Hau Yu Ken Redi Long Kisim Baptais

1-2. Sapos yu no redi yet long kisim baptais, wai na yu no ken bel hevi long dispela? (Lukim fran pes piksa.)

SAPOS yu laik kisim baptais, em gutpela mak yu laik winim. Yu redi long kisim baptais nau? Sapos yu pilim olsem yu redi na ol elda i orait long dispela, orait no ken surik long kisim baptais long neks kibung. Yu bai gat gutpela laip tru taim yu mekim wok bilong Jehova.

² Tasol wanpela i bin tokim yu olsem yu mas mekim sampela moa senis paslain long yu kisim baptais? O yu yet i luksave long dispela samting? Sapos olsem, no ken bel hevi. Yu ken mekim ol senis bilong winim mak bilong kisim baptais, maski yu yangpela o lapun.

 3. Man Itiopia i askim Filip long wanem samting, na wanem askim i kamap long dispela? (Aposel 8:36, 38)

³ Ritim Aposel 8:36, 38. Wanpela ofisa bilong haus king bilong Itiopia i askim Filip olsem: “Wanem samting i pasim mi long kisim baptais?” Dispela man Itiopia i laik kisim baptais, tasol tru tru em i redi long mekim dispela bikpela samting?

 4. Man Itiopia i mekim wanem bilong soim olsem em i laik wok yet long kisim save?

⁴ Dispela man Itiopia “i bin go long Jerusalem long lotu.” (Apo. 8:27) So i luk olsem dispela man Itiopia i bihainim lotu Juda, na em i insait long dispela lotu. Em i kisim save long Jehova long rot bilong ol rait bilong Ol Skripsa Hibru. Tasol em i laik kisim sampela save moa. Na taim Filip i bungim em long rot, Filip i lukim dispela man i mekim wanem samting? Em i wok long ritim ol tok long skrol bilong profet Aisaia. (Apo. 8:28) Em ol strongpela tok i tru. Dispela ofisa i kisim save long sampela bikpela tok i tru bilong Ol Rait Holi, tasol em i gat laik long kisim sampela save moa.

 5. Man Itiopia i mekim wanem long ol save em i kisim?

⁵ Dispela man em i ofisa bilong Kwin Kandasi bilong Itiopia, na em i wanpela ofisa i gat biknem; “em i save bosim olgeta mani samting bilong kwin.” (Apo. 8:27) So ating em i save bisi tru, long wanem, em i gat planti wok. Maski i olsem, em i makim haptaim bilong lotuim Jehova. Em i no amamas tasol long kisim save long tok i tru, nogat. Em i mekim ol samting i stret wantaim save em i kisim. Olsem na em i lusim Itiopia na i go longwe tru long tempel long Jerusalem bilong lotuim Jehova. Ating bikpela haptaim na mani i lus long em i mekim dispela wokabaut bilong em, tasol em i laik lotuim Jehova maski em i lusim sampela samting bilong em yet long mekim olsem.

6-7. Olsem wanem pasin bilong man Itiopia long laikim Jehova i wok yet long kamap strong?

⁶ Dispela man Itiopia i kisim ol nupela save long sampela bikpela tok i tru long rot bilong Filip, na wanpela bilong ol dispela save em olsem Jisas em i Mesaia. (Apo. 8:34, 35) Dispela bikman i amamas tru long save long samting Jisas i bin mekim bilong helpim em. Em i mekim wanem bihain long em i kisim ol dispela save? Sapos em i laik, em i ken stap yet olsem wanpela man i bihainim lotu Juda na i no gat wok long em i mekim senis. Tasol pasin bilong em long laikim Jehova na Pikinini bilong Em i kamap strong moa. Olsem na em i mekim bikpela senis tru long laip bilong em taim em i wokim disisen long kisim baptais na kamap disaipel bilong Jisas Krais. Filip i lukim olsem dispela man i redi na em i baptaisim em.

⁷ Sapos yu bihainim pasin bilong dispela man Itiopia, yu ken redi long kisim baptais. Yu tu inap strongim bel na tok olsem, “Wanem samting i pasim mi long kisim baptais?” Yumi ken stori long hau yu ken mekim ol wankain samting olsem em i bin mekim: Em i wok yet long kisim save, em i bihainim ol tok em i lainim, na pasin bilong em long laikim God i wok yet long kamap strong.

