Papias i Laikim Tru Tok Bilong Bikpela
“MI NO bin amamas long bung wantaim ol man i save mekim planti toktok; mi laikim ol man i lainim man long tok i tru.” Man bilong raitim dispela tok em Papias, em i bin i stap long yia 100 samting, na em i tok em i Kristen.
Papias i bin i stap klostu tru long taim ol aposel bilong Jisas i bin i dai. Em i wanpela poroman bilong Polikap, em ol i tok aposel Jon i bin skulim em. Yumi tingim rot bilong Papias long kisim save, olsem na yumi ken ting i gat as bilong ol tok bilong em.
Em i Skelim Gut
Papias i hangre tru long kisim save long tok i tru, na dispela i kamap ples klia long 5-pela buk em i bin raitim, i gat ol tok bilong Bikpela long en. Taim em i yangpela man, planti tok i tru em i bin harim, ating em i bin putim gut long tingting bilong em. Bihain, taim Papias i stap long haus bilong em long biktaun Frigia long Hierapolis long Esia Maina, em i toktok wantaim ol lapun na bai em i ken save, ol i bin lukim sampela aposel bilong Jisas o harim sampela tok bilong ol o nogat. Em i givim ol askim long ol na em i raitim ol tok ol i mekim.
Papias i tok, “Mi no ken surik long raitim olgeta tok mi bin kisim save long en long maus bilong ol elda na mi bin putim gut long tingting bilong mi, na bai yu ken save ol dispela tok i stret. Long wanem, mi no olsem sampela man—mi no amamas long bung wantaim ol man i save mekim planti toktok; mi laikim ol man i lainim man long tok i tru; na mi no amamas long bung wantaim ol man i givim tok bilong ol yet long ol man—mi laikim ol man i givim tok bilong Bikpela long ol man, em tok i tru i as bilong en. Na sapos mi bungim wanpela man em i save bihainim ol elda, mi save askim em long kamapim ol tok em ol elda i bin givim long em—em ol tok em Andru o Pita i bin mekim, o ol tok em Filip o Tomas o Jems o Jon o Matyu i bin mekim, o tok bilong ol narapela disaipel bilong Bikpela.”
Wok Bilong Em
Ating Papias inap kisim planti save tru long ol samting bilong spirit. Yumi save, em i bin putim gut yau long ol tok i stori long i stap bilong ol aposel na wok bilong ol long autim tok. Long yia 135 samting, em i bin putim olgeta dispela tok long wanpela buk em yet i raitim. Tasol sori tru, nau dispela buk i no stap. Tasol Airenias, em wanpela man i stap long taim bilong Papias na em i tok em i wanpela Kristen, em i bin kamapim tok bilong dispela buk. Na man bilong raitim stori bilong ol samting i bin kamap bipo, em Yusibias, em i bin i stap 300 yia samting bihain long Krais, em tu i kamapim sampela tok bilong dispela buk. Na 500 yia bihain moa, ol i save kaunim yet, na ating dispela buk i stap inap long yia 1350 samting.
Papias i bilip long Krais bai stap King inap wan tausen yia. (KTH 20:2-7) Airenias i tok, Papias i stori long taim ‘olgeta samting bai i stap fri na lusim ol samting nogut i kalabusim ol, na ol bai kamap gutpela gen, na kol bilong antap bai kam daun long graun na graun bai kamapim planti kaikai tru; ol elda i bin lukim Jon, em disaipel bilong Bikpela, ol i tok ol i bin harim olsem Bikpela i skulim ol man long dispela taim bai kamap.’ Na Papias i raitim tok olsem: “Long tingting bilong ol bilipman, ol dispela samting inap kamap; Judas, em man bilong kamapim Jisas, em i no laik bilip long dispela, na em i askim Jisas, ‘Bikpela bai kamapim dispela samting olsem wanem?’ Bikpela i tok, ‘Ol man i stap long dispela taim bihain bai ol i lukim.’ ”
Papias i raitim ol dispela tok long taim planti man i kisim wanpela kain bilip—ol i tok ol i gat narapela kain save bilong spirit. Ol i save bungim ol save bilong graun na ol stori nating bilong ol haiden wantaim tok bilong ol Kristen giaman. Papias i laik kamapim ol dispela tok bilong Bikpela bambai dispela lain i gat narapela kain bilip ol i no ken i go bikpela tumas. Bihain long em, Airenias i wok strong long sakim ol tok na pasin giaman bilong dispela lain, em ol i giaman long bihainim ol samting bilong spirit. Ating dispela lain i bin wokim planti buk moa, olsem na ating Papias i tingim dispela lain taim em i tok long “ol man i save mekim planti toktok.” Laik bilong Papias, em i laik daunim tok giaman na kamapim long ples klia tok i tru.—1 Timoti 6:4; Filipai 4:5.
Em i Stori Long Fopela Gutnius
I gat sampela liklik hap rait bilong Papias i stap yet long nau, na i stori liklik long ol tok em Matyu na Mak i raitim. Papias i stori long ol tok Mak i raitim, na em i tok: “Mak i raitim ol tok bilong Pita, na em i raitim stret olgeta tok em i bin tingim.” Na Papias i tok: “Olsem na taim Mak i raitim ol tok em i bin tingim, em i no popaia liklik, long wanem, em i was gut na bai em i no ken lusim wanpela liklik tok em i bin harim, o raitim wanpela tok i giaman.”
Papias i tokaut olsem Matyu i bin raitim Gutnius bilong em long tok Hibru. Papias i tok: “Matyu i raitim long tok Hibru, na olgeta wan wan i tanim dispela tok inap long save bilong ol.” Ating Papias i tok long Gutnius em Luk na Jon i bin raitim, na sampela rait moa bilong Nupela Testamen. Sapos olsem, ating em i olsem namba wan man bilong harim ol dispela tok ol i bin mekim na em i raitim bilong strongim bilip olsem olgeta tok bilong Gutnius i stret tru, na God i kirapim ol long raitim. Tasol sori tru, ol liklik hap tasol bilong ol rait bilong Papias i stap yet long nau.
Em i Laik Kisim Ol Samting Bilong Spirit
Papias em i wanpela wasman long kongrigesen bilong Hierapolis, na em i wok strong tru long painim as bilong ol tok samting. Na em i givim bel tru long ol tok bilong Baibel. Papias i tok stret olsem ol tok em Krais Jisas na ol aposel i bin mekim long ol samting bilong bilip, em i bikpela samting tru bilong autim long ol man, winim ol tok nating bilong ol rait i stap long taim bilong em.—Jut 17.
Ol stori i tok, ol i bin kilim i dai Papias long yia 161 o 165 samting. Yumi no save tru olsem ol tok bilong Jisas i bin go daun tru long bel bilong Papias na i bosim olgeta wokabaut na pasin bilong em. Tasol em i gat strongpela laik tru long kisim save long Baibel na kamapim ol dispela tok. Ol Kristen tru bilong nau tu i laik mekim olsem, long wanem, ol i save ol i mas kisim ol samting bilong spirit. (Matyu 5:3) Na olsem Papias, ol i ting ol tok bilong Bikpela i gutpela samting tru.