Ol Ofa i Litimapim Nem Bilong Jehova na Em i Laikim
“Yupela i mas givim bodi bilong yupela long God olsem ofa i stap laip na i holi na God i save laikim.”—ROM 12:1, NW.
1. Baibel i tok wanem long strong bilong ol ofa ol i mekim aninit long Lo Bilong Moses?
“LONG Lo Bilong Moses yumi save lukim piksa o tewel tasol bilong ol gutpela samting i laik kamap bihain. Tasol em i no soim yumi gut tru long ol dispela samting. Lo i tok, ol i mas mekim ol wankain ofa tasol long olgeta yia, olsem na yumi save, lo i no inap stretim tru ol manmeri i kam long haus lotu. Lo i no inap mekim ol i kamap gutpela tru. Nogat.” (Hibru 10:1) Dispela tok bilong aposel Pol i kamapim klia olsem olgeta ofa ol i mekim aninit long Lo Bilong Moses ol i no gat strong long kisim bek tru ol man.—Kolosi 2:16, 17.
2. Sapos yumi wok strong long kisim gut ol tok bilong Baibel i stori long ol ofa, bilong wanem dispela wok bilong yumi i no inap lus nating?
2 Yu ting dispela i makim olsem ol 5-pela buk bilong Pentatuk i stori long ol ofa em i no inap helpim ol Kristen long nau? Nau tasol, insait long wanpela yia samting, ol man insait long Skul Bilong Wok Autim Tok long ol kongrigesen bilong ol Witnes Bilong Jehova long olgeta hap, ol i kaunim dispela 5-pela buk bilong Baibel, em Buk Stat i go inap Buk Lo. Sampela i bin wok strong bambai ol inap kaunim na save gut long olgeta liklik liklik tok bilong en. Yu ting hatwok bilong ol i lus nating? Nogat tru, long wanem, ‘olgeta tok bipo ol i bin raitim long buk bilong God, ol i bilong skulim yumi na strongim bel bilong yumi na mekim yumi sanap strong na wetim God i kisim yumi.’ (Rom 15:4) Olsem na i gat askim olsem: Ol tok bilong Lo i stori long ol ofa, em inap “skulim” na “strongim bel” bilong yumi olsem wanem?
Bilong Skulim na Strongim Bel Bilong Yumi
3. Yumi mas i gat helpim long wanem samting?
3 Tru, yumi no gat wok long mekim ol ofa olsem Lo i makim, tasol samting ol ofa i bin helpim ol Israel long en, em samting yumi tu i mas kisim helpim long en—yumi laik bai God i ken lusim ol rong bilong yumi na orait long yumi. Tasol long nau yumi no save ofaim moa ol animal, olsem na i gat wanem rot na yumi ken kisim kain helpim olsem? Taim Pol i stori pinis long samting ofa bilong ol animal i no inap helpim ol man long en, em i tok: “Taim Krais i kam long graun, em i tok olsem, ‘Yu no laik bai ol i kilim abus na mekim ofa. Tasol yu bin redim wanpela bodi bilong givim long mi. Ol ofa ol i save kukim olgeta long paia, na ol ofa bilong tekewe sin, em tu yu no laikim. Orait nau mi tok olsem, “God, mi kam pinis. Olsem bipo ol i raitim tok long mi long buk. Nau mi kam pinis bilong bihainim laik bilong yu.” ’ ”—Hibru 10:5-7.
4. Olsem wanem Pol i soim olsem tok bilong Song 40:6-8 i stret long Jisas Krais?
4 Pol i kamapim tok bilong Song 40:6-8 bilong soim olsem Jisas i no kam bilong strongim pasin bilong “kilim abus na mekim ofa,” na “ol ofa ol i save kukim olgeta long paia, na ol ofa bilong tekewe sin,” nogat. Long taim Pol i raitim pas bilong em, God i no orait moa long ol dispela ofa. Tasol Jisas i kam wantaim bodi em Papa bilong em long heven i bin redim—dispela bodi i wankain stret long bodi God i bin redim taim Em i wokim Adam. (Stat 2:7; Luk 1:35; 1 Korin 15:22, 45) Jisas em i Pikinini bilong God na em i gutpela olgeta, olsem na em i dispela ‘pikinini’ bilong meri em Stat 3:15 i tok profet long en. Jisas bai kirap na mekim wok bilong ‘krungutim Satan long het,’ maski Satan bai ‘kaikaim lek bilong em.’ Long dispela pasin, Jisas i kamap olsem rot bilong Jehova i ken kisim bek ol man, em samting ol bilipman i bin wet long en, kirap long taim bilong Abel.
