Wok Gut Wantaim Long Mekim Wok Bilong God
“Long dispela taim bai mi givim wanpela gutpela tok ples long ol man, bambai olgeta i ken singaut long nem bilong Jehova na wok gut wantaim long mekim wok bilong em.”—SEFANAIA 3:9, NW.
1. Wanem samting i kamap bilong truim tok profet bilong Sefanaia 3:9?
LONG nau i gat olsem 6,000 tok ples ol man i save mekim long olgeta hap. Na i gat planti tok ples ol i tanim liklik. Tasol maski ol man i mekim wanem kain tok ples—tok Arap o tok Sulu samting—God i bin mekim wanpela samting i narapela kain tru. Em i wokim rot bambai ol manmeri long olgeta hap ol inap lain na mekim wanpela gutpela tok ples tru. Dispela samting i wok long kamap bilong truim wanpela tok promis God Jehova i bin mekim long rot bilong profet Sefanaia: “Long dispela taim bai mi givim wanpela gutpela tok ples [olsem klinpela maus] long ol man, bambai olgeta i ken singaut long nem bilong Jehova na wok gut wantaim long mekim wok bilong em.”—Sefanaia 3:9, NW.
2. Wanem dispela “gutpela tok ples”? Em i helpim ol man long mekim wanem?
2 Dispela “gutpela tok ples” em tok i tru bilong God i stap long Baibel. Na moa yet, em tok i tru bilong Kingdom bilong God, em bai mekim holi nem bilong Jehova, na kamapim long ples klia olsem em i Nambawan Bos, na mekim gut long ol man. (Matyu 6:9, 10) Dispela gutpela tok ples em wanpela tok ples tasol long graun i klin tru long ol samting bilong spirit, na ol man bilong olgeta lain na skin i save mekim dispela tok ples. Em i helpim ol long “wok gut wantaim” long mekim wok bilong Jehova. Olsem na ol i “wanbel wantaim” long mekim wok bilong em.—The New English Bible.
No Ken Laikim Sampela Lain Tasol
3. Wanem samting i helpim yumi long mekim wok bilong Jehova long pasin wanbel?
3 Yumi ol Kristen i amamas long ol lain i gat kain kain tok ples i stap namel long yumi na yumi olgeta i wok gut wantaim. Tru, yumi save autim gutnius bilong Kingdom long kain kain tok ples, tasol yumi mekim wok bilong God long pasin wanbel. (Song 133:1) Yumi inap mekim olsem, long wanem, maski yumi stap we long graun, yumi olgeta i save mekim dispela gutpela tok ples na litimapim nem bilong Jehova.
4. Pasin bilong laikim sampela lain tasol na sampela nogat, bilong wanem em i no ken i stap insait long lain bilong God?
4 Pasin bilong laikim sampela lain tasol na sampela nogat, dispela i no ken i stap namel long lain bilong God. Aposel Pita i kamapim klia dispela samting taim em i autim tok long wanpela kepten bilong ami long 36 C.E., nem bilong em Kornilius, em man bilong ol narapela lain. Pita i tok: “Tru tumas, nau mi save, God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” (Aposel 10:34, 35) Dispela tok i stret, olsem na pasin bilong laikim sampela lain tasol na sampela nogat, o bung wantaim ol gutpela pren o wantok tasol na givim baksait long ol narapela, o mekim gut long sampela tasol, dispela pasin i no ken i stap insait long kongrigesen Kristen.
5. Bilong wanem i no stret long bung wantaim ol gutpela pren tasol insait long kongrigesen na givim baksait long ol narapela?
5 Wanpela sumatin bilong skul koles i bin go long Haus Kingdom na bihain em i tok: “Pasin bilong ol lotu, ol i save pulim ol manmeri bilong wanpela kain skin o lain i kam insait. . . . Tasol ol Witnes Bilong Jehova ol i sindaun wantaim, na ol i no sindaun wantaim ol wantok tasol, nogat.” Tasol sampela long kongrigesen Korin long bipo ol i mekim pasin i brukim lain. Ol i kamapim kros pait na ol lain i bruk nabaut, na long dispela pasin ol i sakim wok bilong spirit holi bilong God, em i save kamapim pasin wanbel na bel isi. (Galesia 5:22) Sapos yumi kirapim pasin insait long kongrigesen long bung wantaim ol gutpela pren tasol na givim baksait long ol narapela, i olsem yumi sakim wok bilong spirit long stiaim yumi. Olsem na yumi mas tingim tok aposel Pol i bin givim long ol Korin: “Ol brata, . . . yupela olgeta i mas wanbel long ol toktok yupela i mekim. Yupela i no ken bruk nabaut. Yupela i mas i stap wanlain tru long wankain tingting na wankain laik.” (1 Korin 1:10) Na Pol i tokim ol Efesus tu long ol i mas i stap wanbel.—Efesus 4:1-6, 16.
