Bosim Gut Laik Bilong Skin
“Yupela i mas bosim gut laik bilong bodi bilong yupela.”—2 PITA 1:5, 6.
JISAS i tok: “Ol bai i ting long daunim mi, na pulim yupela i go long ol gavman na ol king. Olsem na bai yupela i ken autim gutnius long ol dispela bikman, na long ol arapela haiden tu.” (Matyu 10:18) Sapos yu mas i go sanap long ai bilong wanpela bikman o jas o presiden samting, bai yu toktok long wanem samting? Ating bai yu tokaut olsem i gat wanem as na yu mas i kam, o bai yu toktok long samting ol i bin kotim yu long en, a? Spirit bilong God bai helpim yu long mekim. (Luk 12:11, 12) Tasol olsem wanem sapos yu mas tokim ol long pasin bilong bosim skin? Yu ting dispela em i bikpela samting na yumi ol Kristen i mas autim tok long en tu?
2 Ol i holim wanpela Witnes Bilong Jehova, em aposel Pol, na ol i sanapim em long kot, na em i autim “tok long stretpela pasin, na long man i mas bosim gut laip bilong em yet, na long God bai i kotim yumi bihain.” Dispela samting i kamap long Sisaria. “Sampela de i go pinis, na Feliks i kam wantaim meri bilong en Drusila. Drusila em i meri bilong lain Juda. Na Feliks i singautim Pol na i harim sampela tok bilong en. Pol i tokim em long pasin bilong bilip long Krais Jisas.” (Aposel 24:24) Ol stori bilong bipo i tok, Feliks em i man nogut bilong bagarapim ol man na givim pen long ol. Bipo em i bin marit tupela taim, na em i grisim Drusila long lusim man bilong em na Feliks i ken kisim em. (Em i brukim lo bilong God.) Ating meri yet i laik harim stori bilong dispela nupela lotu Kristen.
3 Pol i tokim tupela “long stretpela pasin, na long man i mas bosim gut laip bilong em yet, na long God bai i kotim yumi bihain.” (Aposel 24:25) Dispela tok bilong Pol i kamapim long ples klia stretpela lo bilong God na pasin nogut bilong tupela. Ating Pol i laik bai Feliks i ken mekim stretpela kot long Pol. Tasol bilong wanem Pol i toktok long “stretpela pasin” na “long God bai i kotim yumi bihain”? Tupela i mekim pasin pamuk, na tupela i laik save, sapos yumi bilip long Krais Jisas yumi mas mekim wanem. Ol i mas save, sapos yumi bihainim Jisas na kamap Kristen, yumi mas bosim tingting na toktok na pasin bilong yumi, olsem daunim laik bilong skin na bosim gut. God bai i gat tok long yumi sapos tingting na toktok na pasin bilong yumi i no stret. Feliks inap givim strafe long Pol, tasol em i nambatu samting. Tupela i gat bikpela asua long ai bilong God, na kot bilong God bai painim tupela, na dispela bai i nogut moa yet. (Aposel 17:30, 31; Rom 14:10-12) Olsem na taim tupela i harim dispela tok bilong Pol, Feliks i pret.
Mas Mekim, Maski Hatwok
4 Pol i save, ol Kristen i mas bosim laik bilong skin. Na Pita tu i gat wankain tingting. Em i tokim ol man bilong i go long heven: “Bai yupela i kisim laip na pasin bilong God yet,” olsem na em i tokim ol long ol i mas bilip, na bihainim pasin bilong sori, na daunim laik bilong skin. Pasin bilong bosim laik bilong skin em i bikpela samting, na Pita i tok: “Sapos yupela i kisim ol dispela kain pasin na ol i kamap strong tru long yupela, orait dispela save bilong yupela bai i no inap i stap nating. Nogat. Em bai i karim planti kaikai.”—2 Pita 1:1, 4-8.
