Sapta 16
Gavman Bilong God i Kirap Mekim Wok
1. (a) Longtaim ol bilipman i wetim wanem samting? (b) Bilong wanem ol i kolim kingdom bilong God olsem wanpela “taun”?
INAP longtaim pinis ol manmeri i bilip long gavman bilong God ol i bin wetim dispela gavman i kirap mekim wok bilong en. Baibel i tok, Ebraham ‘i wetim dispela taun God i bin wokim.’ (Hibru 11:10) Dispela “taun” em kingdom bilong God. Tasol bilong wanem Baibel i kolim olsem wanpela “taun”? Long wanem bipo ol taun i gat king bilong ol. King i bosim taun, olsem na dispela taun i olsem kingdom bilong em.
2. (a) Olsem wanem yumi save ol disaipel bilong Krais i tingim kingdom bilong God i wanpela samting tru? (b) Ol i laik save long wanem samting bilong dispela kingdom?
2 Ol disaipel bilong pastaim ol i tingim kingdom bilong God i wanpela samting tru. Olsem na ol i laik save long wok bilong en. (Matyu 20:20-23) Ol i laik save wanem taim Krais wantaim lain bilong em bai kirap mekim wok king. Taim Jisas i kirap bek pinis, wanpela taim em i kamap long ai bilong ol disaipel na ol i askim em: “Bikpela, ating nau long dispela taim bai yu kirapim gen kingdom bilong Isrel, o nogat?” (Aposel 1:6) Olsem wanem? Yu tu yu laik save wanem taim Krais i kirap mekim wok king long gavman bilong God?
DISPELA GAVMAN OL KRISTEN I BETEN ASKIM GOD LONG EN
3, 4. (a) Olsem wanem yumi save long olgeta taim God i stap king? (b) Olsem na bilong wanem Jisas i lainim ol disaipel long beten olsem: ‘Kingdom bilong God i mas i kam’?
3 Krais i lainim ol disaipel long beten long God, olsem: “Kingdom bilong yu i mas i kam.” (Matyu 6:9, 10) Tasol Jehova i stap king long olgeta taim, a? Olsem na bilong wanem yumi beten na tok, ‘Kingdom bilong yu i mas i kam’?
4 Tru Baibel i tok, Jehova em i “King bilong olgeta taim.” (1 Timoti 1:17) Na Baibel i tok, “Bikpela i stap king long heven, na em i bos bilong olgeta samting.” (Sam 103:19) Olsem na long olgeta taim Jehova i stap Nambawan Bikpela King na em i bosim olgeta samting em i bin wokim. (Jeremaia 10:10) Tasol Seten na Adam tupela Iv i bikhet na ol i no laik bai God i bosim ol, olsem na God i wokim rot bilong kamapim wanpela gavman i narapela kain. Em dispela gavman tasol Krais Jisas i lainim ol disaipel long beten askim God long en. Wok bilong dispela gavman em bilong pinisim ol hevi i bin kamap taim Seten na sampela moa ol i bikhet long wok king bilong God.
5. Sapos em i kingdom bilong God, bilong wanem ol i kolim tu olsem kingdom bilong Krais na kingdom bilong lain 144,000?
5 Bikpela King, God Jehova, em i givim strong na namba bilong mekim wok long dispela nupela Kingdom o gavman. Em kingdom bilong em. Planti taim Baibel i kolim olsem “kingdom bilong God.” (Luk 9:2, 11, 60, 62; 1 Korin 6:9, 10; 15:50) Tasol nau God i makim Pikinini bilong em bilong kamap Nambawan King long dispela kingdom, olsem na sampela taim Baibel i kolim olsem kingdom bilong Krais. (2 Pita 1:11) Yumi save pinis 144,000 manmeri bilong graun bai wok king wantaim Krais long dispela kingdom. (Revelesen 14:1-4; 20:6) Olsem na Baibel i kolim tu olsem “kingdom bilong ol.”—Danyel 7:27, NW.
6. Sampela man i tok, kingdom bilong God i kirap mekim wok long wanem taim?
6 Sampela man i tok, dispela kingdom i kirap mekim wok taim Jisas i go bek long heven. Ol i tok, Krais i kirap mekim wok king taim em i kapsaitim spirit holi long lain bilong em long de Pentikos long yia 33 C.E. (Aposel 2:1-4) Tasol dispela Kingdom God i wokim bilong pinisim ol hevi Seten i bin kamapim, em i no kirap mekim wok long dispela taim bipo. I no gat wanpela samting na yumi ken tok, gavman bilong God long han bilong Krais, olsem dispela “pikinini man,” em i bin kamap long dispela taim bipo. Nogat. (Revelesen 12:1-10) Orait, olsem wanem? Long yia 33 C.E. Jisas i kirap bosim wanpela lain na i olsem em i gat wanpela kingdom?
