Sapta 12

“Samting Yu Holim, Em Yu Mas Holim Strong”

FILADELFIA

 1. Namba 6 tok bilong Jisas i go long kongrigesen i stap long wanem taun? Wanem insait bilong nem bilong dispela taun?

LAIKIM TRU OL BRATA​—⁠em wanpela gutpela pasin tru! Ating Jisas i tingim dispela samting taim em i salim tok i go long namba 6 kongrigesen, em kongrigesen bilong Filadelfia, long wanem, insait bilong dispela nem Filadelfia i olsem “Laikim Tru Ol Brata.” Lapun Jon i tingim yet wanpela taim inap olsem 60 yia bipo​—⁠long dispela taim Pita i tokaut strong 3-pela taim long Bikpela bilong em Jisas, olsem: “Mi laikim yu.” (Jon 21⁠:​15-​17) Orait, olsem wanem long ol Kristen long Filadelfia? Ol i laikim tru ol brata? Tru tumas ol i laikim ol tru!

 2. Filadelfia i wanem kain taun? Olsem wanem long kongrigesen i stap long dispela taun? Jisas i tok wanem long ensel bilong dispela kongrigesen?

² Kirap long taun Sardis (long hap nau taun Alasehir long Turki i stap) na i go long hap bilong saut-is inap 48 kilomita, em taun Filadelfia i stap. Long taim bilong Jon, taun Filadelfia i gat planti wok bisnis long en na i kamap gutpela. Tasol yumi tingim kongrigesen Kristen i stap long dispela taun. Wok bilong ol tu i kamap gutpela. Ol i amamas tru long kisim wokman i bringim tok i kam long ol, ating em i kam long rot bilong Sardis. Tok em i kisim i kam em strongpela tok bilong kirapim tingting bilong ol. Tasol pastaim dispela tok i stori long bikpela namba bilong Man i salim tok i kam. Dispela Man i tokim Jon: “Na yu mas raitim sampela tok long ensel bilong sios [kongrigesen] i stap long taun Filadelfia. Dispela tok i olsem, ‘Mi holi tru, na mi as bilong pasin i tru. Mi holim ki bilong Devit, na samting mi opim, i no inap wanpela man i pasim. Na samting mi pasim, i no inap wanpela man i opim. Mi salim dispela tok i kam long yu.’ ”​—⁠KTH 3:⁠7.

 3. Olsem wanem na i stret Baibel i tok, Jisas em i “holi”? Na olsem wanem i stret yumi ken tok em i “as bilong pasin i tru”?

³ Jon i bin harim Pita i tokim Krais Jisas, olsem: “Tok bilong yu tasol i save givim laip i stap gut oltaim oltaim. Na mipela i bilip, na i save gut olsem, yu dispela gutpela stretpela man God i bin makim bilong em yet.” (Jon 6⁠:​68, 69) God Jehova em i gutpela stretpela olgeta, em i holi tru, olsem na dispela wanpela Pikinini tasol em yet i bin kamapim, em tu i “holi.” (KTH 4⁠:⁠8) Na Jisas em i “as bilong pasin i tru.” Wanpela tok Grik (a·le·thi·nosʹ) ol i tanim olsem “pasin i tru” i makim samting i tru olgeta. Olsem na Jisas em i lait tru na em i bret tru i lusim heven i kam daun. (Jon 1⁠:9; 6⁠:32) Em i diwai wain tru. (Jon 15⁠:⁠1) Na em i save mekim tok i tru tasol, olsem na yumi ken bilipim tok bilong em. (Lukim Jon 8⁠:​14, 17, 26.) Dispela Pikinini bilong God em inap tru long mekim wok olsem King na Jas.​—⁠KTH 19⁠:​11, 16.

“Ki Bilong Devit”

4, 5. “Ki bilong Devit” em i samting bilong wanem kontrak?

⁴ Jisas i holim “ki bilong Devit.” Em i mekim wok long dispela ki na “samting [em i] opim, i no inap wanpela man i pasim. Na samting [em i] pasim, i no inap wanpela man i opim.” Dispela “ki bilong Devit” i makim wanem samting?

⁵ Jehova i bin mekim kontrak wantaim King Devit bilong lain Israel na em i tok, wanpela man long lain bilong Devit bai stap king oltaim. (Song 89⁠:​1-4, 34-​37) Kirap long yia 1070 i go inap long yia 607 paslain long Krais, lain bilong Devit i bin mekim wok king na ol i sindaun long sia king bilong Jehova long Jerusalem. Tasol bihain strafe bilong God i painim dispela lain king long Jerusalem, long wanem ol i mekim pasin nogut. Olsem na Jehova i kirap long truim tok profet bilong em i stap long Esekiel 21⁠:​27, olsem: “Bai mi bagarapim Jerusalem olgeta, long pasin ol man i no bin lukim bipo. Na bai [wok king bilong lain bilong Devit] i stap nating inap long taim wanpela man i kam. Mi bin makim dispela man na em bai i bosim.” Dispela man bai kisim wok king bilong lain bilong Devit.

6, 7. Dispela man God i “makim,” wanem taim em i mas kam? Em i mas kam olsem wanem?

⁶ Orait, dispela man God i bin “makim” em i mas i kam long wanem taim? Na em i mas kam olsem wanem? Na olsem wanem em bai kisim wok king bilong lain bilong Devit?

⁷ Inap olsem 600 yia bihain, spirit holi i kam long wanpela tumbuna pikinini bilong King Devit, em wanpela meri Juda, nem bilong em Maria, na nau Maria i gat bel. God i salim ensel Gebriel i go tokim Maria olsem Maria bai karim pikinini man na em i mas kolim nem bilong em Jisas. Na Gebriel i tok moa, olsem: “Em bai i stap bikman. Na bai ol i kolim em Pikinini bilong God Antap Tru. Na God bai i putim em i stap king olsem tumbuna bilong en Devit. Em bai i stap king bilong ol lain bilong Jekop oltaim. Na wok king bilong en bai i no inap pinis.”​—⁠Luk 1⁠:​31-​33.

 8. Jisas i mekim wanem na em i kamapim long ples klia olsem em inap tru long kisim wok king bilong lain bilong Devit?

⁸ Long yia 29 Jisas i kisim baptais long wara Jordan na God i kapsaitim spirit bilong em long Jisas na makim em bilong kamap King long lain bilong Devit. Jisas i wok strong tru long autim gutpela tok bilong Kingdom na em i givim wok long ol disaipel bilong em long autim tok. (Matyu 4⁠:23; 10⁠:​7, 11) Jisas i daunim em yet na bihainim tok bilong God i go inap long em i dai long pos pen, na long dispela rot em i kamapim long ples klia olsem em inap tru long kisim dispela wok king i kam long lain bilong Devit. Jehova i kirapim bek Jisas na givim laip long em long heven na em i no inap i dai moa. Jehova i litimapim Jisas i go sindaun long han sut bilong Em. Taim Jisas i stap olsem, em i kisim olgeta strong bilong bosim kingdom bilong Devit. Bihain, long taim God i makim, Jisas i mekim wok long dispela strong bilong ‘daunim ol birua bilong em.’​—⁠Song 110⁠:​1, 2; Filipai 2⁠:​8, 9; Hibru 10⁠:​13, 14.

 9. Olsem wanem Jisas i mekim wok long ki bilong Devit bilong opim na pasim samting?

⁹ Tasol taim Jisas i no kirap yet long mekim wok long dispela strong, em inap mekim wok long ki bilong Devit na opim rot long ol man bambai ol i ken kisim sampela wok bilong Kingdom. Long rot bilong Jisas, nau bai Jehova i kisim bek ol Kristen em i bin makim na ol i stap yet long graun, na bai ol i lusim “strong bilong tudak” na em i putim ol “insait long lain bilong Pikinini bilong en, em dispela Pikinini em i save laikim tru.” (Kolosi 1⁠:​13, 14) Na bai Jisas inap mekim wok long dispela ki bilong lokim dua tu na pasim rot long ol man i no stap gut long God na ol i no ken kisim ol dispela wok. (2 Timoti 2⁠:​12, 13) Jehova yet i givim wok king bilong lain bilong Devit long Jisas, olsem na i no gat wanpela man o wanpela ensel inap pasim Jisas long mekim dispela wok.​—⁠Lukim Matyu 28⁠:​18-​20.

10. Jisas i mekim wanem tok long kongrigesen long Filadelfia bilong strongim bel bilong ol?

¹⁰ Jisas i kisim bikpela strong, olsem na tok bilong em i strongim tru ol Kristen long Filadelfia! Em i amamas long gutpela wok ol i mekim na em i tok: “Mi save pinis long olgeta pasin yu save mekim. Orait lukim. Long pes bilong yu, mi putim dua i op i stap, na i no gat wanpela man inap long pasim. Mi save olsem yu gat liklik strong tasol i stap yet, na yu bin bihainim tok bilong mi, na yu no bin givim baksait long nem bilong mi.” (KTH 3:⁠8) Kongrigesen i bin wok strong na nau dua i op long ol bilong mekim wok bilong helpim ol man. (Lukim 1 Korin 16⁠:9; 2 Korin 2⁠:12.) Dua i op, olsem na Jisas i kirapim kongrigesen long givim bel long mekim wok bilong autim tok. Ol i bin sanap strong na spirit bilong God i helpim ol bambai ol i gat strong inap long mekim sampela wok moa long wok bilong God Jehova. (2 Korin 12⁠:10; Sekaraia 4⁠:⁠6) Ol i bin bihainim tok bilong Jisas, na ol i no bin givim baksait long em long wanpela tok o pasin bilong ol.

‘Bai Ol i Brukim Skru Long Yu’

11. Jisas i tok promis long givim wanem blesing long ol Kristen? Ol bai kisim olsem wanem?

¹¹ Olsem na Jisas i tok promis olsem gutpela pasin bilong ol bai karim kaikai. Em i tok: “Yu save long dispela ol man bilong lain bilong Satan, ol i save tok, ol i bilong lain Juda. Tasol ol i no bilong lain Juda. Ol i man bilong giaman. Orait harim. Bai mi mekim ol dispela man i kam brukim skru klostu long lek bilong yu, na bai ol i save olsem, mi laikim yu tru.” (KTH 3:⁠9) Ating ol Juda i putim hevi long dispela kongrigesen wankain olsem ol i mekim long Smerna. Jisas i kolim ol dispela Juda olsem “lain bilong Satan.” Tasol nau bai sampela bilong ol dispela Juda i save, ol stori bilong Jisas ol Kristen i autim, em tok i tru. Ating ol bai “brukim skru” olsem Pol i stori long 1 Korin 14⁠:​24, 25​—⁠bai ol i tanim bel na kamap Kristen​—⁠bai ol i pilim tru bikpela pasin sori Jisas i bin mekim, olsem em i bin dai bilong helpim ol disaipel bilong em.​—⁠Jon 15⁠:​12, 13.

12. Lain bilong haus lotu bilong ol Juda long taun Filadelfia, ating ol i tingim wanem samting na ol i kirap nogut long harim tok olsem sampela bilong ol bai “brukim skru” long kongrigesen Kristen bilong dispela taun?

¹² Ating lain bilong haus lotu bilong ol Juda long Filadelfia ol i kirap nogut long harim tok olsem sampela bilong ol bai “brukim skru” long kongrigesen Kristen bilong dispela taun. Planti manmeri long dispela kongrigesen ol i no Juda​—⁠ol i bilong ol narapela lain, olsem na ating ol Juda i tingim wanpela tok profet bilong Aisaia na ol i ting ol dispela Kristen i mas brukim skru long ol. Aisaia i tok: “Ol king na ol kwin [i no Juda] bai i lukautim ol pikinini bilong yu [Israel] olsem ol papa na mama bilong ol. Ol bai i brukim skru na putim het bilong ol i go daun long graun klostu long lek bilong yu.” (Aisaia 49⁠:23; 45⁠:14; 60⁠:14) Na God i kirapim Sekaraia long mekim wankain tok, olsem: “Long dispela taim 10-pela man bilong ol longwe ples [ol i no bilong lain Juda] bai i kam holim wanpela Juda man na bai ol i tok olsem, ‘Mipela i harim olsem God i stap wantaim yupela Juda. Olsem na mipela i laik kamap wanlain wantaim yupela.’ ” (Sekaraia 8⁠:23) Em nau, ol Juda i ting ol manmeri bilong ol narapela lain i mas brukim skru long ol Juda; ol Juda i no ken brukim skru long ol!

