Yu Inap Long Mekim Wok Insait Long Kongrigesen?
“God wanpela tasol i save mekim mipela inap long dispela wok.”—2 KORIN 3:5.
1. Wanem kain ol man i no ken i stap long lain Kristen?
GOD JEHOVA na Krais Jisas i man bilong wok. Jisas i tok: “Papa bilong mi em i save wok oltaim i kam inap long nau. Na mi tu mi save wok.” (Jon 5:17) God i no save amamas long ol man i no laik wok; na em i no save amamas long ol man i laik kisim wanpela wok bambai ol i ken kisim bikpela strong bilong bosim ol man. Ol man i les long mekim wok na ol man i laik kisim bikpela wok bilong litimapim nem bilong ol yet, ol i no ken i stap long lain Kristen.—Matyu 20:25-27; 2 Tesalonaika 3:10.
2. Olsem wanem na long nau yumi sot long ol man bilong kisim wok insait long ol kongrigesen?
2 Ol Witnes Bilong Jehova i gat planti wok long “wok bilong Bikpela,” na ol i mas wok strong moa long mekim long nau, long wanem, planti planti man i wok long i kam long “maunten” bilong lotu i tru. (1 Korin 15:58; Aisaia 2:2-4) Yumi sot tru long ol man bilong kisim wok bilong lukautim ol kongrigesen, em ol man i stap strong long ol samting bilong spirit na ol inap mekim dispela wok. Ol dispela kain man i no tingting long litimapim nem bilong ol yet na ol i laik kisim dispela wok. Nogat. Ol i save litimapim nem bilong Jehova. (Sindaun 8:13) Ol i save, God i save helpim ol bambai ol inap long mekim dispela wok insait long kongrigesen, wankain olsem God i save mekim ol “wokman bilong nupela kontrak” ol inap long wok.—2 Korin 3:4-6.
3. Ol elda na ol wokman bilong kongrigesen i gat wanem ol wok?
3 Long nau wankain samting i kamap olsem long taim bilong ol Kristen bilong pastaim. Long rot bilong spirit holi na pasin Jehova i bin kamapim insait long oganaisesen bilong em, ol i save makim ol man bilong kamap elda o wokman bilong kongrigesen. (Aposel 20:28; Filipai 1:1; Taitus 1:5) Ol elda i stap olsem wasman bilong ol sipsip bilong God na ol i gat wok long lukautim ol long ol samting bilong spirit. Ol wokman bilong kongrigesen i helpim ol, tasol ol wokman i save lukautim ol wok i no wok tru bilong was long ol sipsip long samting bilong spirit. (1 Pita 5:2; skelim wantaim Aposel 6:1-6.) Pikinini Bilong God i bin kam long graun bilong helpim ol man, na olsem tasol ol wasman na wokman bilong kongrigesen i laik mekim ol wok bilong helpim ol wanlotu bilong ol. (Mak 10:45) Sapos yu wanpela man Kristen, yu gat dispela laik?
Ol i Mas Winim Wankain Mak
4. Wanem ol hap bilong Baibel i kolim ol mak ol brata i mas winim bambai ol inap kisim wok insait long kongrigesen?
4 Long 1 Timoti 3:1-10, 12, 13 na Taitus 1:5-9, aposel Pol i kolim klia ol mak ol brata i mas winim bambai ol inap kamap elda o wokman bilong kongrigesen. Sampela mak em i kolim i wankain bilong elda na wokman tu wantaim. Tasol taim yumi skelim ol dispela gutpela pasin em man i mas kisim bambai em inap kamap elda o wokman bilong kongrigesen, yumi no ken bihainim tingting bilong ol man bilong dispela graun. Yumi mas bihainim tingting bilong ol Kristen bilong pastaim na lain bilong Jehova long nau. Bilong inapim ol dispela mak, i no olsem brata i no ken popaia liklik. Olsem bai i no gat wanpela man inap winim ol dispela mak. (1 Jon 1:8) Sapos yu wanpela man Kristen, maski nau yu holim ol wok insait long kongrigesen o nogat, gutpela sapos yu skelim pasin bilong yu yet—yu inapim ol dispela mak o nogat?
