Armagedon Bai Kamap Long Wanem Taim?
“YUMI kamap pinis long Armagedon na yumi mekim pait bilong helpim Bikpela.” Em tok bilong Theodore Roosevelt bipo em i stap presiden bilong Amerika. Em i kolim dispela tok “Armagedon” bilong makim wanpela pait politik em yet i insait long en. Olsem na yu ting Armagedon em i wanpela pait ol lain politik bai kamapim?
Sampela yia i go pinis, na wanpela nius bilong Kanada (Business Life) i kolim dispela tok “Armagedon” bilong makim bikpela bagarap bilong mani. Nius i tok: “Ol kantri i no gat planti mani, sapos ol i no inap bekim dinau bilong ol, ating bai i gat bikpela bagarap bilong mani?” Tasol yu ting i stret yumi tingim Armagedon i olsem wanpela bikpela bagarap bilong mani?
Wanpela nius (Newsweek) i tok, long yia 1984 ol man i laik kamap presiden bilong Amerika ol i bin paitim tok i go i kam long pinis bilong graun. Long dispela taim ol i askim man i stap presiden, em Ronald Reagan, ‘Yu bilip tru olsem “Armagedon nuklia” i laik kamap long dispela graun?’ Reagan i tok, em i bin toktok wantaim sampela man long ol samting i wok long kamap long nau na ol mak Baibel i kolim bilong taim bilong las de, tasol bikman hia i tok strong olsem em i no bin tok, taim ol i tingim ol samting ol i laik mekim ol i mas tingim Armagedon bai kamap. Tasol taim yumi laik save long Armagedon, yu ting yumi mas tingim ol ami bai mekim pait nuklia na nau bai Armagedon i kamap?
Planti man bilong lotu i tok Armagedon em i wanpela pait. Tasol long yia 1800 samting Adam Clarke, em wanpela saveman bilong Baibel, em i tok, “Ol man i mekim ol tok nating long dispela samting! Insait long 20 yia i go pinis ol aipas saveman na ol man i kolim ol yet olsem profet, ol i bin makim kain kain pait na tok em olsem Armagedon. Ol i tok, pait i kamap long Austerlitz em dispela pait, na bihain gen ol i tok, pait i kamap long Moscow em dispela pait, na narapela taim ol i tok pait bilong Leipsic em dispela pait, na nau ol i tok pait bilong Waterloo em dispela pait! Ol i mekim olsem i go yet, na ol i longlong nabaut na ol i longlongim tingting bilong ol narapela man.”
Olsem na sapos yumi laik save long Armagedon, yumi mas save long bekim bilong sampela bikpela askim, olsem: Armagedon em i wanem samting? Sapos em i wanpela pait, orait husat bai insait long en? Bilong wanem em bai kamap? Em bai kamap long wanem hap? Na em bai kamap long wanem taim?
Armagedon Em i Wanem Samting?
Dispela tok “Armagedon” i kam long wanpela tok i stap long hap bilong Baibel ol i kolim Kamapim Tok Hait, em planti tok piksa i pulap long en. Long dispela hap aposel Jon i rait olsem, “Na mi lukim tripela spirit nogut olsem rokrok, ol i kamap long maus bilong dispela traipela snek na long maus bilong wel animal na long maus bilong giaman profet. Ol dispela spirit nogut tru i save wokim ol kain kain mirakel, na ol i go nabaut long ol king bilong olgeta kantri bilong graun. Ol i laik mekim ol king i bringim ol ami bilong ol i kam bung, bai ol i ken kirapim pait long dispela bikpela de bilong God I Gat Olgeta Strong. . . . Orait ol spirit nogut i bringim ol king i kam bung long dispela hap, long tok Hibru ol i kolim Armagedon.”—Kamapim Tok Hait 16:13-16.
Dispela tok Armagedon o Har-Magedon i kam long wanpela tok Grik i wankain long tok Hibru Har Meghid·dohnʹ. Insait bilong en i olsem “Maunten bilong Megido” o “Maunten bilong ol Bikpela Lain Ami i Bung long en.” Em i samting bilong pait bilong “bikpela de bilong God I Gat Olgeta Strong.” Olsem na Armagedon i no wanpela pait politik, o wanpela bikpela bagarap bilong mani, o wanpela bikpela pait nuklia, o wanpela pait bilong ol man bilong dispela graun. Nogat. Armagedon em i pait bilong God.
Husat Bai Insait long En?
