Sapta 4
God Em i Husat?
1. (a) Ol manmeri i bin lotuim wanem ol god? (b) Baibel i makim “God” na “ol god” i narapela narapela kain olsem wanem?
OL MANMERI i save lotuim planti god. Ol Sinto na Budis na Hindu samting, ol i gat planti planti god. Long taim bilong ol aposel bilong Jisas ol manmeri i save lotuim ol god olsem Sus na Hemis. (Aposel 14:11, 12) Olsem na i stret Baibel i tok, “I gat planti samting ol i kolim ‘god.’ ” Tasol “yumi gat wanpela God tasol, em God Papa. Em i as bilong olgeta samting.” (1 Korin 8:5, 6) Sapos wanpela man i givim askim long yu, olsem: ‘God em i husat?’ bai yu tok wanem?
2. Ol manmeri i gat wanem kain kain tingting long God?
2 Planti man bai tok: ‘God em i Bikpela,’ o ‘God em i wanpela Spirit long heven.’ Wanpela buk i tok: ‘God em i Nambawan Bikpela Man.’ Sapos yu askim man: ‘Nem bilong God husat?’ Bai sampela i tok, ‘Nem bilong em Jisas.’ Sampela man i ting God em i olsem wanpela strong i stap long olgeta hap. Na sampela ol i no save, God em i stap o nogat. Orait, olsem wanem yumi inap save God em i stap tru?
GOD EM I STAP TRU
3. Wanpela haus i kamap olsem wanem?
3 Sampela taim yu lukim wanpela gutpela haus na yu tok: ‘Husat i bin wokim?’ Sapos wanpela man i tok, dispela haus i kamap nating tasol—bai yu bilipim tok bilong em? Nogat, a? Baibel i tok: “Olgeta haus i gat man i bin wokim.” Yumi save dispela tok i stret. Olsem na dispela narapela tok bilong Baibel tu em i stret, olsem: “Na man i wokim olgeta samting, em God.”—Hibru 3:4.
4. Ol planti planti sta i kamap olsem wanem?
4 Tingim ples antap. I gat planti planti sta i stap. Tasol olgeta i bihainim lo na wokabaut stret long rot bilong ol na ol i no bam. Wanpela man bilong bipo em i tok: “Husat i bin wokim ol dispela samting?” Bekim bilong dispela tok i stret: “Em dispela Man em i bringim ol i kam olsem bikpela lain, em i save hamas i stap na em i save kolim nem bilong olgeta.” (Aisaia 40:26, NW) Yumi save, ol dispela planti planti sta i no inap kamap nating, na ol lo i bosim wokabaut bilong ol tu i no inap kamap nating!—Sam 14:1.
5. (a) Ol liklik hap bilong wanpela sutlam, bilong ol yet ol inap pas wantaim na i kamap wanpela sutlam? (b) Orait, olsem wanem long ol samting i stap long antap na long graun?
5 Wanpela Man em i gat tingting na bikpela strong em i bin wokim ol dispela samting. (Sam 19:1, 2) Yumi ken tok piksa long wanpela sutlam na bai yumi inap save long dispela samting. Sapos yu kisim olgeta samting bilong wokim wanpela sutlam, olsem ol bateri na glob o kiau bilong sutlam samting, na yu putim long wanpela baket na sakim nabaut, yu ting bai wanpela sutlam i kamap na i wok? Nogat, a? Sapos yumi sakim dispela baket inap wan tausen yia, ol dispela samting bilong wokim sutlam i no inap skruim wantaim na kamap wanpela sutlam. Wanpela man i mas wokim. Orait, ol kain kain samting i stap long graun na long antap na ol samting i gat laip ol i bikpela samting na i winim wanpela sutlam nating, olsem na i mas i gat wanpela man i wokim ol dispela samting tu. Dispela Man em i God I Gat olgeta Strong. Olsem na i stret yumi mas litimapim nem bilong em, a?—Revelesen 4:11; Aposel 14:15-17; 17:24-26.