5. Wanem insait bilong dispela tok “bihainim ol stretpela pasin tasol”?
5 Bihainim ol stretpela pasin tasol; i gat gutpela nem namel long ol man ausait; i no gat rong long ai bilong ol manmeri. (1 Timoti 3:2, 7, 8, 10; Taitus 1:6, 7) Taim brata i kamap elda o wokman bilong kongrigesen na taim em i mekim dispela wok, em i mas bihainim ol stretpela pasin tasol, olsem em i no gat asua long wanpela samting nogut bai ol man i ken kotim em long en. Sapos “ol giaman brata” o narapela man i sutim tok giaman long em, em i no gat asua. Sapos ol man i sutim nating tok long wanpela elda o wokman long liklik samting, i no gat as bilong pinisim em long wok. Ol man i mas kamapim klia olsem em i gat asua long kalapim lo bilong Baibel na bai i gat as bilong pinisim em long wok. (2 Korin 11:26; 1 Timoti 5:19) Man i kisim wok insait long kongrigesen em i mas “i gat gutpela nem namel long ol man i stap ausait long [kongrigesen], . . . Sapos em i no gat gutpela nem, orait inap ol man i tok nogut long em na bai umben bilong Satan i kisim em.” Sapos bipo wanpela man i bin mekim wanpela bikpela rong, orait em i mas wet inap long taim sem bilong dispela rong em i bin mekim i pinis na em i kisim gen gutpela nem, na bai em i ken kisim wok gen insait long kongrigesen.
6. Wanem insait bilong dispela tok ‘i stap man bilong wanpela meri tasol’?
6 Man bilong wanpela meri tasol. (1 Timoti 3:2, 12; Taitus 1:6) I no olsem ol man marit tasol inap kamap wokman bilong kongrigesen o elda. Nogat. Tasol sapos man i marit, orait em i mas i gat wanpela meri tasol i stap laip, na em i mas i stap gut long meri bilong em. (Hibru 13:4) Planti man ausait long lain Kristen long taim bilong ol aposel ol i maritim planti meri, tasol Kristen i no ken bihainim dispela pasin.a
7. (a) Man i mas winim bikpela krismas bambai em inap kisim wok elda o olsem wanem? (b) Man i mas mekim wanem na yumi ken tok em i bosim gut meri pikinini bilong em?
7 Bosim gut meri pikinini bilong em yet, na mekim ol pikinini i harim gut tok bilong em na i bihainim. (1 Timoti 3:4, 5, 12; Taitus 1:6) Sampela i ting olsem brata i mas winim 30 krismas pastaim na bai em i ken holim wok elda, tasol Baibel i no kolim hamas krismas wasman i mas winim. Tasol brata i kisim wok elda em i mas i stap olsem ‘olpela’ man long ol samting bilong spirit. Ol wokman bilong kongrigesen na ol elda i mas i gat bikpela krismas inap long ol i marit na kamapim pikinini. Sapos brata i marit na em i mekim gutpela pasin long ai bilong kongrigesen na long ples wok samting, tasol insait long famili em i mekim hatpela pasin, em i no inap long kamap elda o wokman bilong kongrigesen. Em i mas kisim gutpela nem pastaim long bihainim ol lo bilong Baibel na bosim gut meri pikinini, na bai em i ken kisim dispela wok. Na em i mas tingting long helpim olgeta wan wan long famili bambai ol i kamap gutpela long spirit. Sapos elda i marit na em i gat pikinini, orait ol liklik pikinini bilong em i mas bihainim gutpela pasin na “bilip.” Ol i mas wok long kamap strong long spirit, o ol i mas baptais pinis na stap Witnes Bilong Jehova. Sapos man i no inap helpim ol pikinini bilong em long kisim bilip, ating bai em i no inap helpim ol narapela man long kisim.
