Yu Save Bilip Tru Long Gutnius?
“Kingdom bilong God em i kam klostu pinis. Yupela i mas tanim bel na bilip long gutnius.”—MAK 1:15.
1, 2. Wanem insait bilong Mak 1:14, 15?
EM YIA 30 C.E. Jisas Krais i kirapim bikpela wok bilong em long autim tok long Galili. Em i autim tok bilong “gutnius bilong God,” na planti man bilong Galili i pilim tru tok bilong em, olsem: “Taim God i makim em i kamap pinis, na Kingdom bilong God em i kam klostu pinis. Yupela i mas tanim bel na bilip long gutnius.”—Mak 1:14, 15.
2 “Taim God i makim” i kamap pinis bilong Jisas i mas kirapim wok bilong em long autim tok na bilong ol man i mas makim wanem samting ol bai mekim bambai God i ken orait long ol. (Luk 12:54-56) “Kingdom bilong God em i kam klostu pinis,” long wanem, Jisas i stap pinis olsem Man God i bin makim bilong kamap king. Wok bilong em long autim tok i kirapim ol man i gat stretpela bel na ol i tanim bel. Tasol olsem wanem ol i bin kamapim olsem ol i “bilip long gutnius”? Na olsem wanem yumi tu i ken mekim olsem?
3. Ol man i mekim wanem na ol i soim olsem ol i bilip long gutnius?
3 Olsem Jisas i bin mekim, aposel Pita i tokim ol man long tanim bel. Taim Pita i givim tok long ol Juda long Jerusalem long Pentikos 33 C.E., em i tok: “Yupela olgeta wan wan i mas tanim bel na kisim baptais long nem bilong Jisas Krais, na God bai i lusim ol sin bilong yupela. Yupela i mekim olsem, na bai God i givim Holi Spirit long yupela.” Planti tausen ol i tanim bel, na ol i kisim baptais na kamap disaipel bilong Jisas. (Aposel 2:38, 41; 4:4) Long 36 C.E., ol manmeri bilong ol narapela lain em ol i bin tanim bel, ol tu i mekim wankain pasin. (Aposel 10:1-48) Long nau, planti tausen manmeri ol i bilip long gutnius na dispela i kirapim ol long tanim bel, na dediket long God, na kisim baptais. Ol i bilip long gutnius bilong God i laik kisim bek ol man na ol i bilip long ofa bilong Jisas long baim bek ol man. Na tu, ol i bihainim stretpela pasin na sanap strong long sait bilong Kingdom bilong God.
4. Bilip em i wanem samting?
4 Tasol bilip em i wanem samting? Aposel Pol i tok: “Pasin bilong bilip em i olsem. Yumi save gut tru olsem, olgeta gutpela samting God i promis pinis long givim yumi na yumi wet long kisim, em bai yumi kisim tru. Maski ai bilong yumi i no lukim ol dispela samting, yumi save gut tru olsem, dispela olgeta samting i stap.” (Hibru 11:1) Bilip bilong yumi i mekim na i olsem olgeta tok promis bilong God long Baibel i kamap pinis, long wanem, yumi save tru tru olsem ol dispela samting bai kamap tru. I olsem yumi gat wanpela pepa i kamapim klia olsem yumi papa bilong wanpela hap graun samting. Na bilip i olsem yumi save tru olsem samting i stap, maski ai bilong yumi i no lukim. Tingting na bel bilong yumi i pilim tru, na dispela i mekim na yumi bilip tru olsem ol dispela samting i stap tru, maski yumi no lukim yet.—2 Korin 5:7; Efesus 1:18.
Yumi Mas i Gat Bilip!
