‘Taim Bilong Kot’ i Kamap Pinis

KAMAPIM TOK HAIT, em laspela buk bilong Baibel, i tokim yumi long wanpela ensel i flai i go namel long skai em i gat “gutnius bilong i stap oltaim oltaim, na em i gat wok bilong autim dispela gutnius.” Em i tokaut strong olsem: “Taim i kamap pinis bilong God i skelim pasin bilong olgeta man long kot. Olsem na yupela i mas pret long em na litimapim nem bilong em.” (KTH 14:​6, 7) Insait long dispela ‘taim bilong kot’ i gat wok bilong tokaut long kot bilong God na givim strafe olsem dispela kot i makim. Em bai kamap long pinis bilong taim bilong “las de.” Nau yumi stap long dispela taim.​—⁠2 Timoti 3:⁠1.

Ol man husat i laikim stretpela pasin, ol i amamas long harim olsem ‘taim bilong kot’ i laik kamap. Em taim God bai pinisim hevi bilong ol wokman bilong em husat i bin karim hevi long han bilong ol man bilong dispela graun i gat pasin bilong pait na bagarapim man, na i no gat pasin laikim.

Long nau, paslain long taim bilong kot i pinis em taim God bai bagarapim pasin nogut bilong dispela graun, Baibel i tokim yumi: ‘Pret long God na litimapim nem bilong em.’ Yu save mekim olsem? Bilong mekim olsem em i no inap long yumi tok tasol olsem, “Mi bilip long God.” (Matyu 7:​21-23; Jems 2:​19, 20) Pasin bilong pret long God i mas kirapim yumi long litimapim nem bilong em. Dispela pret i mas kirapim yumi long givim baksait long pasin nogut. (Sindaun 8:13) Em i mas helpim yumi long laikim gutpela pasin na nolaik tru long pasin nogut. (Amos 5:​14, 15) Sapos yumi laik givim biknem long God, bai yumi harim gut tok bilong em. Bai yumi no bisi tumas long mekim ol arapela samting na lusim pasin bilong ritim Tok bilong em, Baibel, long olgeta taim. Bai yumi bilip long em long olgeta taim na long bel olgeta. (Song 62:8; Sindaun 3:​5, 6) Ol man i givim biknem tru long em ol i save olsem em i Man Bilong Wokim heven na graun, na King Bilong Heven na Graun, na ol i daun long em olsem King i gat rait long bosim wokabaut bilong ol. Sapos yumi luksave olsem yumi gat wok long tingim gut moa ol dispela samting, orait yumi mas kirap nau na no ken westim taim.

Dispela taim bilong givim strafe em ensel i tok long en, Baibel i kolim tu olsem “De bilong Bikpela.” Dispela kain “De” i painim taun Jerusalem bilong bipo long 607 B.C.E., long wanem, ol man bilong dispela taun i no bihainim tok lukaut bilong Jehova em ol profet bilong em i autim. Ol i ting de bilong Jehova i longwe yet, na dispela i mekim na i hatwok moa long ol inap abrusim bagarap. Jehova i bin tokim ol olsem: “De bilong Bikpela i mekim kot bilong en, em i klostu nau na dispela De bai i kamap kwiktaim tru.” (Sefanaia 1:14) Narapela “De bilong Bikpela” i painim taun Babilon bilong bipo long 539 B.C.E. (Aisaia 13:​1, 6) Ol Babilon i bilip long strongpela banis na ol god bilong ol, olsem na ol i no tingim ol tok lukaut bilong ol profet bilong Jehova. Tasol long wanpela nait, ol Midia na Persia i daunim bikpela taun Babilon.