8. Man i marit na em i gat pikinini, em i mas lain long mekim wanem pastaim na bai em i ken kamap elda?
8 Man i marit na em i gat pikinini, em i mas lain long bosim gut meri pikinini bilong em pastaim, na bai em inap holim wok wasman na lukautim kongrigesen. “Man i no inap bosim meri pikinini bilong em yet, em i no inap kisim wok bilong lukautim [kongrigesen] bilong God.” (1 Timoti 3:5) Tru, ating meri bilong em i no bilip na meri i birua long lotu bilong em. (Matyu 10:36; Luk 12:52) O ating wanpela pikinini bilong em i mekim bikpela rong, maski ol narapela pikinini i wok long kamap strong long spirit. Tasol sapos brata i bin wok strong inap long skel bilong em, na em i bin helpim ol narapela insait long famili long kamap strong long spirit, maski wanpela i sakim tok bilong em na gutpela wok em i bin mekim bilong soim rot long ol, i no olsem em i no inap kamap wokman bilong kongrigesen o elda.
9. Elda na wokman bilong kongrigesen i mas was gut olsem wanem long bia na wain samting?
9 Em i no ken spak na pait o dring planti. (1 Timoti 3:3, 8; Taitus 1:7) Wokman bilong kongrigesen o elda em i no ken dring spak. Em i no ken dring planti wain o bia o strongpela dring. Sapos em i kamap man bilong dring oltaim, bai em i no inap bosim tingting na bel bilong em, na bai em i belhat kwik na pait nabaut. Em i no ken “dring planti wain” o kisim nem olsem man bilong dring. (Sindaun 23:20, 21, 29-35) Nogut em i go lukim wanpela brata bilong strongim em long spirit na em i dring planti na nau em i no inap helpim dispela brata! Sapos brata i save kisim liklik dring long wan wan taim, em i no ken dring taim em i gat wok long miting, o em i autim tok, o em i mekim narapela wok bilong God.—Wok Pris 10:8-11; Esekiel 44:21.
10. Ol man i laikim tumas mani o ol i mangal long kisim planti mani samting, bilong wanem ol i no inap long kisim wok elda o kamap wokman bilong kongrigesen?
10 No ken laikim tumas long kisim planti mani samting. (1 Timoti 3:3, 8; Taitus 1:7) Ol man i laikim tumas mani ol inap bagarap long spirit, na “ol man i save mangal” ol i no inap i go insait long Kingdom bilong God. Olsem na ol dispela kain man i no inap kisim wok elda o kamap wokman bilong kongrigesen. (1 Korin 6:9, 10; 1 Timoti 6:9, 10) Tupela hap tok Grik ol i tanim olsem “planti mani samting” i makim olgeta kain gutpela samting bilong skin em man i laik kisim bilong helpim em yet na em i kisim long rot i no stret. (Filipai 1:21; 3:4-8) Sapos man i gat dispela kain pasin, ating bai em i tingting long helpim em yet na em bai mekim pasin i no stret long “ol sipsip” bilong God, olsem na em i no inap long kisim wok bilong lukautim kongrigesen. (Esekiel 34:7-10; Aposel 20:33-35; Jut 16) Ol elda i mas tingting gut taim ol i skelim ol brata, bai ol inap kamap elda o wokman bilong kongrigesen o nogat, long wanem, taim brata i kisim pinis kain wok olsem, ating em i mas lukautim sampela mani na nogut em i stilim sampela.—Jon 12:4-6.