Dispela “tripela spirit nogut olsem rokrok,” ol i kamap long maus bilong traipela snek (Satan), na wel animal (ol gavman politik bilong em long graun), na profet giaman, em gavman bilong Inglan na Amerika. Dispela i makim ol tok gris em ol spirit nogut o ensel nogut i kamapim bilong bungim ol king na hetman bilong graun i go long Armagedon.—Lukim sapta 32 long buk (tok Inglis) Revelation—Its Grand Climax At Hand! em Sosaiti Wastaua bilong Nu Yok i wokim.
Lain bilong Jehova em ol i insait long pait bilong Armagedon em ol bikpela lain ami bilong heven, em King Krais Jisas bai i go paslain long ol. Aposel Jon i tok: “Mi lukim heven i op, na wanpela waitpela hos i stap. Na nem bilong man i sindaun long dispela hos, em i olsem, ‘Man i lukautim gut wok bilong en,’ na ‘Man i save mekim pasin i tru tasol.’ Taim em [Jisas] i skelim pasin bilong ol manmeri long kot, na taim em i kirapim pait, em i save bihainim stretpela pasin tasol na mekim. . . . Ol ami bilong heven ol i sindaun long ol waitpela hos bilong ol, na ol i bihainim em i go. . . . Wanpela bainat i sap tumas, em i stap long maus bilong dispela man i go pas long ol, na dispela bainat i kam ausait. Na long dispela bainat em bai daunim ol manmeri bilong olgeta lain. Em bai i holim stik ain na bosim strong olgeta lain manmeri. Na em bai i krungutim ol pikinini wain long bikpela tang ston i makim bikpela belhat bilong God I Gat Olgeta Strong. Long longpela klos bilong en na long lek bilong en ol i bin raitim dispela nem, ‘King bilong olgeta king, na Bikpela bilong olgeta bikman.’ ” (Kamapim Tok Hait 19:11-16) Dispela longpela bainat i sap tumas i makim strong bilong Krais bilong givim tok orait long lain ensel bilong em long bagarapim olgeta manmeri i no laik mekim wok bilong Kingdom bilong God. (Kamapim Tok Hait 1:16; 2:16) Ol bikpela lain ami bilong heven i redi i stap bilong mekim pait long Armagedon.
Ol dispela lain bai pait wantaim Satan, na ol spirit nogut, na olgeta king bilong olgeta hap graun. Tasol yumi no ken ting olsem ol hetman bilong graun tasol bai insait long dispela pait. Nogat. Ol manmeri ol i bosim, ol tu bai insait long en. Olsem Baibel i tok, “Bikpela i belhat tru long olgeta kantri na long ol soldia bilong ol, na em i tok pinis bai olgeta bilong ol i mas dai.”—Aisaia 34:2.
Bilong Wanem Em Bai Kamap?
Armagedon bai kamap, long wanem, God i save mekim stretpela pasin tasol na em i no ken larim pasin nogut i stap oltaim. (Buk Song 11:7) Oganaisesen bilong Satan—olsem ol spirit nogut na ol bikhetlain bilong graun, em ol i as bilong ol hevi na pasin nogut i bin kamap inap planti tausen yia pinis—ol i mas bagarap. (Lukim Stat 3:15.) Jehova em King bilong heven na graun na dispela samting bai kamap ples klia long Armagedon, na dispela bai stretim bek nem bilong em, em ol manmeri i bin bagarapim inap planti handet yia pinis. God i tokaut long maus bilong profet Esekiel, olsem: “Ol samting mi laik mekim nau long ol manmeri bilong mi, ol Israel, ol bai i mekim ol arapela lain i save long gutpela nem bilong mi, na bai ol i no inap daunim biknem bilong mi moa. Na bai ol i save gut olsem, mi yet mi Bikpela, na mi stap wantaim ol Israel, na pasin bilong mi i gutpela na stretpela olgeta.”—Esekiel 39:7.
Pait bilong God, em Armagedon, bai mekim na bai bagarap i no ken painim olgeta manmeri. Jehova i bin wokim graun bilong ol man na ol narapela samting i gat laip ol i ken i stap long en, olsem na em i no ken larim wanpela pait nuklia o narapela samting i bagarapim dispela graun, na bai ol i no inap i stap moa long en. (Aisaia 45:18) Em bai “bagarapim ol man i bin bagarapim graun.” (Kamapim Tok Hait 11:18) Tasol wanpela man bilong raitim Buk Song i tok, “Bikpela i stap king. Em i bin strongim graun [Hibru, te·velʹ, olsem dispela graun i kamapim kaikai na i gat ol man samting i stap long en] na graun i stap gut na i no inap mekim nais. Bihain bai Bikpela i mekim kot na skelim stret olgeta man.”—Buk Song 96:10.
