Yumi Mas Bilip Long Ol Tok Promis Bilong God

“[God Jehova] i givim yumi olgeta samting i nambawan tru na i bikpela moa yet, em ol samting bipo em i bin promis long givim long yumi.”​—⁠2 PITA 1:⁠4.

JEHOVA i laik bai yumi bilipim ol tok promis bilong em, tasol “planti man ol i no bilip.” (2 Tesalonaika 3:⁠2) Bilip em i samting spirit holi bilong God i save kamapim. (Galesia 5:​22, 23) Olsem na ol man em spirit bilong Jehova i stap wantaim ol, ol tasol i gat bilip.

² Pol i tok, bilip i olsem: “Samting God i promis pinis . . . na yumi wet long kisim, em bai yumi kisim tru. Maski ai bilong yumi i no lukim ol dispela samting, yumi save gut tru olsem, dispela olgeta samting i stap.” Sapos man i gat dispela kain strongpela bilip, em i ken save tru olsem God Jehova bai truim ol tok promis em i bin mekim. Long tingting bilong dispela man, i olsem ol dispela tok promis i kamap pinis na em i lukim.​—⁠Hibru 11:⁠1.

Bilip na Promis Bilong Jehova

³ Jehova i save amamas long man i bilipim tok promis bilong em. Pita i bin kamapim dispela samting long pas em i bin raitim long yia 64. Em i tokim ol narapela Kristen em God i bin makim ol long spirit holi, sapos ol tu i ting ol tok promis bilong God “i nambawan tru na i bikpela moa yet,” ol bai kisim ol dispela samting bilong tok promis na ol bai i stap king wantaim Krais long Kingdom bilong heven. Ol i bin bilip olsem, na God Jehova i bin helpim ol tu, olsem na ol i no pas moa wantaim ol man bilong graun o long ol pasin nogut bilong ol. (2 Pita 1:​2-4) Na ol man bilong nau tu, sapos ol i gat wankain trupela bilip, ol tu i ken i stap fri olsem.

⁴ Yumi bilipim ol tok promis bilong God, na yumi amamas long God i bin helpim yumi long kamap fri, na dispela i mas kirapim yumi long i stap gutpela Kristen. Pita i tok: “Wok strong tru long mekim gutpela pasin, na . . . kisim save long God, na . . . bosim gut laik bilong bodi . . . na . . . sanap strong na karim hevi, na . . . wokabaut long pasin bilong God, na . . . stap pren tru bilong ol arapela manmeri bilong God, na . . . givim bel bilong yupela long ol arapela.” (2 Pita 1:​5-7) Em wanpela lista Pita i kolim na yumi mas tingim gut. Orait, na yumi ken stori long ol wan wan bilong ol dispela pasin em Pita i kolim.

Bungim Dispela Wantaim Bilip

⁵ Pita i kolim ol samting yumi mas putim wantaim bilip bilong yumi, olsem gutpela pasin, na kisim stretpela save, na bosim laik bilong bodi, na karim hevi, na bihainim pasin bilong God, na stap pren bilong ol brata sista, na laikim tru ol. Mekim gutpela pasin, em dispela samting i hap bilong bilip bilong yumi. W. E. Vine i stori long dispela “gutpela pasin” olsem i stap long 2 Pita 1:5 na em i tok, em i wanpela bikpela samting bilong bilip. Pita i kolim ol narapela pasin yumi mas kamapim insait long bilip bilong yumi tu.

⁶ Yumi mas putim gutpela pasin wantaim bilip bilong yumi. Sapos yumi mekim ol samting i stret long ai bilong God, dispela i olsem gutpela pasin. Sapos yumi bihainim gutpela pasin, bai yumi abrusim ol pasin i no stret o pasin i save mekim nogut long narapela man. (Song 97:10) Na bai yumi strong long mekim ol gutpela pasin i save helpim ol narapela man long ol samting bilong spirit na bilong skin na bilong tingting.

⁷ Bilong wanem Pita i tok, kisim save long God em i samting bilong bilip? Em i tok olsem, long wanem, ol nupela kain traim na hevi i save painim yumi na i traim bilip bilong yumi, olsem na yumi mas kisim stretpela save bilong God na bai yumi inap save, wanem samting i stret na wanem samting i no stret. (Hibru 5:14) Sapos yumi stadi long tok bilong Baibel, na nau yumi bihainim ol dispela tok, na yumi bihainim gutpela tingting long olgeta samting yumi mekim, dispela bai wok long givim save long yumi, na em bai helpim yumi long holimpas bilip na long bihainim gutpela pasin long taim bilong traim.​—⁠Sindaun 2:​6-8; Jems 1:​5-8.

