Kristen i Mas Sanap Strong na Karim Hevi
“Yupela i mas wok strong tru long . . . sanap strong na karim hevi.”—2 PITA 1:5, 6.
WANPELA wasman bilong raun na meri bilong em i go lukim wanpela lapun Kristen i gat 90 krismas samting, na em i bin mekim wok painia inap planti yia. Ol i toktok wantaim, na lapun i stori long ol bikpela wok em i bin mekim, na nau aiwara bilong em i pundaun na em i tok: “Tasol nau mi no inap mekim bikpela wok moa.” Wasman i opim Baibel long Matyu 24:13 na i kaunim tok bilong Jisas olsem: “Ol manmeri i stap strong inap long las de, God bai i kisim bek ol.” Na wasman i tokim lapun: “Maski yumi inap mekim bikpela wok o liklik wok, laspela wok yumi olgeta i mas mekim, em yumi mas i stap strong i go inap long taim bilong pinis.”
2 Yumi olgeta Kristen i mas i stap strong na no ken les, i go inap long taim dispela pasin nogut bilong graun i pinis o inap long yumi dai. Yumi mas mekim olsem na bai Jehova i ken orait long yumi na yumi no ken lus. Yumi stap long wanpela resis bilong kisim laip, “na yumi mas lusim olgeta kain samting i mekim yumi i no inap ran strong . . . na yumi mas strongim bel na ran strong” inap long resis i pinis, na yumi no ken les. (Hibru 12:1) Aposel Pita tu i tok, yumi mas “sanap strong na karim hevi.” (2 Pita 1:5, 6) Yumi ken mekim olsem wanem?
Sanap Strong na Karim Hevi
3 Dispela tok “sanap strong na karim hevi,” long tok Grik (hy·po·meʹno) i olsem ‘mas i stap na no ken ranawe; sanap strong. W. Bauer na F. W. Gingrich na F. Danker i tok olsem, na Baibel i kolim inap 17 taim. Na dispela tok “karim hevi,” long tok Grik (hy·po·mo·neʹ) i olsem “wet i stap na no ken les,” na Baibel i kolim inap 30 taim. Long wanpela buk (A New Testament Wordbook) William Barclay i tok: ‘Dispela tok “karim hevi” i makim man i sanap strong na wet i stap na tingim gutpela samting em bai kisim bihain. Maski em i karim bikpela pen na hevi, em i tingting long winim dispela mak.’
4 Sapos yumi stap strong olsem, bai yumi no inap surik o les o lusim tingting long gutpela samting yumi wetim i kamap bihain, maski i gat sampela hevi o traim i painim yumi. (Rom 5:3-5) Bai yumi no tingim tumas ol dispela samting. Bai yumi tingting tasol long winim dispela resis na kisim prais—em laip i stap oltaim long graun, na remnan bai stap long heven.—Jems 1:12.
Bilong Wanem Yumi Mas Sanap Strong?
5 Yumi olgeta Kristen “i mas sanap strong.” (Hibru 10:36) Long wanem, Jems 1:2 i tok, “ol kain kain traim i kamap” long yumi. Dispela tok long tok Grik em i toktok long samting nogut i painim yumi wantu, olsem stilman i hansapim yumi o kain samting olsem. (Lukim Luk 10:30.) I gat tupela kain traim i save painim yumi, na as bilong wanpela, em sin yumi bin kisim long namba wan tumbuna, em Adam; na as bilong narapela traim, em yumi bihainim tok bilong Jehova na mekim wok bilong em nau long dispela taim nogut. (1 Korin 10:13; 2 Timoti 3:12) Wanem sampela traim yumi mas karim?
6 Bikpela sik. “Sik oltaim i save kamap” long ol Kristen tu olsem long Timoti. (1 Timoti 5:23) Yumi mas “sanap strong na karim hevi” sapos yumi gat bikpela sik na pen, na God i ken helpim yumi long mekim, na yumi ken tingting long gutpela samting bihain bai yumi inap kisim sapos yumi sanap strong na karim dispela hevi. Wanpela Witnes i gat 50 krismas samting na em i gat wanpela kain sik kensa, na ol dokta i katim em tupela taim, na ol i laik givim blut long em, tasol em i sakim. (Aposel 15:28, 29) Kensa i go kamap long bel na long baksait bilong em. Em i gat bikpela pen tru, na no gat wanpela marasin inap kilim dispela pen. Tasol em i wok long tingim gutpela pe em bai kisim long nupela taim bihain, em laip oltaim. Em i autim tok i tru long ol dokta na nes na ol manmeri i kam lukim em, na em i mekim olsem i go inap long taim em i dai. Ating sik bilong yu i no bikpela olsem sik bilong dispela brata, tasol yu tu yu mas i stap strong na karim hevi bilong dispela sik bilong yu.
