Em i Dai Pinis, Tasol i Olsem Em i Autim Tok Yet

ABEL i lukluk long lain sipsip bilong em i kaikai i stap long sait bilong maunten. Ating bihain liklik, em i lukluk i go longwe abrusim hap ol sipsip bilong em i stap long en na em inap lukim wanpela lait. Em i save dispela lait em wanpela bainat i gat paia na i tanim tanim long olgeta taim, na i pasim ol man long i go insait long gaden Iden. Bipo papamama bilong em i bin stap long dispela gaden, tasol nau papamama na pikinini bilong ol i no inap i go insait long en. Piksaim long tingting olsem win bilong apinun i bloim nabaut gras bilong Abel taim em i lukluk i go antap na i tingting long Man Bilong Wokim em. Olsem wanem? Ol man inap kamap wanbel gen wantaim God? Abel i gat bikpela laik tru long dispela samting i mas kamap.

Abel i autim tok long yu long nau. Yu inap harim tok bilong em? Ating yu bai tok olsem dispela samting i no inap kamap. Dispela namba 2 pikinini man bilong Adam i dai long bipo yet. Klostu 6,000 yia i go pinis na ol bun bilong em i tanim i kamap graun. Baibel i stori long ol daiman olsem: “Ol man i dai pinis, ol i no inap save long wanpela samting.” (Saveman 9:​4, 5, 10) Na tu, long Baibel yumi no inap ritim wanpela tok em Abel i bin mekim. So olsem wanem em inap autim tok long yumi?

Holi spirit i kirapim aposel Pol long stori long Abel olsem: “Abel i dai pinis, tasol long dispela bilip bilong en i olsem em i autim tok yet long yumi.” (Hibru 11:4) Abel i autim tok long wanem rot? Long rot bilong bilip bilong em. Abel em i fes man husat i bin kisim dispela gutpela pasin bilong bilip. Em i kamapim klia bilip bilong em, olsem na em i stap gutpela piksa tru long yumi ken bihainim long nau. Sapos yumi kisim skul long bilip bilong em na wok strong long bihainim, orait i olsem Abel i autim tok long yumi na i helpim yumi.

Tasol Baibel i no stori tumas long Abel, olsem na yumi inap kisim wanem skul long em na long bilip bilong em? Orait nau yumi ken skelim dispela.

Abel i bon bihain liklik long God i bin wokim namba 1 man na meri. Jisas i stori long Abel olsem em i bin stap long “taim ol manmeri i bon long graun.” (Luk 11:​50, 51) Jisas i toktok long ol manmeri em God bai kisim bek ol long sin bilong ol. Abel i namba 4 man i bin kamap long graun, na i luk olsem em i fes man em God i laik kisim bek em long sin.a I klia tru olsem Abel i kamap bikpela namel long ol man i no stap olsem gutpela piksa.

Maski i no gat planti manmeri yet, ol i no stap amamas tumas. Papamama bilong Abel, em Adam na Iv, tupela i gat naispela na strongpela skin. Tasol ol i bin mekim bikpela rong tru, na ol i save long dispela. Bipo ol i gutpela olgeta, na ol inap i stap laip oltaim. Tasol ol i bikhet long God Jehova na em i rausim ol long Paradais long gaden Iden. Ol i putim laik bilong ol i go pas long olgeta narapela samting na long ol samting ol pikinini bilong ol i mas kisim tu, long dispela rot ol i lusim laip i gutpela olgeta na laip oltaim.​—Stat 2:15–3:24.

Adam tupela Iv i stap ausait long gaden Iden, na laip i hatwok tru. Tasol taim fes pikinini bilong ol i bon, ol i kolim em Kein, mining bilong en “kisim,” na Iv i tok: “Bikpela i helpim mi na mi kisim pikinini man.” Tok bilong Iv i soim olsem ating em i tingim tok promis Jehova i bin mekim long gaden Iden olsem wanpela meri bai kamapim “lain” o pikinini husat bai bagarapim dispela man nogut husat i bin paulim Adam tupela Iv. (Stat 3:15; 4:1) Olsem wanem? Iv i ting em i dispela meri long tok profet na Kein i dispela pikinini?

