Sapta 23

Namba 2 Bikpela Hevi​—⁠Ol Soldia i Sindaun Long Hos

 1. Ol pris pasto i wok strong long pinisim ol grasopa, tasol wanem samting i kamap? I gat tupela bikpela hevi moa i kamap, na dispela i makim wanem samting?

KIRAP long 1919 ol dispela “grasopa” i go autim strongpela tok long hap bilong ol lotu i gat nem Kristen, na dispela i givim bikpela hevi long ol pris pasto. Ol i wok strong long pinisim ol dispela grasopa, tasol ol dispela gasopa i kam yet na ol i strong moa. (KTH 9⁠:⁠7) Na i no dispela hevi tasol i painim ol dispela lotu! Jon i raitim tok olsem: “Orait namba wan bikpela hevi em i pinis. Tasol harim. Tupela bikpela hevi i stap yet na bai i kamap bihain.” (KTH 9⁠:12) Em nau, sampela bikpela hevi moa i mas painim ol dispela lain i gat nem Kristen.

 2. (a) Taim namba 6 ensel i winim biugel, wanem samting i kamap? (b) Dispela “maus bilong wanpela man” i toktok namel long ol kom bilong alta gol em i makim wanem samting? (c) Bilong wanem Baibel i tok long 4-pela ensel?

² Orait, namba 2 bikpela hevi i kirap we? Jon i tok: “Namba 6 ensel i winim biugel bilong en, na mi harim maus bilong wanpela man i toktok namel long ol 4-pela kom i stap long ol 4-pela kona bilong alta gol i stap long pes bilong God. Em i tokim namba 6 ensel i holim biugel olsem, ‘Dispela 4-pela ensel ol i kalabus i stap long bikpela wara Yufretis, yu mas lusim ol i go.’ ” (KTH 9⁠:​13, 14) Taim dispela maus i toktok namel long 4-pela kom i stap long alta gol, em nau, ol i lusim 4-pela ensel i go. Dispela alta gol em i bilong kukim paura long en bilong kamapim smok i gat gutpela smel, na tupela taim paslain long dispela, paura bilong ol plet gol i stap long dispela alta ol i bin bungim wantaim ol beten bilong ol manmeri bilong God. (KTH 5⁠:8; 8⁠:​3, 4) Olsem na dispela maus i makim beten bilong olgeta manmeri bilong God wantaim, em ol i stap long graun. Ol i beten long ol i ken lusim kalabus na kirap gen long mekim wok olsem “man bilong autim tok” bilong Jehova​—⁠dispela em insait bilong wanpela tok Grik ol i tanim olsem “ensel.” Bilong wanem Baibel i tok long 4-pela ensel? Ating dispela namba i makim olsem lain bilong God i redi gut long mekim wok autim tok na bai ol inapim olgeta hap graun.​—⁠KTH 7⁠:1; 20⁠:⁠8.

 3. Olsem wanem dispela 4-pela ensel i “kalabus i stap long bikpela wara Yufretis”?

³ Olsem wanem ol dispela ensel i bin “kalabus i stap long bikpela wara Yufretis”? Bipo dispela wara Yufretis em i olsem mak o boda long hap bilong not-is bilong graun Jehova i bin tok promis long givim long Abraham. (Stat 15⁠:18; Lo 11⁠:24) Ating ol dispela ensel i kalabus i stap long boda bilong graun God i bin givim long ol. Ol i stap olsem arere long wok God i bin givim long ol long graun, long wanem, ol i mas wet pastaim. Na taim Baibel i stori long bikpela taun Babilon, planti taim em i kolim dispela wara Yufretis. Taim ol Babilon i bagarapim Jerusalem long yia 607 paslain long Krais, ol Israel bilong skin i kalabus inap 70 yia long ples Babilon​—⁠i olsem ol i “kalabus i stap long bikpela wara Yufretis.” (Song 137⁠:⁠1) Long 1919 ol Israel bilong spirit tu ol i stap olsem kalabus​—⁠na ol i beten askim Jehova long soim rot long ol.