7. Kirap long yia 33 C.E. Krais i bin bosim wanem lain?
7 Tru tumas. Long wanem long dispela taim Jisas i kirap bosim kongrigesen bilong em, em dispela lain bihain bai ol i stap wantaim em long heven. Olsem na Baibel i tok, taim ol i stap yet long graun God i ‘putim ol insait long kingdom bilong Pikinini bilong em.’ (Kolosi 1:13) Tasol dispela “kingdom” i bosim ol Kristen ol i bilong i go long heven, em i no dispela Kingdom o gavman Krais i lainim ol disaipel long beten askim God long en. Nogat. Kirap long yia 33 na i kam inap long nau lain 144,000 tasol ol i stap aninit long dispela ‘kingdom bilong Pikinini bilong God.’ Olsem na dispela ‘kingdom’ bai pinis taim olgeta manmeri bilong dispela lain bilong heven ol i dai na ol i go i stap wantaim Krais long heven. Bai ol i no i stap aninit moa long Krais. Bai ol i stap king wantaim em long dispela Kingdom o gavman longtaim God i tok promis long kamapim.
EM I KIRAP MEKIM WOK KING NAMEL LONG OL BIRUA
8. (a) Olsem wanem yumi save, taim Krais i kirap bek pinis em i mas wet pastaim na bihain bai em i kirap mekim wok king? (b) Orait, taim Krais i mas kirap mekim wok king, God i tok wanem long em?
8 Taim Jisas i kirap bek i go long heven em i no kirap mekim wok king long gavman bilong God long dispela taim. Nogat. Em i mas wet pastaim, olsem aposel Pol i tok: “Tasol Krais em i mekim wanpela ofa tasol bilong tekewe sin, na dispela em inap long olgeta taim. Em i mekim olsem, na em i sindaun long han sut bilong God. Em i stap olsem na i wetim taim bilong God i putim ol birua bilong en i go aninit long em.” (Hibru 10:12, 13) Taim bilong Krais i kirap mekim wok king i kamap na Jehova i tokim em: ‘Yu go daunim ol birua bilong yu.’—Sam 110:1, 2, 5, 6.
9. (a) Olsem wanem na sampela man i no laikim kingdom bilong God? (b) Taim gavman bilong God i kirap mekim wok, ol lain man i mekim wanem?
9 Ating yu kirap nogut taim yu harim olsem sampela man i birua long gavman bilong God. Tasol sampela man i no laik i stap aninit long wanpela gavman i tok, lain bilong en ol i mas bihainim pasin i stret. Olsem na taim Baibel i stori long Jehova wantaim Pikinini bilong em i kirap bosim graun, Baibel i tok, ‘ol lain man i belhat.’ (Revelesen 11:15, 17, 18) Ol lain man i no amamas long kingdom bilong God, long wanem Seten i giamanim ol na ol i birua long dispela kingdom.
10, 11. (a) Taim gavman bilong God i kirap mekim wok, wanem samting i kamap long heven? (b) Wanem samting i kamap long graun? (c) Olsem na i gat wanem bikpela samting yumi mas tingim?
10 Taim gavman bilong God i kirap mekim wok, Seten wantaim ol ensel bilong em ol i stap yet long heven. Ol i birua long Kingdom, olsem na wantu pait i kamap long heven, na ol i rausim Seten wantaim ol ensel bilong em. Nau wanpela maus i singaut strong olsem: “God bilong yumi em i kisim bek pinis yumi, na strong bilong em i kamap pinis long ples klia, na em i stap king! Na Krais bilong en i kisim pinis bikpela namba.” Em nau, kingdom bilong God i kirap mekim wok! Nau ol i rausim pinis Seten wantaim ol ensel bilong em long heven, olsem na Baibel i tok: “Yu heven, na yupela olgeta i stap long heven, yupela i ken amamas!”—Revelesen 12:7-12.
11 Olsem wanem? Long graun tu ol i ken amamas? Nogat! Bikpela hevi tru i kamap long graun. Baibel i tok: “Tasol yu graun, na yu solwara, yupela lukaut! Bikpela hevi i laik kamap long yupela! Seten i go daun pinis long yupela, na em i gat bikpela belhat tru. Em i save, em i gat sotpela taim tasol.” (Revelesen 12:12) Olsem na i gat wanpela bikpela samting yumi mas tingim: Taim kingdom bilong God i kirap mekim wok i no olsem gutaim bai kamap wantu tasol long graun. Nogat. Taim Kingdom i bosim tru olgeta hap graun, orait gutaim tru bai kamap. Em bai kamap long pinis bilong “sotpela taim” bilong Seten. Long dispela taim bai Seten wantaim ol ensel bilong em i kalabus na bai ol i no inap givim hevi moa long ol man.
