Luksave Long Wel Animal na Mak Bilong En

YU SAVE amamas taim yu kisim save long mining bilong wanpela tok hait? Bilong mekim olsem, yu mas painim sampela tok i helpim yu long kisim save long insait bilong en. Long Baibel, God i kamapim sampela tok bilong helpim yumi long kisim save long dispela namba 666, na nem, o mak, bilong wel animal bilong Kamapim Tok Hait sapta 13.

Long dispela stori, bai yumi skelim 4-pela bikpela samting em bai kamapim long ples klia insait bilong mak bilong wel animal. Bai yumi skelim (1) olsem wanem ol i save makim sampela nem long Baibel, (2) wel animal em i wanem samting tru, (3) wanem insait bilong dispela tok olsem 666 em i “namba bilong wanpela man,” na (4) namba 6 i makim wanem samting, na bilong wanem ol i raitim tripela taim, olsem 666.​—KTH 13:18.

Ol Nem Long Baibel i No Nem Nating Tasol

Planti nem long Baibel i gat bikpela mining bilong en, na em i bikpela samting moa yet taim God i givim dispela nem long ol. Olsem: Abram bai kamap tumbuna bilong ol bikpela lain manmeri, olsem na God i senisim nem bilong em na kolim em Abraham, insait bilong en, “tumbuna bilong planti lain manmeri.” (Stat 17:5) God i tokim Josep na Maria, dispela pikinini bihain Maria bai karim, ol i mas kolim nem bilong em Jisas, insait bilong en, “Jehova i Kisim Bek.” (Matyu 1:21; Luk 1:31) Olsem i stret wantaim dispela nem, long rot bilong wok bilong Jisas long autim tok na i dai bilong em olsem ofa, Jehova i wokim rot bilong kisim bek yumi.​—Jon 3:16.

Na olsem tasol, dispela namba, o nem, 666 em God i bin givim, em i mas makim sampela pasin God i lukim long dispela wel animal. Tasol bilong save long ol dispela pasin bilong wel animal, yumi mas save em i wanem samting tru na wanem ol wok bilong en.

Wel Animal i Kamap Ples Klia

Buk Daniel long Baibel i kamapim planti save long mining bilong ol animal long tok piksa. Sapta 7 i stori gut long “4-pela narakain narakain bikpela animal”​—laion, bea, lepat, na wanpela animal nogut tru i gat bikpela tit ain. (Daniel 7:​2-7) Daniel i tok ol dispela animal i makim ol “kantri,” o gavman, em narapela i kamap bihain long narapela na i bosim planti kantri.​—Daniel 7:​17, 23.

Buk The Interpreter’s Dictionary of the Bible i stori long wel animal bilong Kamapim Tok Hait 13:​1, 2 na i tok, em i “kisim pasin bilong olgeta 4-pela animal bilong driman bilong Daniel . . . Olsem na dispela namba wan wel animal [bilong Kamapim Tok Hait] i makim olgeta lain bilong ol gavman politik ol i birua long God.” Tok bilong Kamapim Tok Hait 13:7 i strongim dispela tok na em i tok long wel animal olsem: “Em i kisim strong bilong bosim ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin.”a

Bilong wanem Baibel i mekim tok piksa long ol wel animal bilong makim ol gavman bilong ol man? I gat tupela as. Namba wan, ol gavman i bin kapsaitim blut bilong planti man tru insait long ol handet handet yia i go pinis. Ol saveman Will na Ariel Durant i tok: “Pait em samting i bin kamap long olgeta taim long bipo, na maski ol kantri i kisim gutpela sindaun, o ol gavman demokratik i kamap, ol pait i no pinis liklik.” Tru tumas, “sampela bikman i wok long daunim ol arapela manmeri na mekim nogut long ol”! (Saveman 8:9) Namba tu as, “snek i givim strong bilong em yet long dispela wel animal. Em i mekim em i stap king olsem em yet, na em i givim bikpela strong long em.” (KTH 12:9; 13:2) Olsem na ol wok gavman long graun em samting Satan yet i kamapim, na long dispela as ol gavman i kamapim wankain pasin olsem Satan, em ol pasin bilong wel animal.​—Jon 8:44; Efesus 6:12.

