Ol Samting Kingdom Bilong God Bai Mekim
“Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”—MATYU 6:10.
1. Taim Kingdom bilong God i kam, em bai mekim wanem?
TAIM Jisas i skulim lain bilong em long beten long Kingdom bilong God i mas i kam, em i save, taim Kingdom i kam em bai pinisim wok bilong ol man long bosim graun, em ol i bin mekim inap planti tausen yia. Insait long ol dispela planti tausen yia, ol man i no mekim laik bilong God long graun. (Song 147:19, 20) Tasol taim Kingdom bilong God i kamap pinis long heven, ol man i mas mekim laik bilong God long olgeta hap bilong graun. Taim bilong Kingdom bilong God long senisim gavman bilong ol man, em i klostu pinis.
2. Wanem samting bai makim olsem Kingdom i senisim gavman bilong ol man na em yet i kirap bosim graun?
2 Bilong makim taim bilong dispela bikpela senis i kamap, bai i gat wanpela hap taim Jisas i bin kolim olsem taim bilong ‘bikpela hevi tru, stat long taim graun i nupela yet na i kam inap long nau, kain hevi olsem i no bin kamap bipo, na bihain tu bai i no gat kain hevi olsem i kamap gen.’ (Matyu 24:21) Baibel i no tokaut olsem dispela taim em i bikpela hap taim o nogat, tasol ol hevi bai kamap insait long dispela taim em bai nogut moa yet, winim olgeta hevi i bin kamap long graun. Taim dispela bikpela hevi tru i kirap, wanpela samting bai kamap na planti man bilong graun bai kirap nogut tru long en: Olgeta lotu giaman bai bagarap. Ol Witnes Bilong Jehova i no ken kirap nogut long dispela samting, long wanem, inap longtaim pinis ol i bin wetim dispela taim. (KTH 17:1, 15-17; 18:1-24) Dispela taim bilong bikpela hevi tru bai pinis long Armagedon, taim Kingdom bilong God i pinisim olgeta pasin bilong dispela graun em Satan i bosim.—Daniel 2:44; KTH 16:14, 16.
3. Jeremaia i stori olsem wanem long ol samting bai painim ol man i bikhet long God?
3 Long dispela taim, wanem samting bai painim “ol man i no laik save long God na i no bihainim gutnius” bilong Kingdom bilong em long heven em Krais i bosim? (2 Tesalonaika 1:6-9) Tok profet bilong Baibel i tok: “Harim. Olgeta kantri bai i bagarap. Dispela bai i stat long wanpela kantri na bai i go i go na inapim olgeta kantri. Dispela bagarap i olsem traipela win na ren i kirap long ol longwe ples na i raun long olgeta hap bilong graun. Na long dispela taim Bikpela bai i kilim i dai planti manmeri moa na bai bodi bilong ol i stap nabaut long olgeta hap bilong graun. Na bai i no gat man i stap bilong krai sori long ol na bilong bungim ol bodi bilong ol na planim ol. Nogat. Ol bodi bai i stap nabaut long graun olsem pekpek bilong dok.”—Jeremaia 25:32, 33.
Olgeta Pasin Nogut Bai Pinis
4. Bilong wanem i stret Jehova i pinisim pasin nogut bilong dispela graun?
4 Inap planti tausen yia pinis, God Jehova i bin larim pasin nogut i stap, na insait long dispela taim ol man i gat stretpela bel ol inap lukim olsem taim ol man yet i bosim graun, ol bikpela hevi nogut tru i save kamap. Wanpela buk i tok, kirap long yia 1900 samting na i kam inap long yia 2000, inap olsem 150 milion manmeri i bin bagarap long ol bikpela pait namel long ol kantri na ol pait insait long ol kantri yet. Pasin nogut tru bilong ol man i kamap ples klia tru long taim bilong Namba Tu Pait. Long dispela taim inap olsem 50 milion manmeri ol i bagarap, na planti bilong ol i bin kisim bikpela pen nogut tru na ol i dai insait long ol banis kalabus bilong ol Natsi. Olsem Baibel i tok profet long en, long taim bilong yumi ‘ol man nogut na ol giaman profet ol bai i kamap nogut tru.’ (2 Timoti 3:1-5, 13) Long nau pasin pamuk, pasin raskol, pait na bagarapim man, paulim mani samting, sakim ol lo bilong God, ol dispela pasin i go bikpela tru. Olsem na i stret tru Jehova i laik pinisim dispela pasin nogut bilong graun.