5, 6. Wanem gutpela samting tru i opim rot bilong ol Kristen i ken i go klostu long God?
5 Taim Pol i stori long dispela bikpela wok bilong Jisas, em i tok: “Krais i no save mekim sin, tasol God i laik helpim yumi, olsem na em i bin bungim olgeta sin bilong yumi antap long em, na Krais i kamap olsem man bilong mekim sin tru. God i mekim olsem bai yumi ken i stap long Krais, na long strong bilong em yumi ken kamap stretpela manmeri bilong God.” (2 Korin 5:21) Dispela tok, “kamap olsem man bilong mekim sin tru,” yumi ken tanim tu olsem ‘kamap olsem ofa bilong tekewe sin.’ Aposel Jon i tok: “Em yet i bin mekim wok bilong tekewe sin bilong yumi. Na em i no mekim dispela wok bilong helpim yumi tasol. Nogat. Em i mekim bilong helpim olgeta manmeri i stap long graun.” (1 Jon 2:2) Ol Israel inap go klostu long God inap sotpela taim long rot bilong ol ofa bilong ol, tasol ol Kristen inap go klostu long God long rot bilong samting i winim tru ol dispela ofa—em ofa bilong Jisas Krais. (Jon 14:6; 1 Pita 3:18) Sapos yumi bilip long dispela ofa God i bin givim na yumi bihainim tok bilong Em, orait God bai lusim ol rong bilong yumi tu na orait long yumi na mekim gut long yumi. (Jon 3:17, 18) Taim yumi tingim dispela samting, dispela i mekim gut bel bilong yumi, a? Tasol olsem wanem yumi inap soim olsem yumi bilip long dispela ofa bilong baim bek man?
6 Aposel Pol i stori pinis long ol Kristen i gat gutpela samting tru i opim rot bilong ol i ken i go klostu long God, orait nau, long Hibru 10:22-25, em i stori long tripela samting yumi ken mekim bilong soim olsem yumi bilip na pilim tru dispela gutpela samting God i givim long yumi. Maski Pol i givim dispela tok long ol lain bilong i “go insait long Rum Tambu Tru bilong haus bilong God”—em ol Kristen God i bin makim ol bilong i go long heven—olgeta manmeri i mas tingim gut dispela tok bilong Pol sapos ol i laik bai ofa bilong Jisas i ken helpim ol.—Hibru 10:19.
Mekim Ol Ofa i Klin
7. (a) Olsem wanem ol tok bilong Hibru 10:22 i stret long pasin ol i bin bihainim long mekim ofa? (b) Ol i mas mekim wanem na bai God i ken orait long ofa?
7 Pastaim, Pol i tokim ol Kristen: “Em i bin tromoi blut bilong en long bel bilong yumi, bilong pinisim asua bilong ol pasin nogut yumi bin mekim na bilong mekim yumi i save olsem yumi stap klin tru long ai bilong God. Na em i bin wasim bodi bilong yumi long wara i klin tru. Olsem na . . . yumi mas bilip tru long God na yumi mas i go klostu long em.” (Hibru 10:22) Ol tok long dispela ves i stret long pasin ol i bin bihainim long mekim ofa aninit long Lo. Dispela i stret, long wanem, bilong God i ken laikim wanpela ofa, stretpela tingting i mas kirapim man long mekim ofa, na animal em i ofaim i mas klin long ai bilong God na skin bilong en i gutpela. Sapos man i bringim wanpela animal bilong mekim ofa, em i mas kisim wanpela bulmakau o sipsip o meme, olsem wanpela klinpela animal, na i mas “gutpela tru” na i no gat sua samting long skin bilong en. Sapos man i bringim wanpela pisin bilong mekim ofa, em i mas kisim pisin ol i kolim balus. Taim man i bihainim ol dispela pasin long mekim ofa, God i “belgut long dispela ofa bilong tekewe ol sin bilong dispela man.” (Wok Pris 1:2-4, 10, 14; 22:19-25) Taim ol i mekim ofa bilong kukim wit, ol i no save putim yis long en—yis i makim samting i nogut—na ol i no putim hani, olsem wara bilong prut, em inap mekim wok olsem yis. Taim ol i ofaim animal o wit antap long alta, ol i save putim sol long ofa. Sol i save mekim na kaikai i no bagarap.—Wok Pris 2:11-13.
8. (a) Man i mekim ofa, em i mas i stap olsem wanem? (b) Olsem wanem yumi ken save Jehova i orait long pasin bilong yumi long lotuim em?
