Ol Brata—Bihainim Pasin Bilong Holi Spirit na Winim Mak!
“Sapos [man] i bihainim pasin bilong Holi Spirit, orait Holi Spirit bai i kamapim laip long dispela man na em bai i stap gut oltaim oltaim.”—GA. 6:8.
1, 2. Olsem wanem tok bilong Matyu 9:37, 38 i kamap tru? Dispela i mekim na ol kongrigesen i mas i gat wanem samting?
LONG nau yumi lukim planti gutpela samting i kamap, na i go inap long olgeta taim bihain bai yumi no lusim tingting long en! Jisas Krais i bin tok profet long wanpela wok em long nau i wok long go bikpela hariap. Jisas i tok: “Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i salim ol wokman i go bungim kaikai bilong en.” (Mt. 9:37, 38) God Jehova i wok long harim ol kain beten olsem. Long sevis yia bilong 2009, inap 2,031 nupela kongrigesen bilong ol Witnes Bilong Jehova i kamap, olsem na nau long olgeta hap i gat 105,298 kongrigesen. Inap olsem 757 manmeri i kisim baptais long olgeta de!
2 Dispela i mekim na i mas i gat ol brata i winim mak bilong go pas long wok bilong skulim ol manmeri bilong God na mekim wok wasman insait long ol kongrigesen. (Ef. 4:11) I kam inap long nau, Jehova i mekim na i gat ol man i winim mak bilong lukautim ol sipsip bilong em, na yumi bilip olsem em bai wok yet long mekim olsem. Tok profet long Maika 5:5 i kamapim klia olsem long taim bilong las de, lain bilong Jehova bai i gat “ol strongpela lida” bilong lukautim wok.
3. Olsem wanem man inap “bihainim pasin bilong Holi Spirit”?
3 Sapos yu wanpela man Witnes i baptais pinis, wanem samting inap kirapim yu na bai yu gat laik long kisim sampela wok insait long kongrigesen? Wanpela bikpela samting em olsem, yu mas “bihainim pasin bilong Holi Spirit.” (Ga. 6:8) Bilong mekim olsem, wokabaut bilong yu i mas opim rot long holi spirit i stiaim olgeta samting yu mekim long i stap bilong yu. Tingting strong long no ken “bihainim ol laik bilong olpela bel.” No ken larim ol amamas bilong skin na ol samting yu inap mekim long taim bilong malolo i daunim laik bilong yu long taitim bun long mekim wok bilong God. Olgeta Kristen i mas “bihainim pasin bilong Holi Spirit,” na bihain, ol man husat i mekim olsem ating ol bai winim mak bilong holim wok insait long kongrigesen. Long nau i mas i gat planti moa kongrigesen sevan na ol elda, olsem na ol tok bilong dispela stadi i go moa long ol man Kristen. Olsem na mipela i laik kirapim yupela ol brata long beten na tingim gut ol tok bilong dispela stadi.
Wok Strong Long Kisim Wanpela Gutpela Wok
4, 5. (a) I gutpela sapos ol man i baptais pinis i wok strong long kisim wanem ol wok insait long kongrigesen? (b) Olsem wanem man Kristen inap wok long winim mak?
4 Man Kristen i no inap kisim nating wok wasman. Em i mas wok strong long inapim mak bilong mekim dispela “gutpela wok.” (1 Ti. 3:1) Wanpela samting em i mas mekim bilong winim mak, em i mas mekim wok bilong helpim ol wanbilip. (Ritim Aisaia 32:1, 2.) Em i no laik kamap wasman bilong kisim biknem, nogat. Em i gat laik tru long helpim ol arapela.
5 Bilong kamap kongrigesen sevan o elda, man i mas wok strong long winim ol mak em Baibel i kolim. (1 Ti. 3:1-10, 12, 13; Ta. 1:5-9) Sapos yu wanpela man i dediket pinis, askim yu yet: ‘Mi save insait tru long wok autim tok, na mi save helpim ol arapela long mekim olsem? Mi wok long strongim ol wanbilip long rot bilong toktok wantaim ol na tingim gut ol? Mi gat nem olsem man bilong stadi gut long Tok Bilong Baibel? Mi wok long mekim ol bekim bilong mi long ol miting i kamap gutpela moa? Mi save mekim gut ol wok em ol elda i givim mi long mekim?’ (2 Ti. 4:5) Em sampela gutpela askim ol brata i baptais pinis i ken skelim.
