Yu Ting Yumi Mas Kliagut Long Baibel?

Wanpela liklik gel i gat 4-pela krismas samting i lukim smok i kamap long faktori na i go karamapim ol klaut. Olsem na em i ting ol faktori i save kamapim ol klaut. Tingting kranki bilong em inap mekim yumi lap. Tasol sapos yumi no kliagut long ol bikpela samting, dispela inap mekim sampela samting long i stap bilong yumi. Olsem, sapos yumi no kliagut long ol tok i stap long karamap bilong marasin, bikpela hevi inap painim yumi.

Taim yumi no kliagut long ol bikpela tok bilong Baibel, dispela inap kamapim bikpela hevi moa. Olsem, long bipo sampela man i bin kisim tingting kranki long ol tok Jisas i autim. (Jon 6:48-68) Ol i no laik kisim sampela save moa, ol i sakim olgeta tok Jisas i skulim ol long en. Na em bikpela popaia tru!

Olsem wanem? Yu save ritim Baibel bilong kisim helpim? Sapos yu mekim olsem, dispela em i gutpela pasin. Tasol yu ting hevi inap kamap sapos yu no kliagut long ol tok yu ritim? Planti manmeri i bungim dispela hevi. Nau yumi laik stori long 3-pela bikpela tok bilong Baibel em planti i no kliagut long en.

• Sampela man i ting lo bilong Baibel long “yumi mas aninit long God” i makim olsem yumi mas pret tru long em. (Saveman 12:13) Tasol God i no laik ol man i lotu long em i holim kain tingting olsem. Em i tok: “Yupela i no ken pret, long wanem, mi God bilong yupela na mi stap wantaim yupela. Bai mi mekim yupela i kamap strong na bai mi helpim yupela.” (Aisaia 41:10) Dispela tok pret long God i makim olsem yumi mas laikim na rispektim em.

• 

  Sampela man i no kliagut long tok bilong Baibel olsem: “Olgeta samting i kamap long dispela graun, i save kamap long taim bilong em yet. God i makim taim bilong yumi man i kamap long graun na taim bilong yumi i dai.” Ol man i ting dispela tok i kamapim olsem God i makim pinis taim bilong yumi wan wan long dai. (Saveman 3:1, 2). Tasol dispela skripsa i stori long wanpela samting we i save painim olgeta man, em dai. Na tu, Baibel i skulim yumi olsem ol disisen yumi mekim inap helpim yumi long stap laip longpela taim. Baibel i tok: “Sapos yu stap aninit long Bikpela . . . bai yu stap longpela taim long graun.” (Sindaun 10:27; Song 90:10; Aisaia 55:3) Wanem insait bilong dispela tok? Sapos yumi bihainim Tok Bilong God, dispela bai helpim yumi long sakim olkain pasin we inap nogutim helt bilong yumi, olsem pasin bilong dring spak na pasin pamuk.—1 Korin 6:9, 10.

• Sampela man i ting tok bilong Baibel olsem skai na graun “i wetim paia i kamap,” i makim olsem God bai bagarapim graun olgeta. (2 Pita 3:7) Tasol God i tok promis olsem em bai i no inap bagarapim graun. Baibel i tok, God i “putim dispela graun i stap long ples bilong en, na graun i stap strong olgeta. Em i no inap surik liklik. Nogat tru.” (Song 104:5; Aisaia 45:18) Dispela tok i makim olsem God bai bagarapim ol man nogut na ol bai pinis olgeta, kain olsem yu tromoi wanpela hap pepa long paia na paia i kukim. Tasol taim Baibel i tok long heven tru, dispela inap makim skai, ol samting i stap long yunives, na ples God i stap long en. Em ol samting we i no inap bagarap.

Olsem ol eksampel yumi stori pinis, planti taim ol man i no kliagut long tok ol i ritim long Baibel. Tasol bilong wanem God i no helpim ol? Ating sampela bai tok: ‘Sapos God i gat bikpela save, em inap kamapim wanpela buk we i isi long kliagut long ol tok bilong en. Tasol wai na em i no mekim olsem?’ Bai yumi stori long tripela risen na planti man i no kliagut long tok bilong Baibel.

