Kisim Save Long Tok Hait Bilong Pasin Bilong Givim Bel Long God
“Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim.”—1 PITA 2:21.
1. Jehova i gat wanem laik long tok hait bilong pasin bilong givim bel long em?
DISPELA ‘tok hait’ bilong pasin bilong givim bel long God em i no hait moa—em i kamap ples klia! (1 Timoti 3:16) Em i no olsem ol tok hait bilong lotu giaman, olsem tok bilong God Triwan samting. Dispela kain tok hait bai stap hait olgeta taim, long wanem, i no gat wanpela man i save long en. Tasol Jehova i laik bai tok hait bilong pasin bilong givim bel long em i mas kamap ples klia long rot bilong Krais Jisas, na em i kamap ples klia pinis, na stori bilong en i mas go kamap long olgeta hap na olgeta man i mas harim. Jisas yet i bin wok strong moa long autim tok bilong Kingdom bilong God, na em i makim rot bilong yumi tu i ken mekim olsem. Olsem na nau yumi ken kisim save long tok em i bin autim na pasin bilong em long autim dispela tok.
2. Bilong wanem Baibel i makim olsem namba wan wok bilong Jisas i bilong helpim ol man, na wok bilong givim laip bilong em i namba tu? (Matyu 20:28)
2 Orait yumi ken stori gen long taim Jisas i bin “kamap man tru” long graun. (1 Timoti 3:16) Matyu 20:28 i tok, Jisas “i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri.” Baibel i tok hia, namba wan wok bilong Jisas, em bilong helpim ol man; givim laip bilong em, em namba tu. Olsem wanem long dispela? Orait, bipo long Iden i olsem Satan i laik tok, Jehova i no king tru bilong ol man, na ol wok bilong Jehova i no gutpela tumas, na i no gat wanpela man inap i stap gut long God Antap Tru sapos traim i painim dispela man. (Lukim Jop 1:6-12; 2:1-10.) Jisas i bin mekim wok i gutpela olgeta, na em yet i nambawan gutpela, olsem “Adam i kamap bihain tru.” Satan i bin sutim tok long Jehova, tasol wok bilong Jisas i kamapim long ples klia olsem Satan i man nogut bilong tok giaman. (1 Korin 15:45) Na Jisas i kamapim long ples klia olsem em inap tru long mekim wok God i makim bilong em, olsem bilong “soim rot long yumi na kisim bek yumi” na “skelim pasin bilong olgeta manmeri bilong graun.” Na long dispela rot bai em i litimapim nem bilong Jehova, em i King tru bilong heven na graun.—Aposel 5:31; 17:31.
3. Jisas i mekim wanem na em i kamapim long ples klia olsem Satan em i man bilong giaman?
3 Satan i tok, no gat wanpela man inap i stap gut long God, tasol Jisas i stap gut long God! I no gat narapela man i bin givim bel long wok bilong God olsem Jisas i bin mekim. Ol man i tok bilas long em na paitim em na givim bikpela pen na hevi long em, tasol em i no lusim God. Em i Pikinini bilong God, tasol ol man i bin toknogutim em na semim em na rabisim em. Bihain ol i kilim em i dai, na taim ol i mekim olsem ol i givim bikpela pen long em na semim em, tasol em i stap strong long Papa bilong em; em i no surik o pundaun liklik, nogat; em i holimpas bilip. Long Filipai 2:8, 9 Pol i tok, Jisas “i bihainim tok bilong God, i go inap long em i dai, . . . Long dispela as tasol God i litimapim Jisas na mekim em i stap antap tru. Na God i givim em wanpela nem i gutpela tru na i winim olgeta arapela nem.” Ol dispela samting i kamapim long ples klia olsem Satan em i man nogut bilong mekim tok giaman!
4. Olsem wanem na Jisas inap tokim Pailat em i bin kam long graun bilong autim tok i tru?
4 Jisas i wok strong long autim tok inap sampela yia, olsem na bihain em inap tokaut strong long Pailat, olsem: “Mama i karim mi na mi kam long dispela graun bilong mekim wanpela wok tasol, em bilong autim tok tru, bai olgeta manmeri i ken harim. Na olgeta man i bihainim tok tru, ol i save harim tok bilong mi.” (Jon 18:37) Jisas i bin givim bel olgeta long autim tok bilong Kingdom bilong God long hap bilong Palestain. Na em i lainim ol disaipel bilong em tu long wok strong long autim tok. Pasin bilong em i mas kirapim yumi long wok strong olsem long nau!