8 Olsem wanem long man i mekim ofa? Lo i tok man i kam klostu long Jehova em i mas i stap klin long ai bilong em. Olsem na sapos wanpela samting i mekim na man i bin kamap doti long ai bilong God, orait pastaim em i mas mekim ofa bilong tekewe sin o ofa bilong pinisim asua na bai em inap kamap klin gen long ai bilong Jehova, na nau Jehova i ken orait long ofa bilong em, em ofa ol i kukim olgeta long paia o ofa bilong kamap wanbel wantaim God. (Wok Pris 5:1-6, 15, 17) Orait, olsem wanem long yumi yet? Yumi pilim tru olsem oltaim yumi mas stap klin, o stret, long ai bilong Jehova? Bilong God i ken orait long lotu bilong yumi, yumi mas kirap kwik na stretim ol rong yumi mekim long brukim ol lo bilong God. Yumi mas hariap na kisim ol samting God i putim bilong helpim yumi—“ol hetman bilong sios” na ofa “bilong tekewe sin bilong yumi,” em Jisas Krais.—Jems 5:14; 1 Jon 2:1, 2.
9. Wanem bikpela samting i mekim na ol ofa ol i givim long Jehova em i narapela kain long ol ofa ol i givim long ol god giaman?
9 Pasin bilong klia long olkain samting i doti, dispela i mekim na ol ofa ol i givim long Jehova i narapela kain long ol ofa em ol lain i stap klostu long lain Israel ol i givim long ol god giaman. Wanpela buk i stori long ol ofa aninit long Lo Bilong Moses olsem: ‘Taim ol i mekim ofa, ol i no save mekim pasin bilong glasman, o tromoi nabaut skin bilong ol na singaut singaut, o mekim pasin bilong lotu olsem pamuk, o katkatim skin bilong ol, o kilim man olsem ofa, o mekim ofa bilong tingim man i dai pinis, nogat.’ Ol dispela samting i kamapim klia olsem: Jehova em i holi, na em i no orait liklik long sin na pasin nogut, maski em i wanem kain. (Habakuk 1:13) Lotu na ol ofa i mas klin long ai bilong em—long skin, long pasin, na long ol samting bilong spirit.—Wok Pris 19:2; 1 Pita 1:14-16.
10. Olsem Pol i tok long Rom 12:1, 2, yumi mas glasim yumi yet olsem wanem?
10 Olsem na yumi mas glasim yumi yet long olgeta samting long i stap bilong yumi na bai yumi ken save Jehova i orait long ol wok yumi mekim bilong lotuim em o nogat. Yumi no ken ting olsem sapos yumi go long ol miting Kristen na autim tok, orait samting yumi mekim long sindaun bilong yumi i no bikpela samting, nogat. Na yumi no ken ting sapos yumi insait long sampela wok Kristen, orait yumi no gat wok long bihainim ol lo bilong God long ol narapela samting long i stap bilong yumi. (Rom 2:21, 22) Sapos yumi larim samting i doti long ai bilong God i bagarapim tingting na pasin bilong yumi, yumi no ken tingting long kisim blesing long God o em bai orait long yumi, nogat. Tingim tok bilong Pol: “Yupela i mas givim bodi bilong yupela long God olsem ofa [“i stap laip na i holi na God i save laikim,”NW ]. Yupela i mekim olsem na yupela i ken lotu tru long God. Na yupela i no ken wokabaut wankain olsem ol man bilong dispela graun. Nogat. Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap long save tru long laik bilong God. Bai yupela i save long ol pasin i gutpela na long ol pasin God i laikim tumas na long ol pasin i inap tru na i stret olgeta.”—Rom 12:1, 2.
Givim Bel Long Litimapim Nem Bilong God Olsem Ofa
11. Dispela tok olsem “tokaut” long Hibru 10:23 i makim wanem samting?
11 Taim Pol i raitim pas long ol Hibru, em i kamapim wanpela bikpela samting bilong pasin bilong lotu tru long God: “Yumi save tokaut long bilip bilong yumi na long ol gutpela samting yumi wetim i stap. Orait yumi mas holim strong bilip bilong yumi, na yumi no ken pret na surik. Yumi save, olgeta samting God i tok pinis long mekim, tru tumas bai em i mekim.” (Hibru 10:23) Insait bilong dispela tok “tokaut” i olsem “autim,” na Pol i tok tu long pasin bilong ‘litimapim nem bilong God olsem ofa.’ (Hibru 13:15) Dispela i kirapim yumi long tingim ofa ol man olsem Abel, Noa, na Abraham i bin mekim.