12. Olsem wanem yumi save Baibel i mas tokim yumi long taim kingdom bilong God i mas kirap mekim wok?
12 Tasol wanem taim ol i rausim Seten long heven na bikpela hevi i kamap long graun inap “sotpela taim”? Wanem taim gavman bilong God i kirap mekim wok? Baibel i tokim yumi long dispela samting? I stret Baibel i mas tokim yumi, long wanem bipo yet Baibel i tok Pikinini Bilong God i mas kamap man long graun na kamap Mesaia o Krais, na i makim stret dispela yia em i kamap Mesaia. Orait, olsem wanem long taim dispela Mesaia i kirap mekim wok king long Kingdom? I stret Baibel i mas makim dispela taim tu!
13. Olsem wanem Baibel i makim yia stret bilong Mesaia i kamap long graun?
13 Tasol wanem hap bilong Baibel i makim taim stret Mesaia i mas kamap long graun? Hap bilong Danyel i tok: “Taim ol i putim tok long stretim na wokim gen Jerusalem inap long taim Hetman Mesaia i kam, em inap olsem 7-pela wik, na 62 wik,” em olsem 69 wik olgeta. (Danyel 9:25, NW) Tasol em i no 69 wik tru, olsem 483 de. Nogat. Dispela tok “wik” i no makim 7-pela de, em i makim 7-pela yia. Olsem na dispela “69 wik” i olsem 483 yia. (Lukim Nambas 14:34.) Long yia 455 B.C.E. ol i putim tok long stretim na wokim gen banis bilong Jerusalem. (Niemaia 2:1-8) Olsem na dispela “69 wik” i pinis 483 yia bihain, olsem long yia 29 C.E. Na long dispela yia stret Jisas i go long Jon bilong kisim baptais! Na spirit i makim em na em i kamap Mesaia o Krais.—Luk 3:1, 2, 21-23.
TAIM GAVMAN BILONG GOD I KIRAP MEKIM WOK
14. Dispela “diwai” Danyel sapta 4 i stori long en i makim wanem samting?
14 Orait, wanem hap bilong Baibel i kolim taim bilong Krais i kirap mekim wok king long gavman bilong God? Em hap bilong Danyel tasol. (Danyel 4:10-37) Danyel i tok profet long wanpela draipela diwai i makim King Nebukatnesa bilong Babilon, em nambawan bikpela king long graun long dispela taim. Tasol God Jehova i mekim save long King Nebukatnesa bambai em i ken save, i gat wanpela Bikpela Man em i stap em i winim King Nebukatnesa. Dispela Man em God Jehova, em i “Nambawan Bikpela” na “King bilong Heven.” (Danyel 4:34, 37, NW) Olsem na dispela draipela diwai i makim wok king bilong God, em dispela wok king em i mekim bilong bosim graun. Bipo, inap liklik hap taim, Jehova i mekim dispela wok king long rot bilong wanpela kingdom em i kamapim bilong bosim lain Isrel. Em i makim ol king bilong lain Juda bilong bosim Isrel, olsem na Baibel i tok ol dispela king i “sindaun long sia king bilong Jehova.”—1 Kronikel 29:23, NW.
15. Taim ol i katim dispela “diwai” na i pundaun, bilong wanem ol i pasim banis ain long en?
15 Danyel sapta 4 i tok ol i katim dispela draipela diwai na i pundaun, tasol ol i larim as bilong en i stap, na ol i pasim banis ain na bras long en. Na bai dispela as bilong diwai i no ken kru na kamap gen inap long taim God i makim bilong tekewe dispela banis. Tasol olsem wanem ol i katim dispela wok king o kingdom bilong God na i pundaun? Na wanem taim ol i mekim?
16. (a) Olsem wanem ol i katim wok king bilong God na i pundaun? Wanem taim ol i mekim? (b) Jehova i tok wanem long laspela king bilong Juda em i sindaun long “sia king bilong Jehova”?
16 Bihain, dispela kingdom bilong Juda em Jehova i bin kamapim, em i go nogut olgeta. Olsem na long 607 B.C.E. Jehova i larim King Nebukatnesa i bagarapim dispela kingdom, olsem katim na i pundaun. Long dispela taim Sedekaia i stap king, em laspela king bilong Juda i sindaun long sia king bilong Jehova, na Jehova i tokim em: “Lusim dispela hat bilong king. . . . na wanpela man i no ken kisim inap long taim dispela man i kamap, em man bilong kisim, na bai mi givim long em.”—Esikiel 21:25-27, NW.
