Harim Gut Dispela Tok Holi Spirit i Autim!

“Orait man i gat yau, em i mas harim gut dispela tok Holi Spirit i autim long ol sios.”​—⁠KTH 3: 22.

1, 2. Jisas i givim wanem tok kaunsel long olgeta 7-pela kongrigesen long Buk Kamapim Tok Hait?

OL WOKBOI bilong Jehova i mas putim yau long ol tok spirit bilong God i kamapim na Jisas Krais i givim long ol 7-pela kongrigesen em Baibel i stori long ol long Buk Kamapim Tok Hait. Ol tok i go long olgeta wan wan kongrigesen i gat dispela tok kaunsel: “Orait man i gat yau, em i mas harim gut dispela tok Holi Spirit i autim long ol sios.”​—⁠KTH 2:​7, 11, 17, 29; 3:​6, 13, 22.

² Yumi stori pinis long tok Jisas i givim long ol ensel, o ol wasman, bilong Efesus, Smerna, na Pergamum. Olsem wanem yumi inap kisim helpim long ol tok em i mekim long rot bilong holi spirit long ol narapela 4-pela kongrigesen?

Long Ensel i Stap Long Taiataira

 3. Taiataira i stap we? Ol i save wokim wanem samting na ol i gat nem long dispela?

³ “Pikinini Bilong God” i givim gutpela tok amamas na tok bilong stretim kongrigesen Taiataira. (Ritim KTH 2:​18-29.) Ol i bin wokim taun Taiataira (nau Akhisar) long arere long wanpela hanwara bilong wara Gediz (bipo ol i kolim Hermus) long hap wes bilong Esia Maina. Ol man bilong dispela taun i gat nem long wokim kain kain samting long han. Ol man bilong wokim pen bilong penim laplap i save yusim rop bilong plaua madder bilong wokim retpela pen, em dispela retpela pen taun i gat nem long en. Lidia, em i bin kamap Kristen taim Pol i raun lukim ol man long taun Filipai long Grik, “em i meri bilong taun Taiataira, na em i save wok bisnis long retpela laplap.”​—⁠Aposel 16:​12-15.

 4. Jisas i mekim wanem gutpela tok amamas long kongrigesen Taiataira?

⁴ Jisas i mekim gutpela tok amamas long kongrigesen Taiataira long ol samting ol i mekim bilong helpim ol narapela, laikim narapela, bilip, sanap strong, na wok ol i mekim long autim tok. Na em i tok “nau ol pasin bilong yu i kamap gutpela moa yet.” Tasol maski yumi bin mekim planti gutpela samting long bipo, yumi mas was gut long ol pasin bilong yumi.

5-7. (a) “Dispela meri Jesebel” em i husat? Kongrigesen i mas mekim wanem long ol meri i bihainim pasin bilong em? (b) Tok Krais i givim long kongrigesen Taiataira i save helpim ol meri i pret long God long mekim wanem?

⁵ Kongrigesen Taiataira i larim pasin bilong lotuim ol god giaman, ol bilip giaman, na pasin pamuk i stap insait long kongrigesen. Namel long ol i gat “dispela meri Jesebel” i stap​—⁠ating em i wanpela lain meri husat i bihainim pasin bilong kwin nogut Jesebel bilong 10-pela lain Israel. Sampela saveman i ting ‘ol profet meri’ bilong Taiataira i bin wok long pulim ol Kristen long lotuim ol god na ol god meri bilong ol man i wok bisnis na long insait long ol bikpela de we ol man bai kisim ol kaikai ol i bin ofaim long ol god giaman. Yumi no ken larim wanpela meri husat i makim em yet long kamap wanpela profet meri i kirap pulim na bosim ol narapela insait long kongrigesen Kristen bilong nau!