Sapos em i ting olsem, orait em i popaia stret. Na sapos Adam na Iv i bin tokim Kein olsem em i dispela pikinini, dispela inap mekim na pasin antap bilong em i go bikpela. Bihain, Iv i karim namba 2 pikinini man, tasol em i no mekim wankain tok long dispela pikinini olsem em i mekim long Kein. Ol i givim nem Abel long em, ating mining bilong en i olsem “Winim Win Long Maus,” o “Samting Nating.” (Stat 4:2) Olsem wanem? Dispela nem tupela i givim i soim olsem ol i no bilip tumas long Abel na ol i bilip moa long Kein? Yumi no save long dispela.

Tasol ol papamama long nau inap kisim skul long dispela fes papamama. Olsem wanem? Long rot bilong tok na pasin yupela i mekim, yupela bai strongim pasin bilong ol pikinini bilong yupela long hambak, tingim ol yet, na strong long kisim namba? O bai yupela i lainim ol long laikim tru God Jehova na kamap pren bilong em? Sori tru, tupela fes papamama i feil long mekim gut wok bilong ol. Tasol gutpela samting inap painim ol pikinini bilong ol.

Taim tupela mangi i kamap bikpela, ating Adam i bin skulim ol long mekim ol wok bilong lukautim famili long kaikai samting. Kein i kamap fama; Abel i kamap wasman bilong sipsip.

Tasol Abel i mekim wanpela samting i bikpela samting moa. Em i kisim pasin bilong bilip, em dispela gutpela pasin em bihain Pol i stori long en. Tingim dispela. I no gat wanpela man i stap olsem gutpela piksa em Abel i ken bihainim. So olsem wanem em i kisim pasin bilong bilip long God Jehova? Tingim 3-pela samting we inap helpim em long kisim strongpela bilip.

Ol samting Jehova i bin wokim.

Tru, Jehova i mekim tok bilong bagarapim graun, olsem na ol rop i gat nil na ol gras nogut i mekim na i hatwok long kamapim kaikai long gaden. Tasol graun i kamapim kaikai inap long lukautim famili bilong Abel. Na God i no mekim tok bilong bagarapim ol animal, ol pis na pisin, ol maunten, ol raunwara, ol wara, na solwara; na em i no mekim tok bilong bagarapim skai, ol klaut, san, mun, na ol sta. Long olgeta hap Abel i lukluk long en, em i lukim ol samting i kamapim klia pasin laikim, savetingting, na gutpela pasin bilong God Jehova, em dispela Man i bin wokim olgeta samting. (Rom 1:20) Pasin bilong tingim tingim long bel ol dispela samting i strongim bilip bilong em.

Abel i lusim haptaim bilong tingim Jehova. Piksaim long tingting olsem Abel i was long ol sipsip bilong em. Wasman bilong sipsip i mas wokabaut planti. Em i kisim ol sipsip i go long ol maunten na brukim ol veli na wara​—oltaim em i painim gutpela gras na wara, na ol gutpela ples we ol sipsip i ken malolo long en. Long olgeta animal God i bin wokim, i luk olsem ol sipsip i no gat strong bilong lukautim ol yet, ating God i bin wokim ol bilong ol man i ken stiaim na sambai long ol. Olsem wanem? Abel i luksave olsem em tu i nidim God long stiaim, sambai, na lukautim em, em dispela Man i gat bikpela savetingting na strong, winim olgeta narapela? Yumi ken save olsem em i bin kamapim ol kain tok olsem long ol beten bilong em, na dispela i mekim na bilip bilong em i kamap strong moa.

Ol tok promis bilong Jehova.

Ating Adam tupela Iv i stori long ol pikinini man bilong ol long ol samting i bin kamap long gaden Iden we i mekim na God i rausim ol. Olsem na i gat planti samting Abel i ken tingim tingim long bel.

