I Gat Rot na Bai Olgeta Lain i Stap Wankain?
JOHN ADAMS, namba tu presiden bilong Yunaitet Stets, em i sainim Dekleresen ov Independens i gat dispela gutpela tok long en: “Dispela tok i tru i stap ples klia, olsem God i wokim olgeta man bambai ol i ken i stap wankain.” Tasol yumi ken save olsem John Adams i gat tupela tingting long dispela samting, long wanem, em i tok: ‘God i Gat Olgeta Strong i wokim ol man na bai skin na tingting bilong narapela i winim narapela, olsem na i no gat rot long ol i ken i stap wankain.’ Tasol wanpela saveman bilong Briten, nem bilong em H. G. Wells, em i ting olgeta man inap i stap wankain na narapela i no winim narapela sapos i gat dispela 3-pela samting: wanpela gutpela lotu tasol, em bilong olgeta man, na wankain ediukesen bilong olgeta man, na i no gat ami samting.
I kam inap long nau, dispela samting i no bin kamap olsem H. G. Wells i bin tingim, nogat. Ol man i no stap wankain, na dispela pasin olsem sampela lain i gat nem na sampela i stap olsem ol man nating tasol, dispela pasin i stap yet. Yu ting dispela pasin i bin helpim olgeta manmeri? Nogat. Dispela pasin i save brukim ol manmeri, olsem na bel kaskas, birua, pen na hevi, kilim planti man i dai, ol dispela samting i save kamap. Bipo long hap bilong Afrika, Australia, na Not Amerika, ol i ting ol waitskin i winim ol blakskin na dispela i bin kamapim planti hevi nogut tru long ol blakskin—long Tasmania ol i bagarapim na pinisim olgeta Aborijini. Long Yurop, pasin bilong ting olsem ol Juda i no gutpela, dispela i bin kirapim taim bilong ol Natsi i kilim i dai planti milion Juda. Long Frans na Rasia, ol lain i gat nem na namba ol i gat planti mani, na ol lain nating i no gat nem ol i no amamas long i stap bilong ol, na dispela samting i bin mekim na long 1789 ol Frans i pait na daunim gavman, na long 1917 ol Rasia i pait na daunim gavman.
Wanpela saveman long bipo em i tok: “Mi lukim sampela bikman i wok long daunim ol arapela manmeri na mekim nogut long ol.” (Saveman 8:9) Tok bilong em i tru, maski wanpela lain i stap antap long ol narapela o wanpela man tasol i mekim. Taim wanpela lain i putim ol yet i stap antap long narapela lain, hevi na pen i save kamap.
Long Ai Bilong God, Olgeta i Wankain
Olsem wanem? Ol man bilong sampela lain i winim ol narapela lain? Long ai bilong God, nogat. Baibel i tok: “Long wanpela tumbuna tasol [God] i bin mekim olgeta lain manmeri i kamap. Na em i putim ol i stap long olgeta hap bilong graun.” (Aposel 17:26) ‘God i bin wokim olgeta manmeri, na long ai bilong en ol i wankain tasol, maski ol i gat planti samting o ol i no gat samting.’ (Jop 34:19) Olgeta manmeri i bin kamap long wanpela tumbuna tasol, na taim mama i karim ol, ol i wankain tasol long ai bilong God.
Tingim dispela samting tu: Taim man i dai, dispela tingting kranki olsem em i winim ol narapela lain, em i pinis olgeta. Tasol ol Isip long bipo ol i no bilip olsem. Taim wanpela king bilong Isip i dai, ol i save putim ol gutpela gutpela samting insait long matmat bilong em bambai em inap mekim wok long en long laip em i kisim bihain olsem wanpela bikman. Tasol em i bin mekim wok long ol dispela samting? Nogat. Ol man i bin stilim ol dispela gutpela samting, na planti samting ol i no bin stilim em yumi ken lukim insait long ol haus tumbuna long nau.
Em i dai pinis, olsem na King bilong Isip i no mekim wok long ol dispela gutpela samting i gat bikpela pe. Man i dai pinis em i no antap long narapela o aninit long em, na em i no stap maniman o rabisman. Baibel i tok: “Yumi lukim ol saveman tu, ol i save dai. Na ol krankiman na ol longlong man ol i save dai. . . . Biknem bilong yumi i no inap pasim yumi long dai. Nogat. Yumi bai i dai olsem ol abus tasol.” (Song 49:10, 12) Maski yumi king o wokboi nating, dispela tok i stret long yumi olgeta, olsem: “Ol man i dai pinis, ol i no inap save long wanpela samting. Bai ol i no kisim gutpela samting moa. . . . Yu no inap mekim wok o tingting o kisim gutpela tingting na save long ples bilong ol man i dai pinis, dispela ples bai yu go long en.”—Saveman 9:5, 10.