6, 7. Jems i bin givim wanem tok long kongrigesen long pasin bilong mekim gut long sampela lain tasol? Olsem wanem yumi ken bihainim dispela tok bilong em?
6 Long bipo na long nau tu, God i laik bai ol Kristen i mas laikim olgeta lain wantaim. (Rom 2:11) Long taim bilong ol aposel, sampela insait long kongrigesen i bin mekim gut long ol maniman tasol, olsem na disaipel Jems i tokim ol: “Ol brata bilong mi, . . . nogut yupela i wok long mekim gut long ol man i gat nem, na yupela i givim baksait long ol man nating. Sapos wanpela man em i bilas gut tru na em i gat ring gol long pinga bilong en, em i go insait long haus lotu bilong yupela. Na sapos wanpela rabisman, bilas bilong en i bruk bruk nabaut na i nogut tasol, em tu i go insait long haus lotu. Orait ating yupela bai i mekim gut long man i bilas gut tru na yupela bai i tokim em, ‘Plis, yu kam sindaun long dispela sia.’ Na ating yupela bai i tokim rabisman olsem, ‘Yu sanap long hap,’ o, ‘Yu sindaun long plua klostu long lek bilong mi.’ Sapos yupela i mekim kain pasin olsem, . . . yupela i no tingting stret na skelim olgeta man long wankain pasin. Nogat.”—Jems 2:1-4.
7 Sapos wanpela maniman i no bilip em i kam long wanpela miting Kristen, na em i gat ol ring gol na i bilas gut tru, na wanpela rabisman tu i kam na klos bilong em i bruk bruk na i doti, orait ol i save mekim gut long dispela maniman. Ol i save tokim em long sindaun long nambawan sia, tasol ol i tokim rabisman long sindaun long plua klostu long lek bilong wanpela man. Tasol God i bin givim Jisas olsem ofa bilong baim bek ol maniman na ol rabisman wantaim. (Jop 34:19; 2 Korin 5:14) Olsem na bilong mekim pasin Jehova i laikim na wok gut wantaim long mekim wok bilong em, yumi no ken mekim gut long sampela lain tasol o ‘grisim ol man, bilong mekim ol i bihainim laik bilong yumi.’—Jut 4, 16.
No Ken Toktok Planti
8. Ol Israel i toktok planti na wanem samting i kamap long dispela?
8 Bilong holimpas pasin wanbel bilong yumi na God i ken orait yet long yumi, yumi mas bihainim tok bilong Pol, em i tok: “Long olgeta samting yupela i mekim, . . . yupela i no ken toktok planti.” (Filipai 2:14, 15) Taim ol Israel i lusim pinis kalabus long Isip, ol i toktok planti long Moses na Aron, na long God Jehova yet. Long dispela as, olgeta man i gat 20 krismas na antap long en ol i no i go insait long Graun Bilong Promis—ol i dai insait long 40 yia ol Israel i bin wokabaut long ples drai nating. Josua na Kalep na ol Livai, em ol i bin stap gut long Jehova, ol tasol i go insait. (Namba 14:2, 3, 26-30; 1 Korin 10:10) Man! Ol i kisim pe nogut long pasin bilong ol long toktok planti!
9. Miriam i toktok planti na wanem samting i painim em?
9 Dispela i soim yumi long samting inap kamap long wanpela lain olgeta em ol i toktok planti. Orait olsem wanem long ol wan wan man o meri i toktok planti? Susa bilong Moses, em Miriam, wantaim brata bilong em Aron, tupela i bin toktok planti olsem: “Ating Bikpela i bin givim tok long ol manmeri long maus bilong Moses wanpela tasol, a? Nogat ya. Em i givim tok long ol long maus bilong mitupela tu.” Na Baibel i tok moa: “Bikpela i harim dispela tok bilong tupela.” (Namba 12:1, 2) Orait wanem samting i kamap? Ating Miriam i go pas long dispela pasin bilong toktok planti, na God i semim em tru. Em i mekim olsem wanem? Sik lepra i kisim Miriam na em i mas i stap ausait long kem inap 7-pela de, i go inap long taim skin bilong em i kamap klin gen.—Namba 12:9-15.
10, 11. Sapos ol i no pasim pasin bilong toktok planti, wanem samting inap kamap? Stori long dispela.
