‘Yupela Litimapim Nem Bilong Ja!’
“Olgeta samting i gat laip—litimapim nem bilong Ja.”—SONG 150:6, NW.
JISAS i kisim ol disaipel na kamapim lain Kristen, na maski ol man bilong lotu i birua tru long ol, lain bilong ol i kamap bikpela na ol i wok strong. Ol i “autim [gutnius] long olgeta manmeri i stap long graun.” (Kolosi 1:23) Tasol taim ol aposel bilong Krais Jisas i dai pinis, isi isi Satan i wok long pulim ol manmeri bilong God bambai ol i lusim lotu Kristen tru.
2 Ol aposel i toksave pinis long dispela samting bai kamap. Pol i bin tokim ol elda long Efesus: “Yupela i mas was gut long yupela yet, na long olgeta manmeri bilong sios bilong God, em ol dispela manmeri em i bin baim long blut bilong Pikinini bilong em yet. Na Holi Spirit i makim yupela i stap wasman bilong ol dispela sipsip bilong God. Mi save, taim mi lusim yupela na mi go pinis, ol weldok nogut tru bai i kam namel long yupela, na ol bai i bagarapim ol sipsip. Na sampela man bilong yupela yet bai i kirap na mekim tok giaman nabaut, bilong pulim ol manmeri bilong God i go bihainim ol.” (Aposel 20:28-30; lukim tu 2 Pita 2:1-3; 1 Jon 2:18, 19.) Olsem na lotu Kristen giaman i kamap, na long yia 350 samting dispela lotu i pas wantaim Gavman Bilong Rom. Sampela handet yia bihain, Gavman Holi Bilong Rom i wok wantaim pop bilong Rom na i kisim strong bilong bosim bikpela hap lain bilong graun. Bihain moa sampela i les long pasin nogut em misin Katolik i mekim na ol i bruk long misin na ol lotu Talatala i kamap, tasol ol i no kamapim bek lotu Kristen tru.
3 Tasol klostu long yia 1900, sampela manmeri i gat gutpela bel ol i stadi long Baibel na ol i kirap na mekim gen bikpela wok bilong ‘autim gutnius long olgeta manmeri i stap long graun.’ Ol i bin stadi gut long ol tok profet bilong Baibel, olsem na 30 yia paslain long yia 1914 ol i tokaut olsem, long dispela yia 1914, “taim God i bin makim bilong ol arapela lain” i pinis—em hap taim olsem “7-pela yia,” o 2,520 yia, em i kirap long taim ol lain i bin bagarapim Jerusalem long yia 607 paslain long Krais. (Luk 21:24; Daniel 4:16) Na tru tumas, long 1914 bikpela senis i kamap long graun. Long heven tu ol bikpela samting i kamap. Long dispela yia 1914, King bilong oltaim i putim Krais Jisas i stap king wantaim em long heven na em i redi long pinisim olgeta pasin nogut i stap long dispela graun na kamapim bek Paradais.—Song 2:6, 8, 9; 110:1, 2, 5.
Lukim King Mesaia!
4 Long 1914 dispela King Mesaia, em Jisas, em i kirap mekim wok. Baibel i kolim narapela nem tu bilong em, em Maikel. Insait bilong dispela nem i olsem: “Husat i Wankain Olsem God?” Em i kisim dispela nem, long wanem, em i laik kamapim long ples klia olsem Jehova em i Nambawan Bikpela King. Long Kamapim Tok Hait 12:7-12, aposel Jon i stori long ol samting bai kamap, olsem em i bin lukim long driman. Em i tok: “Bikpela pait i kirap long heven. Maikel wantaim ol ensel bilong en ol i pait long dispela traipela snek. Na snek wantaim ol ensel bilong en ol i bekim pait long ol, tasol ol i no gat strong bilong winim pait. Olsem na ol i no inap i stap moa long heven, na ol ensel bilong God i tromoi dispela snek i go daun. Em dispela snek bilong bipo yet, na ol i kolim em Satan na ‘Man I Save Kotim Olgeta Manmeri.’ Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en i go daun wantaim em.” Satan i pundaun nogut tru!