 4. Ol dispela 4-pela ensel i gat wanem wok? Ol i mekim dispela wok olsem wanem?

⁴ Nau Jon i tokim yumi long samting i kamap, olsem: “Orait em i lusim dispela 4-pela ensel, bai ol i ken tilim olgeta manmeri long tripela lain, na kilim i dai wanpela lain olgeta. Ol dispela ensel i redi pinis na ol i wetim dispela aua na dispela de na dispela mun na dispela yia tasol, bilong mekim dispela wok.” (KTH 9⁠:15) Jehova i save makim taim stret bilong mekim ol samting na em i bihainim stret dispela taim. Olsem na long taim stret bilong en ol dispela “4-pela ensel” olsem lain bilong autim tok ol i lusim kalabus i go bilong mekim wok bilong ol na inapim tru dispela wok insait long dispela taim Jehova i makim. Ol i amamas tru taim ol i lusim kalabus long 1919 na ol i redi long mekim wok bilong ol! Ol i gat wok bilong givim pen long ol man, na bihain ol i gat wok long “kilim i dai wanpela lain olgeta.” Dispela em i wankain liklik long ol samting nogut tru em namba 1 i go inap namba 4 biugel i bin tokaut long en na i bin painim wanpela hap bilong graun, na wanpela hap bilong solwara na olgeta samting i stap insait long en, na wanpela hap bilong ol wara wantaim ol hul wara, na wanpela hap bilong san na mun na ol sta. (KTH 8⁠:​7-​12) Tasol dispela 4-pela ensel i gat sampela wok moa​—⁠ol i kamapim long ples klia tru olsem ol lotu i gat nem Kristen ol i dai pinis long ol samting bilong spirit​—⁠i olsem ol dispela ensel i ‘kilim ol i dai.’ Bilong mekim dispela wok, ol i kamapim ol bikpela toksave bilong dispela samting na ol i tokaut long olgeta man, kirap long 1922 na i kam inap long nau.

 5. Taim namba 6 ensel i winim biugel, wanem samting i kamap long 1927 na i kisim ol lotu i gat nem Kristen?

⁵ Namba 6 ensel long heven em i winim pinis biugel bilong em. Olsem na ol Sumatin Bilong Baibel i wokim namba 6 kibung long Toronto, long Kanada. Ol tok bilong dispela kibung long Sande, Julai 24, 1927, i kamap long 53 redio-stesin. Inap planti milion manmeri ol i harim ol dispela tok i kamap long ol dispela redio-stesin. Namba wan tok, em wanpela bikpela toksave i kamapim klia olsem ol lotu i gat nem Kristen ol i dai pinis long ol samting bilong spirit, na dispela toksave i tokim ol man: “Nau long dispela taim bilong hevi na tingting planti, Jehova i laik tokim olgeta manmeri long lusim ol lotu i holim nating nem Kristen na givim baksait olgeta long ol . . . ; ol i mas givim bel olgeta na i stap aninit olgeta long God Jehova na long King na kingdom bilong em.” Bihain long dispela toksave, ol i mekim wanpela bikpela pablik-tok, het-tok bilong en, “Ol Manmeri i Mas Lusim Kalabus i Go.” J. F. Rutherford i mekim dispela tok, na em i mekim save kolim strong ol dispela tok, na dispela i stret wantaim dispela “paia na smok na ol ston salfa i paia” nau Jon i lukim long driman.

 6. Nau Jon i lukim bikpela lain soldia i sindaun long hos na ol i ran i go long pait, na Jon i stori olsem wanem long dispela samting?

⁶ “Namba bilong ol soldia i sindaun long hos em inap olsem 200 milion. Mi harim ol i kolim namba bilong ol. Na . . . mi lukim ol hos na ol man i sindaun long ol hos, na pasin bilong ol i olsem: Ol man ol i putim ol siot kapa, na kala bilong ol dispela siot em retpela na blupela na yelopela. Het bilong ol hos i olsem het bilong ol laion. Na paia na smok na ol ston salfa i paia, ol i kamap long maus bilong ol hos na i sut i go nabaut. I olsem ol i tilim olgeta manmeri long tripela lain, na dispela tripela samting nogut i kilim i dai wanpela lain olgeta. Dispela tripela samting em dispela paia na smok na ston salfa i paia, ol i kamap long maus bilong ol hos.”​—⁠KTH 9⁠:​16-18.

