Stap Klin Olsem Ol Man Bilong Mekim Ol Gutpela Wok
“Yumi mas rausim olgeta pasin doti bilong bodi na bilong spirit, na yumi mas kamap klin olgeta long ai bilong God. Na yumi mas pret na aninit long God.”—2 Korin 7:1.
1. Jehova i laik bai ol man i lotu long em ol i mas stap olsem wanem?
“HUSAT inap i go antap long maunten bilong God? Husat inap i go insait long haus bilong God yet?” King Devit bilong Israel i bin kamapim dispela bikpela askim long pasin bilong lotu em Jehova i orait long en. Em yet i bekim dispela askim olsem: “Man i no mekim pasin nogut, na bel bilong en i klin, man i no save lotu long ol giaman god, na man i no tok tru antap bilong giamanim narapela man, kain man olsem em inap.” (Song 24:3, 4) Jehova em i as bilong pasin holi, na bilong em i ken orait long man, man i mas stap klin na holi. Jehova i bin tokim ol Israel: “Yupela i mas givim yupela yet long mi na lusim pasin i no stret na bihainim stretpela pasin na i stap holi. Long wanem, mi yet mi holi.”—Wok Pris 11:44, 45; 19:2.
2. Olsem wanem Pol na Jems i bin kamapim klia olsem pasin bilong i stap klin long ol samting bilong lotu em i bikpela samting?
2 Inap planti handet yia bihain, aposel Pol i salim pas i go long ol wanbilip Kristen i stap long Korin, em taun i pulap long ol pasin i nogut tru, Pol i tokim ol: “Yumi kisim pinis ol dispela promis bilong God. Olsem na yumi mas rausim olgeta pasin doti bilong bodi na bilong spirit, na yumi mas kamap klin olgeta long ai bilong God. Na yumi mas pret na aninit long God na yumi mas givim yumi yet olgeta long God na bihainim tru pasin holi oltaim.” (2 Korin 7:1) Dispela tok i kamapim klia gen olsem man i laik pas wantaim God na kisim ol blesing em i tok promis long givim, dispela man i mas i stap klin na ol doti bilong skin na spirit i no ken pas long em. Olsem tasol taim disaipel Jems i stori long lotu God i orait long en, em i tok: “Pasin bilong Kristen i stap stret olgeta na i no gat asua long ai bilong God Papa bilong yumi, em i olsem. Yumi mas tingting long ol pikinini, papamama bilong ol i dai pinis, na long ol meri, man bilong ol i dai pinis, na yumi mas helpim ol long karim ol hevi bilong ol. Narapela samting tu, yumi mas lukautim gut wokabaut bilong yumi yet, bai pasin bilong dispela graun i no ken mekim yumi i kamap doti long ai bilong God.”—Jems 1:27.
3. Bilong God i ken orait long lotu bilong yumi, yumi mas tingting strong long wanem samting?
3 Pasin bilong i stap klin na holi i bikpela samting long lotu i tru, olsem na man i laik bai God i orait long em i mas tingting strong long inapim mak bilong stap olsem. Ol pipel long nau i gat kain kain tingting long mak bilong i stap klin, tasol yumi mas save gut na mekim ol samting Jehova yet i tok em i klin na em i orait long en. Yumi mas painimaut ol samting God i laik ol lain i lotu long em i mas mekim long dispela samting, na long ol samting em i bin mekim bilong helpim ol long kamap klin na ol i no ken doti gen na bai em i ken orait long ol.—Song 119:9; Daniel 12:10.
Klin Bilong Mekim Lotu i Tru
4. Stori long mining bilong dispela tok klin olsem Baibel i kamapim.
4 Long tingting bilong planti man, samting i stap klin taim em i no gat pipia samting long en. Tasol long Baibel, i gat planti tok Hibru na tok Grik bilong makim samting i klin na ol i no stori tasol long ol samting bilong skin, planti taim ol i stori long ol samting bilong spirit. Wanpela dikseneri bilong Baibel i tok: “Wan wan taim tasol dispela tok ‘klin’ na ‘i no klin’ i stori long pasin bilong stap klin long skin, planti taim em stori long ol samting bilong lotu. Olsem dispela tok i makim pasin bilong i stap klin i stiaim klostu olgeta samting man i mekim.”