Wanem samting i laik painim yumi long nau? Wanpela narapela “De bilong God” i bikpela moa. (2 Pita 3:​11-14) God i tokaut pinis olsem “Bikpela taun Babilon” bai bagarap. Long Kamapim Tok Hait 14:​8, wanpela ensel i tok: “Bikpela taun Babilon em i bagarap pinis! Yes, em i bagarap pinis!” Dispela samting i kamap pinis. Em i no kalabusim moa ol man i lotuim Jehova. Planti man i save pinis long pasin nogut bilong em na pasin bilong em long insait long ol woa. Klostu nau Bikpela Babilon bai bagarap olgeta. Olsem na Baibel i tokim ol man long olgeta hap: “Yupela i mas lusim dispela ples [Bikpela Babilon] na i kam ausait. Nogut yupela i poroman wantaim em long ol sin em i save mekim. Na nogut yupela bai i poroman wantaim em tu long taim em i kisim pe nogut bilong ol dispela sin. Em i hipim ol sin bilong en i kam antap inap long heven. Na God i tingim gut olgeta pasin nogut em i bin mekim.”​—⁠KTH 18:​4, 5.

Bikpela Babilon Em Wanem Samting? Em olgeta lotu bilong dispela graun i gat wankain pasin olsem Babilon bilong bipo. (Kamapim Tok Hait, sapta 17, 18) Tingim sampela pasin i wankain, olsem:

• Ol pris bilong Babilon bilong bipo ol i insait tru long wok politik bilong en. Planti lotu long nau i save mekim wankain pasin.

• Planti taim ol pris bilong Babilon i sapotim ol pait bilong en. Planti lotu long nau i go pas long blesim ol soldia taim ol kantri i go long woa.

• Ol pasin na tok ol Babilon bilong bipo i lainim ol man long en i kirapim ol long mekim pasin pamuk nogut tru. Taim ol bikman bilong lotu long nau i sakim ol lo bilong Baibel long stretpela pasin, pasin pamuk i go bikpela tru namel long ol pris pasto na ol man i go long lotu. Bikpela Babilon i pamuk wantaim ol lain politik bilong dispela graun, olsem na Buk Kamapim Tok Hait i kolim em olsem pamukmeri.

• Baibel i tok tu olsem Bikpela Babilon i “kisim planti ol naispela samting.” (NW ) Long Babilon bilong bipo, tempel na ol wok bilong en i kisim bikpela hap graun, na ol pris i kamap ol bikman long wok bisnis. Long nau Bikpela Babilon i gat ol haus lotu, na planti bisnis na graun samting. Ol tok em i lainim ol man long en na ol bikpela de em i save tingim i givim planti mani long em na long ol arapela i mekim wok bisnis.

• Planti man long Babilon bilong bipo i yusim ol imis, posin na marila samting, na long nau tu i wankain long planti hap. Ol i bin ting indai em i rot bilong kisim narapela kain laip. Babilon i pulap long ol tempel na haus lotu i givim biknem long ol god bilong ol, tasol ol Babilon i birua long ol man i lotuim Jehova. Bikpela Babilon i gat wankain bilip na pasin.

Long bipo, Jehova i stiaim ol strongpela lain politik na kantri i gat bikpela ami long givim strafe long ol man i givim baksait long em na laik bilong em. Olsem na ol Asiria i bagarapim Samaria long 740 B.C.E. Ol Babilon i bagarapim Jerusalem long 607 B.C.E. na ol Rom i bagarapim dispela taun long 70 C.E. Ol Midia na Persia i bagarapim Babilon long 539 B.C.E. Baibel i tok, long taim bilong yumi ol gavman, olsem wanpela wel animal, bai birua long dispela “pamukmeri” na rausim olgeta klos bilong em, olsem kamapim pasin tru bilong em long ples klia. Ol gavman bai bagarapim em olgeta.​—⁠KTH 17:⁠16.

Yu ting ol gavman bilong dispela graun bai mekim tru dispela samting? Baibel i tok “God yet i givim tingting long ol dispela king.” (KTH 17:17) Dispela samting bai kamap wantu tasol, na ol man bai kirap nogut long en, em bai no kamap isi isi na ol man bai no inap luksave long dispela samting i laik kamap.

