Yu Kaikai Long Tebol Bilong Husat?
“I no inap yupela i kaikai long tebol bilong Bikpela na long tebol bilong ol spirit nogut tu.”—1 KORIN 10:21.
DISPELA tok God i kirapim aposel Pol long raitim em i tok bokis long tupela tebol, na olgeta man i kaikai long wanpela bilong tupela. Kaikai i stap long tebol i makim em i tebol bilong husat. Sapos yumi laik bai God i orait long yumi, yumi no ken kaikai long tebol bilong em na long wankain taim kisim liklik kaikai long tebol bilong ol spirit nogut. Pol i toksave olsem: “Samting ol haiden i save ofaim, em ‘ol i ofaim long ol spirit nogut. Ol i no ofaim long God.’ Na mi no laik bai yupela i bung wantaim ol spirit nogut. I no inap yupela i dring long kap bilong Bikpela na long kap bilong ol spirit nogut tu. Na i no inap yupela i kaikai long tebol bilong Bikpela na long tebol bilong ol spirit nogut tu.”—1 Korin 10:20, 21.
2 Dispela tok i kirapim yumi long tingim ol ofa bilong kamap wanbel wantaim God, em Lo bilong God i tok ol Israel i mas mekim. Alta bilong God i olsem tebol, na man i kisim abus i kam bilong mekim ofa, em i bung wantaim Jehova na ol pris. Dispela i kamap olsem wanem? (1) Jehova i insait long dispela, long wanem, ol i tromoi blut long alta bilong em, na kukim gris bilong abus long paia aninit. Na (2) i gat hap abus bilong ofa bilong pris (wantaim famili bilong em)—ol i kaikai mit bilong bros na lek sut ol i kukim long paia. Na (3) man i mekim ofa, em i kaikai ol narapela hap abus. (Wok Pris 7:11-36) Bilong kaikai long tebol bilong Jehova long nau, yumi mas lotu long Jehova long pasin em i laikim, olsem Jisas na ol aposel i makim. Na bilong mekim olsem, yumi mas kisim ol kaikai bilong spirit, em Jehova i givim long yumi long rot bilong Baibel na oganaisesen bilong em. Ol Israel i kaikai wantaim Jehova long tebol bilong em, na em i tambuim ol long mekim ofa long ol spirit nogut na kaikai long tebol bilong ol. Dispela tambu i stap long ol Israel bilong spirit na lain “arapela sipsip.”—Jon 10:16.
3 Olsem wanem yumi inap kaikai long tebol bilong ol spirit nogut long nau? Sapos yumi helpim wok bilong ol samting i birua long Jehova bai yumi gat asua long dispela. Yumi mas sakim olgeta tok gris bilong ol spirit nogut em bilong giamanim yumi na pulim yumi long lusim Jehova. Yumi no laik kisim dispela kain “kaikai” i olsem marasin nogut, a? Ol Kristen tru i no save mekim ofa long god bilong pait na god bilong mani, olsem planti man long nau i mekim.—Matyu 6:24.
Klia Long “Tebol Bilong Ol Spirit Nogut”
4 Yumi olgeta i mas tingim askim olsem: Mi kaikai long tebol bilong husat? I gat tupela tebol tasol na sapos yumi no kaikai long tebol bilong Jehova, yumi kaikai long tebol bilong ol spirit nogut. (Lukim Matyu 12:30.) Sapos yumi save em tebol bilong ol spirit nogut, yumi no laik kaikai long en, a? Sapos yumi kaikai long en, bai God tru, Jehova, i no ken orait long yumi. Tasol sapos yumi kaikai long tebol bilong Jehova tasol, bai yumi inap i stap oltaim na i stap amamas! (Jon 17:3) Sapos yu laik bai skin na tingting bilong yu i stap gutpela, yu mas was gut long kaikai yu kisim. Sapos yu kisim ol rabis kaikai i gat bikpela gris, maski i gat marasin long en bilong mekim swit long maus, em i no inap helpim skin long i stap gutpela. Na olsem tasol, ol tok gris bilong dispela graun, em tingting bilong ol spirit nogut i stap long en, em bai bagarapim tingting bilong yumi.
