Amamas Long Stretpela Pasin Bilong Jehova

“Sapos man i bihainim stretpela pasin na pasin bilong laikim tru ol arapela, em bai i stap gut na bai ol i mekim stretpela pasin long em na givim biknem long em.”​—⁠SINDAUN 21:21.

 1. Wanem sampela pasin bilong ol manmeri long nau i kamapim ol hevi?

“SAMPELA man i save ting, pasin bilong ol i gutpela na ol i bihainim gutpela rot. Tasol nogat. Ol i mekim i go i go na bihain bai ol i dai.” (Sindaun 16:25) Dispela tok bilong Baibel i makim stret pasin bilong planti manmeri long nau! Planti manmeri i tingting tasol long bihainim ol pasin ol yet i ting em i stret, na ol i no tingim liklik ol samting ol narapela man i sot long en. (Sindaun 21:⁠2) Ol i tok olsem lo bilong gavman i gutpela, tasol taim rot i op ol i traim long abrusim ol dispela lo. Dispela i mekim na ol lain manmeri i bruk bruk, paul nabaut, na tingting planti.​—⁠2 Timoti 3:​1-5.

 2. I mas i gat wanem bikpela samting bilong helpim olgeta manmeri?

² Bilong helpim yumi yet​—⁠na bilong olgeta manmeri i ken kisim bel isi na gutpela sindaun⁠—yumi mas i gat wanpela stretpela lo, em wanpela lo olgeta manmeri bai orait long en na amamas long bihainim. Wanpela man bilong graun i no inap tru long kamapim kain lo olsem, maski em i gat bikpela save o bikpela laik tru long mekim olsem. (Jeremaia 10:23; Rom 3:​10, 23) Sapos kain lo olsem i stap pinis, orait ol man inap painim we dispela lo, na dispela lo bai i wanem kain? Bikpela askim i olsem: Sapos kain lo olsem i stap pinis, bai yu amamas long bihainim?

Painim Stretpela Lo

 3. Husat tasol i winim mak bilong kamapim wanpela lo i stret long olgeta manmeri na i gutpela bilong helpim ol? Bilong wanem yumi tok olsem?

³ Bilong painim wanpela lo i stret long olgeta manmeri na i gutpela bilong helpim ol, yumi mas i go long man em ol samting bilong graun i no pasim em, olsem kala bilong skin, pasin bilong ples, na samting bilong wok politik. Na tu, ol hevi bilong ol man bilong graun i no ken daunim em, ol man bilong graun i no gat bikpela strong na ol i no inap tingim olgeta samting inap kamap long bihain. Wanpela man tasol i winim dispela mak, em Man bilong wokim olgeta samting, em God Jehova, na em i tok: “Skai i stap antap tru long graun, olsem tasol ol pasin bilong mi na tingting bilong mi i winim tru ol pasin bilong yupela na tingting bilong yupela.” (Aisaia 55:⁠9) Na tu, Baibel i tok Jehova i “save bihainim tok bilong en na em i no save giaman. Na pasin bilong en i gutpela na stretpela tasol.” (Lo 32:⁠4) Planti taim Baibel i stori long Jehova olsem em i God bilong mekim stretpela pasin. (Kisim Bek 9:27; 2 Stori 12:6; Song 11:7; 129:4; Krai 1:18; KTH 19:⁠2) Yes, yumi ken save olsem Jehova inap kamapim lo i nambawan olgeta, long wanem, em i gat stretpela pasin, na em i save bihainim ol tok bilong em.

 4. Stretpela pasin i makim wanem samting?

⁴ Planti man i no save laikim man husat i ting pasin bilong em i stret tru o i holi tru, winim ol narapela. Long tingting bilong ol, dispela kain man i gat pasin antap, o em i giaman tasol long mekim pasin holi. Tasol long Baibel dispela tok stretpela pasin i makim pasin i stret, gutpela pasin; pasin i no gat asua, no gat sin; pasin bilong bihainim ol stiatok em lo bilong God i as bilong en o ol lo ol man i wanbel long bihainim; pasin bilong mekim ol samting i stret. Ating bai yu amamas long wanpela lo i gat ol dispela gutpela pasin, a?

