Jehova Em ‘Man Bilong Kisim Bek’ Yumi
“[Bikpela] i save helpim ol . . . [na] kisim bek ol.”—SNG. 37:40.
1, 2. Wanem stretpela save long Jehova i mekim gut bel bilong yumi na strongim yumi?
SEDO, olsem tewel em san i kamapim, i no save stap long wanpela hap tasol, nogat. Taim graun i tanim, tewel i save surik na senis senis. Tasol Man Bilong Wokim graun na san, em i no save senis. (Mal. 3:6) Baibel i tok: “Em i no save senisim nabaut pasin bilong en. Em i no olsem tewel bilong wanpela samting san i mekim i kamap, na em i go longpela na bihain em i go sotpela gen. Nogat.” (Jem. 1:17) Dispela stretpela save long Jehova i mekim gut bel bilong yumi na strongim yumi, na moa yet taim ol bikpela hevi i painim yumi. Bilong wanem i olsem?
2 Olsem yumi skelim pinis long stadi i kamap paslain long dispela, Jehova i bin stap olsem ‘man bilong kisim bek’ lain bilong em long taim ol man i bin raitim Baibel. (Sng. 70:5) Em i no save senisim nabaut pasin bilong em, na oltaim em i save mekim ol samting em i tok long mekim. Olsem na ol manmeri i lotuim em long nau ol i ken bilip tru olsem em bai “helpim ol . . . [na] kisim bek” ol. (Sng. 37:40) Long nau Jehova i kisim bek ol wokboi bilong em long wanem ol rot? Olsem wanem em inap kisim bek yumi olgeta wan wan?
Kisim Bek Yumi Long Han Bilong Ol Birua
3. Bilong wanem yumi ken bilip tru olsem ol birua i no inap pasim lain bilong Jehova long autim gutnius?
3 Maski Satan i birua tru long ol Witnes Bilong Jehova, dispela i no inap pasim ol long lotuim Jehova wanpela tasol. Baibel i tokim yumi olsem: “I no gat wanpela bilong ol dispela samting bilong pait inap bagarapim yu. Na bai yu sanap strong na bekim tok bilong ol man i sutim ol kain kain tok long yu.” (Ais. 54:17) Ol birua i bin traim long pasim lain bilong God long mekim wok bilong ol long autim tok, tasol ol i no inap pasim ol. Orait, skelim tupela samting i bin kamap.
4, 5. Wanem hevi i painim lain bilong Jehova long 1918? Bihain wanem samting i kamap?
4 Long 1918, ol pris pasto i laik pasim wok bilong lain bilong Jehova long autim tok, olsem na ol i kirapim ol man long mekim nogut tru long ol. Long Me 7, gavman i wokim kotpepa bilong arestim J. F. Rutherford na sampela arapela tu long hetkota. Long dispela taim, Brata Rutherford i lukautim wok bilong autim tok long olgeta hap. Insait long tupela mun tasol ol i giaman na sutim tok olsem Brata Rutherford na ol wanwok bilong em i laik rausim gavman, olsem na kot i makim ol bilong kalabus inap longpela taim. Yu ting ol birua i win, olsem ol i yusim kot long pasim na pinisim wok bilong autim tok? Nogat tru!
5 Tingim tok promis bilong Jehova: “I no gat wanpela bilong ol dispela samting bilong pait inap bagarapim yu.” Orait, ol samting i senis kwiktaim, na long Mas 26, 1919—em 9-pela mun bihain long Brata Rutherford na ol wanwok bilong em i kalabus—ol brata i baim kot bilong ol na ol i lusim kalabus. Long yia bihain, long Me 5, 1920, kot i tok ol i no gat asua. Ol brata i stap fri na ol i wok strong long mekim wok bilong Kingdom. Wanem samting i kamap? Kirap long dispela taim na i kam, dispela wok i kamap bikpela moa! Dispela samting i kamap long strong bilong God, em ‘man bilong kisim bek’ lain bilong em.—1 Ko. 3:7.