7, 8. (a) Husat i bosim dispela bikpela lain soldia i sindaun long hos na i ran i go long pait? (b) Dispela lain soldia i sindaun long hos, wanem samting bilong ol i wankain olsem dispela lain grasopa i bin i go pas long ol?

⁷ I olsem ol dispela “4-pela ensel” yet i soim rot long ol dispela soldia i sindaun long hos na i ran i go long pait. Sapos yu lukim wanpela bikpela lain soldia i sindaun long hos na ol i spit i kam bilong mekim pait long yu, bai yu pret na guria nogut tru, a? Tasol dispela lain soldia i wankain liklik olsem ol dispela lain grasopa i bin i go pas long ol. Ol dispela grasopa i olsem hos; tasol insait long dispela lain soldia i gat ol hos stret. Olsem na tupela lain wantaim i mekim pait bilong God. (Sindaun 21⁠:31) Ol grasopa i gat tit olsem bilong laion; ol hos bilong dispela lain soldia ol i gat het olsem bilong laion. Olsem na tupela lain wantaim ol i bilong dispela Man i gat strongpela bel tru, em Krais Jisas, em i Hetman na Kepten na Man bilong makim gutpela pasin ol i mas bihainim.​—⁠KTH 5⁠:5; Sindaun 28⁠:⁠1.

⁸ Dispela lain grasopa na lain soldia i sindaun long hos, tupela lain wantaim i mekim wok bilong Jehova long tokaut long strafe bai painim ol lain bilong graun i gat nem Kristen. Dispela smok ol grasopa i lusim, em i makim ol bikpela hevi na bagarap olsem paia bai painim ol dispela lain; long maus bilong ol hos, paia na smok na ston salfa i paia i kamap. Ol siot kapa i karamapim bros bilong ol grasopa, dispela i makim olsem ol i strong tru long bihainim stretpela pasin, na dispela i lukautim bel bilong ol olsem siot kapa i save mekim; siot kapa bilong ol soldia em retpela na blupela na yelopela, em kala bilong paia na smok na ston salfa i paia, na dispela i makim ol strongpela tok bilong strafe i kamap long maus bilong ol hos. (Lukim Stat 19⁠:​24, 28; Luk 17⁠:​29, 30.) Ol grasopa i gat tel olsem bilong ol binatang skopion, bilong givim pen long ol man; ol hos i gat tel olsem snek, bilong kilim ol man i dai! Dispela wok ol grasopa i bin kirapim, em ol soldia i sindaun long hos ol bai mekim i go moa yet, inap long dispela wok i pinis.

 9. Dispela lain soldia i sindaun long hos na ol i go long pait, ol i olsem piksa bilong wanem samting?

⁹ Dispela lain soldia i sindaun long hos ol i olsem piksa bilong wanem samting? Orait, dispela lain em Jon i piksa bilong ol, ol i bin kirapim wok bilong tokaut long strafe bilong Jehova bai painim ol lotu i gat nem Kristen, na ol i kisim strong long ‘givim pen’ long ol dispela bikman bilong lotu. Olsem na em dispela lain yet ol i gat wok long ‘kilim i dai’ ol man​—⁠olsem ol i mas tokaut long ol manmeri olsem ol lotu i gat nem Kristen wantaim ol pris pasto bilong ol, ol i dai pinis long ol samting bilong spirit na Jehova i rausim ol pinis, na em bai tromoi ol i go long “bikpela paia” na bai ol i bagarap olgeta. Na i no ol dispela lain tasol i mas bagarap​—⁠olgeta hap bilong Bikpela Babilon i mas bagarap. (KTH 9⁠:​5, 10; 18⁠:​2, 8; Matyu 13⁠:​41-​43) Tasol paslain long dispela taim, dispela lain em Jon i piksa bilong ol, ol i mekim wok long “bainat,” em tok bilong God, bilong kamapim long ples klia olsem ol dispela lotu ol i gat nem Kristen ol i dai pinis long ol samting bilong spirit. Dispela “4-pela ensel” na ol man i sindaun long hos ol i soim rot long dispela liklik lain na bai ol i ken mekim dispela wok olsem “kilim i dai wanpela lain olgeta.” (Efesus 6⁠:17; KTH 9⁠:​15, 18) Dispela i makim olsem taim dispela strongpela lain bilong autim tok bilong Kingdom i spit i go long pait, ol i stretim gut dispela wok ol i mas mekim, na Jehova i soim rot long ol na ol i wok aninit long Krais Jisas.

