Sanap Strong na Ran Long Resis
“Yumi mas sanap strong na ran long dispela resis God i makim bilong yumi.” —HIB. 12:1.
1, 2. Baibel i tok laip bilong ol Kristen tru i olsem wanem samting?
LONG olgeta yia planti manmeri i save ran long ol longpela resis. Sampela ol i hapman bilong ran, na ol i laik winim resis. Tasol planti arapela i save olsem ol i no inap winim resis. Bikpela samting long ol em long ran i go inap long ol i pinisim resis.
2 Baibel i stori olsem laip bilong ol Kristen tru i olsem wanpela resis. Aposel Pol i stori long dispela kain resis long namba 1 pas em i raitim long ol Kristen long Korin. Em i tok: “Ating yupela i no save olsem olgeta man insait long resis i save ran, tasol wanpela tasol i save kisim prais? Yupela i mas ran olsem bai yupela i ken kisim prais.”—1 Kor. 9:24.
3. Pol i gat wanem tingting taim em i tok olsem wanpela man tasol bai kisim prais?
3 Taim Pol i tok olsem wanpela man tasol bai kisim prais, yu ting em i makim olsem wanpela Kristen tasol bai kisim prais bilong laip? Nogat. Ol Kristen long Korin i save olsem olgeta man insait long resis i gat strongpela tingting long winim resis, maski wanpela tasol bai kisim prais. Olsem na ol man bilong resis i save tren gut tru na ran strong tru bilong winim resis. Pol i laik bai ol brata bilong em i mekim olgeta samting ol inap mekim bilong stap gut long Jehova na ran i go inap long pinis bilong resis. Olgeta Kristen husat i mekim olsem ol inap winim prais, em laip i stap oltaim.
4. Yumi mas save long wanem samting bilong dispela resis ol Kristen i insait long en?
4 Tok bilong Pol i strongim yumi, tasol tu dispela tok i kirapim yumi long tingting gut long wokabaut bilong yumi. Sapos wokabaut bilong yumi i amamasim Jehova, orait gutpela samting i wetim yumi, em laip oltaim long heven o long Paradais long graun. Tasol laip bilong wanpela Kristen i olsem wanpela longpela resis tru we i gat planti samting em inap bagarapim em. Planti samting inap mekim na yumi no ran strong moa na mekim wok bilong Jehova o yumi lusim wok bilong Jehova olgeta. (Mat. 7:13, 14) Dispela samting i painim pinis sampela wokboi bilong Jehova. Wanem ol trap na ol bagarap inap painim man i insait long resis bilong kisim laip? Olsem wanem yu inap abrusim ol? Yu inap mekim wanem bilong winim resis?
Sanap Strong Bilong Winim Resis
5. Long Hibru 12:1, Pol i stori long wanem samting?
5 Taim Pol i raitim pas i go long ol Kristen Hibru long Jerusalem na Judia, em i stori gen long ol man i ran insait long resis. (Ritim Hibru 12:1.) Em i stori long as na ol Kristen i mas ran yet long resis, na tu, long ol samting ol i mas mekim bilong winim resis. Pastaim bai yumi stori long as na Pol i raitim pas i go long ol Hibru, na long samting em i laik ol i mas mekim. Na bihain bai yumi stori long skul yumi kisim long tok em i raitim long ol.
6. Ol hetman bilong lotu i laik mekim wanem long ol Kristen?
6 I gat planti samting i bin givim hatwok tru long ol Kristen long taim bilong ol aposel. Moa yet long ol Kristen Hibru long Jerusalem na Judia, long wanem, ol hetman bilong lotu Juda i traim long fosim ol manmeri long bihainim tok bilong ol. Pastaim ol i bin kirapim ol manmeri long ting olsem Jisas Krais i bin agensim gavman na em wanpela raskol husat i mas dai. Ol i bin kilim i dai Jisas Krais, na nau ol i laik stopim ol lain husat i autim tok long ol samting Jisas i bin mekim. Long buk Aposel, yumi ken ritim stori bilong samting i kamap bihain long Pentikos 33 C.E. Bilong stopim ol Kristen long autim tok, ol dispela hetman i bin mekim nogut long ol planti taim. Olsem na ol Kristen i stap gut long God i karim hevi.—Apo. 4:1-3; 5:17, 18; 6:8-12; 7:59; 8:1, 3.