5 Nau wanpela strongpela maus long heven i tokaut olsem: “Nau God bilong yumi em i kisim bek yumi pinis, na strong bilong en i kamap pinis long ples klia, na em i stap king. Na dispela man em i makim bilong kisim bek ol manmeri bilong en, em i kisim pinis bikpela namba na strong. Long wanem, dispela man bilong kotim ol brata bilong yumi, em i bin kotim ol long ai bilong God bilong yumi long san na long nait, tasol nau ol ensel i tromoi em i go daun pinis. Ol brata bilong yumi ol i no bin laikim tumas laip bilong ol yet, na ol i no tingting strong long ol i mas i stap gut long graun. Nogat. Ol i bin kisim strong long blut bilong Pikinini Sipsip [Krais Jisas] na ol i strong long autim tok bilong em, maski ol birua i kilim ol i dai. Na long dispela pasin ol [Kristen i stap gut long God] i winim pait na daunim dispela birua. Olsem na yu heven, na yupela olgeta lain i stap long heven, yupela i ken amamas. Tasol yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” Em nau, God bai kisim bek ol manmeri i holimpas ol lo bilong em na ol i bilip long gutpela ofa bilong Jisas bilong baim bek ol man.—Sindaun 10:2; 2 Pita 2:9.
6 Dispela strongpela maus long heven i tokaut moa olsem: “Olsem na yu heven, na yupela olgeta lain i stap long heven, yupela i ken amamas. Tasol yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” Dispela “bikpela hevi” em Baibel i tok profet long en, em i kamap pinis—long taim bilong yumi ol bikpela pait bilong olgeta hap i bin kamap, na ol bikpela hangre, na bikpela sik, na ol guria, na pasin nogut i go bikpela. Long Matyu 24:3-13, Jisas i tok profet olsem ol dispela samting i hap bilong “mak” bilong taim bilong las de. Olsem Baibel i tok profet pinis, kirap long 1914 ol bikpela hevi i kamap long graun, na i no gat bikpela hevi olsem i bin kamap bipo.
7 Nau long dispela taim bilong bikpela hevi em Satan i kirapim, yu ting ol man inap wetim gutpela taim bai kamap bihain? Ol inap, long wanem, Matyu 12:21 i tok long Jisas olsem: “Ol manmeri bilong ol arapela lain bai ol i bilip long em na wetim em i helpim ol.” Ol dispela bikpela hevi i wok long painim ol lain man, em i olsem “mak” bilong taim bilong las de, na em i “mak” bilong Jisas i kam bek pinis na i stap King long Kingdom bilong heven. Jisas i tok moa long dispela Kingdom olsem: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Wanem lain long nau ol i autim gutpela tok olsem Kingdom bilong God bai bosim graun na pinisim olgeta hevi bilong ol man? Ol Witnes Bilong Jehova tasol! Ol i save taim i sot pinis, olsem na ol i wok strong long go long haus bilong ol man na tokim ol, klostu nau bai Kingdom bilong God i kirap bosim ol samting hia long graun, na em bai kamapim stretpela pasin na bel isi long graun. Olsem wanem long yu? Yu insait long dispela wok bilong autim tok? I no gat narapela wok i winim dispela wok!—2 Timoti 4:2, 5.
“Las De” Bai Kamap Olsem Wanem?
8 Nau olgeta lain man ol i stap long taim bilong kot. Olsem yumi lukim long 1 Pita 4:17, dispela kot i bin kirap pastaim long ‘lain bilong God yet’—God i skelim long kot ol lotu i tok ol i Kristen, na dispela wok i kamap ples klia kirap long taim dispela “taim bilong las de” i kirap na Namba Wan Pait Bilong Olgeta Hap i bagarapim planti man namel long yia 1914 na 1918. Long dispela kot, olsem wanem long ol lain i holim nating nem Kristen? Orait, tingim ol samting ol lotu i bin mekim bilong helpim ol pait i bin kamap, kirap long 1914 na i kam inap nau. Ol pris pasto i gat bikpela asua tru long ‘kilim nating ol man na blut bilong ol i pas i stap yet long ol klos bilong ol’ dispela pris pasto, em ol i bin tokim ol dispela man long go insait long pait.—Jeremaia 2:34.
9 Long Matyu 26:52, Jisas i tok: “Olgeta man i pait long bainat, bainat bai i bagarapim ol.” Dispela samting i kamap tru long ol pait i kamap long taim bilong yumi! Ol pris pasto i bin kirapim ol yangpela man long kilim i dai ol narapela yangpela man, maski ol i wanlotu bilong ol yet—ol Katolik i kilim i dai ol Katolik na ol Talatala i kilim i dai ol Talatala. Ol i litimapim moa yet kantri bilong ol, na ol i no litimapim nem bilong God na Krais olsem. Long sampela kantri long Afrika, ol man i tingim lain bilong ol, winim ol lo bilong Baibel. Long Ruanda, planti manmeri ol i bilong lotu Katolik, tasol inap olsem 500,000 i bin bagarap long ol pait i kamap namel long ol lain bilong Ruanda yet. Long nius bilong Vatiken (L’Osservatore Romano) pop i tokaut olsem: “Dispela em i pasin bilong pinisim wanpela lain olgeta, na sori tumas, ol Katolik tu i mekim dispela pasin.”—Skelim wantaim Aisaia 59:2, 3; Maika 4:3, 5.