 5. Stretpela pasin olsem Baibel i stori long en i makim wanem kain pasin?

⁵ Buk Encyclopaedia Judaica i stori long stretpela pasin olsem: “Stretpela pasin i no makim wanpela samting i stap tasol long tingting bilong man, em i makim pasin bilong mekim ol samting i stret long ol narapela.” Olsem: Stretpela pasin bilong God i no wanpela pasin tasol bilong em olsem pasin holi o pasin bilong stap klin. Tasol em wanpela pasin God i save kamapim long rot bilong mekim ol samting i stret. Yumi ken tok olsem Jehova i holi na em i klin, olsem na olgeta samting em i mekim na olgeta samting i kam long em i stretpela. Olsem Baibel i tok: “God i save bihainim stretpela pasin na em i save marimari long yumi long olgeta samting em i mekim.”​—⁠Song 145:⁠17.

 6. Pol i tok wanem long tingting bilong sampela Juda long taim bilong em? Bilong wanem em i tok olsem?

⁶ Aposel Pol i strongim dispela tok long pas em i raitim long ol Kristen i stap long Rom. Em i stori long sampela Juda i no bilip, em i tok: “Ol i no save long pasin God i bihainim bilong kolim yumi stretpela man, na ol i laik kamap stretpela man long strong bilong ol yet. Olsem na ol i no bin aninit long God na larim em i mekim ol i kamap stretpela man.” (Rom 10:⁠3) I gat wanem as na Pol i tok ol “i no save long pasin God i bihainim bilong kolim yumi stretpela man”? Yu ting ol i bin lain long Lo, em ol stretpela lo bilong God? Yes, ol i bin lain gut long en. Tasol planti bilong ol i ting stretpela pasin em i wanpela gutpela pasin bilong man na em tasol. Na bilong kisim dispela pasin ol i ting ol i mas taitim bun tru na bihainim olgeta lo lotu i kamapim, ol i no ting em i wanpela pasin bilong stiaim ol samting ol i mekim long ol narapela man. Olsem ol hetman bilong lotu long taim bilong Jisas, ol i paul olgeta long mining tru bilong stretpela pasin.​—⁠Matyu 23:​23-28.

 7. Jehova i kamapim stretpela pasin bilong em olsem wanem?

⁷ Tasol olgeta samting Jehova i mekim i kamapim klia stretpela pasin bilong em. Stretpela pasin bilong em i mekim na em i no inap orait long ol sin ol man i mekim long laik bilong ol yet, tasol dispela i no makim olsem em i wanpela hatpela God i no gat pasin sori na ol man i mas pret na stap longwe long em, nogat. Stretpela pasin bilong em i as na ol man i ken go klostu long em na em bai kisim bek ol long hevi bilong sin. Olsem na em i stret tru Baibel i tok Jehova em i ‘God bilong mekim stretpela pasin, na God bilong kisim bek ol manmeri.’​—⁠Aisaia 45:21.

Stretpela Pasin na Wok Bilong Kisim Bek Ol Man

8, 9. Long wanem ol rot Lo i kamapim ples klia stretpela pasin bilong God?

⁸ Bilong save olsem wanem stretpela pasin bilong God i wok wantaim pasin sori bilong em long kisim bek ol man, tingim Lo em i bin givim long lain Israel long rot bilong Moses. Em i stretpela Lo. Long laspela tok Moses i mekim long ol Israel, em i tokim ol olsem: “Ol dispela arapela lain pipel i no gat stretpela lo olsem ol dispela lo nau mi bin skulim yupela long en. Nogat tru.” (Lo 4:⁠8) Planti handet yia bihain, King Devit bilong Israel i tok: “Bikpela i save tokim yumi long olgeta pasin yumi mas mekim, na dispela tok i tru na i stret olgeta.”​—⁠Song 19:⁠9.

⁹ Long rot bilong Lo, Jehova i tokaut long ol stretpela lo bilong em i makim wanem pasin i stret o i no stret. Lo i bin kamapim gut tru ol pasin ol Israel i mas bihainim long sait bilong lotu, tasol tu Lo i kamapim ol tok bilong ol samting bilong wok bisnis, maritpasin, kaikai na pasin bilong stap klin, na ol tok kot i pasim. Lo i kolim tu strafe bilong ol man i sakim ol tok bilong en, sampela taim Lo i makim man bilong i dai.a Tasol yu ting ol stretpela lo bilong God, olsem Lo i kamapim, ol i givim hevi long ol manmeri na tekewe pasin bilong ol long stap fri na stap amamas, olsem planti manmeri long nau i save tok?