5 Aposel Pol i tok, long taim bilong las de “tok bilong . . . ol spirit nogut” bai paulim ol man. (1 Timoti 4:1) Ol i kamapim dispela tok long rot bilong ol bilip kranki bilong ol lotu giaman, na long ol narapela rot tu. Olsem na yumi mas was gut long ol buk na nius yumi kaunim, na ol piksa yumi na ol pikinini bilong yumi i lukim long televisen o long haus piksa. (Sindaun 14:15) Olsem wanem? Yu save kaunim ol stori nating bilong malolo na painim amamas? Em ol stori long man i bagarapim nating narapela man, o pamuk, o mekim wok marila samting? O yu save kaunim buk i kamapim giaman save bilong ol man o pasin i “no save bihainim tingting bilong Krais”? (Kolosi 2:8) O buk i kamapim tingting nating bilong ol man o i kirapim yu long insait long sampela wok bilong graun bilong helpim ol man? O buk i kirapim laik long kisim planti mani samting? (1 Timoti 6:9) O buk i wok hait long kamapim sampela tok em inap brukim lain na i no tok bilong Krais? Sapos yumi Yesa long wanpela askim hia na yumi wok yet long kaunim dispela kain buk o lukim dispela kain piksa, bai yumi kaikai long tebol bilong ol spirit nogut. Long nau i gat planti handet tausen buk i kamapim giaman save bilong ol man na ol inap paulim yumi, na bai yumi ting ol i kamapim gutpela nupela save. (Saveman 12:12) Tasol ol dispela kain tok gris bilong pulim yumi i no nupela; na i no helpim yumi long i stap gutpela, olsem tok giaman Satan i mekim long Iv i no bin helpim em.—2 Korin 11:3.
6 Olsem na taim Satan i laik pulim yumi long traim rabis kaikai bilong em, yumi mas mekim wanem? Yumi mas mekim olsem Jisas i bin mekim. Taim Satan i traim em na tokim em long mekim ol ston i kamap bret, Jisas i tok: “Buk bilong God i gat tok olsem, ‘Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.’ ” Na taim Satan i tok long givim “olgeta strongpela kantri” bilong graun long Jisas sapos em i brukim skru na lotu long em, Jisas i tok: “Satan, yu klia. Buk bilong God i tok, ‘Yu mas aninit long God, [na] . . . lotu long em wanpela tasol.’ ”—Matyu 4:3, 4, 8-10.
7 I no inap yumi kisim kaikai long tebol bilong Jehova na long tebol bilong ol spirit nogut tu! Bipo sampela i laik mekim olsem. Tingim ol Israel long taim bilong profet Elaija. Ol i tok ol i lotuim Jehova, tasol ol i ting ol narapela god, olsem Bal, ol inap helpim ol long kisim gutpela sindaun. Elaija i tokim ol: “Yupela manmeri bilong tupela tingting, wanem taim bai yupela i gat wanpela tingting tasol? Sapos [Jehova] em i God tru, orait yupela i mas lotu long em wanpela tasol. Na sapos Bal i God tru, orait yupela i mas lotu long em wanpela tasol.” I olsem ol Israel i wokabaut long wanpela lek, na bihain long narapela lek. (1 King 18:21) Elaija i tokim ol pris bilong Bal long soim ol man, god bilong ol em i God tru. Em i tok, wanem God i salim paia i kam na kukim ofa, em i God tru. Ol pris bilong Bal i wok strong, tasol nogat. Bihain Elaija i tok tasol: “[Jehova], harim beten bilong mi na mekim olsem mi askim yu, na bai dispela ol manmeri i ken save, yu tasol yu God tru.” Wantu Jehova i salim paia i kam kukim ofa i gat bikpela wara long en. Dispela i kamapim klia olsem Jehova em i God tru, olsem na ol manmeri i bihainim tok bilong Elaija na kilim olgeta 450 profet bilong Bal. (1 King 18:24-40) Olsem tasol long nau, yumi mas save Jehova em i God tru, na sapos yumi no mekim yet, yumi mas i go na kisim kaikai long tebol bilong em tasol.
‘Gutpela Wokboi’ i Putim Kaikai Long Tebol Bilong Jehova
8 Bikpela Krais Jisas i tok profet olsem, taim em i kam bek na i stap, wanpela wokboi ‘i gat gutpela tingting, na i save mekim gut wok bilong en,’ em bai givim kaikai bilong spirit long ol disaipel. Jisas i tok, dispela wokboi i ken amamas taim bikman i kam bek na lukim em i stap mekim wok bilong em; bikman bai makim em “bilong bosim olgeta samting bilong en.” (Matyu 24:45-47) Ol samting i bin kamap i makim olsem dispela wokboi i no wanpela man tasol; em wanpela lain man, olsem ol Kristen i dediket na God i makim ol. Dispela lain i bin putim gutpela kaikai bilong spirit long tebol bilong Jehova, na lain remnan wantaim bikpela lain i kisim. Bikpela lain, winim 4 milion, ol i wok wantaim lain remnan long litimapim wok king bilong Jehova na Kingdom bilong em, em rot bilong em long mekim holi nem bilong em.—KTH 7:9-17.