⁶ Krais ‘bai mekim dispela meri i kisim sik, na ol dispela man i mekim pasin pamuk wantaim em, sapos ol i no tanim bel na givim baksait long ol pasin em i mekim, orait bai em i givim bikpela pen na hevi long ol.’ Ol wasman i no ken orait liklik long ol kain bilip nogut na tingting nogut olsem, na ol Kristen i no gat wok long mekim pasin pamuk bilong spirit o bilong skin o insait long pasin bilong lotuim god giaman bilong save olsem “ol toktok hait bilong Satan” em samting nogut tasol. Sapos yumi bihainim tok lukaut bilong Jisas, olsem ‘olgeta samting yumi save holim, em yumi holim strong,’ orait sin i no inap bosim yumi. Ol Kristen God i bin makim na ol i kirap bek pinis, ol bai kisim “namba bilong i stap hetman bilong ol lain manmeri” na ol bai wok wantaim Krais long bagarapim ol bikhet lain. Ol kongrigesen bilong nau i gat ol elda i stap olsem ol sta, na taim ol Kristen God i makim i kirap bek na go long heven ol bai kisim “dispela sta i save lait tumas long moningtaim tru,” em Jisas Krais, dispela Man i laik marit.​—⁠KTH 22:⁠16.

⁷ Jisas i tokim kongrigesen Taiataira long ol i no ken larim ol meri nogut i stap long kongrigesen, em ol meri i laik pulim ol narapela long tromoi bilip i tru. Tok spirit bilong God i kirapim Krais long mekim long dispela kongrigesen i helpim ol meri i pret long God long nau long tingim ol wok God i makim ol long mekim. Ol i no traim bosim ol man, na ol i no wok long pulim ol brata long mekim pasin pamuk bilong spirit o bilong skin, nogat. (1 Timoti 2:12) Ol kain meri olsem i stap olsem gutpela piksa long litimapim nem bilong God long rot bilong mekim gut long ol narapela na mekim wok autim tok. (Song 68:11; 1 Pita 3:​1-6) Sapos kongrigesen i lukautim gut ol samting em i holim pinis​—⁠ol bilip tru, stretpela pasin, na gutpela wok bilong Kingdom​—⁠Krais bai givim ol gutpela presen long em, Krais i no inap bagarapim ol.

Long Ensel i Stap Long Sardis

 8. (a) Sardis i bin i stap we? Stori long sampela samting bilong en. (b) Bilong wanem kongrigesen Sardis i mas kisim sampela helpim?

⁸ Kongrigesen long Sardis i mas kisim kwik sampela helpim, long wanem, em i dai pinis long ol samting bilong spirit. (Ritim KTH 3:​1-6.) Sardis i stap long hap saut bilong Taiataira inap olsem 50 kilomita. Sardis i gat planti wok bisnis, na graun i gat planti gutpela gris, na ol i wokim ol klos na laplap samting long gras bilong sipsip. Ol dispela samting i mekim na ol man bilong dispela taun​—⁠olsem 50,000 manmeri​—⁠i gat planti mani. Saveman Josifas i tok long taim bilong ol aposel, Sardis i gat bikpela lain Juda i stap long en. Namel long ol haus samting bilong dispela taun i bagarap i stap ol i painim wanpela haus lotu bilong ol Juda na wanpela tempel bilong god meri Artemis, em god meri bilong ol Efesus.

 9. Yumi mas mekim wanem sapos yumi mekim nating ol wok bilong Jehova?

⁹ Krais i tokim ensel bilong kongrigesen Sardis: “Mi save pinis long olgeta pasin yu save mekim. Ol i save tok long yu olsem, ‘Dispela sios i gat laip tru.’ Tasol nogat, yu dai pinis.” Olsem wanem sapos yumi gat nem olsem yumi was i stap long ol samting bilong spirit tasol tru tru yumi no givim bel tumas long ol gutpela wok Kristen yumi inap mekim, na yumi mekim nating ol wok autim tok samting, na long ol samting bilong spirit klostu yumi laik “i dai”? Sapos olsem, yumi mas ‘tingim gen dispela gutnius bipo yumi bin harim na kisim,’ na yumi laik wok strong gen long mekim wok bilong God. Yumi mas kirap givim bel long insait long ol miting Kristen. (Hibru 10:​24, 25) Krais i tok lukaut long kongrigesen Sardis olsem: “Sapos yu no kirap na lusim slip, orait wantu bai mi kam long yu olsem ol stilman i save kam. Na yu bai i no inap save long taim mi laik i kam.” Olsem wanem long taim bilong yumi? Klostu nau God bai skelim olgeta samting yumi bin mekim.