Ol samting God bai mekim long Armagedon bai i stret tru wantaim stretpela pasin bilong em, na gutpela save na tingting bilong em, na strong bilong em, na pasin sori bilong em. (Lo 32:4; Jop 12:13; Aisaia 40:26; 1 Jon 4:8) Em bai i bagarapim ol “man bilong mekim sin, ol i save givim baksait long God,” tasol em bai lukautim ol stretpela manmeri. (Jut 14, 15) “Ol manmeri i save mekim pasin nogut,” ol tasol bai bagarap. (Jeremaia 25:31) Dispela bai i opim rot bilong kamapim bek Paradais long graun, na dispela bai kamapim laik bilong God long dispela graun na long ol man.—Luk 23:43.
Em Bai Kamap long Wanem Hap?
Dispela tok “Armagedon” i kam long wanpela tok Hibru, insait bilong en i olsem “Maunten bilong Megido,” olsem na ating sampela i ting dispela pait bai i kamap long wanpela maunten i gat dispela nem. Tasol i no gat wanpela maunten ol i kolim Megido. Inap olsem 100 kilomita longwe long Jerusalem long bipo, long hap bilong notwes, i gat wanpela liklik maunten i stap na wanpela taun i stap long en ol i kolim Megido. Tasol dispela taun i bagarap pinis na nau long dispela hap i gat liklik hip graun tasol i stap em i go antap inap olsem 20 mita.—Josua 17:11.
Ol manmeri long dispela taun long bipo ol inap lukim “ples daun bilong Megido” i stap klostu. (2 Stori 35:22) I stret Baibel i bungim tok “Armagedon” wantaim dispela ples, long wanem em i ples bilong pait long bipo. Olsem: Long dispela hap, God i larim Hetman Barak i mekim save long wanpela king bilong Kenan, em Jabin wantaim ol lain ami bilong em, em Sisera i bosim. (Hetman 4:12-24; 5:19, 20) Na klostu long dispela ples, Gideon wantaim liklik lain bilong em ol i daunim ol Midia. (Hetman 7:1–8:35) Na long dispela hap ol i bin kilim i dai King Ahasia na King Josaia long pait.—2 King 9:27; 23:29, 30.
Tasol i gutpela sapos yumi tingim mak bilong dispela ples daun, em ol i kolim tu olsem ples daun bilong Esdrelon—longpela bilong en i olsem 32 kilomita na bikpela bilong en i olsem 29 kilomita long hap bilong is. Dispela liklik hap ples bai i no inap long ol king bilong olgeta hap graun na ol lain ami bilong ol i go bung long en. Na tu, wanpela hip graun (olsem long Megido long nau) o wanpela ples daun i no wanpela maunten. Olsem na Armagedon bai i no ken kamap long wanpela maunten long hap bilong Midel-Is. Nogat. Dispela tok “Armagedon” long Baibel em i tok piksa tasol na i makim wanpela samting i mas kamap long olgeta hap bilong graun. Tasol Megido bilong bipo na ol samting i bin kamap long dispela hap i makim gut sampela samting bilong Armagedon, olsem na Baibel i kolim dispela nem long dispela pait.
Armagedon Bai Kamap long Wanem Taim?
Taun Megido i bin stap long graun bilong lain bilong God long bipo, olsem na ol Witnes Bilong Jehova long nau i mas tingim ol samting bai i kamap long Armagedon “long taim bilong las de.” (Daniel 12:4) Armagedon i makim “ples” em ol lain hetman politik bilong graun bai bung long en na pait long Jehova na Kingdom bilong em i stap long han bilong Krais Jisas. (Kamapim Tok Hait 16:14, 16) Tasol dispela “ples” (tok Grik, toʹpos) i makim wanpela samting bai kamap long graun. Taim dispela samting i kamap na i painim ol Witnes Bilong Jehova, em nau bai Armagedon i kamap.
