Yu Save Bihainim Laik Bilong God?

TUPELA Witnes Bilong Jehova i autim tok long ol haus na ol i bungim wanpela pris bilong Misin Episkopal. Man hia i olsem mekim gutpela pasin long ol; em i gat mausgras, na krismas bilong em i olsem 60 samting, na long singlis bilong em i gat nem bilong misin bilong em. Em i tok: “Mi laik bai ol memba bilong misin bilong mipela i givim bel long autim Tok bilong God olsem yupela i save mekim, tasol mi mas tokim yupela long no ken kam gen long haus bilong mi.”

Tru tumas, planti man i litimapim wok bilong ol Witnes Bilong Jehova na pasin bilong ol long givim bel long mekim dispela wok. Tasol ol yet i no laik save liklik long dispela wok ol Witnes i mekim, na ol yet i no laik mekim dispela wok. Kain pasin olsem i bin i stap long taim bilong Jisas na em i tok piksa long dispela.

“Yupela i ting wanem? Wanpela man i gat tupela pikinini. Em i go long namba wan pikinini na i tokim em olsem, ‘Pikinini, nau yu go wok long gaden wain.’ Na pikinini i tok, ‘Mi no laik.’ Tasol bihain em i senisim tingting na i go. Na papa i go long narapela pikinini na i mekim wankain tok long em. Na pikinini i tok, ‘Yes, papa.’ Tasol em i no i go. Orait long dispela tupela pikinini, husat i bihainim laik bilong papa?”​—⁠Matyu 21:​28-31.

Yumi save pinis, a? Olsem ol man i bin harim tok bilong Jisas, yumi tu bai bekim tok, “Namba wan.” Long rot bilong dispela tok piksa, Jisas i laik helpim yumi long save, pasin bilong bihainim laik bilong papa em i bikpela samting. Tru, namba wan pikinini i tok em i no laik go, tasol em i go na papa i amamas long em. Tasol em i no mekim wok long gaden wain bilong em yet, nogat; em i go mekim wok long gaden wain bilong papa bilong em olsem papa i bin tokim em long mekim.

Dispela i lainim yumi long wanem samting? God i laik bai ol man i lotuim em long nau i mekim wanem? I stap bilong Jisas i lainim yumi long wanem samting na em bai helpim yumi long bihainim laik bilong Papa? Em ol bikpela askim, na sapos yumi painim ol stretpela bekim, dispela inap helpim yumi long kisim laip bilong i stap gut oltaim, long wanem, “man i bihainim tok bilong God, em bai i stap oltaim.”​—⁠1 Jon 2:17; Efesus 5:⁠17.

“Laik Bilong God” Em Wanem Samting?

Dispela tok “laik” i stap inap 80 taim samting long buk Comprehensive Concordance of the New World Translation of the Holy Scriptures. Inap 60 bilong ol dispela 80 taim samting (olsem 75 pesen) i makim laik bilong God. Tok olsem “laik bilong God” na “laik bilong Papa bilong mi” i stap inap olsem 20 taim. Dispela i kamapim klia olsem pasin bilong bihainim laik bilong God i mas i stap namba wan bikpela samting long i stap bilong yumi.

Tru tumas, Jehova, em Nambawan Bikpela, em i gat laik bilong em. Em i gat laik long wanem samting? Baibel i tok, hap laik bilong em i olsem: “[God] i laik kisim bek olgeta manmeri, bai ol i ken save long as bilong tok tru.” (1 Timoti 2:⁠4) Krais Jisas na ol Kristen bilong pastaim i givim bel olgeta long helpim ol narapela long kisim as bilong tok tru.​—⁠Matyu 9:35; Aposel 5:42; Filipai 2:​19, 22.

Husat long nau i bihainim laik bilong God? Inap 2 bilion manmeri i tok ol i bihainim Krais Jisas. Tasol hamas bilong ol i wankain olsem dispela namba wan pikinini long tok piksa bilong Jisas, em i go na bihainim laik bilong papa? I no hatwok long save. Lain tru bilong Jisas bai mekim wok em i bin tokim ol long mekim, olsem: “Olgeta lain man i mas harim man i autim gutnius pastaim.” (Mak 13:10) Winim 4 na hap milion Witnes Bilong Jehova long olgeta hap ol i save autim gutnius bilong Kingdom bilong God na lainim ol narapela olsem Kingdom tasol em rot bilong kamapim gutaim tru. Olsem wanem? Yu yet yu wok strong long bihainim laik bilong God? Yu save autim gutnius bilong Kingdom olsem Jisas i bin mekim?​—⁠Aposel 10:42; Hibru 10:⁠7.

Amamas Long Bihainim Laik Bilong God

Yumi amamas long kisim save long laik bilong Papa, tasol sapos yumi helpim ol narapela long kisim save long laik bilong God, bai yumi amamas moa yet. Jisas i kisim amamas long helpim ol man long kisim save long Papa bilong em. Dispela i olsem kaikai bilong em. (Jon 4:34) Sapos yumi autim tok na lainim ol narapela long ol samting Jisas i bin lainim ol man long en, em ol samting em i bin kisim long Papa bilong em, bai yumi amamas tru. (Matyu 28:​19, 20) Olsem Jisas i tok promis, “yupela i save pinis long as tingting bilong dispela pasin mi mekim, na sapos yupela i bihainim gut, orait yupela i ken amamas.”​—⁠Jon 13:⁠17.