GOD EM I BIKPELA MAN BILONG ANTAP
6. Olsem wanem yumi inap save, God em i no wanpela strong tasol?
6 Planti man i tok ol i bilip olsem God em i stap, tasol ol i ting em i wanpela strong tasol. Tasol God i gat tingting na dispela tingting i as bilong olgeta samting em i bin wokim. Orait, sapos em i gat tingting em i gat bodi tu, tasol i no olsem bilong yumi. God em i spirit na em i gat bodi bilong heven. Baibel i tok: “I gat bodi bilong graun, na i gat bodi bilong heven tu.”—1 Korin 15:44; Jon 4:24.
7. (a) I gat wanem samting na yumi ken save God i stap long wanpela hap, olsem ples bilong em? (b) I gat wanem samting na yumi ken save, em i gat bodi?
7 God i gat bodi, olsem na em i mas i gat ples bilong sindaun. Em i gat bodi bilong heven na Baibel i tok, heven em “ples bilong em.” (Sam 33:13, 14) Na Baibel i tok: “Krais i . . . go insait long heven stret. Na nau em i kamap ples klia long ai bilong God.” (Hibru 9:24) Sampela manmeri bai kisim laip i stap long heven wantaim God. Bai ol i kisim bodi bilong heven. Baibel i tok, bai ol i lukim God, na bai ol i kamap kain olsem em. (1 Jon 3:2) Olsem na yumi save, God em i Bikpela Man bilong antap na em i gat bodi.
8, 9. (a) Stori long wanpela ples bilong wokim paua na i makim strong bilong God i save go longwe? (b) Spirit holi bilong God em wanem samting? Em inap mekim wanem?
8 Tasol sapos em i sindaun long wanpela hap tasol, orait olsem wanem em inap lukim ol samting i kamap long olgeta hap? Na olsem wanem strong bilong em inap mekim wok long olgeta hap? (2 Kronikel 16:9) Tru em i sindaun long wanpela hap tasol, tasol em i Bikpela Man na em i gat bikpela strong. (1 Kronikel 29:11-13) Yumi ken stori long wanpela ples bilong wokim paua na bai yumi inap save olsem wanem em inap mekim wok long olgeta hap.
9 Ples bilong wokim paua i stap long wanpela hap tasol long biktaun. Tasol paua i go nabaut long dispela hap olgeta na mekim wok bilong en bilong kirapim lait samting. Na i wankain long God. God em i stap long heven. (Aisaia 57:15; Sam 123:1) Tasol spirit holi o strong bilong em i go long olgeta hap na mekim wok. Long rot bilong spirit holi God i wokim ol samting long ples antap na long graun na olgeta samting i gat laip. (Sam 33:6; Jenesis 1:2; Sam 104:30) God i no lusim heven na i go nabaut na wokim ol dispela samting. Nogat. Em i stap longwe, tasol em i salim spirit holi bilong em i go mekim wok na kamapim laik bilong em long olgeta hap. Tru tumas, God em i Bikpela Man bilong antap!—Jeremaia 10:12; Danyel 4:35.
PASIN BILONG GOD
10. Wanem wanpela rot bilong yumi ken kisim save long God?
10 Sapos yumi save gut long God, bai yumi laikim tumas Em, a? Tru, tasol yumi no inap lukim em, orait, olsem wanem yumi inap save long em? (Jon 1:18) Baibel i soim wanpela rot long yumi. Baibel i tok: “Ol man ol i lukim samting em i bin wokim. Long dispela ol inap save long sampela pasin bilong God . . . na bikpela strong bilong em.” (Rom 1:20) Olsem na ol samting God i bin wokim, sapos yumi skelim na tingim gut, yumi inap save long pasin bilong God.
