Husat Bai Abrusim Bagarap Long De Bilong Jehova?

“Yupela i ting yupela i mas bihainim wanem kain pasin? Yupela i mas givim laip bilong yupela long God na wokabaut long pasin holi na bihainim olgeta pasin bilong God. Long dispela pasin yupela i mas wetim De bilong God i kamap.”​—⁠2 PITA 3:​11, 12.

 1. Husat ol i bin mekim wok bilong ol long pasin na strong bilong Elaija?

GOD JEHOVA i bin makim sampela manmeri namel long ol lain bilong graun em ol bai i stap king wantaim Pikinini bilong em, Krais Jisas, long Kingdom bilong heven. (Rom 8:​16, 17) Taim ol Kristen God i bin makim ol i stap yet long graun, ol i mekim wok bilong ol long pasin na strong bilong Elaija. (Luk 1:​17) Long stori i kamap paslain long dispela, yumi bin lukim sampela wok bilong ol i wankain olsem wok bilong profet Elaija. Tasol olsem wanem long wok bilong man i senisim Elaija, em profet Elisa?​—⁠1 King 19:​15, 16.

 2. (a) Wanem laspela mirakel bilong Elaija? Wanem namba wan mirakel bilong Elisa? (b) Wanem samting i kamapim klia olsem Elaija i no bin go long heven?

² Laspela mirakel Elaija i bin wokim i olsem: Em i kisim longpela klos bilong em i makim namba bilong em olsem profet, na em i paitim wara Jordan long dispela klos, na wara i bruk i go tupela hap. Olsem na Elaija wantaim Elisa ol inap wokabaut long graun i drai na ol i kamap long hapsait bilong wara. Tupela i wokabaut long hap is bilong wara na wanpela raunwin i karim Elaija i go long narapela hap bilong graun. (Lukim blok long pes 15, nem bilong en, “Elaija i Go Antap Long Wanem Heven?”) Taim Elaija i go, longpela klos bilong em i pundaun. Orait taim Elisa i paitim wara Jordan long dispela klos, wara i bruk gen long tupela hap na em inap wokabaut i go bek long graun i drai. Dispela mirakel i kamapim klia olsem Elisa i kamap senis bilong Elaija long helpim lotu i tru long Israel.​—⁠2 King 2:​6-​15.

Mas i Gat Ol Pasin Olsem Bilong God

 3. Pol na Pita i tok wanem long Jisas i kam i stap na De bilong Jehova?

³ Planti handet yia bihain long taim bilong Elaija na Elisa, aposel Pol na aposel Pita i toktok long wanpela De bilong Jehova bai kamap, na ol i bungim wantaim tok olsem Krais Jisas bai kam i stap, na “nupela heven na nupela graun” em bai kamap bihain long taim bilong ol. (2 Tesalonaika 2:​1, 2; 2 Pita 3:​10-​13) Bilong abrusim bagarap long bikpela De bilong Jehova​—⁠taim God i bagarapim ol birua bilong em na lukautim lain bilong em na ol i no bagarap​—⁠yumi mas wok long painim Jehova na mekim pasin daun na stretpela pasin. (Sefanaia 2:​1-3) Tasol i gat sampela pasin moa i kamap ples klia taim yumi tingim ol samting i bin kamap na profet Elisa i insait long en.

⁴ Bilong abrusim bagarap long De bilong Jehova, yumi mas strong long mekim wok bilong God. Bipo Elaija na Elisa i strong long mekim wok bilong Jehova. Na liklik hap lain Kristen God i bin makim na ol i stap yet long graun, ol tu i strong long mekim wok holi bilong Jehova na ol i go pas long autim gutnius.a Kirap long 1935 samting, ol i wok long kirapim olgeta manmeri i bilip long tok bilong Kingdom na ol i gat tingting long i stap oltaim long graun, na bai ol i ken dediket long Jehova na kisim baptais. (Mak 8:​34; 1 Pita 3:​21) Planti milion manmeri ol i kirap na mekim olsem. Bipo ol i stap tudak long ol samting bilong spirit, na sin i mekim na i olsem ol i dai pinis, tasol bihain ol i kisim save long tok i tru bilong God na ol i bilip na wet long kisim laip i stap oltaim long Paradais bai kamap long graun, na ol i strong long mekim wok bilong Jehova. (Song 37:29; KTH 21:​3-5) Ol i strong long mekim wok, na ol i wok gut wantaim ol brata bilong Krais em ol i stap yet long graun, na ol i kisim ol na mekim gut long ol, na ol i mekim ol narapela gutpela wok, na dispela i givim nupela strong long ol dispela brata bilong Krais.​—⁠Matyu 25:​31-​46.