 8. Tok bilong Jon 17:3 i kirapim yu long mekim wanem?

⁸ Ritim Jon 17:3 na futnot. Olsem wanem? Ol dispela tok bilong Jisas i kirapim yu long stadi long Baibel? Yes, planti bilong yumi i bin bihainim dispela tok. Tasol yu ting ol dispela wankain tok i kirapim yumi long wok yet long kisim save? Yes. Yumi no inap stop long “kisim save long . . . God tru.” (Ekl. 3:11) Yumi bai wok yet long kisim save inap oltaim oltaim. Taim yumi wok long kisim sampela save moa, yumi bai pas gut moa wantaim Jehova.​—Sng. 73:28.

 9. Yumi mas mekim wanem bihain long yumi kisim save long ol bikpela tok i tru bilong Baibel?

⁹ Taim yumi kirap long kisim save long Jehova, yumi wok long lainim sampela bikpela tok i tru bilong Baibel. Long pas aposel Pol i raitim long ol Hibru, em i kolim ol bikpela tok i tru olsem “ol namba 1 as tok.” Tok bilong aposel Pol i no makim olsem “ol as bilip” ol i samting nating, nogat. Em i tok ol i olsem susu i save givim strong long bebi. (Hib. 5:12; 6:1) Tasol em i kirapim olgeta Kristen long wok yet long kisim save long ol strongpela tok i tru bilong God i stap long Baibel, na i no save tasol long ol bikpela tok i tru. Olsem wanem? Yu laik tru long kisim save long ol strongpela tok i tru bilong Baibel? Yu redi long wok yet long kamap strong, na wok yet long kisim save long Jehova na laik bilong em?

10. Wai na sampela inap pilim hatwok long stadi?

¹⁰ Planti bilong yumi i save pilim hatwok long stadi. Ating yu tu i save pilim olsem, a? Olsem wanem? Long skul, yu bin lain long rit na stadi gut? Yu amamas long stadi na lainim planti samting? O yu kisim tingting olsem yu no gutpela long ritim ol buk na stadi long en? Sapos olsem, orait i no yu wanpela i pilim olsem. Jehova i ken helpim yu. Em i gutpela olgeta na em i nambawan Tisa tru.

11. Olsem wanem Jehova i soim olsem em i “Nambawan Bikpela Tisa”?

¹¹ Jehova i kolim em yet olsem “Nambawan Bikpela Tisa bilong yu.” (Ais. 30:20, 21) Em i gutpela Tisa, em i no save les kwik, na em i kliagut long tingting bilong yu. Em i save tingim ol gutpela pasin bilong ol sumatin bilong em. (Sng. 130:3) Na em i no inap tru long askim yumi long mekim ol samting i winim mak bilong yumi. Tingim, em i bin wokim kru bilong yumi, em wanpela gutpela presen tru. (Sng. 139:14) Em i wokim yumi wantaim dispela laik bilong kisim save. Man Bilong Wokim yumi i laik bai yumi wok yet long kisim save inap oltaim oltaim, na amamas long mekim olsem. So long nau, em i gutpela long yumi “laikim tumas” ol tok i tru bilong Baibel. (1 Pita 2:2) Putim ol mak em yu ken winim, na bihainim gut sediul bilong ritim Baibel na stadi. (Jos. 1:8) Jehova bai blesim hatwok bilong yu taim yu amamas long ritim Baibel na kisim sampela save moa long em.

12. Wai na yumi mas stadi gut long laip na wok autim tok bilong Jisas?

¹² Long olgeta taim, lusim sampela haptaim long tingim tingim long bel laip na wok autim tok bilong Jisas. Em i bikpela samting long yumi bihainim gut lek mak bilong Jisas, long wanem, dispela bai helpim yumi long mekim gut wok bilong Jehova, moa yet long dispela haptaim nogut bilong nau. (1 Pita 2:21) Jisas i tokim ol disaipel bilong em olsem ol bai karim ol hevi. (Luk 14:27, 28) Tasol em i save olsem ol disaipel tru bilong em bai stap gut long God, olsem em i bin mekim. (Jon 16:33) Stadi gut long ol samting Jisas i bin mekim, na putim ol mak long bihainim pasin bilong em long laip bilong yu.

13. Yu mas wok yet long askim Jehova long wanem samting, na bilong wanem?

¹³ Save tasol em i no inap. As na yu kisim save em bilong helpim yu long lain gut moa long Jehova na kisim ol pasin olsem pasin laikim, na pasin bilong bilip long em. (1 Kor. 8:1-3) Taim yu wok long kisim save, wok yet long askim Jehova long mekim bilip bilong yu i kamap strong. (Luk 17:5) Em i save amamas long bekim ol kain beten olsem. Taim stretpela save yu kisim long God i stap olsem as bilong bilip bilong yu, dispela bai helpim yu long kamap strong.​—Jems 2:26.

