Sapta 27
Kingdom Bilong God i Kamap!
Driman 7—Kamapim Tok Hait 12:1-17
Stori: Meri bilong heven i karim pikinini, na Maikel i pait wantaim Satan na tromoi em i go daun long graun
Taim bilong truim: Kirap long taim Krais Jisas i kamap King long 1914 na i go inap long taim bilong bikpela hevi tru
1. Sapos yumi kisim save long insait bilong ol mak em Kamapim Tok Hait sapta 12 i go inap sapta 14 i kolim, dispela bai helpim yumi olsem wanem?
TOK HAIT bilong God i kamap ples klia pinis. (KTH 10:7) Kingdom bilong Jehova long han bilong Krais i kamap pinis. Nau em i wok i stap! Olsem na bagarap bai painim Satan wantaim lain bilong em, tasol dispela Pikinini em oganaisesen bilong God long heven i kamapim, em bai win tru. Tasol namba 7 ensel i no pinis yet long winim biugel—em i gat sampela tok moa bilong namba 3 bikpela hevi em i laik tokaut long en. (KTH 11:14) Ol mak long Kamapim Tok Hait sapta 12 i go inap sapta 14 bai helpim yumi long pilim tru olgeta samting bilong dispela namba 3 bikpela hevi, na ol samting i mas kamap bilong inapim tru tok hait bilong God.
2. (a) Wanem bikpela mak Jon i lukim? (b) Ol samting dispela i makim i kamap ples klia long wanem taim?
2 Nau Jon i lukim wanpela bikpela mak i narapela kain stret, na em i bikpela samting tru long lain bilong God. Bihain long en, Jon i lukim driman bilong wanpela samting bai kamap bihain. Wastaua (tok Inglis) bilong Mas 1, 1925, i kamapim insait bilong dispela driman, na wanpela tok bilong dispela Wastaua, het-tok bilong en “Jehova i Kamapim Wanpela Lain,” na ol i kamapim gen long wanpela buk ol i wokim long 1926 (Deliverance). Dispela save ol i kisim long insait bilong dispela tok piksa em i bikpela samting tru bilong helpim wok bilong Jehova i go bikpela. Orait, nau Jon i stori long ol samting em i lukim long dispela driman: “Wanpela narakain mak tru i kamap long skai. Dispela mak i olsem: Wanpela meri i stap, na em i pasim san olsem klos bilong en. Na mun i stap aninit long lek bilong en, na 12-pela sta i stap olsem hat long het bilong en. Dispela meri i gat bel, na pen bilong karim pikinini em i kamap pinis long em. Em i laik karim pikinini, na em i pilim pen nogut tru, olsem na em i singaut strong.”—KTH 12:1, 2.
3. Dispela meri Jon i lukim long heven, em i makim wanem samting?
3 Em namba wan taim Jon i bin lukim wanpela meri long heven. Tasol em i no wanpela meri tru. Em mak o piksa bilong wanpela samting. (KTH 1:1) Orait, dispela meri em i piksa bilong wanem samting? Long sampela tok profet long Baibel, ol meri i makim sampela lain o oganaisesen i olsem ol i “marit” long man i gat biknem. Long Olpela Testamen, Baibel i tok piksa long Israel i olsem meri bilong Jehova. (Jeremaia 3:14) Long Nupela Testamen, Baibel i tok piksa long lain Kristen em God i bin makim ol, ol i olsem meri i laik marit long Krais. (KTH 21:9-14) Dispela meri Jon i lukim, em tu i marit long wanpela man, na nau em i laik karim pikinini. Man bilong em i husat? Baibel i tok, bihain “ol i kisim pikinini i go antap, na ol i bringim em i go long God na long sia king bilong em.” (KTH 12:5) Jehova i kisim dispela pikinini olsem pikinini bilong em yet. Olsem na dispela meri Jon i lukim em i olsem “meri” bilong Jehova.
4. Husat ol i pikinini bilong dispela “meri” bilong Jehova? Aposel Pol i kolim wanem nem long dispela meri em Jon i lukim?
4 Inap 800 yia samting paslain long dispela, Jehova i bin toktok wantaim dispela “meri” bilong em, em i tok: “Bai mi yet mi skulim ol pikinini bilong yu.” (Aisaia 54:5, 13) Jisas i kolim dispela tok profet na em i tok, ol dispela pikinini em ol lain bilong em ol i stap gut long em, na bihain ol i kamap wanpela lain Jehova i makim ol. (Jon 6:44, 45) Olsem na ol manmeri i insait long dispela lain, Baibel i kolim ol olsem pikinini bilong God, olsem na ol i pikinini bilong “meri” bilong God tu. (Rom 8:14) Aposel Pol i kamapim klia dispela samting, olsem: “Jerusalem i stap long heven, em i stap fri. Em i mama bilong yumi.” (Galesia 4:26) Olsem na dispela “meri” Jon i lukim, em “Jerusalem i stap long heven.”
5. Dispela “meri” bilong Jehova i gat 12-pela sta olsem hat i stap long het bilong em, olsem na Jerusalem i stap long heven em i wanem samting tru?