10 King bilong oltaim i ting olsem wanem long ol lotu i save kirapim ol man long kilim i dai ol narapela, o ol i sanap lukluk tasol na ol i no mekim wanpela samting taim lain bilong ol i wok long kilim i dai ol wanlotu bilong ol? Kamapim Tok Hait 18:21, 24 i stori long Bikpela Babilon, em olgeta lotu giaman, na i tok: “Wanpela strongpela ensel i kisim wanpela ston i wankain mak olsem ol bikpela ston bilong wilwilim wit. Em i litimapim dispela ston na i tromoi i go daun long solwara. Na em i tok olsem, ‘Long dispela pasin tasol ol bai i kisim dispela bikpela taun Babilon na tromoi i go daun strong tru, na ol man bai i no inap lukim em moa.’ God i lukim dispela taun i gat asua bilong kilim i dai ol profet na ol manmeri bilong en. Na olgeta man bilong graun ol birua i bin kilim ol i dai, asua bilong dispela tu em i stap long Babilon tasol.”
11 Olsem Baibel i tok profet pinis, ol samting nogut tru i bin kamap insait long ol lain i holim nating nem Kristen. (Skelim wantaim Jeremaia 5:30, 31; 23:14.) Ol pris pasto i orait long kain kain pasin nogut, olsem na lain bilong ol i mekim olkain pasin pamuk na pasin sem. Amerika i tok em i kantri Kristen, tasol planti marit—klostu 50 pesen—ol i katim marit. Long lain bilong ol lotu, planti yangpela meri ol i kisim bel nating, na pasin sodom i pulap tru. Ol pris i save mekim pasin sem long ol pikinini—na dispela pasin i kamap planti taim. Sampela i tok, insait long 10-pela yia bihain, misin Katolik long Amerika bai tromoi wan bilion dola bilong baim kot bilong ol pris i bin mekim dispela pasin. Ol lotu i holim nating nem Kristen ol i sakim toksave bilong aposel Pol i stap long 1 Korin 6:9, 10: “Ol man i save mekim pasin nogut, ol bai i no inap i go insait long kingdom bilong God. Ating yupela i no save long dispela, a? Nogut yupela i giamanim bel bilong yupela yet. Ol man i save mekim pasin pamuk, na ol man i save lotu long ol giaman god, na ol man i trabel long ol maritmeri, na ol man i save mekim ol kain kain pasin i gat sem wantaim ol arapela man, na ol stilman, na ol man i save mangal . . . , na ol man i save spak, na ol man i save tok bilas long ol arapela man, na ol man i save pulim samting bilong ol arapela man, olgeta dispela kain man bai i no inap i go insait long kingdom bilong God.”
12 Liklik taim nau na long rot bilong Nambawan Kepten bilong em long heven, Krais Jisas, dispela King bilong oltaim, em Jehova, bai kirapim “bikpela hevi.” Namba wan lain bilong kisim strafe long kot bilong Jehova, em ol lotu i holim nating nem Kristen wantaim ol narapela lotu i hap bilong Bikpela Babilon. (KTH 17:16, 17) Jehova i bin wokim rot bilong kisim bek ol man long rot bilong ofa bilong Jisas, tasol ol dispela lain i kamapim long ples klia pinis olsem ol i no inap tru long Jehova i kisim bek ol. Ol i nolaik tru long nem holi bilong God. (Skelim wantaim Esekiel 39:7.) Ol i giaman tru taim ol i mekim singsing ‘Haleluya’ long ol bikpela haus lotu bilong ol! Ol i rausim nem bilong God long ol Baibel bilong ol, tasol i olsem ol i no tingim insait bilong dispela tok “Haleluya,” em “Litimapim nem bilong Ja”—dispela tok “Ja” em pasin bilong sotim nem “Jehova.” Olsem na Kamapim Tok Hait 19:1-6 i kamapim ol tok bilong dispela singsing ‘Haleluya,’ em liklik taim bai ol i mekim bilong amamas long God i givim strafe long Bikpela Babilon.