6, 7. (a) Long taim bilong ol Natsi long Jemani, ol birua i bin mekim wanem long ol Witnes Bilong Jehova? Wanem samting i kamap long dispela? (b) Stori bilong ol Witnes Bilong Jehova long nau i kamapim klia wanem samting?
6 Orait skelim narapela stori. Long 1934, Hitler i tok tru antap long pinisim olgeta Witnes Bilong Jehova long Jemani. Dispela i no wanpela tok nating, nogat, em i tingting strong long mekim dispela samting. I no longtaim na ol i arestim na kalabusim planti witnes. Ol i bin mekim nogut long planti tausen Witnes; na ol i kilim i dai planti handet Witnes long ol banis kalabus nogut. Olsem wanem? Hitler i win long pinisim lain Witnes? Em i pasim olgeta wok bilong autim gutnius long Jemani? Nogat tru! Taim em i wok long mekim nogut long ol Witnes, ol brata bilong yumi i wok yet long autim tok long pasin hait. Taim gavman Natsi i pundaun, ol brata i stap fri na ol i mekim yet wok bilong autim tok. Long nau, winim 165,000 pablisa i autim tok bilong Kingdom long Jemani. Long dispela samting tu, ‘man bilong kisim bek’ lain bilong em i truim tok promis bilong em olsem: “I no gat wanpela bilong ol dispela samting bilong pait inap bagarapim yu.”
7 Stori bilong ol Witnes Bilong Jehova long nau i kamapim klia olsem Jehova i no inap larim ol birua i pinisim ol manmeri bilong em olsem wanpela lain olgeta, nogat tru. (Sng. 116:15) Tasol olsem wanem? Jehova inap lukautim yumi olgeta wan wan? Jehova i kisim bek yumi wan wan olsem wanem?
Olsem Wanem Long Pasin Bilong Lukautim Yumi Long Ol Samting Bilong Skin?
8, 9. (a) Olsem wanem yumi save olsem i no olgeta taim Jehova bai lukautim yumi long ol samting bilong skin? (b) Yumi save long wanem samting?
8 Yumi save olsem Jehova i no tok promis olsem oltaim em bai lukautim yumi olgeta wan wan long ol samting bilong skin. Yumi bihainim pasin bilong 3-pela Hibru em ol i no brukim skru long imis gol bilong King Nebukatnesar. Ol dispela yangpela man ol i daun long God, na ol i no bin kisim tingting olsem Jehova bai wokim mirakel na lukautim ol na ol i no ken kisim bagarap, nogat. (Ritim Daniel 3:17, 18.) Tasol Jehova i bin kisim bek ol long bikpela paia. (Dan. 3:21-27) Na tu, long taim ol man i bin raitim Baibel, i no olsem olgeta taim Jehova i wokim mirakel bilong kisim bek lain bilong em, nogat, wan wan taim tasol em i mekim olsem. Planti gutpela wokboi bilong Jehova i bin i dai long han bilong ol birua.—Hi. 11:35-37.
9 Olsem wanem long nau? Olsem ‘man bilong kisim bek’ lain bilong em, Jehova inap tru long kisim bek wan wan man long taim nogut. Olsem wanem? Yumi inap kolim stret sampela samting i kamap na tok olsem Jehova i bin givim helpim long dispela samting o nogat? Tasol sapos wanpela man i abrusim wanpela hevi, em inap kisim tingting olsem Jehova i bin helpim em. I no stret long ol arapela i rabisim dispela tingting bilong em. Tasol yumi save olsem planti gutpela Kristen i bin i dai, long wanem, ol birua i mekim nogut long ol, olsem long taim bilong ol Natsi. Sampela arapela i bin i dai taim ol bikpela hevi o taim nogut i painim ol. (Sav. 9:11) Yumi ken askim olsem, ‘Olsem wanem? Jehova i no stap olsem “man bilong kisim bek” ol gutpela wokboi bilong em, em ol i dai taim ol i no lapun yet?’ Yumi no ken tok olsem.
10, 11. Olsem wanem na ol man i no gat strong long abrusim dai? Tasol Jehova i gat strong long mekim wanem?