5, 6. Stori long pasin nogut i bin i stap long Kenan long bipo.
5 Pasin i stap nau long graun i wankain olsem pasin i bin stap long Kenan inap 3,500 yia i go pinis. Baibel i tok: “Long taim ol i lotu long ol giaman god bilong ol, ol i save mekim ol kain kain pasin nogut Bikpela i no laikim tru. Ol i save mekim olsem. Ol i kilim pikinini bilong ol yet na kukim antap long alta olsem ofa.” (Lo 12:31) Jehova i toksave long ol Israel olsem: “Bikpela . . . bai i rausim ol, long wanem, ol i man nogut.” (Lo 9:5) Wanpela saveman bilong ol samting i bin kamap olsem Baibel i stori long en, em Henry H. Halley, em i tok: ‘Bilong lotuim Bal, na Astoret, na ol narapela god bilong ol Kenan, ol Kenan i save mekim pasin sem nogut tru; ol haus lotu bilong ol i ples bilong mekim pasin pamuk.’
6 Halley i kamapim klia olsem pasin nogut bilong dispela lain i go nogut olgeta. Em i tok, long wanpela bilong ol planti ples olsem, ol saveman bilong painim ol samting bilong bipo “ol i painim planti sospen graun i gat sampela bun samting bilong ol pikinini i stap insait long en, em ol pikinini ol i bin givim olsem ofa long [Bal].” Em i tok: “Dispela hap olgeta em i wanpela ples matmat bilong ol nupela pikinini. . . . Ol Kenan i save mekim pasin pamuk, olsem pasin bilong lotu, long ai bilong ol god bilong ol, na ol i kilim i dai ol namba wan pikinini bilong ol olsem ofa bilong ol dispela god. Ples Kenan i kamap olsem ples Sodom na Gomora. . . . Ol Kenan i bin mekim pasin doti na pasin bilong bagarapim man i nogut nogut tru, olsem na yu ting i stret ol i stap? . . . Sampela saveman i wok long painim ol samting long ol taun bilong ol Kenan bilong bipo, em ol taun i bagarap pinis, ol i ting: Bilong wanem God i no bin kirap kwik na bagarapim ol Kenan long bipo yet?”
Ol Bai Kisim Graun
7, 8. Olsem wanem God bai pinisim ol pasin nogut long graun?
7 Olsem God i bin pinisim ol pasin nogut long Kenan, liklik taim nau na em bai pinisim pasin nogut na hevi i stap long olgeta hap bilong graun, na em bai givim graun long ol manmeri i bihainim laik bilong em. “Ol gutpela stretpela man bai i stap gut oltaim long graun bilong yumi. Tasol God bai i rausim ol man i save mekim pasin nogut na i no save bihainim em. Em bai i kamautim ol, olsem man i kamautim kaikai long gaden bilong en.” (Sindaun 2:21, 22) Na man bilong raitim Song i tok: “I no longtaim na bai ol man nogut i lus olgeta. . . . Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” (Song 37:10, 11) God bai rausim Satan tu, bambai em i “no inap giamanim moa ol manmeri bilong olgeta lain. Em i mas wetim 1,000 yia i pinis pastaim.” (KTH 20:1-3) Tru tumas, “dispela graun bai i pinis, na olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim. Tasol man i bihainim tok bilong God, em bai i stap oltaim.”—1 Jon 2:17.
8 Jisas i stori long gutpela samting ol man i laik i stap oltaim long graun ol inap wetim, olsem: “Ol manmeri i save daunim nem bilong ol yet, em ol i ken amamas. Bai God i givim olgeta graun long ol.” (Matyu 5:5) Taim Jisas i mekim dispela tok, ating em i bin tingim Song 37:29, i tok profet olsem: “Ol stretpela man bai i kisim graun God i givim ol, na bai ol i stap oltaim long en.” Jisas i save, em laik bilong Jehova long ol man i gat stretpela bel ol i ken i stap long Paradais long graun inap oltaim oltaim. Jehova i tok: “Mi yet mi bin wokim dispela graun long bikpela strong bilong mi, na tu mi bin wokim ol manmeri na ol abus i stap long graun. Mi save bihainim laik bilong mi yet na mi tilim graun long ol man.”—Jeremaia 27:5.