Jehova i tok em bai bagarapim graun. Abel inap lukim ol rop i gat nil na ol gras nogut i kamap na i truim dispela tok. Jehova i bin tok tu olsem Iv bai pilim pen taim em i laik karim pikinini. Taim ol brata na susa bilong Abel i bon, em i lukim olsem dispela tok tu i kamap tru. Jehova i tok profet olsem Iv bai i gat bikpela laik tumas long man bilong em, na Adam bai bosim em. Abel i lukim dispela pasin namel long papamama bilong em. Abel i lukim olsem olgeta tok bilong Jehova i save kamap tru. Olsem na i gat as tru na Abel inap bilip long tok promis bilong God, olsem wanpela “lain” o pikinini bai kamap na stretim olgeta hevi i bin stat long Iden.​—Stat 3:​15-19.

Ol wokboi bilong Jehova.

I no gat wanpela man i gat bilip we Abel inap lukim na bihainim pasin bilong em, tasol i gat ol ensel long graun long dispela taim we Abel inap lukim na bihainim bilip bilong ol. Taim Jehova i rausim Adam tupela Iv long gaden Iden, em i wokim rot na tupela na ol pikinini bilong ol i no inap i go insait long dispela Paradais long graun. Bilong was long gaden, Jehova i putim ol serap em ol ensel i gat bikpela namba na em i putim bainat i gat paia i lait long en na i tanim tanim oltaim.​—Stat 3:24.

Tingim, Abel i bin lukim ol dispela serap taim em i liklik mangi yet. Ol i kisim bodi bilong man, na Abel inap lukim olsem ol i gat bikpela strong tru. Na em i kirap nogut tu long “bainat” i gat paia na i tanim tanim oltaim. Taim Abel i kamap bikpela, yu ting em i lukim olsem ol dispela serap i les na lusim wok bilong ol? Nogat. Long san na long nait, insait long planti planti yia, ol dispela strongpela ensel i gat gutpela tingting, ol i stap na mekim wok bilong ol. Olsem na Abel i kisim save olsem God Jehova i gat ol stretpela wokboi em ol i save stap gut long wok bilong ol. Abel i lukim ol dispela serap i stap gut long Jehova na bihainim tok bilong em, em ol pasin em i no lukim insait long famili bilong em yet. Gutpela eksampel bilong ol dispela ensel i strongim bilip bilong em.

Jehova i kamapim klia em yet long rot bilong ol samting em i wokim, ol tok promis bilong em, na gutpela piksa bilong ol wokman bilong em, na taim Abel i tingim tingim long bel ol dispela samting, dispela i strongim tru bilip bilong em. Yumi inap kisim planti gutpela skul long pasin bilong em. Na moa yet ol yangpela inap save tru olsem ol i ken kisim pasin bilong bilip strong long God Jehova, maski ol narapela long famili bilong ol i no mekim olsem. Long nau, yumi inap lukim planti gutpela samting God i wokim, yumi gat Baibel olgeta, na i gat planti manmeri i stap olsem gutpela piksa long pasin bilong bilip, olsem na i gat as tru na yumi inap kisim strongpela bilip.

Taim bilip bilong Abel long Jehova i kamap strong moa, em i laik painim rot bilong kamapim klia bilip bilong em. Tasol man nating inap givim wanem samting long Man Bilong Wokim heven na graun? God i no nidim wanpela presen o helpim i kam long ol man, nogat. Bihain, Abel i kliagut long wanpela bikpela samting: Sapos bel i kirapim em long givim nambawan gutpela samting em i gat i go long Jehova, gutpela Papa bilong em long heven bai amamas tru.

Abel i redi long givim sampela sipsip bilong em olsem ofa. Em i kisim ol gutpela sipsip tru em ol namba 1 sipsip mama i bin karim na em i ofaim ol nambawan gutpela hap bilong ol dispela sipsip. Kein tu i laik kisim blesing bilong God, olsem na em i kisim sampela gaden kaikai bilong em na redim ofa. Tasol tingting i kirapim em long givim ofa i no wankain olsem bilong Abel. Dispela samting i kamap ples klia taim 2-pela brata i givim ofa bilong ol.