10. Maski i gat wanpela kongrigesen i kain olsem Sardis, ating wan wan Kristen bai bihainim wanem pasin?

¹⁰ Maski i gat wanpela kongrigesen i kain olsem Sardis, ating bai i gat wan wan Kristen ol i ‘no bin mekim doti klos bilong ol na pasin bilong ol em i gutpela, inap long ol i putim ol waitpela klos na wokabaut wantaim Krais.’ Long olgeta taim ol narapela inap luksave olsem ol i Kristen, na long pasin na lotu ol i stap stret olgeta na i no gat asua long ai bilong God. (Jems 1:27) Olsem na Jisas ‘bai i no inap rausim nem bilong ol long buk bilong laip, na em bai autim nem bilong ol long pes bilong Papa bilong em, na long pes bilong ol ensel.’ Lain God i bin makim na ol i stap olsem meri bilong Krais, God i orait long ol i wokabaut wantaim Krais, na ol bai pasim ol naispela waitpela klos i klin tru na i lait moa yet, na ol dispela klos i makim stretpela pasin ol manmeri bilong God i mekim. (KTH 19:⁠8) Ol gutpela wok i wetim ol long heven i save kirapim ol long winim strong bilong dispela graun. Ol man i kisim laip oltaim long graun, ol tu bai kisim planti blesing. Nem bilong ol i stap long buk bilong laip.

11. Yumi mas mekim wanem sapos yumi laik slip long ol samting bilong spirit?

¹¹ Yumi no laik stap tarangu long ol samting bilong spirit olsem kongrigesen Sardis. Tasol olsem wanem sapos yumi luksave olsem yumi laik slip long ol samting bilong spirit? Bilong helpim yumi yet yumi mas kirap kwik long mekim samting. Sapos ol pasin nogut i wok long pulim yumi o yumi wok long slek long kam long ol miting o mekim wok autim tok, orait yumi mas beten strong na askim Jehova long helpim yumi. (Filipai 4:​6, 7, 13) Pasin bilong ritim Baibel long olgeta de na stadi long Baibel na ol buk samting em “bosboi i gat gutpela tingting” i save redim, dispela bai helpim yumi long was i stap long ol samting bilong spirit. (Luk 12:​42-44) Sapos yumi mekim olsem bai yumi stap olsem ol brata long Sardis em Jisas i bin orait long ol, na bai yumi stap olsem gutpela samting bilong strongim ol wanbilip.

Long Ensel i Stap Long Filadelfia

12. Stori long ol samting bilong lotu long Filadelfia long bipo.

¹² Jisas i mekim tok amamas long kongrigesen Filadelfia. (Ritim KTH 3:​7-13.) Filadelfia (nau Alasehir) em i ples bilong mekim gutpela wok bisnis long wokim ol wain long hap wes bilong Esia Maina. Nambawan god bilong ol em Dionisus, em god bilong wain. Ol Juda i stap long Filadelfia i bin traim long pulim ol Kristen Juda long holim yet sampela pasin bilong Lo Bilong Moses o kirap gen long bihainim sampela pasin bilong Lo, tasol ol i no inap pulim ol.

13. Olsem wanem Krais i bin yusim “ki bilong Devit”?

¹³ Krais i holim “ki bilong Devit,” na dispela i makim olsem God i givim em wok bilong lukautim olgeta samting bilong Kingdom na bilong bosim ol wanlain bilipman. (Aisaia 22:22; Luk 1:32) Jisas i bin yusim dispela ki bilong opim rot long ol Kristen long Filadelfia na long ol narapela hap na bai ol inap mekim ol gutpela wok bilong Kingdom. Kirap long 1919 em i “opim rot” bilong dispela “bosboi i gat gutpela tingting” long autim tok bilong Kingdom na ol birua i no inap pasim dispela rot. (1 Korin 16:9; Kolosi 4:​2-4) Tasol dispela rot bilong mekim gutpela wok bilong Kingdom i bin pas long “lain bilong Satan,” long wanem, ol i no insait long lain Israel bilong spirit.