5 Tasol i hatwok long bosim gut laik bilong skin long olgeta taim, long wanem, i no planti man i save bihainim tru dispela pasin long nau. Pol i stori long ol pasin bai kamap “long taim bilong las de,” na em i kolim wanpela pasin olsem, “ol bai i no bosim laik bilong bodi bilong ol.” (2 Timoti 3:1-5) Yumi lukim ol i save mekim olsem, a?
6 Sampela man i ting, i gutpela sapos yumi bihainim laik bilong skin na yumi no pasim dispela laik. Ol i tok, sapos yumi laik pairap, o bikmaus, o belhat, o kros, o pait, mekim tasol, long wanem, em bai helpim skin. Long taim bilong pilai spot samting, yumi lukim ol man i save mekim olsem. Ol nius i save stori long ol bikpela pait samting i save kamap long taim sampela lain i gat nem long spot ol i mekim ol bikpela pilai. Na sampela man i kaikai tumas, o dring tumas, o larim laik bilong skin i kirapim ol long mekim pasin i no stret long ol meri, o givim bel long kisim mani, o tingting tumas long sampela kain amamas bilong skin. Tasol yumi no ken stori tumas long planti samting olsem. Nau yumi laik stori long pasin bilong bosim bel na tingting bilong yumi.
Bosim Gut Bel na Tingting
7 Ating planti bilong yumi i save bosim gut skin. Yumi no save stil o pamuk o kilim man i dai. Yumi save, lo bilong God i tambuim dispela kain samting. Tasol olsem wanem long bosim bel na tingting bilong yumi? Sapos man i no lain long bosim bel na tingting bilong em, skin inap kirapim em long mekim sampela pasin i no stret. Olsem na yumi mas toktok long pasin bilong bosim bel.
8 God Jehova i save, yumi no olsem wanpela masin samting i no gat tingting na i no gat samting bilong kirapim em long krai o lap o amamas o kros o bel hevi o sori samting, nogat. Yumi no olsem. Sampela taim bel bilong yumi inap kirapim yumi long pilim ol dispela kain samting. Taim Lasarus i dai, “Jisas i lukim Maria i krai, na . . . bel bilong en i sori tru na em tu i laik krai.” Na taim ol i go long matmat, “Jisas i krai.” (Jon 11:32-38) Tasol long narapela taim bihain, em i no krai, nogat. Em i mekim narapela kain samting, na em i bosim gut bel bilong em tu: Em i kirap rausim ol man i mekim wok bisnis long haus lotu. (Matyu 21:12, 13; Jon 2:14-17) Na ol gutpela disaipel bilong em ol tu i bin kamapim bel bilong ol long sampela taim. (Luk 10:17; 24:41; Jon 16:20-22; Aposel 11:23; 12:12-14; 20:36-38; 3 Jon 4) Tasol ol disaipel i save, ol i mas bosim bel bilong ol, nogut bel i kirapim ol long mekim sampela pasin i no stret. Efesus 4:26 i tok: “Sapos bel bilong yupela i hat, orait yupela lukaut. Nogut yupela i mekim sin. Nogut yupela i belhat yet i stap na san i go daun.”
9 Sampela taim i olsem Kristen i bosim skin bilong em, tasol bel inap kirapim em long mekim nabaut. God i bin orait long ofa bilong Abel, tasol bilong Kein nogat, olsem na “Kein i kros nogut tru, . . . orait Bikpela i tokim Kein olsem, . . . ‘Sapos yu mekim gutpela pasin, orait bai yu amamas, . . . tasol sapos yu mekim pasin nogut, orait sin bai i redi long bagarapim yu. Sin i gat bikpela laik tru bilong winim yu. Tasol yu mas strong na winim em.’ ” (Stat 4:5-7) Tasol Kein i no bosim bel bilong em, olsem na bel i kirapim em long kilim i dai Abel.