5. Bilong wanem bilip i bikpela samting tru?
5 Taim mama i karim yumi, laik bilong kisim ol samting bilong spirit i stap pinis long skin bilong yumi, tasol bilip nogat. Na tru tumas, “planti man ol i no bilip.” (2 Tesalonaika 3:2) Tasol ol Kristen i mas i gat bilip bambai ol i ken kisim ol samting God i promis pinis long en. (Hibru 6:12) Pol i kamapim nem bilong planti bilipman, na bihain em i tok: “Ol dispela manmeri bilong bipo ol i sanap na raunim yumi i stap olsem bikpela klaut, na ol i soim yumi pasin bilong bilip. Olsem na yumi mas lusim olgeta kain samting i mekim yumi i no inap ran strong, na olgeta sin i save pas long yumi. Na yumi mas strongim bel na ran strong long dispela resis God i bin makim bilong yumi ran long en. Yumi mas lukluk i go long Jisas, em i as bilong bilip bilong yumi, na bihain em bai inapim tru bilip bilong yumi.” (Hibru 12:1, 2) Wanem dispela “sin i save pas long yumi”? Em i olsem man i no gat bilip, o em i lusim bilip pinis. Bilong holimpas strongpela bilip, yumi mas “lukluk i go long Jisas” na bihainim pasin bilong em. Na tu, yumi mas sakim pasin pamuk, daunim ol pasin bilong olpela bel, abrusim pasin bilong laikim tumas mani samting, na ol tingting bilong dispela graun, na ol pasin na tok bilong ol tumbuna em Baibel i no as bilong en. (Galesia 5:19-21; Kolosi 2:8; 1 Timoti 6:9, 10; Jut 3, 4) Na tu, yumi mas bilip olsem God i stap wantaim yumi, na ol tok bilong em long Baibel i save helpim yumi tru tru.
6, 7. Bilong wanem i stret yumi mas beten long kisim strongpela bilip?
6 Yumi yet i no inap kamapim bilip long bel bilong yumi, maski yumi gat strongpela tingting long mekim. Bilip em i wanpela samting em spirit holi, o strong, bilong God i save kamapim long man. (Galesia 5:22, 23) Orait, olsem wanem sapos yumi mas strongim bilip bilong yumi? Jisas i tok: “Yupela i save tumas long givim ol gutpela samting long ol pikinini bilong yupela. Olsem na yupela i ken save tru, Papa bilong yupela i stap long heven em bai i amamas long givim Holi Spirit long ol man i askim em.” (Luk 11:13) Yes, yumi mas beten long kisim spirit holi, long wanem, em inap kamapim bilip long bel bilong yumi bambai yumi ken mekim laik bilong God, maski bikpela hevi o traim i painim yumi.—Efesus 3:20.
7 I stret yumi ken beten long kisim strongpela bilip. Taim Jisas i laik rausim spirit nogut long wanpela mangi, papa bilong mangi i krai long Jisas olsem: “Mi bilip, tasol bilip bilong mi i sot. Yu mas helpim mi.” (Mak 9:24) Ol disaipel bilong Jisas i tok: “Yu mas mekim bilip bilong mipela i kamap bikpela moa.” (Luk 17:5) Olsem na yumi mas beten long kisim strongpela bilip, na bilip tru olsem God i save harim kain beten olsem.—1 Jon 5:14.
Yumi Mas Bilip Long Tok Bilong God
8. Sapos yumi bilip strong long Tok Bilong God, dispela inap helpim yumi olsem wanem?
8 Klostu long taim Jisas i dai olsem ofa, em i tokim ol disaipel: “Yupela i no ken bel hevi na tingting planti. Yupela i bilip long God. Yupela i mas bilip long mi tu.” (Jon 14:1) Yumi ol Kristen, yumi save bilip long God na long Pikinini bilong em. Tasol olsem wanem long Tok Bilong God, em Baibel? Em i gat bikpela strong tru na em inap helpim gut yumi sapos yumi stadi na bihainim tok bilong en na yumi bilip tru olsem em i gat ol nambawan gutpela tok bilong stretim na stiaim yumi.—Hibru 4:12.
9, 10. Bai yu stori olsem wanem bilong kamapim klia tok bilong Jems 1:5-8 long bilip?