 5. Bilong wanem em i bikpela samting tru long mekim gutpela pasin long ol “brata” bilong Jisas? Husat ol i stap olsem gutpela piksa bilong dispela samting long taim bilong Elisa?

⁵ Ol manmeri i mekim gutpela pasin long ol “brata” bilong Krais long wanem ol i disaipel bilong em, ol inap tingting long abrusim bagarap long De bilong Jehova. God i bin mekim gut tru long tupela marit long ples Sunem, long wanem, tupela i bin mekim gutpela pasin long Elisa na wokboi bilong em na kisim tupela i go long haus na lukautim ol long kaikai. Tupela marit hia i no gat pikinini, na man i lapun pinis. Tasol Elisa i tok promis long meri Sunem olsem em bai karim wanpela pikinini man, na tru tumas dispela samting i kamap. Orait sampela yia bihain dispela pikinini i dai, na Elisa i go long Sunem na kirapim bek pikinini. (2 King 4:​8-​17, 32-​37) Man! Em ol gutpela pe tru dispela meri i kisim long gutpela pasin em i bin mekim long lukautim Elisa!

6, 7. Naman i mekim wanem na em i stap olsem gutpela piksa? Dispela i bikpela samting long ol man i laik abrusim bagarap long De bilong Jehova o olsem wanem?

⁶ Yumi mas i gat pasin daun na bai yumi ken bihainim ol tok bilong Baibel em ol “brata” bilong Krais i save givim long yumi bilong soim rot long yumi bambai yumi ken abrusim bagarap long De bilong Jehova. Lepraman Naman, em kepten bilong ami bilong Siria, em i mas mekim pasin daun bambai em inap bihainim tok bilong liklik wokmeri Israel, em i tokim Naman long go long Israel na painim Elisa na bai sik bilong em i ken pinis. Elisa i no lusim haus na go ausait bilong bungim Naman. Em i salim tok long Naman olsem: “Yu go waswas 7-pela taim long wara Jordan na bai sik bilong yu i pinis na skin bilong yu i kamap gutpela gen.” (2 King 5:​10) Naman i gat pasin antap na taim em i harim dispela tok em i kros nogut tru, tasol bihain em i mekim pasin daun na em i go waswas long wara Jordan inap 7-pela taim, na nau “skin bilong en i kamap gutpela olsem skin bilong nupela pikinini.” (2 King 5:​14) Naman i laik i go bek long ples, tasol pastaim em i kam bek olgeta long Samaria bilong tok tenkyu long profet bilong Jehova. Elisa i tingting olsem em i no ken kisim mani samting long dispela strong God i bin givim long em bilong wokim mirakel. Orait em i kam ausait bilong bungim Naman, tasol em i no laik kisim wanpela presen. Long pasin daun Naman i tokim Elisa: “Bihain bai mi mekim ol ofa bilong paia i kukim olgeta na ol arapela ofa long Bikpela wanpela tasol. Na bai mi no inap mekim ofa long arapela god. Nogat tru.”​—⁠2 King 5:​17.

⁷ Planti milion manmeri long nau ol i mekim pasin daun na bihainim tok bilong dispela lain God i bin makim, em ol tok bilong Baibel na ol i kisim planti blesing. Na tu, ol dispela manmeri i gat stretpela bel ol i bilip long ofa bilong Jisas na dispela i mekim ol i kamap klin long ol samting bilong spirit. Nau ol i stap pren bilong God Jehova na Krais Jisas. (Song 15:​1, 2; Luk 16:⁠9) Ol i givim bel long God na long mekim wok bilong em, olsem na long De bilong Jehova bai ol i abrusim dispela bagarap i laik painim ol sinman i gat pasin antap na ol i no tanim bel, em ol bai bagarap na pinis olgeta.​—⁠Luk 13:24; 1 Jon 1:⁠7.

“Husat i Laik Kam Long Lain Bilong Mi?”