7. Wanem samting i mekim na laip bilong ol Kristen long taim bilong ol aposel i gat hatwok tru long en?
7 Narapela as na laip bilong ol dispela Kristen i gat hatwok tru long en, em long wanem klostu Jerusalem bai bagarap. Jisas i bin mekim tok lukaut long ol olsem Jerusalem bai bagarap. Em i bin tokim ol long ol samting bai kamap paslain long bagarap, na long ol samting ol i mas mekim bilong stap laip. (Ritim Luk 21:20-22.) Jisas i tok: “Was gut long yupela yet, nogut pasin bilong kaikai planti tumas na dring planti na ol wari bilong laip i daunim yupela, na dispela de i kamap long yupela wantu tasol.”—Luk 21:34.
8. Ating wanem samting i mekim na sampela Kristen i no ran strong moa o ol i lusim wok bilong Jehova olgeta?
8 Klostu 30 yia bihain long Jisas i mekim dispela tok, Pol i raitim pas long ol Kristen Hibru. Wanem ol samting i bin painim ol dispela Kristen insait long dispela 30 yia? Ating ol hevi o pasin bilong tingting planti long ol samting ol i nidim bilong wan wan de i mekim na sampela i no wok moa long save gut long Jehova na pas gut yet wantaim em. (Hib. 5:11-14) Ating sampela Kristen i ting em bai isi moa long bihainim pasin bilong ol Juda. Long wanem, ol Juda i bilip yet long God na ol i bihainim planti tok bilong Lo bilong Moses. Na tu, i gat sampela insait long ol kongrigesen husat i laik fosim ol arapela long bihainim Lo bilong Moses na ol pasin tumbuna bilong ol Juda. Sampela Kristen i bilipim ol, na sampela i bihainim tasol tok bilong ol, long wanem, ol i pret. Pol i tok wanem bilong strongim ol brata Kristen bilong en long bihainim yet pasin Kristen na stap gut long Jehova?
9, 10. (a) Long pinis bilong Hibru sapta 10, Pol i tok ol Kristen Hibru i mas mekim wanem? (b) Bilong wanem Pol i stori long ol samting ol wokboi bilong Jehova i bin mekim bilong kamapim bilip bilong ol?
9 Bilong strongim ol Kristen Hibru, Jehova i bin kirapim Pol long raitim pas i go long ol. Long sapta 10, Pol i tokim ol olsem Lo Bilong Moses i “olsem sedo tasol bilong ol gutpela samting bai kamap bihain” na long rot bilong sakrifais bilong Jisas tasol God inap lusim ol sin bilong ol. Long pinis bilong sapta 10, Pol i tok: “Yupela i mas i gat pasin bilong sanap strong bai yupela i ken kisim ol samting God i promis long en. Tasol pastaim yupela i mas mekim laik bilong God. Yes, ‘i no longtaim’ na ‘dispela man i laik i kam, em bai kam na em bai kam kwiktaim.’ ”—Hib. 10:1, 36, 37.
10 Long Hibru sapta 11, Pol i stori long ol samting ol man i gat bilip tru i bin mekim, na em i kamapim klia pasin bilong bilip tru long God em i wanem samting. Long sapta 12, em i kirapim ol gen long “sanap strong na ran long dispela resis” God i makim bilong ol. Bilong wanem em i stori long pasin bilong bilip paslain long em i stori gen long pasin bilong sanap strong? Em i laik bai ol dispela Kristen i save olsem, bilong kamapim olsem ol i bilip tru long Jehova, ol i mas i gat strongpela bel na pasin bilong sanap strong. Em i stori long planti man na meri bipo husat i bin stap gut long Jehova maski bikpela hevi i painim ol. Eksampel bilong ol bai helpim ol Kristen Hibru long sanap strong long taim bilong hevi. Pol i stori long ol samting ol dispela wokboi bilong Jehova i mekim bilong kamapim bilip bilong ol, na bihain em i tokim ol Kristen Hibru: “Bikpela lain manmeri ol i olsem bikpela klaut na ol i raunim yumi i stap, em ol lain i save tokaut long ol samting ol i lukim na harim. Olsem na yumi tu mas lusim olgeta samting i putim hevi long yumi na dispela sin i save pasim yumi. Na yumi mas sanap strong na ran long dispela resis God i makim bilong yumi.”—Hib. 12:1.