10 Na yumi ken tingim taim bilong Mordekai na Esta. Haman em bikpela man bilong gavman, na em i gat biknem na bikpela namba, na em i laik bai ol man i mas litimapim nem bilong em. Em i kros long Mordekai, long wanem, Mordekai i no brukim skru long em. Wanpela taim Haman i raun na “amamas na bel gut tru. . . . Tasol Mordekai i lukim em na em i no sanap na givim gude long em. Olsem na Haman i belhat . . . moa, tasol em i pasim long tingting bilong em yet na i no mekim wanpela samting.” (Esta 5:9, 10) Tru, em “i no mekim wanpela samting” long Mordekai long dispela taim, tasol i no olsem em i bosim gut bel bilong em, nogat; long wanem, em i belhat nogut tru long Mordekai na bihain em i pasim tok long kilim Mordekai i dai.
11 Sapos Kristen i no bosim bel bilong em, dispela inap kamapim bikpela hevi namel long ol Kristen. Sampela i ting nogat, tasol bipo dispela samting i bin kamap. Kros i bin stap namel long tupela sista long Filipai, na Baibel i no tok long as bilong kros bilong ol, tasol yumi ken stori nating olsem: Yuodia i singautim sampela brata sista long i kam long haus bilong em bilong kaikai na amamas. Tasol Yuodia i no singautim Sintike, olsem na Sintike i bel hevi. Ating bihain Sintike i wokim wanpela pati olsem na em i no singautim Yuodia, olsem bekim dispela samting Yuodia i bin mekim. Nau narapela i kirap tingim ol popaia bilong narapela. Tupela i no toktok moa wantaim. Yu ting wanem as bilong dispela hevi? Ating em i kirap long taim wanpela i no singautim narapela long kaikai, a? Tasol tupela i no bosim gut bel bilong ol, olsem na dispela liklik samting i kamap olsem wanpela bikpela kros na hevi, olsem na wanpela aposel i mas stretim. I olsem liklik hap paia ol i tromoi insait long bus na bus olgeta i paia.—Filipai 4:2, 3.
Mas Tingim Ol Brata na Bosim Bel
12 Tru, i hatwok long daunim kros sapos wanpela i bin mekim yumi i bel hevi o em i laik daunim yu. Jehova i save long dispela samting. Em i bin lukim pasin bilong ol man long bipo yet na i kam inap nau. God i tokim yumi: “Yu no ken belhat kwik . . . em i pasin bilong ol man i no gat gutpela tingting.” (Saveman 7:9) Pastaim God i kolim ol samting i save kirap long bel bilong man, na bihain em i kolim ol samting dispela man i mekim. (Sindaun 14:17; 16:32; Jems 1:19) Yu ken askim yu yet olsem: ‘Mi save bosim ol tingting i save kamap long bel bilong mi, o nogat?’
13 Planti man bilong graun i ting narapela i mekim samting nogut long ol, na ol i no bosim bel, olsem na kros pait i save kamap. Sapos yumi no daunim tingting nogut i kamap long bel, em inap i stap longpela taim na kamapim hevi na rong. (Lukim Stat 34:1-7, 25-27; 49:5-7; 2 Samuel 2:17-23; 3:23-30; Sindaun 26:24-26.) Ol Kristen, maski ol i bilong wanem lain, ol i mas save, pasin bilong bel nogut na kros na pait i samting nogut na yumi mas abrusim. (Wok Pris 19:17) Olsem wanem? Yu save bosim bel na bai yu no ken bel nogut long narapela?
14 Olsem hevi i bin stap namel long Yuodia na Sintike, kain hevi inap kamap long nau tu. Ating i gat wanpela sista ol i no singautim o pikinini o kasen brata bilong em i kam long wanpela kaikai o pati samting, na nau em i hevi long dispela. O wanpela brata i baim olpela ka long narapela Kristen, na bihain liklik ka i bagarap, na nau brata i bel hevi long dispela narapela Kristen. Dispela sista o brata i no daunim dispela hevi i stap long bel na bosim skin bilong em. Orait, wanem samting inap kamap long dispela?