10. Ol man i bin laikim tumas Jehova, ol i gat wanem tingting long ol lo bilong em?

¹⁰ Ol man i bin laikim tru Jehova, ol i kisim bikpela amamas long ol stretpela lo bilong em. Olsem yumi skelim pinis, King Devit i bin stori olsem ol lo bilong Jehova i tru na stret olgeta, na tu, Devit i bin laikim tru ol dispela lo na em i amamas ol lo i stap. Em i stori long ol lo na tok bilong Jehova olsem: “Tok bilong Bikpela i winim gol. Em i winim gol i gutpela tru, . . . Lo bilong Bikpela i swit tumas, na i winim hani. Em i winim tru gutpela switpela hani. Lo bilong yu i givim save long mi, wokman bilong yu. Mi bihainim lo bilong yu, olsem na yu save mekim sindaun bilong mi i kamap gutpela tru.”​—⁠Song 19:​7, 10, 11.

11. Olsem wanem Lo i olsem ‘waspapa bilong bringim ol i go long Krais’?

¹¹ Planti handet yia bihain, Pol i stori long wanpela bikpela samting moa Lo i mekim. Long pas em i bin raitim long ol Galesia, em i tok: “Lo i stap olsem waspapa bilong yumi, bilong bringim yumi i kam long Krais, bai yumi ken bilip long gutnius na God i ken kolim yumi ol stretpela manmeri.” (Galesia 3:24) Long taim bilong Pol dispela tok waspapa i makim wanpela wokboi nating bilong wanpela bikpela famili. Em i wok bilong dispela wokboi long lukautim ol pikinini na kisim ol i go long skul. Na olsem tasol, Lo i bin lukautim ol Israel na bai ol i no insait long ol pasin nogut bilong skin na pasin nogut bilong lotu olsem ol manmeri i stap klostu long ol i save mekim. (Lo 18:​9-13; Galesia 3:23) Na tu, Lo i bin helpim ol Israel long save olsem ol i sinman na ol i mas i gat man bilong lusim rong bilong ol na kisim bek ol. (Galesia 3:19) Wok bilong givim ofa i kamapim klia olsem i mas i gat pe bilong baim bek ol man, na tu, em i stap olsem piksa bilong ol man i ken luksave long Mesaia tru. (Hibru 10:​1, 11, 12) Olsem na Jehova i bin kamapim stretpela pasin bilong em long rot bilong Lo, tasol em i mekim olsem bilong helpim ol manmeri na kisim bek ol bilong ol i ken stap oltaim.

Ol Stretpela Manmeri Long Ai Bilong God

12. Ol Israel inap stap olsem wanem sapos ol i bin bihainim gut olgeta tok bilong Lo?

¹² Lo bilong Jehova i stretpela olgeta, olsem na long rot bilong bihainim dispela Lo ol Israel inap stap olsem stretpela manmeri long ai bilong God. Paslain long ol i go insait long graun bilong promis, Moses i tokim ol Israel: “Sapos yumi bihainim gut olgeta lo em i bin givim long yumi, bai God i belgut long yumi na kolim yumi ol stretpela manmeri.” (Lo 6:25) Na tu, Jehova i bin tok promis olsem: “Yupela i mas bihainim olgeta pasin mi laikim na olgeta lo mi givim yupela. Sapos yupela i mekim olsem bai yupela i stap laip. Mi Bikpela, mi God bilong yupela.”​—⁠Wok Pris 18:5; Rom 10:⁠5.

13. Yu ting Jehova i mekim pasin i no stret taim em i tok ol Israel i mas bihainim stretpela lo bilong em? Stori long dispela.

¹³ Sori tru, lain Israel i no bin “bihainim gut olgeta lo [Jehova] i bin givim,” olsem na ol i lus long kisim ol blesing God i bin promis long givim. Ol i no bin bihainim olgeta lo bilong God, long wanem, Lo bilong God i gutpela olgeta, tasol ol i no stap olsem. Yu ting dispela i makim olsem God i no mekim stretpela pasin? Nogat tru. Pol i tok: “Olsem na bai yumi tok wanem? Ating bai yumi tok God i mekim pasin i no stret, a? Nogat tru.” (Rom 9:14) I bin i gat sampela manmeri i bin stap paslain na bihain long taim ol Israel i bin kisim Lo em God i bin tok ol i stretpela manmeri, maski ol i gat sin na ol i no gutpela olgeta. Nem bilong sampela bilong ol em Noa, Abraham, Jop, Rahap, na Daniel. (Stat 7:1; 15:6; Jop 1:1; Esekiel 14:14; Jems 2:25) Olsem na bikpela askim i olsem: I gat wanem as na God i tok ol i stretpela manmeri?

