Sapta 26

Tok Hait Bilong God​—Em i Kamap Ples Klia Olgeta!

 1. (a) Jon i tok wanem na bai yumi ken save, tok hait bilong God i kamap ples klia olgeta? (b) Bilong wanem ol ensel i singaut strong?

YU TINGIM yet tok bilong strongpela ensel long Kamapim Tok Hait 10:​1, 6, 7? Em i tok: “Taim i laik pinis nau. God bai i no inap wet moa. Nogat. Taim namba 7 ensel i winim biugel, na krai bilong en i kamap, orait dispela samting God i laik mekim na tok bilong en i bin hait i stap, em bai God i mekim i kamap tru. Em dispela gutnius bipo em i bin givim long ol profet, em ol wokman bilong en.” Taim Jehova i makim bilong winim laspela biugel, em dispela taim i kamap pinis! Na olsem wanem ol samting bilong tok hait i kamap ples klia olgeta na i no hait moa? Jon i amamas long tokim yumi. Em i tok: “Namba 7 ensel i winim biugel bilong en, na mi harim ol lain i stap long heven i singaut strong olsem, ‘Bikpela bilong yumi wantaim dispela man em i makim bilong kisim bek ol manmeri bilong en, tupela i kamap king bilong olgeta hap bilong graun. Na Bikpela bai i stap king oltaim oltaim.’ ” (KTH 11:15) Ol ensel i mekim dispela tok ol i mas singaut strong olsem klaut i pairap, long wanem, olgeta lain long heven na graun na olgeta samting i gat laip ol i mas harim. Em i bikpela samting bilong ol.

 2. Tok hait bilong God i kamap ples klia olgeta long wanem taim? Wanem samting i kamap long dispela taim?

² Taim Jehova i mekim tok hait bilong em i kamap ples klia olgeta, em bai gutpela samting tru na i samting bilong amamas! Em i kamap ples klia pinis long 1914 taim Jehova i givim wok king long Krais na bai Krais i stap helpim bilong em long mekim wok king. Krais Jisas i bihainim tok bilong Papa bilong em na em i kirap mekim wok king namel long ol birua, em ol man bilong dispela graun. Em i dispela Pikinini Jehova i bin tok promis long kamapim, na em i kisim strong bilong Kingdom na bai em i ken daunim dispela Snek wantaim lain bilong Snek na em i ken kamapim gen Paradais na bel isi long graun. (Stat 3:15; Song 72:​1, 7) Jisas i kamap King pinis na em bai truim ol tok bilong Jehova long Baibel na em bai mekim gut nem bilong Papa bilong em, olsem stretim bek dispela nem bilong Jehova, em i stap “King bilong olgeta taim.”​—1 Timoti 1:17.

 3. God Jehova i bin stap King inap long olgeta taim, orait, olsem wanem em i larim ol narapela king i kamap?

³ Tasol olsem wanem Jehova i “kamap king bilong olgeta hap bilong graun”? Em i bin stap King long olgeta taim, a? Em i stret. Asap bilong lain Livai em i bin tok: “God, bipo tru yu bin i stap king bilong mipela, na nau tu yu stap king bilong mipela.” Na narapela man bilong raitim song long Baibel em tu i bin tok: “[Jehova] i stap king. . . . [Jehova], long taim olgeta samting i no kamap yet, yu i stap. Yu stap oltaim oltaim, na yu stap king oltaim oltaim.” (Song 74:12; 93:​1, 2) Tasol Jehova i gat gutpela tingting na save, olsem na em i larim ol narapela king i kamap long graun. Em i bin mekim olsem, long wanem, long Iden tok i kamap olsem: Man inap lusim God na man yet i ken bosim gut wokabaut bilong em o nogat? Olsem na God i larim ol man i traim save bilong ol, tasol wok bilong ol long bosim graun em i pundaun olgeta! Profet bilong God i bin tok tru taim em i tok: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Kirap long taim tupela tumbuna bilong yumi, em Adam tupela Iv, i lusim Jehova na i kam inap long nau, Satan, “em dispela snek bilong bipo yet,” em i bin bosim olgeta man. (KTH 12:9; Luk 4:6) Olsem na long nau em taim bilong bikpela senis i mas kamap! Jehova i laik kamapim long ples klia olsem em i Nambawan Bikpela bilong heven na graun, olsem na long wanpela nupela rot, olsem long rot bilong Kingdom i stap long han bilong Krais, em i kirap long mekim wok king long olgeta hap bilong graun.