13. Ol tok profet long lain Israel bilong bipo, truim bilong en i mas painim wanem ol “Israel,” o “Juda”?

¹³ Taim ol profet i mekim ol dispela tok, ol Israel bilong skin i stap lain bilong God. Tasol taim ol Israel i sakim Man bilong kisim bek ol, nau Jehova i rausim ol. (Matyu 15⁠:​3-9; 21⁠:​42, 43; Luk 12⁠:32; Jon 1⁠:​10, 11) Long de Pentikos long yia 33, Jehova i makim senis bilong ol na lain Kristen i kamap lain bilong em, ol i olsem Israel tru bilong God. Olgeta wan wan i “Israel tru,” o Juda tru, bilong spirit. Ol i no bihainim pasin bilong katim skin​—⁠dispela pasin i kamap long bel na tingting bilong ol. (Aposel 2⁠:​1-4, 41, 42; Rom 2⁠:​28, 29; Galesia 6⁠:16) I gat wanpela rot tasol bilong ol Juda bilong skin i ken kam insait long lain bilong God: Ol i mas bilip olsem Jisas em i Man bilong kisim bek ol. (Matyu 23⁠:​37-​39) Nau sampela Juda long Filadelfia i laik mekim olsem.a

14. Wanem bikpela truim bilong Aisaia 49⁠:23 na Sekaraia 8⁠:23 i bin kamap long taim bilong yumi?

¹⁴ Bikpela truim bilong ol tok profet olsem bilong Aisaia 49⁠:23 na Sekaraia 8⁠:23 i bin kamap long taim bilong yumi. Dispela lain em Jon i piksa bilong ol, ol i bin autim tok na planti planti manmeri i bin harim na ol i go insait long dispela dua i op na ol i kirap mekim wok bilong Kingdom.b Bipo planti ol i bilong ol misin i gat nem Kristen, em ol i giaman na tok ol i Israel bilong spirit. (Lukim Rom 9⁠:⁠6.) Ol dispela manmeri i mekim wok bilong Kingdom, ol i bikpela lain na ol i bilip long blut bilong Jisas em i givim olsem ofa​—⁠i olsem ol i wasim klos bilong ol long blut bilong Jisas na klos i kamap waitpela. (KTH 7⁠:​9, 10, 14) Ol i bihainim lo bilong Kingdom bilong Krais na ol i wet long kisim ol blesing bilong en hia long graun. Ol i go long ol brata bilong Jisas, em ol Kristen God i bin makim, na long spirit i olsem ol i “brukim skru” long ol, long wanem ‘ol i harim olsem God i stap wantaim ol.’ Ol i mekim ol wok bilong helpim ol dispela brata bilong Jisas na ol i kamap wanlain wantaim ol. Olgeta i stap olsem brata brata long olgeta hap bilong graun.​—⁠Matyu 25⁠:​34-​40; 1 Pita 5⁠:⁠9.

“Dispela Traim”

15. (a) Jisas i mekim wanem tok promis long ol Kristen long Filadelfia? Na dispela i strongim ol long mekim wanem? (b) Ol dispela Kristen i wet long kisim wanem “prais”?

¹⁵ Jisas i tok moa olsem: “Yu bin bihainim tok bilong mi, na yu bin sanap strong long olgeta hevi i kamap long yu. Olsem na bai mi lukautim yu, na dispela traim i laik kamap na traim olgeta manmeri long olgeta hap bilong graun, em i no ken kamap long yu. Bai mi kam long yu kwiktaim. Samting yu holim, em yu mas holim strong. Nogut wanpela man i tekewe prais bilong yu.” (KTH 3:​10, 11) Ol Kristen long taim bilong Jon ol i no ken i stap inap long de bilong Bikpela (i kirap long yia 1914), tasol ol i bilip tru olsem Jisas i mas i kam na dispela i strongim ol long wok strong long autim tok. (KTH 1⁠:10; 2 Timoti 4⁠:⁠2) “Prais” bilong ol em laip i stap oltaim long heven. (Jems 1⁠:12; KTH 11⁠:18) Sapos ol i stap gut long God i go inap long taim ol i dai, i no gat wanpela man inap tekewe dispela prais long ol.​—⁠KTH 2⁠:⁠10.

16, 17. (a) Wanem “dispela traim” i laik kamap long “olgeta manmeri long olgeta hap bilong graun”? (b) Taim “dispela traim” i kirap, ol manmeri God i bin makim, ol i stap olsem wanem?

¹⁶ Tasol wanem “dispela traim”? Ating bihain gavman bilong Rom i mekim nogut gen long ol dispela Kristen long Esia na dispela i olsem wanpela traim bilong ol.c Tasol bikpela truim bilong dispela tok i kamap long de bilong Bikpela. Em i makim dispela taim bilong traim na skelim ol man i kirap long yia 1918 na i go. Dispela traim i bilong skelim bel bilong ol man​—⁠ol i givim bel long Kingdom bilong God i kamap pinis long heven, o ol i givim bel long dispela graun bilong Satan. Dispela traim i mas i stap liklik taim tasol, inap olsem wanpela ‘aua,’ tasol i no pinis yet, olsem na long olgeta taim yumi mas tingting gut olsem yumi stap long taim bilong “dispela traim.”​—⁠Luk 21⁠:​34-​36.

¹⁷ Bipo “lain bilong Satan” i bin birua long strongpela kongrigesen bilong Filadelfia, na long yia 1918 wankain hevi i painim ol Kristen God i bin makim, em Jon i piksa bilong ol​—⁠“lain bilong Satan” i birua long ol na mekim nogut long ol. Ol misin i tok ol i Juda, o Israel, bilong spirit, ol hetman bilong ol i wok hait na stiaim ol hetman bilong graun long daunim ol Kristen tru. Tasol ol dispela Kristen tru i wok strong long ‘bihainim tok bilong Jisas na sanap strong’; spirit bilong God i bin helpim ol, olsem na ol i gat “liklik strong” na ol i no pundaun. Ol i winim dispela hevi na ol i kirap i go insait long dispela dua nau i op long ol. Wanem samting i bin helpim ol long mekim olsem?

“Dua i Op i Stap”

18. Long yia 1919 Jisas i givim wok long wanem lain? Olsem wanem dispela lain i kain olsem gutpela wokboi bilong King Hesekia?

¹⁸ Long yia 1919, Jisas i truim tok promis bilong em na em i givim wok long liklik lain Kristen tru na ol i kamap ‘gutpela wokboi’ bilong em, em God i bin makim dispela lain long spirit holi. (Matyu 24⁠:​45-​47) Dua i op long ol na ol i kisim wanpela wok wankain olsem gutpela wokboi Eliakim i bin kisim long taim bilong King Hesekia.d Jehova i stori long Eliakim olsem: “Bai mi putim long sol bilong en ki bilong haus bilong King Devit. Na wanem samting em i opim, i no inap wanpela man bai i pasim. Na wanem samting em i pasim, i no inap wanpela man bai i opim.” Bikpela wok bilong King Hesekia bilong lain bilong Devit i stap long sol bilong Eliakim. Olsem tasol long nau God i bin putim “ki bilong haus bilong King Devit” long sol bilong dispela liklik lain em Jon i piksa bilong ol​—⁠em i putim olgeta wok bilong Kingdom long graun long han bilong ol. Jehova i bin strongim ol wokboi bilong em bambai ol inap mekim dispela wok. Ol i gat “liklik strong,” tasol em i bin givim bikpela strong moa long ol bambai ol inap mekim dispela bikpela wok tru bilong autim tok long olgeta hap bilong graun.​—⁠Aisaia 22⁠:​20, 22; 40⁠:⁠29.

19. Dispela lain Jon i olsem piksa bilong ol, ol i mekim gut ol wok Jisas i bin givim long ol long yia 1919 o olsem wanem? Na wanem samting i bin kamap long dispela rot?

¹⁹ Kirap long yia 1919 lain remnan i bin bihainim pasin bilong Jisas na ol i kirap na wok strong tru long autim gutpela tok bilong Kingdom. (Matyu 4⁠:17; Rom 10⁠:18) Olsem na sampela manmeri bilong “lain bilong Satan” long nau, em ol misin i gat nem Kristen, ol i bin kam long lain remnan, na ol i bin tanim bel na “brukim skru” long ol​—⁠ol i daun long ol, long wanem, ol i save dispela lain i gat namba olsem wokboi bilong God. Ol tu i kirap mekim wok bilong Jehova wantaim ol dispela olpela man bilong lain remnan. Dispela samting i wok long kamap i go inap long taim God i bungim pinis ol Kristen em i bin makim na inapim namba bilong ol brata bilong Jisas. Bihain “planti manmeri tru . . . bilong olgeta lain man” ol i bin kam “brukim skru” long lain remnan, em wokboi bilong God. (KTH 7⁠:​3, 4, 9) Dispela wokboi wantaim dispela bikpela lain manmeri, olgeta wantaim i olsem wanpela lain sipsip, olsem ol Witnes Bilong Jehova.

20. Bilong wanem ol Witnes Bilong Jehova i mas i stap strong moa long bilip na long mekim wok bilong God long nau?

²⁰ Ol Witnes Bilong Jehova long nau i pas gut wantaim olsem ol brata brata, wankain olsem ol Kristen long Filadelfia i bin mekim long bipo, na ol i save ol i mas hariap mekim wok bilong ol long autim tok. Liklik taim tasol na bai taim bilong bikpela hevi tru i kirap, na bai dispela graun nogut bilong Satan i pinis. Long dispela taim yumi olgeta wan wan i mas i stap strong long bilip na wok strong long mekim wok bilong God Jehova, na bai God i no ken rausim nem bilong yumi long buk bilong laip. (KTH 7⁠:14) Yumi mas tingim gut tok Jisas i bin givim long kongrigesen bilong Filadelfia bambai yumi no ken lusim wok bilong God na yumi ken kisim prais bilong laip i stap oltaim.

Ol Gutpela Samting Bai Painim Man i Winim Pait

21. Ol Kristen God i makim, olsem wanem ol i bin ‘bihainim tok bilong Jisas na sanap strong’ long nau? Wanem gutpela samting inap painim ol?

²¹ Lain remnan ol i bin ‘bihainim tok bilong Jisas na sanap strong,’ olsem em i bin mekim. (Hibru 12⁠:​2, 3; 1 Pita 2⁠:21) Ol i bin kisim strong long sampela tok moa Jisas i bin givim long kongrigesen bilong Filadelfia, olsem: “Sapos man i winim pait, mi bai sanapim em olsem pos bilong strongim haus bilong God bilong mi, na em bai i no lusim haus bilong God na i go ausait gen. Nogat tru.”⁠​—⁠​KTH 3:12a.

22. (a) Haus bilong God bilong Jisas em wanem samting? (b) Ol Kristen God i makim na ol i winim pinis pait, olsem wanem ol bai kamap olsem ol pos long dispela haus bilong God?

²² Sapos man i kamap olsem wanpela pos long haus bilong God Jehova, em gutpela samting tru! Long bipo, haus lotu i stap long Jerusalem na em i nambawan ples bilong lotuim Jehova. Insait long dispela haus lotu, long wanpela de long olgeta yia, hetpris i save kisim blut bilong sampela animal ol i bin kilim olsem ofa na em i go insait long “Rum Tambu Tru” na kapsaitim dispela blut long ai bilong narapela kain lait i stap long dispela hap na i makim olsem Jehova i stap long dispela hap. (Hibru 9⁠:​1-7) Taim Jisas i kisim baptais, narapela haus lotu i kamap. Em i no wanpela haus tru​—⁠em i olsem tempel spirit o rot bilong lotuim Jehova. Rum tambu tru bilong dispela haus lotu long heven, em ples stret God i stap long en, na taim Jisas i go insait long en, em i “stap klostu tru long God.” (Hibru 9⁠:24) Jisas em i Hetpris, na i gat wanpela ofa tasol bilong tekewe sin olgeta, em blut bilong Jisas, em man i nambawan tru, na blut i kapsait pinis. (Hibru 7⁠:​26, 27; 9⁠:​25-​28; 10⁠:​1-5, 12-​14) Ol Kristen God i makim long spirit holi, taim ol i stap yet long graun na ol i stap gut long God, ol i mekim wok long banis bilong dispela haus lotu hia long graun. (1 Pita 2⁠:⁠9) Tasol taim ol i winim pinis pait, ol tu i go insait long dispela rum tambu tru long heven, na ol i kamap olsem strongpela pos bilong ol samting Jehova i putim olsem rot, o haus, bilong lotuim em. (Hibru 10⁠:19; KTH 20⁠:⁠6) Ol “bai i no lusim haus bilong God na i go ausait gen.”

23. (a) Nau Jisas i mekim wanem tok promis long ol dispela Kristen i winim pinis pait? (b) Jisas i raitim nem bilong Jehova na nem bilong nupela Jerusalem long ol na dispela i mekim wanem wok?

²³ Jisas i tok moa olsem: “Mi bai raitim nem bilong God bilong mi long em, na mi bai raitim nem bilong taun bilong God bilong mi, em dispela nupela Jerusalem i kam long God bilong mi, na i lusim heven na i kam daun. Na nupela nem bilong mi yet, em tu bai mi raitim long em.” (KTH 3:12b) Jisas i raitim nem bilong Jehova long ol dispela man i winim pinis pait​—⁠em nem bilong God bilong ol na God bilong Jisas. Dispela samting i kamapim klia olsem Jehova i narapela na Jisas i narapela​—⁠tupela i no hap bilong wanpela God triwan. (Jon 14⁠:28; 20⁠:17) Olgeta ensel na olgeta man i mas save, ol dispela Kristen em God i bin makim ol, ol i bilong em. Ol i witnes bilong em. Na Jisas i raitim nem bilong nupela Jerusalem tu long ol, em dispela taun i lusim heven na i kam daun​—⁠olsem em i kirap long bosim olgeta gutpela manmeri na mekim gut long ol. (KTH 21⁠:​9-​14) Olgeta sipsip Kristen long graun ol tu bai save ol dispela manmeri i winim pinis pait ol i lain bilong Kingdom, olsem Jerusalem i stap long heven.​—⁠Song 87⁠:​5, 6; Matyu 25⁠:​33, 34; Filipai 3⁠:20; Hibru 12⁠:⁠22.