⁸ Na yumi mas kisim pasin bilong bosim gut laik bilong bodi na putim wantaim stretpela save, na bai yumi ken sanap strong long bilip. Dispela pasin em i samting spirit bilong God i save kamapim, na em i helpim yumi long bosim tingting na toktok na pasin bilong yumi na yumi ken sanap strong na karim hevi, olsem strongim bel na no ken les, na no ken larim ol hevi i daunim yumi, na no ken ranawe long samting i gat hatwok long en. Jisas i bin tingim gutpela amamas em bai kisim, na dispela tingting i bin helpim em long sanap strong na karim hevi na pen long diwai. (Hibru 12:⁠2) God i ken strongim yumi long karim hevi, na dispela bai strongim bilip bilong yumi tu na bai yumi ken i stap amamas yet na sakim ol traim, na taim ol man i mekim nogut long yumi, yumi no pundaun.​—⁠Filipai 4:⁠13.

⁹ Na yumi mas mekim narapela samting moa na putim wantaim pasin bilong sanap strong, em wokabaut long pasin bilong God, olsem givim biknem long em, na lotu long em, na mekim wok bilong em. Na yumi save long pasin Jehova i mekim bilong helpim lain bilong em, na dispela bai strongim bilip bilong yumi na yumi givim bel moa yet long Jehova. Tasol bilong mekim olsem, yumi mas i stap pren tru bilong ol arapela manmeri bilong God, long wanem, “sapos wanpela man . . . i no laikim . . . ol arapela manmeri bilong God, orait dispela man em i man bilong giaman. . . . Man i no save laikim ol arapela . . . em i lukim pinis, em i no inap laikim God em i no bin lukim.” (1 Jon 4:20) Yumi mas laikim tru ol narapela bilong lain bilong Jehova na wok long helpim ol. (Jems 2:​14-17) Na yumi mas givim bel long ol narapela man tu, olsem mekim pasin sori long ol, na i no ol brata tasol, long wanem, dispela bai kirapim yumi long autim gutnius long ol na helpim ol long ol samting bilong spirit.​—⁠Matyu 24:14; 28:​19, 20.

Tupela Kain Pasin

¹⁰ Gutpela pasin, na kisim save long God, na bosim laik bilong bodi, na karim hevi, na wokabaut long pasin bilong God, na stap pren bilong ol narapela, na givim bel long ol, sapos yumi bungim ol dispela pasin wantaim bilip bilong yumi, tingting na toktok na pasin bilong yumi bai i stret long ai bilong God. Tasol sapos man i tok em i Kristen, na em i no bihainim ol dispela samting, em i sot long spirit na lait bilong God na em i no tingim moa olsem God i bin lusim ol sin em i bin mekim bipo. (2 Pita 1:​8-10; 2:​20-22) Nogut yumi mekim olsem na yumi no bilip moa long ol tok promis bilong God.

¹¹ Ol Kristen God i bin makim ol long spirit holi, ol i bilipim ol tok promis bilong Jehova na ol i wok strong na bai em i ken orait long ol. Sapos samting i laik traim ol, yumi ken save ol bai sanap strong na bihainim ol dispela pasin yumi kolim pinis. Ol Kristen bilong dispela lain, sapos ol i stap strong long bilip, bai ol inap kirap bek long i dai na go sindaun wantaim Krais long Kingdom bilong em long heven.​—⁠2 Pita 1:⁠11.

¹² Pita i save liklik taim em bai i dai, na em i bilip olsem em bai kirap bek bihain na i go i stap long heven, tasol em i ting, taim em i stap yet long graun em i mas strongim bilip bilong ol Kristen na kirapim ol long mekim ol samting God i laikim. Olsem na taim em i dai pinis ol dispela brata sista bilong em ol inap tingim yet ol tok bilong em na dispela bai strongim bilip bilong ol.​—⁠2 Pita 1:​12-15.