5. Olsem wanem? Lo Bilong Moses long pasin bilong i stap klin i bosim planti samting long laip bilong wanpela Israel o nogat?
5 Tru tumas, Lo Bilong Moses i gat ol lo i bosim klostu olgeta samting long laip bilong wanpela man Israel, Lo i makim stret ol samting i klin na i gutpela na ol samting i no klin. Olsem: Long Wok Pris sapta 11 i go 15, yumi lukim planti tok i makim ol samting i klin na ol samting i no klin. Sampela animal i no klin, na ol Israel i no ken kisim na kaikai. Taim meri i karim pikinini em i no stap klin inap sampela hap taim. Sampela sik bilong skin, olsem sik lepra o susu i kamap long sem bilong man o bilong meri, ol tu i mekim na man i no stap klin. Na tu, Lo i kolim stret pasin ol i mas bihainim taim wanpela i no klin. Olsem: Namba 5:2, i tok: “Tokim ol Israel long rausim ol manmeri i gat sik lepra na susu i kamap long sua, na wara o blut samting i kamap long bodi, na ol manmeri i bin putim han long bodi bilong man i dai pinis. Ol dispela manmeri i no klin long ai bilong mi, na ol i mas i go stap ausait long kem.”
6. I gat wanem as na God i bin givim ol lo long pasin bilong i stap klin?
6 Ol dispela lo wantaim ol narapela lo bilong Jehova i kamapim sampela save long helt na i stap bilong man paslain tru long ol saveman i bin painimaut ol dispela samting, na ol i bin helpim ol man taim ol i bihainim. Tasol God i no givim ol dispela lo bilong bosim ol samting bilong helt tasol o bilong helpim ol man long abrusim sik. Ol lo i hap bilong lotu i tru. Na ol i stori long ol samting bilong i stap bilong ol man long olgeta wan wan de—kaikai, karim pikinini, maritpasin, na ol samting olsem—bilong kamapim klia olsem God bilong ol, Jehova, em i gat rait long makim ol samting i stret na ol samting i no stret long laip bilong ol, em dispela laip ol i bin dediketim long Jehova wanpela tasol.—Lo 7:6; Song 135:4.
7. Lain Israel bai kisim wanem blesing long rot bilong bihainim Lo?
7 Lo i bin lukautim tu ol Israel na bai ol i no insait long sampela pasin i no klin bilong ol lain i stap klostu long ol. Long rot bilong bihainim gut Lo na ol tok bilong en bilong stap klin long ai bilong Jehova, ol Israel bai i stap stret inap long ol i ken lotuim God bilong ol na kisim ol blesing bilong em. Jehova i bin tokim lain Israel: “Sapos nau yupela i holim strong kontrak bilong mi na bihainim tok bilong mi, orait bai yupela i kamap lain manmeri bilong mi. Olgeta graun na olgeta manmeri i bilong mi, tasol mi bai makim yupela i stap lain manmeri bilong mi stret. Na bai yupela i stap lain manmeri i save mekim wok bilong mi olsem ol pris.”—Kisim Bek 19:5, 6; Lo 26:19.