Long ai bilong God, taim mama i karim yumi, yumi olgeta i wankain, na taim yumi dai, yumi olgeta i wankain tasol. Olsem na insait long sotpela taim yumi stap laip, pasin bilong putim wanpela lain i stap antap long narapela lain, dispela i save lus nating!
Olgeta Man i Stap Wankain—Dispela Inap Kamap Olsem Wanem?
Tasol yu ting wanpela taim bai kamap na olgeta man i stap laip ol bai wankain tasol, olsem narapela i no winim narapela? Yumi ken tok yes. Taim Jisas i stap long graun inap olsem 2,000 yia i go pinis, God i wokim rot bilong kamapim kain lain olsem. Jisas i givim laip bilong em olsem ofa bilong baim bek olgeta man i bilip, na bai “olgeta manmeri i bilip long em ol i no ken lus. . . . Bai ol i kisim laip i stap gut oltaim oltaim.”—Jon 3:16.
Bilong kamapim klia olsem ol man i bihainim em ol i no ken litimapim ol yet olsem ol i antap long ol wanbilip bilong ol, Jisas i tok: “Ol man i no ken kolim yupela ‘Tisa.’ Nogat. Wanpela tasol em i tisa bilong yupela, na yupela olgeta i stap brata brata. Na long graun hia yupela i no ken kolim wanpela man em i papa bilong yupela. Wanpela tasol em i Papa bilong yupela, na em i stap long heven. Na ol i no ken kolim yupela ‘Hetman.’ Yupela i gat wanpela hetman tasol, em man God i makim bilong kisim bek ol manmeri bilong en. Bikman bilong yupela em i mas i stap wokman bilong yupela. Man i litimapim nem bilong em yet, nem bilong en bai i go daun.” (Matyu 23:8-12) Long ai bilong God, olgeta disaipel tru bilong Jisas ol i wankain tasol insait long trupela lotu.
Olsem wanem? Ol Kristen bilong pastaim ol i ting ol i wankain tasol na narapela i no winim narapela? Ol Kristen i kisim gut tok bilong Jisas ol i ting olsem. Ol i ting narapela i stap wankain olsem narapela long lotu na ol i kamapim dispela tingting taim ol i kolim narapela olsem “brata.” (Filemon 1, 7, 20) Ol i no kirapim narapela long ting olsem em i winim ol narapela. Tingim pasin daun Pita i mekim taim em i stori long em yet olsem: “Mi Saimon Pita, mi wokboi na aposel bilong Jisas Krais, em i God bilong yumi, na em i Man bilong kisim bek yumi. Mi raitim dispela tok long yupela ol manmeri i bin kisim bilip i gutpela tru . . . wankain olsem bilip bilong mipela.” (2 Pita 1:1) Pita i bin kisim skul long Jisas yet, na em i wanpela aposel, olsem na em i holim bikpela wok i gat namba. Tasol em i ting em i wanpela wokboi nating na em i save olsem ol narapela Kristen tu i holim wok insait long lotu i tru.
Ating sampela i save tok, dispela pasin bilong i stap wankain em i pait wantaim pasin i bin stap paslain long taim bilong ol Kristen, em God i bin kisim lain Israel olsem lain stret bilong em. (Kisim Bek 19:5, 6) Ol i tok dispela i soim olsem wanpela lain i stap antap long ol narapela lain, tasol i no olsem. Tru, ol Israel ol i tumbuna pikinini bilong Abraham na ol i bin stap olsem lain bilong God yet, na God i bin givim tok bilong em long ol man long rot bilong ol. (Rom 3:1, 2) Tasol taim em i mekim olsem, i no bilong putim ol antap long ol narapela lain. Nogat. God i mekim olsem na bai em i ken ‘mekim gut long olgeta lain manmeri.’—Stat 22:18; Galesia 3:8.
Ol samting i kamap i soim olsem planti Israel i no bihainim pasin bilong tumbuna bilong ol, Abraham, long bilip. Ol i no stap gut long God na ol i sakim Jisas olsem Mesaia. Long dispela as, God i rausim ol. (Matyu 21:43) Tasol ol man i gat pasin daun ol i no bin lus long kisim ol blesing God i bin tok promis long en. Long Pentikos 33 C.E., kongrigesen Kristen i kamap. Dispela oganaisesen bilong ol Kristen em spirit holi i bin makim ol, ol i “lain Israel tru bilong God,” na ol samting i kamap i soim olsem, long rot bilong dispela lain, ol dispela blesing bai kam.—Galesia 6:16.