24. Nupela nem bilong Jisas i makim wanem samting? Olsem wanem Jisas i raitim dispela nem long ol Kristen God i makim, em ol i stap gut long em?

²⁴ Na Jisas i raitim narapela nem tu long ol, em nupela nem bilong Jisas. Dispela nupela nem i makim nupela wok Jisas i kisim na ol narapela gutpela wok Jehova i givim long em. (Filipai 2⁠:​9-​11; KTH 19⁠:12) Ol narapela man i no inap kisim save long dispela nem, long wanem God i no givim ol dispela wok long narapela man; em i givim long Jisas wanpela tasol. Tasol taim Jisas i raitim nem bilong em long ol brata bilong em i stap gut long wok, nau bai ol i pas tru wantaim em long Kingdom bilong heven, na ol i wok wantaim em long mekim ol dispela wok em i kisim. (Luk 22⁠:​29, 30) Olsem na taim Jisas i laik pinisim dispela tok em i givim long ol manmeri God i bin makim, Jisas i tok strong gen, olsem: “Orait man i gat yau, em i mas harim gut dispela tok Holi Spirit i autim long ol sios [kongrigesen].”​—⁠KTH 3:⁠13.

25. Olsem wanem olgeta wan wan Kristen long nau i ken bihainim lo bilong dispela tok Jisas i bin givim long kongrigesen bilong Filadelfia?

²⁵ Ol dispela tok i bin strongim tru ol Kristen long Filadelfia! Na em i givim gutpela tingting long ol Kristen i stap nau long de bilong Bikpela, em Jon i olsem piksa bilong ol. Tasol ol lo bilong en i bikpela samting long olgeta wan wan Kristen, maski God i bin makim ol o ol i bilong lain arapela sipsip. (Jon 10⁠:16) Yumi olgeta wan wan i mas wok strong yet long kamapim ol kaikai bilong Kingdom, olsem ol Kristen long Filadelfia i bin mekim. Yumi olgeta i gat liklik hap strong. Yumi olgeta inap mekim sampela wok bilong Jehova. Orait, yumi mas mekim wok long dispela hap strong! Ai bilong yumi i mas op na taim yumi lukim dua i op long yumi bilong mekim bikpela wok moa bilong Kingdom, yumi mas go insait long dispela dua. Na yumi ken beten askim Jehova long opim dispela dua long yumi. (Kolosi 4⁠:​2, 3) Yumi mas sanap strong olsem Jisas i bin mekim na stap gut long nem bilong em, na long dispela rot bai yumi kamapim long ples klia olsem yumi tu yumi harim gut dispela tok spirit bilong God i autim long ol kongrigesen.

[Ol Futnot]

[Blok long pes 63]

Helpim Planti Long Brukim Skru

I gat 144,000 God i bin makim bilong kisim Kingdom bilong heven, na nau liklik hap lain tasol, em lain remnan, ol i stap yet long graun; namba bilong ol i aninit long 9,000. Tasol ol manmeri bilong bikpela lain ol i wok long kamap planti moa na i winim 6,600,000. (KTH 7⁠:​4, 9) Wanem samting i mekim na dispela lain i go bikpela olsem? Wanpela samting em ol skul ol Witnes Bilong Jehova i putim. Ol misin i gat ol skul bilong lainim ol man i laik kamap pris, na ol i save lainim ol long tingting bilong ol man na ol i daunim Baibel. Tasol ol skul bilong ol Witnes i lainim ol man long bilip tru long Baibel. Ol i helpim ol man long bihainim ol lo bilong Baibel bambai ol i ken wokabaut stret na givim bel long mekim wok bilong God. Kirap long 1943, olgeta kongrigesen bilong ol Witnes i gat skul long olgeta wik, em Skul Bilong Wok Autim Tok. Planti milion manmeri i save go long dispela skul, na ol i skul long ol tok bilong Baibel.

Kirap long 1959 ol Witnes i bin putim ol skul tu bilong lainim ol elda na wokman (Skul Bilong Wok Kingdom). Na kirap long 1977, ol Skul Bilong Wok Painia i bin lainim planti handet tausen brata sista, em ol i wok strong long autim tok wankain olsem ol Kristen long Filadelfia long bipo. Long 1987 ol i bin kirapim wanpela skul bilong lainim sampela brata na salim ol i go mekim wok long ol narapela kantri (Skul Bilong Lainim Wok Bilong Lukautim Kongrigesen).

Wanpela skul bilong ol Witnes i bin mekim bikpela wok, em Wastaua Baibel Skul Bilong Gileat. Ol i bin opim dispela skul misineri long 1943 long provins Nu Yok, na klostu olgeta yia inap olsem tupela lain sumatin i bin winim skul. Planti wokman bilong Jehova, winim 7,000, ol i bin go long dispela skul na kamap misineri long ol longwe ples. Ol dispela misineri i bin mekim wok long planti kantri, winim 100, na ol i bin kirapim wok bilong Kingdom long planti bilong ol dispela kantri. Dispela skul i stap olsem 60 yia pinis, na sampela misineri bilong pastaim ol i wok yet long ol kantri ol i bin i go long en. Ol i wok wantaim ol misineri i kam bihain na helpim lain bilong Jehova long i go bikpela moa yet long olgeta hap!

[Sat long pes 64]

Long 1919 King Jisas i opim dua long ol man bilong mekim wok Kristen. Planti Kristen i givim bel tru long God ol i bin kirap mekim dispela wok.

1918 14 3,868  591

1928 32 23,988 1,883

1938 52 47,143 4,112

1948 96 230,532 8,994

1958 175 717,088 23,772

1968 200 1,155,826 63,871

1978 205 2,086,698 115,389

1988 212 3,430,926 455,561

1998 233 5,544,059 698,781

2005 235 6,390,022 843,234

[Ol Futnot]

[Sat long pes 65]

Ol Witnes Bilong Jehova i save givim bel olgeta long mekim wok. Lukim hamas aua ol i bin lusim bilong autim tok na lainim ol man, na ol i bin mekim planti Baibel-stadi wantaim ol manmeri long haus bilong ol.

1918 19,116 No Gat Ripot

1928 2,866,164 No Gat Ripot

1938 10,572,086 No Gat Ripot

1948 49,832,205 130,281

1958 110,390,944 508,320

1968 208,666,762 977,503

1978 307,272,262 1,257,084

1988 785,521,697 3,237,160

1998 1,186,666,708 4,302,852

2005 1,278,235,504 6,061,534

[Piksa long pes 59]

Wanpela ki bilong ol Rom long taim bilong ol aposel

Sapta 14

Gutpela Bilas Tru Bilong Sia King Bilong Jehova

Driman 2​​—⁠Kamapim Tok Hait 4⁠:1–5⁠:⁠14

Stori: Ol bikpela samting i kamap long ai bilong sia king bilong God long taim bilong kot

Taim bilong truim: Dispela driman i makim sampela samting i mas kamap long yia 1914 na i go inap long pinis bilong 1,000 yia na bihain long en, em taim bilong olgeta long heven na graun bai litimapim nem bilong Jehova.​—⁠KTH 5⁠:⁠13

 1. Bilong wanem yumi mas tingim tru ol samting Jon i lukim olsem driman na em i tokim yumi long en?

NAU Jon i kirap long stori long sampela samting moa em spirit holi i soim long em olsem long driman. Ol dispela samting i bilong de bilong Bikpela, olsem na i bikpela samting long yumi ol manmeri i stap nau long dispela de. Long rot bilong ol dispela samting Jon i lukim olsem driman, Jehova i helpim yumi long save long sampela samting tru i stap long heven, em ai bilong ol man i no inap lukim, na em i kamapim tingting bilong em long strafe bilong em i mas painim ol man bilong graun. Na maski yumi wet bilong kisim laip long heven o long graun, ol dispela tok hait Jehova i kamapim long yumi i helpim yumi long save long ol wok em i laik bai yumi mekim. Olsem na yumi olgeta i mas tingting strong yet long tok bilong Jon olsem: “Dispela tok em i tok profet i kam long God, na man i ritim dispela tok long ol arapela, em i ken amamas. Na ol manmeri i harim dispela tok na ol manmeri i bihainim dispela tok bilong God mi bin raitim, ol tu i ken amamas.”​—⁠KTH 1⁠:⁠3.

 2. Nau wanem samting i painim Jon?

² Nau Jon i lukim wanpela gutpela samting tru. Em i tok: “Long heven mi lukim wanpela dua i op i stap. Na maus bilong dispela man, bipo mi harim em i singaut strong long mi olsem krai bilong biugel, nau em i tok olsem, ‘Yu kam antap hia, na bai mi soim yu olgeta samting i mas kamap bihain.’ ” (KTH 4⁠:⁠1) Jon i lukim sampela samting ai bilong ol man i no inap lukim​—⁠ol dispela samting i stap long heven long ples Jehova yet i stap long en. Dispela ples i antap tru, winim ples antap ol man i bin raun long en long ol roket samting bilong lukim mun samting, na i antap moa yet long ol bikpela bikpela lain sta bilong skai. I olsem wanpela dua long heven i op i stap na Jon inap lukluk i go insait na lukim olgeta hap bilong dispela ples em Jehova yet i stap long en long sia king bilong em. (Song 11⁠:4; Aisaia 66⁠:⁠1) Em gutpela samting tru!

 3. Dispela maus i singaut strong olsem “krai bilong biugel” i kirapim yumi long tingim wanem samting? Husat i As bilong ol tok dispela maus i mekim?

³ Jon i harim “maus” bilong wanpela man i singaut. Baibel i no tok em maus bilong husat, tasol maus i singaut strong olsem krai bilong biugel, wankain olsem Jisas i bin mekim taim Jon i harim em i singaut long pastaim. (KTH 1⁠:​10, 11) Dispela i kirapim yumi long tingim strongpela krai bilong biugel i bin kamap bilong makim olsem Jehova i stap long maunten Sainai. (Kisim Bek 19⁠:​18-​20) Olsem na yumi save, Jehova i As bilong dispela singaut i go long Jon. (KTH 1⁠:⁠1) Jehova yet i opim dua bambai Jon, long driman, inap go insait long dispela ples i tambu tru.

Bikpela Lait Bilong Jehova

 4. (a) Ol samting Jon i lukim olsem driman, bilong wanem i bikpela samting long liklik lain Kristen God i bin makim? (b) Bilong wanem i bikpela samting long ol man i wet long kisim laip oltaim long graun?

⁴ Jon i lukim wanem samting? Harim, nau em i laik stori. Em i tok: “Na wantu tasol Holi Spirit i kamap strong long mi, na long heven mi lukim wanpela sia king i stap, na wanpela Man i sindaun i stap long dispela sia.” (KTH 4:⁠2) Wantu tasol strong bilong God i mekim na long tingting bilong Jon i olsem em i go kamap long sia king bilong Jehova yet. Gutpela samting tru i painim Jon! Em i lukim dispela ples long heven em yet wantaim ol narapela Kristen God i bin makim bai ol i go long en na kisim “dispela laip em i no inap bagarap.” Dispela kain laip “i klin olgeta long ai bilong God, na em bai i no inap pinis.” (1 Pita 1⁠:​3-5; Filipai 3⁠:20) Ol dispela samting Jon i lukim olsem driman i bikpela samting tu long ol man i wet long kisim laip oltaim long graun. Dispela i helpim ol long save long biknem bilong Jehova, na long dispela lain king bilong heven em Jehova i givim wok long ol bilong skelim ol lain man, na bilong bosim ol man long graun long bihain. God Jehova i save moa yet long pasin bilong stretim wok na bosim gut ol samting!

 5. Jon i lukim wanem samting tru em ai bilong Bokis Kontrak i makim?

⁵ Planti samting Jon i lukim long heven i kain olsem ol samting i bin i stap long haus lotu sel bilong ol Israel long ples nating. Inap olsem 1,600 yia paslain long taim Jon i lukim dispela driman, ol i bin wokim dispela haus lotu sel olsem ples bilong lotuim Jehova. Bokis kontrak i stap long Rum Tambu Tru bilong dispela haus lotu sel, na antap long ai gol bilong en Jehova yet i save autim lo bilong em. (Kisim Bek 25⁠:​17-​22; Hibru 9⁠:⁠5) Olsem na ai bilong Bokis Kontrak i makim sia king bilong Jehova. Nau Jon i lukim samting tru ai bilong Bokis i makim: Em i lukim Nambawan Bikpela King Jehova yet i sindaun long gutpela naispela sia king bilong em i stap antap tru!

