“MI LUKIM narapela ensel i flai i go namel long skai. Em i gat gutnius bilong i stap oltaim oltaim, na em i gat wok bilong autim dispela gutnius long ol manmeri i stap long graun. Em i autim long ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin.” (Kamapim Tok Hait 14:⁠6) Lapun aposel Jon i mekim dispela tok taim em i lukim samting olsem driman na em i lukim ol samting i wok long kamap tru nau long taim bilong yumi. Yumi amamas tru i gat sampela gutnius o gutpela tok nau long dispela taim bilong pasin raskol i go bikpela, na ol man i bagarapim graun, na pasin bilong birua na pretim man i go bikpela, na i gat pait, na planti wok bisnis i bagarap! Tasol i gat wanem tok i gutpela tru inap long wanpela ensel i mas autim? Wanem tok i gutpela tru na ol manmeri bilong olgeta lain na olgeta kantri na olgeta tok ples na olgeta kain skin ol i mas harim?

Taim Jisas i stap long graun em inapim planti wok God i laik bai em i mekim, tasol long dispela taim bipo em i no i stap king bilong Kingdom bilong God. Em i no kisim yet dispela wok. Planti taim dispela nius Wastaua i bin tokaut olsem Jisas i bin kisim dispela wok long yia 1914 long taim bilong yumi. Truim bilong ol tok profet i kamapim long ples klia olsem Kingdom bilong God i bin kamap long heven long yia 1914. (Kamapim Tok Hait 12:​10, 12) I gat sampela tok nogut tru i bin kamap long yia 1914, olsem tok bilong Namba Wan Pait Bilong Olgeta Hap i kirap. Tasol i gat gutpela tok tru i kamap, em olsem: Kingdom bilong God i kamap pinis long heven. Jisas i bin tok profet long ol samting i mas kamap long taim bilong yumi na em i tok: “Na bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim.”​—⁠Matyu 24:⁠14.

Olsem wanem? Ol samting i bin kamap olsem Jisas i tok profet pinis? Tru tumas! Na ol samting Jon i bin lukim olsem driman dispela tu i bin kamap. Tru, yumi no inap lukim dispela ensel em Jon i bin lukim. Tasol ol man inap lukim ol Witnes Bilong Jehova taim ol i wok long autim gutnius bilong dispela ensel long “ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin.” Long 212 kantri na long ol ailan long solwara ol i bin autim tok, na planti planti manmeri ol i harim na ol i bilip. Stori bilong sampela bilong ol dispela manmeri i kamapim long ples klia olsem tok bilong Kingdom bilong God em i nambawan gutpela tok.