Bihainim Pasin Bilong Man i Soim Rot long Yumi
5. Sapos yumi “lukluk i go long Jisas” yumi ken kisim wanem save long pasin bilong givim bel long God?
5 Sapos yumi givim bel long bihainim laik bilong God, bai yumi tu inap kamapim long ples klia olsem Satan em i man bilong giaman. Maski wanem kain hevi i painim yumi, yumi no karim bikpela pen na bikpela sem olsem Jisas i bin mekim. Olsem na yumi mas kisim save long pasin bilong dispela Man bilong soim rot long yumi, na yumi mas bihainim pasin bilong em. Yumi mas “lukluk i go long Jisas, em i as bilong bilip bilong yumi, na bihain em bai inapim tru bilip bilong yumi,” na yumi mas ran strong long resis, olsem Hibru 12:1, 2 i kirapim yumi long mekim. Adam i pundaun long traim; em i no givim bel tru long God. Tasol Jisas i winim olgeta hevi na traim i bin painim em long graun na em i stap gut long God. I no gat narapela man long dispela graun i bin mekim olsem. Inap long taim em i dai “em i save bihainim ol pasin God i laikim, na i no gat wanpela rong i stap long em. Em i klin olgeta long ai bilong God.” (Hibru 7:26) Em i no lusim lo bilong God liklik, olsem na em inap tokim ol birua bilong em: “Yupela i ting mi bin mekim sin, a? Sapos yupela i ting olsem, orait yupela i mas kamapim rong bilong mi.” Em i bekim tok Satan i bin sutim long ol man. Em i tok: “Hetman i save bosim dispela graun . . . i no gat strong bilong mekim wanpela samting long mi.” Klostu long taim Judas i laik kamapim Jisas long ol birua na bai ol i holim em, Jisas i mekim laspela tok bilong em long ol disaipel na em i tokim ol: “Bel bilong yupela i ken i stap strong. Mi winim pinis strong bilong dispela graun”—Jon 8:46; 14:30; 16:33.
6. (a) Olsem wanem Jisas i save long wanem kain malolo ol manmeri i mas kisim? (b) Jisas i aninit long God inap olsem wanem?
6 Taim Jisas i kam daun long graun em i pilim pinis hevi bilong ol man, long wanem em yet i kamap man bilong graun na em i stap “aninit long ol ensel.” (Hibru 2:7) Em i save long ol hevi i save painim ol, long wanem ol i sinman. Olsem na em inap tru long i stap King na Jas bilong ol long 1,000 yia. Dispela Pikinini bilong God em i bin tok, “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela.” Em i save long hevi bilong ol man na long wanem kain malolo ol i mas kisim. (Matyu 11:28) Long Hibru 5:7-9, Baibel i tok: “Taim Jisas i stap man long graun, em i save mekim prea na beten long God. Em i save, God inap long kisim bek em, na em i no [ken] i dai, olsem na em i beten strong long God, na em i singaut strong na i krai planti. Em i save daunim laik bilong em yet na i aninit long God, olsem na God i harim beten bilong em. Jisas em i Pikinini Bilong God, tasol em i karim pen, na dispela i skelim em tru long pasin bilong bihainim tok bilong God. Dispela i mekim em i kamap nambawan man tru bilong bihainim tok. Olsem na . . . em i kamap Man bilong helpim na kisim bek olgeta manmeri i bihainim tok bilong em, bai ol i stap gut oltaim oltaim.” Jisas i no surik liklik, maski em i mas i dai tu taim Snek nogut i “kaikaim lek” bilong em. (Stat 3:15) Yumi mas bihainim pasin bilong Jisas na oltaim yumi mas aninit long God, maski yumi mas i dai tu. Na yumi ken bilip tru olsem God Jehova bai harim beten bilong yumi na kisim bek yumi.
“Bihainim Ol Pasin i Stret Olgeta”
7. Jisas i makim wanem gutpela pasin yumi ken bihainim, olsem 1 Pita 2:21-24 i stori long en? Pasin bilong Jisas i mas mekim wanem long yumi?