Bilip Long Ol Tok Promis

¹³ God i bin mekim sampela samting bilong strongim dispela bilip olsem Jisas bai “kam wantaim bikpela strong.” (2 Pita 1:​16-18) Ol pris haiden i giaman na kolim ol gutpela samting bilong ol god bilong ol, tasol Pita na Jems na Jon i lukim tru ol gutpela samting bilong Jisas long taim skin bilong em “i senis na i kamap narakain.” (Matyu 17:​1-5) Ol i lukim lait God i bin salim long em, na ol i harim God i tok, Jisas em i gutpela Pikinini bilong em. Dispela lait wantaim tok bilong God i givim bikpela namba na nem long Jisas. Ating dispela samting i bin kamap long wanpela kil bilong Maunten Hermon, na Pita i kolim “dispela maunten God i bin i stap long en.”​—⁠Lukim Kisim Bek 3:​4, 5.

¹⁴ Taim yumi harim stori long Jisas i kamap narapela kain, dispela i mas strongim bilip bilong yumi. Pita i tok: “Mipela i save bilip strong moa long tok bilong ol profet. . . . Em i olsem lam i lait i stap long ples tudak, i go inap long tulait i kamap na sta bilong moningtaim em i kirap insait long bel bilong yupela.” (2 Pita 1:19) “Tok bilong ol profet” em ol tok profet insait long Olpela Testamen wantaim tok bilong Jisas long em bai “i kam wantaim bikpela strong na bikpela lait.” Taim ol i lukim Jisas i kamap narapela kain, dispela i helpim ol long “bilip strong moa” long Krais Jisas bai kam wantaim strong bilong Kingdom.

¹⁵ Bilong strongim bilip bilong yumi, yumi mas tingim gut ol dispela tok profet, olsem na yumi mas stadi long en, na toktok long en long ol miting, na bihainim ol samting yumi save lainim. (Jems 1:​22-27) Ol dispela tok i mas i stap olsem “lam i lait i stap long ples tudak” na bai ol samting i kamap ples klia long bel bilong yumi. (Efesus 1:18) Dispela bai helpim yumi long i stap strong i go inap long taim “sta bilong moningtaim,” em Krais Jisas, em i kamap ples klia wantaim bikpela strong. (KTH 22:16) Na long dispela taim ol man i no bilip ol bai bagarap, na ol man i bilip ol bai kisim gutpela samting.​—⁠2 Tesalonaika 1:​6-10.

¹⁶ Ol tok profet i no kamap long tingting bilong ol profet yet, nogat. Pita i tok: “I no gat wanpela tok profet i bin kamap long laik bilong man i autim. Nogat. Holi Spirit yet i kirapim ol man na ol i autim tok God i givim long ol.” (2 Pita 1:​20, 21) Devit i bin tok: “Spirit bilong Bikpela i autim tok long maus bilong mi.” (2 Samuel 23:​1, 2) Na Pol i tok: “Spirit bilong God yet i bin kamapim olgeta tok i stap long buk bilong God [em Baibel].” (2 Timoti 3:16) Spirit bilong God i bin kirapim ol profet long autim tok, olsem na yumi ken bilip tru long God bai truim ol tok promis em i bin mekim.

Ol i Bilipim Promis Bilong God

¹⁷ Ol tok promis bilong God i as bilong bilip bilong “ol dispela manmeri bilong bipo ol i . . . olsem bikpela klaut, na ol i soim yumi pasin bilong bilip.” (Hibru 11:​1–12:1) Abel i bilipim tok promis bilong God long ‘pikinini’ bilong wanpela ‘meri’ bai i krungutim het bilong “snek.” Abel i lukim God i wok long truim tok bilong em long givim strafe long papamama bilong em, olsem God i rausim papamama long Iden, na tupela wantaim famili bilong ol i mas hatwok long kamapim kaikai long graun i gat gras nogut i gat nil, na mama i “gat bikpela laik yet long” papa, na papa “em i bosim” mama, na mama i kisim pen taim em i karim pikinini. Na ol ensel i sanap na pasim rot i go long Iden na bai man i no ken go insait. (Stat 3:​14-19, 24) Abel i lukim ol dispela samting, na em i bilip olsem God bai i kisim bek ol man long rot bilong dispela Pikinini em God i tok promis long salim i kam, na dispela bilip i kirapim Abel long mekim ofa i winim ofa bilong Kein.​—⁠Hibru 11:​1, 4.