5 Pol i tok, dispela Jerusalem em “i stap long heven,” na Jon tu i lukim dispela. Olsem na em i no wanpela biktaun i stap long graun. Nogat. Na em i no dispela “Nupela Jerusalem,” long wanem, “Nupela Jerusalem” em i meri i laik marit long Krais—em i no “meri” bilong Jehova. (KTH 21:2) Na olsem Jon i tok, i gat 12-pela sta olsem hat i stap long het bilong “meri.” Namba 12 i makim wanpela lain, o oganaisesen, em inap tru.a Olsem na ating dispela 12-pela sta i makim olsem dispela meri i wanpela lain, o oganaisesen, long heven—olsem Jerusalem bilong bipo em wanpela lain, o oganaisesen, long graun. Jerusalem i stap long heven em i oganaisesen bilong Jehova long heven—em i olsem olgeta ensel bilong Jehova long heven na ol i mekim wok olsem meri bilong em, na ol i kamapim pikinini tu.
6. (a) Wanem insait bilong dispela tok olsem meri i pasim san olsem klos long skin bilong em, na mun i stap aninit long lek bilong em, na ol sta i stap olsem hat long het bilong em? (b) Pen bilong karim pikinini i makim wanem samting?
6 Dispela meri Jon i lukim, em i pasim san olsem klos long skin bilong em, na mun i stap aninit long lek bilong em; tasol em i gat ol sta tu i stap olsem hat long het bilong em, olsem na bikpela lait bilong heven i raunim em olgeta. God i belgut long em, na dispela i olsem lait i stap long em long san na nait. Em gutpela piksa stret bilong makim nambawan gutpela oganaisesen bilong Jehova long heven! Dispela meri em i gat bel, na pen bilong karim pikinini i kamap long em. Em i singaut strong long God i mas helpim em, na dispela i makim olsem em i redi long karim pikinini. Sampela taim Baibel i tok piksa long pen bilong karim pikinini, bilong makim olsem i gat hatwok long kamapim wanpela bikpela wok. (Lukim Song 90:2; Sindaun 25:23; Aisaia 66:7, 8.) Taim oganaisesen bilong Jehova long heven i redi long kamapim dispela bikpela samting, em i kisim dispela pen na hatwok olsem meri i karim pikinini.
Wanpela Traipela Retpela Snek
7. Jon i lukim wanem narapela mak long heven?
7 Orait nau Jon i lukim wanem samting? “Na narapela mak i kamap long skai. Dispela mak em i olsem: Wanpela traipela retpela snek i stap. Em i gat 7-pela het, na 10-pela kom i kamap long ol het bilong en. Na 7-pela hat olsem ol hat bilong king i stap long ol het bilong en. Tel bilong en i brumim tru bikpela lain sta bilong skai na tromoi ol i go long graun. I olsem ol i tilim ol sta long tripela lain, na wanpela lain sta olgeta i pundaun. Orait dispela snek i sanap long pes bilong meri i laik karim pikinini, na em i wetim meri i karim pikinini pinis, bai em i ken kaikai dispela pikinini.”—KTH 12:3, 4.
8. (a) Traipela retpela snek em i husat? (b) Dispela 7-pela het na 10-pela kom bilong snek, na 7-pela hat bilong king i stap long het bilong em, ol dispela samting i makim wanem samting tru?
8 Dispela snek em Satan, em “snek bilong bipo yet.” (KTH 12:9; Stat 3:15) Em i man nogut tru bilong bagarapim man—em wanpela traipela snek i gat 7-pela het, na taim em i holim wanpela samting bilong kaikai, em inap daunim olgeta long maus bilong em. Tasol em i narapela kain snek tru! Dispela 7-pela het na 10-pela kom i makim olsem em yet i kamapim dispela wel animal politik em Kamapim Tok Hait sapta 13 i kolim na liklik taim bai yumi stori long en. Wel animal tu i gat 7-pela het na 10-pela kom. Satan i gat hat bilong king i stap long olgeta wan wan het bilong em—inap 7-pela olgeta—olsem na yumi inap save tru, ol bikpela gavman bilong graun em dispela wel animal i makim, ol i stap aninit long Satan. (Jon 16:11) Na 10-pela kom i makim stret olsem Satan i bin holim strong inap tru long bosim olgeta gavman bilong graun.
9. Tel bilong snek “i brumim tru bikpela lain sta bilong skai” na tromoi ol i go daun long graun, em i makim wanem samting?
9 Na dispela traipela snek i gat strong tu long ples ol ensel i stap long en. Tel bilong en “i brumim tru bikpela lain sta bilong skai.” Sampela taim “sta” i makim ensel. (Jop 38:7) I olsem ol i tilim olgeta sta long tripela lain, olsem na dispela tok olsem “wanpela lain sta olgeta” i makim olsem Satan i bin pulim planti planti ensel na ol i bihainim em. Taim ol i kam aninit pinis long em, ol i kalabus olgeta. Ol i no inap i go bek moa long oganaisesen holi bilong Jehova. Ol i kamap ensel nogut, na i olsem king o bos bilong ol, em Satan, i brumim ol i go bihainim em. (Matyu 12:24) Na Satan i tromoi ol i go daun long graun. Dispela i kamap long taim bilong Noa paslain long bikpela Tait Wara, taim ol dispela pikinini bilong God i bikhet long em na Satan i grisim ol long i go daun long graun na maritim ol meri bilong graun. God i givim strafe long ol dispela “ensel i bin mekim sin,” na em i tromoi ol i go long wanpela kain kalabus bilong tudak.—Stat 6:4; 2 Pita 2:4; Jut 6.