10 Dispela kain pasin bilong toktok planti i no olsem yumi gat tok long wanpela rong i bin kamap, nogat. Ol man i save toktok planti oltaim, ol i save tingting tumas long ol yet o namba bilong ol, na ol i pulim tingting bilong ol man i kam long ol yet, na long God nogat. Dispela kain pasin inap mekim na ol brata i bruk bruk na ol i no inap wok gut wantaim long mekim wok bilong Jehova. Dispela samting inap kamap, long wanem, taim ol i toktok planti, ating ol i laik bai sampela i wanbel wantaim ol long dispela tok.
11 Olsem: Ating wanpela i toktok planti long pasin bilong wanpela elda long mekim ol tok bilong em insait long kongrigesen o long lukautim ol wok bilong em. Sapos yumi putim yau long tok bilong dispela man bilong toktok planti, ating bai yumi kisim wankain tingting olsem em. Taim em i no givim yet dispela tingting long yumi, yumi no gat tok long wok dispela elda i mekim, tasol nau yumi gat tok long en. Orait bihain i no gat wanpela wok bilong em i stret long ai bilong yumi, na ating yumi tu i kirap toktok planti long em. I no stret dispela kain pasin i stap insait long wanpela kongrigesen bilong lain bilong Jehova.
12. Sapos yumi toktok planti, dispela inap mekim wanem long pasin bilong yumi long pas gut wantaim God?
12 Sapos yumi toktok planti long ol man i gat wok long lukautim lain bilong God, dispela inap kirapim yumi long tok bilas long ol. Dispela kain tok bilong bagarapim gutnem bilong ol, em inap nogutim pasin bilong yumi long pas gut wantaim Jehova. (Kisim Bek 22:28) Ol man i tok bilas na ol i no tanim bel, ol i no ken go insait long Kingdom bilong God. (1 Korin 5:11; 6:10) Disaipel Jut i stori long ol man bilong toktok planti, em ol i “givim baksait long wok bos bilong ol man i gat namba, na ol i tok nogut long ol man i gat biknem,” em ol man i holim bikpela wok insait long kongrigesen. (Jut 8, NW ) God i no orait long ol dispela man bilong toktok planti, na sapos yumi gat gutpela tingting, bai yumi abrusim pasin nogut bilong ol.
13. Olsem wanem na i no olgeta pasin bilong toktok planti i nogut?
13 Tru, i no olgeta pasin bilong toktok planti i nogut na God i no laikim. Em i no bin pasim yau taim “i gat planti tok moa i kamap” long ol pasin nogut i kamap long Sodom na Gomora, nogat—em i bagarapim dispela tupela taun nogut. (Stat 18:20, 21; 19:24, 25) Long Jerusalem, bihain liklik long Pentikos bilong 33 C.E., “ol disaipel i save tok Grik, ol i gat kros long ol disaipel i save tok Aram. Ol i tok olsem, ‘Long olgeta de yupela i save helpim ol manmeri i sot long kaikai samting, tasol yupela i no save helpim ol meri bilong mipela, man bilong ol i dai pinis.’ ” Olsem na “ol 12-pela aposel” i stretim dispela hevi—ol i makim ‘7-pela man ol i gat gutpela nem’ na bai ol i ken “lukautim dispela wok” bilong tilim kaikai. (Aposel 6:1-6) Ol elda bilong nau i no ken “pasim yau” sapos i gat as na sampela i toktok planti. (Sindaun 21:13) Na nogut ol elda i sutim tok long ol wanlotu bilong ol—ol i mas mekim tok i strongim bel bilong ol.—1 Korin 8:1.
14. Bilong abrusim pasin bilong toktok planti, yumi mas i gat wanem kain pasin?
14 Yumi olgeta i mas abrusim pasin bilong toktok planti, long wanem, em inap nogutim yumi long ol samting bilong spirit. Na em bai bagarapim pasin wanbel i stap namel long yumi. Oltaim yumi mas larim spirit holi i kamapim pasin insait long bel bilong yumi long laikim tru ol narapela. (Galesia 5:22) Sapos yumi bihainim ‘lo bilong laikim tru ol arapela,’ dispela bai helpim yumi long wok gut wantaim long mekim yet wok bilong Jehova.—Jems 2:8; 1 Korin 13:4-8; 1 Pita 4:8.