 6. Jon i stori olsem wanem long Jehova? Olsem wanem stori bilong em i stret?

⁶ Sampela profet paslain long Jon i bin lukim sia king bilong Jehova olsem long driman na ol i stori planti long Man Holi i sindaun long dispela sia, tasol Jon i no stori tumas long em. (Esekiel 1⁠:​26, 27; Daniel 7⁠:​9, 10) Jon i stori long em olsem: “Dispela Man i lait olsem ston jaspa na retpela ston konilian. Wanpela renbo i raunim sia king, na mi lukim dispela renbo i lait olsem grinpela ston emeral.” (KTH 4:​3) Em gutpela bilas tru! Jon i lukim Jehova i sindaun isi i stap na em i lait tru olsem ol gutpela ston i dia tumas. Dispela i stret wantaim stori bilong disaipel Jems, em i stori long Jehova na em i tok, Jehova em i “Papa i bin mekim kamap olgeta lait bilong skai”! (Jems 1⁠:17) Na Jon yet i tok: “God em i lait, na i no gat liklik hap tudak i stap long em.” (1 Jon 1⁠:⁠5) Tru tumas, God Jehova em i Man i gat biknem na gutpela bilas tru!

 7. Wanpela renbo i raunim sia king bilong Jehova na dispela i lainim yumi long wanem samting?

⁷ Jon i lukim wanpela renbo i raunim dispela sia king na renbo i lait olsem grinpela ston emeral. Hap tok Grik (irʹis) ol i tanim olsem renbo long dispela KTH 4:3 ves, em i makim samting i raunpela olgeta. Namba wan taim Baibel i stori long wanpela renbo em long taim bilong Noa. Ol wara bilong Bikpela Tait i slek pinis na nau Jehova i kamapim renbo long antap olsem wanpela mak. Em i stori long ol samting dispela renbo i makim na em i tok: “Mi putim renbo bilong mi long klaut olsem mak bilong dispela kontrak bilong oltaim mi mekim pinis wantaim yupela na olgeta animal. Dispela renbo bai i stap olsem mak bilong kontrak mi mekim wantaim olgeta samting bilong graun. Na bai mi tingim dispela promis mi mekim pinis wantaim yupela na ol animal, olsem na bai tait i no ken bagarapim gen olgeta samting i gat laip.” (Stat 9⁠:​13, 15) Dispela renbo Jon i lukim i mas kirapim em long tingim pasin bilong i stap wanbel wantaim Jehova, olsem liklik lain em Jon i piksa bilong ol i stap wanbel wantaim Em long nau. Na tu, Jon bai pilim bel isi na gutpela pasin isi bilong Jehova, em olgeta man i bihainim tok bai kisim dispela bel isi long taim “haus bilong God i stap wantaim ol manmeri” long nupela graun.​—⁠Song 119⁠:165; Filipai 4⁠:7; KTH 21⁠:​1-4.

Dispela 24 Hetman

 8. Jon i lukim husat ol i sindaun long ol sia i raunim sia king bilong Jehova? Ol i olsem piksa na i makim wanem lain?

⁸ Jon i save i gat ol pris i save mekim wok long haus lotu sel bilong bipo. Olsem na ating em i kirap nogut long samting nau em i lukim. Em i stori olsem: “I gat 24 sia i raunim dispela sia king, na 24 hetman i sindaun i stap long ol dispela sia. Ol dispela hetman i putim longpela waitpela klos, na ol i gat ol hat gol olsem ol hat king i stap long het bilong ol.” (KTH 4:⁠4) Em nau, em i no lukim ol pris i stap​—⁠em i lukim 24 hetman i stap, em ol i gat hat gol olsem bilong king na ol i sindaun long ol sia king. Ol dispela hetman i olsem piksa na i makim liklik lain Kristen God i bin makim, na Jon i lukim olsem ol i kirap bek pinis na ol i kisim pinis wok king long heven. Olsem wanem yumi save, dispela 24 hetman i olsem piksa bilong dispela lain?

9, 10. Olsem wanem yumi save, dispela 24 hetman i olsem piksa bilong liklik lain Kristen God i makim, taim ol i kisim pinis wok king bilong ol long heven?

⁹ Wanpela samting i helpim yumi long save, em olsem: Ol i gat hat gol olsem bilong king na ol i sindaun long ol sia king na dispela i makim olsem ol i holim strong bilong mekim wok king. (Lukim Kamapim Tok Hait 6⁠:2; 14⁠:14.) Dispela samting i helpim yumi long save, dispela 24 hetman i olsem piksa bilong liklik lain taim ol i kisim pinis wok bilong ol long heven, long wanem Jisas i bin mekim kontrak wantaim ol na em i tok, ol bai sindaun long ol sia king long Kingdom bilong em. (Luk 22⁠:​28-​30) Baibel i no stori long ol ensel i kisim dispela wok. Nogat. Baibel i stori long Jisas wantaim ol 24 hetman tasol ol i sindaun long ai bilong Jehova na mekim wok king.

¹⁰ Dispela i stret wantaim tok promis Jisas i bin mekim long kongrigesen i stap long taun Laodisia, em i bin tokim ol: “Sapos man i winim pait, bai mi larim em i sindaun wantaim mi long sia king bilong mi.” (KTH 3⁠:21) Ol dispela 24 hetman i mekim wok king long heven na ol i mekim narapela wok tu. Taim Jon i kirap long raitim ol tok bilong Kamapim Tok Hait, em i tok: “[Jisas] i bin mekim yumi i kamap ol pris bilong lain bilong king, na yumi stap lain pris bilong God, em Papa bilong Jisas.” (KTH 1⁠:​5, 6) Ol dispela hetman i holim wok king na wok pris tu wantaim.​—⁠KTH 20⁠:⁠6.

11. Bilong wanem i stret namba bilong ol hetman em 24? Dispela namba i makim wanem samting?

¹¹ Ol dispela hetman Jon i lukim ol inap olsem 24. Orait dispela namba 24 i makim wanem samting? Ol gutpela pris bilong lain Israel long bipo i olsem piksa bilong dispela lain hetman long planti samting. Aposel Pita i bin stori long liklik lain Kristen God i makim na em i tok: “God i makim yupela pinis, na yupela i stap lain manmeri bilong em stret. Yupela i stap ol pris bilong lain bilong king. Yupela i stap lain manmeri i holi, em ol lain manmeri tru bilong God.” (1 Pita 2⁠:⁠9) Ol i bin tilim ol pris bilong Israel long bipo i go long 24 lain, na ol i makim taim bilong olgeta wan wan lain i mas i go mekim wok long haus lotu bilong Jehova, bambai long olgeta taim i gat ol lain bilong lotu long Jehova na mekim wok bilong em. (1 Stori 24⁠:​5-​19) Olsem na i stret Jon i lukim 24 hetman i mekim wok pris long heven, long wanem, dispela lain pris bai mekim wok bilong Jehova oltaim oltaim. Taim dispela lain em inap pinis, bai i gat 144,000 olgeta, em olsem 24 lain bilong 6 tausen 6 tausen man bilong winim pait (olsem 24 taims 6 tausen). Kamapim Tok Hait 14⁠:​1-4 i tok: “God i bin baim bek ol dispela lain namel long olgeta manmeri bilong graun” na ol bai sanap wantaim Pikinini Sipsip, em Krais Jisas, long maunten Saion long heven. Namba 12 i olsem piksa na i makim wanpela lain o oganaisesen God yet i kamapim long heven o long graun. Sapos yumi dabolim 12 (olsem 2 taims 12), dispela i mekim 24, olsem na dispela namba 24 i makim olsem God i dabolim, olsem strongim, dispela lain hetman em i bin kamapim.

‘Lait Bilong Klaut, na Nois, na Klaut i Pairap’

12. Orait, nau Jon i lukim na harim wanem samting? Dispela ‘lait bilong klaut, na nois, na klaut i pairap’ i kirapim yumi long tingim wanem samting?

¹² Nau Jon i lukim na harim wanem samting? Em i tok: “Long sia king mi lukim lait bilong klaut i sut i go nabaut, na mi harim bikpela nois i kamap na klaut i pairap.” (KTH 4:⁠5a) Kain samting olsem i bin kamap long taim Jehova i kamapim bikpela strong bilong em long bipo. Olsem: Moses i stori long taim Jehova i bin “kam daun” long maunten Sainai, na Moses i tok: “Long moningtaim bilong dispela de namba 3, bikpela klaut i kamap long maunten, na klaut i pairap na lait bilong klaut i sut i go nabaut, na wanpela biugel i krai bikpela moa. . . . Na krai bilong biugel i kamap bikpela moa. Na Moses i tok long God na God i mekim klaut i pairap na Moses i harim maus bilong God i bekim tok long em.”​—⁠Kisim Bek 19⁠:​16-​19.

13. Lait bilong klaut i kam long sia king bilong Jehova i makim wanem samting?

¹³ Long de bilong Bikpela, Jehova i kamapim strong na biknem bilong em long wanpela rot i nambawan tru. Em i no kamapim long rot bilong lait tru bilong klaut, long wanem ol samting Jon i lukim i olsem piksa tasol. Orait, dispela lait bilong klaut Jon i lukim, em i makim wanem samting? Lait bilong klaut inap givim lait long man, tasol sapos em i holim man em inap bagarapim em. Olsem na dispela lait bilong klaut i kamap long sia king bilong Jehova na i sut i go nabaut i makim ol tok na save Jehova i givim long lain bilong em, na i makim tu ol tok bilong em i kolim strafe bilong ol man nogut.​—⁠Lukim Song 18⁠:14; 144⁠:​5, 6; Matyu 4⁠:​14-​17; 24⁠:⁠27.

14. Olsem wanem ol maus i bin kamap long nau tu?

¹⁴ Na olsem wanem long dispela bikpela “nois,” o pairap, Jon i harim? Em pairap bilong ol maus i kamap long heven. Taim Jehova i bin kam daun long maunten Sainai, Moses i harim wanpela maus bilong heven i toktok long em. (Kisim Bek 19⁠:19) Long hap bilong Kamapim Tok Hait, planti taim wanpela maus long heven i singaut na givim tok long ol man long ol samting ol i mas mekim, o i mekim sampela tokaut. (KTH 4⁠:1; 10⁠:​4, 8; 11⁠:12; 12⁠:10; 14⁠:13; 16⁠:​1, 17; 18⁠:4; 19⁠:5; 21⁠:⁠3) Long nau tu, Jehova i bin givim tok long lain bilong em long ol samting ol i mas mekim na em i bin mekim sampela tokaut long ol, na em i bin givim save long ol, olsem lait, na dispela i helpim ol long save long ol tok profet na ol lo bilong Baibel. Long sampela bikpela kibung ol i bin kisim kain save o lait olsem, na ol i bin tokaut long olgeta hap bilong graun long ol dispela tok i tru bilong Baibel ol i kisim save long en. Aposel Pol i stori long ol man i wok strong long autim “gutnius” na em i tok: “Ol manmeri long olgeta hap bilong graun i harim pinis nek bilong ol. Na tok bilong ol i go inap long olgeta ples.”​—⁠Rom 10⁠:⁠18.

15. Wanem samting olsem klaut i pairap i lusim sia king nau long dispela hap taim long de bilong Bikpela?

¹⁵ Taim klaut i lait, bihain klaut i save pairap. Devit i stori long Jehova na em i tok, taim Jehova i singaut strong i “olsem klaut i pairap.” (Song 29⁠:​3, 4) Jehova i bin helpim Devit long daunim ol birua na Baibel i tok, long dispela taim Jehova i singaut bikmaus na i “olsem klaut i pairap.” (2 Samuel 22⁠:14; Song 18⁠:13) Elihu i tokim Jop, taim ol man i harim maus bilong Jehova i olsem ol i harim “klaut i pairap,” long wanem “em i save mekim olkain samting, i winim tingting bilong yumi.” (Jop 37⁠:​4, 5) Nau long dispela hap taim long de bilong Bikpela, maus bilong Jehova i “pairap”​—⁠em i toksave long ol bikpela wok em bai mekim bilong daunim ol birua bilong em. Dispela “pairap” i bin go nabaut long olgeta hap bilong graun. Sapos yu bin bihainim ol dispela toksave i olsem klaut i pairap, na yu bin mekim gutpela wok long maus bilong yu bilong autim ol dispela toksave long ol man, orait yu ken amamas.​—⁠Aisaia 50⁠:​4, 5; 61⁠:​1, 2.

Ol Bombom i Lait na Solwara Glas

16. Dispela “7-pela bombom” i makim wanem samting?

¹⁶ Orait, Jon i lukim wanem samting moa? Em i tok: “Long pes bilong sia 7-pela bombom i lait i stap. Dispela ol bombom em ol 7-pela spirit bilong God. Long pes bilong sia king i gat wanpela samting i stap, em i olsem bikpela solwara ol i bin wokim long glas, na em i klia tru.” (KTH 4:​5b, 6a) Jon yet i tokim yumi long samting dispela 7-pela bombom i makim, em i tok: “Dispela ol bombom em ol 7-pela spirit bilong God.” Namba 7 i makim samting bilong God em inap olgeta; olsem na dispela 7-pela bombom i makim strong bilong spirit holi bilong givim save em inap tru. Liklik lain long nau em Jon i piksa bilong ol, ol i amamas long God i bin givim dispela save o lait long ol, na ol i amamas long em i bin givim wok long ol bilong autim dispela save long ol manmeri bilong graun ol i hangre long ol kaikai bilong spirit! Yumi amamas tru, long wanem, long olgeta yia planti handet milion nius Wastaua i wok long givim dispela lait, o save, long ol man long planti tok ples, inap olsem 150!​—⁠Song 43⁠:⁠3.