Wanpela Nupela Taim i Gutpela Tru
9. Kingdom bilong God bai kamapim wanem kain pasin long graun?
9 Bihain long Armagedon, Kingdom bilong God bai kamapim “nupela graun” i gutpela tru na i gat “stretpela pasin tasol bai i stap long en.” (2 Pita 3:13) Ol manmeri i abrusim bagarap long Armagedon, ol bai kisim gutpela malolo tru taim dispela pasin nogut bilong graun i pinis olgeta! Ol bai amamas tru long ol i bin go insait long nupela taim i gat stretpela pasin tasol long en na gavman bilong Kingdom bilong heven bai bosim, na ol i ken tingting long kisim planti gutpela blesing na laip i stap oltaim oltaim!—KTH 7:9-17.
10. Taim Kingdom i bosim graun, wanem ol samting nogut i no ken i stap moa?
10 Ol man i no ken pret moa long ol pait bai kamap, o pasin raskol, o hangre, o ol animal nogut bai bagarapim ol. “Mi bai mekim kontrak wantaim [lain bilong mi], bilong ol i ken i stap gut. Na bai mi rausim olgeta wel animal i save kilim ol sipsip na ol bai i no inap i stap moa long dispela graun. . . . Na ol diwai i save karim kaikai, bai ol i karim planti moa. Na planti kaikai bai i kamap long ol gaden. . . . Na bai ol i stap gut long graun bilong ol yet.” “Bai ol i paitim bainat bilong ol i kamap olsem ain bilong brukim graun, na paitim spia bilong ol i kamap olsem naip. Na olgeta lain manmeri bai i no pait moa, na bai ol i no skul moa long pait. Na olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret.”—Esekiel 34:25-28; Maika 4:3, 4.
11. Bilong wanem yumi inap bilip tru olsem ol sik bai pinis?
11 Sik, bel hevi, na dai tu bai pinis olgeta. “Long dispela taim, i no gat man . . . bai i tok olsem, ‘Mi gat sik.’ Na Bikpela bai i lusim sin bilong ol manmeri.” (Aisaia 33:24) “[God] bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta. . . . ‘Harim. Mi mekim olgeta samting i kamap nupela.’ ” (KTH 21:4, 5) Taim Jisas i stap long graun, em i kamapim klia olsem em inap tru long mekim ol dispela samting long strong God i bin givim long em. Spirit holi i strongim em na em i go nabaut long olgeta hap bilong kantri na em i oraitim ol lek nogut na ol sikman.—Matyu 15:30, 31.
12. Wanem gutpela samting bai painim ol man i dai pinis?
12 Na i no dispela samting tasol Jisas i mekim. Em i kirapim bek ol man i dai pinis. Ol man i gat pasin daun ol i mekim wanem taim ol i lukim dispela samting? Taim em i kirapim bek wanpela pikinini meri i gat 12-pela krismas, papamama bilong em “i kirap nogut” na ol i amamas tru. (Mak 5:42) Em nau, dispela tu i makim samting Jisas bai mekim long olgeta hap bilong graun taim Kingdom i bosim graun, long wanem, em “bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Man! Tingim bikpela amamas bai kamap taim wanpela lain i kirap bek, na bihain narapela lain i kirap bek, na ol bai bung gen wantaim famili bilong ol! Yumi ken ting, long dispela taim bai i gat wanpela bikpela wok tru bilong skulim ol man, em Kingdom bai bosim dispela wok, olsem na “olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.”—Aisaia 11:9.
Jehova Bai Kamapim Klia Olsem Em i Nambawan Bos
13. Olsem wanem God bai kamapim long ples klia olsem i stret em i bosim graun?
13 Taim Kingdom i bosim graun inap wan tausen yia pinis, olgeta manmeri bilong graun bai kamap gutpela olgeta long tingting na long skin. Graun olgeta bai stap olsem gaden Iden, o paradais, em inapim olgeta hap. Bai i gat bel isi, amamas, na gutpela sindaun, na olgeta manmeri bai i gat pasin sori. Taim Kingdom i no bin kirap yet long bosim graun, kain pasin olsem i no bin stap, nogat tru. Wanpela samting bai kamap long ples klia tru, olsem: Wok nogut bilong ol man long bosim graun inap planti tausen yia em i narapela kain tru long nambawan gutpela wok em Kingdom bilong God i mekim long bosim graun inap wan tausen yia! Dispela bai kamapim klia tru olsem wok bilong God long bosim graun long rot bilong Kingdom, em i win tru. Em nau, God i kamapim long ples klia tru olsem i stret em i stap Nambawan Bos bilong graun.