Olsem: Nau tasol wanpela mama i kirap gen long mekim wok painia na em i tok: “Mi amamas nogut tru taim Baibel-stadi bilong mi i pilim tru ol tok i tru bilong Baibel na mi lukim pes bilong em i lait tumas! Na mi amamas long lukim wanpela Baibel-stadi, paslain long stadi em i save raitim ol tok bilong Baibel long notbuk samting, na taim mitupela stadi i stap em i save raitim sampela hap tok em i lainim na bai em inap bekim ol askim bilong rivyu.” Narapela Baibel-stadi bilong em, taim em i gat 14 krismas samting, em i bin kisim sampela save long tok i tru. Bihain em i marit na em i tingting planti long sampela hevi bilong em yet, olsem na em i gat bikpela laik long painim ol Witnes. Em i amamas tru taim dispela sista painia i painim em! Yangpela meri hia i amamas long kirap gen long stadi long Baibel?

Stap Amamas Yet Long Bihainim Laik Bilong God

King Devit bilong Israel bipo i wok long givim bel olgeta long bihainim laik bilong God. Planti hevi i painim em, tasol em i tok: “God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.” (Song 40:⁠8) Pasin bilong bihainim laik bilong Jehova i stap insait tru long bel bilong Devit. Dispela i mekim na em i no lusim amamas bilong em long mekim wok bilong Jehova. Bihainim laik bilong God i no hatwok long Devit. Bel bilong em i kirapim em long mekim, na em i amamas. Taim em i stap laip, em i wok strong long givim bel long mekim wok bilong God bilong em, em Jehova, maski sampela taim em i bin pundaun na mekim sin.

Sampela taim, amamas bilong yumi inap wok long lus. Ating skin i les o yumi bel hevi. O ating bel bilong yumi i kotim yumi long wanpela rong bipo yumi mekim. Planti taim, yumi inap winim ol dispela hevi sapos yumi stadi gut long Tok bilong God. Yumi ken wok long putim lo bilong God i go “insait long bel” bilong yumi olsem Devit i bin mekim. Sapos yumi wok long givim bel olgeta long bihainim laik bilong God inap long skel bilong yumi, em bai givim gutpela pe long yumi, long wanem, oltaim em i save lukautim yumi gut tru.​—⁠Efesus 6:6; Hibru 6:​10-12; 1 Pita 4:⁠19.

Long Hibru 10:​5-7, aposel Pol i kamapim tok bilong Devit long Song 40:​6-8 na em i tok dispela i makim Krais Jisas. Taim Pol i tok olsem em i kamapim klia, Jisas i stap klostu tru long Papa long bel na long tingting bilong em. Long tok Hibru, dispela tok “laik” i olsem ‘laikim tumas.’ Olsem na Song 40:8 i tok long Krais olsem: “God bilong mi, mi amamas long mekim ol samting yu laikim tumas.”a Yes Jisas i laik mekim ol samting Papa bilong em i amamas long en. Olsem na Jisas i no mekim ol samting Papa i tokim em long mekim na em tasol, nogat. Em i amamas long mekim ol samting Papa i laikim tumas.

Olgeta taim Jisas i wok long skulim ol narapela long laik bilong God na long ol samting ol yet i mas mekim na bai God i ken mekim gut long ol. Long olgeta de em i autim tok na lainim ol man na em i kisim bikpela amamas long mekim dispela wok. Olsem na yumi ken save, sapos yumi lusim sampela hap taim moa long mekim wok bilong Jehova, bai yumi kisim bikpela amamas. Olsem wanem? Yu tu inap autim tok long olgeta de na bai amamas bilong yu tu inap i go bikpela moa?

Narapela samting bilong helpim yumi long i stap amamas long bihainim laik bilong God, em yumi mas tingting strong long ol samting i mas kamap bihain. Jisas i bin mekim olsem. “Jisas i save, . . . bihain em bai i stap gut na amamas moa yet. Na em i tingting long dispela na em i stap strong, na em i karim pen na i dai.” Jisas i kisim amamas long em i stap gut long God inap long em i dai na long gutpela pe em bai kisim, em wok king long han sut bilong Papa bilong em.​—⁠Hibru 12:⁠2.

Tingim amamas ol manmeri bai kisim sapos ol i wok yet long bihainim laik bilong God. Ol bai lukim bagarap bilong ol man i strong long bihainim laik bilong ol yet tasol, maski dispela i putim hevi long ol man i wok long bihainim laik bilong God. (2 Tesalonaika 1:​7, 8) Na tingim amamas ol man yumi laikim tumas ol bai kisim taim ol i kirap bek, na rot i op long ol i kisim save long laik bilong God na bihainim. O tingim laik bilong God long mekim graun i kamap Paradais gen. Na las tru, tingim dispela samting: Taim Satan em man bilong sakim laik bilong Jehova i bagarap olgeta, bai yumi stap fri tru.

Tru tumas, sapos nau yumi bihainim laik bilong God, bai yumi inap kisim bikpela amamas nau na bihain bai yumi stap amamas oltaim. Olsem na taim yumi autim tok, maski man i harim o nogat, yumi mas bihainim pasin bilong Jisas em i amamas long bihainim laik bilong Papa.

[Ol Futnot]