7 Bel hevi. Sampela bilong lain bilong Jehova tu em ‘bel bilong ol i hevi, na tingting bilong ol i bagarap.’ (Sindaun 15:13) Long nau “planti hevi nogut tru” i kamap, na dispela i mekim na sampela i stap bel hevi. (2 Timoti 3:1) Wanpela nius (Science News) bilong Disemba 5, 1992 i tok: ‘Bihain long 1915 bel hevi i wok long kamap bikpela tru long ol nupela nupela lain man na i bagarapim ol.’ Sampela em tingting bilong ol i bagarap, o sampela samting nogut i bin painim ol na tingting wantaim bel bilong ol i no stap isi. Kain bel hevi olsem i bungim sampela Kristen long olgeta de na ol i mas karim, tasol ol i no les na surik. Ol i sanap strong yet na holimpas bilip na stap gut long Jehova, maski aiwara i pundaun.—Lukim Song 126:5, 6.
8 Na sapos yumi sot tru long ol samting bilong skin em narapela kain traim. Wanpela brata long Nu Jesi long Amerika ol i pinisim em long wok, na nau em i tingting planti long olsem wanem em i ken lukautim famili bilong em long ol samting bilong skin, na nogut ol i rausim em long haus bilong em tu. Tasol em i no lusim tingting long ol gutpela samting Kingdom bai kamapim. Taim em i raun long painim narapela wok mani em i mekim wok painia haptaim tu, na bihain em i kisim wanpela wok bilong skin.—Matyu 6:25-34.
9 Sapos wanpela bilong famili i dai pinis, hevi bilong dispela i save stap longpela taim. Na ating long olgeta yia, long taim em i bin dai, bai yu tingim yet na bai yu hevi gen. Na i no gat rong long krai long dispela samting. Ol manmeri i save krai long sampela i bin dai. Sapos yu krai, i no olsem yu no bilip long em bai kirap bek gen. (Stat 23:2; lukim tu Hibru 11:19.) Taim Lasarus i dai, Jisas i tokim Marta: “Brata bilong yu bai i kirap bek,” tasol taim ol narapela i krai, bel bilong Jisas “i sori tru na em tu i laik krai,” na bihain “Jisas i krai.” Tasol bihain moa Lasarus i kirap bek tru!—Jon 11:23, 32-35, 41-44.
10 Yumi mas karim ol hevi i save painim yumi ol man, tasol i gat narapela samting tu na lain bilong Jehova i mas sanap strong na karim hevi. Jisas i tok, ol man “bai ol i bel nogut tru long yupela, long wanem, nem bilong mi em i stap long yupela.” (Matyu 24:9) Na em i tok: “Sapos ol i bin mekim nogut long mi, orait ol bai i mekim nogut long yupela tu.” (Jon 15:20) Ol i birua long yumi, long wanem, maski yumi stap we long graun, yumi save mekim wok bilong Jehova, na Satan i laik bai yumi lusim Jehova. (1 Pita 5:8; lukim tu KTH 12:17.) Olsem na Satan i save kirapim ol man long birua long yumi na mekim nogut long yumi, na dispela inap putim bikpela traim long yumi, bai yumi sanap strong o nogat.