Yu mas mekim wanem? Askim yu yet: ‘Mi pas yet long wanpela lotu em ol bilip na pasin bilong em i soim olsem em i hap bilong Bikpela Babilon?’ Maski yu no memba bilong wanpela lotu olsem, askim yu yet: ‘Mi larim pasin bilong Bikpela Babilon i stiaim mi?’ Wanem kain pasin? Em pasin bilong orait long ol man i ken mekim kain kain pasin pamuk, pasin bilong laikim tumas mani kago na amamas bilong skin na i no laikim God, o pasin bilong givim baksait (long ol liklik samting tu) long Tok Bilong Jehova. Tingting gut long bekim yu laik givim.

Bilong Jehova i ken orait long yumi, em i bikpela samting long pasin na tingting i stap long bel bilong yumi i mas soim olsem tru tru yumi no insait long Bikpela Babilon. Yumi no ken westim taim. Baibel i tokim yumi olsem pinis bai kamap wantu tasol, em i tok: “Ol bai i kisim dispela bikpela taun Babilon na tromoi i go daun strong tru, na ol man bai i no inap lukim em moa.”​—⁠KTH 18:⁠21.

Tasol i no dispela samting tasol. Narapela samting bilong dispela ‘taim bilong kot’ em olsem: God Jehova bai kotim ol lain politik bilong dispela graun, ol bikman bilong en, na olgeta man husat i givim baksait long wok king em i mekim long rot bilong Kingdom bilong heven i stap long han bilong Jisas Krais. (KTH 13:​1, 2; 19:​19-21) Long Daniel 2:​20-45 i gat driman olsem tok profet long ol lain politik i bosim graun, kirap long Babilon bilong bipo i kam inap long nau. Em wanpela traipela imis ol i wokim long gol, silva, bras, ain, na graun. Dispela tok profet i tok long taim bilong yumi olsem: “God bai i kirapim wanpela kingdom na dispela kingdom bai i stap oltaim oltaim.” Na ol samting dispela Kingdom bai mekim yet long ‘taim bilong kot’ bilong Jehova, Baibel i tok: “Em bai i daunim ol na bagarapim ol arapela king [ol gavman bilong man] na kingdom bilong en bai i stap oltaim.”​—⁠Daniel 2:⁠44.

Baibel i mekim tok lukaut long ol man i lotu tru long God long ol i no ken laikim “ol pasin bilong graun”​—⁠em pasin bilong ol man bilong dispela graun husat i stap longwe long trupela God. (1 Jon 2:​15-17) Olsem wanem? Ol rot yu makim bilong bihainim na pasin bilong yu i soim olsem yu sapotim tru Kingdom Bilong God? Tru tru yu putim Kingdom i stap namba wan long laip bilong yu?​—⁠Matyu 6:33; Jon 17:​16, 17.

[Blok long pes 14]

Pinis Bai Kamap Long Wanem Taim?

“Pikinini Bilong Man bai i kam long wanpela taim yupela i no ting em bai i kam.”​—⁠Matyu 24:⁠44.

“Yupela i mas was gut. Yupela i no save long wanem de na wanem aua Bikpela bilong yupela bai i kamap.”​—⁠Matyu 25:⁠13.

“Yu mas wet liklik na em bai i kamap.”​—⁠Habakuk 2:⁠3.

[Blok long pes 14]

Sapos Yu Save Bai Yu Bihainim Narapela Kain Pasin?

Sapos yu save olsem taim bilong God long givim strafe long ol man bai kamap long sampela yia bihain, yu ting dispela bai senisim pasin yu bihainim long laip bilong yu? Sapos pinis bilong pasin bilong dispela graun i no bin kam long taim yu ting em bai kam, dispela i mekim na yu no mekim bikpela wok bilong Jehova olsem bipo?​—⁠Hibru 10:​36-38.