 8. (a) Ol man i abrusim bagarap long De bilong Jehova ol i gat wanem tingting long mekim laik bilong God? (b) Jehu i kisim wanem wok? (c) Wanem samting i mas painim Jesebel?

⁸ Ol manmeri i laik abrusim bagarap long De bilong Jehova ol i mas tingting strong long mekim laik bilong Jehova. Elaija i no pret long autim tok profet olsem famili bilong Ahap bai bagarap, em ol i man bilong kilim man i dai na ol i save lotuim Bal. (1 King 21:​17-​26) Tasol pastaim Elisa, em dispela man i bin senisim Elaija, em i mas pinisim sampela wok i stap yet. (1 King 19:​15-​17) Orait taim bilong Jehova i kamap pinis na Elisa i tokim wanpela wokboi bilong em long go na makim Jehu, em kepten bilong ami, long kamap nupela king bilong Israel. Wokboi i kapsaitim wel long het bilong Jehu na bihain em i tokim Jehu: “God, Bikpela bilong yumi Israel, i tok olsem, ‘Nau mi makim yu long kamap king bilong Israel. Na bai yu bosim ol dispela manmeri bilong mi. Na yu mas kilim i dai ol lain bilong Ahap, dispela king bipo yu stap ofisa bilong en. Long dispela pasin bai mi bekim stret pasin nogut bilong Kwin Jesebel. Em dispela meri bipo i bin kilim ol profet bilong mi na ol arapela wokman bilong mi. Bai mi bagarapim olgeta lain famili bilong Ahap.’ ” Ol bai tromoi dispela meri nogut, Kwin Jesebel, i go long ol dok, na ol man i no ken planim em gut long matmat.​—⁠2 King 9:​1-​10.

9, 10. Samting i painim Jesebel, olsem wanem dispela i truim tok bilong Elaija?

⁹ Ol ofisa bilong Jehu i luksave olsem Jehova i bin makim em tru long kamap king, olsem na ol i tokaut olsem em i nupela king bilong Israel. Orait Jehu i tingim pinis samting em i mas mekim: Em i spit i go long taun Jesril bilong kirapim wok bilong em long kilim i dai ol man i bin givim baksait long Jehova na ol i pulim ol narapela long lotuim Bal. Namba wan man bilong kisim bagarap long spia bilong Jehu em pikinini bilong Ahap, King Joram. Em i kisim karis i go ausait long taun bilong askim Jehu olsem olgeta samting i stap orait o nogat. Jehu i bekim tok olsem: “Bai i orait olsem wanem, sapos mama bilong yu Jesebel, i wok yet long bihainim ol giaman god na i mekim ol pasin nogut na ol pasin bilong mekim posin. Ol dispela pasin nogut bilong mama bilong yu i wok long kamap bikpela moa.” Orait nau Jehu i taitim banara na spia bilong en i kisim lewa bilong Joram.​—⁠2 King 9:​22-​24.

¹⁰ Ol meri i stap aninit long God ol i no save bihainim pasin bilong Jesebel o ol narapela meri i kain olsem em. (KTH 2:​18-​23) Taim Jehu i kamap pinis long Jesril, Jesebel i bin wok long bilasim gut skin bilong em. Em i sanap long windo na lukluk i go daun long Jehu na i givim gude long em long pasin olsem tok bilas. Jehu i singaut long ol wokboi bilong Jesebel olsem: “Husat i laik kam long lain bilong mi?” Orait kwiktaim tupela o 3-pela ofisa long haus king ol i lukluk i go daun. Ating ol i laik kam long lain bilong Jehu o nogat? Jehu i tokim ol: “Tromoi dispela meri i kam daun.” Orait kwiktaim ol i kisim meri nogut Jesebel na tromoi em i go daun. Na lek bilong ol hos i krungutim bodi bilong em. Taim ol man i kam bilong planim em, “ol i no lukim bodi bilong en i stap. Nogat. Ol i lukim tasol bun bilong het na han na lek.” Em nau, samting i kamap stret olsem Elaija i bin tok: “Taim Jesebel i dai, ol dok bai i kaikai bodi bilong en.”​—⁠2 King 9:​30-​37.