7 Taim Jisas i stap man long graun em i stap gut long God na em i kamapim long ples klia pasin bilong givim bel long God. Long 1 Pita 2:21-24 Baibel i tok: “Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim. Em i no bin mekim sin, na tu em i no bin mekim wanpela tok giaman. Ol i bin tok nogut long em, tasol em i no bekim tok nogut bilong ol. Em i karim pen, tasol em i no tok long bagarapim ol. Nogat. Em i putim em yet long han bilong God, em dispela Jas i save skelim stret olgeta samting. Krais i bin hangamap long diwai [pos] na i karim sin bilong yumi long bodi bilong em yet. Em i mekim olsem bai yumi ken lusim pasin bilong sin olgeta, na yumi ken i stap laip na bihainim ol pasin i stret olgeta.” Taim yumi tingim ol pasin Jisas i bin mekim, dispela i strongim yumi long bihainim pasin bilong givim bel long God na holimpas lo bilong em na bihainim ol pasin i stret olgeta, olsem Jisas i bin mekim!
8. Olsem wanem yumi ken bihainim ol pasin i stret olgeta, olsem Jisas i bin mekim?
8 Jisas i bin bihainim tru ol pasin i stret olgeta. Buk Song 45:7 i mekim tok profet long em na i tok: “Yu save laikim stretpela pasin na yu no laikim tru pasin nogut.” Long Hibru 1:9 aposel Pol i kamapim dispela tok i makim Jisas na Pol i tok: “Yu save laikim stretpela pasin, na yu no laikim tru pasin nogut.” Yumi save pinis long as bilong dispela tok hait long pasin bilong givim bel long God, olsem na yumi mas mekim pasin olsem Jisas i bin mekim—long olgeta taim yumi mas laikim tumas stretpela pasin na nolaik tru long pasin nogut. Long nau ol lain bilong Satan i wok long bagarapim ol stretpela pasin Kristen, tasol long olgeta pasin yumi mekim long ol manmeri insait na ausait long kongrigesen, yumi mas tingting strong oltaim long bihainim ol pasin i stret, na bihainim ol stretpela lo bilong Jehova. Na long olgeta taim yumi mas kaunim ol tok bilong God long Baibel bambai yumi inap kisim gutpela save na tingting i kam long God, na bai yumi inap sanap strong na sakim Satan na olgeta samting em i mekim bilong pundaunim yumi!
9. Wanem narapela samting i kirapim Jisas long givim bel long autim tok na helpim ol man? Olsem wanem long ol wasman giaman bilong lotu?
9 Na i gat narapela samting tu i bin kirapim bel bilong Jisas long wok strong long autim tok na helpim ol man. Matyu 9:36 i tok: “Em i lukim ol bikpela lain manmeri, na em i sori tru long ol, long wanem, tingting bilong ol i paul nabaut, na ol i stap nogut tru, olsem ol sipsip i no gat wasman.” Na olsem Mak 6:34 i tok, Jisas i kirap long “givim planti tok long ol.” Em i mas givim tok long ol bilong kamapim tu pasin nogut bilong ol wasman giaman bilong lotu. Matyu 15:7-9 i kolim tok Jisas i bin mekim long sampela wasman giaman olsem, em i tok: “Yupela i man bilong giaman. Profet Aisaia i bin makim tru pasin bilong yupela taim em i tok olsem, ‘Ol dispela lain manmeri ol i save litimapim nem bilong mi long maus bilong ol, tasol bel na tingting bilong ol i stap longwe tru long mi. Ol i save autim lo bilong ol man tasol na tok, “Dispela em i tok bilong God.” Olsem na ol i lotu nating long mi.’ ”
Wanpela Pasin Nogut i Stap Hait
10. “Dispela pasin bilong sakim lo em i wok hait i stap,” long nau em i makim wanem lain? Ol i gat wanem rong?