Tu Handet Milion

10. Dispela namba 200 milion em i 200 milion stret, o em i makim hamas?

¹⁰ Tasol olsem wanem na i gat 200 milion soldia i sindaun long hos? Long nau i gat sampela milion manmeri i autim tok bilong Kingdom, tasol i no gat 200 milion. Orait, yumi ken tingim tok bilong Moses long Namba 10⁠:36: “Bikpela, yu mas kam bek long ol tausen tausen famili bilong mipela Israel.” Moses i no kolim hamas famili stret, long wanem em i save, i no inap makim stret hamas bai kamap insait long lain Israel. (Stat 22⁠:17; 1 Stori 27⁠:23) Olsem na dispela 200 milion i makim tasol bikpela lain, na yumi no save i gat hamas stret i insait long en.

11. Olsem wanem dispela liklik lain ol inap kamap olsem 200 milion long tok piksa?

¹¹ Tasol dispela liklik hap lain ol i stap yet long graun, ol i no winim 10,000. Orait, olsem wanem dispela planti milion soldia i sindaun long hos ol i makim dispela liklik lain? Bilong kamap planti milion milion, i mas i gat planti moa i kam bung wantaim ol bilong helpim ol long mekim wok bilong ol. Jehova i save long dispela samting, olsem na long sori bilong em em i wokim rot bambai ol i ken kisim ol dispela helpim bilong ol! Tasol ol i kisim we ol dispela helpim bilong ol?

12, 13. Wanem samting i kamap long 1918 i go inap long 1935 na yumi ken save long dispela lain ol i kam bilong helpim ol?

¹² Kirap long 1918 i go inap long 1922, dispela liklik lain ol i kirap long givim gutpela tok long ol manmeri ol i stap bel hevi, na ol i tokim ol long gutpela samting bai kamap bihain, olsem “planti milion man bilong nau i no ken i dai.” Long 1923 ol i tokaut tu olsem ol sipsip em Matyu 25⁠:​31-​34 i stori long ol, bai ol i kisim laip long graun aninit long Kingdom. Na long bikpela kibung long 1927 ol i kamapim wanpela liklik buk (Freedom for the Peoples) i stori long dispela gutpela samting ol manmeri inap wet long en. Na long 1932 samting, ol i tokaut olsem dispela stretpela lain em Jonadap i piksa bilong ol, na ol dispela man i ‘krai na bel hevi’ long ol bikpela sik bilong spirit i stap long ol lotu i gat nem Kristen, em ol dispela manmeri ol inap kisim laip i stap oltaim long graun; Baibel i kolim ol olsem sipsip. (Esekiel 9⁠:4; 2 King 10⁠:​15, 16) Wastaua (tok Inglis) bilong Ogas 15, 1934, i soim rot long ol dispela “sipsip” na bai ol i ken ranawe i go long ol “taun bilong hait,” na Wastaua i tok, “Dispela lain em Jonadap i piksa bilong ol, ol i harim pinis krai bilong biugel bilong God na ol i bihainim toksave na ol i ranawe i go long oganaisesen bilong God na bung wantaim lain bilong God, na ol i mas i stap insait long dispela lain na ol i no ken lusim.”​—⁠Namba 35⁠:⁠6.

¹³ Long 1935 ol Witnes i singautim dispela lain em Jonadap i piksa bilong ol, ol i kam long wanpela bikpela kibung long Wosington, D.C., Amerika. Long dispela kibung long Fraide, Me 31, J. F. Rutherford i mekim wanpela bikpela tok, nem bilong en “Planti Manmeri Tru,” i stori long dispela bikpela lain, na em i tokaut klia olsem dispela bikpela lain em Baibel i kolim long Kamapim Tok Hait 7⁠:9 em dispela lain sipsip Matyu 25⁠:​33 i stori long en; ol i givim bel long God na ol i gat tingting long i stap oltaim long graun. Long dispela kibung i gat 840 nupela Witnes ol i kisim baptais, na planti ol i bilong dispela ‘bikpela lain.’ Dispela i makim olsem bihain bai i gat planti moa i kam insait long dispela bikpela lain bilong kisim laip long graun.a

14. Olsem wanem? Dispela ‘bikpela lain’ manmeri bai ol i insait long wok bilong ol dispela soldia i sindaun long hos na i go long pait? Long 1963 wanem bikpela toksave i kamap?