14. Olsem wanem aposel Pita i kamapim klia olsem em i bikpela samting long yumi mas bihainim ol tok yumi lainim? (Lukim tu piksa.)

¹⁴ Aposel Pita i kamapim klia olsem em i bikpela samting long ol disaipel bilong Krais i wok yet long bihainim ol tok ol i lainim. Em i kolim stori bilong Noa long Baibel. Jehova i tokim Noa olsem em bai kamapim bikpela tait wara bilong bagarapim ol man nogut long taim bilong em. Noa i save olsem tait wara bai kamap, tasol dispela save tasol i no inap lukautim Noa na famili bilong em. Pita i kolim haptaim paslain long Bikpela Tait olsem, “dispela taim Noa i wokim sip.” (1 Pita 3:20) Noa na famili bilong em i bihainim save ol i kisim long God na ol i wokim wanpela traipela sip. (Hib. 11:7) Pita i tok samting Noa i mekim i wankain long pasin bilong kisim baptais, na em i tok: “Dispela samting i bin kamap i olsem piksa bilong samting i kisim bek yupela long nau, em baptais yupela i kisim.” (1 Pita 3:21) So yumi ken tok olsem, ol wok yu mekim long nau bilong redim yu yet long kisim baptais em i wankain long ol wok Noa na famili bilong em i bin mekim inap planti yia bilong wokim sip. Yu mas mekim wanem ol wok bilong redim yu yet long kisim baptais?

15. Yumi mas mekim wanem bilong soim olsem yumi tanim bel tru tru?

¹⁵ Wanpela fes samting yumi mas mekim em long tanim bel long ol sin bilong yumi. (Apo. 2:37, 38) Taim yumi tanim bel tru tru, em bai isi moa long yumi mekim ol senis. Olsem wanem? Yu lusim pinis ol pasin we Jehova i no amamas long en, olsem pasin pamuk, pasin bilong smok, o mekim ol tok doti o ol tok nogut? (1 Kor. 6:9, 10; 2 Kor. 7:1; Efe. 4:29) Sapos yu no mekim olsem yet, orait wok yet long traim long mekim olsem. Yu ken toktok wantaim man o meri i stadi long Baibel wantaim yu o askim ol elda bilong kongrigesen long helpim na stiaim yu. Sapos yu wanpela yangpela na yu stap yet long haus wantaim papamama, wok yet long askim papamama bilong yu long helpim yu long lusim sampela pasin nogut we inap pasim yu long kisim baptais.

16. Yumi mas mekim wanem bilong lotuim Jehova long olgeta taim?

¹⁶ Em i bikpela samting tu long yumi mas mekim ol samting bilong lotuim Jehova long olgeta taim. Dispela i makim olsem yumi mas go long ol miting Kristen na insait long bekim tok samting. (Hib 10:24, 25) Na taim yu winim mak bilong mekim wok autim tok, orait givim bel long mekim olsem planti taim. Taim yu givim bel moa yet long mekim dispela wok bilong seivim laip bilong ol man, yu bai amamas tru long mekim olsem. (2 Tim. 4:5) Sapos yu wanpela yangpela na yu stap yet long haus wantaim papamama, orait askim yu yet: ‘Mi save larim papamama i kirapim mi long go long ol miting o insait long wok autim tok? O mi yet i save kirap long mekim olsem?’ Taim yu yet i kirap long mekim olsem, yu soim bilip bilong yu na yu soim olsem yu laikim God Jehova na tenkyu long em. Dispela em ol “pasin bilong givim bel tru long God,” na i olsem ol presen yu givim i go long Jehova. (2 Pita 3:11; Hib. 13:15) God i save amamas long ol presen em yumi givim long laik bilong yumi na i no gat man i subim yumi long givim. (Skelim 2 Korin 9:7.) Yumi mekim olsem, long wanem, yumi amamas long givim ol nambawan gutpela samting bilong yumi i go long Jehova.

17-18. Wanem nambawan pasin we bai helpim yu long winim mak bilong kisim baptais, na bilong wanem? (Provep 3:3-6)

¹⁷ Taim yu wok long winim ol mak bilong kisim baptais, yu bai karim ol hevi. Sampela manmeri inap tok bilas long yu long nupela bilip bilong yu, na ol inap birua o mekim nogut long yu. (2 Tim. 3:12) Ating yu wok strong long daunim wanpela pasin nogut, tasol yu kirap gen long mekim dispela pasin nogut. O yu inap les kwik na bel hevi, long wanem, yu pilim olsem i hatwok long winim mak yu putim. Wanem samting bai helpim yu long wok strong yet? Nambawan bikpela samting we bai helpim yu em pasin bilong yu long laikim Jehova.

