No Ken Katim Samting God i Pasim Pinis

“Tupela i no i stap olsem tupela moa. Nogat. Tupela i kamap olsem wanpela bodi. Olsem na samting God i pasim pinis, em man i no ken katim.”​—MATYU 19:6.

1, 2. Olsem wanem ol marit i ken save olsem sampela taim hevi bai kamap insait long marit bilong ol?

PIKSAIM long tingting olsem yu redi long go long wanpela longwe ples long ka. Yu ting bai i no gat sampela hevi i kamap long rot? Em i no savepasin long ting olsem bai i no gat hevi i kamap! Olsem, ating bai i gat bikpela win na ren samting, na dispela i mekim na yu mas draiv isi isi na was gut. O ating wanpela samting bilong ka bai bagarap na yu yet i no inap stretim, olsem na yu mas stopim ka long sait bilong rot na askim wanpela long helpim yu. Taim kain hevi olsem i kamap, yu bai kisim tingting olsem yu popaia long i go long dispela longwe ples na nau yu mas lusim ka? Nogat. Yu save olsem taim yu ron long longpela rot bai i gat sampela hevi i kamap na bai yu painim rot bilong stretim ol dispela hevi.

² Dispela i wankain tu long marit. Ol hevi bai kamap, olsem na ol lain i tingting long marit i no ken ting olsem ol bai stap amamas tasol long olgeta taim, nogat. Long 1 Korin 7:​28, Baibel i tokaut klia olsem ol manmeri i marit bai “painim planti hevi long laip bilong ol.” Bilong wanem i olsem? Long wanem, ol man na meri marit i gat sin, na yumi stap long taim bilong “planti hevi nogut tru.” (2 Timoti 3:1; Rom 3:23) Olsem na maski wanpela man na meri i save sindaun gut wantaim na ol i save tingim laik bilong God long marit bilong ol, sampela taim hevi bai painim ol.

 3. (a) Ol man bilong graun i gat wanem tingting long marit? (b) Bilong wanem ol Kristen i wok strong long strongim marit bilong ol?

³ Long nau taim hevi i kamap insait long marit, namba wan samting ol i tingting long mekim em long katim marit. Long planti hap, namba bilong ol man i katim marit i go bikpela tru. Tasol ol Kristen tru ol i save stretim ol hevi na ol i no save hariap long katim marit bilong ol. Bilong wanem ol i mekim olsem? Long wanem, ol i tingim marit i samting holi Jehova i givim olsem presen. Jisas i tok long ol manmeri i marit olsem: “Samting God i pasim pinis, em man i no ken katim.” (Matyu 19:6) Tru, sampela taim i hatwok long bihainim dispela tok bilong Jisas. Ol wanblut​—na sampela man bilong givim tingting long ol manmeri i marit​—em ol i no save long ol stiatok bilong Baibel, planti taim ol i save kirapim ol man na meri marit long sakim tok bilong Baibel na lusim poroman bilong ol o katim marit bilong ol.a Tasol ol Kristen i save olsem i gutpela moa long stretim ol hevi insait long marit na strongim marit bilong ol na ol i no tingting long katim marit hariap. Kirap long taim hevi i kamap em i bikpela samting long yumi mekim ol samting olsem Jehova i makim​—na yumi no ken bihainim tingting bilong ol narapela.​—Sindaun 14:12.

Stretim Ol Hevi

4, 5. (a) Wanem ol samting ol marit i mas mekim na bai marit bilong ol i ken i stap gut? (b) Bilong wanem ol stiatok i stap long Baibel inap helpim ol marit long stretim ol hevi i kamap long marit?

⁴ Long olgeta marit sampela taim hevi i save kamap na ol i mas wok long stretim. Planti taim em long ol liklik samting tasol. Tasol long sampela marit, ating i gat bikpela hevi i kamap na inap bagarapim marit bilong ol. Sampela taim ating yu mas askim wanpela elda Kristen i marit long helpim yu. Tasol dispela i no makim olsem marit bilong yu i bagarap pinis, nogat. Ol hevi i kamap i soim olsem em i bikpela samting long bihainim ol stiatok bilong Baibel na bai yu inap stretim ol hevi.

⁵ Jehova i bin wokim ol man na em i As bilong marit, olsem na em wanpela tasol i save long wanem samting yumi mas i gat na bai marit bilong yumi inap i stap gut. Tasol olsem wanem? Bai yumi harim tok bilong em i stap long Baibel na bihainim? Sapos yumi mekim olsem dispela bai helpim yumi. Jehova i tokim lain bilong em long bipo: “Sapos yupela i bin harim tok bilong mi, orait nau yupela inap i stap gut na oltaim laip bilong yupela bai i pulap long amamas, olsem wara i ran oltaim na i no save pinis. Na stretpela pasin bilong yupela bai i kamap strong oltaim olsem solwara i save bruk long nambis.” (Aisaia 48:18) Sapos yumi bihainim ol stiatok i stap long Baibel dispela bai helpim marit bilong yumi long i stap gut. Orait nau yumi ken skelim tok Baibel i mekim long ol man marit.

