Wok Long Kamap Gutpela Moa

TAIM yu kirap nupela long bihainim ol stiatok bilong Baibel, em nau, tingting, toktok, na pasin bilong yu i kirap long senis isi isi. Planti bilong ol dispela senis i bin kamap taim yu no kam insait yet long Skul Tiokratik. Ating nau yu bin wok strong i go i go na yu dediketim pinis laip bilong yu long Jehova. Olsem wanem? Dispela i makim olsem nau yu no gat wok long kamap gutpela moa? Nogat. Baptais bilong yu i makim olsem yu stat tasol long mekim laik bilong Jehova.

Disaipel Timoti i stap pinis olsem wanpela elda Kristen taim Pol i tokim em long “lukautim gut,” olsem tingim gut dispela wok na tok kaunsel em i bin kisim​—olsem “wok hat” long mekim ol dispela samting​—“na bai olgeta manmeri i lukim pasin bilong yu yet i kamap gutpela tru.” (1 Ti. 4:​12-15) Maski nau tasol yu stat long bihainim rot bilong tok i tru o yu bin bihainim pasin Kristen long i stap bilong yu inap longpela taim pinis, yu mas tingting long kamap gutpela moa.

Long Efesus 3:​14-19, yumi ritim beten aposel Pol i mekim bambai ol wanbilip “i ken save gut” long tok i tru, olsem “em i bikpela tru, na i go longpela moa, na i go antap tru, na i go daun moa.” Bilong mekim olsem Jisas i bin givim ol man long yumi olsem presen bambai ol inap skulim, stretim, na strongim ol manmeri bilong kongrigesen. Taim yumi tingim tingim ol tok bilong Baibel long olgeta taim, na bihainim tok bilong ol gutpela tisa, dispela inap helpim yumi long kamap bikpela long ol samting bilong spirit.​—Efesus 4:​11-15.

Bilong kamap bikpela olsem, “tingting . . . i mas kamap nupela.” Tingting bilong yumi i mas stret wantaim tingting bilong God na Krais. Bilong “kamap nupela manmeri,” oltaim yumi mas wok long kisim tingting bilong tupela. (Ef. 4:​23, 24) Taim yu stadi long 4-pela Gutnius, yu save ting olsem ol dispela stori bilong i stap na wok bilong Jisas i olsem piksa yu inap bihainim? Yu kisim save long sampela pasin bilong Jisas na traim long bihainim ol dispela pasin long laip bilong yu yet?​—1 Pi. 2:21.

Ol samting yu save toktok long en inap makim olsem yu kamap gutpela moa o olsem wanem. Ol man i “kamap nupela manmeri” ol i no save insait long ol tok giaman, tok doti o tok i makim olsem ol i ting gutpela samting i no inap kamap. Nogat. Toktok bilong ol i save “strongim ol man” na i save “bringim marimari bilong God i kam long ol man i harim.” (Ef. 4:​25, 26, 29, 31; 5:​3, 4; Ju. 16) Ol tok na pasin bilong ol long toktok taim ol i stap nating na long ol miting bilong kongrigesen i kamapim klia olsem tok i tru i wok long senisim pasin bilong ol.

Sapos “ol dispela tok bilong ol grisman i . . . no inap sakim [yu] nabaut olsem win na si i save sakim kanu long solwara,” orait dispela tu i kamapim klia olsem yu wok long kamap gutpela moa. (Ef. 4:14) Yu save mekim wanem taim pasin bilong dispela graun i laik kirapim yu long kisim ol nupela kain tingting, o go insait long wanpela lain i strong long helpim ol man o wanpela wok samting, o painim kain kain amamas? Dispela i pulim yu long lusim sampela wok bilong spirit bambai yu inap mekim ol dispela samting? Dispela inap pasim yu long kamap strong long samting bilong spirit. Em i savepasin long yusim taim bilong yu bilong mekim ol samting bilong spirit!​—Ef. 5:​15, 16.

Pasin yu mekim long ol narapela man inap makim olsem yu kamap gutpela moa long ol samting bilong spirit o nogat. Olsem wanem? Yu lain pinis long ‘mekim gutpela pasin na lusim sin’ bilong ol brata sista bilong yu?​—Ef. 4:32.

Long kongrigesen na long haus bilong yu, ol i mas lukim olsem yu kamap gutpela moa long bihainim pasin bilong Jehova long mekim ol samting. Na dispela pasin i mas kamap ples klia tu long skul, long hap ol man i stap long en, na long ples wok. (Ef. 5:21–6:9) Sapos yu kamapim moa yet ol pasin bilong God long ol dispela hap, orait ol man i luksave olsem yu wok long kamap gutpela moa long samting bilong spirit.

Yumi olgeta i gat sampela save Jehova i bin givim yumi. Em i laik bai yumi yusim dispela save long helpim ol narapela, na long rot bilong yumi em inap kamapim pasin marimari bilong em. Aposel Pita i bin tok: “God i bin marimari long yupela olgeta wan wan na givim ol kain kain presen long yupela. Olsem na yupela wan wan i mas i stap gutpela wokboi bilong God, na yusim ol dispela presen bilong helpim ol arapela manmeri bilong God.” (1 Pi. 4:10) Olsem na yu mekim wanem long wok bilong yu olsem wokboi?