9 Lain ‘gutpela wokboi’ i bin mekim wok long Sosaiti Was Taua olsem rot bilong givim kaikai bilong spirit long olgeta Witnes Bilong Jehova. Ol misin i gat nem Kristen na ol narapela lain bilong graun long nau ol i hangre tru—ol i lus olgeta long dispela kaikai bilong spirit em inap givim laip long ol, em ol Witnes Bilong Jehova i kisim planti long nau. (Amos 8:11) Dispela i truim tok profet bilong Aisaia 25:6: “Long maunten Saion, Bikpela I Gat Olgeta Strong bai i redim bikpela kaikai tru. Bai i gat planti gutpela gutpela abus na nambawan wain tru bilong dring.” Na Aisaia 25 ves 7 na 8 i makim olsem ol bai kisim bikpela kaikai olsem inap long olgeta taim bihain. Jehova i mekim gut tru long lain bilong em long graun long nau, na em bai mekim olsem long bihain tu!
Lukaut Long Kaikai Nogut Long Tebol Bilong Ol Spirit Nogut
10 Kaikai long tebol bilong ol spirit nogut i gat marasin bilong kilim man i dai. Lain wokboi nogut na ol man i lusim lotu i tru na givim baksait long Jehova ol i tilim kaikai long ol man, tasol dispela kaikai i no save strongim man. Em i no gutpela kaikai, long wanem, ol i lusim pinis tebol bilong Jehova. Ol i lusim pinis gutpela pasin ol i kisim bipo. Spirit holi i no kirapim ol long mekim wok, pasin bilong bel nogut i kirapim ol. Ol i tingting tasol long paitim ol wanwok bilong ol bilong bipo, olsem Jisas i tok profet pinis.—Matyu 24:48, 49.
11 Olsem: Long yia 1909, C. T. Russell i stap presiden bilong Sosaiti Was Taua, na long Wastaua (tok Inglis) bilong Oktoba 1, 1909, em i stori long ol man i bin lusim tebol bilong Jehova na ol i wok long mekim nogut long ol wanwok bilong ol long bipo, na em i tok: “Olgeta man i lusim Sosaiti na wok bilong en, dispela i no helpim ol yet long i stap gutpela, na i no strongim bilip bilong ol narapela o helpim ol long bihainim ol gutpela pasin bilong spirit. Dispela i nogutim ol na ol i traim long bagarapim Wok bipo ol i helpim, na wantaim bikpela nois o liklik nois, isi isi ol i pinis. Ol i bagarapim ol yet na ol man i gat wankain pasin bilong bel nogut na toktok planti. . . . Sapos sampela i ting ol inap kisim gutpela kaikai moa long ol narapela tebol, o ol yet inap kamapim gutpela kaikai moa—larim ol i mekim traim. . . . Mipela i save larim ol narapela i go painim kaikai na lait long wanem wanem hap ol yet i laikim, tasol ol dispela man i kamap birua bilong mipela ol i bihainim narapela kain pasin. Ol i no laik tok tasol, ‘Mi painim pinis kaikai mi laikim moa,’ na ol i go. Nogat. Ol i save kros na birua, na mekim nogut long mipela, na bel nogut, na mekim ‘ol pasin bilong olpela bel na bilong Satan’; mipela i no bin lukim ol man bilong graun i mekim kain pasin nogut olsem. I olsem Satan i givim sik longlong long ol. Sampela ol i mekim nogut long mipela na bihain ol i tok, mipela i bin mekim nogut long ol. Bilong daunim mipela, ol i redi long mekim kain kain tok giaman na pasin nogut.”