14. Taim wan tausen yia i pinis, wanem samting bai painim ol bikhetman?
14 Long pinis bilong wan tausen yia, taim olgeta manmeri i kamap gutpela olgeta, Jehova bai larim ol yet i makim rot ol i laik bihainim, olsem ol i laik i stap aninit long husat. Baibel i tok “ol bai i opim dua bilong hul i no gat as, na Satan bai i lusim kalabus bilong en.” Em bai wok strong gen long giamanim ol manmeri, na sampela bai i gat laik long bosim ol yet na ol i no laikim God i bosim ol. Bilong pasim rot na bai “i no gat wanpela man inap bikhet long em tupela taim,” Jehova bai pinisim Satan na ol spirit nogut bilong em na olgeta man i bikhet long wok bos bilong Jehova. I no gat wanpela man inap tok, ol man Jehova i bagarapim ol long dispela taim na ol i pinis olgeta, em i no bin givim rot long ol long senisim tingting, o ol i popaia na bihainim rot nogut, long wanem, sin i stap long skin bilong ol. Ol bai wankain olsem Adam na Iv, em ol i gutpela olgeta, tasol long laik bilong ol yet ol i bikhet long stretpela wok bos bilong Jehova.—KTH 20:7-10; Nahum 1:9.
15. Ol man i stap gut long Jehova, ol bai stap olsem wanem wantaim em?
15 Tasol yumi ken ting, klostu olgeta manmeri bai ol i gat laik long i stap aninit long wok bos bilong Jehova. Taim Jehova i pinisim olgeta bikhetman pinis, orait nau ol stretpela man bai sanap long ai bilong Jehova, long wanem, ol i winim pinis laspela traim, olsem ol bai stap gut long Jehova o nogat. Em nau, ol dispela manmeri i stap gut long Jehova, em bai kisim ol olsem ol pikinini man na pikinini meri bilong em. Dispela i mekim na ol bai stap wankain olsem Adam na Iv taim tupela i no bikhet yet long God, em tupela i bin stap olsem pikinini bilong God. Olsem na tok bilong Rom 8:21 bai kamap tru: ‘God bai i pinisim dispela kalabus bilong bagarap nau olgeta samting i stap long en, na bai olgeta samting [olsem ol manmeri] i stap gutpela tru olsem ol pikinini bilong God.’ Profet Aisaia i tok profet olsem: “[God] bai i pinisim dai tru na bai dai i no kamap moa long ol. God, Bikpela bai i pinisim krai bilong ol na mekim drai wara bilong ai bilong olgeta manmeri.”—Aisaia 25:8.
Ol i Wet Long Kisim Laip i Stap Oltaim
16. Bilong wanem i stret yumi ken tingting long gutpela prais bai yumi kisim, olsem laip i stap oltaim oltaim?
16 Ol man i stap gut long God, ol inap wetim gutpela samting tru i kamap, long wanem, ol i save God bai givim ol gutpela gutpela samting bilong spirit na bilong skin long ol, i go inap oltaim oltaim! Man bilong raitim Song i tok stret olsem: “Em i save givim kaikai samting long olgeta inap long ol i stap gut.” (Song 145:16) Ol manmeri bilong i stap long graun, Jehova i laik kirapim ol long holim dispela tingting bilong i stap long Paradais, na dispela bilip i mas i stap insait long bilip bilong Kristen. Tru, dispela bikpela tok i bin kamap long wok bos bilong Jehova, em i bikpela samting moa, tasol Jehova i no tokim ol man long mekim wok bilong em na ol i no inap tingting long kisim prais. Planti taim Baibel i bungim pasin bilong i stap gut long God wantaim pasin bilong tingting long kisim laip i stap oltaim, na dispela tupela samting wantaim i mas stap insait long bilip bilong Kristen. “Man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.”—Hibru 11:6.