11. Ol samting God i bin wokim i lainim yumi olsem wanem long God?
11 Taim yumi lukim ol sta i stap long antap, yumi inap save long bikpela strong bilong God! (Sam 8:3, 4; Aisaia 40:26) Na tingim dispela graun. God i putim gut graun bambai san i hatim graun na givim lait long graun, tasol i no kukim ol samting long graun. Na tingim wara. Ren i kam daun na wasim graun, na dispela wara i go insait long ol baret wara na i ran i go long solwara. San i pulim dispela wara i go antap olsem smok, na dispela smok i tanim i kamap ren na ren i kam daun na wasim graun gen. (Eklisiastis 1:7) I gat planti samting kain olsem, em God i bin wokim bambai graun inap kamapim kaikai na ol man na animal i ken i stap long graun! Ol dispela gutpela samting God i bin mekim i lainim yumi olsem wanem long God? Olsem: Em i gat bikpela save na em i lukautim gut ol samting em i bin wokim.—Provep 3:19, 20; Sam 104:13-15, 24, 25.
12. Skin bilong yu i lainim yu olsem wanem long God?
12 Tingim skin bilong yu yet. God i wokim skin bilong yumi bambai yumi inap i stap laip na i stap amamas tu. (Sam 139:14) Olsem: Ai bilong yumi inap lukim kain kain kala, na yumi inap harim smel bilong kaikai na pilim swit bilong en long maus. Ol dispela samting skin inap mekim i no samting tru bilong helpim yumi long i stap laip, tasol God i wokim olsem bambai yumi ken i stap amamas. Olsem na yumi save, God em i Man bilong sori na em i tingim yumi.—Jenesis 2:9; 1 Jon 4:8.
13. Ol samting God i bin mekim long ol man, dispela i lainim yu olsem wanem long God?
13 Na sapos yumi tingim ol samting God i bin mekim long ol man yumi ken save God i laikim pasin i stret. Em i no save laikim sampela lain tasol na sampela lain, nogat. (Aposel 10:34, 35) Em i save marimari long ol man na mekim gutpela pasin long ol. Baibel i stori long ol samting God i mekim long ol Isrel na i tok: “God i marimari long ol, . . . Em i tingting long ol olsem: Ol i manmeri tasol.” Baibel i tok, planti taim ol Isrel i bikhet long God na “ol i mekim em i bel hevi . . . planti taim ol i traim em na mekim em i kros.” (Sam 78:38-41; 103:8, 13, 14) Tasol taim ol wokboi bilong God i bihainim tok bilong em, em i save amamas. (Provep 27:11) Taim ol birua i mekim nogut long ol, God i pilim tru na em i tok: “Man i holim yupela em i holim kiau bilong ai bilong mi.” (Sekaraia 2:8, NW) God i gat bikpela sori tru long yumi ol man nating bilong olgeta kain skin na lain. Dispela samting i kirapim yumi long givim bel long Em, a?—Aisaia 40:22; Jon 3:16.
GOD EM I JISAS O GOD TRIWAN O EM I HUSAT?
14. Wanem dispela tok bilong God Triwan?
14 Dispela gutpela God em i husat? Sampela man i tok, nem bilong em Jisas. Sampela i tok, em i God Triwan, tasol dispela tok “triwan” i no stap long Baibel. Ol i tok i gat tripela i stap, olsem “Papa, na Pikinini, na Holi Spirit,” na tripela wantaim i wanpela God tasol. Planti misin i lainim ol man long dispela tok, tasol ol i tok em wanpela tok “hait.” Olsem wanem? Ol dispela tok ol i mekim long God em i stret?