10. Wanem tupela lain i kamap ples klia, em ol i birua birua? Bilong wanem snek i laik kaikai dispela nupela pikinini?
10 Olsem na dispela tupela oganaisesen i birua birua ol i kamap ples klia—wanpela em oganaisesen bilong Jehova long heven em dispela meri i piksa bilong en, na wanpela em oganaisesen bilong Satan i gat ol spirit nogut long en na i sutim tok long wok king bilong God. God i mas stretim dispela bikpela tok i kamap long wok king bilong em. Tasol em bai mekim olsem wanem? Satan i wok yet long brumim ol ensel nogut i go bihainim em, na em i olsem wel animal nogut i laik holim abus. Satan i wetim dispela meri i karim pikinini. Em i laik kaikai dispela pikinini, long wanem em i save dispela pikinini bai i gat strong inap long pinisim em na pinisim pasin na lain bilong dispela graun em i save bosim.—Jon 14:30.
Wanpela Pikinini Man
11. Jon i stori olsem wanem long meri i karim pikinini? Bilong wanem Baibel i kolim dispela pikinini olsem “pikinini man”?
11 God i bin makim taim bilong ol gavman bilong ol man i ken bosim graun na God i no ken katim dispela wok bilong ol. Tasol dispela taim i pinis long 1914. (Luk 21:24) Orait, long taim stret, dispela meri i karim pikinini: “Meri i karim pikinini man, em pikinini God i makim bilong holim stik ain na bosim strong olgeta lain manmeri. Meri i karim pikinini pinis, orait kwiktaim ol i kisim pikinini i go antap, na ol i bringim em i go long God na long sia king bilong em. Na dispela meri em i ranawe i go long hap i no gat man. Long dispela hap God i redim pinis ples bilong em i ken i stap long en, na ol bai i lukautim em na givim kaikai long em inap long 1,260 de.” (KTH 12:5, 6) Jon i no kolim dispela pikinini olsem “pikinini” tasol; nogat. Jon i tok em “pikinini man,” long wanem, dispela i makim olsem dispela pikinini bai i gat save na strong inap tru long i stap king na bosim gut ol man. Sapos wanpela meri i karim pikinini man, ol man i save amamas. Olsem na bikpela amamas i kamap taim meri i karim dispela pikinini man. Dispela samting em inapim tok hait bilong God. Dispela pikinini man bai “holim stik ain na bosim strong olgeta lain manmeri”!
12. (a) Long Buk Song Jehova i mekim wanem tok profet long Jisas? (b) Dispela tok piksa long meri i karim pikinini man na dispela man bai “holim stik ain na bosim strong olgeta lain manmeri,” dispela i makim wanem samting?
12 Ating yu lukim pinis kain tok olsem long narapela hap bilong Baibel, a? Long wanem, Jehova i bin tok profet long Jisas olsem: “Bai yu brukim ol liklik liklik, olsem man i brukim sospen graun.” (Song 2:9) Na i gat narapela tok profet long em, olsem: “Bikpela i stap long Saion, na bai em i mekim yu i bosim planti ples, na em i tok, ‘Yu bosim ol birua bilong yu.’ ” (Song 110:2) Olsem na dispela nupela pikinini Jon i lukim meri i karim, em i makim sampela samting Jisas i insait long en. Em i no makim Jisas yet taim wanpela nupela meri i karim em olsem 100 yia paslain long taim Jon i lukim dispela driman. Na em i no makim Jisas i kirap bek long spirit long yia 33. Nogat. Dispela nupela pikinini i makim Kingdom bilong God i kamap nupela long 1914, na long dispela taim Jisas—nau em i stap pinis long heven klostu olsem 2,000 yia—em i kamap King bilong dispela Kingdom.—KTH 12:10.
13. Dispela tok piksa long ol i kisim pikinini man “i go long God na long sia king bilong em,” em i makim wanem samting?
13 Jehova i no inap larim Satan i kaikai meri o nupela pikinini man bilong Em. Nogat tru! Taim meri i karim, kwiktaim “ol i kisim pikinini i go antap, na ol i bringim em i go long God na long sia king bilong em.” Olsem na em i stap gut long han bilong Jehova na Jehova i lukautim gut dispela nupela Kingdom, long wanem, long rot bilong dispela Kingdom Jehova bai litimapim nem holi bilong em. Orait, taim ol i kisim nupela pikinini i go long God, meri i ranawe i go long wanpela hap i no gat man, em God i redim pinis bilong em. Tasol bihain bai yumi stori gut long dispela! Nau yumi tingim Satan—wanpela bikpela samting tru i laik kamap na dispela bai pasim rot bilong em na bai em i no inap wok gen long bagarapim dispela Kingdom. Wanem dispela samting i laik kamap?
Bikpela Pait Long Heven!
14. (a) Olsem Jon i stori long en, wanem samting i kamap na Satan i no inap wok moa long bagarapim Kingdom? (b) Nau Satan wantaim ol ensel nogut ol i kalabus i stap long wanem hap?
