666—I No Wanpela Tok Hait Nating Tasol

“Sapos man i no gat dispela mak bilong nem bilong wel animal o sapos em i no gat namba bilong nem bilong en, orait em i no inap baim samting long ol arapela manmeri na ol i no inap baim samting long em. Man i gat gutpela tingting, em inap save gut long dispela samting. Man i gat save, em i mas kaunim gut namba bilong wel animal. Dispela namba em i namba bilong wanpela man, na namba bilong dispela man em 666.”​—⁠KTH 13:​17, 18.

WANPELA tok bilong Baibel em planti man i gat bikpela tingting long en, em tok profet long mak, o nem, bilong “wel animal”​—⁠em namba 666. Long televisen na Intenet, ol piksa wokabaut, ol buk, na nius, mak bilong wel animal em samting ol man i save mekim planti toktok long en.

Sampela i bilip olsem dispela namba 666 em i mak bilong birua bilong Krais em Baibel i stori long en. Na sampela i tok em i wanpela kain mak em man i mas putim, olsem tatu o putim wanpela liklik samting tru insait long skin na i kamapim namba i makim olsem man em i wanpela wokman bilong wel animal. Na sampela i ting 666 em mak bilong lain pop bilong Misin Katolik. Ol i senisim ol leta i stap long wanpela biknem bilong pop, em Vicarius Filii Dei (Mausman Bilong Pikinini Bilong God) na ol i putim ol namba long en, na ol i senisim liklik ol namba na ol i kisim namba 666. Na tu, sampela i tok yumi inap kisim dispela namba long nem Latin bilong King Diocletian bilong Rom na nem bilong Nero Caesar olsem ol i save kolim long tok Hibru.a

Tasol ol dispela toktok nating ol i mekim bilong kamapim mining bilong dispela namba, ol i narapela kain tru long tok Baibel i mekim long mak bilong wel animal, olsem yumi bai lukim long stori i kamap bihain long dispela. Baibel i kamapim olsem ol man i gat dispela mak, belhat bilong God bai painim ol taim em i pinisim pasin nogut bilong nau. (KTH 14:​9-11; 19:20) Olsem na bilong kisimgut insait bilong dispela namba 666, i no olsem yumi mas save long as bilong wanpela tok hait na em tasol, nogat. Gutpela tru na God Jehova, em man i kamapim tru pasin laikim na As bilong lait bilong spirit, em i no haitim dispela bikpela samting long ol wokman bilong em, nogat.​—⁠2 Timoti 3:16; 1 Jon 1:5; 4:⁠8.

[Futnot]