¹⁸ Abraham na Aisak na Jekop tu i bilip long ol tok promis bilong God. God i bin tok promis olsem: Long rot bilong Abraham em God bai mekim gut long ol man bilong graun, na lain pikinini bilong Abraham bai kisim wanpela graun. Abraham i bilipim dispela tok promis. (Stat 12:​1-9; 15:​18-21) Abraham “wantaim Aisak na Jekop, em olgeta” i insait long dispela “promis long givim dispela graun long ol.” Abraham “i bilip na i go sindaun long dispela graun bipo God i tok long givim em,” na em i “wet long lukim dispela taun i stap strong,” em Kingdom bilong heven, taim em i kirap bek long matmat na em i stap aninit long en hia long graun. (Hibru 11:​8-10) Yu yet yu gat strongpela bilip olsem?

¹⁹ Sara i gat olsem 90 krismas, na i no inap lapun meri olsem i ken karim pikinini, tasol Sara i bilip long tok promis bilong God na God inapim em long karim pikinini, em Aisak, na em i save, “God i tok tru tasol.” Na Abraham i gat 100 krismas na em i “lapun pinis na klostu em i laik i dai,” tasol em i mekim na Sara “i kisim strong inap long karim pikinini,” na bihain lain tumbuna pikinini bilong ol “i kamap planti moa yet, olsem ol sta bilong skai.”​—⁠Hibru 11:​11, 12; Stat 17:​15-17; 18:11; 21:​1-7.

²⁰ Ol dispela bilipman i dai na ol i no lukim olgeta truim bilong ol tok promis, tasol “taim ol i stap” yet ol i “lukluk i go long ol dispela samting i stap longwe” yet na “ol i amamas long lukim,” na ol i ting ol “i stap long dispela graun olsem ol manmeri bilong narapela kantri.” God i no givim kwik Graun Bilong Promis long ol tumbuna pikinini bilong Abraham. Ol i mas wet inap sampela handet yia pastaim. Tasol ol dispela bilipman i no lusim bilip long tok promis bilong Jehova, olsem na liklik taim ol bai kirap bek na i stap oltaim aninit long dispela “taun,” em Kingdom. (Hibru 11:​13-16) Na yumi tu, sapos yumi bilip olsem, dispela bai helpim yumi long i stap gut long Jehova, maski truim bilong ol tok promis i no kamap hariap. Bilip bai kirapim yumi long bihainim tok bilong Jehova olsem Abraham i bin mekim. Na bilip bilong em i bin helpim ol tumbuna pikinini bilong em, na olsem tasol yumi ken helpim ol pikinini bilong yumi long bilip tru long ol tok promis bilong Jehova.​—⁠Hibru 11:​17-21.

Kristen i Mas Bilip Strong

²¹ Sapos yumi bilip long ol tok promis bilong Jehova, em gutpela, tasol yumi mas mekim sampela samting moa na bai God i ken orait long yumi. Pol i tok: “Man i no bilip long God, em i no inap bihainim laik bilong God. Long wanem, man i laik i go klostu long God, em i mas bilip olsem God i stap, na . . . God i save mekim gut tru long ol man i wok long painim em.” (Hibru 11:⁠6) Yumi mas bilip long Jisas na long ofa God i bin givim long yumi long rot bilong Jisas, na nau God i ken orait long yumi. (Rom 5:8; Galesia 2:​15, 16) Jisas i tok: “God i laikim tumas olgeta manmeri . . . , olsem na em i givim dispela wanpela Pikinini long ol . . . bilong olgeta manmeri i bilip long em ol i no ken lus. Nogat. Bai ol i kisim laip i stap oltaim oltaim. Man i no bihainim tok bilong Pikinini, em bai i no inap kisim laip. Nogat. Belhat bilong God i stap long em.”​—⁠Jon 3:​16, 36.

²² Jisas i gat bikpela wok tru insait long dispela Kingdom bilong truim ol tok promis bilong God. (Aisaia 9:​6, 7; Daniel 7:​13, 14; Matyu 6:​9, 10) Taim Jisas i bin kamap narapela kain, dispela i strongim ol tok profet long em bai kam wantaim bikpela strong bilong Kingdom. Kingdom bai truim narapela tok promis God i bin mekim, olsem: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.” (2 Pita 3:13) Truim bilong kain tok profet olsem i bin kamap long taim ol Juda i lusim Babilon na i go bek long graun bilong ol yet long yia 537 paslain long Krais na Serubabel i stap gavman na Josua i stap hetpris. (Aisaia 65:17) Tasol Pita i tok, bihain bai i gat “nupela skai,” em Kingdom bilong heven, na em bai bosim “nupela graun,” em ol stretpela man long graun.​—⁠Lukim Song 96:⁠1.