Tasol dispela i no makim olsem olgeta wan wan bikman bilong gavman i wokman bilong Satan. Yumi ken tok, ol gavman bilong graun i stap olsem “wokman bilong God” na ol i helpim ol lain man long sindaun gut wantaim; sapos ol i no stap, bai i no gat lo na ol man bai paul nabaut na i stap nogut tru. Na sampela gavman i bin lukautim raits bilong ol man, olsem rait bilong ol long mekim lotu i tru​—em samting Satan i no laik bai ol i mekim. (Rom 13:​3, 4; Esra 7:​11-27; Aposel 13:7) Tasol Satan i stiaim ol samting, olsem na i no gat wanpela lain politik samting bilong graun inap kamapim gutaim na bel isi bilong i stap oltaim.b​—Jon 12:31.

“Namba Bilong Wanpela Man”

Namba tri samting i helpim yumi long save long mining bilong namba 666 i olsem: Em i “namba bilong wanpela man.” Tasol dispela i no inap makim wanpela man tru, long wanem, Satan​—na i no wanpela man​—em i bosim dispela wel animal. (Luk 4:​5, 6; 1 Jon 5:19; KTH 13:​2, 18) Wel animal i gat “namba,” o mak, “bilong wanpela man,” na dispela i makim olsem em i samting olsem man, na i no olsem spirit o ensel nogut, olsem na em i kamapim sampela pasin bilong man. Wanem ol pasin? Baibel i bekim na i tok: “Olgeta man i bin mekim sin, na olgeta i no inap i stap olsem piksa i soim biknem na strong bilong God.” (Rom 3:​23, NW ) Olsem na taim Baibel i tok wel animal i gat “namba bilong wanpela man,” dispela i makim olsem ol gavman i kamapim pasin bilong ol man bilong graun em ol i gat sin na i no gutpela tumas.

Ol samting i bin kamap bipo i soim olsem dispela tok i stret. Wanpela bikman long gavman bilong Amerika long bipo, em Henry Kissinger, em i tok: ‘Olgeta lain bilong bipo i gat ol strongpela gavman, bihain ol i pinis. Ol samting i bin kamap bipo i olsem stori bilong hatwok bilong ol man i lus nating, na ol samting ol i bin tingting long mekim i no kamap. Olsem na yumi mas save, ol hevi bai kamap long olgeta taim na yumi no inap abrusim.’ Dispela tok bilong Kissinger i stret wantaim wanpela tok tru bilong Baibel: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.”​—Jeremaia 10:23.

Orait nau yumi save pinis dispela wel animal em i wanem samting, na God i ting olsem wanem long en, olsem na yumi inap skelim laspela hap bilong dispela tok hait​—em dispela namba 6 na bilong wanem ol i raitim tripela taim, olsem 666.

Raitim 6 Tripela Taim—Bilong Wanem?

Long Baibel, sampela namba i save makim sampela samting. Planti taim, namba 7 i makim samting em inap tru, o i gutpela olgeta, long ai bilong God. Olsem: Dispela wik God i bin wokim olgeta samting long en i gat 7-pela “de,” olsem ol longpela haptaim, na insait long dispela taim God i pinisim olgeta wok em i bin tingting long mekim long graun. (Stat 1:3–2:3) Ol “tok” bilong God i olsem silva “ol i bin kukim 7-pela taim long paia” na em i klin olgeta. (Song 12:6; Sindaun 30:​5, 6) Lepraman Naman i kisim tok olsem em i mas waswas 7-pela taim long wara Jordan, na bihain sik bilong em i pinis olgeta.​—2 King 5:​10, 14.