Givim Bel Long Helpim Lotu i Tru

11. Jonadap em i husat? Olsem wanem em i kamapim klia olsem em i laik helpim lotu i tru?

¹¹ Ol manmeri i laik abrusim bagarap long De bilong Jehova na i stap oltaim long graun, ol i mas givim bel long helpim lotu i tru. Ol i mas bihainim pasin bilong Jonadap, em i no bilong lain Israel tasol em i save lotuim Jehova. Taim Jehu i wok strong yet long mekim ol wok God i bin givim long em, Jonadap i laik soim Jehu olsem em i orait long wok Jehu i mekim na em i laik helpim em. Olsem na em i go bilong bungim nupela king bilong Israel, em i raun long karis na i laik i go long Samaria bilong kilim i dai ol narapela long lain bilong Ahap. Orait Jehu i lukim Jonadap na i askim em: “Yu amamas long ol samting mi mekim o nogat?” Jonadap i bekim tok olsem: “Yes, mi wanbel wantaim yu.” Em nau, Jehu i kisim han bilong Jonadap na pulim em i kam antap long karis bilong em na em i tok: “Yu kam wantaim mi na bai yu save, mi strong long bihainim Bikpela tasol.” Jonadap i no wet​—⁠kwiktaim em i tok orait long kisim dispela wok bilong soim olsem em i laik helpim dispela man Jehova i bin makim bilong bagarapim lain bilong Ahap.​—⁠2 King 10:​15-​17.

12. Bilong wanem Jehova i strong long ol man i mas lotuim em wanpela tasol na i stret ol i mas mekim olsem?

¹² I stret yumi mas givim bel long helpim lotu i tru, long wanem, Jehova em i Man bilong wokim olgeta samting na em i King bilong heven na graun, na em i strong long yumi mas lotuim em wanpela tasol, na i stret yumi mas mekim olsem. Em i bin tokim ol Israel: “Yupela i no ken wokim wanpela giaman god, na yupela i no ken wokim piksa bilong wanpela samting i stap long heven o i stap long graun o insait long wara i stap aninit long graun. Yupela i no ken brukim skru long wanpela giaman god o piksa na lotuim em, long wanem, mi Bikpela, mi God bilong yupela, na mi no inap larim wanpela giaman god i senisim mi.” (Kisim Bek 20:​4, 5) Ol manmeri i laik abrusim bagarap long De bilong Jehova ol i mas lotuim em wanpela tasol, na ol i mas mekim long ‘spirit na long pasin i tru.’ (Jon 4:​23, 24) Ol i mas strong long sambai long lotu i tru, olsem Elaija na Elisa na Jonadap.

13. Jonadap i wanbel wantaim Jehu, na olsem tasol husat ol i bilip long King Mesaia? Ol i kamapim klia olsem wanem?

¹³ Taim King Jehu i bagarapim pinis lain bilong Ahap, em i mekim sampela samting moa bilong kamapim long ples klia ol narapela man bilong lotuim Bal na pinisim dispela lotu giaman long Israel. (2 King 10:​18-​28) Long nau, King Krais Jisas long heven i kisim wok bilong bagarapim ol birua bilong Jehova na kamapim long ples klia olsem Jehova i Nambawan Bos bilong heven na graun. Bipo Jonadap i wanbel wantaim Jehu, na olsem tasol dispela bikpela lain manmeri bilong “ol arapela sipsip” bilong Krais Jisas long nau ol i givim bel long tokaut olsem Krais em i King Mesaia na ol i wok gut wantaim ol brata bilong em i stap long graun. (KTH 7:​9, 10; Jon 10:16) Ol i kamapim klia dispela samting taim ol i bihainim lotu i tru na ol i strong long mekim wok Kristen bilong autim tok, na ol i toksave long ol birua bilong God long dispela De bilong Jehova klostu nau bai kamap.​—⁠Matyu 10:​32, 33; Rom 10:​9, 10.

Ol Bikpela Samting Klostu Bai Kamap!