11 Long 1936 i go inap 1943 ol man i mekim nogut long ol Witnes Bilong Jehova wantaim ol pikinini bilong ol long Yunaitet Stets na Kanada, long wanem, ol Witnes i no laik salut long plak; bel bilong ol i gat tok long dispela pasin. Ol i no bikhet long plak bilong kantri ol i sindaun long en, tasol ol i bihainim lo bilong God long Kisim Bek 20:4, 5 i tok: “No ken wokim piksa bilong wanpela samting i stap long heven o i stap long graun . . . Yupela i no ken brukim skru long . . . piksa na lotuim em, long wanem, mi Bikpela, mi God bilong yupela, na mi no inap larim wanpela giaman god i senisim mi.” Ol i rausim sampela pikinini Witnes long skul, long wanem, ol i laik lotuim God Jehova wanpela tasol. Olsem na ol Witnes i kirapim skul bilong ol yet, ol i kolim Skul Bilong Kingdom, na bai ol dispela pikinini i ken skul. Bihain Sprim-Kot bilong Yunaitet Stets i orait long ol dispela pikinini i ken bihainim bilip bilong ol na no ken salut long plak, na ol i go bek gen long skul bilong gavman. Sapos wankain traim i painim sampela yangpela Kristen bilong nau na ol man i mekim nogut long ol, long wanem, ol i laik bihainim ol lo bilong Baibel, ol i ken tingim ol dispela yangpela bilong bipo em ol i bin strongim bel na sanap strong.—1 Jon 5:21.
12 Ol hevi i painim ol man, ol i painim yumi tu, na i gat sampela hevi moa i save painim yumi ol Kristen tasol. Olsem na yumi mas sanap strong na karim ol dispela hevi. Yumi ken mekim olsem wanem?
Karim Hevi Inap Long Pinis
13 Yumi lain bilong Jehova inap mekim wanpela samting ol narapela lain i no save lotu long em ol i no inap mekim: Yumi ken beten askim Jehova long helpim yumi. Em “i save mekim yumi sanap strong” na no ken les. (Rom 15:5) Olsem wanem Jehova i save helpim yumi long sanap strong? Baibel i gat stori bilong ol man i bin sanap strong, na Jehova i bin putim long Baibel bilong helpim yumi long mekim olsem. (Rom 15:4) Sapos yumi tingim ol dispela stori, em bai kirapim yumi na strongim yumi bambai yumi no ken les, na em bai lainim yumi long pasin bilong sanap strong. Yumi ken tingim tupela man—em Jop, em i no bin les long karim hevi, na Jisas, em i bin sanap strong tru.—Hibru 12:1-3; Jems 5:11.
14 Planti hevi i painim Jop. Olgeta samting bilong em i bin lus. (Jop 1:14-17; lukim tu Jop 1:3.) Bikpela win i mekim na olgeta 10-pela pikinini bilong em i bagarap. (Jop 1:18-21) Bikpela sik na pen i kisim em. (Jop 2:7, 8; 7:4, 5) Meri bilong em i wok long subim em long lusim Jehova. (Jop 2:9) Ol pren bilong em i mekim tok i givim pen long em na ol i tok giaman long em. (Lukim Jop 16:1-3 na Jop 42:7.) Tasol Jop i sanap strong na karim ol dispela hevi na em i no pundaun na lusim Jehova. (Jop 27:5) Wankain hevi i save painim lain bilong Jehova long nau tu.
15 Olsem wanem na Jop inap karim ol dispela hevi? Em i tingting long gutpela samting em inap kisim bihain. Em i tok: “Mi save, sapos man i katim diwai, i gat rot long nupela kru inap kamap gen long en.” (Jop 14:7) Wanem gutpela samting Jop inap tingting long kisim bihain? Em i beten olsem: “God, i gutpela sapos yu haitim mi long ples bilong ol man i dai pinis, . . . na yu ken makim wanpela taim bilong tingim mi gen. . . . Na bai yu singautim mi na bai mi lusim dispela ples na kam long yu.” (Jop 14:14, 15) Jop i save, pen na hevi bilong em bai pinis na i no inap i stap olgeta taim, na sapos Jop i dai, dispela hevi bilong em bai pinis. Na Jop i save, Jehova i gat laik long kirapim bek ol man i dai pinis, na Jop i bilip olsem Jehova bai kirapim bek em tu.—Aposel 24:15.