¹⁴ Yumi tingim dispela lain soldia i sindaun long hos na ol i kirap i go long pait long 1922 na bikpela stori bilong en i bin kamap long wanpela kibung long Toronto long 1927. Orait yumi laik save, dispela bikpela lain i bin i go wantaim dispela lain em Jon i piksa bilong ol na helpim ol long mekim dispela wok o olsem wanem? Ol i bin mekim! Ol i wok aninit long dispela liklik lain em 4-pela ensel i piksa bilong ol. Wanpela kibung, nem bilong en “Gutnius Bilong i Stap Oltaim,” i bin kamap long olgeta hap long 1963, na long dispela kibung dispela bikpela lain i bung wantaim liklik lain long mekim wanpela bikpela toksave, olsem ‘taim nogut tru bai painim dispela graun olsem wanpela traipela guria, na kain taim nogut olsem i no bin kamap bipo, na long dispela taim bai olgeta lain politik wantaim olgeta lotu ol i wankain olsem Babilon, bai ol i bagarap olgeta.’ Na ol i tokaut tu olsem “mipela bai wok yet long autim ‘gutnius bilong i stap oltaim’ long olgeta lain manmeri, em gutnius bilong Kingdom bilong God, na bilong tokaut long strafe bilong God bai painim ol man​—⁠ol dispela tok i olsem samting nogut tru i givim hevi long ol birua bilong God. Tasol God bai givim dispela strafe long ol bambai olgeta manmeri i laik lotuim God long spirit na long tok i tru olsem em i laikim, ol i ken lusim kalabus na i stap gutpela.” Ol i kamapim dispela strongpela toksave long 24 kibung i bin kamap long ol narapela narapela hap bilong graun, na inap 454,977 manmeri i bung long ol dispela kibung ol i wanbel long dispela toksave, na klostu olgeta ol i bilong bikpela lain.

15. (a) Long 2005 dispela ‘bikpela lain’ manmeri ol i hamas pesen bilong olgeta wokman bilong Jehova i autim tok? (b) Long beten bilong Jisas long Jon 17⁠:​20, 21, em i tok wanem long pasin wanbel i stap namel long bikpela lain na liklik lain?

¹⁵ Dispela ‘bikpela lain’ i wok yet long tokaut olsem ol i wanbel wantaim liklik lain long mekim wok bilong kapsaitim samting nogut tru i go long ol lotu i holim nating nem Kristen. Long 2005 inap 99.8 pesen bilong olgeta manmeri i mekim wok bilong autim tok bilong Jehova ol i bilong ‘bikpela lain.’ Dispela lain ol i wanbel tru wantaim liklik lain em Jisas i bin beten long helpim ol; long Jon 17⁠:​20, 21 em i beten olsem: “Mi no beten bilong helpim ol dispela man tasol. Nogat. Mi beten bilong helpim ol manmeri bai i harim tok bilong ol na i bilip long mi. Mi laik bai dispela olgeta man i ken i stap wanbel, olsem yu Papa, yu stap long mi na mi stap long yu. Olsem tasol mi laik bai ol i ken i stap long mitupela, na bai ol manmeri bilong graun i ken bilip olsem yu bin salim mi na mi kam.” Liklik lain i wok aninit long Jisas na ol i go pas long mekim wok, na dispela ‘bikpela lain’ i givim bel long wok wantaim ol long dispela bikpela wok, olsem ol man i sindaun long hos na ol i ran i go long wanpela bikpela pait nogut tru i kamapim bikpela bagarap, winim olgeta narapela pait i bin kamap long graun!b

16. (a) Jon i stori olsem wanem long maus na tel bilong ol hos long dispela piksa? (b) Jehova i mekim wanem bilong redim lain bilong em long autim gut tok? (c) “Tel bilong ol i olsem snek,” dispela i makim wanem samting?