15. Baibel i tok wanem na yumi inap save, God em i narapela na Jisas em i narapela na Jisas em i no bikpela olsem God?
15 Olsem wanem? Jisas i tok em i God? Nogat tru. Baibel i tok, Jisas em i “Pikinini Bilong God.” Na em yet i tok: “Papa em i bikpela na i win long mi.” (Jon 10:34-36; 14:28) Na Jisas i tok, i gat sampela samting em yet na ol ensel ol i no save long en, God tasol i save long en. (Mak 13:32) Na Jisas i beten long God na em i tok: “Tasol yu no bihainim laik bilong mi. Nogat. Yu bihainim laik bilong yu tasol.” (Luk 22:42) Sapos Jisas em i God I Gat Olgeta Strong em i no ken beten long em yet, a? Na Baibel i tok: “Dispela Jisas God i kirapim pinis” (Aposel 2:32) Olsem na dispela God I Gat Olgeta Strong em i narapela man, na Jisas em i narapela man. Jisas i dai na kirap bek na i go long heven, na long heven tu em i no bikpela olsem Papa bilong em.—1 Korin 11:3; 15:28.
16. Sampela Baibel i kolim Jisas olsem “God,” tasol olsem wanem yumi inap save Jisas em i no God I Gat Olgeta Strong?
16 Tasol ating bai wanpela man i tok: ‘Mi ting Baibel i tok Jisas em i wanpela god.’ Em i stret. Na Baibel i tok Seten em i wanpela god. (2 Korin 4:4) Jon 1:1 i kolim Jisas olsem “Tok,” na long sampela Baibel ol i tanim tok bilong Jon 1:1 olsem: “Bipo tru Tok i stap. Tok i stap wantaim God. Na Tok em yet i God.” Tasol ves 2 i tok: “Bipo tru em i stap wantaim God.” Ol man i bin lukim Jisas, tasol Jon 1:18 i tok: “I no gat wanpela man i bin lukim God liklik.” Olsem na i stret sampela Baibel i tanim tok bilong Jon 1:1 olsem: “Bipo tru Tok i stap. Tok i stap wantaim God. Na Tok em yet i olsem God,” o “em i wanpela god.” Tok o Jisas em i wanpela strongpela man kain olsem wanpela god. Tasol Jisas em i no God I Gat olgeta Strong. Nogat. Jisas i kolim Papa bilong em olsem “God bilong mi,” na em i tok, “Yu wanpela tasol yu God tru.”—Jon 20:17; 17:3.
17. Baibel i tok spirit holi i pulap long ol disaipel bilong Jisas, orait dispela tok i helpim yumi olsem wanem na yumi save spirit holi i no wanpela man?
17 Na “Holi Spirit” em i no wanpela man, em i strong bilong God bilong mekim wok. Jon Bilong Baptais i tok, Jisas bai baptaisim ol man long “Holi Spirit” olsem Jon i bin baptaisim ol long wara. Wara i no wanpela man na “Holi Spirit” tu i no wanpela man. (Matyu 3:11) Jisas i dai na kirap bek na bihain ol samting i kamap olsem Jon i tok. Spirit holi i kam daun long ol disaipel i bung long Jerusalem. Baibel i tok: “Holi Spirit i pulap long olgeta disaipel.” (Aposel 2:4) Yu ting wanpela man “i pulap” long ol? Nogat, a? Spirit bilong God i pulap long ol. Olsem na dispela tok bilong God Triwan em i no wanpela tok bilong Baibel. Taim Jisas i no kam daun yet long graun ol haiden bilong Isip na Babilon i save lotuim ol god triwan.
NEM BILONG GOD
18. (a) “God” em i nem tru bilong God I Gat olgeta Strong? (b) Wanem nem tru bilong em?