14. Wanem samting bai painim ol lotu giaman?

¹⁴ Jehu i bin mekim ol samting bilong pinisim lotu bilong Bal long Israel. Orait long taim bilong yumi, long rot bilong Man Jehu i makim, em Krais Jisas, God bai bagarapim Bikpela Babilon, em olgeta lotu giaman. Liklik taim bai yumi lukim truim bilong tok ensel i bin givim long aposel Jon, em i tok: “Ol dispela 10-pela kom yu bin lukim, ol dispela kom wantaim dispela wel animal ol bai i birua long pamukmeri [em Bikpela Babilon]. Ol bai i bagarapim em tru na rausim olgeta klos samting bilong en. Na ol bai i kaikai mit bilong bodi bilong en, na kukim em olgeta long paia. God yet i givim tingting long ol dispela king, bai ol i ken mekim ol dispela samting i kamap, em ol samting bipo God i tok pinis long ol i mas kamap. Ol bai i gat wanpela tingting tasol, na dispela strong ol i kisim bilong i stap king, ol bai i givim dispela olgeta long wel animal. Ol bai i mekim olsem i go inap long taim God inapim pinis olgeta samting em i bin tok long en.” (KTH 17:​16, 17; 18:​2-5) Dispela “10-pela kom” i makim ami bilong ol bikman bilong politik i bosim graun. Tru, nau ol i prenim Bikpela Babilon na mekim pasin pamuk bilong spirit wantaim em, tasol taim bilong em i sot pinis. Ol lain politik bilong graun bai bagarapim olgeta lotu giaman, na dispela “wel animal”​—⁠em Yunaitet Nesen​—⁠em bai i gat bikpela wok wantaim “10-pela kom” long bagarapim em.b Em bikpela taim tru bilong litimapim nem bilong Jehova!​—⁠KTH 19:​1-6.

15. Taim ol bikman bilong politik i laik bagarapim oganaisesen bilong God long graun, wanem samting bai kamap?

¹⁵ Taim King Jehu i bagarapim pinis ol lain bilong lotuim Bal, nau ol king i kamap long lain bilong em ol i mekim pait long ol lain politik ol i birua long Israel. King Krais Jisas bai mekim wankain wok. Taim olgeta lotu giaman olsem lotu bilong Bal i bagarap pinis, ol bikman bilong politik bai stap yet. Satan bai pulim ol dispela birua bilong wok king bilong Jehova na ol bai i kam pait long oganaisesen bilong God long graun bambai ol i ken bagarapim olgeta. (Esekiel 38:​14-​16) Tasol Jehova bai tok na King Krais Jisas bai kirap bagarapim ol long Armagedon, em “pait long dispela bikpela de bilong God I Gat Olgeta Strong,” na em bai inapim tru wok bilong kamapim long ples klia olsem Jehova i Nambawan Bos bilong heven na graun.​—⁠KTH 16:​14, 16; 19:​11-​21; Esekiel 38:​18-​23.

Strong Long Mekim Wok Olsem Elisa

16, 17. (a) Olsem wanem yumi save, Elisa i strong long mekim wok bilong em i go inap long taim em i dai? (b) Yumi mas mekim wanem long ol spia bilong tok i tru?

¹⁶ Orait, i go inap long taim dispela De bilong Jehova i pinisim olgeta pasin nogut Satan i bin kamapim long graun, ol wokboi bilong God bai i gat strongpela bel na ol bai strong long mekim wok bilong God olsem Elisa. Em i bin i stap wokboi bilong Elaija, tasol bihain em i stap wanpis na mekim wok olsem profet bilong Jehova inap 50 yia samting. Na Elisa i strong long mekim wok bilong God i go inap long taim em i dai. Klostu long taim em i dai, tumbuna pikinini bilong Jehu, em King Jehoas, i go lukim em. Elisa i tokim em long sanap long windo na taitim banara na sutim spia i go ausait. Spia i sut i go stret long mak, na Elisa i singaut: “Dispela spia, em spia bilong Bikpela, bilong winim ol Siria. Olsem na taim yu pait long ol Siria long taun Afek, bai yu pinisim ol tru.” Orait Elisa i tok na nau Jehoas i paitim graun long ol spia bilong em. Tasol em i mekim inap 3-pela taim tasol, na em i no strong long mekim. Orait Elisa i tok, dispela pasin bilong Jehoas i mekim na em bai winim ol Siria inap 3-pela taim tasol. Bihain dispela samting i kamap tru olsem Elisa i bin tok. (2 King 13:​14-​19, 25) Taim King Jehoas i pait na daunim ol Siria, em i no “pinisim ol tru.”