 4. Taim ol ensel i kirap winim ol biugel kirap long 1922, wanem bikpela samting em lain bilong Jehova i tokaut long en? Stori long dispela.

⁴ I gat 7-pela biugel i mas krai, na namba wan i kirap long krai long 1922. Long dispela taim ol Sumatin Bilong Baibel i kibung long Sida Poin long Ohaio, na Brata J. F. Rutherford i mekim wanpela tok, as bilong en em wanpela tok bilong Baibel, em i tok: “Kingdom bilong heven em i kam klostu pinis.” (Matyu 4:17) Na bilong pinisim tok, em i tok: “Orait, yupela lain bilong God Antap Tru, yupela kirap gen long autim tok! Pasim klos pait bilong yupela! Tingting gut na was gut! Wok strong na no ken pret! Stap gut olsem ol witnes tru bilong Bikpela. Kirap givim bel long autim tok i go inap long olgeta samting bilong Babilon i pinis olgeta. Bringim tok bilong Kingdom i go long olgeta hap bilong graun. Olgeta man i mas save Jehova em i God na Krais Jisas em i bikpela King winim ol narapela king, na em i Bikpela, winim ol narapela bikpela man. Nau em i bikpela taim. Harim, King i kirap pinis long mekim wok! Yupela i gat wok bilong autim tok long dispela samting. Olsem na yupela mas autim tok, autim tok, autim tok, na tokim ol man long dispela King na kingdom bilong em.” Presiden i kamapim planti tok long Krais Jisas i King bilong Kingdom bilong God, na nau bikpela wok i kirap long autim tok bilong Kingdom na tokaut long strafe bilong God bai painim dispela graun, na dispela tokaut i olsem krai bilong 7-pela biugel em ol ensel i winim.

 5. Long 1928 wanem samting i kamap long kibung bilong ol Sumatin Bilong Baibel na i olsem krai bilong biugel em namba 7 ensel i winim?

⁵ Ol Sumatin Bilong Baibel i bin mekim wanpela kibung long Detroit, Misigen, long Julai 30 i go inap Ogas 6, 1928, na sampela bikpela tok i kamap long dispela kibung i olsem krai bilong biugel em namba 7 ensel i winim. Ol dispela tok i kamap long 107 redio-stesin wantaim, na planti manmeri ol inap harim. Wanpela nius (The New York Times) i stori long dispela bikpela samting i bin kamap. Long dispela kibung ol i mekim wanpela strongpela tokaut olsem “Mipela i Nolaik Tru Long Satan na Mipela i Givim Bel Long Jehova.” Dispela tokaut i tok long Jehova bai daunim Satan wantaim oganaisesen nogut bilong em long Armagedon, na olgeta man i laikim tru stretpela pasin ol bai kamap fri na i stap gutpela. Long dispela kibung ol manmeri i givim bel long i stap aninit long Kingdom bilong God ol i amamas long kisim wanpela buk (Government) i gat 368 pes na i stori long gavman bilong God. Dispela buk i kamapim klia tru olsem God i putim Krais Jisas i kamap King long 1914.