6. Wanem narapela rot bilong inapim mak bilong kisim ol wok insait long kongrigesen?
6 Narapela rot bilong inapim mak bilong kisim ol wok insait long kongrigesen Kristen, em long rot bilong askim God long “pulapim Holi Spirit bilong em long bel bilong [yu], na mekim [yu] i stap strong tru.” (Ef. 3:16) Man i no kamap kongrigesen sevan o elda long rot bilong ol arapela i votim em, nogat. Bilong kisim dispela wok, em i mas kamap strong long ol samting bilong spirit. Olsem wanem yu inap kamap strong olsem? Wanpela rot em long “larim Holi Spirit i stiaim wokabaut bilong [yu]” na wok long kisim ol pasin em holi spirit i save kamapim. (Ga. 5:16, 22, 23) Taim yu mekim ol pasin em man i mas i gat bilong mekim sampela wok moa, na yu bihainim ol tok kaunsel yu kisim long olsem wanem yu inap mekim ol dispela pasin i kamap gutpela moa, dispela bai stap ples klia long ai bilong “olgeta manmeri.”—1 Ti. 4:15.
Givim Yu Yet
7. Wanem samting i insait long wok bilong helpim ol arapela?
7 Bilong mekim wok bilong helpim ol arapela, yu mas wok strong na redi long givim yu yet. Ol elda Kristen i olsem wasman bilong ol sipsip, olsem na ol i save tingim tru ol hevi bilong ol sipsip. Tingim samting em wok wasman i mekim long aposel Pol. Em i tokim ol wanbilip long Korin: “Taim mi raitim pas long yupela, mi wari moa yet na bel bilong mi i gat bikpela hevi tru na mi krai planti wantaim. Tasol mi no bin raitim dispela pas bilong givim bel hevi long yupela. Nogat. Mi raitim bilong yupela i ken save olsem, mi laikim yupela tumas na mi givim bel bilong mi moa yet long yupela.” (2 Ko. 2:4) Tru tumas, Pol i bin givim bel tru long mekim wok bilong em.
8, 9. Stori long sampela man long Baibel em ol i bin helpim ol narapela.
8 Pasin bilong daunim laik bilong ol yet, oltaim dispela i bin i stap olsem mak bilong ol man husat i bin wok strong long helpim ol wokboi bilong Jehova. Noa i no bin tokim ol wanhaus bilong em olsem: ‘Toksave long mi taim yupela i wokim pinis sip na bai mi ken joinim yupela.’ Na long Isip, Moses i no tokim ol Israel olsem: ‘Bai mi bungim yupela long solwara Retsi. Yupela yet i mas painim gutpela rot bilong i go long hap.’ Na Josua i no tok olsem: ‘Toksave long mi taim banis bilong Jeriko i pundaun.’ Na Aisaia i no makim narapela man na tok: ‘Yu salim em.’—Ais. 6:8.
9 Jisas Krais i bin larim spirit bilong God i kirapim em, na long dispela samting em i stap gutpela piksa tru yumi ken bihainim. Em i amamas long kisim wok olsem Man Bilong Baim Bek ol man. (Jo. 3:16) Pasin bilong Jisas long laikim tru ol narapela na givim em yet, dispela i mas kirapim yumi tu long mekim olsem. Wanpela brata i bin mekim wok elda inap planti yia, na em i stori long tingting bilong em long lain sipsip na i tok: “Dispela tok Jisas i givim long Pita—was long ol sipsip bilong mi—em wanpela tok mi pilim tru. Insait long ol dispela yia, mi bin lukim olsem sampela liklik tok o liklik samting man i mekim bilong tingim na helpim narapela, dispela inap strongim tru bel bilong em. Wok wasman em wanpela wok mi amamas tru long mekim.”—Jo. 21:16.
10. Wanem samting inap kirapim ol man Kristen long bihainim pasin bilong Jisas long mekim wok bilong helpim ol narapela?
10 Bilong helpim lain sipsip bilong God, ol man i dediket pinis i mas i gat laik long bihainim tingting bilong Jisas, em i tok: “Bai mi givim malolo long yupela.” (Mt. 11:28) Pasin bilong bilip long God na laikim tru kongrigesen i save kirapim ol man Kristen long wok strong long kisim wok wasman. Ol i no ting ol i mas lusim bikpela hap taim tumas o i hatwok tumas long mekim, nogat. Tasol olsem wanem sapos wanpela brata i no gat bikpela laik long mekim wok wasman? Yu ting em inap kisim laik long mekim dispela wok?