10 Tingim dispela: Ol man i no gat strong long abrusim dai, long wanem, i no gat wanpela man inap kisim bek em yet na em inap abrusim “matmat,” nogat tru. (Sng. 89:48) Tasol olsem wanem long Jehova? Wanpela sista husat i abrusim bagarap bilong lain Natsi, em i tingim bek wanpela tok bilong mama bilong em. Mama bilong em i wanpela Witnes na em i bin mekim wanpela tok bilong mekim gut bel bilong dispela sista taim ol pren na famili bilong em i dai long ol banis kalabus nogut. Mama i tok: “Sapos dai em samting bilong i stap oltaim, orait ating em bai i gat bikpela strong moa, winim God, a?” Tasol dai em i samting nating taim yumi skelim wantaim strong bilong Man Bilong Givim laip, em Man i gat olgeta strong! (Sng. 36:9) Olgeta man i stap long Sheol, o Hades, ol i stap long tingting bilong Jehova, na em bai kisim bek olgeta wan wan bilong ol.—Lu. 20:37, 38; KTH. 20:11-14.
11 Long nau, Jehova i save mekim sampela samting long laip bilong ol manmeri i lotuim em. Orait nau yumi ken skelim 3-pela rot i kamapim ples klia olsem em i ‘man bilong kisim bek’ yumi.
Lukautim Yumi Long Ol Samting Bilong Spirit
12, 13. Jehova i lukautim yumi long ol samting bilong spirit, na bilong wanem dispela i bikpela samting tru? Em i save lukautim yumi long wanem ol rot?
12 Jehova i save lukautim yumi long ol samting bilong spirit, na dispela em i bikpela samting tru. Yumi ol Kristen tru i save olsem i gat wanpela samting i winim tru laip bilong yumi long nau. Samting i dia tumas long yumi em pasin bilong yumi long pas gut wantaim Jehova. (Sng. 25:14; 63:3) Sapos yumi no pas gut wantaim Jehova, laip bilong yumi long nau bai i no gat as bilong en na yumi no inap wet long kisim gutpela samting long bihain.
13 Tasol gutpela tru, Jehova i givim olgeta samting long yumi bilong helpim yumi long pas gut wantaim em. Em i givim yumi Baibel, holi spirit, na kongrigesen i stap long olgeta hap bilong graun. Yumi ken mekim wanem bambai ol dispela samting i helpim gut yumi? Yumi mas givim bel tru long stadi oltaim long Baibel, na dispela bai strongim bilip bilong yumi na pasin bilong yumi long wetim gutpela samting i kamap bihain. (Ro. 15:4) Yumi mas givim bel tru long beten long God i ken givim holi spirit long yumi. Dispela bai helpim yumi long sakim ol traim i laik pulim yumi long mekim ol samting em inap bagarapim pasin bilong yumi long pas gut wantaim God. (Lu. 11:13) Yumi mas bihainim ol tok em lain wokboi i kamapim long rot bilong ol buk na nius em Baibel i as bilong en, na long rot bilong ol miting na ol kibung samting. Dispela bai helpim yumi long kisim “kaikai” bilong spirit “long taim bikman i makim.” (Mt. 24:45) Ol dispela samting i lukautim yumi long ol samting bilong spirit na helpim yumi long stap klostu long God.—Jem. 4:8.