10 Jisas i bin tokaut strong long pasin nogut bilong ol bikman bilong ol lotu giaman, na olsem tasol long nau yumi save nolaik tru na tokaut strong long wanpela pasin nogut em i hait i stap na i narapela kain tru long dispela gutpela tok hait long pasin bilong givim bel long God. Long 2 Tesalonaika 2:7 Pol i stori long dispela narapela samting i stap hait, na em i tok, “Nau dispela pasin bilong sakim lo em i wok hait i stap.” Long taim bilong ol aposel dispela samting i stap hait, long wanem, i no taim bilong em i kamap ples klia. Bihain tru long taim ol aposel i dai pinis, em i mas i kamap ples klia. Long nau em i makim ol bikman bilong ol misin ol i kolim Kristen. Ol dispela bikman i moa tingim wok politik, na ol i no tingim wok bilong autim gutpela tok long stretpela Kingdom bilong God. Ol i man bilong tupela maus. Sampela evanselis bilong ol lotu Talatala ol i kain man bilong giaman olsem—ol i save kamapim ol tok bilong lotu long televisen, tasol ol i mekim olsem bilong pulim mani bilong ol man na ol i mekim lotu bilong ol i kamap olsem bikpela bisnis, na ol i prenim ol meri pamuk, na ol i krai giaman long taim rong bilong ol i kamap ples klia, tasol ol i singaut yet long mani—ol i laikim moa moa mani. Ol bikman bilong lotu Katolik tu i mekim wankain pasin nogut—ol i insait long ol wok politik i no stret, na ol i mekim ol bilaspasin bilong lotu bambai ol man i ken lukim, na ol i mekim wok i no stret long mani bilong misin long beng.
11. Bihain bai wanem samting i painim ol pris pasto bilong ol misin ol i kolim Kristen na olgeta narapela lain bilong Bikpela Babilon?
11 Olsem na yumi ken tok, ol dispela bikman bilong lotu i olsem “man bilong sakim lo”! (2 Tesalonaika 2:3) Ol dispela lotu i bikpela hap bilong dispela meri pamuk, nem bilong en Bikpela Babilon, na bihain God bai kamapim tru pasin bilong ol na God bai bagarapim ol wantaim olgeta narapela lotu giaman. Kamapim Tok Hait 18:9-17 i tok, long dispela taim bai ol man bilong politik na bisnis (na ol man i bosim beng bilong ol) bai krai na tok: “Sori, sori tumas long yu Babilon, yu bikpela na strongpela taun!” God bai kamapim long ples klia Bikpela Babilon na ol tok hait bilong en, em dispela i narapela kain tru long ol samting i kamapim long ples klia as bilong tok hait long pasin bilong givim bel long God.
12. Jisas i laikim tumas stretpela pasin na dispela i kirapim em long mekim wanem?
12 Jisas i laikim tumas stretpela pasin na em i nolaik tru long pasin bilong sakim lo, na dispela i kirapim em long wok strong long helpim ol samting bilong lotu i tru. Taim God i kapsaitim pinis spirit bilong em long dispela Pikinini bilong em na em i go long Jerusalem long namba wan taim bihain long dispela, em i rausim ol man i mekim wok bisnis na wok mani long haus lotu na em i tok: “Kisim ol [dispela samting] i go. Yupela i no ken mekim haus bilong Papa bilong mi i kamap olsem haus bilong maket.” (Jon 2:13-17) Na long narapela taim bihain em i go long haus lotu na em i tokim ol Juda ol i birua long em, olsem: “Yupela i pikinini bilong papa bilong yupela, em Satan. Na yupela i strong long bihainim ol laik bilong papa bilong yupela. Bipo yet em i stap man bilong kilim ol man i dai. Na em i no bihainim pasin i tru, long wanem, pasin i tru em i no i stap long em.
Tok giaman em i save mekim, dispela em i tok bilong em stret. Em i man bilong tok giaman, na em i papa tru bilong pasin bilong tok giaman.” (Jon 8:44) Jisas i no pret liklik long tokaut long ol dispela bikman bilong lotu na tokim ol stret olsem ol i man bilong giaman na ol i lain bilong Satan!
13. (a) Long wanem hap bilong Baibel Jisas i kamapim long ples klia olsem em i nolaik tru long pasin bilong sakim lo? (b) Ol pris pasto long nau ol i sakim lo bilong God, bilong wanem i stret wankain strafe i mas painim ol olsem Jisas i kolim bilong ol saveman bilong lo na ol Farisi long bipo?