Jehova i Kamapim Strong Bilong Em

 6. Jon i stori olsem wanem long bikpela tokaut i kamap long heven taim Krais i kamap King long Kingdom bilong God?

⁶ Krais i kamap King long Kingdom​—em samting bilong amamas long en! Jon i tok: “Dispela 24 hetman i save sindaun long sia bilong ol long ai bilong God, ol i brukim skru na putim pes bilong ol i go daun long graun, na ol i lotu long God. Ol i tok olsem: ‘Bikpela, yu God I Gat Olgeta Strong. Yu stap nau, na bipo tru yu stap. Yu kisim pinis bikpela strong bilong yu, na yu kamap king tru. Olsem na mipela i tenkyu long yu.’ ”​—KTH 11:​16, 17.

 7. (a) Hap lain bilong 24 hetman, olsem hap lain bilong 144,000, em ol i stap yet long graun, ol i mekim wanem bilong tenkyu long God Jehova? (b) Na hap lain bilong dispela 24 hetman i go pinis long heven ol tu i mekim wanem bilong tenkyu long God Jehova?

⁷ Dispela lain i tenkyu long God Jehova em ol 24 hetman, ol i olsem piksa na i makim ol brata bilong Krais ol i stap pinis long heven. Kirap long 1922, hap lain bilong 144,000 ol i stap yet long graun, ol i mekim wok em krai bilong ol biugel i bin kirapim. Long dispela taim ol i save gut long ol samting em Matyu 24:3–25:46 i makim. Paslain long dispela taim, ol narapela bilong lain 144,000 i bin ‘holim bilip i go inap long taim ol i dai,’ ol i kirap bek na i go long heven, na taim “ol i brukim skru na putim pes bilong ol i go daun long graun, na ol i lotu long” Jehova, i olsem olgeta bilong 144,000 i mekim. (KTH 1:10; 2:10) Ol i amamas, long wanem, Bikpela King bilong ol, em Jehova, i no bin lusim taim long kamapim long ples klia ol samting bilong tok hait bilong em!

 8. (a) Taim ensel i winim namba 7 biugel ol lain man i mekim wanem? (b) Ol i belhat long husat?

⁸ Tasol taim ensel i winim namba 7 biugel ol lain man bilong graun i no amamas; em taim bilong Jehova i mas kamapim belhat bilong em long ol. Olsem Jon i tok: “Ol haiden i belhat tru, tasol taim bilong yu long belhat em i kamap pinis. Nau em i taim bilong ol man i dai pinis ol i mas kamap long kot bilong yu. Nau em i taim bilong givim gutpela pe long ol wokman bilong yu, em ol profet, na ol manmeri bilong yu, na olgeta man i save pret long yu na i stap aninit long yu, em ol man i gat nem na ol man i no gat nem tu. Nau em i taim bilong bagarapim ol man i bin bagarapim graun.” (KTH 11:18) Kirap long 1914 i kam inap long nau, ol lain man bilong graun i pait na narapela i belhat long narapela, na ol i belhat long Kingdom bilong God, na ol i moa belhat long “tupela man bilong autim tok.”​—KTH 11:3.

 9. Ol lain man i mekim wanem na ol i bagarapim graun? God bai mekim wanem long dispela samting?

⁹ Long olgeta taim bipo ol lain man i bin pait, na ol i no bin lukautim gut ol samting bilong graun tu, na dispela i bin bagarapim graun. Tasol kirap long 1914 ol i bin mekim planti samting i moa bagarapim graun. Ol i tingting tasol long kisim bikpela mani long ol wok bisnis samting, na ol i paulim tu ol samting, olsem na graun i kamap nogut, na ol ples wesan i go bikpela, na planti hap graun i no gat gris moa long en. Ren i gat marasin nogut long en i pundaun long planti hap na bagarapim graun. Ol man i bin bagarapim ol hap bilong planim kaikai. Na ol i bagarapim ol wara na win. Pipia bilong ol haus faktori i bagarapim ol bikbus na ol animal na i bagarapim solwara. Na long wanpela taim bipo ol bikpela gavman i bin redi long pait long ol bom nuklia, na dispela samting inap long bagarapim tru olgeta hap bilong graun. Tasol gutpela tru, Jehova bai “bagarapim ol man i bin bagarapim graun”; em bai givim strafe long ol man i gat pasin antap na ol i no bilip long God; asua bilong ol na graun i stap nogut. (Lo 32:​5, 6; Song 14:​1-3) Olsem na Jehova i redi long salim namba 3 bikpela hevi i kam, na dispela bai mekim save long ol dispela bikhetman.​—KTH 11:14.