1. Ol i no gat pasin daun na redi long kisim save. Jisas i tok long Papa bilong em olsem: “Papa, Bikpela bilong heven na graun, mi litimapim nem bilong yu long ai bilong ol man. Long wanem, yu bin haitim gut ol dispela samting long ol man i gat savetingting na ol klevaman, na yu bin kamapim long ol man i stap olsem ol liklik pikinini.” (Luk 10:21) Tru tumas, ol man i gat pasin daun na redi long kisim save, ol tasol inap kliagut long tok bilong Baibel. Planti taim “ol man i gat savetingting na ol klevaman” i gat pasin antap, olsem na ol i no inap kliagut long tok ol i ritim. Tasol ol man i olsem “ol liklik pikinini,” ol i gat pasin daun na redi long kisim save, olsem na God i helpim ol long kliagut long tok bilong Baibel. Long rot bilong Baibel God i kamapim savetingting bilong em!

2. Ol i no redi long kisim helpim long God. Jisas i kamapim klia olsem ol man bai nidim helpim long kliagut long ol tok em i autim. Ol bai kisim helpim olsem wanem? Jisas i tok: “Dispela helpim, em holi spirit, em bai skulim yupela long olgeta samting . . . Long nem bilong mi Papa bai salim dispela helpim i kam.” (Jon 14:26) Olsem na God i salim holi spirit, em strong bilong em, long helpim ol man long kliagut long tok bilong Baibel. Tasol God i no save givim holi spirit long ol man husat i no laik kisim helpim long Em, olsem na planti taim ol i no kliagut long ol tok bilong Baibel. Na tu, holi spirit i save kirapim ol Kristen i kliagut long tok bilong Baibel long helpim ol narapela husat i laik save gut long ol tok ol i ritim.—Aposel 8:26-35.

3. God i makim taim stret bilong kliagut long sampela tok profet bilong Baibel. Olsem, wanpela ensel i kamap long profet Daniel na tokim em long raitim tok bilong ol samting bai kamap bihain. Ensel i tok: “Daniel, yu pasim buk i gat ol dispela tok long en. Na yu mas putim mak long en, bilong tambuim ol man long ol i no ken opim dispela buk. Dispela buk i mas pas i stap inap klostu long taim bilong las de.” Inap planti handret yia, planti man i ritim Buk Daniel long Baibel, tasol ol i no kliagut long tok bilong en. Daniel yet i no kliagut long sampela tok em i raitim. Long pasin daun em i tok: “Mi harim dispela tok bilong em, tasol mi no klia gut.” Isi isi, ol man i kliagut long insait bilong tok profet em God i tokim Daniel long raitim, tasol dispela samting i kamap long taim stret God i makim. Ensel i tok: “Daniel, yu go nau. Buk i pas pinis na i tambu long opim nau, long wanem, as bilong dispela tok i mas i stap hait inap long taim bilong las de.” Husat bai kliagut long tok bilong God? Baibel i tok: “Ol dispela manmeri i gat gutpela save na tingting, ol tasol bai i save long as bilong ol dispela samting. Tasol ol manmeri nogut bai i no inap save long as bilong ol dispela samting.” (Daniel 12:4, 8-10) Yes, God i save kamapim insait bilong ol bikpela tok bilong Baibel long taim stret bilong en.

Yu ting em risen na sampela taim ol Witnes Bilong Jehova i no kliagut long ol tok bilong Baibel? Yes. Tasol long taim stret, God i helpim ol Witnes long skelim gen Baibel na kliagut long ol tok bilong en, na ol i redi long stretim bilip bilong ol. Ol i bihainim pasin bilong ol aposel bilong Krais, taim em i stretim ol long pasin daun ol i senisim ol tingting kranki bilong ol.—Aposel 1:6, 7.

Liklik gel em yumi stori long en long kirap bilong atikol, em i no kliagut long hau ol klaut i kamap. Tingting kranki bilong em i liklik samting. Tasol em bikpela samting long yumi mas kliagut long ol tok bilong Baibel. Bilong mekim olsem, yumi mas kisim helpim long ol narapela. Painim ol man husat i gat pasin daun na ol i stadi long Baibel, ol man i larim holi spirit bilong God i stiaim ol long kliagut long Baibel, na ol man husat i bilip olsem yumi stap long wanpela haptaim we God i laik bai yumi kliagut long tok bilong Baibel winim olgeta taim bipo. I gutpela yu toktok wantaim wanpela Witnes Bilong Jehova o ritim ol tok i stap long Web-sait jw.org. Baibel i tok promis olsem: “Yu mas askim gutpela tingting na save long kam long yu . . . , na bai yu save gut long God.”—Sindaun 2:3-5.