Yumi no save long wanem taim stret pinis bai kamap, na dispela i opim rot long yumi ken soim olsem gutpela bel i kirapim yumi long mekim wok bilong God. Ol man i save long Jehova ol i save olsem em inap lukim tingting na bel bilong man na sapos man i kirap givim bel inap sotpela taim tasol paslain liklik long pinis i kamap, Jehova i no inap tingim dispela.​—⁠Jeremaia 17:10; Hibru 4:⁠13.

Oltaim Jehova i stap olsem namba wan samting long laip bilong ol man i save laikim em tru. Olsem ol arapela man, ol Kristen tru i save mekim wok mani. Tasol ol i no tingting long kamap maniman, nogat; ol i mekim wok bilong kisim kaikai na haus na bilong ol i ken givim ol samting long ol arapela. (Efesus 4:28; 1 Timoti 6:​7-12) Ol i save painim amamas tu na malolo long sampela taim, tasol ol i mekim olsem bilong kisim nupela strong na i no bilong bihainim pasin bilong ol arapela man. (Mak 6:31; Rom 12:⁠2) Olsem Jisas Krais, ol i amamas long mekim laik bilong God.​—⁠Song 37:4; 40:⁠8.

Ol Kristen tru i laik i stap oltaim na mekim wok bilong Jehova. Dispela samting ol i wet long en i gutpela samting tru, maski ol i mas wet longpela taim moa long kisim ol blesing, winim taim ol i bin ting ol i mas wet long en.

[Blok/Piksa long pes 15]

Bikpela Tok Long Husat i Nambawan Bos

Bilong save long as na God i larim pen na hevi i stap, yumi mas kliagut long bikpela tok long husat i mas i stap nambawan bos.

Jehova em i Man Bilong Wokim olgeta samting, olsem na em i gat rait long bosim graun na ol man i stap long en. Tasol Baibel i tok, taim Jehova i wokim namba wan man na meri, bikpela tok i bin kamap long wok bos bilong em. Satan i bin tok Jehova i strong tumas long bosim man, na Em i bin giamanim namba wan tumbuna papamama bilong yumi long wanem samting bai painim ol sapos ol i sakim lo bilong God na bihainim laik bilong ol yet, na em i tok i gutpela moa sapos ol i bosim wokabaut bilong ol yet na maski long God.​—⁠Stat, sapta 2, 3.

Sapos God i bin pinisim ol dispela bikhetman wantu tasol, dispela bai kamapim klia bikpela strong bilong em, tasol dispela i no stretim ol bikpela tok i bin kamap. Jehova i no pinisim ol bikhetman wantu tasol, nogat; em i larim olgeta man na ensel i lukim ol samting dispela pasin bikhet i kamapim. Tru, dispela i mekim na ol man i karim pen na hevi, tasol dispela i bin opim rot tu long yumi inap kamap.

Na tu, Jehova i givim bikpela samting tru bilong em yet, em i mekim gutpela pasin na i stretim rot long ol man i bihainim tok bilong em na i bilip long ofa bilong Pikinini bilong em long baim bek ol man, long ol inap lusim kalabus bilong sin na ol samting sin i kamapim na stap long Paradais. Sapos man i dai pinis, em inap kisim ol dispela samting long rot bilong kirap bek.

God i larim haptaim i lus bilong stretim dispela bikpela tok na dispela i bin givim rot long ol wokman bilong em long kamapim klia olsem ol inap bihainim pasin laikim bilong God na stap gut long em maski wanem samting i painim ol. Wok bilong stretim tok long husat i nambawan bos na ol man bai stap gut long God o nogat, em i bikpela samting na bai ol man i ken rispek tru long ol lo bilong heven na graun. Sapos i no gat pasin bilong rispek long ol dispela lo, bel isi tru i no inap kamap.a

[Futnot]

[Piksa]

Ol gavman politik bilong dispela graun bai pinis