14 Nau Jon i tok: “Bikpela pait i kirap long heven. Maikel wantaim ol ensel bilong en ol i pait long dispela traipela snek. Na snek wantaim ol ensel bilong en ol i bekim pait long ol, tasol ol i no gat strong bilong winim pait. Olsem na ol i no inap i stap moa long heven, na ol ensel bilong God i tromoi dispela snek i go daun. Em dispela snek bilong bipo yet, na ol i kolim em Satan na ‘Man I Save Kotim Olgeta Manmeri.’ Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en i go daun wantaim em.” (KTH 12:7-9) Bilong inapim tru tok hait bilong God, ol i mas rausim Satan long heven na tromoi em wantaim ol ensel nogut bilong em i go daun long graun. Dispela man i bin giamanim olgeta manmeri bilong graun na i kamap god bilong ol, tasol nau em i kalabus i stap klostu long dispela graun; em long dispela graun yet Satan i bin kirap pastaim long mekim pasin bikhet.—2 Korin 4:3, 4.
15, 16. (a) Maikel em i husat? Yumi save olsem wanem? (b) Bilong wanem i stret Maikel yet i tromoi Satan i go daun long graun?
15 Husat ol i bin winim dispela bikpela pait long nem bilong Jehova? Baibel i tok, em Maikel wantaim ol ensel bilong em. Tasol Maikel em i husat? Insait bilong nem “Maikel” i olsem “Husat i Wankain Olsem God?” Olsem na Maikel i gat bikpela laik tru long stretim tok Satan i bin sutim long wok king bilong Jehova na bai olgeta man i ken save, i no gat wanpela i wankain olsem Jehova. Long Jut ves 9 ol i kolim Maikel olsem “namba wan ensel.” Long sampela hap moa bilong Baibel ol i kolim dispela tok long wanpela man tasol, em Krais Jisas.b Pol i tok long em olsem: “God bai i tok strong, na namba wan ensel bai i singaut, na biugel bilong God bai i krai. Na Bikpela bai i lusim heven na i kam daun.” (1 Tesalonaika 4:16) Dispela biknem, olsem “namba wan ensel,” insait bilong en i olsem “namba wan bilong ol ensel.” Olsem na yumi no kirap nogut long tok bilong Kamapim Tok Hait i stori long Maikel wantaim ol ensel bilong em. I gat sampela hap moa bilong Baibel i stori long ol ensel i stap aninit long wanpela stretpela wokman bilong God, em Jisas. Olsem na Pol i stori long “taim Bikpela Jisas wantaim olgeta strongpela ensel bilong en i lusim heven na i kamap ples klia.”—2 Tesalonaika 1:7; lukim tu Matyu 24:30, 31; 25:31.
16 Ol dispela tok bilong Baibel na sampela tok moa bilong en i kamapim klia olsem Maikel em Bikpela Krais Jisas, taim em i stap long heven. Nau long de bilong Bikpela, em i no tok tasol long Satan olsem “[Jehova] yet i ken krosim yu na tokim yu long pasim maus”; nau em i taim bilong kot, na Maikel i kirap mekim wanpela samting—em i rausim dispela man nogut Satan long heven wantaim ol lain ensel nogut bilong em. (Jut 9; KTH 1:10) I stret tru long Jisas yet i mas mekim dispela wok, long wanem em i kamap King long dispela taim. Na tu, Jisas em dispela Pikinini God i bin tok promis long en long Iden, em bai krungutim het bilong Snek, em Satan, na Satan bai bagarap olgeta na i no ken i stap moa, inap long olgeta taim bihain. (Stat 3:15) Taim Jisas i rausim Satan long heven, em i kirap pinis long mekim wok bilong em long krungutim het bilong Satan.
“Yupela Olgeta Lain i Stap Long Heven, Yupela i Ken Amamas”
17, 18. (a) Jon i tok, taim ol i tromoi Satan i go daun long graun, ol ensel long heven i mekim wanem? (b) Dispela maus Jon i harim, ating em i maus bilong husat?
17 Jon i stori long bikpela amamas i kamap long heven taim ol i tromoi Satan i go daun long graun. Em i tok: “Long heven mi harim maus bilong wanpela man i singaut strong olsem: ‘Nau God bilong yumi em i kisim bek yumi pinis, na strong bilong en i kamap pinis long ples klia, na em i stap king. Na dispela man em i makim bilong kisim bek ol manmeri bilong en, em i kisim pinis bikpela namba na strong. Long wanem, dispela man bilong kotim ol brata bilong yumi, em i bin kotim ol long ai bilong God bilong yumi long san na long nait, tasol nau ol ensel i tromoi em i go daun pinis. Ol brata bilong yumi ol i no bin laikim tumas laip bilong ol yet, na ol i no tingting strong long ol i mas i stap gut long graun. Nogat. Ol i bin kisim strong long blut bilong Pikinini Sipsip na ol i strong long autim tok bilong em, maski ol birua i kilim ol i dai. Na long dispela pasin ol i winim pait na daunim dispela birua. Olsem na yu heven, na yupela olgeta lain i stap long heven, yupela i ken amamas.’ ”—KTH 12:10-12a.