Ol Witnes Bilong Jehova i stap gutpela long ol samting bilong spirit, olsem na Satan i belhat nogut tru, na klostu nau bai em i kirapim pait long ol dispela Kristen i stap olsem long wanpela taun i no gat banis. Esekiel sapta 38 na 39 i stori long dispela samting Satan o Gok bai i mekim long lain bilong God em ol i bilong olgeta hap bilong graun na ol i man bilong bel isi. Satan bai stiaim olgeta lain bilong graun na bai ol i go mekim pait long ol dispela wokboi bilong Jehova long graun, em ol i autim gutpela tok bilong Kingdom bilong God.
Ol man i save tingim ples em pait i bin kamap long en na ol i tok em i pait bilong dispela ples. Olsem tasol, strongpela pait Jehova i mekim bilong lukautim ol manmeri bilong em, em yumi ken kolim olsem pait bilong Armagedon. Taim Gok i kirapim pait long lain bilong Jehova na Jehova i kirap lukautim na helpim ol, Armagedon bai i kamap! Ol gavman bilong graun bai i bagarap. Tait wara, na ren ais, na hatpela ston wantaim paia, na olkain sik—em God yet bai mekim i kamap—ol dispela samting bai i mekim na bai ol manmeri i no bilong lain Witnes Bilong Jehova ol i pret nogut tru. Ol dispela birua bilong ol Witnes bai pret nogut tru na bai ol i kirap na pait namel long ol yet. Na ol man i no i dai long dispela pait, em bai Jehova i bagarapim ol.—Esekiel 38:18-23; Daniel 2:44.
Ol man bai pret na longlong nabaut, na bai ol i holimpas ol lain i stap klostu long ol na kilim ol i dai bambai ol yet i ken i stap laip. Tasol ol tu bai bagarap. (Sekaraia 14:12, 13) “Na long dispela taim Bikpela [Jehova] bai i kilim i dai planti manmeri moa na bai bodi bilong ol i stap nabaut long olgeta hap bilong graun. Na bai i no gat man i stap bilong krai sori long ol na bilong bungim ol bodi bilong ol na planim ol.” (Jeremaia 25:33) Maski yu no helpim ol dispela lain long taim bilong pait bilong God, sapos yu no insait long lain bilong God bai yu bagarap long Armagedon! Na planti taim dispela nius i bin kamapim ol tok bilong Baibel i makim olsem ol manmeri bilong dispela taim i no dai yet, na Armagedon bai i kamap!—Matyu 24:21, 34.
Ol Samting Armagedon Bai Kamapim
Armagedon bai i rausim oganaisesen bilong Satan olgeta long graun. Na tu, Satan wantaim ol spirit nogut bai i kalabus long hul i no gat as. (Kamapim Tok Hait 20:1-3) Bai planti blesing i kam long lain bilong Jehova—ol manmeri i abrusim bagarap long bikpela pait bilong God long Armagedon ol bai amamas i stap! Ol bai amamas long mekim graun olgeta i kamap gutpela ples paradais. Bai i no gat pen, o bel hevi, o krai, na bai ol man i no i dai moa. (Kamapim Tok Hait 11:15, 18; 21:3, 4) Na yu inap i stap long dispela taim sapos yu bihainim tok bilong wanpela man bilong raitim Buk Song, em i tok: “Yu mas bilip long Bikpela na prea long em na bihainim pasin bilong em. Sapos yu mekim olsem, bai em i givim biknem long yu, na yu ken holim dispela graun em i givim yu. Na bai yu lukim em i bagarapim ol man nogut.” (Buk Song 37:34) Tru tumas, yu inap i stap na lukim pait bilong bikpela de bilong God I Gat Olgeta Strong na amamas long abrusim bagarap taim Armagedon i kamap!
“Sapos dispela olgeta samting bai i pinis long dispela kain pasin, orait yupela i ting yupela i mas bihainim wanem kain pasin? Yupela i mas givim laip bilong yupela long God na wokabaut long pasin holi na bihainim olgeta pasin bilong God. Long dispela pasin yupela i mas wetim De bilong God i kamap.”—2 Pita 3:11, 12
[Rait long pes 4]
Armagedon i no wanpela pait politik, o wanpela bikpela bagarap bilong mani, o wanpela pait nuklia, o pait bilong ol man. Nogat. Armagedon em i pait bilong God
[Rait long pes 5]
Pait bilong God, em Armagedon, bai mekim na bai olgeta man i no ken bagarap
[Rait long pes 6]
Sapos yu no insait long lain bilong God long taim bilong Armagedon, bai yu bagarap!