11. Bilong wanem ol i no ken putim kwik nem bilong “nupela Kristen” bilong kisim wok insait long kongrigesen?
11 Nupela Kristen, nogat; traim wok bilong em pastaim. (1 Timoti 3:6, 10) Sapos nau tasol man i bin kisim baptais, em i no bin kamapim klia yet olsem em inap i stap gut long wok na em inap lukautim gut wok ol i givim long em. Ating em i no lain yet long sori long ol man i gat sik o hevi, o em i sot long gutpela save na tingting bilong helpim ol wanlotu bilong em, o ating em i save daunim ol narapela na em i ting em i winim ol. Olsem na ol i no ken putim kwik nem bilong em bilong kamap wanpela wokman bilong kongrigesen, na ol i no ken tru putim kwik nem bilong em bilong kisim wok elda; ol i mas “traim wok” bilong em pastaim. Na em i mas kamapim klia olsem em inap skelim gut ol samting na stap gut long wok. Baibel i no kolim hamas mun o yia ol i mas “traim wok” bilong em. Nogat. Sampela man i kamap strong long spirit kwiktaim, na sampela nogat. Tasol ol elda i no ken kirap kwik na tok wanpela nupela Kristen inap kisim wok, “nogut em i ting em i gutpela man tru na i bikhet, na God i kotim em olsem em i bin kotim Satan.” Pastaim dispela man i mas kamapim klia olsem em i gat pasin daun kain olsem bilong Krais.—Filipai 2:5-8.
Ol Mak Bilong Ol Wokman Bilong Kongrigesen
12. Ol mak Baibel i kolim bilong man i laik kamap wokman bilong kongrigesen, wokman tasol i mas winim ol dispela mak?
12 Baibel i kolim sampela wok ol man Kristen i mas winim bambai ol inap kamap wokman bilong kongrigesen. Tasol ol elda tu i mas winim ol dispela mak; sapos nogat, bai ol i no inap long holim wok elda. Olsem wanem? Yu wanpela man Kristen? Yu winim ol dispela mak?
13. Wanem insait bilong dispela tok “tingting stret”?
13 Tingting stret. (1 Timoti 3:8) Man em inap kamap wokman bilong kongrigesen em i no ting wok bilong em i samting nating; em i mas tingting stret long wok bilong em. Em i mas bihainim stretpela tingting, na bai ol man i harim gut tok bilong em. Sapos sampela taim em i mekim tok pani, i no gat rong long dispela; tasol nogut em i mekim pani long olgeta taim. Sapos olsem, em i no tingting stret na em i no inap long kisim wok.
14. (a) Man i no gat tupela maus, em i no save mekim wanem? (b) Man i mas mekim wanem na bel bilong em bai i stap stret long ai bilong God?
14 No gat tupela maus; no gat asua long ai bilong God. (1 Timoti 3:8, 9) Ol wokman bilong kongrigesen (na ol elda) ol i mas mekim tok tru tasol. Ol i no ken toktok nabaut long pasin bilong narapela man, olsem mekim tok baksait, na ol i no ken giaman. Ol i no ken i stap man bilong tupela maus, olsem na ol i no ken mekim wanpela tok long wanpela man na mekim narapela kain tok olgeta long narapela man. (Sindaun 3:32; Jems 3:17) Ol dispela man i mas holimpas ol tok i tru God i kamapim pinis long ol man; ol i mas “save olsem ol i no gat asua long ai bilong God, na ol i mas holim strong dispela tok tru God i bin soim long yumi ol man i bilip long em.” Long ai bilong God, bel bilong kain man olsem i mas i stap stret, na long bel em i mas save, em i bin mekim stretpela pasin na em i no save mekim ol kain pasin nogut ol man i save hait na mekim. (Rom 9:1; 2 Korin 1:12; 4:2; 7:1) Man i mas holimpas ol tok i tru na ol lo bilong God bambai em inap long mekim wok bilong lukautim ol sipsip bilong God.
Ol Mak Bilong Ol Elda
15. Nau yumi laik skelim mak bilong wanem lain? Ol dispela mak i bilong wanem wok stret bilong ol?
15 Sampela mak i bilong ol elda i mas winim, long wanem ol dispela mak i bilong wok wasman na wok tisa bilong ol elda. Olsem wanem? Yu wanpela man Kristen? Yu inapim ol dispela mak?
16. (a) Elda i mas mekim wanem na bai em i sindaun gut? (b) Olsem wanem elda inap bosim gut laip bilong em?