18 Jon i harim maus bilong husat i singaut strong? Baibel i no tok. Tasol i gat wanpela kain maus olsem i kamap, em Jon i stori long en long Kamapim Tok Hait 11:17, em maus bilong ol 24 hetman ol i kirap bek pinis na ol i holim pinis wok bilong ol long heven na ol i maus bilong lain 144,000. (KTH 11:18) Ol dispela wokman bilong God, sampela i stap yet long graun na ol birua i mekim nogut long ol, na dispela maus i kolim ol olsem “ol brata bilong yumi.” Olsem na ating dispela maus em maus bilong ol dispela 24 hetman. Na ol dispela gutpela wokman bilong God em maus i kolim ol olsem “ol brata bilong yumi,” ol inap tru long bungim maus bilong ol na mekim dispela singaut, long wanem, ol i mas kirap bek na i go antap long heven kwiktaim bihain long taim Satan na ol ensel nogut bilong em i kam daun pinis long graun.
19. (a) Taim tok hait bilong God i kamap tru pinis, dispela bai opim rot bambai Jisas i ken mekim wanem? (b) Ol i kolim Satan olsem “man bilong kotim ol brata bilong yumi,” na dispela i kamapim long ples klia wanem samting?
19 Bilong mekim dispela tok hait bilong God i kamap tru, Jisas i mas kisim strong long bosim Kingdom. Dispela bai opim rot bambai God i ken kamapim tru wanpela bikpela laik bilong em long kisim bek ol man i stap gut long em. Jisas bai kisim bek lain bilong em ol i stap nau long graun na ol i save pret long God na i stap aninit long Em. Tasol em bai kisim bek tu planti milion milion manmeri ol i dai pinis na God i tingim yet ol. (Luk 21:27, 28) Baibel i kolim Satan olsem “man bilong kotim ol brata bilong yumi,” olsem na yumi save, maski tok em i sutim long Jop i giaman, na dispela tok giaman i kamap ples klia, em i wok yet long sutim tok long ol gutpela wokman bilong God long graun na i tok, ol i no givim bel tru long God. Yumi save planti taim em i bin sutim tok long ol wokman bilong God olsem man bai givim olgeta samting bilong em bilong baim bek laip bilong em. Tasol Satan i pundaun tru na tok giaman bilong em i kamap ples klia olgeta!—Jop 1:9-11; 2:4, 5.
20. Ol gutpela Kristen i mekim wanem na ol i winim pait na daunim Satan?
20 Ol Kristen em God i makim ol pinis na “blut bilong Pikinini Sipsip” i mekim ol i kamap olsem stretpela man, ol i wok yet long autim tok bilong God na Krais Jisas, maski ol birua i mekim nogut long ol. Winim 120 yia pinis, dispela liklik lain i wok long tokaut olsem: Taim bilong ol man bilong ol arapela lain i pinis long 1914 na sampela bikpela samting i insait long dispela. (Luk 21:24) Na long nau ‘bikpela lain’ manmeri ol i wok gut wantaim dispela liklik lain long autim tok. Ol i no “pret long ol man i save kilim i dai bodi, tasol ol i no inap kilim spirit bilong [ol].” Long taim bilong yumi dispela pasin bilong ol Witnes Bilong Jehova long sanap strong long bilip em i kamap ples klia planti taim. Long toktok bilong ol na long stretpela pasin Kristen bilong ol, ol i soim olsem ol i winim pait na daunim Satan, na dispela i kamapim klia olsem em i man bilong giaman tasol. (Matyu 10:28; Sindaun 27:11; KTH 7:9) Taim ol Kristen bilong liklik lain i kirap bek long matmat na ol i go antap long heven, yumi save ol i amamas tru, long wanem Satan i no i stap moa long heven na em i no inap sutim tok long ol brata bilong ol i stap long heven! Olsem na nau em i taim tru bilong olgeta ensel i ken amamas long bihainim wanpela singaut i kamap long heven, i tok: “Yu heven, na yupela olgeta lain i stap long heven, yupela i ken amamas”!
Em i Bekim Wanpela Bikpela Hevi!
21. Olsem wanem Satan i kamapim bikpela hevi long graun na long solwara?
21 Satan i belhat long namba 3 bikpela hevi i kamap, olsem na nau em i strong long bekim wanpela bikpela hevi long ol manmeri bilong graun. Taim em i mekim olsem, em nau, “yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” (KTH 12:12b) Tru tumas, taim ol i rausim Satan long heven, bikpela hevi nogut tru i painim dispela graun yet, long wanem ol man i wok aninit long Satan ol i tingim skin bilong ol yet na ol i wok long bagarapim graun. (Lo 32:5) Tingting bilong Satan i olsem: Sapos em i no inap bosim graun, orait em i mas bagarapim. Olsem na bikpela hevi i painim tu ol bikpela wok gavman na lo samting em ol man i bin kamapim, na dispela hevi i painim “solwara” tu, em i makim olgeta lain manmeri, em ol i mekim nabaut na ol i no stap isi. Long taim bilong Namba Wan Pait na Namba 2 Pait, ol lain bilong dispela graun i stap aninit long Satan ol i bihainim belhat bilong Satan na ol tu i belhat na pait. Na bihain long dispela tupela pait na i kam inap nau, Satan i wok long kirapim ol lain bilong graun na ol i belhat na pait yet. Tasol em i no gat bikpela hap taim moa bilong mekim olsem—taim bilong em i sot pinis! (Mak 13:7, 8) Tru Satan i mekim kain kain samting nogut bilong givim bikpela hevi long ol man, tasol ol samting nogut em Kingdom bai mekim long Satan wantaim lain bilong em long graun long rot bilong namba 3 bikpela hevi, em i nogut moa yet!