18 Olgeta man i gat nem. God tu em i gat nem. Dispela nem i makim em i narapela kain long olgeta narapela god. Tasol ating sampela man bai tok: “God em i nem bilong em, a?” Nogat. “God” em i biknem tasol, olsem “Praim Minista” o “King” i biknem. Nem bilong God i stap long Baibel. Ol i raitim planti taim long Baibel, olsem 7,000 taim. Nem bilong em JEHOVA. Yu inap lukim dispela nem long sampela Baibel bilong Papua Nugini, olsem Baibel Kuanua (Ieova), na Baibel Manus (Jehova), na Baibel Motu. Namba wan taim ol i tanim tok bilong Mak long tok Pisin ol i raitim nem “Jehova” long Mak 12:36. Na long Sam 146:5, 6 long wanpela Baibel Pisin ol i raitim dispela nem olsem “Jihova.” Sampela taim ol i raitim olsem “Yawe.” Dispela nem em i insait long dispela tok ‘Aleluya.’ Ol i sotim nem “Yawe” na raitim olsem “ya.” Long tok Pisin ol i tanim dispela tok ‘Aleluya’ olsem “litimapim nem bilong God.”—Revelesen 19:1-6.
19. (a) Bilong wanem sampela manmeri i kirap nogut taim ol i lukim nem bilong God long Baibel bilong ol? (b) Long sampela Baibel ol i senisim nem bilong God na raitim olsem wanem?
19 Sampela manmeri ol i kirap nogut taim ol i lukim nem bilong God long Baibel bilong ol. Long wanem, Baibel bilong ol i kolim nem bilong God wan wan taim tasol. Long wanpela Baibel Inglis (King James Version) ol i raitim tasol long Eksodas 6:3, Sam 83:18, Aisaia 12:2, Aisaia 26:4. Tasol taim dispela Baibel i senisim nem bilong God na putim “Bikpela” o “God,” ol i raitim long bikpela rait, olsem. “BIKPELA” o “GOD.” Ol i mekim olsem long Sam 110:1.
20. (a) Bilong wanem planti taim ol i no putim nem bilong God long Baibel? (b) Tasol i stret ol i ken putim?
20 Tasol ating yu laik save, ‘Bilong wanem ol i no putim nem bilong God long olgeta hap bilong Baibel olsem ol man bilong raitim Baibel i bin putim long pastaim? Bilong wanem ol man bilong tanim tok bilong Baibel ol i lusim dispela nem na raitim BIKPELA o GOD?’ Long wanpela Baibel Inglis (American Standard Version), ol i putim nem bilong God, Jehova. Na long Tok Bilong Ritim Pastaim ol i stori long as bilong dispela samting ol i mekim, na bilong wanem ol man i bin lusim dispela nem longtaim na ol i no putim long ol Baibel. Ol i tok: ‘Ol Juda i bihainim wanpela bilip giaman na ol i pret long kolim Nem Bilong God, long wanem ol i tok, dispela Nem i holi tumas. Tasol yumi no ken bihainim moa dispela bilip giaman. Yumi mas putim nem bilong God long ol Baibel Inglis na long ol narapela Baibel tu.’ Ol man i tanim tok bilong dispela Baibel ol i pilim olsem ol man i rausim nem bilong God long Baibel ol i gat tingting kranki na ol i mekim olsem. Olsem na ol i putim gen nem bilong God long dispela Baibel bilong ol. Ol i putim long olgeta hap i stret ol i ken putim.
21. Wanpela Baibel Katolik i tok wanem long dispela nem Jehova?
21 Tasol sampela man i tok, dispela nem “Jehova” em i no nem tru bilong God, olsem na yumi no ken kolim. Wanpela Baibel Katolik (Douay Version) i no gat dispela nem long en, tasol dispela Baibel i mekim sampela tok long Eksodas 6:3 na i tok: “Sampela man bilong nau ol i bin kamapim dispela nem Jehova. . . . dispela nem i stap long olpela rait Hibru bilong Baibel, tasol longtaim pinis ol man i no kolim, olsem na nau yumi no save ol i bin kolim olsem wanem.”
22. (a) Long tok Hibru ol i raitim nem bilong God olsem wanem? (b) Bilong wanem i hatwok long save ol i bin kolim nem bilong God olsem wanem long pastaim?