9 Yumi ol man bilong graun tasol na planti hevi i save painim yumi. Tasol sapos yumi bilip tru long Baibel, dispela inap helpim tru yumi. (Jop 14:1) Olsem: Sapos yumi no save gut long ol samting yumi mas mekim taim wanpela hevi i painim yumi. Baibel i givim dispela tok long yumi: “Sapos wanpela man namel long yupela em i sot long gutpela tingting, orait em i mas beten long God i givim tingting long em, na bai God i givim em. God i save givim planti samting long olgeta man, na em i no save tok kros long man i askim em. Tasol dispela man i mas bilip tru na i beten long God. Em i no ken lusim bilip liklik na i ting olsem, ‘Ating God bai i givim dispela long mi, o nogat?’ Long wanem, man i gat tupela tingting, em i olsem solwara win i sakim na i kirap nabaut. Kain man olsem i no ken ting Bikpela bai i givim wanpela samting long em. Nogat. Tingting bilong dispela man em i bruk nabaut, na long olgeta pasin em i mekim, em i no save bihainim wanpela rot tasol.”—Jems 1:5-8.
10 God Jehova i no ken krosim yumi sapos yumi sot long gutpela tingting na yumi beten long kisim. Em bai helpim yumi long kisim stretpela tingting long dispela hevi. Ating sampela wanbilip bai kamapim sampela ves bilong Baibel inap helpim yumi, o yumi bai lukim sampela ves olsem taim yumi stadi long Baibel. O ating spirit holi bilong Jehova bai stiaim tingting bilong yumi long ol narapela rot. Papa bilong yumi long heven bai givim gutpela tingting long yumi bilong helpim yumi long karim ol hevi sapos yumi wok long ‘beten long God na bilip tru,’ na yumi no gat tupela tingting. Sapos yumi olsem solwara em win i sakim na i kirap nabaut, yumi no ken ting long kisim wanpela samting long God. Bilong wanem? Long wanem, yumi gat tupela tingting, na long beten bilong yumi na long ol narapela samting—na long pasin bilong bilip long God—yumi no strong long bihainim wanpela rot tasol. Olsem na yumi mas bilip strong long Baibel na long ol stiatok em i givim long yumi. Orait nau yumi ken stori long olsem wanem em i save helpim na stiaim yumi.
Bilip na Kaikai Samting
11. Sapos yumi bilip long tok bilong Baibel, bai yumi bilip olsem wanem long ol samting yumi mas kisim long ol wan wan de?
11 Olsem wanem sapos nau yumi stap rabis na yumi sot tru long kaikai samting? Sapos yumi bilip long tok bilong Baibel, bai yumi save tru olsem Jehova bai lukautim yumi long ol samting yumi mas kisim long olgeta de, na bihain em bai givim planti kaikai samting long olgeta man i save laikim em tru. (Song 72:16; Luk 11:2, 3) Bilong strongim bel bilong yumi, yumi ken tingim taim Jehova i bin lukautim Elaija long kaikai long taim bilong bikpela hangre. Bihain God i wokim mirakel na long olgeta de i gat plaua na wel i stap bilong helpim wanpela meri na pikinini bilong em na Elaija, na ol inap i stap laip. (1 King 17:2-16) Na Jehova i lukautim profet Jeremaia tu long kaikai taim ol Babilon i kam banisim Jerusalem. (Jeremaia 37:21) Maski Elaija na Jeremaia i no gat planti kaikai, Jehova i lukautim ol. Na em i save mekim wankain pasin long ol manmeri bilong nau i bilip long em.—Matyu 6:11, 25-34.