17. “Solwara ol i bin wokim long glas” em i makim wanem samting?

¹⁷ Jon i lukim tu wanpela samting “i olsem bikpela solwara ol i bin wokim long glas.” Dispela i makim wanem samting long ol manmeri Jehova i bin singautim ol i go long heven? Pol i stori long ol samting Jisas i mekim bambai dispela lain bilong i go long heven ol i ken kamap klin; em i tok Jisas i mekim ol i kamap klin “long wara na long tok bilong en.” (Efesus 5⁠:26) Taim Jisas i no i dai yet, em i tokim ol disaipel: “Yupela i kamap klin pinis. Dispela tok mi givim yupela, em i mekim yupela i kamap klin.” (Jon 15⁠:⁠3) Olsem na dispela samting i olsem solwara glas i makim Tok bilong God i save mekim ol i kamap klin. Ol manmeri bilong i go i stap klostu long Jehova na mekim wok king na pris long heven ol i mas kamap klin pastaim long rot bilong Tok bilong em.

Lukim​—⁠“4-pela Samting i Stap Laip”!

18. Jon i lukim wanem samting i stap long 4-pela sait bilong sia king?

¹⁸ Nau Jon i lukim narapela samting. Em i tok: “Na 4-pela samting i stap laip ol i sanap i stap long ol 4-pela sait bilong sia king. Dispela 4-pela samting i stap laip ol i gat planti ai i karamapim olgeta hap bilong bodi bilong ol, em long baksait tu.”​—⁠KTH 4:6b.

19. Dispela 4-pela samting i stap laip i piksa bilong wanem samting? Olsem wanem yumi inap save long dispela samting?

¹⁹ Dispela “4-pela samting” i piksa bilong wanem samting? Sampela samting profet Esekiel i bin lukim olsem driman i helpim yumi long save long dispela samting. Esekiel i bin lukim Jehova i sindaun long wanpela sia king long heven i kain olsem karis i gat wil, na klostu long en i gat 4-pela samting ol i kain olsem dispela 4-pela samting i stap laip em Jon i lukim. (Esekiel 1⁠:​5-​11, 22-​28) Bihain, Esekiel i lukim gen dispela sia king na dispela ol samting olsem man na nau Esekiel i tok, ol i wanpela kain ensel bilong God. (Esekiel 10⁠:​14, 20) Olsem na dispela 4-pela samting i stap laip em Jon i lukim, i mas makim ol dispela kain ensel em ol i planti na ol i gat bikpela wok long oganaisesen bilong God long heven. Jon i no ken kirap nogut long lukim sampela ensel i stap klostu tru long God Jehova, long wanem, long haus lotu sel long bipo i gat piksa bilong tupela ensel ol i bin wokim long gol antap long ai bilong Bokis Kontrak bilong Jehova, em ai bilong bokis i makim sia king bilong Jehova. Maus bilong Jehova i save kamap namel long dispela tupela ensel na givim ol tok na lo bilong em long lain Israel.​—⁠Kisim Bek 25⁠:22; Song 80⁠:⁠1.

20. Olsem wanem yumi ken tok dispela 4-pela samting i stap laip ol i stap “long namel na long 4-pela sait bilong sia king”?

²⁰ Dispela 4-pela samting i stap laip ol i stap long “4-pela sait bilong sia king.” Sampela Baibel (olsem The Jerusalem Bible) i tok, ol i stap “long namel na long 4-pela sait bilong sia king.” Olsem na ating ol i sanap klostu long sia king long namel bilong olgeta wan wan sait bilong en, o ating dispela tok i makim olsem ol i stap namel tru long heven, olsem long ples dispela sia king i stap long en. Tasol bikpela samting em olsem: Ol dispela kain ensel i stap klostu tru long sia king bilong Jehova, wankain olsem dispela 4-pela samting Esekiel i lukim i sanap klostu long 4-pela wil bilong ‘karis,’ olsem oganaisesen, bilong Jehova. (Esekiel 1⁠:​15-​22) Olgeta dispela samting i stret wantaim tok bilong Song 99⁠:1 i tok, Jehova “i sindaun long sia king bilong en antap long ol ensel.”

21, 22. (a) Jon i stori olsem wanem long dispela 4-pela samting i stap laip? (b) Pes bilong dispela 4-pela samting i stap laip i makim wanem samting?

²¹ Jon i stori moa olsem: “Namba wan samting i stap laip em i olsem laion. Namba 2 samting i stap laip em i olsem bulmakau man. Namba 3 samting i stap laip em i gat pes olsem pes bilong man. Na namba 4 samting i stap laip em i olsem wanpela bikpela tarangau i flai i stap.” (KTH 4:⁠7) Bilong wanem dispela 4-pela samting i stap laip i narapela narapela kain? Em bilong makim narapela narapela gutpela pasin bilong God. Namba wan samting i stap laip em i olsem laion. Long Baibel, laion i makim pasin bilong sanap strong na i no pret long bihainim stretpela pasin. (2 Samuel 17⁠:10; Sindaun 28⁠:⁠1) Olsem na laion i makim gutpela pasin bilong God long sanap strong na mekim stretpela kot. (Lo 32⁠:4; Song 89⁠:14) Namba 2 samting i stap laip em i olsem bulmakau man. Taim yu tingim wanpela bulmakau man, yu tingim wanem kain pasin? Long ol Israel bulmakau man i bikpela samting, long wanem, em i gat bikpela strong bilong mekim wok. (Sindaun 14⁠:4; lukim tu Jop 39⁠:​9-​11.) Olsem na bulmakau man i makim strong, olsem bikpela strong i kam long Jehova.​—⁠Song 62⁠:11; Aisaia 40⁠:⁠26.

²² Namba 3 samting i stap laip em i gat pes olsem pes bilong man. Dispela i mas makim pasin sori bilong God, long wanem, God i bin wokim ol man tasol i kain olsem em yet, em ol i gat dispela pasin i nambawan tru, em pasin bilong sori. (Stat 1⁠:​26-​28; Matyu 22⁠:​36-​40; 1 Jon 4⁠:​8, 16) Yumi save, ol dispela ensel i save bihainim dispela pasin taim ol i mekim wok klostu long sia king bilong Jehova. Orait, olsem wanem long namba 4 samting i stap laip? Em i olsem wanpela bikpela tarangau i flai i stap. Jehova yet i stori long pasin bilong ol tarangau em ol inap lukluk i go longwe. Jehova i tok: “Maski abus i stap longwe, ol [tarangau] i save lukim.” (Jop 39⁠:29) Olsem na tarangau i makim stret gutpela tingting na save bilong Jehova, em inap save long ol samting ‘i stap longwe.’ Jehova em i As bilong olgeta gutpela tingting na save. Taim ol ensel bilong em i bihainim tok bilong em na mekim ol wok em i bin tokim ol long mekim, ol i save bihainim gutpela tingting na save i kam long em.​—⁠Sindaun 2⁠:6; Jems 3⁠:⁠17.

Ol i Litimapim Nem Bilong Jehova

23. Dispela 4-pela samting i gat “planti ai” na dispela i makim wanem samting? Ol i gat 6-pela wing na dispela i makim wanem samting?

²³ Jon i stori moa na em i tok: “Dispela 4-pela samting i stap laip, olgeta wan wan i gat 6-pela wing. Na planti ai i karamapim bodi bilong ol, na i stap aninit long ol wing tu. Na long san na long nait ol i save tok olsem, ‘God, Bikpela I Gat Olgeta Strong, em i holi, em i holi, em i holi. Bipo em i stap, na nau em i stap, na bihain bai em i kam.’ Ol i no save malolo long mekim dispela tok.” (KTH 4:⁠8) Dispela planti ai i makim olsem ol inap lukim olgeta samting na lukluk i go longwe. Dispela 4-pela samting i stap laip ol i no save slip, olsem na long olgeta taim ai bilong ol i op na ol i wok long lukim ol samting na lukluk i go longwe. Ol i bihainim pasin bilong Jehova, em Baibel i tok: “Oltaim Bikpela i save was gut long ol manmeri i save aninit long em wanpela tasol, maski ol i stap long wanem hap bilong graun.” (2 Stori 16⁠:⁠9) Ol dispela ensel i gat planti ai, olsem na ol inap lukim ol samting long olgeta hap. No gat wanpela samting inap hait long ai bilong ol. Olsem na ol inap tru long helpim God long wok bilong em long skelim ol man. Baibel i tok: “Bikpela i save lukim olgeta samting i kamap long olgeta hap. Em i lukim ol gutpela man na ol man nogut tu.” (Sindaun 15⁠:⁠3) Na ol dispela 4-pela samting i stap laip i gat 6-pela wing, olsem na ol inap raun spit tru na tokaut long strafe bilong Jehova na givim dispela strafe long ol man.

24. Ol dispela ensel i tok wanem bilong litimapim nem bilong Jehova? Na dispela i makim wanem samting?

²⁴ Harim! Ol dispela ensel i mekim gutpela singsing tru bilong litimapim nem bilong Jehova na i kirapim tru bel bilong yumi. Ol i tok: “God, Bikpela I Gat Olgeta Strong, em i holi, em i holi, em i holi. Bipo em i stap, na nau em i stap, na bihain bai em i kam.” Tripela taim ol i kolim dispela tok “em i holi”​—⁠ol i mekim olsem bilong strongim dispela tok. Ol i tokaut strong long pasin holi bilong God Jehova. Em i As bilong pasin holi na em i Mak tru bilong en. Na tu em i “King bilong olgeta taim”​—⁠oltaim em i stap olsem “paslain tru” na “las tru,” na “namba wan tru” na “bihain tru,” na em i “as bilong olgeta samting, na [em i] save pinisim olgeta wok [em i] mekim.” (1 Timoti 1⁠:17; KTH 22⁠:13) Ol ensel i no save malolo liklik long tokaut long ol gutpela pasin tru bilong Jehova long ai bilong olgeta samting em i bin wokim.

25. Olsem wanem 4-pela samting i gat laip na ol 24 hetman i bung wantaim long litimapim nem bilong Jehova?

²⁵ Insait tru long heven ol i litimapim tru nem bilong Jehova! Jon i stori olsem: “Dispela ol samting i stap laip, ol i save amamas long dispela Man i sindaun long sia king bilong en na i stap laip oltaim oltaim. Na ol i litimapim nem bilong en na ol i tenkyu long em. Na olgeta taim ol 4-pela samting i stap laip ol i mekim olsem, orait dispela 24 hetman ol i save brukim skru long pes bilong dispela Man i sindaun i stap long sia king. Na ol i save lotu long em, em Man bilong i stap oltaim oltaim. Ol i save kisim ol hat gol bilong ol na tromoi ol i go pundaun klostu long pes bilong sia king, na ol i save singim song olsem, ‘Bikpela, yu God bilong mipela. Yu tasol yu stap antap tru na inap tru long olgeta man i ken amamas long yu na litimapim nem bilong yu na i stap aninit long strong bilong yu. Long wanem, yu bin wokim olgeta samting. Long laik bilong yu yet yu bin mekim olgeta samting i kamap, na nau dispela olgeta samting i stap.’ ” (KTH 4⁠:​9-​11) Long olgeta tok bilong Baibel, dispela tok em i nambawan gutpela tokaut tru bilong daun long Jehova na litimapim nem bilong em, em i God bilong yumi na Nambawan Bikpela King!

26. Bilong wanem ol 24 hetman i tromoi hat king bilong ol i go pundaun long ai bilong Jehova?

²⁶ Ol 24 hetman i gat wankain tingting olsem bilong Jisas​—⁠ol i daun tru long Jehova, olsem na ol i tromoi hat king bilong ol i go pundaun long ai bilong em. Ol i stap klostu long God, tasol ol i no tingting liklik long litimapim nem bilong ol yet. Ol i gat pasin daun na ol i save, ol i bin kamap king bilong mekim wanpela wok tasol, em bilong givim biknem long God, olsem Jisas i save mekim long olgeta taim. (Filipai 2⁠:​5, 6, 9-​11) Ol i daun long God Jehova, long wanem, ol i save ol yet i no gat nem​—⁠Nambawan Bikpela King Jehova i bin givim wok king long ol. Olsem na ol i wanbel wantaim ol dispela ensel na ol narapela ensel na ol man i stap gut long God, na ol i wok wantaim ol long litimapim nem bilong God na givim biknem long em, em i Man bilong wokim olgeta samting.​—⁠Song 150⁠:​1-6.

27, 28. (a) Stori bilong Jon long dispela driman i mas mekim wanem long yumi? (b) I gat wanem ol askim long ol samting Jon i lukim na harim bihain long dispela?