12, 13. Taim wanpela Israel i mekim ofa em paia i kukim olgeta, i olsem em i tokaut long wanem samting? Yumi ken mekim wanem bilong kamapim wankain tingting?
12 Taim wanpela Israel i mekim ofa bilong paia i kukim olgeta, em i save mekim long laik bilong em yet. (Wok Pris 1:3, NW ) Long rot bilong dispela kain ofa em i tokaut long ol planti gutpela samting Jehova i bin givim long lain bilong Em. Yumi ken tingim gen wanpela bikpela samting bilong ofa em paia i kukim olgeta: Paia i kukim olgeta hap bilong dispela ofa antap long alta—dispela i makim pasin bilong dediket na givim bel olgeta long Jehova. Na olsem tasol, yumi soim olsem yumi tenkyu na bilip long ofa bilong baim bek man, taim yumi givim bel olgeta long ‘litimapim nem bilong God, olsem ofa yumi givim long em,’ na yumi mekim long laik bilong yumi yet.
13 Tru, ol Kristen i no save kisim wanpela animal o kaikai bilong gaden na mekim ofa, tasol ol i gat wok long autim gutnius bilong Kingdom na kamapim ol disaipel bilong Jisas Krais. (Matyu 24:14; 28:19, 20) Olsem wanem? Yu save mekim wok long ol rot i op bilong autim gutnius bilong Kingdom bilong God na bai planti man moa i ken kisim save long ol gutpela gutpela samting God i laik kamapim bilong helpim ol man i bihainim tok? Yu amamas long lusim taim na strong bilong yu long lainim ol man i laik harim tok na helpim ol long kamap disaipel bilong Jisas Krais? Taim yumi givim bel long autim tok, olsem gutpela smel bilong ofa em paia i kukim, dispela i gutpela samting tru long ai bilong God.—1 Korin 15:58.
Amamas Long Bung Wantaim God na Ol Man
14. Olsem wanem tok bilong Pol long Hibru 10:24, 25 i kirapim yumi long tingim ofa bilong kamap wanbel?
14 Las tru, Pol i toktok long pasin yumi mas mekim long ol wanlain Kristen taim yumi lotu long God. Em i tok: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim, olsem sampela man i save mekim. Nogat. Yupela i save, De bilong Krais em i kam klostu. Olsem na yumi wan wan i mas wok strong moa long strongim bel bilong ol arapela.” (Hibru 10:24, 25) Dispela tok “painim rot bilong kirapim ol long laikim ol arapela na mekim ol gutpela pasin long ol,” na “pasin bilong bung wantaim,” na “strongim bel bilong ol arapela,” em i kirapim yumi long tingim samting em ofa bilong kamap wanbel i bin mekim long ol manmeri bilong God long Israel.
15. Olsem wanem ofa bilong kamap wanbel wantaim God em i wankain long ol miting Kristen?
15 Sampela taim yumi tanim dispela tok “ofa bilong kamap wanbel wantaim God” olsem “ofa bilong stap bel isi.” Tok Hibru bilong dispela tok “bel isi,” ating em i makim olsem taim man i mekim dispela ofa, dispela i helpim em long i stap bel isi wantaim God na ol wanlotu. Wanpela saveman i stori long ofa bilong kamap wanbel wantaim God, olsem: ‘Em taim bilong amamas wantaim God Bilong Kontrak—em i save mekim pasin daun na kaikai wantaim ol Israel, olsem Man ol i bin singautim em i kam long kaikai.’ Dispela i kirapim yumi long tingim tok promis bilong Jisas: “Sapos tupela o tripela man i kam bung long nem bilong mi, orait mi yet mi stap namel long ol.” (Matyu 18:20) Olgeta taim yumi go long wanpela miting Kristen, ol narapela i save strongim yumi, na yumi harim ol gutpela tok bilong strongim yumi, na Bikpela bilong yumi, Jisas Krais, em i stap wantaim yumi. Dispela i mekim na ol miting Kristen i olsem taim bilong kisim bikpela amamas na strongim bilip bilong yumi.
16. Yumi tingim ofa bilong kamap wanbel wantaim God, na wanem samting i mekim na ol miting i samting bilong kisim bikpela amamas long en?