Namba 6 i sot long mak bilong namba 7. Em i gutpela tok piksa bilong makim samting i no gutpela tumas long ai bilong God, a? (1 Stori 20:​6, 7) Na taim ol i raitim namba 6 inap tripela taim, olsem 666, dispela i kamapim strong moa olsem em i sot tru long mak bilong samting i gutpela olgeta. Na tu, samting i kamapim klia olsem dispela tingting i stret, i olsem: Dispela 666 em i “namba bilong wanpela man,” olsem yumi stori pinis. Olsem na ol samting dispela wel animal i bin mekim, na em i gat “namba bilong wanpela man,” na dispela namba 666 yet, olgeta i kamapim klia tru olsem em i sot olgeta na i lus tru long ai bilong Jehova.

Ol tok i kamapim olsem wel animal i sot tru long gutpela pasin i kirapim yumi long tingim tok Jehova i bin givim long King Belsasar bilong Babilon. Long maus bilong Daniel Jehova i tokim king: “God i skelim pinis pasin bilong yu, na skel bilong en i soim olsem yu no save mekim gutpela pasin.” Long dispela nait stret ol i kilim i dai Belsasar, na strongpela gavman bilong Babilon i pundaun. (Daniel 5:​27, 30) Na olsem tasol, kot bilong God long dispela wel animal politik na ol manmeri i gat mak bilong en, em i makim olsem dispela wel animal na lain bilong en ol bai pinis olgeta. Tasol long dispela taim God i no ken pinisim wanpela lain politik tasol, nogat; em bai pinisim olgeta wok gavman bilong ol man. (Daniel 2:44; KTH 19:​19, 20) Olsem na em i bikpela samting long yumi no ken kisim mak bilong wel animal, em mak bilong i dai!

Yumi Kisim Save Long Dispela Mak

Taim Buk Kamapim Tok Hait i kamapim namba 666, kwiktaim bihain long dispela em i toktok long 144,000 disaipel bilong Pikinini Sipsip, Jisas Krais, em ol i gat nem bilong em na nem bilong Papa bilong em, Jehova, long pes bilong ol. Ol dispela nem i makim olsem ol i bilong Jehova na Pikinini bilong em, na ol i amamas long autim tok na stap olsem witnes bilong tupela. Na olsem tasol, ol man i gat mak bilong wel animal ol i tokaut olsem ol i wokboi bilong wel animal. Olsem na maski dispela mak i stap long han sut o long pes long tok piksa, em i wanpela mak bilong kamapim olsem dispela man i save helpim ol gavman bilong graun i olsem wel animal na sapotim ol olsem lotu long ol. Ol man i gat dispela mak ol i givim long “Sisar” ol samting ol i mas givim long God. (Luk 20:25; KTH 13:​4, 8; 14:1) Ol i mekim olsem wanem? Ol i givim biknem, olsem lotu, long ol gavman politik, na ol mak bilong en, na ol strongpela ami bilong en, na ol i wetim ol dispela samting i kisim bek ol na ol i ken i stap gut. Hap lotu ol i givim long God tru, ol i mekim nating long maus.

Tasol Baibel i tokim yumi: “Ol king na ol man bilong graun i no inap kisim bek yu. Olsem na nogut yu bilip long ol. Taim ol i dai ol i tanim i kamap graun gen. Na long dispela taim ol i no inap mekim olgeta samting ol i bin tok long mekim.” (Song 146:​3, 4) Ol man husat i putim yau long dispela tok i gat gutpela tingting long en ol i no bel hevi taim ol gavman i no inap mekim ol samting ol i bin promis long en o taim sampela bikman i gat nem i mekim sampela pasin na ol i mas lusim namba bilong ol.​—Sindaun 1:33.