14. (a) Jisas i givim wanem tok promis long kongrigesen Filadelfia? (b) Yumi ken mekim wanem na bai yumi no pundaun long “dispela traim i laik kamap”?

¹⁴ Jisas i givim dispela tok promis long ol Kristen bilong Filadelfia bilong bipo: “Yu bin bihainim tok bilong mi, na yu bin sanap strong long olgeta hevi i kamap long yu. Olsem na bai mi lukautim yu, na dispela traim i laik kamap na traim olgeta manmeri long olgeta hap bilong graun, em i no ken kamap long yu.” Bilong mekim wok autim tok man i mas i gat wankain pasin bilong sanap strong na no ken les olsem Jisas i bin kamapim. Em i no larim birua i pasim em, nogat, em i wok yet long mekim laik bilong Papa bilong em. Olsem na Krais i kirap bek na kisim laip long heven na i no inap i dai moa. Sapos yumi holimpas tingting bilong yumi long lotuim Jehova na sapotim Kingdom long rot bilong autim gutnius, orait bai yumi no pundaun nau long “dispela traim i laik kamap.” Yumi bai “holim strong” samting yumi bin kisim long Krais taim yumi wok strong long mekim ol samting bilong Kingdom i go bikpela moa. Taim yumi mekim olsem bai yumi kisim bikpela pe tru​—⁠ol Kristen God i bin makim bai kisim wok king long heven na ol gutpela poroman bilong ol bai kisim laip oltaim long graun.

15. Ol man em ol bai stap olsem “pos bilong strongim haus bilong God” ol i mas mekim wanem?

¹⁵ Krais i tok moa olsem: “Sapos man i winim pait, mi bai sanapim em olsem pos bilong strongim haus bilong God bilong mi, na . . . mi bai raitim nem bilong God bilong mi long em, na mi bai raitim nem bilong taun bilong God bilong mi, em dispela nupela Jerusalem i kam long God bilong mi, na i lusim heven na i kam daun. Na nupela nem bilong mi yet, em tu bai mi raitim long em.” Ol wasman God i bin makim long holi spirit i mas sambai long lotu i tru. Ol i mas stap gut long ol mak ol i winim pinis bilong insait long “nupela Jerusalem” long rot bilong autim tok bilong Kingdom bilong God na stap klin long ol samting bilong spirit. Ol i mas mekim olsem sapos ol i laik i stap olsem ol pos insait long bikpela tempel long heven na sapos ol i laik bai nem bilong taun bilong God i stap long ol, olsem ol i stap man bilong dispela taun, na ol i laik bai nem bilong Krais i stap long ol olsem meri bilong em. Na tu, ol yau bilong ol i mas “harim gut dispela tok Holi Spirit i autim long ol sios.”

Long Ensel i Stap Long Laodisia

16. Stori long ol samting bilong Laodisia.

¹⁶ Krais i bin stretim kongrigesen Laodisia, em ol i no tingim tumas ol samting bilong spirit. (Ritim KTH 3:​14-22.) Lusim Efesus na i go long hap is inap 150 kilomita na bai yu kamap long Laodisia. Laodisia i stap long rot bung bilong ol man i go i kam bilong baim na salim ol samting long ples daun bilong wara Lycus. Ol man bilong Laodisia i gat planti wok bisnis na ol beng samting. Planti man i save long ol klos ol i wokim long blakpela gras bilong ol sipsip bilong dispela hap. Laodisia i gat wanpela skul bilong marasin i gat nem, na ating ol i bin wokim wanpela marasin bilong ai long en (Phrygian powder). Asklipias, wanpela god bilong marasin, em i wanpela bikpela god bilong Laodisia. I luk olsem i gat planti lain Juda i stap long Laodisia, na sampela bilong ol i maniman.