²⁷ Wanem man i stap na bel bilong em i no kirap taim em i kaunim stori bilong Jon long dispela samting em i lukim olsem driman? Nogat tru! Jon i lukim nambawan gutpela samting! Em i lukim olsem piksa, tasol olsem wanem long samting tru piksa i makim? Jehova em i nambawan bikpela King na olgeta man i gat gutpela bel i mas pilim tru bikpela namba bilong em na bai ol i bung wantaim ol 4-pela samting i stap laip na ol 24 hetman long litimapim nem bilong Em! Bai ol i mekim olsem long taim ol i beten na long taim ol i autim nem bilong Em long ol man. Ol Kristen long nau i gat gutpela wok ol i ken mekim​—⁠ol i ken i stap witnes bilong dispela God na autim tok bilong em. (Aisaia 43⁠:10) Yumi mas save, Jon i lukim ol samting bilong de bilong Bikpela, em dispela taim nau yumi stap long en. Long olgeta taim “ol 7-pela spirit bilong God” i redi i stap bilong soim rot long yumi na strongim yumi. (Galesia 5⁠:​16-​18) Long nau yumi gat Baibel, na dispela inap helpim yumi long bihainim pasin holi long taim yumi mekim wok bilong dispela God i holi. (1 Pita 1⁠:​14-​16) Tru tumas, yumi amamas long kaunim dispela tok profet long ol narapela man. (KTH 1⁠:⁠3) Dispela tok profet i kirapim yumi long i stap gut long Jehova na yumi no laik larim wanpela samting bilong dispela graun i pulim yumi na bai yumi lusim wok bilong litimapim nem bilong em!​—⁠1 Jon 2⁠:​15-​17.

²⁸ Em nau, Jon i stori long ol samting em i lukim taim God i singautim em i go antap long heven. Em i stori long bikpela King Jehova em i gat bikpela lait na biknem na em i sindaun long gutpela sia king bilong em long heven. Ol lain i mekim wok bilong em, em wanpela oganaisesen i winim olgeta narapela oganaisesen, ol i sanap klostu long em long bikpela lait na ol i stap gut long em. Em nau, bikpela King, em God Jehova, wantaim lain bilong em ol i bung i stap. (Daniel 7⁠:​9, 10, 18) Ol samting i redi pinis bilong narapela kain samting i ken kamap. Wanem samting i laik kamap? Dispela samting i mekim wanem long yumi long nau? Orait, nau yumi ken skelim ol samting i wok long kamap!

[Piksa i karamapim pes olgeta long pes 75]

[Piksa i karamapim pes olgeta long pes 78]

Sapta 13

Baim Gol Em Paia i Klinim Pinis

LAODISIA

1, 2. Laspela bilong ol 7-pela kongrigesen Jisas i bin salim tok long ol, dispela kongrigesen i stap we? Stori long sampela bikpela samting bilong dispela taun.

KONGRIGESEN bilong Laodisia em i laspela kongrigesen Jisas i salim tok long en taim em i kirap bek pinis na em i stap gen long heven. Ol dispela tok i kirapim tru tingting na bel bilong yumi!

² Long nau ol hap brukpela haus samting bilong taun Laodisia i stap klostu long taun Denisli, em longwe long Alasehir inap 89 kilomita. Taun Laodisia i stap long bikpela rot bung na i gat planti wok bisnis long en na ol haus beng. Ol Laodisia i save wokim wanpela marasin bilong ai, em planti man i save baim. Na ol i kisim nem long wokim klos long blakpela gras bilong sipsip. Tasol wanpela bikpela hevi bilong dispela taun, em olsem: Ol i sot long wara. Olsem na ol i bin wokim wanpela bris ston i gat baret long en bilong kisim wara i kam long taun. Dispela wara i stap longwe liklik long taun na i kamap insait long graun na i kam antap na i hat. Tasol wara i ran long baret na taim em i kamap pinis long taun em i no hat tru; em i hat liklik tasol.

 3. Jisas i mekim wanem tok bilong kirapim tok i go long kongrigesen long Laodisia?

³ Taun Laodisia i stap klostu liklik long taun Kolosi. Taim Pol i raitim pas long ol Kolosi em i stori long wanpela pas em i bin raitim long ol Laodisia. (Kolosi 4⁠:​15, 16) Pol i bin raitim wanem tok i go long ol Kristen long Laodisia, em yumi no save, tasol tok Jisas i salim long ol i kamapim klia olsem ol i stap nogut tru long ol samting bilong spirit. Tasol bilong kirapim tok, pastaim Jisas i mekim sampela tok i makim bikpela nem na namba em i holim. Em i tokim Jon: “Na yu mas raitim sampela tok long ensel bilong sios [kongrigesen] i stap long taun Laodisia. Dispela tok i olsem, ‘Mi man bilong tok “I tru” long olgeta tok na promis bilong God, na mi save autim stret olgeta tok bilong God. Oltaim mi save autim tok tru tasol. Mi as bilong olgeta samting God i bin wokim, mi salim dispela tok i kam long yu.’ ”​—⁠KTH 3:⁠14.

 4. Olsem wanem Jisas em i man bilong tok “I tru” long olgeta tok na promis bilong God?

⁴ Bilong wanem Jisas i tok, em i man bilong tok “I tru” long olgeta tok na promis bilong God? Dispela i strongim tok bilong em. Taim yumi beten, long pinis bilong beten yumi save tok, “Amen” (tok Hibru), olsem “I tru.” Em bilong makim olsem yumi save ol tok bilong dispela beten i tru. (1 Korin 14⁠:16) Jisas em i man bilong tok “I tru” long olgeta tok na promis bilong God, long wanem em i holimpas olgeta lo bilong God na em i dai olsem ofa, na dispela i soim yumi olsem olgeta gutpela tok promis bilong God i tru na i no ken lus nating. (2 Korin 1⁠:20) Bihain long taim Jisas i dai olsem ofa, i stret yumi mas beten long Jehova long rot bilong Jisas.​—⁠Jon 15⁠:16; 16⁠:​23, 24.

 5. Olsem wanem Jisas em i “man bilong autim stret olgeta tok bilong God”?

⁵ Na tu Jisas em i “man bilong autim stret olgeta tok bilong God.” Jisas i stap wokboi bilong Jehova na em i save mekim pasin i stret tasol. (Song 45⁠:4; Aisaia 11⁠:​4, 5; KTH 1⁠:5; 19⁠:11) Em i nambawan gutpela Witnes bilong Jehova. “Bipo tru, long taim Bikpela i no wokim graun yet, em i wokim” Jisas, olsem na long pastaim tru na i kam inap long nau Jisas i bin wok long tokaut long biknem bilong God. (Sindaun 8⁠:​22-​30) Taim em i stap man long graun, em i bin autim tok i tru long ol man. (Jon 18⁠:​36, 37; 1 Timoti 6⁠:13) Taim em i kirap bek, em i tok promis long givim spirit holi long ol disaipel na em i tokim ol: “Yupela bai i autim tok bilong mi long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.” Kirap long de Pentikos long yia 33 na bihain long dispela taim, Jisas i stiaim ol dispela Kristen God i bin makim na ol i autim tok long “olgeta manmeri i stap long graun.” (Aposel 1⁠:​6-8; Kolosi 1⁠:23) Jisas i autim stret olgeta tok bilong God na sapos ol Kristen long Laodisia i harim tok bilong em, dispela bai helpim ol.

 6. (a) Kongrigesen long Laodisia i stap olsem wanem long ol samting bilong spirit, olsem Jisas i tok? (b) Ol Kristen long Laodisia i no bihainim wanem gutpela pasin bilong Jisas?

⁶ Jisas i no inap kolim wanpela gutpela pasin bilong ol Kristen long Laodisia. Em i tok stret long ol olsem: “Mi save pinis long olgeta pasin yu save mekim. Mi save, yu no kol na yu no hat. Mi laik bai yu stap kolpela o yu stap hatpela. Tasol nogat. Yu hat liklik tasol. Yu no hatpela tru na yu no kolpela tru. Olsem na mi laik trautim yu long maus bilong mi.” (KTH 3:​15, 16) Sapos Bikpela Krais Jisas i mekim kain tok olsem long yu, bai yu kirap skelim pasin bilong yu, a? Na ol Kristen long Laodisia i mas kirap mekim olsem. Ol i kisim pinis marimari bilong God, tasol ol i slek long ol samting bilong spirit, olsem na ol i mas kirap stretim pasin bilong ol. (Lukim 2 Korin 6⁠:⁠1.) Ol i Kristen na ol i mas bihainim pasin bilong Jisas​—⁠em i givim bel tru long Jehova na long wok bilong Em. (Jon 2⁠:17) Na em i save mekim pasin isi long ol man i gat pasin daun, na gutpela pasin bilong em i givim nupela strong long ol na mekim gut bel bilong ol, olsem wara i kol i mekim gut skin bilong man long taim bilong bikpela san. (Matyu 11⁠:​28, 29) Tasol ol Kristen long Laodisia i givim hap bel tasol​—⁠ol i no hat tru na ol i no kol tru. Ol i hat liklik tasol olsem dispela wara i kam insait long taun bilong ol. Olsem na Jisas i laik sakim ol olgeta, olsem ‘trautim ol’! Yumi tu i mas givim bel long strongim ol narapela long spirit, olsem Jisas i bin mekim.​—⁠Matyu 9⁠:​35-​38.

“Yu Save Tok Olsem, ‘Mi Gat Planti Mani’ ”

 7. (a) Olsem Jisas i tok, wanem samting tru i mekim na ol Kristen long Laodisia i slek long wok? (b) Bilong wanem Jisas i tok ol Kristen long Laodisia i “aipas” na ol i stap “as nating”?

⁷ Wanem samting tru i mekim na ol Kristen long Laodisia i slek long wok? Tok bilong Jisas i helpim yumi long save long dispela samting, em i tok: “Yu save tok olsem, ‘Mi gat planti mani, na mi gat planti samting i stap. Mi no sot long wanpela samting.’ Tasol nogat. Yu stap nogut tru, inap long ol man i ken sori tru long yu. Yu stap rabis tru na yu aipas na yu stap as nating. Na yu yet yu no save long dispela.” (KTH 3⁠:17; lukim tu Luk 12⁠:​16-​21.) Ol i stap namel long ol man i gat planti wok bisnis na gutpela sindaun, olsem na ol i bilip long ol planti mani samting bilong ol na ol i ting dispela inap helpim ol. Na ating ol i save go lukim pilai o pait long ples bung na go long ol ples spot na ol i kirap ‘laikim tumas ol kain kain pasin bilong amamas na ol i no laikim God.’a (2 Timoti 3⁠:⁠4) Ol dispela Laodisia i gat planti samting bilong skin, tasol ol i stap rabis long ol samting bilong spirit. Ol i no bin bungim “ol gutpela gutpela samting” bilong ol long heven, o ating ol i bungim liklik tasol. (Matyu 6⁠:​19-​21) Ai bilong ol i no “gutpela”​—⁠ol i no tingim Kingdom bilong God i namba wan samting. I olsem ol i stap long tudak na ol i aipas​—⁠ol i no ‘lukim gut,’ olsem tingim gut, ol samting bilong spirit. (Matyu 6⁠:​22, 23, 33) Na tu, ol i pasim ol gutpela klos, long wanem ol i gat planti mani na ol inap baim, tasol long ai bilong Jisas i olsem ol i no gat klos na ol i stap “as nating.” Ol i no gat ol klos bilong spirit bilong makim ol i Kristen.​—⁠Lukim Kamapim Tok Hait 16⁠:⁠15.

 8. (a) Kain pasin olsem i stap long Laodisia, olsem wanem em i stap long nau tu? (b) Ol man bilong dispela graun i mangalim planti samting na olsem wanem sampela Kristen i stap namel long ol i bin giamanim bel bilong ol yet?

⁸ Ol i stap nogut tru long spirit! Long nau tu sampela man i stap nogut tru olsem, a? Ol i bilip long mani samting na long strong bilong ol man bilong helpim ol. Lain bilong ol misin i save go long lotu, tasol ol i skin Kristen tasol, na sampela long lain bilong Jehova tu i olsem​—⁠ol i ting sapos ol i go long ol miting long wan wan taim Jehova inap amamas long ol. Ol i laik mekim liklik wok tasol bilong ‘bihainim dispela tok ol i kisim.’ (Jems 1⁠:22) Planti taim lain remnan i bin givim toksave long ol, tasol ol i no harim​—⁠ol i givim bel long kisim ol nupela klos na ka na haus i gat stail, na ol i tingting tasol long painim amamas. (1 Timoti 6⁠:​9, 10; 1 Jon 2⁠:​15-​17) Dispela olgeta samting i mekim na tingting bilong ol long ol samting bilong spirit i no klia moa. (Hibru 5⁠:​11, 12) Ol i no ken slek na givim hap bel tasol long mekim wok; ol i mas ‘larim spirit holi i kirapim ol long mekim wok,’ na ol i mas laik tru long “autim tok.”​—⁠1 Tesalonaika 5⁠:19; 2 Timoti 4⁠:​2, 5.

 9. (a) Wanem ol tok bilong Jisas i mas kirapim tingting bilong ol Kristen ol i “hat liklik tasol” long mekim wok? Bilong wanem ol dispela tok i mas kirapim tingting bilong ol? (b) Olsem wanem kongrigesen inap helpim ol “sipsip” i lusim rot?

⁹ Jisas i ting olsem wanem long ol Kristen i “hat liklik tasol”? Strongpela tok bilong em i mas kirapim tingting bilong ol, em i tok: “Yu stap rabis tru na yu aipas na yu stap as nating. Na yu yet yu no save long dispela.” Bel bilong ol i pas na ol i no save ol i stap nogut tru olsem. (Lukim Sindaun 16⁠:2; 21⁠:⁠2.) Dispela pasin nogut i kamap insait long kongrigesen na ol i no ken ting em i samting nating. Ol elda na ol brata ol i makim bilong helpim ol i mas mekim pasin sori na wok strong long lukautim ol “sipsip,” na bai ol inap kirapim tingting bilong ol dispela “sipsip” i lusim rot, na bai ol i kamap strong gen na amamas long givim bel olgeta long mekim wok olsem pastaim ol i bin mekim.​—⁠Luk 15⁠:​3-7.