14. Taim Baibel i tok wanpela man em i “stretpela,” dispela i makim wanem samting?

¹⁴ Taim Baibel i stori long wanpela man bilong graun na tok em i “stretpela” man, dispela i no makim olsem em i no gat sin o em i gutpela olgeta, nogat. Dispela i makim olsem man inapim ol wok bilong God em i mas mekim na ol samting em i mas mekim long ol man. Olsem: Baibel i tok Noa “em i gutpela man” na “wokabaut bilong en i stret long ai bilong God,” long wanem, em i bin “mekim olgeta samting olsem God i tokim em.” (Stat 6:​9, 22; Malakai 3:18) Sekaraia na Elisabet, papamama bilong Jon bilong Baptais, “tupela i stap stretpela long ai bilong God. Tupela i save bihainim olgeta lo na olgeta tok bilong Bikpela, na tupela i no gat asua long ai bilong en.” (Luk 1:⁠6) Na wanpela man i no bilong lain Israel, em wanpela ofisa bilong ami bilong Itali nem bilong em Kornilius, na Baibel i tok em i “stretpela man na em i save pret long God.”​—⁠Aposel 10:⁠22.

15. Stretpela pasin i makim wanem narapela samting?

¹⁵ Stretpela pasin bilong man i makim tu ol samting i stap long bel bilong em​—⁠olsem pasin bilong bilip na laikim tru Jehova na ol tok promis bilong em​—⁠em i no makim man i mekim ol samting God i laik em i mas mekim na em tasol. Baibel i tok Abraham “i bilipim tok bilong Bikpela. Olsem na Bikpela i kolim em stretpela man.” (Stat 15:⁠6) Abraham i bilip olsem God i stap, tasol tu em i bilip long dispela pikinini God i bin tok promis long salim i kam. (Stat 3:15; 12:2; 15:5; 22:18) Bilip na ol wok em pasin bilong bilip i kamapim i as na Jehova inap pas wantaim Abraham na blesim em na ol narapela bilipman, maski ol i no gutpela olgeta.​—⁠Song 36:10; Rom 4:​20-22.

16. Pasin bilong bilip long pe bilong baim bek ol man i bin kamapim wanem ol gutpela samting?

¹⁶ Bilong ol man bilong graun i ken stap olsem stretpela man, ol i mas bilip long ofa bilong Jisas Krais bilong baim bek ol man. Pol i stori long ol Kristen long taim bilong ol aposel na i tok: “God i marimari long yumi, na long wok Krais Jisas i mekim bilong baim bek yumi, God i save kolim yumi stretpela manmeri. Yumi no kamap stretpela manmeri long wok yumi yet i mekim. Nogat. God i givim nating long yumi long han bilong Krais Jisas.” (Rom 3:24) Pol i toktok long ol man God i bin makim bilong wok king wantaim Krais long Kingdom bilong em long heven. Tasol ofa bilong Jisas i bin opim rot tu long planti milion narapela man bilong ol i ken kamap stretpela manmeri long ai bilong God. Long wanpela driman aposel Jon i bin lukim “planti manmeri tru ol i bung i stap, na i no inap man i kaunim namba bilong ol. . . . Ol i sanap i stap long pes bilong sia king na long ai bilong Pikinini Sipsip. Ol i bin putim ol longpela waitpela klos.” Waitpela klos i makim olsem ol i kamap klin na ol i stretpela manmeri long ai bilong God, long wanem, “ol i bin wasim ol klos bilong ol long blut bilong Pikinini Sipsip.”​—⁠KTH 7:​9, 14.

Amamas Long Stretpela Pasin Bilong Jehova

17. Ol man i mas mekim wanem ol samting bilong kamap stretpela man long ai bilong God?

¹⁷ Tru, Jehova i bin mekim gutpela pasin sori na givim pikinini bilong em, Jisas Krais, bilong ol man bilong graun i ken kamap stretpela manmeri long ai bilong em, tasol dispela samting i no kamap nating. Ol i mas bilip long pe bilong baim bek man, na stretim sindaun bilong ol na bai ol i bihainim ol pasin i stret long laik bilong God, ol i mas dediket long Jehova, na makim olsem ol i dediket long rot bilong kisim baptais long wara. Na ol i mas wok oltaim long kisim stretpela pasin na ol narapela gutpela pasin bilong spirit. Timoti, em i wanpela Kristen i baptais pinis em God i bin makim bilong go long heven, na Pol i strongim em long “wok long kisim stretpela pasin na pasin tru bilong God na pasin bilong bilip tru na pasin bilong laikim tru ol arapela na pasin bilong sanap strong na karim olgeta hevi na pasin bilong isi long ol manmeri.” (1 Timoti 6:11; 2 Timoti 2:22) Jisas tu i kamapim klia olsem oltaim man i mas wok strong, em i tok: “Tasol namba wan samting yupela i mas mekim i olsem. Yupela i mas larim God i stap king bilong yupela, na kisim stretpela pasin bilong em.” Ating yumi save mekim bikpela wok tru bilong kisim ol blesing bilong Kingdom bilong God, tasol olsem wanem? Yumi save mekim wankain bikpela wok bilong kisim stretpela pasin bilong Jehova?​—⁠Matyu 6:⁠33.