17. Wanem as na ol brata sista bilong Laodisia i kisim tok bilong stretim ol?

¹⁷ Long rot bilong “ensel” bilong Laodisia, Jisas i mekim tok olsem man i gat namba na man i save ‘autim stret olgeta tok na autim tok tru tasol, na em i as bilong olgeta samting God i bin wokim.’ (Kolosi 1:​13-16) Jisas i mekim tok bilong stretim ol brata sista bilong Laodisia, olsem ol i ‘no kol na ol i no hat’ long ol samting bilong spirit. Ol i hat liklik, olsem na Krais i tok long trautim ol long maus bilong em. Ating i no hatwok long ol i save long mining bilong tok bilong Jisas. Taun Hierapolis i stap klostu na ol i gat ol hulwara i gat hat wara i kamap long en, na taun Kolosi i gat gutpela kolwara. Wara i stap longwe long Laodisia, olsem na ol i mas kisim wara long ol paip. Taim wara i kamap long taun em i hat liklik. Wara i ran long rot bilong wanpela baret ston i luk olsem bris. Tasol taim wara i kam klostu liklik long taun, wara i ran long ol paip ston ol i joinim wantaim simen.

18, 19. Ating wanem samting inap helpim ol Kristen bilong nau husat i kain olsem ol Kristen long Laodisia?

¹⁸ Ol man bilong nau husat i kain olsem ol Laodisia ol i no hat tru o kol tru. Olsem wara i hat liklik, Jisas bai trautim! Jisas i no laik bai ol i stap mausman bilong em, olsem ol man God i makim long holi spirit na ol i stap olsem “maus bilong Krais.” (2 Korin 5:20) Sapos ol i no tanim bel, ol bai no inap holim moa wok bilong ol long autim tok bilong Kingdom. Ol Laodisia i laik kisim ol mani kago samting na ol i no save olsem ol ‘i stap nogut tru, na rabis tru, na aipas, na as nating.’ Ol i stap rabis, na aipas, na as nating long ol samting bilong spirit, na bilong stretim dispela, olgeta man i stap olsem ol i mas baim long Krais “gol” i olsem strongpela bilip, na “waitpela klos” i olsem stretpela pasin, na dispela “marasin bilong putim long ai” i save helpim ai i op long ol samting bilong spirit. Ol wasman Kristen i amamas long helpim ol long pilim olsem ol i sot long samting bilong spirit na bai ol i ken kamap “gutpela tru long pasin bilong bilip.” (Jems 2:5; Matyu 5:⁠3) Na tu, ol wasman i mas helpim ol long putim marasin bilong spirit long ai bilong ol​—⁠olsem ol i mas bihainim ol tok na kaunsel na pasin na tingting bilong Jisas. Dispela i olsem marasin bilong oraitim “pasin bilong bel kirap na aigris na bikhet.”​—⁠1 Jon 2:​15-17.

¹⁹ Jisas i save stretim ol man em i save laikim tumas. Long pasin sori ol wasman i wok aninit long Jisas i mas mekim wankain samting. (Aposel 20:​28, 29) Ol Laodisia i mas “strong long stretim pasin bilong [ol], na [ol i] mas tanim bel,” na senisim tingting na pasin bilong ol. Olsem wanem? Sampela bilong yumi i save bihainim ol pasin i kamapim olsem ol samting bilong spirit i no bikpela samting long laip bilong yumi? Sapos olsem, yumi mas ‘baim marasin long Jisas bilong putim long ai’ na bai yumi inap luksave olsem pasin bilong wok strong long painim Kingdom pastaim em i bikpela samting tru.​—⁠Matyu 6:⁠33.

20, 21. Long nau husat i opim dua taim Jisas i paitim dua? Wanem samting inap painim ol?