22, 23. (a) Jon i tok wanem samting i kamap taim ol i tromoi Satan i go daun pinis long graun? (b) Olsem wanem Satan inap mekim nogut long dispela “meri i bin karim pikinini man”?
22 Taim ol i tromoi Satan i kam daun long graun, ol brata bilong Krais i stap yet long graun ol i kisim nogut long dispela belhat bilong Satan. Jon i stori long samting i kamap, olsem: “Dispela snek em i lukim olsem ol i tromoi em i go daun pinis long graun, na em i go ranim dispela meri i bin karim pikinini man. Tasol ol i givim tupela wing bilong bikpela tarangau long dispela meri, bai em inap flai i go long ples bilong en long graun i no gat man, na em i ken i stap longwe long dispela snek. Na long dispela hap ol bai i lukautim em gut na givim kaikai long em, i go inap long 3 na hap yia.”—KTH 12:13, 14.
23 Dispela driman Jon i lukim em i hap bilong driman em KTH 12 ves 6 i kolim, em i tok, taim meri i karim pinis pikinini, meri i ranawe i go long ples i no gat man, na bai em i stap longwe long dispela snek. Tasol dispela meri i stap long heven, na ol i tromoi snek hia i go daun pinis long graun. Orait, olsem wanem na snek inap mekim nogut long meri? Dispela meri i gat lain pikinini bilong em hia long graun. Long narapela hap bilong dispela driman, Jon i tok, Satan i belhat long meri na em i go na i laik pait long ol pikinini bilong meri. (KTH 12:17) Samting i painim ol pikinini bilong meri ol i stap long graun, i olsem i painim meri yet. (Lukim Matyu 25:40.) Na Satan bai mekim nogut tu long bikpela lain poroman bilong ol dispela pikinini bilong meri i stap long graun.
Jehova i Kamapim Wanpela Lain
24. Wanem samting i painim ol Sumatin Bilong Baibel na i wankain long taim Jehova i bin kisim ol Israel na ol i lusim kalabus long Isip?
24 Long taim bilong Namba Wan Pait, ol brata bilong Jisas i stap gut long wok bilong ol long autim tok. I hatwok long ol i mekim olsem, long wanem Satan wantaim ol lain nogut bilong em i biruaim ol moa yet na i mekim nogut tru long ol. Bihain ol i pasim wok bilong ol Sumatin Bilong Baibel long autim tok na klostu ol i lusim dispela wok olgeta. (KTH 11:7-10) Em nau, samting i painim ol wankain olsem i bin painim ol Israel long Isip, em ol i bin kisim nogut tru long han bilong ol Isip na ol i karim bikpela hevi. Tasol Jehova i helpim ol Israel, na kwiktaim em i kisim ol i go long ples i no gat man, long hap bilong Sainai, na em i lukautim ol—i olsem em i givim wing bilong tarangau long ol na ol inap flai i go long dispela hap. (Kisim Bek 19:1-4) Na olsem tasol, taim ol man i mekim nogut tru long lain bilong Jehova long 1918 i go inap 1919, Jehova i kirap na em i helpim ol dispela witnes bilong em—ol i olsem maus bilong meri bilong em—na ol i stap gutpela long ol samting bilong spirit. I olsem em i bringim ol long wanpela gutpela ples na ol birua i no inap bagarapim ol, olsem dispela ples nating em Jehova i bin bringim ol Israel long en na ol i stap gutpela. Ol witnes bilong em i bin beten askim em long helpim ol na em i harim beten bilong ol.—Lukim Song 55:6-9.
25. (a) Jehova i kamapim wanem samting long 1919 na i olsem long taim ol Israel i stap long ples nating na Jehova i kisim ol na ol i kamap lain bilong em yet? (b) Husat ol i insait long dispela lain? Jehova i bringim ol i go insait long wanem samting?
25 Taim ol Israel i stap long ples nating, Jehova i kisim ol olsem lain bilong em—i olsem em i kamapim wanpela lain—na em i lukautim ol long ol samting bilong spirit na bilong skin tu. Na kirap long 1919 Jehova i mekim olsem tasol—em i kamapim wanpela lain bilong em, ol i olsem ol pikinini bilong meri bilong em. Tasol dispela i no Kingdom i stap long han bilong Krais, nogat; dispela Kingdom i kamap pinis long heven long 1914 na i mekim wok. Tasol dispela lain God i kamapim, em dispela liklik hap lain i stap yet long graun, em Jehova i bin makim ol bilong mekim wok king long heven; long 1919 em i mekim gut long ol, na i olsem em i bringim ol i go long gutpela ples paradais bilong spirit. Nau em i givim ‘kaikai long ol long taim stret bilong en,’ na ol i kisim strong bilong redi long mekim wanpela bikpela wok.—Luk 12:42; Aisaia 66:8.
26. (a) Wanem dispela hap taim em Kamapim Tok Hait 12:6, 14 i kolim? (b) Dispela hap taim olsem 3 na hap yia i bilong mekim wanem? Em i kirap long wanem yia? Em i pinis long wanem yia?