14. Stori long wanpela ekspiriens i kamapim klia olsem Jehova i save lukautim yumi long ol samting bilong spirit.
14 Bilong kamapim klia olsem Jehova i save lukautim yumi long ol samting bilong spirit, tingim gen tupela papamama em yumi bin stori long ol long stadi i kamap paslain long dispela. Pikinini meri bilong tupela, Theresa, em i lus na sampela de bihain ol i kisim toksave olsem wanpela meri i bin kilim em i dai.a Papa bilong Theresa i tok: “Mi bin beten long Jehova i mas lukautim em. Taim mi harim olsem wanpela meri i bin kilim em i dai, pastaim mi tingting olsem bilong wanem Jehova i no harim ol beten bilong mi. Tru, mi save olsem Jehova i no tok em bai wokim mirakel na lukautim olgeta wan wan manmeri long lain bilong em na hevi i no ken painim ol, nogat. Tasol mi wok yet long beten long God i ken givim gutpela tingting long mi. Mi save olsem Jehova i save lukautim lain bilong em long ol samting bilong spirit, na dispela i mekim gut bel bilong yumi. Olsem, em i save givim ol samting yumi mas kisim bambai yumi ken lukautim pasin bilong yumi long pas gut wantaim em. Dispela i bikpela samting tru, long wanem, dispela inap helpim yumi long kisim laip oltaim long bihain. Jehova i bin lukautim Theresa, long wanem, Theresa i bin mekim wok bilong Em i go inap long taim em i dai. Mi save olsem laip bilong em long bihain i stap long han bilong Jehova, na dispela i givim bel isi long mi.”
Lukautim Yumi Long Taim Bilong Sik
15. Taim yumi gat bikpela sik, Jehova inap mekim wanem bilong helpim yumi?
15 Jehova inap “lukautim” yumi taim yumi “gat sik,” olsem em i bin mekim long Devit. (Sng. 41:3) Tru, long nau Jehova i no save wokim ol mirakel bilong oraitim sik bilong yumi, tasol em i save helpim yumi. Em i helpim yumi olsem wanem? Ol stiatok i stap long Baibel inap helpim yumi long mekim ol gutpela disisen long ol marasin samting yumi inap kisim. (Snd. 2:6) Yumi inap kisim ol gutpela tok bilong helpim yumi long rot bilong ol stori i stap long ol Wastaua na Kirap! i toktok long dispela sik i painim yumi. Long rot bilong holi spirit, Jehova inap givim yumi “bikpela strong” bambai yumi inap karim hevi bilong yumi na wok yet long stap gut long Jehova, maski wanem wanem samting i kamap. (2 Ko. 4:7) Dispela inap helpim yumi na yumi no larim sik i daunim yumi na mekim yumi i lusim tingting long ol samting bilong spirit.
16. Olsem wanem wanpela brata i karim hevi bilong sik?
16 Tingim dispela yangpela brata em yumi bin stori long em long stadi i kamap paslain long dispela. Long 1998, ol dokta i painimaut olsem em i gat sik ALS (amyotrophic lateral sclerosis). Dispela sik i mekim na bihain bodi olgeta i kamap paralais.b Olsem wanem em i karim hevi bilong dispela sik? Em i tok: “I gat sampela taim we mi save pilim pen na bel hevi, na mi save ting olsem i gat wanpela rot tasol bilong abrusim dispela hevi, em dai. Taim dispela tingting i daunim mi tru, mi save beten long Jehova i ken givim 3-pela samting long mi: bel isi, pasin bilong i no les kwik, na pasin bilong sanap strong na karim hevi. Mi pilim olsem Jehova i bin harim ol beten bilong mi. Taim mi stap bel isi, mi inap tingim ol samting i mekim gut bel bilong mi, olsem long nupela taim mi bai inap long wokabaut gen, na amamas long kisim kaikai i swit long maus, na toktok gen wantaim famili bilong mi. Pasin bilong i no les kwik i helpim mi long karim ol hevi bilong i stap paralais. Pasin bilong sanap strong na karim hevi i helpim mi long stap gut long Jehova na i no larim ol narapela samting i bagarapim pasin bilong mi long pas gut wantaim em. Mi inap pilim tru tingting bilong Devit, long wanem, mi pilim olsem Jehova i bin lukautim mi taim mi gat sik.”—Ais. 35:5, 6.