18. (a) I gat wanem as na i hatwok long wok oltaim long kisim stretpela pasin? (b) Pasin bilong Lot i lainim yumi long wanem samting?

¹⁸ Tru, i hatwok long wok oltaim long kisim stretpela pasin. Em i hatwok, long wanem, yumi no gutpela olgeta na laik bilong mekim ol pasin i no stret i stap long skin bilong yumi. (Aisaia 64:⁠6) Na tu, yumi stap namel long ol manmeri i no gat tingting liklik long bihainim stretpela pasin bilong Jehova. I stap bilong yumi i klostu wankain olsem bilong Lot, em i bin sindaun long taun Sodom i gat nem olsem em i taun i pulap long ol pasin nogut. Aposel Pita i bin stori long as na Jehova i ting i stret em i helpim Lot long abrusim bagarap i laik kamap. Pita i tok: “Dispela stretpela man em i stap namel long ol Sodom, na em i lukim pasin nogut bilong ol, na long olgeta de em i harim tok nogut bilong ol. Bel bilong en i stap stret, na em i kirap nogut na bel bilong en i pen tru long pasin bilong sakim lo ol i mekim.” (2 Pita 2:​7, 8) Olsem na i gutpela sapos yumi olgeta wan wan i askim yumi yet olsem: ‘Bel bilong mi i no gat tok long ol pasin nogut ol man i mekim long nau? Mi les tasol long ol pasin pait planti man i amamas long lukim long TV o insait long ol spot samting? O mi pilim wankain olsem Lot na bel bilong mi i pen tru long ol kain pasin nogut olsem?’

19. Yumi inap kisim wanem ol gutpela blesing sapos yumi amamas long stretpela pasin bilong God?

¹⁹ Nau long dispela taim nogut, pasin bilong amamas long stretpela pasin bilong Jehova i save lukautim yumi na helpim yumi long stap bel isi. Long dispela askim: “Bikpela, husat inap i stap long haus bilong yu? Husat inap sindaun long Saion, dispela maunten bilong yu yet?” King Devit i bekim olsem: “Man i bihainim laik bilong God long olgeta samting, na i mekim stretpela pasin oltaim.” (Song 15:​1, 2) Long rot bilong wok oltaim long kisim stretpela pasin bilong God na amamas long en, bai yumi inap i stap gut wantaim em na kisim blesing bilong em. Dispela i helpim yumi long stap belgut na amamas long yumi yet. Baibel i tok: “Sapos man i bihainim stretpela pasin na pasin bilong laikim tru ol arapela, em bai i stap gut na bai ol i mekim stretpela pasin long em na givim biknem long em.” (Sindaun 21:21) Na tu, taim yumi givim bel long bihainim stretpela pasin long olgeta samting yumi mekim, dispela bai helpim yumi long i stap wanbel wantaim ol narapela na mekim laip bilong yumi i kamap gutpela moa​—⁠long samting bilong skin na bilong spirit. Man bilong raitim song i tok: “Ol man i save bihainim tok bilong en na mekim stretpela pasin, ol i ken amamas.”​—⁠Song 106:⁠3.

[Futnot]

Yu Inap Stori Long Dispela?

• Stretpela pasin em i wanem samting?

• Olsem wanem stretpela pasin bilong God i poroman wantaim pasin bilong em long kisim bek ol man?

• Wanem samting i mekim na God inap tok ol man i stretpela manmeri?

• Yumi inap mekim wanem bilong amamas long stretpela pasin bilong Jehova?

[Ol Piksa long pes 15]

King Devit i tok olsem em i laikim tru ol lo bilong God

[Ol Piksa long pes 16]

God i tok Noa, Abraham, Sekaraia na Elisabet, na Kornilius, ol i stretpela manmeri. Yu save long as na God i tok olsem?