Em i Givim Tingting Long Ol Bambai Ol i ‘Gat Planti Samting’

10. Wanem dispela “gol” em Jisas i tokim ol Kristen long Laodisia ol i mas baim long em?

¹⁰ Olsem wanem? I gat rot bilong stretim dispela pasin nogut i stap long kongrigesen bilong Laodisia? I gat rot​—⁠ol dispela Kristen i mas bihainim gutpela tingting Jisas i laik givim long ol, em i tok: “Olsem na mi laik givim dispela tingting long yu: Gol bilong mi, em paia i bin kukim na rausim tru olgeta samting nogut i stap long en. Olsem na mobeta yu baim dispela gol, na bai yu gat planti mani.” (KTH 3:18a) Sapos ol i kisim dispela kain gutpela “gol” Kristen, bai ol i no “stap rabis long ai bilong God.” Bai i olsem ol i ‘gat planti samting.’ (Luk 12⁠:21) Ol i ken baim we dispela kain gol? Ol i no inap baim long haus beng​—⁠ol i mas baim long Jisas yet! Aposel Pol i helpim yumi long save dispela kain gol i makim wanem samting. Em i tokim Timoti long kirapim ol Kristen i gat planti mani samting long “mekim planti gutpela pasin bilong helpim ol arapela manmeri,” na “givim planti samting long ol manmeri i sot.” Sapos ol i wok strong long mekim olsem, “ol bai i bungim planti samting bilong helpim ol bihain.” Long dispela rot tasol bai ol inap “kisim dispela laip em i laip tru.” (1 Timoti 6⁠:​17-​19) Ol dispela Kristen long Laodisia, em ol i gat planti mani samting, sapos ol i bin bihainim tok bilong Pol bai ol i ‘gat planti samting’ bilong spirit.​—⁠Lukim tu Sindaun 3⁠:​13-​18.

11. Husat long nau ol i bin baim dispela gutpela “gol”?

¹¹ Olsem wanem? I gat sampela long nau ol i bin baim dispela kain gutpela “gol”? I gat! Taim de bilong Bikpela i no kirap yet, i gat liklik lain ol i save stadi long Baibel na ol i kisim save olsem planti tok bilong ol misin i giaman tasol na lotu bilong Babilon i as bilong en, olsem tok bilong God Triwan, na ol man i gat tewel, na bikpaia, na givim baptais long ol liklik pikinini, na lotuim ol piksa (piksa bilong kruse na bilong Maria tu). Tasol dispela liklik lain Kristen i no olsem​—⁠ol i save holimpas ol tok i tru bilong Baibel, olsem na ol i tokaut olsem Kingdom bilong Jehova tasol inap helpim ol man, na ofa bilong Jisas tasol em rot bilong God i kisim bek ol man. Inap olsem 40 yia paslain long 1914 ol i tok, Baibel i makim olsem ‘taim bilong ol narapela lain’ bai pinis long 1914, na ol bikpela bikpela samting bai kamap long graun.​—⁠KTH 1⁠:⁠10.

12. Husat wanpela man i go pas long ol Kristen em ol i wok long kisim save long Baibel? Olsem wanem em i stap olsem gutpela piksa tru bilong pasin bilong bungim ol gutpela gutpela samting long heven?

¹² Wanpela man i go pas long ol dispela Kristen, em Charles Taze Russell. Long yia 1871 samting, long taun Alegeni (nau em i hap bilong biktaun Pitsbek), long provins Pensilvenia, long Amerika, Russell i kirapim wanpela lain bilong stadi na kisim save long ol tok bilong Baibel. Taim Russell i kirap long painim tok i tru, em i wok bisnis wantaim papa bilong em na rot i op long em bilong kamap wanpela maniman tru. Tasol em i baim ol stua bilong em i go long ol man na em i kisim bikpela mani. Em i mekim wok long dispela mani bilong helpim wok bilong autim tok bilong Kingdom long olgeta hap graun. Long yia 1884, Russell i kamap namba wan presiden bilong Sosaiti ol i bin kamapim long Pensilvenia na ol i kolim Sosaiti Was Taua (Watch Tower Bible and Tract Society of Pennsylvania). Long yia 1916, taim em i mekim laspela raun bilong em bilong autim tok long hap bilong wes long Amerika na em i laik i go bek long biktaun Nu Yok, olgeta strong bilong em i pinis na em i dai long wanpela tren klostu long taun Pampa, long Teksas. Em i bin bungim ol gutpela gutpela samting bilong spirit long heven na em i stap olsem gutpela piksa tru bilong yumi. Nau, planti handet tausen manmeri i bihainim gutpela pasin bilong em na ol i lusim planti samting bilong ol yet bambai ol inap mekim wok bilong God oltaim, olsem mekim wok painia.⁠​—⁠​Hibru 13⁠:7; Luk 12⁠:​33, 34; lukim tu 1 Korin 9⁠:16; 11⁠:⁠1.

Putim Marasin Long Ai Bilong Spirit

13. (a) Marasin bilong helpim ai bilong spirit, olsem wanem dispela kain marasin inap helpim ol Kristen long Laodisia? (b) Gutpela sapos ol i kisim wanem kain klos, olsem Jisas i tok? Bilong wanem ol i mas kisim kain klos olsem?

¹³ Na Jisas i tok strong long ol dispela Laodisia olsem: “Mobeta yu baim waitpela klos bilong karamapim skin bilong yu, na bai ol man i no inap lukim yu i stap as nating na yu gat sem. Na mobeta yu baim marasin bilong putim long ai bilong yu, na bai yu inap lukluk.” (KTH 3:18b) Ol i stap olsem aipas long spirit, olsem na ol i mas baim marasin. Ol i no inap baim long ol dokta bilong Laodisia​—⁠ol inap baim dispela kain marasin long Jisas tasol. Dispela marasin bai helpim ol long kisim gutpela save na tingting long ol samting bilong God, na bai ol inap bihainim “rot bilong ol stretpela man.” Bai ol inap lukluk stret long rot, olsem tingting stret long mekim laik bilong God. (Sindaun 4⁠:​18, 25-​27) Na bai ol inap pasim gutpela klos. I no dispela gutpela klos ol Laodisia i save wokim long blakpela gras bilong sipsip. Nogat. Bai ol inap pasim gutpela “waitpela klos” i makim olsem ol i disaipel bilong Krais Jisas.​—⁠Lukim 1 Timoti 2⁠:​9, 10; 1 Pita 3⁠:​3-5.

14. (a) Kirap long yia 1879 ol man inap kisim wanem samting i olsem marasin bilong helpim ai bilong spirit? (b) Husat i as tru bilong ol mani bilong helpim wok bilong ol Witnes Bilong Jehova? (c) Mani ol man i givim long ol Witnes, olsem kontribusen, ol Witnes i save mekim wanem wok long dispela mani na ol i narapela kain tru long sampela lain?

¹⁴ Olsem wanem? Ol man inap kisim dispela kain marasin long nau? Ol inap kisim! Long yia 1879, Russell, em sampela man i save kolim em Pasto Russell, em i kirap wokim wanpela nius bilong helpim tok i tru. Nau ol i kolim dispela nius olsem Wastaua i Tokaut Long Kingdom Bilong Jehova na ol man long olgeta hap i save long en. Long namba 2 Wastaua (tok Inglis), Russell i tok: “Mipela i bilip olsem JEHOVA i sambai long [dispela nius], na taim em i wok yet long helpim wok bilong en, orait [dispela nius] i no ken krai o singaut long ol man na askim ol long givim mani long en. Jehova i save tok: ‘Olgeta gol na silva long ol maunten em bilong mi,’ olsem na taim em i no givim mani moa bilong wokim dispela nius, bai mipela i save mipela i mas pinis long wokim.” Sampela pasto ol i autim tok bilong lotu long televisen na long dispela rot ol i bin kisim planti mani tru. Ol i bin mekim wok long dispela mani bilong helpim ol yet long kisim gutpela sindaun tru. Ol i no sem long dispela pasin (o long pasin pamuk) ol i mekim. (KTH 18⁠:⁠3) Tasol dispela liklik lain i save stadi long Baibel, nau ol i kolim olsem ol Witnes Bilong Jehova, ol i no bin singaut long mani. Ol man i givim mani long ol long laik bilong ol yet na ol i bin mekim wok long olgeta dispela mani bilong stretim rot bilong helpim wok bilong autim tok bilong Kingdom long olgeta hap bilong graun. Liklik lain long nau, ol i bosim wok bilong kamapim Wastaua na Kirap! na long olgeta taim ol i wokim nupela Wastaua na Kirap! Long 2006, ol i wokim planti tru, winim 59 milion. Ol i wokim Wastaua long planti tok ples, winim 150. Dispela nius em i nius bilong wanpela bikpela lain Kristen, namba bilong ol i winim 6 milion, na ol i bin mekim wok long en olsem marasin bilong ai bilong spirit​—⁠ol tok bilong dispela nius i opim ai bilong ol na nau tok bilong ol lotu giaman i no paulim moa tingting bilong ol, na ol i save ol i mas hariap autim tok long olgeta lain.​—⁠Mak 13⁠:⁠10.

Bihainim Tok Bilong Stretim Yu

15. Bilong wanem Jisas i givim strongpela tok long ol Kristen long Laodisia? Orait, kongrigesen i mas ting olsem wanem long dispela tok?

¹⁵ Orait, nau yumi ken stori gen long ol Kristen bilong Laodisia. Jisas i givim strongpela tok long ol​—⁠bai ol i bihainim o nogat? Ating ol i mas bel hevi na ting olsem Jisas i no laik moa long ol i stap disaipel bilong em? Ol i no ken ting olsem. Jisas i tok moa olsem: “Sapos mi laikim sampela man, orait mi save krosim ol na stretim pasin bilong ol. Olsem na yu mas strong long stretim pasin bilong yu, na yu mas tanim bel.” (KTH 3:⁠19) Taim Jehova i stretim man, dispela i makim olsem em i laikim tumas dispela man, na i wankain long taim Jisas i stretim man. (Hibru 12⁠:​4-7) Jisas i wari long kongrigesen bilong Laodisia na em i laik helpim ol, olsem na ol i mas pilim dispela samting na bihainim ol tok em i givim long ol bilong stretim ol. Ol i hat liklik tasol long mekim wok bilong God na ol i mas save, dispela i olsem ol i mekim sin, olsem na ol i mas tanim bel. (Hibru 3⁠:​12, 13; Jems 4⁠:17) Ol elda long kongrigesen bilong Laodisia i mas lusim pasin bilong laikim tumas mani kago, na ol i mas mekim presen bilong God “i kamap strong gen long laip bilong [ol], olsem man i winim paia na paia i kamap bikpela.” Marasin bilong ai bilong spirit i mas helpim ol, na olgeta long kongrigesen i mas kisim strong gen, olsem man i kisim strong gen taim em i dring gutpela kolwara i kamap insait long graun.​—⁠2 Timoti 1⁠:6; Sindaun 3⁠:​5-8; Luk 21⁠:⁠34.

16. (a) Jisas i laikim tumas ol manmeri bilong em na long nau em i kamapim klia dispela samting long wanem rot? (b) Sapos yumi kisim sampela strongpela tok bilong stretim yumi, yumi mas ting olsem wanem long en?

¹⁶ Orait, olsem wanem long yumi long nau? Jisas i wok yet long “laikim tumas ol manmeri bilong en,” na em bai mekim olsem long “olgeta de, i go inap long dispela taim i pinis.” (Jon 13⁠:1; Matyu 28⁠:20) Em i kamapim dispela samting long rot bilong liklik lain, em Jon i piksa bilong ol, na long rot bilong ol elda, o “sta,” insait long kongrigesen Kristen. (KTH 1⁠:20) Yumi stap long taim bilong planti hevi na ol elda i laik tru long helpim yumi olgeta bambai yumi ken stap aninit long lo bilong God insait long lain bilong em, olsem yumi stap insait long wanpela banis. Na bai yumi inap sakim pasin bilong bikhet na pasin bilong mangalim planti mani, na ol kain pasin pamuk. Sapos yumi kisim strongpela tok bilong stretim yumi, o yumi kisim strafe, yumi mas save dispela i ‘soim yumi gutpela pasin yumi mas bihainim’ bambai yumi inap kisim laip. (Sindaun 6⁠:23) Yumi olgeta i gat sin na yumi save popaia, olsem na taim yumi kisim sampela tok bilong stretim yumi, yumi mas wok strong long tanim bel bambai yumi inap stretim pasin bilong yumi na i stap yet insait long sori bilong God.​—⁠2 Korin 13⁠:⁠11.