¹⁸ Pasin bilong yu long laikim Jehova em naispela pasin tru, na em nambawan gutpela pasin yu gat. (Ritim Provep 3:3-6.) Pasin bilong yu long laikim tru God inap helpim yu long sanap strong na karim ol hevi na mekim yet wok bilong em. Planti taim, Baibel i stori long Jehova i mekim gutpela pasin laikim long ol wokman bilong em. Dispela pasin i mekim na Jehova i no save lusim ol wokman bilong em, o givim baksait long ol. (Sng. 100:5) God i wokim yu i kamap olsem em yet. (Stt. 1:26) Olsem wanem yu ken mekim dispela wankain pasin laikim?

19. Olsem wanem yu ken tok tenkyu long Jehova long olgeta samting em i mekim bilong helpim yu? (Galesia 2:20)

¹⁹ Fes samting yu ken mekim em tok tenkyu long God. (1 Tes. 5:18) Long olgeta wan wan de, askim yu yet, ‘Long wanem rot Jehova i soim pasin laikim long mi?’ Na bihain, beten na tok tenkyu long Jehova, na kolim stret ol samting em i bin mekim bilong helpim yu. Aposel Pol i pilim olsem Jehova i laikim em, na yu tu i ken lukim ol samting Jehova i mekim bilong soim olsem em i laikim yu. (Ritim Galesia 2:20.) Askim yu yet, ‘Mi ken mekim wanem bilong soim olsem mi laikim em?’ Pasin bilong yu long laikim Jehova bai helpim yu long wok yet long sakim ol traim na sanap strong na karim ol hevi. Em bai helpim yu long wok yet long mekim ol wok lotu bilong yu, na oltaim soim long Papa bilong yu olsem yu laikim em long olgeta wan wan de.

20. (a) Yu mas mekim wanem bilong dediketim yu yet long Jehova? (b) Bilong wanem dispela disisen em i bikpela samting tru?

²⁰ I no longtaim, pasin bilong yu long laikim Jehova bai kirapim yu long mekim wanpela spesel beten. Em beten yu mekim bilong dediketim yu yet long God. Tingim, taim yu dediketim yu yet pinis long Jehova, yu gat dispela gutpela hop: Yu bilong em inap oltaim oltaim. Taim yu dediketim laip bilong yu long Jehova, yu promis long em long mekim wok bilong em long gutpela taim na long taim nogut. I no gat wok long yu mekim gen dispela tok promis. Tru tumas, taim yumi dediket long God, dispela em wanpela bikpela disisen yumi mekim long laip bilong yumi. Tasol tingim dispela: Yu bai mekim planti disisen long laip bilong yu, na sampela bilong ol em ol gutpela disisen, tasol i no gat wanpela bilong ol bai gutpela moa winim dispela disisen bilong dediketim laip bilong yu long Jehova. (Sng. 50:14) Satan bai wok strong long daunim pasin bilong yu long laikim Papa bilong yu, long wanem, em i laik bai yu lusim pasin bilong yu long stap gut long God. No ken tru larim Satan i win! (Jop 27:5) Pasin bilong yu long laikim tru Jehova bai helpim yu long inapim dediket bilong yu na yu bai pas gut moa wantaim Papa bilong yu long heven.

21. Wai na yumi ken tok olsem baptais em i kirap tasol bilong laip bilong yu olsem wanpela Kristen, na i no pinis bilong en?

²¹ Bihain long yu dediket pinis long Jehova, toktok wantaim ol elda long kongrigesen bilong yu olsem yu laik kisim baptais. Tasol oltaim tingim olsem, baptais em i kirap tasol bilong laip bilong yu olsem wanpela Kristen, na i no pinis bilong en. Em i kirap tasol bilong laip bilong yu olsem wanpela Kristen we yu bai mekim wok bilong Jehova i go inap oltaim oltaim. Olsem na long nau yet, strongim pasin bilong yu long laikim Papa bilong yu. Putim ol mak long strongim pasin bilong yu long laikim God long olgeta wan wan de. Taim yu mekim olsem, dispela bai kirapim yu long kisim baptais. Em bai wanpela naispela de tru. Tasol dispela em kirap tasol bilong en. Yu ken mekim pasin bilong yu long laikim Jehova na Pikinini bilong Em i kamap strong moa inap oltaim oltaim!