16 Orait, yumi ken kisim wanem save long pasin bilong Jop long sanap strong na karim hevi? Bilong sanap strong olsem, yumi no ken lusim tingting long gutpela samting yumi wetim i kamap long bihain. Na ol gutpela samting yumi wetim Kingdom i kamapim, ol bai kamap tru, olsem na “ol dispela hevi na pen . . . bai i stap sotpela taim tasol.” (2 Korin 4:16-18) Tok promis bilong Jehova i as bilong bilip bilong yumi long nupela taim bai kamap bihain, na “em bai i mekim drai wara i stap long ai bilong olgeta [man] . . . Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.” (KTH 21:3, 4) “Na sapos yumi wetim God i helpim yumi, orait yumi no save wet nating. Nogat.” Olsem na yumi mas holim strong dispela tingting. (Rom 5:4, 5; 1 Tesalonaika 5:8) Yumi mas inap long lukim long tingting bilong yumi dispela gutpela samting bilong bihain, olsem lukim piksa bilong en long tingting bilong yumi, olsem lukim long ai bilong bilip, na yumi stap long nupela taim, na no gat sik o hevi moa, na yumi kirap long moningtaim na yumi gat strong, na tingting i wok gut, na no gat hevi long mani o samting bilong skin, na no ken pret long wanpela samting, na no gat man i dai moa, na yumi lukim ol man i bin dai ol i kirap bek gen. (Hibru 11:1) Sapos yumi no gat dispela tingting long gutpela samting bai kamap bihain, ol hevi inap daunim yumi na yumi no sanap strong moa, tasol dispela gutpela tingting bai strongim yumi long karim ol hevi na sanap strong i go inap long pinis!
17 Baibel i tok: “Yumi mas lukluk i go long Jisas,” na “tingim gut” ol hevi em i bin karim. Sin na pasin kranki bilong ol narapela i as bilong sampela hevi bilong em. Na ol man “i birua nogut” long em. Na sampela hevi na kros i kamap namel long lain disaipel bilong em, na wanpela taim ol i tok pait long husat namel long ol i stap nambawan, na ol dispela samting i givim hevi long em. Na i gat wanpela bikpela traim tru i kamap long em na i traim bilip bilong em. “Em i karim pen na i dai long diwai.” (Hibru 12:1-3; Luk 9:46; 22:24) I hatwok long yumi pilim dispela bikpela pen tru em i bin kisim taim ol i nilim na hangamapim em long dispela pos, na ol i semim em long ai bilong ol manmeri na mekim em i kamap olsem man i bin mekim bikpela rong.a
18 Pol i kolim 2-pela samting i bin helpim Jisas long karim dispela pen na sanap strong i go inap long taim em i dai: Em i bin “mekim prea na beten long God,” na em i tingting long “bihain em bai i stap gut na amamas moa yet.” Em i gutpela olgeta, na em i Pikinini bilong God, tasol em i no sem long singaut na askim God long helpim em. Em i bin “beten strong long God, na em i singaut strong na i krai planti.” (Hibru 5:7; 12:2) Klostu long taim ol i laik bagarapim em, em i mekim dispela samting moa yet. (Luk 22:39-44) Tru, Jehova i no tekewe dispela traim na hevi long Jisas. Nogat. Tasol Jehova i strongim em na bai em inap long karim. Na Jisas i bin tingim tu gutpela pe em bai kisim bihain long dispela pen—em bai amamas long wok em i bin mekim long mekim gut nem bilong Jehova, na wok bilong baim bek ol man na bai ol i no ken lus.—Matyu 6:9; 20:28.
19 Yumi tingim ol samting i bin painim Jisas, na nau yumi save, i hatwok long sanap strong na karim hevi. Sapos yumi hatwok long karim hevi, yumi ken save Jisas tu i bin hatwok olsem, na sapos yumi laik i stap strong inap long pinis, oltaim yumi mas beten askim Jehova long strongim yumi. Na yumi no ken ting Jehova i no inap harim beten bilong yumi, long wanem, em ‘i save wari long yumi, olsem na olgeta hevi yumi karim, yumi mas putim long han bilong em.’ (1 Pita 5:7) Long Baibel Jehova i bin tok promis long givim ‘strong bilong em’ long ol man i bilip na i singaut long em.—2 Korin 4:7-9.
20 Sampela taim aiwara i kamap long taim yumi karim hevi. I no dispela pen i mekim na Jisas i bin amamas, nogat; em i tingim gutpela pe em bai kisim bihain, na em i amamas long dispela. Na yumi tu i no ken ting bai yumi belgut na amamas long taim yumi gat pen na hevi. (Lukim Hibru 12:11.) Tasol sapos yumi tingim gutpela samting yumi bai kisim bihain, yumi ken tok, ol hevi bilong nau “em i samting bilong amamas tasol.” (Jems 1:2-4; Aposel 5:41) Tasol yumi mas i stap strong, maski hevi i bikpela na aiwara i pundaun, long wanem, Jisas i tok: “Ol manmeri i stap strong inap long las de, God bai i kisim bek ol.”—Matyu 24:13.