22 Tru tumas, olsem dispela Baibel Katolik i tok, nem bilong God i stap long olpela rait Hibru, long wanem pastaim ol i bin raitim namba wan hap bilong Baibel (ol 39 liklik buk bilong Olpela Testamen) long tok Hibru. Long tok Hibru ol i raitim nem bilong God, olsem: YHWH. Taim ol i raitim tok Hibru long bipo, ol i save lusim sampela rait, olsem a, e, i, o, u, em inap helpim yumi long kolim stret dispela tok. Olsem na nau yumi gat hatwok, long wanem i no gat rot bilong yumi ken save long ol wan wan rait yumi mas kolim namel long dispela YHWH.
23. Pasin bilong raitim nem “Mak” olsem “Mk” i helpim yumi olsem wanem na yumi ken save long hevi bilong kolim nem bilong God?
23 Bilong yumi ken save long dispela samting, yumi ken tingim nem “Mak.” Yumi save rausim “a” long dispela nem na raitim sotpela olsem “Mk.” Orait, man i stap planti planti yia bihain long taim bilong yumi, taim em i lukim dispela rait “Mk” bai em i no save em i mas kolim olsem wanem. Em i no bin harim wanpela man i kolim, na em i no save wanem ol rait i stap namel long dispela “M” na “k.” Na i wankain tu long nem bilong God. Yumi no save tru ol i bin kolim olsem wanem, tasol sampela saveman i ting ol i bin kolim olsem “Yawe.” Tasol inap planti yia nau na ol man i save kolim olsem “Jehova.” Planti manmeri ol i save kolim olsem.
24. (a) Bilong wanem i stret yumi ken kolim nem bilong God? (b) Bilong wanem i bikpela samting long yumi mas kolim nem bilong God, olsem Rom 10:13 i tok?
24 Yumi no save gut long kolim nem bilong God, olsem na ating yumi no ken kolim? Yumi save kolim nem bilong sampela narapela man long Baibel na yumi no kolim olsem ol Hibru bilong bipo i bin kolim. Olsem nem bilong Jisas. Ol Hibru i save kolim dispela nem olsem “Yesua.” Olsem tasol i stret yumi ken kolim dispela nem bilong God em Baibel i kamapim, maski yumi kolim olsem “Yawe” o “Jehova” o yumi kolim long tok ples bilong yumi yet. Tasol sapos yumi no kolim, em i no stret. Bilong wanem i no stret? Long wanem, sapos yumi no kolim dispela nem, ol man i no inap save yumi bilong dispela “lain manmeri” em nem bilong God i stap long ol. (Aposel 15:14; Rom 10:13) Yumi mas save long nem bilong God na yumi mas litimapim na autim long ol narapela man olsem Jisas i bin mekim taim em i stap long graun.—Matyu 6:9; Jon 17:6, 26.
GOD I GAT LAIK BILONG EM
25. (a) Wanem sampela samting bilong God yumi save kirap nogut long en? (b) Wanem samting i kirapim Jehova long wokim ol samting?
25 Sampela samting bilong God yumi save kirap nogut long en, em olsem: God i no bin kamap nupela long wanpela taim na em i no ken i dai. Em i “King bilong olgeta taim.” (Sam 90:2; 1 Timoti 1:17) Na taim God i no kirap yet long wokim ol samting, em wanpela tasol em i stap. Tasol em i no pilim olsem em i stap wanpis na em i bel hevi; nogat. Bilong em yet em inap tru na em i stap amamas. Bikpela sori bilong em i kirapim em long wokim ol samting na wokim ol man bambai ol tu i ken amamas long i stap laip. Pastaim em i wokim ol spirit ol i kain olsem em yet. Taim em i no redim yet graun bilong putim man long en, em i wokim planti pikinini bilong em long heven, em ol ensel. Jehova i laik bai ol i ken amamas long i stap laip na mekim wok bilong em.—Jop 38:4, 7.