16 Sindaun gut; bosim gut laip bilong em yet. (1 Timoti 3:2; Taitus 1:8) Elda i mas bosim gut skin, nogut sampela pasin nogut i olsem i kalabusim em. Taim hevi na traim i painim em, God bai helpim em long bihainim stretpela tingting sapos em i mekim beten wankain olsem wanpela man bilong raitim song, em i tok: “Yu tekewe olgeta bel hevi bilong mi, na bel bilong mi i ken stap isi. Yu helpim mi na ol hevi i no ken daunim mi.” (Buk Song 25:17) Na wasman i mas beten askim God long givim spirit holi long em na em i mas wok long bihainim ol gutpela pasin em spirit holi i save kirapim ol man long bihainim, olsem pasin bilong daunim laik bilong olpela bel. (Luk 11:13; Galesia 5:22, 23) Sapos elda i bosim gut tingting, na toktok, na pasin em i mekim, bai em i no ken strong tumas long wanpela samting, na bai em inap soim gut rot long kongrigesen long ol samting bilong spirit.
17. Elda i mas mekim wanem na bai i olsem em i tingting stret?
17 Bihainim ol gutpela tingting tasol. (1 Timoti 3:2) Elda i mas tingting gut long gutpela rot bilong mekim ol samting, na em i mas i gat gutpela tingting na save. Em i no ken mekim tok kranki o pasin kranki; em i mas tingting gut na mekim ol gutpela tok na pasin. Em i no ken ting olsem em i winim ol narapela; em i save tingting stret, long wanem, save i kam long God na olgeta tok bilong God long Baibel i as bilong tingting bilong em. Em i mas stadi gut long Baibel na lainim gut ol tok bilong en.—Rom 12:3; Taitus 2:1.
18. Elda i mas mekim wanem na bai em i mekim ol gutpela pasin?
18 Mekim ol gutpela pasin. (1 Timoti 3:2) Hap tok Grik ol i tanim olsem “mekim ol gutpela pasin” em yumi ken tanim tu olsem “stretim gut.” Olsem na elda i mas stretim gut ol wok em i save mekim; em i mas makim taim bilong mekim ol dispela wok. Em i mas mekim ol samting stret long taim. Olsem bai em i no kam bihaintaim long miting o mekim ol wok bihaintaim. Ol Kristen bilong pastaim i no mekim bikpela wok long raitim ol ripot samting bilong wok, na long nau tu, i no olsem wasman i mas i stap saveman tru long wok bilong raitim ol ripot long mani bilong kongrigesen o long mekim wok kuskus samting. Nogat. Ating ol wokman bilong kongrigesen i ken lukautim ol dispela wok insait long kongrigesen. Tasol dispela hap tok Grik i makim tu olsem wasman i mas “mekim ol gutpela pasin,” olsem na wasman i no ken mekim nabaut; em i mas bihainim gut ol lo na bihainim stret taim bilong mekim ol wok.—1 Tesalonaika 5:14; 2 Tesalonaika 3:6-12; Taitus 1:10.
19. Elda i save kisim ol man i kam long haus bilong em na lukautim ol gut na dispela i kirapim em long mekim wanem?
19 Lukautim gut ol man i kam long haus. (1 Timoti 3:2; Taitus 1:8) Elda i save singautim ol man i go long haus bilong em na “lukautim ol gut.” (Rom 12:13; Hibru 13:2) Insait tru bilong hap tok Grik ol i tanim olsem “lukautim gut ol man i kam long haus” em olsem: “Laikim ol man bilong narapela ples,” olsem ol man yu no save long ol. Olsem na elda i save bihainim gutpela pasin olsem—em i save amamas long ol nupela man i kam long ol miting Kristen na em i save sekanim ol. Maski ol i rabisman, em i save tingim gut ol wankain olsem em i mekim long ol man i gat planti samting. Em i save mekim gut long ol brata i raun bilong helpim wok Kristen. Em i save singautim ol i kam i stap long haus bilong em na taim ol i laik wokabaut moa long rot bilong ol, em i “helpim ol inap long laik bilong God yet.” (3 Jon 5-8) Tru tumas, elda i save helpim ol wanlotu bilong em long ol samting ol i sot long en, inap long skel bilong em.—Jems 2:14-17.