Oltaim “Laikim Tumas Ol Meri Bilong Yupela”

 6. Baibel i kamapim wanem tok bilong ol man marit?

⁶ Pas aposel Pol i raitim long ol Efesus i kamapim klia ol samting ol man marit i mas mekim. Pol i tok: “Yupela man, yupela i mas laikim tumas ol meri bilong yupela, olsem Krais i laikim tumas sios na i givim laip bilong em yet bilong helpim sios. Olsem tasol yupela man, yupela i mas laikim tru ol meri bilong yupela, olsem yupela i save laikim bodi bilong yupela yet. Man i laikim tru meri bilong en, em i laikim tru em yet. Yumi save, i no gat wanpela man i save birua long bodi bilong em yet. Nogat. Em i save givim kaikai long em na lukautim gut, olsem Krais i save mekim long sios. Tasol dispela tok i tok tu long yupela man wan wan long yupela i mas laikim tru meri bilong yupela, olsem yupela i save laikim yupela yet.”​—Efesus 5:​25, 28, 29, 33.

 7. (a) Wanem bikpela samting i mas i stap olsem as bilong marit Kristen? (b) Olsem wanem ol man i ken soim olsem ol i laikim meri bilong ol long olgeta taim?

⁷ Pol i no stori long olgeta hevi i save kamap namel long man na meri marit, nogat. Em i stori long wanpela bikpela samting i mas i stap olsem as bilong ol marit Kristen na dispela samting inap helpim ol marit long stretim ol hevi​—em pasin laikim. Long Baibel ol i bin raitim long pastaim, dispela tok laikim i stap 6-pela taim long ol dispela ves i stap long antap. Na tu, long dispela Baibel yet Pol i tokim ol man marit long laikim ol meri bilong ol, dispela i makim olsem man i mas laikim meri bilong em long olgeta taim. Pol i luksave olsem i no hatwok long kirap laikim narapela, tasol i hatwok long holim yet dispela laik long olgeta taim. Dispela i olsem, long wanem, yumi stap long “taim bilong las de,” em taim we planti man i “laikim ol yet tasol” na “taim ol i kros, bai i no gat rot bilong pinisim kros bilong ol.” (2 Timoti 3:​1-3) Ol kain pasin olsem i wok long bagarapim planti marit long nau, tasol man i laikim meri bilong em, em bai i no larim pasin bilong dispela graun long tingim em yet tasol i stiaim tingting na pasin bilong em.​—Rom 12:2.

Lukautim Meri Bilong Yu Long Ol Samting Bilong Skin

8, 9. Long wanem ol rot man Kristen i ken lukautim meri bilong em?

⁸ Sapos yu wanpela man marit Kristen, olsem wanem yu ken sakim pasin bilong tingim yu yet tasol na kamapim olsem yu laikim tru meri bilong yu? Long pas Pol i raitim long ol Efesus em yumi stori long en long pastaim, Pol i kolim tupela samting em yu mas mekim​—lukautim gut meri bilong yu, na laikim em olsem yu laikim bodi bilong yu yet. Olsem wanem yu ken lukautim meri bilong yu? Wanpela rot em yu mas lukautim em long ol samting bilong skin. Pol i tokim Timoti: “Sapos wanpela man i no lukautim ol wanblut tru bilong em yet na ol arapela wanlain tu, orait dispela man i lusim pinis bilip bilong em, na em i man nogut tru. Ol haiden yet i no save mekim dispela kain pasin nogut.”​—1 Timoti 5:8.

⁹ Tasol i no olsem man i mas lukautim meri long klos, kaikai, na haus na em tasol, nogat. Bilong wanem? Long wanem, man inap lukautim em gut long ol samting bilong skin, tasol em i no lukautim em long ol samting bilong tingting na bel na long ol samting bilong spirit. Em i bikpela samting long em i tingim meri bilong em long ol dispela samting. Tru, planti man Kristen i bisi long lukautim ol wok bilong kongrigesen. Tasol maski man marit i gat bikpela wok bilong kongrigesen, dispela i no makim olsem em i no inap mekim wok bilong em olsem het bilong famili, em wok God i givim em. (1 Timoti 3:​5, 12) Sampela yia i go pinis dispela magasin i bin stori long dispela samting na em i tok: “Wasman i ken mekim wok wasman long famili bilong em, na bihain em i ken tingting long mekim dispela wok long kongrigesen; dispela pasin i stret long tok bilong Baibel. Sapos elda i no lukautim gut famili bilong em, ating em i no inap holim wok elda.”b Tru tumas, em i bikpela samting long yu mas lukautim meri bilong yu long ol samting bilong skin, tingting na bel, na bikpela samting moa tingim em long ol samting bilong spirit.