Pita i tok moa olsem: “Sapos wanpela man i kisim presen bilong autim tok, orait em i mas autim stret tok bilong God.” (1 Pi. 4:11) Dispela ves i tok strong olsem yumi gat wok long mekim tok i stret wantaim Tok Bilong God bambai God i kisim biknem. Pasin bilong yumi long mekim dispela tok i mas givim biknem long Jehova. Gutpela skul yu kisim long Skul Tiokratik inap helpim yu long yusim presen bilong yu long kain rot olsem​—long givim biknem long God long pasin yu mekim bilong helpim ol narapela. Dispela i olsem mak yu laik winim, olsem na wanem samting i makim olsem wok bilong yu insait long skul i kamap gutpela moa?

No ken tingting olsem yu winim pinis hamas stadi long tok kaunsel fom o yu mekim pinis ol narapela narapela kain asainmen, nogat. Tingting long olsem wanem skul yu kisim i bin helpim wok bilong yu long givim biknem long Jehova i kamap gutpela moa. Dispela skul i save redim yumi long mekim gutpela wok moa long autim tok. Olsem na givim ol dispela askim long yu yet: ‘Mi save redim ol tok mi bai mekim long taim bilong autim tok? Mi lain pinis long kamapim long ol man mi autim tok long ol olsem mi tingim tru ol? Bilong stretim rot bilong mekim gobek, taim mi laik lusim man mi save mekim wanpela askim bilong toktok long en taim mi go bek lukim em bihain? Sapos mi stadi long Baibel wantaim wanpela man, mi save wok strong long kamap olsem wanpela tisa i save putim tok i go daun long bel bilong man?’

Yu no ken ting olsem yu kisim sampela gutpela wok na dispela samting tasol i makim olsem yu kamap gutpela moa. Nogat. Wok yu mekim long ol asainmen yu kisim, dispela yet i makim olsem yu wok long kamap gutpela moa o nogat. Sapos ol i bin givim yu wanpela asainmen na yu mas mekim wok tisa long en, orait askim yu yet: ‘Mi bin mekim tru wok tisa? Mi kamapim dispela tok long pasin i bin helpim i stap bilong ol man i bin harim tok bilong mi?’

Dispela tok long yusim presen bilong yumi em bilong kirapim yumi long i go pas long mekim samting. Olsem wanem? Yu save go pas long wok wantaim ol narapela long autim tok? Yu save wok long painim rot bilong helpim ol nupela, o yangpela, o ol lain i no gat strong long kongrigesen bilong yu? Yu save volantia long klinim Haus Kingdom o long helpim sampela wok bilong ol kibung? Yu inap mekim wok painia haptaim long sampela mun? Yu inap mekim wok painia oltaim o helpim wanpela kongrigesen i sot long ol pablisa? Sapos yu wanpela brata, yu save wok long winim ol mak Baibel i kolim bilong holim wok kongrigesen sevent o wok elda? Taim yu amamas long givim helpim na yu orait long holim wok, dispela i makim olsem yu wok long kamap gutpela moa.​—Sng. 110:3.

Yu no ken tingting planti sapos yu ting save bilong yu long bihainim pasin Kristen i sot. Tok Bilong God i “save givim gutpela tingting long ol man i no gat planti save.” (Sng. 19:7; 119:130; Snd. 1:​1-4) Taim yumi bihainim tok bilong Baibel, dispela i mekim na gutpela tingting na save bilong Jehova i helpim yumi. Save yumi kisim long dispela rot i winim tru ol save yumi kisim long rot bilong mekim ol samting bilong yumi yet. Taim yumi wok long kamap gutpela moa long mekim wok bilong Jehova, yumi kisim gutpela save. Olsem wanem yumi ken mekim gutpela wok long dispela save?

Taim planti samting i painim man long laip bilong em, em inap kisim tingting olsem: ‘Bipo mi bin bungim kain taim olsem. Mi save long samting mi mas mekim.’ Olsem wanem? Dispela em i gutpela tingting? Sindaun 3:7 i tok: “Nogut yu ting, save bilong yu yet em i samting tru.” Ol samting i bin painim yumi long bipo inap helpim yumi long tingting gut long ol samting i kamap long yumi. Tasol sapos yumi wok long kamap gutpela moa long samting bilong spirit, ol samting i painim yumi bai strongim tingting na bel bilong yumi long save olsem: Bilong mekim gut ol samting yumi mas kisim blesing bilong Jehova. Olsem na ol man bai save yumi kamap gutpela moa long samting bilong spirit taim yumi lukluk long Jehova bilong stiaim ol samting yumi laik mekim na yumi no bihainim save bilong yumi yet. Yumi kamapim dispela taim yumi bilip strong olsem i no gat wanpela samting inap kamap sapos God i no larim i kamap, na yumi bilip na laikim yet Papa bilong yumi long heven.

Maski aposel Pol i stap bikpela pinis long ol samting bilong spirit na em i wanpela Kristen God i bin makim, em i save em i mas “wok strong long kisim” laip. (Fl. 3:​13-16) Yu gat wankain tingting?

Yu bin kamap gutpela moa inap long wanem mak? Skelim yu yet long ol dispela samting: Yu mekim wanem ol samting bilong kamap olsem nupela man, na daun tru long Jehova olsem nambawan bos, na mekim gutpela wok long ol presen yu kisim bilong givim biknem long Jehova? Taim skul yu kisim long Skul Tiokratik i wok long helpim yu, ol gutpela pasin Baibel i stori long en bai kamap ples klia moa long pasin bilong yu long toktok na long skulim man. Tingting long ol dispela samting bilong helpim yu long kamap gutpela moa. Yes, yu mas amamas long ol dispela samting na wok bilong yu long kamap gutpela moa bai i stap ples klia.