20. Elda i mas inap long mekim wanem na bai em inap long skulim ol manmeri?
20 Save gut long pasin bilong skulim ol manmeri. (1 Timoti 3:2) Elda i mas save gut long skulim ol manmeri long ol samting bilong God. Tasol i no olsem em i smatpela man o em i gat bikpela save bilong dispela graun na long dispela as em inap skulim gut ol manmeri. Nogat. (1 Korin 2:1-5, 13) Em inap mekim gut dispela wok, long wanem, em i “holim strong dispela tok tru ol i bin skulim em long en. Olsem na em bai inap long skulim ol manmeri long olgeta tok tru ol i mas bilip long en, na em bai inap long kirapim bel bilong ol long bihainim dispela tok. Na em bai inap long tok strong long ol man bilong sakim tok, bai ol i pilim tru rong bilong ol.” (Taitus 1:9; skelim tu Aposel 20:18-21, 26, 27.) Em i mas save gut long pasin bilong “wok isi na stretim tingting bilong ol man bilong sakim tok.” (2 Timoti 2:23-26) Maski elda i no win tru long mekim gut ol tok long kongrigesen, tasol em i mas stadi gut long ol tok bilong God long Baibel bambai em inap skulim gut na givim gutpela tingting long ol wanlotu bilong em, em ol tu i save stadi gut long Baibel. (2 Korin 11:6) Em i mas inap long givim “olgeta tok bilong God” long ol famili na long ol man wan wan bilong helpim ol long bihainim tru ol pasin God i laikim.—Taitus 2:1-10.
21. (a) Olsem wanem yumi ken tok, elda i no man bilong paitim ol man? (b) Olsem wanem em i “isi” long ol man? (c) Olsem wanem em i no man bilong kirapim pait?
21 No ken belhat kwik na pait long ol narapela man; mas isi long ol. (1 Timoti 3:3; Taitus 1:7) Elda em i man bilong pasin isi, olsem na em i no save paitim tru ol man long han samting, na em i no save paitim ol long maus bilong em, olsem givim hatpela tok long ol o mekim tok nogut long ol. (Lukim 2 Korin 11:20.) (Pastaim dispela ves i tok, “em i no ken spak,” olsem na elda i no save dring planti na spak, em dispela pasin i save kirapim pait.) Em i save “isi” long ol man, olsem na em i no save bosim ol strong tumas o strong long ol i mas bihainim laik bilong em tasol; em i no save kros kros long ol liklik samting. (1 Korin 9:12; Filipai 4:5; 1 Pita 2:18) Elda i no save paitim ol man nabaut o kirapim pait; em i save klia long pasin bilong tok pait. “Em i no ken belhat kwik.”—Taitus 3:2; Jems 1:19, 20.
22. Elda i no ken ‘bihainim laik bilong em tasol’ na dispela i makim olsem em i mas bihainim wanem kain pasin?
22 Em i no ken ting em i gat biknem na em i bosim nabaut ol manmeri. (Taitus 1:7) Insait bilong hap tok Grik ol i kisim dispela tok long en i olsem “bihainim laik bilong [em] tasol.” (Lukim 2 Pita 2:10.) Elda i no ken ting tok bilong em tasol i stret na olgeta man i mas bihainim tok na tingting bilong em tasol. Nogat. Em i mas i gat pasin daun na em i mas save, sampela ol i gat gutpela save winim bilong em. Em i no ken ting em tasol em inap bosim gut ol wok, winim ol narapela. Em i mas bihainim pasin daun na wok gut wantaim ol narapela long bosim ol wok. Em i save, sapos i gat planti man bilong givim tingting long ol, bai wok i kamap gutpela.—Namba 11:26-29; Sindaun 11:14; Rom 12:3, 16.