12. Olsem wanem pasin bilong bilip bai helpim yumi long kisim kaikai?
12 Sapos yumi bilip strong na bihainim ol stiatok bilong Baibel, bai yumi no kamap maniman, nogat, tasol dispela bai helpim yumi long kisim ol kaikai samting yumi mas kisim. Olsem: Baibel i tok yumi mas bihainim stretpela pasin na no ken giaman, na save gut long mekim wok, na taitim bun na wok strong. (Sindaun 22:29; Saveman 5:18, 19; 2 Korin 8:21) Em i bikpela samting long yumi gat nem olsem gutpela wokman. Na long ol ples i hatwok long painim gutpela wok mani, ol man i no save stil o giaman na ol i save gut long mekim wok, na ol i save wok strong, sampela taim ol inap kisim wanpela wok, maski ol narapela i no inap. Tru, ating ol kain gutpela wokman olsem ol i no gat planti samting bilong skin, tasol ol i gat ol samting inap tasol long ol, na ol i amamas long kisim kaikai ol i bin baim long pe ol yet i kisim long wok bilong ol.— 2 Tesalonaika 3:11, 12.
Bilip i Helpim Yumi Long Karim Bikpela Hevi
13, 14. Olsem wanem bilip i save helpim yumi long karim hevi taim wanpela long famili i dai?
13 Baibel i soim olsem em i pasin bilong yumi man long krai sori taim wanpela bilong famili i dai. Bilipman Abraham i bin krai sori taim gutpela meri bilong em Sara i dai. (Stat 23:2) Bel bilong Devit i bagarap stret taim em i harim olsem pikinini bilong em, Apsalom, i dai. (2 Samuel 18:33) Na Jisas tu, maski em i gutpela man olgeta, em i krai taim pren bilong em Lasarus i dai. (Jon 11:35, 36) Taim wanpela long famili i dai, yumi inap kisim bikpela bel hevi tru, tasol bilip bilong yumi long ol tok promis bilong God em inap helpim yumi long karim dispela hevi.
14 Pol i tok: “Mi bilip na mi wet long God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Yumi mas bilip strong long ol samting God i bin mekim bilong wokim rot bambai ol milion milion manmeri i dai pinis ol inap kirap bek. (Jon 5:28, 29) Sampela em Abraham na Sara, Aisak na Rebeka, Jekop na Lea, em olgeta i slip i stap long matmat na ol i wet long kirap bek long nupela taim God bai kamapim. (Stat 49:29-32) Bikpela amamas tru bai kamap taim ol famili bilong yumi i lusim slip bilong indai na ol i ken i stap hia long graun! (KTH 20:11-15) Long nau bilip i no inap tekewe olgeta bel hevi, tasol em bai mekim na oltaim bai yumi stap klostu long God, em i save helpim yumi long karim hevi taim wanpela long famili i dai.—Song 121:1-3; 2 Korin 1:3.
Bilip i Strongim Man i Stap Bel Hevi
15, 16. (a) I gat wanem as na yumi inap tok, bel hevi i no samting ol bilipman bilong nau tasol i kisim? (b) Yumi ken mekim wanem sapos yumi stap bel hevi?
15 Baibel i soim yumi olsem ol man i bilip, ol tu inap kisim bel hevi. Taim bikpela traim i painim Jop, em i pilim olsem God i lusim em pinis. (Jop 29:2-5) Taim Jerusalem na banis bilong en i bagarap i stap, dispela i mekim na Nehemia i bel hevi. (Nehemia 2:1-3) Taim Pita i tok pinis olsem em i no save long Jisas, Pita i bel hevi stret na “i krai nogut tru.” (Luk 22:62) Na Pol i tokim ol wanbilip long kongrigesen Tesalonaika long “strongim bel bilong ol man i save pret [“i stap bel hevi,” NW ].” (1 Tesalonaika 5:14) Olsem na i no ol bilipman bilong nau tasol i save kisim bel hevi, nogat. Orait yumi ken mekim wanem sapos yumi stap bel hevi?