“Ol i Olsem Bikpela Klaut”
11. Eksampel bilong dispela bikpela lain i olsem “bikpela klaut,” i mas kirapim yumi long tingim wanem samting?
11 Pol i tok ol wokboi bilong Jehova husat i bin stap paslain long taim bilong ol Kristen, ol i olsem ‘bikpela klaut i raunim yumi.’ Ol i bin stap gut long God i go inap long ol i dai, na eksampel bilong ol i soim olsem ol Kristen inap stap gut long Jehova maski bikpela hevi i painim ol. Dispela lain i olsem “bikpela klaut,” ol i olsem ol man husat i save gut long ran na ol i bin pinisim resis. Eksampel bilong ol bai strongim ol arapela long ran yet long resis. Sapos yumi insait long wanpela resis na ol hapman bilong ran i strongim yumi long ran yet, orait yumi bai traim bes bilong yumi long ran i go inap long pinis bilong resis. Olsem na ol Kristen Hibru i mas tingim gut eksampel bilong ol wokboi bilong Jehova long bipo. Eksampel bilong ol inap strongim bel bilong ol dispela Kristen na kirapim ol long tingim olsem ol inap “sanap strong na ran” i go inap long pinis bilong resis. Na yumi tu inap mekim olsem.
12. Yumi inap kisim wanem skul long bilip bilong ol manmeri em Pol i stori long ol?
12 Ol samting i bin painim planti bilipman em Pol i stori long ol, i save painim yumi tu. Olsem, Noa i bin stap paslain long taim Jehova i bagarapim ol manmeri long tait wara. Na yumi stap paslain long taim we Jehova bai bagarapim ol manmeri i stap aninit long Satan. Jehova i bin askim Abraham na Sara long lusim ples bilong ol bilong bihainim lotu i tru na long wetim truim bilong tok promis bilong em. Jehova i askim yumi long lusim ol samting bilong yumi yet na bihainim laik bilong em. Long dispela rot yumi kisim ol blesing i kam long em. Moses i bin wokabaut namel long ples nogut inap longpela taim bilong kamap long Graun Bilong Promis. Yumi stap long taim nogut na yumi wetim nupela taim Jehova i promis long kamapim. Em i bikpela samting long yumi mas tingim pasin bilong ol dispela gutpela manmeri. Yumi ken mekim ol samting ol i bin mekim bilong amamasim Jehova, na yumi ken kisim skul long ol samting ol i bin mekim em Jehova i no amamas long en.—Rom 15:4; 1 Kor. 10:11.
Olsem Wanem Ol i Winim Resis?
13. Wanem samting i givim hatwok long Noa? Wanem samting i helpim em long mekim olgeta samting Jehova i tokim em long mekim?
13 Wanem samting i helpim ol dispela wokboi bilong Jehova long sanap strong inap long resis i pinis? Tingim tok Pol i raitim i stori long Noa. (Ritim Hibru 11:7.) Noa i no bin lukim wanpela bikpela tait wara i bagarapim ol man na ol animal. (Stt. 6:17) Tait wara i no bin kamap long bipo. Tasol Noa i no ting dispela samting i no inap kamap. Wai? Long wanem, em i bilip olsem, oltaim Jehova i save mekim ol samting em i tokaut long en. So Noa i no bin ting em i hatwok tumas long bihainim tok bilong Jehova. Nogat. “Noa i mekim olgeta samting.” (Stt. 6:22) Noa i gat planti wok long mekim. Em i mas wokim sip, bungim ol animal, bungim kaikai inap long famili na ol animal, givim tok lukaut long ol manmeri, na em i mas helpim famili bilong en long bilip strong long Jehova. I no isi long Noa i “mekim olgeta samting.” Tasol em i bilip long Jehova na em i sanap strong na mekim wok. Na Jehova i bin kisim bek em na famili bilong em na em i givim planti blesing long ol.
14. Olsem wanem Abraham na Sara i bin kamapim olsem ol i bilip long God? Yumi kisim wanem skul long eksampel bilong tupela?
14 Pol i tok Abraham na Sara ol i insait long “dispela bikpela lain manmeri ol i olsem bikpela klaut na ol i raunim yumi i stap.” Laip bilong ol i senis taim God i tokim ol long lusim ples bilong ol long Ur. Ol i no save wanem samting bai painim ol. Tasol ol i bilip strong long Jehova na ol i bihainim tok bilong en maski i hatwok long mekim olsem. Olsem na Baibel i kolim Abraham olsem “papa bilong olgeta man . . . i bilip.” (Rom 4:11) Ol Kristen Hibru i save pinis long laip bilong Abraham na famili bilong en, olsem na Pol i kolim sampela samting tasol bilip bilong ol i bin kirapim ol long mekim. Na dispela i kamapim ples klia strongpela bilip bilong ol. Pol i tok: “Ol dispela manmeri i holimpas bilip bilong ol i go inap long ol i dai. Taim ol i stap laip ol i no lukim truim bilong ol tok promis God i bin mekim long ol. Tasol ol i luksave olsem truim bilong ol dispela tok promis bai kamap bihain na ol i amamas long ol. Na ol i tokaut olsem ol i man em ol arapela i no save long ol na ol i stap olsem tripman long ples ol i sindaun long en.” (Hib. 11:13) Bilip bilong ol long God na pasin bilong i stap pren bilong em i bin helpim ol long sanap strong long dispela resis.