23. (a) Man i “laikim olgeta gutpela pasin” em i wanem kain man? (b) Stretpela man em i wanem kain man?
23 Laikim olgeta gutpela pasin; bihainim ol stretpela pasin. (Taitus 1:8) Man i mas laikim tumas olgeta gutpela pasin na bihainim ol stretpela pasin bambai em inap kamap elda. Man i laikim olgeta gutpela pasin, em i laikim olgeta pasin i gutpela long ai bilong Jehova, na em i save mekim ol gutpela pasin bilong helpim ol narapela man, na em i pilim gutpela pasin ol i mekim. (Luk 6:35; lukim tu Aposel 9:36, 39; 1 Timoti 5:9, 10.) Em i stretpela man—em i save bihainim olgeta lo na olgeta tok bilong God. Dispela kain man i no save bihainim pasin wantok; em i save mekim stretpela pasin long olgeta man. Na em i save tingting tasol long ol stretpela pasin, na ol klinpela pasin, na olgeta pasin i nambawan tru. (Luk 1:6; Filipai 4:8, 9; Jems 2:1-9) Gutpela pasin i narapela kain long stretpela pasin, long wanem, man i mekim stretpela pasin em i mekim pasin i stret olsem lo i makim, tasol man i laikim tumas gutpela pasin em i save mekim gutpela pasin tru long ol narapela man, winim mak em lo i kolim.—Matyu 20:4, 13-15; Rom 5:7.
24. Man i stap gut long God em i mas mekim wanem?
24 Bihainim olgeta pasin bilong God. (Taitus 1:8) Man em inap long holim wok elda em i save stap gut tru long God na bihainim olgeta lo bilong God, maski wanem kain traim i painim em long dispela. Em i mekim olgeta samting God i laik bai em i mekim, na em i stap gut tu long wok bilong autim tok bilong Kingdom.—Matyu 24:14; Luk 1:74, 75; Aposel 5:29; 1 Tesalonaika 2:10.
Inapim Ol Mak
25. Husat i mas bihainim ol dispela mak yumi kolim pinis? Olsem wanem ol i ken inapim ol kain mak olsem?
25 Planti mak yumi kolim pinis em olgeta Witnes Bilong Jehova i mas bihainim, na ol inap bihainim sapos ol i stadi, na wok strong, na bung wantaim ol gutpela poroman, na beten, na Jehova i mekim gut long ol long dispela rot. Tru ol brata sista wan wan, ating bai ol inapim gut sampela mak na sampela ol i no inapim gut. Tasol ol wokman bilong kongrigesen na ol elda i mas inapim gut olgeta mak bilong wok ol i holim.
26. I gat wanem as na ol man Kristen i laik kisim wok insait long kongrigesen?
26 Olgeta Witnes Bilong Jehova i mas i gat laik long givim bel olgeta long mekim wok bilong God. Dispela kain laik i kirapim bel bilong ol man Kristen na ol i laik tru long kisim wok insait long kongrigesen; ol i no save painim rot bilong abrusim dispela wok. Olsem wanem? Yu wanpela man Kristen na yu dediket na baptais pinis? Orait, yu mas wok strong bambai yu inap long kisim wok insait long kongrigesen!
[Ol Futnot]
a Lukim Wastaua Ogas 1, 1978, pes 13, par. 24-39.
Bai Yu Bekim Wanem Tok?
◻ Olsem wanem na nau yumi sot long ol man bilong kisim wok insait long kongrigesen, em ol man i baptais pinis?
◻ Wanem sampela mak ol wokman bilong kongrigesen i mas winim?
◻ Wanem sampela mak ol elda i mas winim?
◻ Bilong wanem elda i mas save long pasin bilong bosim gut meri pikinini bilong em?
◻ Wanem samting i kirapim bel bilong ol man Kristen na ol i laik tru long kisim wok insait long kongrigesen?
[Piksa long pes 18, 19]
Ol elda na wokman bilong kongrigesen i mas bihainim ol lo bilong Baibel na bosim gut meri pikinini bilong ol