16 Sapos yumi gat sampela bikpela hevi, dispela inap mekim na yumi stap bel hevi. Tasol nogut yumi bungim ol dispela hevi wantaim na tingim olsem wanpela bikpela hevi tru. Ating yumi inap stretim ol dispela hevi wan wan long rot bilong bihainim ol stiatok bilong Baibel. Dispela inap helpim yumi long daunim bel hevi liklik. Na yumi ken mekim olgeta wok samting long skel bilong yumi na kisim gutpela malolo, na dispela inap helpim yumi. Tru tumas, Pasin bilong bilip strong long God na tok bilong em long Baibel, em i save helpim yumi long i stap belgut, long wanem, yumi bilip strong olsem God i save tingim tru yumi.
17. Olsem wanem yumi save, Jehova i save tingim yumi?
17 Pita i givim dispela gutpela tok long yumi: “Yupela i mas daunim laik bilong yupela yet na stap aninit long strongpela han bilong God. . . . God i save wari long yupela. Olsem na olgeta hevi yupela i karim, yupela i mas putim long han bilong en.” (1 Pita 5:6, 7) Man bilong raitim song i tok: “[God] i save helpim olgeta manmeri i gat hevi na em i save litimapim olgeta manmeri ol arapela man i daunim ol.” (Song 145:14) Yumi mas bilip tru long ol dispela tok, long wanem, ol i stap long Baibel. Tru, sampela taim bel hevi bai i stap yet, tasol taim yumi save olsem yumi inap putim olgeta hevi bilong yumi long han bilong Papa bilong yumi long heven, dispela i strongim bilip bilong yumi.
Bilip na Ol Narapela Kain Hevi
18, 19. Olsem wanem bilip i save helpim yumi long karim hevi bilong sik na mekim gut bel bilong ol wanbilip i gat sik?
18 Taim bikpela sik i painim yumi o wanpela long famili, dispela inap traim tru bilip bilong yumi. Baibel i no tok God i bin wokim mirakel na oraitim sik bilong ol Kristen olsem Epafroditus, Timoti, na Trofimus, tasol yumi save Jehova i bin helpim ol long karim dispela hevi. (Filipai 2:25-30; 1 Timoti 5:23; 2 Timoti 4:20) Na tu, man bilong raitim song i tok: “Man i save tingim ol rabisman na i helpim ol, dispela man i ken amamas. Bikpela bai i helpim em long taim hevi i kamap long em. . . . Taim dispela man i gat sik, Bikpela bai i lukautim em.” (Song 41:1-3) Olsem wanem dispela tok inap helpim yumi long mekim gut bel bilong ol wanbilip i gat sik?
19 Wanpela rot bilong helpim ol long ol samting bilong spirit, em yumi ken beten wantaim ol na beten askim God long helpim ol. Tru, yumi no askim God long wokim mirakel na oraitim ol sik long nau, tasol yumi ken askim God long strongim ol long karim ol hevi na pen bilong dispela sik bilong ol. Jehova bai lukautim ol na bilip bilong ol bai kamap strong taim ol i lukluk i go long dispela taim bihain, “i no gat man . . . bai i tok olsem, ‘Mi gat sik.’ ” (Aisaia 33:24) Yumi save, long rot bilong Jisas Krais, em i kirap bek pinis, na long rot bilong Kingdom bilong God, sin, na sik, na indai bai pinis olgeta long skin bilong ol man i bihainim tok bilong God, na dispela save i mekim gut bel bilong yumi! Yumi tingim ol dispela gutpela samting bai kamap na yumi tenkyu long Jehova, ‘em bai mekim orait olgeta sik bilong yumi.’—Song 103:1-3; KTH 21:1-5.
20. I gat wanem as na yumi ken tok, bilip inap helpim yumi long karim hevi bilong “taim nogut” bilong lapun?
20 Na bilip inap helpim yumi long karim hevi bilong “taim nogut” bilong lapun, taim skin i no gat strong moa na planti sik i save painim yumi. (Saveman 12:1-7) Olsem na ol lapun namel long yumi ol i ken beten olsem man bilong raitim song, em i go lapun na em i beten olsem: “Bikpela, mi save bilip long yu tasol. . . . Nau mi lapun pinis na mi no gat strong moa, orait nogut yu lusim mi na givim baksait long mi.” (Song 71:5, 9) Em i pilim olsem em i mas kisim helpim long Jehova, na i wankain tu long planti wanbilip Kristen, em ol i bin go lapun long wok bilong Jehova. Ol i gat strongpela bilip, olsem na ol i ken save tru olsem strongpela han bilong Jehova bai helpim ol i go inap oltaim oltaim.—Lo 33:27.