26 Orait, lain pikinini bilong meri bilong God i kisim malolo long hevi i go inap long wanem taim? Kamapim Tok Hait 12:6 i tok ol i malolo inap 1,260 de. Kamapim Tok Hait 12:14 i kolim dispela hap taim olsem 3 na hap yia. Long hap bilong Not dispela taim i kirap long mun Epril samting bilong yia 1919 i go inap long mun Oktoba samting bilong yia 1922. Insait long dispela hap taim, lain bilong God i wok long kisim bek strong na ol i kirap stretim ol samting bambai ol i ken redi gut long mekim bikpela wok bilong ol.
27. (a) Bihain long 1922 “snek” i mekim wanem, olsem Jon i tok? (b) Satan i laik mekim wanem na em i kirapim ol man long mekim nogut long ol Witnes, olsem trautim bikpela wara long maus bilong em?
27 Tasol dispela snek i no les—em i painim yet rot bilong bagarapim ol! “Snek i trautim wara long maus bilong en. Dispela wara i kamap olsem bikpela wara na i ran i go bihainim meri. Snek i laik bai wara i kisim dispela meri na bagarapim meri olgeta.” (KTH 12:15) Wanem insait bilong dispela tok “bikpela wara,” o “tait wara”? (The New English Bible) Bipo King Devit i tok long “ol man nogut” i biruaim em na pait long em, na em i tok ol i olsem “biksi i karamapim” em. (Song 18:4, 5, 16, 17) Orait bihain long 1922 Satan i mekim wankain samting—em i kirapim “ol man nogut” long mekim nogut tru long lain Witnes; i olsem em i trautim bikpela wara long maus bilong em. (Matyu 24:9-13) Bihain ol dispela birua i kirap paitim ol Witnes, na ol “i save putim lo” i orait long ol manmeri i mekim nogut long ol, na ol i kisim kalabus, na ol birua i kilim ol i dai—ol i hangamapim ol, na sutim ol long gan, na katim nek bilong ol. (Song 94:20) Satan i no gat rot bilong i go long heven na mekim nogut long meri bilong God, olsem na em i belhat na mekim nogut long hap lain pikinini bilong meri ol i stap yet long graun. Em i laik bagarapim ol, olsem kilim ol i dai tru o kirapim ol long lusim Jehova na bai Jehova i no ken orait moa long ol. Tasol dispela lain bilong meri ol i no surik liklik—ol i sanap strong olsem Jop i mekim, em i tok: “Bel na tingting bilong mi i stap stret tasol long ai bilong God. Na mi tok strong olsem, . . . bai mi mekim wankain tok tasol i go inap taim mi dai.”—Jop 27:5.
28. Long taim bilong Namba 2 Pait, olsem wanem ol birua i mekim nogut moa yet long ol Witnes, olsem tait wara i karamapim ol?
28 Long Namba 2 Pait, ol birua i mekim nogut moa yet long ol Witnes, olsem “tait wara” i karamapim ol. Long Yurop, gavman bilong Hitler i kalabusim olsem 12,000 Witnes insait long ol banis kalabus, na 2,000 samting ol i dai. Na long dispela taim bilong pait ol gavman nogut bilong Itali na Japan na Korea na Taiwan ol i mekim wankain pasin nogut long ol Witnes i laik i stap gut long Jehova. Na long ol kantri i gat gavman demokratik, sampela lain bilong Misin Katolik i mekim nogut tru long ol Witnes—ol i penim kolta long skin bilong ol na pasim gras bilong kakaruk long dispela kolta na raunim ol i go lusim taun. Na taim ol Witnes i mekim ol kibung Kristen bilong ol, ol birua i kam bagarapim kibung, na ol i rausim ol pikinini bilong ol Witnes long skul.
29. (a) Jon i tok wanem long wanpela helpim bilong ol Witnes i kamap na ating ol i kirap nogut long en? (b) Wanem samting i kamap na i olsem “graun i helpim meri”? (c) “Snek” i wok yet long mekim wanem?
29 Tasol wanpela samting i kamap bilong helpim ol Witnes: “Graun i helpim meri. Graun i opim maus bilong en na i dringim dispela wara, snek i bin trautim long maus bilong en. Olsem na snek em i belhat long dispela meri, na em i go na i laik pait long ol arapela pikinini bilong en, em ol dispela manmeri i save bihainim ol lo bilong God, na ol i save autim tok bilong Jisas na bihainim em.” (KTH 12:16, 17) “Graun”—olsem sampela lain bilong Satan yet long graun—ol i kirap na i olsem ol i “dringim” dispela “bikpela wara.” Long 1940 samting ol Witnes i winim kot long Sprim Kot bilong Amerika, na long sampela kantri moa em ol i save larim ol man i bihainim wanem lotu ol i laikim, ol gavman i orait long ol Witnes. Bihain ol kantri olsem Amerika na Inglan samting ol i daunim gavman nogut bilong Hitler na Mussolini, na dispela i helpim ol Witnes, em ol i bin kisim bikpela hevi tru long ol dispela gavman nogut. Tasol pasin bilong mekim nogut long ol Witnes i no pinis olgeta. Long wanem Satan i belhat yet, na em i wok yet long mekim pait long ol man “i save autim tok bilong Jisas na bihainim em.” Long planti hap sampela Witnes i stap yet long kalabus, na ol birua i kilim sampela i dai, long wanem ol i holimpas bilip na stap gut long Jehova. Tasol long sampela kantri olsem, long wan wan taim gavman i pinisim sampela tambu i stap long ol Witnes na nau ol i gat hap rot bilong mekim wok bilong Jehova.c Olsem dispela tok profet i tok, “graun” i wok yet long “dringim dispela wara,” olsem daunim pasin bilong mekim nogut long lain bilong Jehova.