26. Olsem wanem yumi inap save God bai kamapim laik bilong em long graun?
26 Taim graun i redi pinis Jehova i putim Adam tupela Iv long wanpela hap bilong graun em i bin wokim i kamap gutpela ples o paradais. Em i laik bai ol i kamapim ol pikinini, na bai ol dispela pikinini i bihainim tok bilong Em na lotu long Em, na bai ol i mekim olgeta hap bilong graun i kamap gutpela ples paradais. (Jenesis 1:27, 28) Tasol Adam tupela Iv i sakim tok bilong God, olsem na God i no kamapim yet laik bilong em. Tasol bihain bai laik bilong God i kamap; laik bilong em i no inap lus nating! Em i tok: “Tok bilong mi i no ken lus nating, na olgeta samting mi save amamas long en bai mi mekim.”—Aisaia 46:10, 11, NW.
27. (a) Bilong wanem God bai skelim yumi long kot? (b) Olsem na yumi mas tingim gut wanem samting?
27 Yu mas mekim wanem bilong bihainim laik bilong God? Sapos yu bihainim laik bilong yu yet tasol na yu no tingim laik bilong God, yu no bihainim laik bilong God. Yu mekim pasin olsem bilong Seten na Adam na Iv. Ol i save long laik bilong God, tasol ol i no bihainim. Olsem na God i skelim ol long kot. Olsem wanem? Bai em i skelim yumi tu? Bai em i skelim yumi, long wanem em i As bilong laip bilong yumi, na yumi stap laip long strong bilong em. (Sam 36:9; Matyu 5:45) Orait, yumi save bihainim laik bilong God? Yumi mas tingim gut dispela samting, long wanem sapos yumi laik i stap oltaim, yumi mas bihainim laik bilong God.
PASIN BILONG LOTUIM JEHOVA
28. Sampela manmeri i mekim wok long wanem samting bilong helpim ol long lotuim God?
28 Pasin yumi bihainim bilong lotuim Jehova em i bikpela samting. Yumi mas lotuim em long pasin em i laikim, maski dispela pasin i narapela kain long pasin yumi bin lain long en bipo. Olsem: Planti manmeri, taim ol i lotu, ol i save mekim wok long ol piksa, olsem piksa bilong wanpela santu, o Maria, o Jisas, o wanpela god. Ating ol i tok, ol i no lotuim dispela piksa, tasol ol i laik lukim o holim kain samting olsem bilong helpim ol long lotuim God. Tasol yu ting God i laikim dispela pasin?
29. Baibel i tok wanem na yumi ken save i no stret yumi mekim wok long piksa samting bilong lotuim God?
29 Em i no laikim. Olsem na Moses i tokim ol Isrel ol i no bin lukim God, long wanem God i no laik bai ol i wokim piksa bilong Em bilong lotu long en. (Diuteronomi 4:15-19) Na wanpela lo bilong ol Tenpela Lo i tok: “Yupela no ken wokim piksa bilong wanpela samting . . . Yupela no ken brukim skru long wanpela god giaman o piksa na lotuim em.” (Eksodas 20:4, 5) Yumi mas lotuim Jehova wanpela tasol. Planti taim Baibel i tambuim yumi long wokim ol piksa bilong lotu long en. Baibel i tok, yumi no ken lotuim wanpela man o wanpela samting, yumi mas lotuim Jehova wanpela tasol.—Aisaia 44:14-20; 46:6, 7; Sam 115:4-8.
30. (a) Jisas na ol aposel i tok wanem na yumi save, yumi no ken mekim wok long ol piksa ol man i wokim bilong lotu long en? (b) Eksodas 32:20 i soim yumi, yumi mas mekim wanem long ol piksa samting ol man i wokim bilong lotu long en?