13 Bihain long en, Jisas bai ‘kam’ bilong makim na givim strafe long ol lain man. Em yet i tok profet olsem: “Taim Pikinini Bilong Man [Krais Jisas] i kam bek olsem king wantaim olgeta ensel, orait em bai i sindaun long sia king bilong en [em sia king bilong mekim kot]. Na olgeta lain manmeri [long graun] bai ol i kam bung long pes bilong em. Na em bai i tilim ol na putim ol long tupela lain, olsem wasman i save tilim ol sipsip i go long hap na ol meme i go long hap. Em bai i putim ol sipsip long han sut bilong en, na ol meme long han kais. Orait na king bai i tokim ol manmeri i stap long han sut bilong en olsem, ‘Yupela i gat blesing bilong Papa bilong mi. Em i laik mekim gut long yupela. Yupela kam kisim kingdom Papa i bin redim na makim bilong yupela pinis, long taim graun i kamap nupela yet.’ ” (Matyu 25:31-34) Mt 25 Ves 46 i tok, lain i olsem meme ol bai “i go bilong kisim pe nogut, em pen [olsem bagarap] i save stap oltaim. Tasol ol stretpela manmeri bai i kisim laip i stap oltaim oltaim.”
14 Hap bilong Kamapim Tok Hait long Baibel i stori long “King bilong olgeta king, na Bikpela bilong olgeta bikman,” em Krais Jisas, Bikpela bilong yumi long heven, em bai sindaun long hos na kam bilong mekim pait long Armagedon, na em bai pinisim tru olgeta wok politik na bikpela bisnis em Satan i bin kamapim long graun. Long dispela rot Krais i kapsaitim long graun bilong Satan “bikpela belhat bilong God I Gat Olgeta Strong.” Taim “ol dispela samting bilong bipo ol i pinis olgeta,” ol man i pret long God na i stap aninit long em, em bai bringim ol i go insait long gutpela nupela taim na bai em “i mekim drai wara i stap long ai bilong . . . ol.”—KTH 19:11-16; 21:3-5.
Taim Bilong Litimapim Nem Bilong Ja
15 Dispela taim bilong givim strafe long ol man i klostu pinis! Olsem na yumi mas putim gut yau long tok profet bilong King bilong oltaim. Wanpela maus long heven i mekim wanpela tokaut i go long ol manmeri i kalabus yet long ol tok na pasin bilong ol lotu giaman, na dispela maus i tokaut olsem: “Yupela ol manmeri bilong mi, yupela i mas lusim dispela ples na i kam ausait. Nogut yupela i poroman wantaim em long ol sin em i save mekim. Na nogut yupela bai i poroman wantaim em tu long taim em i kisim pe nogut bilong ol dispela sin.” Tasol ol i mas ranawe i go we? I gat wanpela tok i tru tasol, olsem na i gat wanpela lotu tru tasol. (KTH 18:4; Jon 8:31, 32; 14:6; 17:3) Bilong kisim laip i stap oltaim, yumi mas painim dispela lotu na bihainim tok bilong God bilong en. Baibel i stiaim yumi i go long em long Song 83:18, em i tok: “Yu, nem bilong yu tasol em JEHOVA, yu God antap tru, na yu save bosim olgeta hap bilong graun.”—Baibel King James Version.
16 Tru, yumi mas save long nem bilong King bilong oltaim, tasol yumi mas mekim sampela samting moa. Yumi mas stadi long Baibel na kisim save long ol gutpela gutpela pasin bilong Em na ol samting em i laik mekim. Taim yumi kisim pinis dispela save, orait nau yumi mas mekim wok bilong em bilong dispela taim nau, olsem Rom 10:9-13 (NW) i makim. Aposel Pol i kamapim tok bilong ol profet na bihain em i tok: “Olgeta manmeri i singaut long nem bilong Jehova, bai em i kisim bek ol.” (Joel 2:32; Sefanaia 3:9) Tru God bai i kisim bek ol? Yes, planti tausen tausen manmeri bilong nau em ol i bilip long samting Jehova i mekim bilong kisim bek yumi long rot bilong ofa bilong Krais, ol bai abrusim bagarap long taim bilong “bikpela hevi,” taim Jehova i givim strafe long olgeta lain bilong Satan long graun.—KTH 7:9, 10, 14.