21 Yumi mas karim hevi na sanap strong na bai yumi ken kisim laip oltaim. Na 2 Pita 1:5, 6 i tok, yumi mas wokabaut long pasin bilong God tu. Em wanem kain pasin? Olsem wanem em i samting bilong karim hevi tu na sanap strong? Yumi ken kisim dispela pasin olsem wanem? Narapela tok i kam bihain bai stori long dispela samting.
[Ol Futnot]
a Skin bilong Jisas i gutpela olgeta, tasol ating dispela bikpela pen tru em i bin karim i kilim em i dai insait long sampela aua tasol. Tasol tupela man i hangamap wantaim em ol i stap longpela taim na ol man i mas brukim lek bilong ol bilong hariapim dai bilong ol. (Jon 19:31-33) Paslain long taim Jisas i dai em i no bin slip long nait na em i bin karim bikpela hevi long dispela taim, na tupela man hia i no bin karim bikpela hevi olsem. Ating dispela hevi na pen bilong Jisas i mekim na em i no inap karim dispela pos.—Mak 15:15, 21.
Bai Yu Bekim Olsem Wanem?
◻ Olsem wanem long dispela tok, sanap strong na karim hevi?
◻ Wanem kain hevi i save painim ol Witnes Bilong Jehova na ol i mas sanap strong?
◻ Wanem samting i helpim Jop long karim hevi?
◻ Ol hevi i painim Jisas, olsem wanem dispela i helpim yumi long save, yumi tu i mas karim hevi na sanap strong?
[Askim Bilong Stadi]
1, 2. Bilong wanem yumi olgeta i mas i stap strong inap long taim bilong pinis?
3, 4. Olsem wanem yumi ken “sanap strong na karim hevi”?
5. (a) Bilong wanem yumi olgeta Kristen i “mas sanap strong”? (b) Wanem tupela kain traim i painim yumi?
6. Olsem wanem wanpela Witnes i bin sanap strong taim bikpela sik na pen i painim em?
7. Sampela brata sista i mas karim wanem kain hevi bilong sanap strong?
8. Wanem sampela hevi bilong skin inap painim yumi?
9. (a) Olsem wanem yumi mas sanap strong taim wanpela long famili i dai? (b) Wanem ol skripsa i tok, i no gat rong sapos yumi krai?
10. Wanem hevi i save painim lain bilong Jehova na ol i mas sanap strong?
11, 12. (a) Wanem hevi i painim ol Witnes wantaim pikinini bilong ol long 1936 inap 1943? (b) Bilong wanem ol Witnes i no laik salut long plak?
13. Jehova i helpim yumi olsem wanem na bai yumi ken i stap strong?
14, 15. (a) Wanem ol hevi i bin painim Jop? (b) Olsem wanem Jop inap karim dispela hevi na sanap strong?
16. (a) Jop i bin karim ol hevi na sanap strong, na dispela inap helpim yumi olsem wanem? (b) Yumi mas mekim wanem long samting yumi tingting long kisim taim Kingdom i bosim graun? Bilong wanem yumi mas mekim olsem?
17. (a) Wanem ol hevi Jisas i bin karim? (b) Ating wanem samting i mekim na pen bilong Jisas i bikpela moa? (Lukim sta daunbilo long han sut.)
18. Olsem aposel Pol i tok, wanem tupela samting i bin helpim Jisas long karim hevi na sanap strong?
19, 20. Olsem wanem ol hevi Jisas i bin karim i ken helpim yumi tu long karim hevi na sanap strong?
21. (a) Yumi mas mekim wanem narapela samting tu, olsem 2 Pita 1:5, 6 i tok? (b) Bihain bai yumi stori long wanem ol askim?
[Piksa long pes 10]
Long 1936 i go inap 1943 ol Witnes i bin kirapim ol Skul Bilong Kingdom na i bilong skulim ol pikinini Kristen i no bin salut long plak na gavman i rausim ol long skul
[Piksa long pes 12]
Jisas i strong long litimapim nem bilong Papa bilong em, olsem na em i beten long God i mas helpim em long sanap strong