¹⁶ Dispela bikpela lain soldia i mas i gat ol samting bilong pait. Na Jehova i givim pinis ol dispela samting long ol! Jon i stori long dispela olsem: “Strong bilong ol dispela hos i stap long maus na long tel bilong ol. Tel bilong ol i olsem snek, na i gat het. Na ol hos i save bagarapim ol manmeri long ol tel bilong ol.” (KTH 9⁠:19) Jehova i makim ol wokman bilong em i dediket na baptais pinis bilong mekim dispela wok. Long rot bilong ol miting bilong kongrigesen olsem Skul Bilong Wok Autim Tok na ol narapela miting na skul, em i bin skulim ol bambai ol inap autim gut tok na autim strong. Em i bin putim tok bilong em long maus bilong ol na em i salim ol i go long “bung bilong ol manmeri na long olgeta haus,” bilong autim strongpela tok bilong em long strafe bai painim ol man. (2 Timoti 4⁠:2; Aisaia 50⁠:4; 61⁠:2; Jeremaia 1⁠:​9, 10; Aposel 20⁠:20) Liklik lain na bikpela lain wantaim ol i mekim dispela wok, na inap planti yia ol i tilim planti milion milion Baibel na buk na nius, na tok bilong en i givim pen long ol man, olsem ol “tel” i sutim ol. Ol i tokaut long ol birua bilong ol olsem Jehova bai “bagarapim” ol, na long ai bilong ol birua, ol dispela lain olsem soldia i sindaun long hos na i mekim pait ol i olsem 200 milion.​—⁠Lukim Joel 2⁠:​4-6.

17. Long sampela kantri i gat tambu long wok bilong ol Witnes Bilong Jehova na ol i no inap tilim ol buk na nius bilong Baibel, olsem na ol i insait long wok bilong dispela lain soldia i go long pait, o nogat? Stori long dispela samting.

¹⁷ Wanpela hap bilong dispela lain em ol i wok strong, em ol brata i stap long ol kantri i tambuim wok bilong ol Witnes Bilong Jehova. Ol i olsem ol sipsip i stap namel long ol weldok, olsem na ol i mas ‘bihainim pasin bilong ol snek, na tingim gut pastaim ol samting ol i laik mekim. Na ol i mas bihainim pasin bilong ol dispela pisin ol i kolim balus na ol i no ken tingting long mekim wanpela pasin nogut.’ Ol i bihainim tok bilong Jehova na ol i no inap lusim wok bilong tokaut long ol samting ol i bin lukim na harim. (Matyu 10⁠:16; Aposel 4⁠:​19, 20; 5⁠:​28, 29, 32) Ol i no gat planti buk o nius samting bilong tilim long ol man, olsem na yu ting yumi ken tok ol i no insait long wok bilong dispela lain soldia ol i mekim pait? Nogat tru! Yumi no ken tok olsem. Ol i gat maus, na Jehova i givim pinis strong long ol na ol inap mekim wok long maus bilong ol long kamapim ol tok i tru bilong Baibel. Ol i mekim olsem, na ol i autim tok long kain kain taim na ples, na ol i mekim long gutpela pasin na bai ol man i putim yau long ol, na ol i kirapim ol Baibel-stadi na ol i “stiaim planti manmeri long bihainim stretpela pasin.” (Daniel 12⁠:⁠3) Tru ol i no sutim man long tel bilong ol, olsem tilim ol buk samting i gat ol strongpela tok long en; tasol i olsem smok na paia na ston salfa i paia i kamap long maus bilong ol taim ol i autim tok bilong bikpela De bilong Jehova i laik i kam, na long dispela De em bai litimapim nem bilong em.

18. Dispela lain soldia i sindaun long hos, ol i tilim hamas buk na nius i givim pen na hevi long ol man? Ol i wokim ol dispela buk samting long hamas tok ples na tilim long ol man?