Klia Long Pasin Bilong Tok Baksait
15. Olsem wanem mauswara nabaut i narapela kain long tok baksait?
15 Pasin bilong toktok planti inap kirapim yumi long mauswara nabaut i save nogutim narapela, olsem na yumi mas was gut long ol tok yumi mekim. Mauswara i olsem yumi stori nating long ol samting bilong ol narapela man. Tasol tok baksait em i wanpela tok giaman man i mekim bilong bagarapim gutnem bilong narapela. Dispela kain tok i nogut na God i nolaik tru long en. Olsem na God i tokim ol Israel: “Yupela i no ken raun long ol wantok na tok baksait long narapela man.”—Wok Pris 19:16.
16. Pol i tok wanem long sampela i save mauswara nabaut? Dispela tok bilong Pol i mas mekim wanem long yumi?
16 Em nau, mauswara nating inap kirapim man long tok baksait, olsem na aposel Pol i tokaut strong long sampela em ol i save mauswara nabaut. Pastaim em i stori long sampela meri, man bilong ol i dai pinis na ol inap tru long kongrigesen i ken helpim ol, na bihain em i toktok long sampela meri, man bilong ol i dai pinis, em ol i bin “kisim pasin bilong les na raun nabaut long ol arapela haus. Na . . . ol i save laikim tumas long harim tok long ol samting ol arapela manmeri i mekim na ol i raun na tok baksait long ol.” (1 Timoti 5:11-15) Sapos wanpela meri Kristen i lukim olsem em i gat pasin bilong mauswara na dispela inap kirapim em long mekim tok baksait, em i mas bihainim tok bilong Pol long “tingting stret” na “no ken tok baksait.” (1 Timoti 3:11) Ol man Kristen tu i mas klia long pasin bilong mauswara nabaut i nogutim narapela man.—Sindaun 10:19.
No Ken Skelim Pasin Bilong Narapela!
17, 18. (a) Jisas i tok wanem long pasin bilong skelim brata bilong yumi? (b) Olsem wanem yumi ken bihainim tok bilong Jisas long pasin bilong skelim man?
17 Maski yumi no save mekim tok baksait, yumi mas wok strong long abrusim pasin bilong skelim man olsem jas. Jisas i tokaut strong tru long dispela kain pasin taim em i tok: “Yupela i no ken skelim pasin bilong ol arapela na tok ol i man nogut. Nogut God i mekim wankain pasin long yupela tu. . . . Bilong wanem yu lukim liklik hap pipia i stap long ai bilong brata bilong yu, tasol yu no tingim bikpela plang i stap long ai bilong yu yet? Sapos plang i stap long ai bilong yu yet, orait olsem wanem na yu inap tokim brata bilong yu, ‘Brata, mi laik kamautim pipia i stap long ai bilong yu’? Yu man bilong giaman, pastaim yu mas kamautim bikpela plang i stap long ai bilong yu yet. Na bihain bai yu inap lukluk gut na kamautim liklik hap pipia i stap long ai bilong brata bilong yu.”—Matyu 7:1-5.
18 Yumi no ken tokim brata olsem yumi laik rausim “liklik hap pipia” i stap long ai bilong em bilong helpim em, tasol i olsem yumi yet i gat wanpela “plang” i stap long ai bilong yumi na yumi no inap skelim gut ol samting. Sapos yumi pilim tru bikpela marimari bilong God, bai yumi no skelim pasin bilong ol brata sista bilong yumi. Yumi no save gut long ol olsem Papa bilong yumi long heven, a? Olsem na Jisas i tok yumi “no ken skelim pasin bilong ol arapela.” Sapos yumi skelim tru ol pasin kranki bilong yumi yet, dispela inap pasim yumi na bai yumi no skelim man long pasin God bai ting i no stret.
No Gat Strong Tasol i Gat Nem
19. Yumi mas ting olsem wanem long ol wanbilip?
19 Sapos yumi strong long wok gut wantaim ol wanbilip long mekim wok bilong God, bai yumi abrusim pasin bilong skelim ol narapela, na tu, bai yumi go pas long litimapim nem bilong ol. (Rom 12:10) Na bai yumi wok long painim rot bilong helpim ol na yumi no tingting long helpim yumi yet tasol, na yumi amamas long mekim ol wok i no gat nem liklik bilong helpim ol. (Jon 13:12-17; 1 Korin 10:24) Orait, olsem wanem yumi ken holim gutpela tingting olsem? Yumi mas tingting olsem olgeta wan wan bilipman em i gutpela samting tru long ai bilong Jehova, na yumi mas i gat ol wanbilip bilong helpim yumi, olsem olgeta wan wan hap bilong bodi i mas i gat ol narapela hap bilong helpim ol.—1 Korin 12:14-27.
20, 21. Tok bilong 2 Timoti 2:20, 21 i mas givim wanem tingting long yumi?