17. Wanem hap taim i kirap long 607 B.C.E.?
17 Olsem na dispela wok king bilong God em “diwai” i makim, em i pundaun long yia 607 B.C.E. Na i no gat wanpela kingdom moa long graun i olsem piksa na i makim wok king bilong God. Olsem na long yia 607 B.C.E. dispela hap taim i kirap em Krais Jisas i kolim olsem taim bilong “ol man bilong ol arapela lain.” (Luk 21:24) Insait long dispela hap taim God i no gat wanpela gavman long graun i olsem piksa na i makim wok king bilong em.
18. Long pinis bilong taim bilong “ol man bilong ol arapela lain” wanem samting i mas kamap?
18 Orait, wanem samting i mas kamap long pinis bilong dispela hap taim? Jehova i mas givim strong bilong mekim wok king long dispela Man em i “man bilong kisim” dispela wok, em Krais Jisas. Olsem na sapos yumi save wanem taim dispela hap taim bilong “ol man bilong ol arapela lain” i pinis, em nau bai yumi inap save wanem taim Krais i mas kirap mekim wok king.
19. Inap hamas “yia” o “hap taim” bai God i no ken mekim wanpela wok king bilong bosim graun?
19 Danyel sapta 4 i tok, dispela taim bilong “ol man bilong ol arapela lain” em i olsem “sevenpela yia” (o “sevenpela hap taim”). Na insait long dispela taim bai God i no ken mekim wanpela wok king, olsem “diwai” i makim, bilong bosim graun. (Danyel 4:16, 23, NW) Orait, nau yumi laik save dispela “sevenpela yia” i makim hamas yia tru?
20. (a) Wanpela “hap taim” o “yia” i olsem hamas de? (b) Na “sevenpela hap taim” o “sevenpela yia” i olsem hamas de? (c) Bilong wanem yumi makim wanpela de i olsem wanpela yia?
20 Revelesen sapta 12:6, 14 i tok, 1,260 de i olsem “tri yia na hap.” Olsem na wanpela “yia” (o “hap taim”) em inap olsem 360 de. Na “sevenpela yia” em inap olsem 2,520 de. Sapos yumi makim wanpela de i olsem wanpela yia, olsem wanpela lo bilong Baibel i makim, orait, dispela 2,520 de i makim tru 2,520 yia.—Nambas 14:34; Esikiel 4:6.
21. (a) Taim bilong “ol man bilong ol arapela lain” i kirap long wanem taim? Na i pinis long wanem taim? (b) Wanem taim gavman bilong God i kirap mekim wok? (c) Olsem na bilong wanem i stret yumi beten yet long kingdom bilong God i mas i kam?
21 Yumi save pinis, dispela taim bilong “ol man bilong ol arapela lain” em i kirap long yia 607 B.C.E. Orait, sapos yumi skruim 2,520 yia moa yumi kamap long yia 1914 C.E. Long dispela yia taim bilong “ol man bilong ol arapela lain” i pinis. Planti planti manmeri ol i stap yet ol inap tingim ol samting i bin kamap long yia 1914. Long yia 1914 Namba Wan Pait Bilong Olgeta Hap i kamap na i kirapim taim bilong planti hevi long graun. Olsem na yumi save, long yia 1914 Krais Jisas i kirap mekim wok king long gavman bilong God long heven. Dispela Kingdom i kirap pinis long mekim wok, olsem na i stret yumi ken beten na tok, kingdom bilong God i mas “i kam” na pinisim olgeta samting nogut Seten i bin kamapim long graun!—Matyu 6:10; Danyel 2:44.
22. Tasol ating sampela man i laik save long wanem samting?
22 Tasol ating yu laik save, ‘Sapos Krais i kam pinis na i stap king, bilong wanem yumi no inap lukim em?’
[Sat long pes 140, 141]
Long 607 B.C.E. kingdom bilong God long Juda i pundaun.
Long 1914 Krais Jisas i kirap mekim wok olsem king bilong gavman bilong God long heven
607 B.C.E.—1914 C.E.
Oktoba, 607 B.C.E.—Oktoba, 1 B.C.E. = 606 yia
Oktoba, 1 B.C.E.—Oktoba, 1914 C.E. = 1,914 yia
TAIM BILONG OL MAN BILONG OL ARAPELA LAIN = 2,520 YIA
[Piksa long pes 134]
“Ating nau long dispela taim bai yu kirapim gen kingdom bilong Isrel, o nogat?”
[Piksa long pes 139]
Dispela diwai long Danyel sapta 4 i makim wok king bilong God. Inap liklik taim God i mekim dispela wok long rot bilong kingdom bilong Juda
[Piksa long pes 140, 141]
Taim kingdom bilong Juda i bagarap, ol i katim dispela diwai na i pundaun