Bilip Strong Long Tok Bilong God
21, 22. Sapos yumi bilip strong, dispela bai mekim wanem long pasin bilong yumi long pas gut wantaim God?
21 Pasin bilong bilip long gutnius na long olgeta tok bilong Baibel i helpim yumi long go klostu moa long Jehova. (Jems 4:8) Tru, em i Bikpela King bilong yumi, tasol tu, em i Man bilong wokim yumi na em i Papa bilong yumi. (Aisaia 64:8; Matyu 6:9; Aposel 4:24) Man bilong raitim song i tok: “Yu Papa na God bilong mi. Yu save lukautim mi na helpim mi oltaim.” (Song 89:26) Sapos yumi bilip long Jehova na long tok bilong em long Baibel, yumi tu i ken tingim em olsem ‘Man bilong lukautim na helpim yumi oltaim.’ Em i gutpela tru long yumi inap mekim olsem!
22 Jehova em i Papa bilong ol Kristen em ol i kamap Pikinini bilong em long rot bilong spirit holi na ol poroman bilong ol i wet long kisim laip i stap oltaim long graun. (Rom 8:15) Na sapos yumi bilip strong long Papa bilong yumi long heven, yumi no inap bel hevi. Devit i tok: “Maski papa na mama i givim baksait long mi, Bikpela bai i lukautim mi.” (Song 27:10) Na Baibel i tok tu: ‘Bikpela i tingting long biknem na promis bilong en na em i no inap givim baksait long lain manmeri bilong en.’—1 Samuel 12:22.
23. Bilong pas gut wantaim Jehova inap oltaim oltaim, yumi mas mekim wanem?
23 Tasol bilong pas gut wantaim Jehova inap oltaim oltaim, yumi mas bilip long gutnius na kisim ol tok bilong Baibel olsem Tok Bilong God tru tru. (1 Tesalonaika 2:13) Yumi mas bilip tru long Jehova na larim tok bilong em long Baibel i stap olsem lait bilong soim rot long yumi. (Song 119:105; Sindaun 3:5, 6) Bilip bilong yumi bai i go bikpela taim yumi beten long em na yumi bilip tru long pasin sori, na marimari, na helpim bilong em.
24. Wanem tok i stap long Rom 14:8 na i mekim gut bel bilong yumi?
24 Bilip i bin kirapim yumi long dediket long God i go inap oltaim oltaim. Sapos yumi gat strongpela bilip, maski yumi dai, yumi ol wokman bilong em i dediket pinis long em, yumi inap wet long kirap bek. “Sapos yumi stap laip, o sapos yumi dai, yumi bilong Bikpela tasol.” (Rom 14:8) Yumi mas holimpas dispela gutpela tingting long bel na bilip tru long Tok Bilong God na bilip strong yet long gutnius.
Bai Yu Bekim Olsem Wanem?
• Bilip em i wanem samting? Bilong wanem yumi mas i gat dispela pasin?
• Bilong wanem em i bikpela samting long yumi mas bilip long gutnius na long olgeta tok bilong Baibel?
• Olsem wanem bilip i save helpim yumi long karim ol hevi?
• Wanem samting bai helpim yumi long holimpas bilip?
[Ol Piksa long pes 12]
Jehova i bin lukautim Jeremaia na Elaija long kaikai, long wanem, ol i bilip strong
[Ol Piksa long pes 13]
Jop, Pita, na Nehemia ol i gat strongpela bilip
[Ol Piksa long pes 15]
Bilong pas gut wantaim Jehova i go inap oltaim oltaim, yumi mas bilip strong long gutnius