Kisim Laik Bilong Mekim Wok
11. Olsem wanem ol brata inap kisim laik long mekim wok insait long kongrigesen?
11 Sapos yu pilim olsem save bilong yu i no inap na dispela i pasim yu long mekim ol samting bilong winim mak, orait i stret yu ken beten long kisim holi spirit. (Lu. 11:13) Spirit bilong Jehova bai helpim yu long daunim dispela tingting. God inap kirapim laik bilong brata long mekim wok insait long kongrigesen, na spirit bilong em bai givim strong long brata long mekim dispela wok holi. (Fl. 2:13; 4:13) Olsem na i stret yu ken askim Jehova long helpim yu long kisim laik long mekim dispela wok.—Ritim Song 25:4, 5.
12. Olsem wanem Kristen inap kisim savetingting na bai em inap lukautim ol wok em i kisim?
12 Kristen inap ting olsem em hatwok tumas long lukautim lain sipsip na em i mas lusim bikpela hap taim na strong long mekim olsem, olsem na em i no wok long winim mak. O ating em i pilim olsem em i sot long savetingting em i mas i gat bilong lukautim ol dispela wok. Sapos olsem, orait em inap kisim savetingting long rot bilong stadi gut long Tok Bilong God na ol buk em Baibel i as bilong en. Em i ken askim em yet, ‘Mi makim taim bilong stadi long Tok Bilong God, na mi save beten askim God long givim mi savetingting?’ Disaipel Jems i tok: “Sapos wanpela man namel long yupela em i sot long gutpela tingting, orait em i mas beten long God i givim tingting long em, na bai God i givim em. God i save givim planti samting long olgeta man, na em i no save tok kros long man i askim em.” (Jem. 1:5) Olsem wanem? Yu bilipim dispela tok? God i bin harim beten bilong Solomon na i givim em “planti gutpela tingting na save,” olsem na taim Solomon i mekim kot, em inap save long wanem pasin i gutpela na wanem pasin i nogut. (1 Kin. 3:7-14) Tru, dispela samting i painim Solomon em i narapela kain. Tasol yumi ken bilip tru olsem God bai givim savetingting long ol man i holim wok insait long kongrigesen na bai ol inap lukautim gut ol sipsip bilong em.—Snd. 2:6.
13, 14. (a) Pasin laikim bilong Krais i bin kirapim Pol long mekim wanem? (b) Pasin laikim bilong Krais i mas mekim wanem long yumi?
13 Narapela samting bilong helpim Kristen long kisim laik long mekim wok insait long kongrigesen, em pasin bilong tingim tingim olgeta samting Jehova na Pikinini bilong em i bin mekim bilong helpim yumi. Tingim tok bilong 2 Korin 5:14, 15. (Ritim.) Olsem wanem pasin laikim bilong Krais—em i “givim bel bilong en long [yumi]”—i “kirapim [yumi] long wok”? Krais i soim bikpela pasin laikim taim em i dai bilong helpim yumi, olsem na taim yumi pilim moa yet dispela gutpela pasin laikim bilong em, dispela i kirapim tru bel bilong yumi. Pol i larim pasin laikim bilong Krais i stiaim em. Dispela pasin laikim i pasim em long tingim em yet tasol, na i mekim na nambawan bikpela tingting bilong em i bilong mekim wok bilong God na helpim ol narapela insait na ausait long kongrigesen.
14 Taim yumi tingim tingim long bel olsem Krais i laikim tru ol manmeri, dispela i kirapim yumi long tenkyu long dispela pasin bilong em. Yumi luksave olsem i no stret long yumi wok yet long “bihainim ol laik bilong olpela bel” na mekim ol samting bilong inapim ol laik bilong yumi yet. Yumi stretim ol samting long sindaun bilong yumi na putim wok God i bin givim long yumi i stap namba wan. Bel i kirapim yumi long laikim tru ol brata na “stap olsem wokboi” bilong ol. (Ritim Galesia 5:13.) Sapos yumi tingim yumi yet olsem wokboi na long pasin daun yumi mekim wok bilong helpim ol arapela wokboi bilong Jehova i dediket pinis, yumi bai mekim pasin i soim rispek long ol. Bai yumi no bihainim pasin em Satan i as bilong en na skelim skelim pasin bilong ol na sutim tok long ol, nogat.—KTH 12:10.
Famili Olgeta i Gat Wok
15, 16. Bilong brata i ken inapim mak long kamap kongrigesen sevan o elda, meri pikinini i mas mekim wanem?
15 Sapos brata i marit na i gat pikinini, orait taim ol i skelim olsem em i inapim mak bilong kamap kongrigesen sevan o elda o nogat, ol i save tingim tu pasin bilong famili bilong em. Tru tumas, pasin bilong famili bilong em, na i stap bilong ol long ol samting bilong spirit, dispela inap mekim na brata i kisim wok o nogat. Olsem na famili olgeta i gat wok long sapotim papa taim em i wok long inapim mak long kamap kongrigesen sevan o elda na mekim wok bilong helpim kongrigesen.—Ritim 1 Timoti 3:4, 5, 12.