¹⁸ Long ol narapela kantri ol buk na nius bilong Kingdom i wok long kamapim klia ol bilip na pasin giaman bilong ol lotu i gat nem Kristen, na long dispela rot i olsem ol dispela buk na nius i givim pen long ol dispela lotu, na i stret ol i kisim pen. Long nau ol dispela bikpela lain olsem soldia i sindaun long hos ol i gat ol nupela nupela masin bilong wokim ol buk na nius samting, na ol i wokim long kain kain tok ples, olsem 450. Olsem na insait long 68 yia i kam inap long 2005 dispela traipela lain ol inap tilim planti bilion Baibel na buk na nius samting​—⁠em planti moa yet, winim tru 200 milion. Ol dispela tel i bin givim bikpela pen tru long ol man!

19, 20. (a) Tru ol i sutim ol dispela strongpela toksave i go long ol kantri ol i tok ol i Kristen, tasol sampela manmeri long ol narapela kantri ol i mekim wanem long taim ol i harim dispela tok? (b) Tasol olsem Jon i stori long en, planti manmeri nabaut long graun ol i mekim wanem long taim ol i harim dispela tok?

¹⁹ Jehova i laik bai dispela tok em lain bilong em i autim i mas “kilim i dai wanpela lain olgeta.” Olsem na dispela strongpela tok i mas i go tru long ol lain i tok ol i Kristen. Tasol em i go long planti ol narapela hap tu, em ol kantri ol i no gat nem Kristen, tasol ol i save pinis long pasin giaman bilong ol lotu i tok ol i Kristen. Sampela manmeri bilong ol dispela narapela kantri ol i tanim bel i go long Jehova taim ol i lukim pen na hevi ol dispela lotu giaman i kisim! Long ol kantri i no strong long bihainim ol lotu i gat nem Kristen, ol manmeri i gat pasin daun na gutpela bel ol i wok long i kam insait long lain bilong Jehova. Tasol planti manmeri nabaut long graun, taim ol i harim ol dispela tok ol i mekim olsem Jon i stori long en, em i tok: “Ol arapela manmeri, em ol lain dispela tripela samting nogut i no kilim ol i dai, ol i no tanim bel na givim baksait long ol giaman god ol i bin wokim long han bilong ol yet. Ol i no lusim pasin bilong lotu long ol spirit nogut na long ol piksa bilong ol giaman god ol man i bin wokim long gol na long silva na long bras na long ston na long diwai, em dispela ol samting i no save lukluk na i no save harim toktok na i no save wokabaut. Ol dispela manmeri i bin kilim i dai ol arapela, na ol i bin wokim posin na [mekim wok long] ol arapela kain [strong], na ol i bin mekim pasin pamuk na stilim ol samting bilong ol arapela man. Tasol ol i no tanim bel na givim baksait long ol dispela pasin tu.” (KTH 9⁠:​20, 21) Ol manmeri kain olsem ol dispela lain em ol i no laik tanim bel, yumi no ken ting bai ol i kam long Jehova na em bai orait long ol. Nogat. Olgeta manmeri ol i strong long bihainim pasin nogut bilong ol na ol i no laik lusim, bai ol i kisim nogut long han bilong Jehova long bikpela de bilong em, em de bilong stretim bek gutnem bilong em. Tasol “olgeta manmeri i singaut long [Jehova] i helpim ol, em bai i kisim bek ol na bai ol i stap gut.”​—⁠Joel 2⁠:32; Sam 145⁠:⁠20; Aposel 2:​20, 21.

²⁰ Ol samting nau yumi bin stori long en, ol i insait long namba 2 bikpela hevi. Tasol i gat sampela samting moa i mas kamap pastaim na bihain dispela namba 2 bikpela hevi bai pinis. Sampela sapta i kamap bihain long dispela ol i stori long dispela samting.

[Ol Futnot]

[Piksa long pes 149]

Taim namba 6 ensel i winim biugel, dispela i kirapim namba 2 bikpela hevi

[Ol Piksa long pes 150, 151]

Fopela ensel i bosim traipela lain soldia i sindaun long hos na ol i go long pait

[Piksa long pes 153]

Dispela traipela lain soldia i bin tilim planti milion milion buk na nius bilong Baibel

[Piksa long pes 154]

Ol narapela manmeri ol i no tanim bel