Yu Bin Kirapim Wanpela Paia Long Bus?
ATING bai yu tok, Nogat! Tasol wet pastaim! Ating yu bin mekim olsem. Harim tok bilong disaipel Jems: “Maus em i liklik hap tasol bilong bodi, tasol em i save hambak moa yet . . . Yumi save, liklik paia tasol em inap kirapim bikpela paia moa long bus.”—Jems 3:5.
Yumi mas i gat maus na bai yumi ken toktok, tasol ol man i save mekim wok nogut long maus bilong ol! Ol i save tok giaman na tok baksait. Long maus ol i save tok bilas long ol man na bagarapim gutnem bilong ol, na trikim ol bilong paulim mani bilong ol. Ol bikhetman i mekim wok long maus bilong kirapim ol man long pait. Adolf Hitler i mekim wok long maus bilong em bilong kirapim kantri olgeta long mekim bikpela pait—em i “kirapim bikpela paia moa long bus”!
Na maski man i gat gutpela bel, em tu inap kirapim ol liklik ‘paia long bus.’ Olsem wanem? Yu bin mekim wanpela tok na wantu yu bel hevi long tok yu bin mekim? Sapos olsem, bai yu pilim tru tok bilong Jems, em i tok: “I no gat wanpela man inap long bosim maus bilong em yet. Nogat.”—Jems 3:8.
Tasol yumi ken wok strong long mekim gutpela wok long maus. Olsem man bilong raitim Song i tok: “Mi bai was gut . . . nogut mi mekim sin long toktok bilong mi.” (Song 39:1) Olsem na yumi no ken tok baksait long man o mekim kain tok olsem. Yumi mas mekim gutpela tok bilong strongim em. Na yumi no ken paulim mani bilong man na tok giaman—yumi mas mekim tok i tru tasol na skulim man. Sapos man i gat gutpela bel, maus bilong em bai mekim gutpela switpela tok bilong mekim gut bel bilong man. Jisas i bin mekim gutpela wok tru long maus bilong em bilong skulim ol man long rot bilong kisim laip oltaim.
Tru tumas, “toktok bilong yu em inap mekim man i stap gut na em inap long bagarapim man.” (Sindaun 18:21) Olsem wanem long maus bilong yu? Em i mekim man i stap gut o em i bagarapim man? Em i save ‘kirapim paia long bus’ o em i save mekim dai paia? Man bilong raitim Song i beten long God olsem: “Mi bai singim song long lo bilong yu, long wanem, olgeta lo bilong yu i stretpela tasol.” (Song 119:172) Olsem na yumi tu i mas mekim gutpela wok long maus bilong yumi.
[Piksa long pes 32]
U.S. Forest Service photo