30 Jisas i no save mekim wok long ol piksa bilong lotu. Em i tok: “God em i spirit. Na ol man i lotu long em, ol i mas lotu long spirit na long pasin i tru.” (Jon 4:24) Ol disaipel i bihainim dispela tok na ol i no save mekim wok long ol piksa samting bilong lotuim God. Aposel Pol i tok: “Mipela i bilip tasol long em na i wokabaut. Mipela i no lukim em yet.” (2 Korin 5:7) Na aposel Jon i tok: “Yupela i mas givim baksait long olgeta god giaman.” (1 Jon 5:21) Skelim ol samting i stap long haus bilong yu. Yu bihainim dispela tok?—Lukim Rom 1:23 na Eksodas 32:20; Diuteronomi 7:25.
31. (a) Maski yumi no save bilong wanem God i givim wanpela lo long yumi, tasol wanem samting bai kirapim yumi long bihainim dispela lo? (b) Yumi mas mekim wanem? Na yumi mas bihainim wanem tok?
31 Sapos yumi lotuim Jehova long pasin em i makim, bai yumi inap i stap amamas tru. (Jeremaia 14:22) Baibel i soim yumi, olgeta lo bilong God i gutpela bilong helpim yumi bambai yumi inap i stap oltaim. Tru, sampela taim yumi no save long as bilong wanpela lo God i givim long yumi na olsem wanem dispela lo inap helpim yumi. Tasol yumi bilip tru olsem: God i gat bikpela save winim bilong yumi, na yumi givim bel long bihainim dispela lo bilong em. (Sam 19:7-11) Yumi mas wok strong long kisim save long Jehova, na bihainim dispela tok: “Yupela kam, yumi daunim het na lotu long em. Bikpela i bin wokim yumi. Orait, yumi go klostu long em na brukim skru. Em yet i God bilong yumi. Em yet i save lukautim yumi manmeri bilong en olsem ol sipsip.”—Sam 95:6, 7.
[Blok long pes 42]
Em sampela Baibel ol i raitim nem bilong God long en
GUD NIUS MAK I RAITIM
The Council of the British & Foreign Bible Society in Australia 1956
36 David yet i tok, Holi Spirit i soim em: Jehova i tok long Lord bilong mi: Yu sit daun long han siut bilong mi, Mi mekim ol birua man i kamap samting bilong yu putim leg bilong yu long em pastaim.
SAMPELA SAM
Wes Sepik Baibel Skul, Yebil, via Wewak
5. Tasol man i save askim God bilong Jekop i helpim em, dispela man em i amamas. Long wanem: Jihova em i God bilong em na em i . . .
6. Na Jihova em i bin wokim heven
TOK KUANUA bilong Nu Briten
Printed by the British & Foreign Bible Society 1896
muka u ra kum wewadu rap? 29 Iesu i piri tana, A wewadu i muka kumi, Muat a tara . . . , Muat . . . Ieova nudat Kalou. Ieova . . . ku ia, 30 Ma kumi, Un . . . Ieova a num Kalou ma ra balam rap,
JENESIS 2:4, 5
JENESIS
Published by The Bible Society of Papua New Guinea Lae—Port Moresby 1981
4 Olsem tasol God i bin wokim heven na graun na olgeta samting. Taim Yawe God i mekim kamap heven na graun, 5 i no gat diwai na gras samting i stap long graun yet,
[Ol Piksa long pes 34, 35]
Haus i gat man bilong wokim, . . . olsem tasol ol sta samting bilong antap i gat Man bilong wokim
[Piksa long pes 39]
Jisas na God i no wanpela man tasol, long wanem Jisas i beten long God, olsem: ‘Yu no bihainim laik bilong mi, yu mas bihainim laik bilong yu’
[Piksa long pes 40, 41]
Spirit holi i pulap long 120 disaipel wantaim, olsem na spirit holi i no wanpela man, a?
[Piksa long pes 45]
Yu ting i stret yumi ken mekim wok long piksa bilong lotu?