8. I gat wanem as na ol Kristen long nau i mas tingim gut ol tok bilong Lo long pasin bilong stap klin?
8 Jehova i kamapim ol dispela tok long Lo bilong skulim ol Israel long pasin bilong kamap klin, holi, na stap stret long ai bilong em, olsem na em i bikpela samting ol Kristen long nau i mas skelim gut pasin bilong ol yet long stap klin na holi. Tru, ol Kristen i no aninit long Lo, tasol olsem Pol i tok, ol i no ken lusim tingting long Lo i olsem ‘piksa bilong ol samting i laik kamap bihain. Tasol Krais em i samting tru.’ (Kolosi 2:17; Hibru 10:1) Jehova i tok, “mi no save senisim tingting bilong mi,” olsem na sapos em i bin ting pasin bilong stap klin i bikpela samting long trupela lotu long bipo, orait long nau tu yumi mas tingim gut pasin bilong stap klin long skin, long spirit, na long wokabaut bilong yumi, sapos yumi laik bai em i ken orait long yumi na blesim yumi.—Malakai 3:6; Rom 15:4; 1 Korin 10:11, 31.
Stap Klin Long Skin
9, 10. (a) I gat wanem as na pasin bilong stap klin em i bikpela samting long wanpela Kristen? (b) Planti man i tok wanem long ol kibung bilong ol Witnes Bilong Jehova?
9 Yu ting pasin bilong stap klin long samting bilong skin i bikpela samting yet long lotu i tru? Pasin bilong stap klin long skin dispela tasol i no makim olsem man i lotu tru long God, nogat; tasol i stret man i bihainim trupela lotu i mekim ol samting em inap mekim bilong stap klin. Dispela em i bikpela samting moa yet long nau, long wanem, planti man ol i no save tingting tumas long klinim gut skin bilong ol, klos bilong ol, o hap ol i sindaun long en. Planti man i luksave long ol lain long hap bilong ol i save stap klin olsem. Dispela inap kamapim ol gutpela samting, olsem Pol i bin tokim ol Kristen long Korin: “Mipela i no laik bai ol man i tok nogut long dispela wok bilong mipela, olsem na mipela i no save mekim wanpela samting i save sutim lek bilong ol dispela man na ol i pundaun. Nogat. Mipela i stap wokman bilong God, olsem na oltaim mipela i save soim gutpela pasin bilong mipela.”—2 Korin 6:3, 4.
10 Planti taim ol man i gat namba i bin tok amamas long pasin bilong ol Witnes Bilong Jehova long rispek long ol narapela, long stap klin, na mekim gut ol wok, olsem ol i lukim long ol bikpela kibung. Olsem: Nius La Stampa i stori long wanpela kibung i bin kamap long provins Savona, long Itali, na tok: “Samting man i luksave long en wantu tasol taim em i wokabaut insait long ples kibung, em ol manmeri i stap long ples bung ol i klin na ol i save mekim stret wok bilong ol.” Bihain long wanpela kibung bilong ol Witnes long wanpela stediam long São Paulo, Brasil, wanpela bikman bilong stediam i tokim supavaisa bilong ol wokman bilong klinim stediam olsem: “Stat long nau mipela i laik bai yupela i klinim stediam long wankain pasin olsem ol Witnes i bin mekim.” Narapela bikman bilong dispela stediam i tok: “Taim ol Witnes Bilong Jehova i laik rentim stediam, mipela i gat wok long tingim tasol ol det ol i laik rentim, mipela no wari long wanpela narapela samting.”
11, 12. (a) Yumi mas tingim wanem stiatok bilong Baibel taim yumi tingim pasin bilong yumi yet long stap klin? (b) Yumi inap mekim wanem ol askim bilong skelim pasin na wokabaut bilong yumi yet?