13 Jisas i nolaik tru long pasin bilong sakim lo, na em i kamapim dispela tingting bilong em taim em i krosim nogut ol saveman bilong lo na ol Farisi, olsem yumi lukim long Matyu sapta 23. Inap 7-pela taim em i tokim ol ol i mas “lukaut,” na em i tok, ol i olsem ‘matmat ol i bin penim long waitpela pen na insait long en i gat olgeta samting i doti na ol pasin bilong giaman na pasin bilong sakim lo i pulap long en.’ Jisas i laik tru long helpim ol man i bin kisim hevi long pasin nogut bilong ol dispela bikman bilong lotu! Em i sori long ol na em i tok: “Jerusalem, Jerusalem, . . . Planti taim moa mi laik bungim ol pikinini bilong yu, olsem kakaruk meri i save bungim ol pikinini bilong en aninit long wing bilong en. Tasol yupela i no laik. Harim. Nau ples bilong yupela bai i bagarap na i stap nating.” (Matyu 23:37, 38) Wankain strafe bai painim ol bikman bilong lotu long nau, long wanem ol tu i bin sakim lo, olsem 2 Tesalonaika 2:12 i tok, ol “i no bin bilipim tok tru, na ol i bin amamas long mekim pasin nogut tasol.” Ol i save sakim lo bilong God, olsem na pasin bilong ol i narapela kain tru long pasin bilong Jisas—Jisas i givim bel long God na em i kamapim gut dispela pasin taim em i stap long graun.
Tokaut long Strafe Bilong God
14. Sapos yumi laikim tru dispela tok hait long pasin bilong givim bel long God, dispela bai kirapim yumi long mekim wanem?
14 Dispela tok hait long pasin bilong givim bel long God, sapos yumi laikim dispela samting bai yumi bihainim stret pasin bilong Jisas long olgeta taim. Olsem em i bin mekim, yumi tu i mas wok strong long autim tok bilong dispela samting em Aisaia 61:2 i kolim olsem taim bilong “God, Bikpela bilong yumi, i laik mekim gut long ol manmeri bilong en na mekim save long ol birua bilong ol.” Na yumi ken wok strong tu long bringim gutpela tok i go long ol manmeri i bel hevi bilong “strongim bel bilong ol” na pinisim bel hevi bilong ol. Na olsem long taim bilong Jisas, long nau tu yumi mas strongim bel na autim tok long strafe bilong Jehova i laik painim ol man nogut, na yumi mas autim tu ol strongpela tok, olsem i stap long sampela Wastaua na long wanpela buk tok Inglis (Revelation—Its Grand Climax At Hand!) i stori long as bilong ol tok bilong Baibel long hap bilong Revelesen o Kamapim Tok Hait. Yumi mas strong long autim dispela tok na no ken pret, tasol oltaim yumi mas “mekim gutpela tok” na bai ol man i gat gutpela bel ol i ken pilim na laikim. (Kolosi 4:6) Yumi kisim save pinis long pasin bilong Jisas long bihainim pasin bilong givim bel long God, olsem na gutpela sapos bihain yumi inap long tok, yumi inap pinis wok Jehova i bin givim long yumi.—Matyu 24:14; Jon 17:4.
15. Kirap long yia 1914 na bihain long en, olsem wanem long dispela tok hait bilong God?
15 Taim Jisas i bin “kamap man tru” em i mekim gutpela pasin tru bilong yumi ken bihainim! Em i kamapim long ples klia pasin bilong givim bel long God! Em i litimapim tru nem bilong Jehova na em i no pret liklik long mekim! Em i holimpas lo bilong Papa bilong em, olsem na Papa i givim bikpela pe tru long em! Na i gat sampela samting moa i stap bilong dispela ‘tok hait.’ “De bilong Bikpela” i kirap long yia 1914 na i stap yet, olsem na nau yumi stap long dispela “de.” (Kamapim Tok Hait 1:10) Kamapim Tok Hait 10:7 i tok, long dispela taim “dispela samting God i laik mekim na tok bilong en i bin hait i stap, em bai God i mekim i kamap tru.” Ol ensel long heven ol i autim pinis tok olsem: “Bikpela bilong yumi [em Jehova] wantaim dispela man em i makim bilong kisim bek ol manmeri bilong en [Krais], tupela i kamap king bilong olgeta hap bilong graun. Na Bikpela bai i stap king oltaim oltaim.” (Kamapim Tok Hait 11:15) Jehova i putim pinis Krais Jisas long gutpela sia king bilong em na bai em i ken wok king wantaim Jehova.
16. Taim Krais Jisas i kirap mekim wok king, kwiktaim em i mekim wanem na dispela i makim olsem em i laik bai ol lain long heven tu i mas bihainim pasin bilong God?