Bikpela Hevi Bai Painim Ol Bikhetman

10. (a) Namba 3 bikpela hevi em i wanem samting? (b) Olsem wanem namba 3 bikpela hevi i bikpela moa long narapela tupela hevi?

¹⁰ Nau em taim bilong namba 3 bikpela hevi. Em bai kamap hariap! Jehova bai salim dispela bikpela hevi bilong pinisim ol man i save bagarapim dispela gutpela graun yumi sindaun long en, em i ples Jehova i save “putim lek bilong [em] antap long en.” (Aisaia 66:1) Kingdom i stap long han bilong Krais​—em tok hait bilong God​—dispela Kingdom bai bagarapim ol bikhetman i wok long bagarapim graun. Tupela narapela bikpela hevi, em ol grasopa na ol soldia long hos, ol i bin givim bikpela hevi long ol bikman bilong ol misin na long ol narapela birua bilong God, tasol nau namba 3 bikpela hevi i laik painim ol, em bikpela hevi tru, na Kingdom bilong Jehova yet bai kamapim. (KTH 9:​3-​19) Kingdom bai pinisim ol man nogut bilong dispela graun na ol hetman bilong ol tu. Dispela samting bai kamap long pinis bilong taim bilong kot bilong Jehova long Armagedon. Daniel i bin tok profet long en na em i tok: “Na taim ol dispela king i stap yet [em ol dispela bikman i save bagarapim graun] God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.” Kingdom bilong God bai stap olsem wanpela traipela strongpela maunten, na taim Kingdom i bosim graun bai graun i kamap gutpela tru, na dispela samting bai kamapim long ples klia tru olsem Jehova em i bos tru bilong heven na graun, na olgeta man bai stap amamas inap oltaim oltaim.​—Daniel 2:​35, 44; Aisaia 11:9; 60:13.

11. (a) Tok profet i stori long wanem sampela gutpela samting bilong amamas bai kamap insait long de bilong Bikpela? (b) Ol man bai kisim wanem gutpela samting olsem presen, em wanpela pasin marimari tru i kam long ol? Ol i kisim dispela samting olsem wanem? Husat i as bilong dispela pasin marimari?

¹¹ Taim namba 3 bikpela hevi i kamap i gat sampela ol amamas tu bai kamap insait long de bilong Bikpela. “Em i taim bilong ol man i dai pinis ol i mas kamap long kot . . . Nau em i taim bilong givim gutpela pe long ol wokman bilong [God], em ol profet, na ol manmeri bilong [em], na olgeta man i save pret long [em] na i stap aninit long [em].” Dispela i makim olsem ol dispela man i bin dai ol i mas kirap bek! Ol manmeri bilong dispela lain em Jehova i bin makim ol long spirit holi na ol i dai, ol i mas kirap bek bihain liklik long taim de bilong Bikpela i kirap. (1 Tesalonaika 4:​15-​17) Bihain moa, taim ol narapela bilong dispela lain i dai, wantu tasol bai ol i kirap bek na i go antap long heven. Na sampela wokman moa bilong God bai kisim gutpela pe, olsem ol profet long bipo, na olgeta narapela man i bin pret long God na i stap aninit long em​—em dispela ‘bikpela lain manmeri’ ol i no bagarap long “bikpela hevi” tru, na ol man i dai pinis, “em ol manmeri i gat nem na ol manmeri nating” em ol bai kirap bek taim Krais i bosim Kingdom inap wan tausen yia. Em i holim ol ki bilong dai na matmat, na taim em i stap King em bai i gat rot long givim laip oltaim long olgeta man i wok strong long kisim dispela gutpela samting. (KTH 1:18; 7:​9, 14; 20:​12, 13; Rom 6:22; Jon 5:​28, 29) Maski man i kisim laip oltaim long heven o long graun, Jehova i givim dispela gutpela presen long ol, long wanem em i marimari long ol, na olgeta i ken amamas na tenkyu long em inap long olgeta taim bihain.​—Hibru 2:9.