17 Wanem laik bilong God long ol man i laik abrusim bagarap long dispela taim? Em i laik bai nau yumi mekim singsing bilong Moses na bilong Pikinini Sipsip na litimapim nem bilong King bilong oltaim, long wanem, yumi save em bai winim pait. I olsem yumi mekim dispela singsing taim yumi autim tok long ol man long ol gutpela samting Jehova i laik mekim. Taim yumi wok long kisim save long Baibel, yumi givim skin bilong yumi olgeta long King bilong oltaim, olsem dediket long em. Olsem bai yumi inap i stap oltaim oltaim long nupela taim dispela strongpela King i toktok long en, olsem yumi lukim long Aisaia 65:17, 18: “Lukim, mi wokim nupela skai [Kingdom bilong Mesaia] na nupela graun [nupela lain manmeri ol i bihainim stretpela pasin]. Na ol man bai i no inap tingim moa ol samting i bin kamap bipo. Yupela i ken bel gut na amamas oltaim long nupela samting nau mi wokim.”
18 Devit, em man bilong raitim Song, em i stori long King bilong oltaim olsem: “Bikpela [em Jehova] i gat biknem na yumi mas litimapim biknem bilong em moa yet. Em i antap tru na yumi no inap save olgeta long biknem bilong en.” (Song 145:3) Tru tumas, yumi no inap save long biknem bilong em, olsem yumi no inap save long kirap o pinis bilong ples antap na bilong ol de na yia! (Rom 11:33) Taim yumi wok long kisim save long Man bilong wokim yumi na long ol samting em i mekim long rot bilong ofa bilong Pikinini bilong em, Krais Jisas, bilong baim bek yumi, bai yumi gat laik long litimapim moa yet nem bilong King bilong oltaim. Bai yumi laik mekim olsem Song 145:11-13 i tok: “Bai ol i tok long biknem bilong yu i stap long olgeta ples yu bosim, na bai ol i stori long bikpela strong bilong yu. Olsem na bai olgeta manmeri i ken save long ol bikpela wok yu bin mekim. Na ol i ken save olsem yu stap strongpela king, na nem bilong yu i bikpela tru. Yu bai i stap king na bosim olgeta lain manmeri oltaim oltaim.”
19 Yumi ken bilip tru olsem God bilong yumi bai i bihainim tok promis bilong em, olsem: “Em i save givim kaikai samting long olgeta inap long ol i stap gut.” Long pasin isi King bilong oltaim bai bringim yumi i go long pinis bilong dispela taim bilong las de, long wanem, Devit i tokim yumi pinis: “Em [Jehova] i save was gut long ol manmeri i save laikim em tru. Tasol em bai i bagarapim ol manmeri i save mekim pasin nogut.”—Song 145:16, 20.
20 Long kirap na pinis bilong 5-pela laspela Song long Buk Song, ol i singautim yumi long litimapim nem bilong Ja. Song 146 i tok: “Litimapim nem bilong Bikpela. Mi yet mi mas litimapim nem bilong em. . . . Bai mi mekim song bilong litimapim nem bilong God bilong mi inap long taim mi dai.” Bai yu mekim olsem? Tru tumas, yu mas laik long litimapim nem bilong em! Yu mas insait long dispela lain em Song 148:12, 13 i stori long ol, olsem: “[Yupela] ol yangpela man na ol yangpela meri, na ol lapun na ol pikinini, yupela olgeta litimapim nem bilong Bikpela! Tru tumas, olgeta i mas litimapim nem bilong Bikpela. Biknem bilong em . . . i antap tru, i winim heven na graun.” Yes, yumi olgeta i mas givim bel long bihainim tok olsem: ‘Litimapim nem bilong Ja!’ Yumi mas bungim nek wantaim long litimapim nem bilong King bilong oltaim!
Yu Laik Bekim Wanem Tok?
◻ Ol aposel bilong Jisas i toksave long wanem samting bai kamap?
◻ Kirap long 1914, wanem sampela bikpela wok i bin kamap?
◻ Klostu nau Jehova bai givim strafe long husat, olsem kot bilong em i makim pinis?
◻ Bilong wanem nau em i taim tru bilong litimapim nem bilong King bilong oltaim?
[Askim Bilong Stadi]
1, 2. (a) Long taim bilong ol aposel, lotu Kristen i go bikpela inap long wanem mak? (b) Ol aposel i bin givim wanem toksave long ol Kristen? (c) Lotu Kristen giaman i bin kamap olsem wanem?
3. (a) Wanem taim ol i bin autim gutnius long olgeta manmeri i stap long graun? Ol i bin mekim dispela wok olsem wanem? (b) Wanem samting i bin kamap long 1914 na i stret wantaim samting ol i bin lukim long Baibel na ol i wet long en?