11 Sapos pasin bilong stap klin na mekim stret ol wok long ples bilong yumi long mekim lotu inap givim biknem long God yumi lotu long em, orait em i bikpela samting tu long kamapim ol dispela pasin long haus bilong yumi yet. Tasol nogut yumi ting yumi gat rait long bihainim laik bilong yumi yet na mekim nabaut taim yumi stap long haus. Na yumi stap fri long makim pasin bilong bilas na stailim gras em yumi ting i gutpela long skin bilong yumi na i luk nais! Tasol i gat ol samting i stiaim dispela pasin bilong i stap fri. Tingim tok lukaut Pol i bin givim long ol wanbilip Kristen taim em i stori long sampela kaikai em ol yet i ken makim olsem ol i laik kaikai o nogat, em i tok: “Lukaut. Yupela i save olsem, yupela inap long kaikai wanem samting yupela i laikim. Tasol nogut dispela pasin bilong yupela i mekim, na ol man tingting bilong ol i no klia, ol i pundaun long sin.” Bihain em i kamapim wanpela bikpela stiatok olsem: “ ‘Olgeta samting i orait long yumi mekim,’ tasol i no olgeta samting i save helpim yumi long i stap gut. ‘Olgeta samting i orait long yumi mekim,’ tasol i no olgeta samting i save mekim yumi i kamap strongpela Kristen.” (1 Korin 8:9; 10:23) Olsem wanem tok bilong Pol i stret long ol samting yumi mekim bilong stap klin?
12 I stret ol manmeri i ting wokman bilong God i mas i stap klin na mekim stret ol samting long laip bilong em. Olsem na yumi mas stretim gut ol samting na bai haus bilong yumi na ol samting klostu long en i no bagarapim nem bilong yumi olsem ol wokman bilong autim Tok Bilong God. Haus bilong yumi i mekim wanem kain wok witnes, olsem tokaut long pasin bilong yumi yet na long ol bilip bilong yumi? Em i soim olsem yumi gat laik tru long stap long wanpela klinpela na gutpela graun em stretpela pasin tasol i stap long en, olsem yumi save givim bel long kirapim ol narapela long bilip long en? (2 Pita 3:13) Na olsem tasol pasin bilong yumi long bilas—maski em long taim bilong malolo o wok autim tok—em inap mekim na ol man i amamas moa long harim tok yumi autim o i mekim na ol i no amamas tumas long harim. Olsem: Tingim tok bilong wanpela niusman long Meksiko: “Bikpela hap bilong lain Witnes Bilong Jehova em ol yangpela, na pasin bilong ol long kom gut, stap klin, na pasim klos i stret i stap ples klia tru.” Yumi amamas tru long ol kain yangpela olsem i stap namel long yumi!
13. Yumi ken mekim wanem na bai ol samting bilong i stap bilong yumi long olgeta de em i klin na i stap stret?
13 Tru, i hatwok liklik long mekim ol samting na bai skin, haus, na ol samting bilong yumi i ken stap klin na stap stret long olgeta taim. Bilong helpim yumi long mekim olsem yumi no ken ting yumi mas i gat kain kain masin samting i gat bikpela pe, nogat. Pasin bilong tingim gut pastaim ol samting yumi mas mekim na givim bel long mekim oltaim bai helpim yumi. Yumi mas makim taim bilong klinim skin, klos, haus, ka, na ol narapela samting bilong yumi. Maski yumi lusim bikpela hap taim long autim tok, go long ol miting, na mekim stadi bilong yumi yet, na ol wok yumi mas mekim long olgeta de, dispela i no makim olsem yumi no gat wok long stap klin na stap stret long ai bilong God na ol man. Planti ol i save long dispela stiatok olsem “olgeta samting i kamap long dispela graun, i save kamap long taim bilong em yet,” na dispela i makim tu wok bilong yumi long stap klin.—Saveman 3:1.
Bel i No Gat Doti Long En
14. Olsem wanem yumi inap tok em i bikpela samting moa long stap klin long ol samting bilong spirit na long pasin bilong yumi, winim pasin bilong stap klin long skin?