20 Tru, ol Kristen i olsem ol sospen graun i no gat strong, na God i bin givim gutpela samting tru long yumi, em wok bilong autim tok bilong em. (2 Korin 4:7) Orait, bilong mekim gut dispela wok na bai em i litimapim nem bilong Jehova, yumi mas i stap stret long ai bilong em na Pikinini bilong em. Bilong i stap olsem gutpela sospen em God i ken mekim wok long en, yumi mas i stap klin olgeta long pasin bilong yumi na long ol samting bilong spirit. Pol i stori long dispela olsem: “Long wanpela bikpela haus i gat sampela dis . . . Sampela i bilong mekim gutpela wok, na sampela i bilong mekim ol kain kain wok nabaut. Olsem na sapos wanpela man i rausim ol pasin nogut long laip bilong en na em i kamap klin long ai bilong God, orait em bai i stap olsem dis bilong mekim gutpela wok tru. Em bai i stap man bilong God tru, na em bai . . . i redi long mekim olgeta kain gutpela wok.”—2 Timoti 2:20, 21.
21 Ol man i no laik bihainim pasin God i laik bai yumi mas mekim, ol i olsem ol ‘dis bilong mekim ol kain kain wok nabaut.’ Tasol sapos yumi bihainim stretpela pasin, bai yumi stap olsem ol ‘dis bilong mekim gutpela wok, olsem man bilong God tru i redi long mekim olgeta kain gutpela wok.’ Olsem na yumi ken askim yumi yet: ‘Mi wanpela “dis bilong mekim gutpela wok?” Pasin bilong mi i save kirapim ol wanbilip long bihainim gutpela pasin? Mi save wok gut wantaim ol wanlotu insait long kongrigesen?’
Wok Gut Wantaim
22. Kongrigesen Kristen i kain olsem wanem samting?
22 Kongrigesen Kristen i kain olsem wanpela famili. Taim olgeta wan wan insait long famili i lotuim Jehova, i gat pasin sori, na narapela i helpim narapela, na pasin amamas i stap long en. Ol wan wan insait long famili ol i gat narapela narapela kain pasin, tasol olgeta wantaim i gat nem. Na i wankain tu long kongrigesen. Yumi olgeta i narapela narapela kain—na yumi olgeta i gat sin—tasol God i bin bringim yumi i kam long em long rot bilong Krais. (Jon 6:44; 14:6) Jehova na Jisas i laikim yumi tru, na yumi mas laikim tru ol narapela narapela, olsem wanpela famili i stap wanbel.—1 Jon 4:7-11.
23. Yumi mas strong long mekim wanem? Na yumi no ken lusim tingting long wanem samting?
23 Na insait long kongrigesen, i stret yumi ken ting narapela bai stap gut long narapela, olsem wanpela famili. Aposel Pol i tok: “Mi laik bai ol man bilong olgeta ples i mas [“stap gut wantaim long,” NW ] apim han bilong ol na mekim prea . . . na lusim pasin bilong belhat na kros.” (1 Timoti 2:8) Pol i bungim pasin bilong i stap gut wantaim na pasin bilong mekim beten long “olgeta ples” ol Kristen i save bung wantaim long en. Ol man i stap gut wantaim ol narapela, ol tasol inap mekim beten insait long kongrigesen. Tasol God i laik bai yumi olgeta i mas i stap gut long em na ol narapela Kristen. (Saveman 12:13, 14) Olsem na yumi mas strong long wok gut wantaim, olsem ol wan wan hap bilong bodi, na mekim wok bilong God long pasin wanbel, olsem wanpela famili i save lotuim Jehova. Na yumi no ken lusim tingting olsem yumi mas i gat ol narapela Kristen bilong helpim yumi, na God bai i orait long yumi na mekim gut long yumi sapos yumi bihainim yet pasin bilong wok gut wantaim long mekim wok bilong Jehova.
Bai Yu Bekim Olsem Wanem?
• Wanem samting i save helpim lain bilong Jehova long wok gut wantaim long mekim wok bilong em?
• Bilong wanem ol Kristen i save abrusim pasin bilong laikim sampela lain tasol na sampela nogat?
• Yu ting pasin bilong toktok planti i gat wanem rong long en?
• Bilong wanem yumi mas litimapim nem bilong ol wanbilip?
[Piksa long pes 15]
Pita i save, “God i save mekim wankain pasin long olgeta manmeri, maski ol i bilong wanem lain”
[Piksa long pes 16]
Bilong wanem God i semim Miriam? Yu save?
[Piksa long pes 18]
Ol Kristen i stap gut long narapela narapela ol i save wok gut wantaim long mekim wok bilong Jehova