12 Tru tumas, ol man i givim baksait long Jehova, ol i save raitim ol buk na nius i paulim tok o kamapim tok i giaman liklik o i giaman olgeta. Ol i save sanap ausait long ples kibung bilong ol Witnes, na ol i laik pundaunim man i no was gut. Olsem na nogut yumi laik save long tok bilong ol na yumi kaunim buk bilong ol, o putim yau long tok nogut bilong ol! Ating yumi ting dispela i no inap pundaunim yumi. Tasol yumi mas was gut, long wanem, sampela buk bilong ol i mekim “switpela tok” o “i hait” na kamapim ol tok giaman. (Rom 16:17, 18; 2 Pita 2:3) Kain kaikai olsem i mas i stap long tebol bilong ol spirit nogut, a? Na sampela taim ol i stori long samting i tru, tasol ol i paulim tok bambai ol i ken pulim ol man na ol i lusim tebol bilong Jehova. Ol i sutim tok tasol na bagarapim bilip! No gat liklik tok bilong strongim bilip.
13 Jisas i tok, ‘Yupela lukim pasin bilong ol, na bai yupela i save long ol.’ (Matyu 7:16) Orait, ol dispela man na buk bilong ol i kamapim klia wanem kain pasin? I gat 4-pela pasin i olsem mak bilong tok gris bilong ol. (1) I gat trik. Efesus 4:14 i tok, ol i “save tumas long olgeta pasin bilong trik na giaman.” (2) Ol i hambak long save bilong ol. (3) No gat pasin sori. (4) Kain kain pasin bilong giaman. Ol dispela samting i stap insait long kaikai i stap long tebol bilong ol spirit nogut, na em bilong bagarapim bilip bilong lain bilong Jehova.
14 Na tingim dispela samting tu: Ol man i lusim lotu i tru ol i go bek long wanem samting? Planti ol i go bek insait long tudak bilong ol misin na bihainim gen ol bilip kranki bilong ol, olsem olgeta Kristen bai go long heven. Ol i no strong moa long bihainim Baibel na sakim blut na ol wok bilong graun, na ol i no autim tok bilong Kingdom. Tasol yumi lusim pinis tudak bilong Bikpela Babilon, na yumi no laik insait gen long en. (KTH 18:2, 4) Yumi wokboi bilong Jehova na yumi stap gut long em; yumi no laik save liklik long tok gris bilong ol dispela man i lusim tebol bilong em. Tok bilong ol i olsem ol i “paitim” ol man i bin helpim yumi long kisim “ol dispela gutpela tok.”—2 Timoti 1:13.
15 Ating sampela i laik save long tok ol man i givim baksait long Jehova i save mekim. Tasol yumi mas tingim tok bilong Jehova long Lo 12:30, 31. Long maus bilong Moses em i tokim ol Israel long ol samting ol i mas klia long en taim ol i rausim ol haiden long Graun Bilong Promis. Em i tok: “Yupela i mas was gut na tambu long bihainim ol pasin bilong lotu bilong ol. Nogut yupela i bihainim pasin bilong ol na yupela i dai. Nogut yupela i tok olsem, ‘Ol haiden i save lotu olsem wanem? Bai mipela tu i ken mekim wankain lotu.’ Taim yupela i lotu long God, Bikpela bilong yumi, yupela i no ken mekim wankain pasin olsem ol.” God Jehova i save long pasin bilong ol man, em ol i laik save long ol samting. Tasol yumi mas tingim Iv na meri bilong Lot tu! (Luk 17:32; 1 Timoti 2:14) Yumi no ken putim yau long tok bilong ol dispela man i givim baksait long Jehova, o tingim ol samting ol i mekim. Yumi mas wok long strongim bilip bilong ol narapela na kisim kaikai long tebol bilong Jehova tasol!
Tebol Bilong Jehova Tasol Bai Stap
16 Klostu nau bai taim bilong bikpela hevi tru i kirap, na pait bilong “bikpela de bilong God I Gat Olgeta Strong.” (KTH 16:14, 16) Na bai Jehova i pinisim pasin bilong nau na dispela tebol ol lain bilong graun i kaikai long en. Jehova bai pinisim tu ol spirit nogut, em ol i lain bilong Satan. Ol man i no lusim tebol bilong ol spirit nogut, em tebol bilong Satan, ol i mas i go long wanpela kaikai. Tasol ol yet i no ken kaikai—bai ol i kamap olsem kaikai i stap long tebol—ol bai bagarap olgeta!—Esekiel 39:4; KTH 19:17, 18.