16 Taim Kingdom i kamap nupela na Jisas i kirap mekim wok king wantaim God, Baibel i kolim narapela nem long Jisas, em Maikel (insait bilong en i olsem “Husat i Kain Olsem God?”). No gat wanpela man bilong bikhet inap kamap kain olsem God, na taim Jisas i kamap King pinis, kwiktaim em i kamapim dispela samting long ples klia—em i tromoi dispela Snek bilong bipo yet, em Satan, na ol ensel bilong Satan, i go daun long graun. (Kamapim Tok Hait 12:7-9) Taim Jisas i stap long graun em i givim bel long God na em i strong long bihainim ol pasin bilong God, na em i laik bai dispela pasin i stap long heven tu. King Krais Jisas bai wok strong i go inap long taim em i pinisim olgeta lotu giaman na em i pinisim lain bilong Satan olgeta, long heven na long graun.
17. Kirap long yia 1914 na bihain long dispela taim, olsem wanem long truim bilong Matyu 25:31-33?
17 Kirap long yia 1914, truim bilong tok profet bilong Jisas long Matyu 25:31-33 i kamap, na dispela samting i strongim dispela “tok bilong [God] i bin hait i stap.” Jisas i bin tok: “Taim Pikinini Bilong Man i kam bek olsem king wantaim olgeta ensel, orait em bai i sindaun long sia king bilong en. Na olgeta lain manmeri bai ol i kam bung long pes bilong em. Na em bai i tilim ol na putim ol long tupela lain, olsem wasman i save tilim ol sipsip i go long hap na ol meme i go long hap. Em bai i putim ol sipsip long han sut bilong en, na ol meme long han kais.” Nau Jisas i wanpela bikpela King na Jas na em i Man bilong kirapim ol man long givim bel long God. Em i stap long heven na i lukluk i kam daun long graun, na em bai mekim save long dispela “man bilong sakim lo” na long ol narapela lain bilong Bikpela Babilon, na bihain bai em i mekim olsem long olgeta narapela hap bilong lain nogut bilong Satan long graun na long ol man i bin helpim dispela lain, em ol i olsem meme. Mekim pinis, na nau Jisas bai kalabusim Satan. (Kamapim Tok Hait 20:1-3) Tasol “ol stretpela manmeri” bai kisim laip i stap oltaim. (Matyu 25:46) I gutpela sapos wok bilong yu long givim bel long God i helpim yu tu long kisim laip oltaim wantaim ol dispela “stretpela manmeri”!
18. Yumi gat wanem gutpela wok yumi ken mekim long dispela tok hait bilong pasin bilong givim bel long God?
18 Kamapim Tok Hait 19:10 i kirapim yumi bai yumi “lotu long God.” Bilong wanem yumi mas mekim olsem? Long wanem, olsem ves 10 i tok, wok bilong autim nem bilong Jisas, dispela tasol “i save kirapim ol man long autim tok profet.” Planti tok profet bilong bipo em spirit holi i bin kirapim ol man long mekim, ol i makim Jisas! Truim bilong ol dispela tok profet i kamap pinis, olsem na “tok bilong [God] i bin hait i stap” em i kamap ples klia pinis. (Kamapim Tok Hait 10:7) Nau yumi save, “as tok bilong pasin bilong [givim bel long] God,” em Jisas tasol, na yumi amamas long dispela. Yumi gat gutpela wok tru long bihainim lek bilong Jisas na bihainim pasin daun na i stap wokman bilong Kingdom bilong God. Em gutpela samting tru, yumi inap save long olgeta samting bilong dispela tok hait long pasin bilong givim bel long God, em “dispela gutnius,” na yumi ken autim long olgeta man!
Bai Yu Bekim Wanem Tok?
◻ Pasin bilong Jisas long givim bel long God inap lainim yumi long wanem samting?
◻ Olsem wanem yumi ken bihainim ol pasin i stret olgeta olsem Jisas i bin mekim?
◻ Wanem samting nogut i hait i stap na em i narapela kain tru long tok hait bilong God long pasin bilong givim bel long em?
◻ Sapos yumi laikim tru dispela tok hait long pasin bilong givim bel long God, dispela bai kirapim yumi long mekim wanem?
[Piksa long pes 17]
Jisas i kirapim ol man long givim bel long God na em i wok strong long autim tok bilong Kingdom, olsem na em inap tokim Pailat: “Mi kam long dispela graun bilong mekim wanpela wok tasol, em bilong autim tok tru”
[Piksa long pes 20]
Taim Jisas i tokaut strong long pasin nogut bilong ol saveman bilong lo na ol Farisi em i kamapim long ples klia olsem em i givim bel long God