16 Long ofa bilong kamap wanbel wantaim God, ol i kisim olgeta gris—gris bilong ol rop bilong bel, na bilong tupela namba 2 lewa, na bilong sangana bilong lek, na gutpela hap bilong namba wan lewa, na tel bilong sipsip i gat bikpela gris—na kukim long paia antap long alta olsem ofa long Jehova. (Wok Pris 3:3-16) Ol i tingim gris em i nambawan gutpela hap bilong animal. Taim ol i ofaim long alta, dispela i makim olsem ol i givim samting i nambawan tru long Jehova. Samting i mekim na ol miting Kristen em samting bilong kisim bikpela amamas long en, i olsem: Yumi kisim save, na tu, yumi litimapim nem bilong Jehova, olsem ofa yumi givim long em. Yumi mekim long taim yumi givim bel long mekim singsing, na putim gut yau, na bekim tok taim yumi gat rot. Man bilong raitim Song i tok: “Litimapim nem bilong Bikpela! Singim nupela song long em. Yupela ol manmeri i save bihainim em oltaim, yupela litimapim nem bilong em long taim yupela i bung bilong lotu.”—Song 149:1.
Planti Gutpela Blesing i Kam Long Jehova Ol i Wetim Yumi
17, 18. (a) Long bung bilong dediketim tempel long Jerusalem, Solomon i mekim wanem bikpela ofa? (b) Ol manmeri i kisim wanem ol gutpela blesing long dispela bung?
17 Long bung bilong dediketim tempel long Jerusalem, long namba 7 mun bilong yia 1026 B.C.E., King Solomon “i mekim [bikpela] ofa” long Jehova. Em i mekim “ol ofa bilong paia i kukim olgeta na ol ofa bilong kukim wit, na em i ofaim gris bilong ol abus bilong ol ofa bilong kamap wanbel.” Em i ofaim wit na 22,000 bulmakau na 120,000 sipsip.—1 King 8:62-65.
18 Bilong mekim bikpela bung olsem, ol i bin tromoi bikpela mani na mekim bikpela wok tru, a? Tasol ol gutpela blesing ol Israel i kisim em i winim tru ol dispela samting ol i givim. Long pinis bilong dispela bung, Solomon “i salim ol manmeri i go bek long ples bilong ol. Na ol manmeri i tok tenkyu long king long olgeta samting em i bin mekim, na ol i askim Bikpela long mekim gut long em. Na taim ol i go ol i amamas tru, long wanem, ol i tingting long olgeta gutpela samting Bikpela i bin mekim long ol Israel, ol manmeri bilong en, bilong inapim dispela promis em i bin mekim long wokman bilong en, Devit.” (1 King 8:66) Tru tumas, olsem Solomon i tok, “sapos Bikpela yet i givim yumi planti gutpela samting, em i no save larim ol dispela samting i givim hevi long yumi.”—Sindaun 10:22.
19. Yumi ken mekim wanem bilong kisim ol gutpela blesing long Jehova long nau na long olgeta taim bihain?
19 Yumi stap long taim samting tru tru i kamap pinis na em i senisim ‘piksa bilong ol gutpela samting.’ (Hibru 10:1) Jisas Krais, em i bikpela Hetpris, em i go insait pinis long heven na givim pe bilong blut bilong em bilong tekewe sin bilong olgeta man i bilip long ofa bilong em. (Hibru 9:10, 11, 24-26) Long rot bilong dispela bikpela ofa na long pasin bilong givim bel olgeta long litimapim nem bilong God olsem ofa i klin long ai bilong Em, yumi tu i ken “amamas tru,” na wetim taim bihain em Jehova bai givim planti gutpela blesing long yumi.—Malakai 3:10.
Bai Yu Bekim Olsem Wanem?
• Ol tok bilong Lo i stori long ol ofa, em inap “skulim” na “strongim bel” bilong yumi olsem wanem?
• Wanem namba wan samting man i mas mekim na bai God i ken orait long ofa bilong em? Dispela inap givim wanem tingting long yumi?
• Yumi ken givim wanem samting olsem ofa na em i kain olsem ofa em paia i kukim olgeta, em man i givim long laik bilong em?
• Olsem wanem ol miting Kristen i olsem ofa bilong kamap wanbel wantaim God na ol man?
[Piksa long pes 18]
Ofa bilong Jisas bilong baim bek man em samting Jehova i givim bilong kisim bek ol manmeri
[Piksa long pes 20]
Bilong Jehova i ken orait long pasin bilong yumi long lotuim em, yumi mas klia long olkain pasin i doti
[Piksa long pes 21]
Taim yumi mekim wok bilong autim tok, yumi save tokaut long ol gutpela samting Jehova i mekim