Ating Kein na Abel i yusim alta na paia bilong wokim ofa bilong ol, na ating ol i wokim ofa long hap we ol serap inap lukim, em ol mausman bilong Jehova long graun long dispela taim bipo. Jehova i mekim samting! Baibel i tok: “Bikpela i amamas long Abel na ofa bilong em.” (Stat 4:4) Baibel i no stori long olsem wanem God i kamapim klia dispela. Tasol bilong wanem em i amamas long Abel?

Yu ting samting Abel i ofaim i mekim God i amamas? Abel i givim samting i gat laip na i kapsaitim blut we i makim laip. Ating Abel i save kain ofa olsem i bikpela samting. Planti handret yia bihain long taim bilong Abel, God i tokim ol wokboi bilong em long ofaim pikinini sipsip i no gat bagarap long skin, bilong makim ofa bilong Pikinini man bilong em i gutpela olgeta, em “Pikinini Sipsip bilong God,” we ol man bai kapsaitim blut bilong em. (Jon 1:29; Kisim Bek 12:​5-7) Tasol ating Abel i no save o kliagut long olsem wanem Jehova bai yusim ol ofa long bihain.

Tasol yumi save long dispela: Abel i givim nambawan gutpela samting em i gat. Jehova i amamas long dispela ofa na long Abel tu, bikos pasin bilong Abel long laikim tru Jehova na bilip long em, dispela i kirapim Abel long givim ofa.

Tasol Kein i narapela kain. Jehova “i no amamas long Kein na ofa bilong em.” (Stat 4:5) I no gat rong long ofa bilong Kein; bihain Lo Bilong God i orait long man i givim gaden kaikai olsem ofa. (Wok Pris 6:​14, 15) Tasol Baibel i tok long Kein olsem “ol samting em i kamapim i nogut.” (1 Jon 3:12) Olsem planti man long nau, Kein i ting pasin bilong giaman tasol long givim bel long God, dispela em inap. Kein i no gat bilip na em i no laikim tru Jehova, na dispela i kamap ples klia long pasin em i mekim.

Taim Kein i lukim olsem Jehova i no amamas long em, yu ting em i laik kisim skul long pasin bilong Abel? Nogat. Em i heitim tru brata bilong em. Jehova i lukim tingting i stap long bel bilong Kein na em i toktok gut wantaim Kein. Em i tokim Kein olsem tingting bilong em bai kirapim em long mekim bikpela rong, na Jehova i tok sapos Kein i senisim pasin bilong em, Em bai “orait long ofa bilong em.”​—Stat 4:​6, 7.

Kein i sakim tok lukaut bilong God. Em i singautim brata bilong em long go wokabaut wantaim em long ples kunai. Long dispela hap Kein i kilim i dai Abel. (Stat 4:8) Abel i kamap fes man long i dai long bilip bilong em. Em i dai pinis, tasol stori bilong em i stap yet long nau.

I olsem blut bilong Abel i krai long God Jehova i mas bekim rong. Na God i givim strafe long Kein long pasin nogut em i bin mekim. (Stat 4:​9-12) Tasol bikpela samting moa, stori bilong bilip bilong Abel i autim tok long yumi long nau. Ating Abel i bin stap laip inap 100 yia samting, em sotpela haptaim long dispela taim bipo, tasol em i yusim gut laip bilong em. Taim em i dai, em i save Papa bilong em long heven, Jehova, i amamas long em. (Hibru 11:4) Yumi ken bilip tru olsem Jehova i no inap lusim tingting long Abel, em i wetim taim we God bai kirapim em bek long Paradais long graun. (Jon 5:​28, 29) Olsem wanem? Bai yu bungim em long Paradais? Yu inap mekim olsem sapos yu tingting strong long putim gut yau long tok Abel i autim na bihainim strongpela bilip bilong em.