Yu Mas Tingim Tru Meri

10. Olsem wanem man inap soim olsem em i tingim tru meri bilong em?

¹⁰ Sapos yu tingim tru meri bilong yu, yu bai lukautim em gut, long wanem, yu laikim em. I gat sampela rot yu ken bihainim bilong mekim olsem. Namba wan, lusim taim long stap wantaim meri bilong yu. Sapos yu no mekim olsem, ating pasin bilong em long laikim yu bai wok long pinis. Na tu, no ken ting olsem hamas taim yu lusim wantaim meri dispela em inap long em, long wanem, nogut em i no gat wankain tingting olsem bilong yu. I no olsem yu ken tok tasol olsem yu laikim meri bilong yu, na em tasol, nogat. Meri bilong yu i mas pilim olsem yu laikim em. Pol i tok: “Yumi no ken ting long helpim yumi yet. Nogat. Yumi mas ting long helpim ol arapela.” (1 Korin 10:24) Olsem wanpela gutpela man marit, yu mas save gut long ol samting meri bilong yu i mas i gat.​—Filipai 2:4.

11. Olsem wanem pasin man i mekim long meri bilong em bai mekim sampela samting long pasin bilong em long pas gut wantaim God na kongrigesen?

¹¹ Narapela rot yu ken soim olsem yu tingim tru meri bilong yu, em long rot bilong mekim gut long em long ol tok na ol pasin bilong yu. (Sindaun 12:18) Pol i tok long ol Kolosi olsem: “Yupela man, yupela i mas laikim tru ol meri bilong yupela, na yupela i no ken mekim nogut bel bilong ol.” (Kolosi 3:19) Wanpela buk i tok, dispela laspela hap tok bilong Pol inap makim olsem ol man i “no ken mekim meri i kamap olsem wanpela hausmeri” o “wanpela wokmeri nating.” Man marit i gat hatpela pasin​—em i mekim long haus o long ai bilong ol man​—em i soim olsem em i no laikim meri bilong em. Taim em i mekim hatpela pasin long meri bilong em, dispela inap mekim na em i no inap pas gut wantaim God. Aposel Pita i tokim ol man marit: “Yupela i mas bihainim gutpela tingting na sindaun gut wantaim ol meri bilong yupela. Bodi bilong ol meri i no strong tumas, olsem na yupela i mas mekim gutpela pasin long ol. Yupela i mas save olsem, ol meri tu bai i kisim laip bilong i stap oltaim. Sapos yupela i bihainim dispela pasin, orait i no gat wanpela samting bai i pasim ol prea bilong yupela.”c​—1 Pita 3:7.

12. Man marit Kristen inap lainim wanem samting long pasin Jisas i mekim long kongrigesen Kristen?

¹² Yu no ken ting pasin bilong meri long laikim yu i samting nating. Yu mas tokim meri olsem yu laikim em. Jisas i stap gutpela piksa bilong ol man marit Kristen long pasin em i mekim long kongrigesen Kristen. Em i mekim pasin isi, gutpela pasin, na em i lusim rong bilong ol disaipel bilong em maski planti taim ol i mekim pasin i no stret. Olsem na Jisas inap tokim ol narapela olsem: “Yupela olgeta kam long mi . . . long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo.” (Matyu 11:​28, 29) Man Kristen i mas bihainim pasin bilong Jisas na mekim wankain pasin long meri bilong em olsem Jisas i bin mekim long kongrigesen. Man i laikim tru meri bilong em na em i soim dispela long ol tok na ol pasin em i mekim, dispela bai helpim meri long stap amamas.

Ol Meri Em Ol i Save Bihainim Ol Tok Bilong Baibel

13. Baibel i kamapim wanem ol stiatok em inap helpim ol meri marit?

¹³ Baibel i kamapim tu ol stiatok bilong helpim ol meri marit. Efesus 5:​22-​24, 33 i tok: “Yupela meri, yupela i mas aninit long ol man bilong yupela, olsem yupela i save aninit long Bikpela. Long wanem, man em i het bilong meri bilong en, olsem Krais em i het bilong sios. Sios em i bodi bilong Krais, na Krais i bin kisim bek em. Sios em i stap aninit long Krais. Olsem tasol yupela meri tu, oltaim yupela i mas aninit long ol man bilong yupela. . . . Meri i mas i stap aninit long man bilong en na mekim gutpela pasin long em.”