17. Sapos yumi gat planti mani samting, olsem wanem dispela inap nogutim yumi long samting bilong spirit?

¹⁷ Yumi no ken larim pasin bilong laikim tumas mani kago i mekim na yumi hat liklik tasol. Na sapos yumi sot long ol samting, yumi no ken larim dispela i mekim na yumi hat liklik tasol. Tru, sapos yumi gat planti mani samting, ating dispela inap helpim yumi long mekim sampela wok bilong God bipo yumi no inap mekim, tasol em inap nogutim yumi tu. (Matyu 19⁠:24) Maniman inap ting olsem sapos sampela taim em i givim bikpela mani bilong helpim wok bilong God, orait, em i no ken mekim bikpela wok bilong autim tok. O em inap ting olsem em i gat planti mani samting, olsem na ol narapela i mas mekim ol samting bilong amamasim em. Na rot i op long maniman bilong mekim kain kain samting bilong painim amamas. Tasol ol dispela kain amamas i save pulim bikpela hap taim bilong man, na em i mas was gut, nogut ol i pulim em na em i lusim wok Kristen. Olsem na sapos man i no tingting gut, ol dispela samting inap mekim na bai em i hat liklik tasol long mekim wok. Yumi mas klia long olgeta dispela kain samting em inap pundaunim yumi. Yumi mas ‘wok strong tru’ na tingting long kisim laip oltaim.​—⁠1 Timoti 4⁠:​8-​10; 6⁠:​9-​12.

“Kaikai Wantaim Em”

18. Jisas i laik helpim ol Kristen long Laodisia long mekim wanem?

¹⁸ Jisas i tok moa olsem: “Lukim, mi sanap long dua, na mi paitim i stap. Sapos wanpela man i harim maus bilong mi na i opim dua, orait bai mi go insait na i stap wantaim em. Na bai mi kaikai wantaim em, na em bai i kaikai wantaim mi.” (KTH 3:20) Sapos ol Kristen long Laodisia i amamas long Jisas na opim dua bambai em inap kam insait long kongrigesen, bai em i helpim ol long lusim dispela pasin bilong hat liklik tasol long wok!​—⁠Matyu 18⁠:⁠20.

19. Taim Jisas i tok promis long kaikai wantaim kongrigesen long Laodisia, i olsem em i tok long mekim wanem?

¹⁹ Jisas i stori long kaikai na ating ol dispela Laodisia i tingim Jisas i bin kaikai wantaim ol disaipel bilong em long sampela taim. (Jon 12⁠:​1-8) Taim em i bin kaikai wantaim ol, olgeta disaipel i stap long dispela taim ol i kisim blesing bilong spirit. Na taim Jisas i kirap bek pinis, sampela taim em i bin stap wantaim ol disaipel long taim ol i kaikai, na dispela i strongim tru ol. (Luk 24⁠:​28-​32; Jon 21⁠:​9-​19) Olsem na taim em i tok promis long kam insait na kaikai wantaim kongrigesen bilong Laodisia i olsem em i tok promis long helpim ol tru long ol samting bilong spirit. Tasol ol i mas opim dua long em na amamas long em i kam insait.

20. (a) Taim de bilong Bikpela i kirap, olsem wanem long ol misin i hat liklik tasol long mekim wok bilong God? (b) Jisas i skelim ol dispela misin long kot na wanem samting i bin painim ol?

²⁰ Long pasin sori Jisas i givim strongpela tok long ol Kristen long Laodisia, na dispela tok inap helpim tru lain remnan long nau. Sampela bilong ol inap tingim yet ol misin i bin i stap olsem wanem long taim de bilong Bikpela i kirap, em ol i stap nogut tru long ol samting bilong spirit, long wanem ol i hat liklik tasol long mekim wok bilong God. Ol pris pasto i no amamas long Bikpela bilong yumi i kam bek long yia 1914​—⁠ol i insait long bikpela pait i kilim i dai planti man, em Namba Wan Pait Bilong Olgeta Hap. Long ol 28 kantri insait long dispela pait, inap olsem 24 i gat nem Kristen. Ol dispela pris pasto i gat bikpela asua tru long blut! Long taim bilong namba 2 bikpela pait tu, planti kantri i gat nem Kristen ol i insait long pait, olsem na ol lotu giaman i “hipim ol sin bilong en i kam antap inap long heven.” (KTH 18⁠:⁠5) Na ol dispela pris pasto i mekim narapela rong tu​—⁠ol i givim baksait long Kingdom bilong Jehova i laik kam na bosim graun. Ol i helpim Lig ov Nesen na Yunaitet Nesen na ol lain paitman i wok long daunim gavman, em olgeta dispela lain na oganaisesen i no inap stretim ol hevi bilong ol man. Jisas i sakim pinis ol dispela pris pasto. Em i skelim pasin bilong ol na ol i lus long kot, olsem na em i rausim ol i go olsem wanpela man bilong kisim pis i tromoi ol pis nogut em i bin kisim long umben. Long nau ol dispela misin i stap nogut na yumi save ol i bin lus long dispela kot. Bihain bai strafe i painim ol na dispela i mas givim tingting long yumi!​—⁠Matyu 13⁠:​47-​50.

21. Kirap long 1919 na bihain long dispela taim ol Kristen tru i bin tingim tok bilong Jisas long ol Kristen bilong Laodisia na ol i mekim wanem?

²¹ Sampela insait long lain Kristen tru ol tu i olsem wara i no kol tru o hat tru​—⁠ol i hat liklik tasol. Tasol Jisas i laikim yet lain bilong em. Em i redi bilong helpim ol Kristen i tingim tok bilong em na ol i opim dua long em. Planti ol i bin singautim em i kam insait olsem bilong kaikai wantaim ol. Olsem na kirap long yia 1919 na bihain long dispela taim, ai bilong ol i op na ol i kisim save long as bilong ol tok profet bilong Baibel. I olsem ol i kisim bikpela lait moa.​—⁠Song 97⁠:11; 2 Pita 1⁠:⁠19.

22. Ating Jisas i tingim wanem bikpela kaikai bilong bihain? Husat ol bai stap long dispela kaikai?

²² Taim Jisas i givim dispela tok long ol Kristen long Laodisia, ating em i tingim narapela kaikai tu. Long sampela sapta bihain long dispela tok, Kamapim Tok Hait i tok: “Ol dispela man God i bin singautim i kam long bikpela kaikai bilong marit bilong Pikinini Sipsip, ol i ken amamas.” Dispela kaikai em i wanpela bikpela kaikai bilong amamas na litimapim nem bilong Jehova taim em i winim pait na givim strafe pinis long ol lotu giaman. Krais wantaim “meri” bilong em tu, em olgeta 144,000 i stap pinis long heven, ol bai stap long dispela kaikai. (KTH 19⁠:​1-9) Ol Kristen long kongrigesen bilong Laodisia, em ol i bin bihainim tok bilong Jisas, ol bai kaikai wantaim Man bilong ol long dispela kaikai. Na ol gutpela brata bilong Krais Jisas long nau, em ol i pasim waitpela klos i kamapim klia olsem ol i Kristen tru God i bin makim, ol tu bai stap long dispela kaikai. (Matyu 22⁠:​2-​13) Dispela samting i strongpela samting tru bilong kirapim ol long tanim bel na wok strong!

Sia King Bilong Ol Man i Winim Pait

23, 24. (a) Jisas i tok long wanem narapela prais ol bai kisim? (b) Wanem taim Jisas i bin sindaun long sia king bilong em yet? Wanem taim em i bin kirap long skelim ol man i tok ol i Kristen? (c) Jisas i mekim wanem gutpela tok promis long ol disaipel bilong em?

²³ Nau Jisas i stori long narapela prais ol bai kisim, em i tok: “Sapos man i winim pait, bai mi larim em i sindaun wantaim mi long sia king bilong mi, olsem bipo mi tu mi winim pait, na mi sindaun wantaim Papa bilong mi long sia king bilong em.” (KTH 3:⁠21) Jisas i stap gut long God na em i winim pinis pasin bilong dispela graun, olsem na Papa bilong em i kirapim bek em long yia 33 na em i go sindaun wantaim Papa long sia king bilong Em long heven, olsem Devit i tok profet pinis long Song 110⁠:​1, 2. (Aposel 2⁠:​32, 33) Long narapela bikpela yia, em 1914, Jisas i kam olsem King na Jas na em i sindaun long sia king bilong em yet. Em i kirap mekim wok jas long yia 1918 na pastaim em i skelim ol man i tok ol i Kristen. Ol man God i bin makim na ol i winim pinis pait na i dai paslain long yia 1918, ol i kirap bek long dispela taim na bung wantaim Jisas long Kingdom. (1 Pita 4⁠:17) Em i bin mekim tok promis long ol disaipel olsem: “Papa bilong mi em i givim kingdom long mi, olsem tasol mi givim kingdom long yupela. Na long kingdom bilong mi yupela bai i sindaun long tebol bilong mi na kaikai na dring. Na yupela bai i sindaun long ol gutpela sia na yupela bai i bosim ol 12-pela lain bilong Israel.”​—⁠Luk 22⁠:​28-​30.

²⁴ Em i givim gutpela wok tru long ol! Bai ol inap sindaun wantaim Man i stap king “long taim olgeta samting i kamap nupela” na wok wantaim em long helpim ol man i bihainim tok, em nambawan ofa bilong em i as bilong dispela wok, na bai ol dispela man i kamap gutpela olgeta wankain olsem long gaden Iden! (Matyu 19⁠:28; 20⁠:28) Olsem Jon i tok, ol dispela man i winim pait, Jisas i mekim ol i kamap “ol pris bilong lain bilong king, na [ol i] stap lain pris bilong God, em Papa bilong Jisas.” Ol i sindaun long ol sia king i raunim nambawan gutpela sia king bilong Jehova yet long heven. (KTH 1⁠:6; 4⁠:⁠4) Yumi olgeta​—⁠maski yumi bilong liklik lain o bikpela lain​—⁠yumi mas tingim gut ol tok Jisas i bin givim long ol Kristen long Laodisia.​—⁠2 Pita 3⁠:13; Aposel 3⁠:​19-​21.

25. (a) Jisas i mekim wanem tok bilong pinisim tok i go long kongrigesen bilong Laodisia, olsem em i bin mekim long ol narapela kongrigesen pastaim? (b) Olgeta wan wan Kristen long nau i mas mekim wanem long ol tok Jisas i bin givim long kongrigesen bilong Laodisia?

²⁵ Bilong pinisim dispela tok, Jisas i tok: “Orait man i gat yau, em i mas harim gut dispela tok Holi Spirit i autim long ol sios [kongrigesen].” (KTH 3:⁠22) Yumi stap long las taim na dispela taim i laik pinis nau. Yumi lukim planti samting i kamapim klia olsem ol misin i gat nem Kristen ol i no givim bel long God​—⁠bel bilong ol i kol pinis. Tasol yumi ol Kristen tru yumi mas givim bel tru long bihainim tok Jisas i bin salim long kongrigesen i stap long Laodisia​—⁠yumi mas bihainim ol tok Bikpela i bin salim long olgeta 7-pela kongrigesen. Yumi ken mekim olsem sapos yumi wok strong long mekim dispela wok Jisas i tok profet long en, em wok bilong “autim dispela gutnius bilong kingdom.”​—⁠Matyu 24⁠:​12-​14.

26. Wanem taim Jisas i toktok gen wantaim Jon? Tasol Jisas i insait long wanem samting?

²⁶ Em nau, olgeta tok Jisas i givim long ol 7-pela kongrigesen i pinis. Em i no toktok moa wantaim Jon i go inap long laspela sapta bilong Kamapim Tok Hait, tasol em i insait long planti samting Jon i lukim olsem driman, olsem em i mekim ol wok bilong givim strafe bilong Jehova long ol man. Orait, nau yumi ken bung wantaim liklik lain na yumi ken skelim namba tu samting Bikpela Krais Jisas i kamapim long Jon olsem long driman.

[Futnot]

[Blok long pes 73]

Yu Laik Kisim Planti Samting o Gutpela Tingting?

Long 1956 wanpela man i raitim tok long nius olsem: “Winim wan handet yia bipo i gat 72 samting ol man i laik kisim, na 16 bilong ol dispela samting em ol man i ting olsem ol i mas kisim. Tasol long nau i gat 474 samting ol man i laik kisim, na 94 bilong ol dispela samting em ol man i ting ol i mas kisim. Inap olsem wan handet yia bipo i gat 200 samting ol man i laik baim i go long ol narapela man. Tasol long nau i gat 32,000 samting ol man i strong long ol narapela man i mas baim na i hatwok long ol i sakim. Ol samting man i mas kisim i no planti, tasol ol samting em i laik kisim i moa moa yet na i no gat pinis bilong en.” Long nau, long olgeta taim ol man bilong bisnis i wok strong long kirapim ol narapela man long ting olsem ol i mas kisim planti mani na planti samting bilong skin na dispela i nambawan bikpela samting. Olsem na planti man i sakim gutpela tok i stap long Saveman 7⁠:​12, olsem: “Gutpela tingting i olsem mani, na i save helpim yumi long taim nogut. Tasol gutpela tingting na save i winim mani, na i helpim yumi moa yet na yumi stap gut olgeta.”

[Piksa long pes 67]

Wara bilong Laodisia i hat liklik na i no gutpela bilong dring. Ol Kristen long Laodisia ol i hat liklik tasol long mekim wok, na dispela pasin bilong ol i no gutpela