²³ Yumi ol wokman bilong Jehova na yumi stap gut long em, na yumi stap disaipel bilong Pikinini bilong em Krais Jisas, olsem na yumi laik tumas bai nupela taim God i tok promis long en bai kam. Yumi save em i klostu pinis, na olgeta gutpela tok promis God i bin mekim, em bai i truim. Bilong i stap gut long ai bilong Jehova, na bilong strongim bilip, yumi mas mekim gutpela pasin, na kisim save long God, na bosim laik bilong bodi, na karim hevi, na wokabaut long pasin bilong God, na stap pren tru bilong ol narapela manmeri bilong God, na givim bel long ol.a Orait, olsem wanem yumi ken mekim gutpela pasin? Olsem wanem dispela bai helpim yumi, na ol narapela, na ol Kristen em ol i bilip pinis long ol tok promis bilong God? Bihain bai yumi toktok long dispela samting.

[Ol Futnot]

Bai Yu Bekim Olsem Wanem?

◻ “Bilip” em wanem samting?

◻ 2 Pita 1:​5-7 i kolim wanem ol pasin yumi mas putim wantaim bilip?

◻ Taim skin bilong Jisas i kamap narapela kain, dispela i mas mekim wanem long bilip bilong yumi?

◻ Abel na Abraham na Sara na sampela bilipman moa bilong bipo, ol i bin mekim wanem?

[Askim Bilong Stadi]

 1. Wanem samting i helpim yumi long bilip tru?

 2. Pol i tok wanem long “bilip”?

 3. Ol Kristen God i bin makim ol long spirit holi, sapos ol i stap gut long bilip, ol bai kisim wanem gutpela samting?

 4. Wanem ol gutpela pasin yumi mas putim wantaim bilip bilong yumi?

5, 6. Olsem wanem long mekim gutpela pasin? Olsem wanem yumi ken putim gutpela pasin wantaim bilip bilong yumi?

 7. Bilong wanem yumi mas kisim save long God na putim wantaim gutpela pasin na bilip bilong yumi?

 8. Olsem wanem long pasin bilong bosim gut laik bilong bodi? Olsem wanem pasin bilong bosim laik bilong bodi em i poromanim pasin bilong sanap strong na karim hevi?

 9. (a) Olsem wanem yumi ken wokabaut long pasin bilong God? (b) Pasin bilong i stap pren tru bilong ol brata, bilong wanem yumi mas bungim wantaim dispela narapela pasin, olsem bihainim pasin bilong God? (c) Bilong wanem yumi mas givim bel long ol narapela?

10. (a) Gutpela pasin, na kisim save long God, na bosim laik bilong bodi, na karim hevi, na wokabaut long pasin bilong God, na stap pren tru bilong ol brata, na givim bel long ol, sapos yumi bungim dispela wantaim bilip bilong yumi, bai yumi stap olsem wanem long ai bilong God? (b) Tasol olsem wanem sapos man i tok em i Kristen, na em i no mekim ol dispela pasin?

11. Yumi ken ting, lain bilong i go long heven em ol i stap gut long God, ol bai mekim wanem?

12. Pita i gat wanem tingting olsem 2 Pita 1:​12-15 i tok?

13. God i bin mekim wanem bilong strongim bilip bilong ol disaipel long Krais bai kam?

14. Jisas i bin kamap narapela kain, na dispela i mas mekim wanem long bilip bilong yumi?

15. Bilong tingim ol dispela tok profet, yumi mas mekim wanem?

16. Olsem wanem yumi ken bilip olsem God bai truim olgeta tok promis bilong em long Baibel?

17. Olsem wanem Abel i bilip long God bai truim ol tok promis bilong em?

18, 19. Abraham na Sara i mekim wanem bilong kamapim bilip bilong ol?

20. Truim bilong ol tok promis i no bin kamap long taim bilong ol dispela bilipman bilong bipo, tasol ol i bin mekim wanem?

21. Yumi mas mekim wanem samting moa na bai God i ken orait long yumi?

22. Kingdom bai truim wanem tok promis?

23. Bihain bai yumi toktok long wanem samting?

[Piksa long pes 15]

Taim skin bilong Jisas i kamap narapela kain, dispela inap mekim wanem long bilip bilong man?