16 Jehova i amamas taim olgeta wan wan insait long famili Kristen i wok gut wantaim. (Ef. 3:14, 15) Papa i mas mekim ol samting long skel bambai em inap mekim ol wok insait long kongrigesen na “bosim gut” famili bilong em tu. Olsem na em i bikpela samting long elda o kongrigesen sevan i stadi wantaim meri pikinini bilong em long Baibel long olgeta wik na bai Famili Lotu i ken helpim olgeta wantaim. Em i mas go autim tok wantaim ol long olgeta taim. Taim papa i mekim ol dispela wok, em i bikpela samting long meri pikinini i wok gut wantaim em.
Bai Yu Kirap Gen Long Mekim Wok?
17, 18. (a) Sapos wanpela brata i no inapim mak moa long holim wok, ating em i mas mekim wanem? (b) Brata em bipo i mekim wok elda o kongrigesen sevan, em i mas holim wanem kain tingting?
17 Ating bipo yu wanpela elda o kongrigesen sevan, tasol nau yu no holim dispela wok. Yu laikim tru Jehova na yu ken bilip olsem em i wari yet long yu. (1 Pi. 5:6, 7) Olsem wanem? Ol i bin tokim yu olsem i gat sampela pasin o tingting bilong yu em yu mas stretim? Redi long tokaut long ol dispela pasin kranki na larim God i helpim yu long stretim. No ken bel nogut. Bihainim savetingting, na holim stretpela tingting. Wanpela brata husat i bin mekim wok elda inap planti yia, tasol bihain ol i pinisim em long dispela wok, em i tok: “Mi tingting strong long mi mas go yet long ol miting, autim tok, na ritim Baibel olsem mi bin mekim long taim mi mekim wok elda. Mi ting mi bai kisim bek dispela wok insait long wanpela o tupela yia, tasol nogat. Klostu 7-pela yia i mas lus pastaim na bihain mi kisim gen wok elda. Dispela i lainim mi long pasin bilong stap isi na no ken les kwik. Insait long dispela haptaim, ol i tokim mi long wok strong yet long kisim gen dispela wok na no ken givap, na dispela tok i bin helpim mi tru.”
18 Sapos yu wanpela brata i kain olsem brata yumi stori pinis long en, orait no ken bel hevi. Tingim ol samting Jehova i mekim long blesim wok autim tok bilong yu na famili bilong yu. Strongim meri pikinini bilong yu long ol samting bilong spirit, go lukim ol sikman long kongrigesen, na strongim ol brata i no strong. Na bikpela samting moa yet i olsem: Yu wanpela Witnes Bilong Jehova na yu no ken lusim wok bilong litimapim nem bilong God na autim gutnius bilong Kingdom. a—Sng. 145:1, 2; Ais. 43:10-12.
Skelim Gen Yu Yet
19, 20. (a) I gutpela sapos olgeta man i baptais pinis i mekim wanem? (b) Stadi i kamap bihain long dispela bai stori long wanem samting?
19 Long nau i mas i gat planti moa wasman na kongrigesen sevan, winim bipo. Olsem na mipela i laik kirapim olgeta man i baptais pinis long skelim gen sindaun bilong ol na askim ol yet, ‘Sapos nau mi no wanpela kongrigesen sevan o elda, orait i gat wok long mi mas skelim as na mi no mekim wanpela bilong dispela tupela wok?’ Larim spirit bilong God i helpim yu long kisim stretpela tingting long dispela bikpela samting.
20 Olgeta insait long kongrigesen inap kisim helpim long rot bilong ol wanbilip em ol i givim ol yet bilong helpim ol. Taim yumi tingim ol narapela na mekim wok bilong helpim ol, yumi kisim kain amamas i save kamap long pasin bilong helpim ol arapela na bihainim pasin bilong holi spirit. Tasol olsem stadi i kamap bihain long dispela bai kamapim klia, yumi no ken givim bel hevi long holi spirit. Olsem wanem yumi inap abrusim ol pasin i givim bel hevi long en?
[Futnot]
Bai Yu Bekim Olsem Wanem?
• Tok profet bilong Maika 5:5 i tok promis long wanem samting?
• Stori long wanem samting i insait long pasin bilong givim yu yet long helpim ol narapela.
• Olsem wanem yu inap kisim laik long helpim ol narapela?
• Bilong man i ken winim mak long kamap kongrigesen sevan o elda, olsem wanem em i bikpela samting long famili i wok gut wantaim?
[Ol Piksa long pes 25]
Yu ken mekim wanem bilong kisim wok insait long kongrigesen?