15 Sapos bel bilong Kristen i gat tok long narapela Kristen, em i mas stretim, nogut bikpela kros na hevi i kamap. Wanpela Witnes i kros long narapela Witnes, na em i no laik go long Buk-Stadi dispela narapela Witnes i save go long en. Sori tumas! I no stret sapos brata i kisim narapela brata i go long kot, tasol i no gutpela tu sapos brata i tingim wanpela samting narapela brata i bin mekim long em o long famili bilong em na nau em i bel nogut long dispela brata. Wanem samting i bikpela moa? Famili bilong yumi? o long i stap wanbel wantaim ol brata sista bilong yumi? Sapos yu tok, yu orait long i dai bilong helpim sista bilong yu, tasol nau yu bel nogut long em na yu no laik toktok wantaim em, dispela i no stret, a? (Lukim Jon 15:13.) God i tok: “No ken bekim pasin nogut long ol. . . . Mekim pasin i gutpela long ai bilong olgeta man. Yupela yet i no ken tingting long kros na pait. Oltaim yupela i mas painim rot bilong i stap wanbel wantaim olgeta man. . . . No ken bekim rong ol i mekim long yupela. Yupela i mas larim God i belhat long ol.”—Rom 12:17-19; 1 Korin 6:7.
16 No ken larim kros i stap. Daunim kros i stap long bel, na stretim dispela hevi na bai pasin wanbel i ken kamap gen. Tingim pasin bilong Abraham. Lain animal bilong em i bikpela, na bilong Lot tu i olsem, na graun bilong ol i liklik tumas, olsem na kros i kamap namel long tupela lain wokman i save lukautim ol animal. Orait, Abraham i bosim gut bel na em i tok, Lot i ken kisim hap graun i gutpela, na Abraham bai kisim hap i no gutpela tumas. Yumi save, Abraham i no bel nogut long Lot, long wanem, bihain em i helpim Lot na em i mekim pait long ol man i laik mekim nogut long Lot.—Stat 13:5-12; 14:13-16.
17 Pol tupela Barnabas i bin poroman inap planti yia, na wanpela taim wanpela i laik kisim Mak bilong raun wantaim ol, tasol narapela i no laik, na “tupela i tok kros . . . na tupela i bruk.” (Aposel 15:39) Em tupela strongpela brata long ol samting bilong spirit, tasol ol i no bosim bel bilong ol. Sapos kain samting inap kamap long strongpela Kristen olsem, em inap kamap long yumi tu. Tasol tupela i no larim dispela hevi i stap longtaim. Baibel i tok, ol i daunim kros bilong ol na ol i kamap wanbel gen.—Kolosi 4:10; 2 Timoti 4:11.
18 Yumi save, bel hevi inap kamap namel long lain bilong God long nau tu. Em i bin kamap long taim bilong ol Hibru na taim bilong ol aposel, long wanem, yumi olgeta i no gutpela tumas. (Jems 3:2) Jisas i tokim lain bilong em, ol i mas mekim hariap ol samting bilong stretim hevi i kamap namel long ol. (Matyu 5:23-25) Tasol i gutpela moa sapos yumi lain long bosim bel na bai kros i no ken kamap. Sapos yu hevi long liklik samting wanpela brata o sista i bin mekim, gutpela sapos yu bosim bel na lusim dispela rong bilong em. Yu ting yu mas strong long em i mas tok sori long yu? Tasol olsem wanem long yu yet? Yu no laik mekim dai dispela kros i stap long bel bilong yu, a?
Yu Inap Mekim!
19 Yumi bin stori long bosim bel, long wanem, bel i save kirapim yumi long mekim ol rong, olsem toktok nabaut, o mekim pasin sem, o givim bel tumas long kaikai, o narapela kain rong bilong skin. (1 Korin 7:8, 9; Jems 3:5-10) Tasol yu ken strongim bel, long wanem, yu inap lain long bosim gut ol laik bilong skin.