Sampela bilong dispela kongrigesen i gat wok long stretim tingting bilong ol na bai ol i ken save, olgeta i wankain tasol. Disaipel Jems i givim strongpela tok long ol Kristen i bin mekim gut long ol Kristen i gat bikpela mani, na ol Kristen i stap rabis, nogat. (Jems 2:1-4) I no stret ol i mekim olsem. Tok bilong aposel Pol i soim olsem ol Kristen Juda i no winim ol Kristen bilong ol narapela lain, na ol man Kristen i no winim ol meri Kristen. Em i tok: “Yupela olgeta i bilip long Krais Jisas na i pas wantaim em, na long dispela pasin yupela i kamap pikinini bilong God. Yupela ol manmeri i bin kisim baptais na i pas wantaim Krais, yupela olgeta i bin pasim Krais olsem man i pasim longpela klos bilong en. Na long lain bilong Krais, i no gat ol Juda na ol Grik. I no gat ol wokboi nating na ol man i stap fri. I no gat ol man na ol meri. Nau long Krais Jisas yupela olgeta i stap wanpela tru.”—Galesia 3:26-28.
Long Nau i Gat Wanpela Lain i Stap Wankain
Ol Witnes Bilong Jehova long nau ol i wok strong long bihainim ol lo bilong Baibel bilong stiaim tingting. Ol i save olsem God i no orait long dispela pasin olsem sampela lain i stap antap long ol narapela lain. Olsem na ol i no bruk i go long wanpela lain pris pasto na wanpela lain man nating bilong lotu, na ol i no tingim kala bilong skin na mani na ol i bruk long dispela samting, nogat. Tru, sampela bilong ol i gat planti mani, tasol ol Witnes i no tingim tumas ol gutpela samting bilong ol, long wanem, ol i save ol dispela samting i no bilong i stap olgeta taim. (1 Jon 2:15-17) Olgeta i stap wanbel long lotuim God Jehova, em King bilong heven na graun.
Olgeta wan wan i kisim wok bilong autim gutnius bilong Kingdom. Olsem Jisas i mekim, ol Witnes i givim biknem long ol man em ol narapela i daunim ol na ol i stap nogut—ol i go lukim ol long haus bilong ol, na ol i tokim ol olsem ol i laik helpim ol long kisim save long Tok Bilong God. Ol man i gat planti samting na ol man i no gat samting ol i wok wantaim. Ol gutpela pasin bilong spirit ol man i bihainim, dispela em i bikpela samting long ol. Wankain olsem long taim bilong ol aposel, olgeta insait long tok i tru ol i stap brata brata.
Ol i Stap Wankain, Tasol Ol i Kain Kain
Tru, pasin bilong i stap wankain, olsem narapela i no winim narapela, dispela i no makim olsem yumi wankain stret long olgeta samting, nogat. Long dispela oganaisesen Kristen i gat ol man na meri, ol yangpela na lapun, na ol man bilong kain kain skin na tok ples na kantri na sindaun. Na olgeta wan wan i gat narapela narapela save na strong long mekim wok. Tasol ol dispela samting i no mekim na sampela i winim ol narapela, nogat. Ol i kain kain na dispela samting i gutpela tru. Ol dispela Kristen i save olsem, wanem wanem save ol i holim, em i olsem presen ol i bin kisim long God na ol i no ken pilim olsem ol i winim ol narapela.
Pasin bilong brukim ol man na sampela i stap antap long ol narapela, em i bin kamap, long wanem, ol man i laik stiaim wokabaut bilong ol yet—ol i no laik bai God i stiaim ol. Klostu nau, Kingdom bilong God bai kirap na bosim dispela graun, na pasin bilong ting sampela lain i winim ol narapela lain, wantaim olgeta narapela samting i bin givim pen na hevi long ol man inap planti tausen yia i kam inap nau, em bai pinis. Long dispela taim, ‘ol manmeri i daunim nem bilong ol yet, bai God i givim olgeta graun long ol.’ (Song 37:11) Bai i no gat as moa na man i ken ting em i winim ol narapela. I no gat wanpela taim bihain na dispela pasin i ken kamap gen na brukim bikpela lain brata i stap long olgeta hap.
[Rait long pes 5]
God “i bin wokim olgeta manmeri, na long ai bilong en olgeta i wankain tasol, maski ol i gat planti samting o ol i no gat samting.”— Jop 34:19.
[Piksa long pes 6]
Ol Witnes Bilong Jehova i save litimapim nem bilong ol narapela man
[Ol Piksa long pes 7]
Ol pasin bilong spirit em man i bihainim, dispela em i bikpela samting long ol Kristen tru