14. Bilong wanem stiatok bilong Baibel long ol meri i mas aninit long ol man bilong ol, i no daunim ol meri?

¹⁴ Pol i tokaut strong olsem ol meri marit i mas soim rispek na aninit long man bilong ol. Dispela i stret wantaim laik bilong God. Olgeta samting long heven na graun i gat laip i save stap aninit long wok bos bilong narapela. Jisas tu i aninit long God Jehova. (1 Korin 11:3) Tasol sapos man i mekim gut wok bilong em olsem het bilong famili dispela inap mekim na meri i no pilim hatwok long aninit long man bilong em.

15. Wanem sampela tok bilong helpim ol meri marit i stap long Baibel?

¹⁵ Na tu, Pol i tok meri i “mas i stap aninit long man bilong en na mekim gutpela pasin long em.” Meri Kristen i mas ‘stap isi,’ na no ken tok pait o sakim man na bihainim laik bilong em yet. (1 Pita 3:4) Meri i save aninit long God em i save wok strong long lukautim gut famili bilong em, na em i givim biknem long man bilong em. (Taitus 2:​4, 5) Em bai mekim gutpela tok long man bilong em, na em bai i no mekim wanpela samting i kirapim ol narapela long daunim man bilong em. Na tu, em bai wok strong long helpim man bilong em long ol samting em i laik mekim.​—Sindaun 14:1.

16. Ol meri marit Kristen inap lainim wanem samting long pasin bilong Sara na Rebeka?

¹⁶ Meri i gat pasin isi dispela i no makim olsem em i no gat tingting o tingting bilong em i no bikpela samting, nogat. Ol meri bilong bipo i save aninit long God olsem Sara na Rebeka, ol i kamapim tingting bilong ol long ol samting na Baibel i kamapim olsem Jehova i orait long dispela samting ol i mekim. (Stat 21:​8-​12; 27:46–28:4) Ol meri marit Kristen tu i ken kamapim tingting bilong ol long ol man bilong ol. Tasol ol i mas mekim long pasin i soim olsem ol i tingim gut man bilong ol na long pasin i no daunim man bilong ol. Taim ol i mekim olsem, ol bai lukim olsem ol man bilong ol bai amamas long harim tok bilong ol.

Stap Gut Long Poroman Marit

17, 18. Wanem sampela samting ol man na meri marit inap mekim bilong sakim ol samting Satan i mekim bilong bagarapim marit?

¹⁷ Marit em i olsem man na meri i tok promis long i stap gut long poroman bilong ol inap long olgeta yia ol i stap laip. Olsem na man na meri marit i mas i gat laik long helpim marit bilong ol long i stap strong. Sapos ol i no toktok gut wantaim, dispela inap mekim na hevi inap i go bikpela. Taim hevi i kamap, planti taim man na meri marit i save lusim pasin bilong toktok gut wantaim, na dispela i mekim na narapela i bel nogut long narapela. Sampela i save painim rot bilong brukim marit bilong ol, ating ol i kirap laikim narapela husat i no poroman marit bilong ol. Jisas i mekim dispela tok lukaut: “Sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.”​—Matyu 5:28.

¹⁸ Aposel Pol i tokim olgeta Kristen, na ol marit Kristen tu olsem: “Sapos bel bilong yupela i hat, orait yupela lukaut. Nogut yupela i mekim sin. Nogut yupela i belhat yet i stap na san i go daun. Nogut yupela i opim dua long Satan.” (Efesus 4:​26, 27) Namba wan birua bilong yumi em Satan, em i save mekim wok long ol hevi i kamap namel long ol Kristen. No ken larim em i win! Taim hevi i kamap, skelim tok Baibel i mekim long tingting bilong Jehova long ol samting, na mekim wok long ol buk na nius bilong Baibel bilong helpim yu. Taim yupela i no wanbel long wanpela samting, toktok long dispela samting long pasin isi na mekim tok tru. Yu save long tok Jehova i laik bai ol marit i bihainim, ating sampela yu save bihainim na sampela nogat, orait wok strong long bihainim ol dispela lo. (Jems 1:​22-​25) Yu na poroman marit bilong yu i mas tingting strong long wokabaut wantaim God, na no ken larim wanpela man o wanpela samting i katim samting God i pasim pinis.​—Maika 6:8.

[Ol Futnot]

Yu Inap Tingim?

• Bilong wanem hevi inap painim ol marit Kristen?

• Olsem wanem man inap lukautim meri bilong em na soim olsem em i tingim tru em?

• Meri i ken mekim wanem bilong soim olsem em i rispektim man bilong em?

• Olsem wanem man na meri marit i ken strongim marit bilong ol?

[Piksa long pes 20]

Man i mas lukautim meri long ol samting bilong skin, na long ol samting bilong spirit tu

[Piksa long pes 21]

Man i tingim tru meri bilong em, em bai mekim meri bilong em i stap amamas

[Piksa long pes 23]

Ol meri marit Kristen i ken kamapim tingting bilong ol long pasin daun