14 Em i bikpela samting long tingim wok bilong mekim skin na haus samting i stap klin, tasol em i bikpela samting moa long stap klin long ol samting bilong spirit na long pasin bilong yumi. Yumi kisim dispela tingting taim yumi tingim lain Israel Jehova i bin givim baksait long ol. Em i no mekim olsem, long wanem, skin bilong ol i no klin, em i mekim, long wanem, ol i bin kamap doti long ol samting bilong spirit na long pasin bilong ol. Long rot bilong profet Aisaia, Jehova i tokim lain Israel olsem pasin bilong ol long ‘mekim sin oltaim,’ em i as na ol ofa bilong ol, na pasin bilong ol long tingim nupela mun na de Sabat, na prea bilong ol tu i kamap olsem wanpela hevi bilong em. Ol i mas mekim wanem bilong God i ken orait gen long ol? Jehova i tokim ol: “Yupela go waswas, na klinim yupela yet na rausim olgeta pasin nogut i pas long yupela. Na no ken mekim sin gen.”—Aisaia 1:4, 11-16.
15, 16. Jisas i tok wanem samting bai i mekim na man i kamap doti? Tok bilong Jisas i ken helpim yumi olsem wanem?
15 Bilong helpim yumi long save gut moa olsem em i bikpela samting long stap klin long spirit na pasin bilong yumi, tingim tok Jisas i bin mekim long ol Farisi na saveman bilong Lo taim ol i tok ol disaipel bilong em i no klin, long wanem, ol i no bin wasim han bilong ol paslain long ol i kaikai. Jisas i stretim ol olsem: “Samting i go insait long maus bilong wanpela man, em i no save mekim man i kamap doti. Nogat. Tasol samting maus i autim, em tasol i mekim man i doti.” Em i tok moa olsem: “Samting maus i autim, dispela i save kamap long tingting. Na dispela samting i save mekim man i doti. Mi tok long olkain samting i save kamap long tingting bilong man, em ol samting olsem, ol tingting nogut na pasin bilong kilim man i dai na olkain pasin pamuk na pasin bilong bagarapim marit na pasin bilong stil na pasin bilong tok giaman long kot na pasin bilong tok nogut long ol arapela. Ol dispela pasin i save mekim man i doti long ai bilong God. Tasol man i kaikai na i no wasim han pastaim, dispela pasin i no mekim em i doti.”—Matyu 15:11, 18-20.
16 Ol tok bilong Jisas inap skulim yumi long wanem samting? Jisas i kamapim klia olsem ol laik nogut i kamap long bel pastaim na bihain pasin nogut, pasin pamuk, na pasin doti i save kamap. Olsem disaipel Jems i tok: “Bel bilong yumi olgeta wan wan i save kirap na pulim yumi.” (Jems 1:14, 15) Olsem na sapos yumi no laik pundaun long ol bikpela sin Jisas i stori long en, yumi mas rausim ol laik nogut long bel bilong yumi na no ken larim ol i kamap gen. Dispela i makim olsem yumi mas was gut long ol samting yumi ritim, lukim, na putim yau long en. Long nau, ol man i tok ol i gat rait long kamapim tingting bilong ol na maski long tingim sampela tambu. Dispela em i as na ol lain i kamapim ol program long TV na redio, na ol bisnis bilong kirapim ol man long baim ol samting i kamapim planti samting bilong lukim na harim i save amamasim ol laik nogut bilong skin. Yumi mas strong long yumi no ken larim ol kain tingting olsem i kamap strong long bel bilong yumi. Bikpela tok i olsem: Bilong God i ken orait long yumi na laikim yumi, oltaim yumi mas wok strong long mekim bel i stap klin na i no gat doti long en.—Sindaun 4:23.
Kamap Klin Bilong Mekim Ol Gutpela Wok
17. I gat wanem as na Jehova i bin mekim lain bilong em i kamap klin?
17 Long rot bilong helpim yumi save kisim long Jehova yumi inap i stap klin long ai bilong em. Dispela i wanpela gutpela samting tru na i save lukautim yumi. (2 Korin 6:14-18) Tasol yumi save tu olsem i gat as na Jehova i bin mekim lain bilong em i kamap klin. Pol i tokim Taitus olsem Krais Jisas “i lusim pinis laip bilong em yet, bilong kisim bek yumi na lusim olgeta sin bilong yumi, bai yumi stap klin tru na yumi stap lain manmeri bilong em yet, na yumi wok strong long mekim olgeta kain gutpela pasin.” (Taitus 2:14) Yumi lain manmeri i kamap klin, olsem na yumi mas givim bel long mekim wanem ol wok?