Bokis Kontrak Bilong God

12. (a) Olsem Kamapim Tok Hait 11:19 i tok, Jon i lukim wanem samting long heven? (b) Bipo Bokis Kontrak i makim wanem samting? Olsem wanem long Bokis Kontrak taim ol Israel i go kalabus long Babilon?

¹² Jehova i stap King! Long rot bilong Kingdom bilong em long han bilong Krais, Jehova i mekim gutpela wok king na bosim olgeta man long graun. Jon i stori long samting em i lukim, olsem: “Ol hetman i tok pinis, orait ol ensel i opim haus bilong God i stap long heven, na ol i lukim Bokis Kontrak bilong God em i stap ples klia insait long haus bilong em. Na lait bilong klaut i sut i go nabaut na bikpela nois i kamap na klaut i pairap, na graun i guria na planti ren ais i kam daun.” (KTH 11:19) I no gat narapela hap long Kamapim Tok Hait i stori long Bokis Kontrak bilong God​—long dispela hap tasol. Bipo Bokis Kontrak i stap long Israel na dispela Bokis Kontrak i makim Jehova i stap wantaim lain bilong em, em ol Israel. Long haus sel na long haus lotu Solomon i wokim, Bokis Kontrak i save stap long Rum Tambu Tru. Tasol taim ol Israel i go kalabus long Babilon long yia 607 paslain long Krais, Jerusalem i bagarap na i no gat man i stap moa long en, na long dispela taim Bokis Kontrak i lus pinis. Bihain long dispela taim i no gat sampela lain moa bilong Devit “i kamap king bilong ol manmeri bilong Bikpela.”​—1 Stori 29:23.a

13. Jon i lukim Bokis Kontrak i stap long haus bilong God long heven, na dispela i makim wanem samting?

¹³ Inap 2,600 yia i go pinis, na long driman Jon i lukim Bokis Kontrak i stap gen, tasol em i no stap long haus lotu long graun; em i stap long haus bilong God long heven. Dispela samting i makim olsem Jehova i kirap gen long mekim wok king long rot bilong wanpela king bilong lain bilong Devit. Tasol long dispela taim dispela King, em Jisas Krais, em i bin kisim wok king long Jerusalem bilong heven, na long dispela gutpela ples antap em inap lukluk i kam daun na mekim laik bilong Jehova i kamap long graun. (Hibru 12:22) Ol sapta bilong Kamapim Tok Hait bihain long dispela, em bai kamapim long ples klia ol dispela samting.

14, 15. (a) Long Jerusalem bilong bipo, husat tasol inap lukim Bokis Kontrak? Olsem wanem na sampela moa i no inap lukim? (b) Long haus bilong God long heven, husat inap lukim Bokis Kontrak?

¹⁴ Jerusalem bilong bipo em i bin i stap long graun, na ol Israel nating i no inap lukim Bokis Kontrak, na ol pris i wok long haus lotu ol tu i no inap lukim, long wanem, em i stap long Rum Tambu Tru na i gat laplap i hangamap namel long Rum Tambu na Rum Tambu Tru na i olsem dua. (Namba 4:20; Hibru 9:​2, 3) Wanpela taim long olgeta yia hetpris i save go insait long Rum Tambu Tru long Bikpela De Bilong God I Tekewe Sin Bilong Ol Manmeri, na em wanpela tasol inap lukim Bokis Kontrak. Tasol taim haus bilong God long heven i op, Hetpris bilong Jehova, em Krais Jisas, em inap lukim Bokis Kontrak, na lain 144,000 nambatu pris ol tu inap lukim, na Jon i bilong dispela lain.