20 Jehova i ken helpim yumi long bosim bel bilong yumi, long wanem, pasin bilong bosim bel em i wanpela pasin spirit bilong Jehova i save kamapim. (Galesia 5:22, 23) Olsem na sapos yumi bihainim gutpela pasin inap long yumi ken kisim spirit bilong Jehova, yumi inap bosim bel bilong yumi. Jisas i tok: “Papa bilong yupela i stap long heven em bai i amamas long givim Holi Spirit long ol man i askim em.”—Luk 11:13; 1 Jon 5:14, 15.
21 Tasol ating bai i hatwok long daunim bel bilong yumi sapos yumi bin kamap bikpela namel long ol man i save belhat kwik na ol i no save daunim ol laik bilong bel, o sapos bel bilong yumi i save kirap kwik, o sapos bipo yumi no bin daunim bel bilong yumi. Sapos bipo yumi bin stap olsem, ating bai i hatwok long stretim dispela samting. Tasol i no olsem yumi no inap mekim, nogat. Yumi inap. (1 Korin 9:24-27) Long nau na i go inap long pasin nogut bilong dispela graun i pinis, ol hevi bai wok long kamap planti, olsem na yumi ol Kristen i mas lain long bosim strong bel bilong yumi! Yumi mas skelim pasin bilong yumi yet, yumi sot long pasin bilong bosim bel bilong yumi o olsem wanem? Sapos yu lukim olsem yu no bosim tumas bel bilong yu, orait, yu mas wok long stretim dispela rong. (Song 139:23, 24) Askim God long givim spirit bilong em long yu. Em bai helpim yu na bai yu ken bosim gut bel bilong yu.—2 Pita 1:5-8.
Tingim Gen Ol Dispela Tok
◻ Bilong wanem yumi mas bosim bel bilong yumi?
◻ Stori bilong Haman na Yuodia na Sintike i bin lainim yu long wanem samting?
◻ Sapos yu hevi long samting man i mekim long yu, bai yu wok strong long mekim wanem?
◻ Sapos yu bosim gut bel bilong yu, olsem wanem dispela bai helpim yu long i stap bel isi?
[Askim Bilong Stadi]
1. Ating sampela taim bai Kristen i stap we na em i mas autim tok?
2, 3. (a) Olsem wanem Pol inap autim tok long Feliks na Drusila? (b) Bilong wanem Pol i toktok long “bosim gut laip”?
4. Olsem wanem pasin bilong bosim bel i bikpela samting ol Kristen i mas mekim?
5. Bilong wanem yumi mas bosim laik bilong skin?
6. Ol man i no bosim gut bel bilong ol, ol i save mekim wanem?
7. Yumi mas lain long bosim wanem samting?
8. Jehova i laik bai yumi mas mekim wanem long bel bilong yumi?
9. Bilong wanem yumi mas bosim bel bilong yumi?
10. Pasin bilong Haman i ken lainim yumi long wanem samting?
11. Wanem hevi i bin kamap long Filipai? Ating wanem as bilong en?
12. Bilong wanem God i givim tok long yumi i stap long Saveman 7:9?
13, 14. (a) Taim man i no bosim bel bilong em, wanem samting i save kamap? (b) Ating wanem kain samting inap kamapim hevi namel long ol Kristen?
15. (a) Sampela taim kros i bin kamap namel long sampela Kristen, na wanem samting nogut i bin kamap? (b) Baibel i tok wanem long dispela samting?
16. Abraham i bin makim wanem gutpela pasin bilong bosim bel?
17. Olsem wanem Pol tupela Barnabas i bin pundaun long dispela samting? Tasol bihain ol i mekim wanem?
18. Sapos yu gat hevi long wanpela brata, gutpela yu mekim wanem?
19. Bilong wanem i gutpela yumi bin toktok long pasin bilong bosim bel?
20. Olsem wanem yumi ken save yumi inap lain long bosim bel?
21. Nau yumi mas kirap mekim wanem?
[Piksa long pes 18]
Taim Pol i sanap long ai bilong Feliks na Drusila, em i autim tok long stretpela pasin na bosim laik bilong skin