15. Wanem tingting i stiaim laip bilong Moses?
15 Moses em i narapela wokboi bilong Jehova husat i insait long “dispela bikpela lain manmeri ol i olsem bikpela klaut.” Moses i bin lusim ol gutpela samting em inap kisim long haus bilong king. Em i ting “olsem i gutpela long kisim hevi wantaim lain bilong God.” Bilong wanem em i mekim olsem? Pol i tok: “Em i tingting strong long gutpela pe em bai kisim. . . . Em i sanap strong i stap, na i olsem em i lukim dispela Man em ol man i no inap lukim long ai bilong ol.” (Ritim Hibru 11:24-27.) Moses i sakim ‘pasin bilong mekim sin na kisim amamas bilong sotpela taim tasol.’ Em i tingim Jehova olsem man i stap tru, na em i save God bai truim olgeta promis bilong en. Dispela i bin helpim em long mekim ol samting wantaim strongpela bel na sanap strong taim em i gat hevi. Na tu, dispela i bin helpim em long wok strong long kisim ol Israel long Isip na bringim ol i go long Graun Bilong Promis.
16. Olsem wanem yumi save Moses i no givap taim em i no inap i go insait long Graun Bilong Promis?
16 Abraham na Moses i bin i dai paslain long ol tok promis bilong God i kamap tru. Paslain long lain Israel i go insait long Graun Bilong Promis, God i tokim Moses: “Yu ken lukim dispela graun, tasol yu no inap i go klostu long en. Na yu no inap i go insait long dispela graun nau mi givim long ol Israel.” Moses na Aron i no bin bihainim stretpela pasin long Meriba, olsem na tupela i no inap go insait long Graun Bilong Promis. Ol i bin larim ol bikhet manmeri i kirapim ol long belhat tru na ol i mekim pasin i no givim ona long God. (Lo 32:51, 52) Yu ting Moses i laik givap na ting God i mekim pasin i no stret? Nogat. Em i amamas na askim Jehova long blesim ol lain bilong Israel. Laspela tok em i mekim long ol em i olsem: “Ol Israel, yupela i mas amamas tru. Bikpela i no bin helpim wanpela lain manmeri olsem em i bin helpim yupela na kisim bek yupela. Bikpela yet i stap olsem hap plang bilong pait na olsem bainat bilong yupela.”—Lo 33:29.
Skul Yumi Kisim
17, 18. (a) Yumi kisim wanem skul long “dispela bikpela lain manmeri ol i olsem bikpela klaut”? (b) Bai yumi stori long wanem samting long neks stadi?
17 Yumi kisim skul long sampela bilong “dispela bikpela lain manmeri ol i olsem bikpela klaut na ol i raunim yumi.” Yumi kisim save olsem bilong pinisim resis, yumi mas bilip strong long God na ol promis bilong en. (Hib. 11:6) Dispela bilip i mas bosim sindaun bilong yumi long nau. Yumi save olsem God i promis long givim gutpela sindaun long yumi long bihain. Yumi inap lukim “dispela Man em ol man i no inap lukim long ai bilong ol,” olsem na yumi sanap strong na ran long dispela resis.—2 Kor. 5:7.
18 Resis ol Kristen i ran long en i no isi. Tasol yumi inap pinisim resis. Long neks stadi bai yumi stori long sampela samting moa em inap helpim yumi long pinisim dispela resis.
Yu Inap Stori Long Dispela?
• Bilong wanem Pol i bin stori long bilip bilong ol wokboi bilong God long bipo?
• Olsem wanem eksampel bilong “bikpela lain manmeri ol i olsem bikpela klaut na ol i raunim yumi i stap” i helpim yumi long sanap strong na ran yet long resis?
• Yu lainim wanem samting long eksampel bilong Noa, Abraham, Sara, na Moses?
[Piksa long pes 19]
Abraham na Sara i orait long lusim gutpela sindaun long Ur