¹⁷ Tasol liklik hap lain God i bin makim na ol i stap yet long graun, ol i strong olsem Elisa na ol i wok yet long mekim pait long ol lotu giaman. Ol poroman bilong ol i gat tingting long i stap oltaim long graun, ol tu i mekim olsem. Na tu, olgeta manmeri i laik abrusim bagarap long De bilong Jehova ol i mas tingim gut tok bilong Elisa long paitim graun. Yumi mas kisim ol spia bilong tok i tru, na yumi mas strong long paitim graun long ol dispela spia, na mekim mekim i go​—⁠yes, yumi mas mekim i go inap long taim Jehova i tok dispela wok bilong yumi long ol spia i pinis.

¹⁸ Klostu nau na De bilong Jehova bai pinisim dispela pasin nogut i stap long graun. Olsem na yumi mas larim tok bilong aposel Pita i kirapim yumi long wok strong. Pita i tok: “Sapos dispela olgeta samting bai i pinis long dispela kain pasin, orait yupela i ting yupela i mas bihainim wanem kain pasin? Yupela i mas givim laip bilong yupela long God na wokabaut long pasin holi na bihainim olgeta pasin bilong God. Long dispela pasin yupela i mas wetim De bilong God i kamap, na yupela i mas wok strong long hariapim [olsem tingim gut] dispela De.” (2 Pita 3:​11, 12) Taim olgeta hap bilong dispela pasin bilong nau i pinis olgeta long paia bilong belhat bilong God em bai kamapim long rot bilong Krais Jisas, ol manmeri i bin bihainim stretpela pasin na givim bel long God, ol tasol bai abrusim bagarap. Ol i mas i stap klin olgeta long pasin bilong ol na long ol samting bilong spirit. Na tu, ol i mas laikim tru ol narapela man, olsem helpim ol long ol samting ol i sot long en, na ol i mas helpim ol moa yet long ol samting bilong spirit, long rot bilong dispela wok Kristen bilong yumi long autim tok.

19. Yumi mas mekim wanem bilong abrusim bagarap long De bilong Jehova?

¹⁹ Olsem wanem? Ol tok na wok bilong yu i makim olsem yu wanpela wokman bilong God i save strong long mekim wok bilong em na yu stap gut long dispela wok? Sapos olsem, orait yu inap tingting long abrusim bagarap long De bilong Jehova na go insait long nupela taim God i tok promis long kamapim. Yes, ating bai yu abrusim bagarap na i stap laip sapos yu mekim gutpela pasin long ol brata bilong Krais, long wanem ol i disaipel bilong em, olsem tupela marit bilong ples Sunem i bin singautim Elisa i kam long haus bilong ol na ol i lukautim em. Na bilong abrusim bagarap yu mas mekim pasin olsem bilong Naman, em i bin mekim pasin daun na bihainim ol tok bilong God na em i kamap man bilong lotuim Jehova. Sapos yu gat laik tru long i stap oltaim long Paradais long graun, yu mas mekim ol samting i soim olsem yu givim bel long helpim lotu i tru, olsem Jonadap i bin mekim. Sapos yu mekim olsem, orait yu inap insait long lain wokboi bilong Jehova ol i stap gut long em na klostu nau truim bilong tok bilong Jisas bai painim ol, em i tok: “Yupela i gat blesing bilong Papa bilong mi. Em i laik mekim gut long yupela. Yupela kam kisim kingdom Papa i bin redim na makim bilong yupela pinis, long taim graun i kamap nupela yet.”​—⁠Matyu 25:⁠34.

[Ol Futnot]

Bai Yu Bekim Olsem Wanem?

◻ Wanem sampela pasin yumi mas bihainim bambai yumi ken abrusim bagarap long De bilong Jehova?

◻ Tupela marit bilong Sunem long taim bilong Elisa ol i mekim wanem na ol i stap olsem gutpela piksa?

◻ Stori bilong Naman inap skulim yumi long wanem samting?

◻ Olsem wanem yumi inap bihainim pasin bilong Jonadap?

◻ Tok bilong 2 Pita 3:​11, 12 i mas mekim wanem long yumi?

 4. Yumi mas strong long mekim wok bilong Jehova o olsem wanem?

18. Tok bilong 2 Pita 3:​11, 12 i mas kirapim yumi long mekim wanem?