4. Olsem wanem Jisas i truim insait bilong nem bilong em, Maikel?
5, 6. (a) Bihain long 1914, wanem gutpela tokaut i kamap long heven? (b) Olsem wanem tok bilong Matyu 24:3-13 i stret wantaim dispela tokaut?
7. Bilong wanem ol Witnes Bilong Jehova i wok strong long autim tok?
8, 9. (a) Olsem wanem kot i kirap pastaim long “lain bilong God yet”? (b) Ol lain i holim nating nem Kristen ol i mekim wanem na ol i brukim lo bilong God long Baibel?
10. Wanem samting bai painim ol lotu giaman olsem kot bilong Jehova i makim?
11. Wanem ol samting nogut tru i kamap insait long ol lain i holim nating nem Kristen?
12. (a) King bilong oltaim bai kirap na mekim wanem long Bikpela Babilon? (b) I gat wanem as na lain bilong God bai mekim singsing “Haleluya”?
13, 14. (a) Wanem ol bikpela samting bai kamap bihain long dispela? (b) Wanem gutpela samting bai painim ol manmeri i pret long God?
15, 16. (a) Bilong wanem yumi mas putim yau long ol tok profet bilong Jehova? (b) Olsem ol profet na aposel i makim, yumi mas mekim wanem bambai God i ken kisim bek yumi? Olsem na planti tausen tausen manmeri bilong nau ol inap mekim wanem?
17. Yumi wetim wanem gutpela samting na dispela i mas kirapim yumi nau long mekim singsing bilong Moses na bilong Pikinini Sipsip?
18, 19. (a) Tok bilong Devit long Song 145 i mas kirapim yumi long mekim wanem? (b) Yumi inap bilip tru olsem Jehova bai mekim wanem long yumi?
20. Yu mekim wanem long singaut em King bilong oltaim i mekim long yumi, olsem i stap long 5-pela laspela Song long Buk Song?
[Blok long pes 19]
Dispela Taim Nogut Bilong Planti Hevi
Planti man i luksave olsem bihain liklik long yia 1900, taim nogut bilong planti hevi i kirap. Wanpela bikman bilong gavman long Amerika, em Daniel Patrick Moynihan, em i raitim wanpela buk (Pandaemonium) long yia 1993, na long tok i go pas em i toktok long “bikpela bagarap i kamap long 1914.” Em i tok: “Bikpela pait i kamap na ol samting long graun i senis olgeta. Long nau i gat 8-pela kantri tasol em ol i bin i stap long 1914 na ol i no bin mekim pait na daunim gavman bilong ol bihain long dispela taim. . . . Long ol narapela 170 samting kantri i stap long nau, sampela i nupela tru na i no gat planti hevi i kamap yet long ol.” Tru tumas, kirap long 1914 planti hevi na ol bikpela pait na bagarap i bin kamap!
Ol i wokim narapela buk long 1993 (Out of Control—Global Turmoil on the Eve of the Twenty-First Century). Man bilong raitim dispela buk em Zbigniew Brzezinski, bipo em i stap nambawan bilong Nesenel Sekyuriti Kaunsil bilong Amerika. Em i tok: “Planti buk i tok, Taim Bilong Save i kirap tru long yia 1900 samting. . . . Ol man i bin ting, insait long 100 yia bihain long 1900, gutpela taim bai kamap, tasol nogat; insait long dispela hap taim, blut bilong planti planti man i bin kapsait na pasin birua i go bikpela tru; ol man bilong politik i mekim ol tok nating, na ol bikpela pait nogut i bin bagarapim planti man. Ol man i lain long mekim pasin nogut tru long ol narapela man, na ol i wokim planti samting nogut bilong pait. Ol i kisim bikpela save ol inap mekim gutpela wok long en, tasol ol i mekim wok nogut tru bilong politik long en. I no gat wanpela taim bipo ol i bin kilim i dai planti man long olgeta hap olsem ol i mekim long dispela taim; i no gat wanpela taim bipo ol i bin bagarapim laip bilong planti man olsem ol i mekim long dispela taim; i no gat wanpela taim bipo ol i bin wok strong long pinisim tru olgeta manmeri bambai ol inap mekim ol samting ol i laik mekim long pasin hambak bilong ol.” Dispela tok i stret tru!
[Piksa long pes 17]
Maikel i tromoi Satan wantaim bikpela lain ensel nogut bilong em i kam daun long graun bihain long taim Kingdom i kamap pinis long 1914