²⁰ Jisas i tok: “Lukim, mi sanap long dua, na mi paitim i stap. Sapos wanpela man i harim maus bilong mi na i opim dua, orait bai mi go insait na i stap wantaim em. Na bai mi kaikai wantaim em, na em bai i kaikai wantaim mi.” Planti taim Jisas i bin skulim ol man long ol samting bilong spirit taim em i kaikai wantaim ol. (Luk 5:​29-39; 7:​36-50; 14:​1-24) Nau Jisas i save paitim dua bilong ol kongrigesen i kain olsem kongrigesen Laodisia. Olsem wanem? Ol brata sista bai opim dua, kirap laikim em gen, amamas long em i stap namel ol, na larim em i skulim ol? Sapos olsem, Krais bai kaikai wantaim ol na dispela bai helpim ol gut tru long ol samting bilong spirit.

²¹ Long nau i olsem “ol arapela sipsip” i opim dua long Jisas na larim em i kam insait, na dispela i mekim na ol inap kisim laip oltaim. (Jon 10:16; Matyu 25:​34-40, 46) Olgeta Kristen God i bin makim em ol i winim pait, Krais bai larim ol ‘i sindaun wantaim em long sia king bilong em, olsem bipo em tu em i winim pait, na em i sindaun wantaim Papa bilong em long sia king bilong em.’ Yes, long ol dispela lain Jisas i tok promis olsem ol bai sindaun wantaim em long han sut bilong Papa bilong em long heven. Na ol arapela sipsip i winim pait i wetim gutpela sindaun long graun aninit long Kingdom.

Samting Dispela i Skulim Yumi Long En

22, 23. (a) Olsem wanem tok Jisas i givim long ol 7-pela kongrigesen i ken helpim olgeta Kristen? (b) Yumi mas tingting strong long mekim wanem?

²² Yumi save olsem ol tok Jisas i bin givim long ol 7-pela kongrigesen bilong Esia Maina inap helpim tru olgeta Kristen. Ol elda Kristen i ken luksave olsem Krais i bin mekim ol gutpela tok amamas, na dispela i ken kirapim ol long mekim gutpela tok amamas long ol wan wan Kristen na long ol kongrigesen husat i stap gut long ol samting bilong spirit. Taim ol brata sista i no strong long ol samting bilong spirit, ol elda i save helpim ol wanbilip long bihainim ol tok Baibel i kamapim bilong strongim ol. Yumi olgeta i ken wok yet long kisim helpim long ol narapela narapela tok kaunsel Krais i bin givim long dispela 7-pela kongrigesen sapos kwiktaim yumi wok long beten na bihainim dispela tok.a

²³ Dispela taim bilong las de i no taim bilong slek, kisim planti mani kago, o mekim narapela samting na yumi givim hap bel tasol long mekim wok bilong God. Olsem na yumi laik bai olgeta kongrigesen i ken lait gut olsem ol lam Jisas bai larim ol i stap long hap i stret long ol i stap long en. Yumi ol Kristen i save stap gut long God, oltaim yumi mas putim gut yau taim Krais i toktok na harim tok holi spirit i autim. Sapos yumi mekim olsem bai yumi amamas oltaim olsem ol man i stap olsem lait na dispela bai litimapim nem bilong Jehova.

[Futnot]

Bai Yu Bekim Olsem Wanem?

• “Dispela meri Jesebel” em i husat? Bilong wanem ol meri i pret long God i no laik bihainim pasin bilong em?

• Kongrigesen Sardis i bin i stap olsem wanem? Yumi ken mekim wanem na bai yumi no kamap wankain olsem planti Kristen i bin i stap long Sardis?

• Jisas i mekim wanem ol tok promis long kongrigesen Filadelfia? Ol dispela tok promis i mekim wanem samting long yumi long nau?

• I gat wanem as na ol Laodisia i kisim ol tok bilong stretim ol? Tasol wanem gutpela samting inap painim ol Kristen i save givim bel long mekim wok bilong God?

[Piksa long pes 16]

Yumi mas abrusim ol pasin nogut bilong “dispela meri Jesebel”

[Ol Piksa long pes 18]

Jisas i “opim rot” bilong ol disaipel long mekim bikpela wok bilong Kingdom

[Piksa long pes 20]

Olsem wanem? Yu save opim dua long Jisas na harim tok bilong em?