¹⁵ Sampela bilong lain bilong i go long heven ol i bin kirap bek long i dai na ol i go pinis long heven na ol i paslain long ol narapela, na ol i lukim gut dispela Bokis Kontrak, long wanem, ol i bilong dispela lain 24 hetman i stap klostu long sia king bilong Jehova. Na hap lain em Jon i piksa bilong ol, ol i stap yet long graun, tasol spirit bilong Jehova i bin givim save long ol na nau long tingting bilong ol i olsem ol inap lukim Jehova i stap long haus bilong em long heven. Na sampela mak i bin kamap long graun na bai ol man bilong graun tu i ken save long ol dispela gutpela samting. Jon i toktok long lait bilong klaut, na bikpela nois, na klaut i pairap, na guria, na ren ais. (Lukim Kamapim Tok Hait 8:5.) Ol dispela samting i makim wanem samting?

16. Dispela lait bilong klaut, na bikpela nois, na klaut i pairap, na guria, na ren ais, ol dispela samting i makim wanem samting?

¹⁶ Bihain long 1914 bikpela senis i bin kamap long ol samting bilong lotu, i olsem guria. Lain bilong Jehova i givim bel long tokaut strong, olsem “bikpela nois,” na ol i tokaut olsem Kingdom bilong God i kirap pinis. Na ol i givim strongpela toksave bilong Baibel long ol man, na i olsem “klaut i pairap.” Jehova i givim save long lain bilong em long ol tok profet long Baibel, na i olsem lait bilong klaut, na ol i autim long ol man. Na ol i tokaut tu long ol strafe God bai givim long ol misin i gat nem Kristen na long olgeta narapela lotu giaman, na dispela tok i paitim ol man olsem ren ais. Ol lain bilong graun inap kisim tingting long dispela samting. Tasol planti ol i no tingim​—ol i olsem ol man bilong Jerusalem long taim bilong Jisas, na ol i no pilim ol samting i kamap bilong truim ol tok piksa bilong Kamapim Tok Hait.​—Luk 19:​41-​44.

17, 18. (a) Krai bilong biugel bilong 7-pela ensel i givim wanem wok long ol Kristen i dediket pinis? (b) Olsem wanem yumi save ol dispela Kristen i mekim dispela wok?

¹⁷ Sevenpela ensel i wok yet long winim biugel bilong ol, na dispela i makim ol samting i wok long kamap hia long graun. Ol Kristen i dediket pinis ol i gat wok long autim tok long ol man long ol dispela samting, na ol i amamas long mekim dispela wok! Long 1986 ol i autim tok inap 680,837,042 aua, tasol long 2005 ol i autim tok inap 1,278,235,504 aua, em i go bikpela klostu dabol. Tru tumas, “samting God i laik mekim na tok bilong en i bin hait i stap, em bai God i mekim i kamap tru,” na lain bilong em ol i autim, na “tok bilong ol i go inap long olgeta ples.”​—KTH 10:7; Rom 10:18.

¹⁸ God i wok long kamapim long ples klia ol samting em bai mekim long rot bilong Kingdom, na yumi ken harim stori bilong sampela driman moa na yumi ken save long ol dispela samting.

[Futnot]

[Blok long pes 173]

Sampela Strongpela Tok Long Kot Bilong Jehova, Olsem Krai Bilong Biugel

 1. 1922 Sida Poin, Ohaio: Ol i tokaut olsem ol bikman bilong ol misin na politik na bisnis i no bin kamapim bel isi na gutpela sindaun na amamas long graun. Kingdom bilong Krais tasol inap kamapim.