30. (a) “Graun” i helpim ol Witnes na wanem samting i kamap? (b) Lain bilong God ol i stap gut long em, na dispela i mekim wanem gutpela wok?
30 Long dispela rot, “graun” i helpim ol Witnes, olsem na wok bilong God i go bikpela moa na i kamap long planti kantri, winim 235, na lain bilong autim tok i go bikpela tru, winim 6 milion. Planti manmeri ol i bilip na ol i kam bung wantaim liklik hap lain pikinini bilong meri ol i stap yet long graun. Dispela bikpela lain ol i bihainim tok bilong God na ol i klia long pasin bilong graun na ol i stap narapela kain, na ol i bihainim stretpela pasin bilong marit, na ol i laikim tumas ol brata Kristen bilong ol, na ol i autim tok bilong Kingdom i stap long han bilong Krais. Ol i stap gut long Jehova na dispela i kamapim long ples klia olsem dispela tok Satan i bin sutim long Jehova em i giaman tru; olsem na liklik taim nau na bagarap bai painim Satan wantaim lain bilong em long graun na olgeta wok ol i kamapim long graun.—Sindaun 27:11.
[Ol Futnot]
a I gat 12-pela lain bilong Israel, na 12-pela aposel, na 12-pela lain bilong Israel bilong spirit, na Nupela Jerusalem i gat 12-pela dua long banis, na 12-pela ensel, na 12-pela as ston.—KTH 21:12-14.
b Tasol Kamapim Tok Hait 12:9 i stori long ‘snek wantaim ol ensel bilong en.’ Olsem na Satan i no wok tasol long putim em yet olsem wanpela god—em i wok tu long kamap namba wan bilong ol ensel, tasol Baibel i no kolim dispela nem “namba wan ensel” long em.
c Ol nambawan bikpela kot long sampela kantri ol i orait long ol Witnes Bilong Jehova i mekim wok bilong autim tok; lukim blok i stap long pes 92, i stori long sampela kot ol Witnes i bin winim.
[Blok long pes 185]
“Graun i Opim Maus Bilong En”
Satan i trautim tait wara—long planti hap em i mekim nogut long ol Witnes. Tasol sampela taim ol samting i kamap long graun em Satan i bosim na dispela i helpim ol Witnes, na i olsem graun i “dringim dispela wara.”
Dispela tait wara i kisim ol Witnes long Amerika, olsem ol i paitim na kalabusim ol Witnes; tasol long 1940 samting, “graun i dringim dispela wara”—Sprim Kot i orait long ol Witnes na ol i winim kot.
1945: Ol i bin mekim nogut tru long ol Witnes long ol kantri em Jemani na Japan i bosim; dispela i pinis taim Inglan na Amerika samting i winim Namba 2 Pait.
Taim ol i tambuim wok bilong ol Witnes long Ripablik Dominika, ol i kalabusim na paitim ol nogut tru. Tasol long 1960 kros i kamap namel long bos nogut bilong gavman, em Rafael Trujillo, na Lotu Katolik, na ol i pinisim tambu i bin i stap long ol Witnes.
Taim wanpela provins long Naijiria i pait long gavman, ol lain bilong dispela provins i sutim ol Witnes, na kukim ol long paia, na bagarapim ol meri, na paitim ol, na kilim sampela i dai. Tasol long 1970 dispela hevi bilong ol Witnes i pinis taim ami bilong gavman i winim pait na kisim bek dispela provins.
Long Spen ol polis i go insait long haus bilong ol Kristen na holim ol na ol i mas baim kot na ol i kalabus, long wanem ol i autim tok bilong God na ol i bung long ol miting Kristen. Tasol long 1970 dispela hevi i pinis taim gavman i senisim ol lo long ol lotu i no Katolik na dispela i larim ol Witnes Bilong Jehova i rejistaim lotu bilong ol.
Long Potugal ol polis i go insait nating long haus bilong ol Witnes na sekim ol samting, na ol i no holim kotpepa. Ol i paitim nogut ol Witnes na kalabusim ol na kisim Baibel bilong ol. Tasol dispela hevi bilong ol Witnes i pinis long 1974; ami bilong gavman i bikhet na ol i kirap pait na daunim gavman, na nupela gavman ol i kamapim i orait long ol manmeri i ken bung wantaim na mekim lotu na i no gat tambu.
Bipo long Ajentina taim ami i bosim gavman, ol i bin rausim ol pikinini bilong ol Witnes long skul, na taim ol Witnes i autim tok, ol polis i holim ol na putim ol long kot. Tasol long 1984 gavman i orait long ol Witnes na ol i no mekim nogut moa long ol.
[Sat long pes 183]
(Bilong save ol dispela rait i stap we long pes, lukim buk o magasin)
1914 Jehova i kamapim Kingdom
1919 Jehova i kamapim wanpela lain
1919- 1922 Taim bilong kamap strong gen
1922- Pasin birua olsem tait
[Ol Piksa long pes 182]
Bikpela hevi i kamap long graun