Tasol i no olsem ol Kristen tru i no laik mekim wanpela samting bilong helpim ol man i gat ol hevi. Ol i save raun na autim tok bilong dispela wanpela gavman tasol em bai stretim ol hevi bilong ol man​—em Kingdom Bilong God na ol i olsem mausman bilong en.​—Matyu 24:14.

Kingdom Bilong God—Em Tasol Inap Helpim Ol Man

Taim Jisas i stap long graun, tok bilong Kingdom Bilong God em i nambawan bikpela tok em i autim. (Luk 4:43) Long bikpela beten bilong em ol i save kolim Beten Bilong Bikpela, Jisas i skulim ol disaipel long beten long dispela Kingdom i mas i kam, na laik bilong God i mas kamap hia long graun. (Matyu 6:​9, 10) Dispela Kingdom em wanpela gavman bai bosim olgeta hap bilong graun, na em i no ken stap long wanpela biktaun tasol long graun na mekim dispela wok​—em bai stap long heven na mekim. Olsem na Jisas i kolim olsem “kingdom bilong heven.”​—Matyu 11:12.

Husat em inap tru long i stap King bilong dispela Kingdom? Em Jisas Krais tasol, em i bin i dai bilong helpim ol manmeri bihain ol bai stap aninit long em. (Aisaia 9:​6, 7; Jon 3:16) Liklik taim nau na dispela nambawan gutpela King, nau em i wanpela strongpela spirit, em bai tromoi dispela wel animal, na ol king wantaim ol ami bilong en, i go insait long “dispela bikpela raunpela hul ol ston salfa i pulap long en na ol i paia i stap,” em i makim olsem ol bai bagarap na pinis olgeta. Na i no dispela samting tasol. Jisas bai rausim Satan tu, em samting i no gat wanpela man bilong graun inap mekim.​—KTH 11:15; 19:​16, 19-21; 20:​2, 10.

Kingdom Bilong God bai kamapim gutpela taim na bel isi long olgeta man i stap aninit long en na i bihainim tok bilong en. (Song 37:​11, 29; 46:​8, 9) Bai i no gat bel hevi, pen, na i dai moa. Em gutpela samting tru i wetim ol man husat i no kisim mak bilong wel animal!​—KTH 21:​3, 4.

[Ol Futnot]

[Blok long pes 5]

Sampela Tok i Kamapim Mining Bilong 666

 1. Planti taim ol nem long Baibel i kamapim sampela pasin o i stap bilong man i gat dispela nem, olsem long nem bilong Abraham, Jisas, na planti man moa. Na olsem tasol, namba, o nem, bilong wel animal i makim ol pasin bilong en.

 2. Long buk Daniel long Baibel, ol narapela narapela wel animal i makim ol gavman bilong ol man em narapela i kamap bihain long narapela. Wel animal bilong Kamapim Tok Hait 13:​1, 2 i makim olgeta gavman politik bilong graun, em Satan i givim strong long ol na i bosim ol.

 3. Wel animal i gat “namba bilong wanpela man” na dispela i makim olsem em i samting olsem man, na i no wanpela spirit nogut. Olsem na em i kamapim pasin bilong ol man bilong graun, em sin i mekim na ol i sot tru long gutpela pasin.

 4. Namba 6 i sot long mak bilong namba 7, long Baibel namba 7 i makim samting em inap tru, o i gutpela olgeta, olsem na long ai bilong God, namba 6 i makim samting i no gutpela tumas. Ol i raitim dispela namba inap tripela taim, olsem na mak 666 i kamapim strong moa olsem em i sot tru long mak bilong samting i gutpela olgeta.

[Ol Piksa long pes 6]

Wok bilong ol man long bosim graun i pundaun pinis, na dispela namba 666 i makim stret ol

[Kredit Lain]

Starving child: UNITED NATIONS/Photo by F. GRIFFING

[Ol Piksa long pes 7]

Jisas Krais bai kamapim nambawan gutpela wok gavman long graun