18. Yumi ken mekim wanem bilong soim olsem yumi givim bel long mekim ol gutpela wok?
18 Namba wan bikpela samting em yumi mas wok strong long en, em yumi mas autim gutnius bilong Kingdom bilong God. (Matyu 24:14) Taim yumi mekim olsem, yumi tokim ol manmeri long olgeta hap long ol inap i stap oltaim long graun i no gat wanpela samting long en i doti. (2 Pita 3:13) Ol narapela gutpela samting yumi mekim em yumi kamapim ol pasin bilong spirit bilong God long olgeta de. Dispela i givim biknem long Papa bilong yumi long heven. (Galesia 5:22, 23; 1 Pita 2:12) Na yumi no lusim tingting long ol lain i stap insait long tok i tru husat i bagarap i stap long sampela hevi em bikpela win o guria samting i bin kamapim, o sampela narapela bikpela hevi i painim ol. Yumi tingim tok bilong Pol: “Wanem taim yumi inap mekim gutpela pasin long ol arapela, yumi mas mekim. Na yumi mas strong tru long mekim gutpela pasin long ol arapela manmeri i bilip long Bikpela.” (Galesia 6:10) Olgeta kain gutpela wok olsem em klinpela bel na gutpela tingting i kirapim yumi long mekim, em i gutpela samting tru long ai bilong God.—1 Timoti 1:5.
19. Yumi inap kisim wanem ol gutpela samting sapos yumi holimpas pasin bilong stap klin tru long skin, long pasin, na long ol samting bilong spirit?
19 Yumi ol wokboi bilong God Antap Tru, olsem na yumi strong long bihainim dispela tok bilong Pol: “Ol brata, mi tingting long bikpela marimari bilong God na mi tokaut strong long yupela olsem. Yupela i mas givim bodi bilong yupela long God olsem ofa. Na taim yupela i stap laip bai yupela i stap ol manmeri bilong God stret na bai yupela i mekim ol pasin God i laikim. Yupela i mekim olsem na yupela i ken lotu tru long God.” (Rom 12:1) Oltaim yumi mas pilim tru gutpela samting Jehova i mekim bilong mekim yumi kamap klin, na yumi laik givim bel long stap klin tru long skin, long pasin, na long ol samting bilong spirit. Dispela bai mekim na yumi stap belgut na amamas long yumi yet long nau, na tu, em bai opim rot long yumi long lukim “ol dispela samting bilong bipo”—em dispela taim nogut bilong nau—i pinis olgeta taim God i “mekim olgeta samting i kamap nupela.”—KTH 21:4, 5.
Yu Inap Tingim?
• I gat wanem as na ol Israel i bin kisim planti lo long pasin bilong stap klin?
• Olsem wanem pasin bilong stap klin long skin i mekim na ol man i amamas moa long harim tok yumi autim?
• Bilong wanem wok bilong stap klin long ol samting bilong spirit na long pasin i bikpela samting moa long pasin bilong stap klin long skin?
• Yumi ken mekim wanem bilong soim olsem yumi wanpela lain i “wok strong long mekim olgeta kain gutpela pasin”?
[Ol Piksa long pes 21]
Pasin bilong stap klin long skin i mekim na ol man i amamas moa long harim tok yumi autim
[Piksa long pes 22]
Jisas i tokaut olsem ol tingting nogut i kirapim man long mekim pasin nogut
[Ol Piksa long pes 23]
Ol Witnes Bilong Jehova i kamap klin na ol i wok strong long mekim olgeta kain gutpela pasin