 2. 1923 Los Enjeles, Kalifonia: Pablik-tok, em “Olgeta Lain i Wokabaut i Go Long Armagedon, Tasol Planti Milion Man Bilong Nau Ol i No Ken Dai,” i tokaut olsem ol man i gat pasin daun ol i mas lusim pasin bilong graun i olsem solwara nogut i bagarapim ol man.

 3. 1924 Kalambas, Ohaio: Ol i tokaut olsem ol pris pasto i gat kot, long wanem ol i litimapim nem bilong ol yet na ol i no autim tok bilong Kingdom. Ol Kristen tru i mas tokaut long belhat bilong God, na mekim gut bel bilong ol man i gat hevi.

 4. 1925 Indianapolis, Indiana: Ol i tokaut olsem ol lotu i gat nem Kristen ol i stap tudak long ol samting bilong spirit, tasol Kingdom bai kamapim bel isi na gutpela sindaun na pinisim sik na dai na ol man bai stap fri na i stap amamas inap oltaim.

 5. 1926 Landon, Inglan: Ol Witnes i amamas long Kingdom bilong God i kamap long heven, na ol i kamapim rong bilong ol misin, ol i bin sakim dispela Kingdom.

 6. 1927 Toronto, Kanada: Ol soldia i sindaun long hos ol i tokaut long ol man i mas lusim ol misin i holim nating nem Kristen na givim bel long Jehova na King na Kingdom bilong em.

 7. 1928 Detroit, Misigen: Ol i tokaut olsem ol i nolaik tru long Satan na ol i givim bel long Jehova, na ol i tokaut klia olsem Krais Jisas i kamap King long 1914 na em bai pinisim oganaisesen nogut bilong Satan na i no ken kalabusim moa ol man.

[Blok long pes 175]

Ol i Bagarapim Graun

‘Long olgeta 3 sekon 3 sekon ol man i bagarapim hap bus i bikpela inap olsem ples bilong pilai kikbal. Sapos bus i pinis, planti tausen kain gras na plaua na binatang na animal na pisin tu bai pinis.’​—Illustrated Atlas of the World (Rand McNally).

‘Insait long 200 yia i go pinis ol man i wok long bagarapim bikpela raunwara ol i kolim Gret Leks na nau em i kamap olsem bikpela toilet.’​—The Globe and Mail (Kanada).

Long Epril 1986 long Senobil, Yukren, ‘bikpela pairap na paia i kamap long ples bilong wokim paua long samting ol i save wokim bom nuklia long en, na marasin nogut bilong en i bagarapim win na wara na graun na i no ken orait gen inap longtaim. Em i winim ol bikpela bagarap bilong bom nuklia i kamap bihain long taim ol i bin tromoi tupela bom nuklia long Hirosima na Nagasaki.’​—JAMA; The New York Times.

Long Minamata long Japan ol i bin kapsaitim marasin nogut long solwara na dispela i bagarapim ol pis na kina samting, na planti man i kaikai dispela pis na kina samting ol i kisim wanpela sik ol i kolim sik Minamata, na ‘long 1985 dispela sik i stap long 2,578 man long Japan.’​—International Journal of Epidemiology.

[Piksa long pes 176]

Ol strongpela toksave bilong Kamapim Tok Hait 11:​15-​19 i olsem tok i go pas long ol driman i kamap bihain long en. Kamapim Tok Hait sapta 12 i kolim gen na i kamapim klia ol gutpela toksave i stap long Kamapim Tok Hait 11:​15, 17. KTH Sapta 13 i helpim tok bilong KTH sapta 11 na ves 18, na i stori long as bilong oganaisesen politik bilong Satan em i bin bagarapim graun, na em i wok long kamap strong olsem wanem. KTH Sapta 14 na 15 i stori moa long ol stretpela kot bilong Kingdom, na krai bilong namba 7 biugel na namba 3 bikpela hevi i insait long dispela samting.

[Ol Piksa long pes 174]

Jehova bai “bagarapim ol man i bin bagarapim graun”