Lukautim Yumi Long Kaikai Samting
17. Jehova i bin tok promis long mekim wanem bilong helpim yumi? Dispela tok promis i makim olsem yumi mas mekim wanem?
17 Jehova i tok promis long lukautim yumi long ol samting bilong skin. (Ritim Matyu 6:33, 34 na Hibru 13:5, 6.) Dispela i no makim olsem yumi no ken wok na yumi wetim Jehova i wokim wanpela mirakel na givim ol samting bilong skin long yumi, nogat. (2 Te. 3:10) Dispela promis i makim olsem: Sapos Kingdom Bilong God i stap namba wan samting long laip bilong yumi na yumi redi long mekim wok bilong lukautim yumi yet, orait yumi ken bilip olsem Jehova bai helpim yumi long kisim ol samting yumi mas kisim bilong i stap laip. (1 Te. 4:11, 12; 1 Ti. 5:8) Em inap givim yumi ol samting yumi nidim long ol rot we yumi no ting bai kamap. Ating wanpela wanbilip i givim kaikai samting long yumi o em i tok long givim wok mani long yumi.
18. Kamapim wanpela ekspiriens i soim olsem God inap lukautim yumi long kaikai samting taim yumi sot tru.
18 Tingim dispela singel mama em yumi bin stori long em long stadi i kamap paslain long dispela. Taim em na pikinini meri bilong em i go sindaun long narapela hap, em i hatwok long painim wok mani. Em i tok: “Long moningtaim mi save go autim tok, na long olgeta apinun mi save raun long painim wok. Mi tingim yet wanpela taim mi go long stua long baim susu. Mi sanap na lukluk long ol kaikai bilong gaden na mi laik baim sampela, tasol mi sot long mani. Long dispela taim mi bel hevi nogut tru. Taim mi go bek long haus long apinun, ol beg i gat kain kain kaikai bilong gaden long en i pulap long veranda bilong haus. Kaikai i planti tru na dispela i lukautim mipela inap sampela mun. Mi krai, na mi tok tenkyu long Jehova.” I no longtaim na dispela sista i painimaut olsem wanpela brata long kongrigesen em i save planim ol kaikai long gaden, em i bin putim ol dispela kaikai. Bihain dispela sista i salim pas i go long dispela brata, na em i tok: “Long dispela de stret, mi bin givim bikpela tok tenkyu long yu, tasol mi tok tenkyu long Jehova tu long em i bin yusim gutpela pasin bilong yu long kirapim mi long tingim pasin laikim bilong em.”—Snd. 19:17.
19. Long taim bilong bikpela hevi tru, ol wokboi bilong Jehova bai bilip tru long wanem samting? Long nau yumi mas tingting strong long mekim wanem?
19 Ol samting Jehova i bin mekim long taim ol man i bin raitim Baibel na long taim bilong yumi tu, dispela i strongim yumi long bilip tru olsem Jehova em i Helpim bilong yumi. Klostu nau, taim bilong bikpela hevi tru bai painim dispela graun bilong Satan, na long dispela taim Jehova i mas helpim yumi moa yet, winim olgeta taim bipo. Ol wokboi bilong Jehova bai bilip tru long em na lukluk i go long em bilong helpim ol. Ol bai apim het bilong ol na amamas, long wanem, ol i save olsem taim bilong God i kisim bek ol i klostu pinis. (Lu. 21:28) Tasol i go inap long dispela taim, maski wanem wanem ol hevi i painim yumi, yumi mas strong long bilip tru long Jehova, em God i no save senisim nabaut ol pasin bilong em, olsem em i ‘man bilong kisim bek’ yumi.
[Ol Futnot]
a Lukim stori “Coping With an Unspeakable Tragedy,” long Awake! bilong Julai 22, 2001, pes 19-23.
b Lukim stori “Sustained by My Faith—Living With ALS,” long Awake! bilong Janueri 2006, pes 25-9.
Yu Inap Tingim?
• Olsem wanem Jehova inap kisim bek ol manmeri em ol i dai taim ol i no lapun yet?
• Jehova i save lukautim yumi long ol samting bilong spirit, na bilong wanem dispela em i bikpela samting tru?
• Jehova i tok promis long lukautim yumi long ol samting bilong skin, na dispela i makim wanem samting?
[Piksa long pes 8]
Ol i bin arestim Brata Rutherford na ol wanwok bilong em long 1918, tasol bihain kot i tok ol i no gat asua
[Piksa long pes 10]
Jehova inap lukautim yumi taim yumi “gat sik”