17. Olsem wanem Jisas i soim yumi olsem i stret yumi ken tingim ol gutpela samting bai kamap bihain na bai dispela i ken strongim yumi?
17 Jisas i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) Long dispela skripsa, Jisas i bungim pasin bilong kisim save long God na ol laik bilong em wantaim gutpela prais em man bai kisim sapos em i mekim olsem Jisas i tok. Wanpela man bilong mekim rong i bin tokim Jisas long tingim em taim em i kamap king long Kingdom bilong em, na Jisas i tok: “Bai yu stap wantaim mi long Paradais.” (Luk 23:43, NW ) Jisas i no tokim em olsem em i mas bilip, maski em i no ken kisim prais. Nogat. Jisas i save, Jehova i laik bai ol wokman bilong em i ken tingting long kisim laip i stap oltaim long Paradais long graun na dispela bai helpim ol long stap strong taim ol traim na hevi bilong dispela graun i bungim ol. Olsem na pasin bilong wet long kisim prais em i wanpela bikpela samting bilong helpim Kristen long sanap strong na karim hevi.
Olsem Wanem Long Kingdom Long Bihain?
18, 19. Olsem wanem long King na Kingdom long pinis bilong Wan Tausen Yia Bilong Krais i Stap King?
18 Dispela Kingdom i olsem nambatu gavman Jehova i mekim wok long en bilong mekim graun wantaim olgeta manmeri bilong en i kamap gutpela olgeta na kamap wanbel gen wantaim em. Olsem na taim dispela Wan Tausen Yia i pinis, King Jisas Krais wantaim ol 144,000 king na pris bilong em ol bai mekim wanem wok? “Bai Krais i pinisim olgeta gavman na olgeta strongpela spirit na olgeta samting i gat strong, na bai em i putim kingdom long han bilong God Papa. Long wanem, Krais i mas i stap king i go inap em i daunim olgeta birua bilong en.”—1 Korin 15:24, 25.
19 Taim Krais i putim Kingdom long han bilong God, yumi mas kisim wanem tingting long ol skripsa i tok Kingdom bai i stap oltaim oltaim? I olsem: Ol wok Kingdom i bin mekim, ol bai stap oltaim oltaim. Inap long olgeta taim bihain ol man bai givim biknem long Krais long bikpela wok em i bin mekim bilong kamapim long ples klia olsem God em i Nambawan Bos. Tasol long dispela taim bihain, sin na indai i pinis olgeta, na Jisas i kisim bek pinis ol man, olsem na em i no gat wok moa olsem Man bilong kisim bek ol man. Kingdom i mekim pinis wok bilong en long bosim graun inap wan tausen yia; olsem na i no gat wok moa long wanpela nambatu gavman i mas i stap namel long Jehova na ol man bilong bihainim tok. Em nau, “God bai i stap het tru bilong olgeta samting.”—1 Korin 15:28.
20. Olsem wanem yumi ken kisim save long ol samting Krais wantaim lain 144,000 bai mekim long bihain bihain?
20 Orait taim dispela Wan Tausen Yia Bilong Krais i pinis, Krais na ol narapela king i wok wantaim em ol bai mekim wanem wok? Baibel i no tok. Tasol yumi inap save tru olsem Jehova bai givim planti wok moa long ol. Orait long nau yumi olgeta i mas sambai long wok bos bilong Jehova na bai em i givim laip i stap oltaim oltaim long yumi. Olsem na bihain bai yumi stap laip na yumi inap save long ol wok Jehova i laik bai King wantaim ol wanwok king na pris bilong em i mas mekim, na em i gat wanem laik long gutpela ples antap na graun em i bin wokim!
Sampela Tok Bilong Kamapim Gen
• Wanem senis long wok bilong bosim graun i klostu pinis?
• Olsem wanem God bai skelim long kot ol man nogut na ol stretpela man?
• Wanem ol pasin bai stap long nupela taim?
• Olsem wanem Jehova bai kamapim long ples klia tru olsem i stret em i stap Nambawan Bos?
[Ol Piksa long pes 17]
“God bai i kirapim bek ol man i dai pinis, em ol stretpela man na ol man nogut wantaim”
[Piksa long pes 18]
Ol manmeri i stap gut long Jehova, em bai kisim ol olsem ol pikinini bilong em