17 Tebol bilong Jehova tasol bai stap. Ol man i amamas long kaikai long en ol bai abrusim bagarap, na bai ol inap kaikai long dispela tebol i go inap long olgeta taim bihain. Bai ol i no sot liklik long kaikai bilong skin o spirit. (Song 67:6; 72:16) Bai ol i stap gutpela olgeta na mekim wok bilong Jehova long Paradais! Gutpela tok bilong Kamapim Tok Hait 21:4 bai kamap tru: “Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” Ol birua tu bai pinis olgeta, olsem na God Jehova wanpela tasol bai bosim olgeta hap na mekim gut oltaim long ol manmeri em i kisim bek ol na ol i stap long Paradais long graun. Bilong kisim ol dispela blesing, yumi olgeta i mas strong long kaikai long tebol bilong Jehova tasol, em ol gutpela kaikai tru bilong spirit i pulap long en!
Bai Yu Bekim Wanem Tok?
◻ Yumi mas mekim wanem na bai tok bilong ol spirit nogut i no giamanim yumi?
◻ Olsem wanem na yumi no inap i stap gutpela sapos yumi kaikai long tebol bilong Jehova na long tebol bilong ol spirit nogut tu?
◻ Ol man i givim baksait long Jehova, ol i tilim wanem kain kaikai long ol man?
◻ Bilong wanem yumi mas was gut, nogut yumi laik save long tok ol dispela man i sutim long lain bilong Jehova?
◻ Wanem ol pasin i makim ol man i givim baksait long Jehova?
[Askim Bilong Stadi]
1. I gat wanem tupela tebol yumi ken kaikai long en? Na Pol i givim wanem toksave long tupela tebol?
2. (a) Long taim bilong ol Israel long bipo, i gat wanem tebol bilong Jehova i stap? Husat ol i kaikai wantaim long ofa bilong kamap wanbel wantaim God? (b) Bilong kaikai long tebol bilong Jehova long nau, yumi mas mekim wanem?
3. Olsem wanem yumi ken klia long tebol bilong ol spirit nogut long nau?
4. Yumi olgeta i mas tingim wanem askim? Sapos yumi save em tebol bilong ol spirit nogut, bilong wanem yumi no laik kaikai long en?
5. Yumi mas mekim wanem na bai yumi klia long tok bilong ol spirit nogut long nau?
6. Taim Satan i laik pulim yumi long traim rabis kaikai bilong em, yumi mas mekim wanem?
7. Sapos yumi ting yumi inap kaikai long tebol bilong Jehova na bilong ol spirit nogut tu na yumi stap gutpela, olsem wanem yumi giamanim yumi yet?
8. Jisas i tok em bai makim wanem wokboi bilong givim kaikai bilong spirit long ol disaipel bilong em long taim em i kam bek na i stap?
9. Lain ‘gutpela wokboi’ i mekim wok long wanem samting olsem rot bilong givim kaikai bilong spirit long ol Witnes Bilong Jehova? Wanpela tok profet i stori olsem wanem long bikpela kaikai ol i kisim?
10. (a) Lain wokboi nogut i tilim wanem kain kaikai long ol man? Wanem samting i kirapim ol long mekim wok? (b) Lain wokboi nogut i mekim wanem long ol wanwok bilong ol bilong bipo?
11. C. T. Russell i tok wanem long ol man i laik painim kaikai bilong spirit long narapela hap? Em i stori olsem wanem long ol man i lusim tebol bilong Jehova?
12. (a) Ol man i lusim lotu i tru na givim baksait long Jehova, ol i “paitim” ol wanwok bilong ol olsem wanem? (b) Bilong wanem yumi mas was gut, nogut yumi laik save long tok bilong ol dispela man na yumi kaikai liklik?
13, 14. Wanem ol pasin i makim ol dispela man i givim baksait long Jehova na tok gris bilong ol?
15. Taim yumi harim tok olsem ol man i givim baksait long Jehova i sutim tok long lain bilong em, wanem tok bilong Baibel i helpim yumi long bihainim savepasin?
16. (a) Klostu nau wanem samting bai painim Satan, na ol spirit nogut, na tebol ol lain bilong graun i kaikai long en? (b) Wanem samting bai painim olgeta manmeri i no bin lusim tebol bilong ol spirit nogut?
17. Ol manmeri i kaikai long tebol bilong Jehova tasol bai ol i kisim wanem ol blesing?
[Piksa long pes 10]
Ol gutpela kaikai tru bilong spirit i pulap long tebol bilong Jehova