Ol Man i Askim
Pait Bilong Armagedon Bai Kamap Long Wanem Hap?
I no gat wanpela ples stret we pait bilong Armagedon bai kamap long en. Olgeta hap bilong graun bai stap olsem ples bilong pait. Bilong wanem yumi tok olsem? Long wanem, tupela lain i pait wantaim ol i bikpela tumas na i no gat wanpela hap long graun i bikpela inap long dispela tupela lain i ken bung long en.
Armagedon em “pait [bilong] dispela bikpela de bilong God I Gat Olgeta Strong.” Long rot bilong Pikinini bilong em Krais Jisas, God Jehova bai kisim lain ami em ol ensel long heven i go pait long olgeta hetman nogut bilong graun.—KTH 16:14; 19:11-16.
Ol spirit nogut bai giamanim ol manmeri bilong olgeta lain na pulim ol i go insait long dispela pait. Baibel i tok “ol spirit nogut” bai go nabaut “long ol king [hetman] bilong olgeta kantri bilong graun . . . [na] bringim ol . . . i kam bung long dispela hap, long tok Hibru ol i kolim Armagedon.”—KTH 16:14-16.
Buk Kamapim Tok Hait i kirapim tru tingting bilong planti man i save ritim Baibel. Sampela man i bin kolim ples stret we ol i ting dispela pait bai kamap, na ol i save was long ol samting i kamap long dispela hap. Dispela tingting olsem Armagedon bai kamap long wanpela ples stret, em i stap long wanpela rait Grik i stori long Buk Kamapim Tok Hait, em wanpela hetman bilong lotu, Oecumenius, i bin raitim olsem 1,500 yia i go pinis.
John F. Walvoord, bipo em presiden bilong Dallas Theological Seminary, em i kamapim tingting bilong planti pasto taim em i tok olsem Armagedon “em laspela pait namel long ol gavman em ol i laik kamap nambawan, na em bai kamap long hap bilong Midel Is.” Walvoord i tok dispela pait bai kamap long “ ‘Maunten Bilong Megido,’ em wanpela liklik maunten i stap long wanpela ples daun long hap not bilong Palestain.”
Tasol Buk Kamapim Tok Hait i no tok long wanpela ples tru em ol i kolim Armagedon, nogat. Long tok Grik ol i bin raitim Baibel long en, namba wan ves bilong Kamapim Tok Hait i soim olsem i gat ol tok long dispela buk i olsem piksa tasol. Inap planti yia i go pinis, long buk Studies in the Scriptures, Volium 4, bilong ol Witnes Bilong Jehova i tok: “Yumi no ken ting olsem ol lain bai bung long Liklik Maunten Bilong Megido, nogat.”
Ol samting i bin kamap long Megido bilong bipo i makim olsem i no gat rot long ol birua bilong God long ranawe. Olsem na long taim bilong Armagedon, God bai pinisim tru olgeta kain pasin nogut, maski ol dispela pasin i stap we long graun.—KTH 21:8.
Ol man i save laikim tru God Jehova na Pikinini bilong em, Jisas Krais, ol i no ken pret long Armagedon. Dispela pait bilong God bai mekim save tasol long ol man em God i bin skelim ol olsem ol i man nogut tru na ol i no inap senisim pasin bilong ol. Bagarap i no ken painim ol gutpela man. Baibel i tok: “Bikpela i save long rot bilong kisim bek” “ol man i bihainim God.” (2 Pita 2:9) Gutpela tok promis i stap long Song 37:34: “Yu mas bilip long Bikpela na prea long em na bihainim pasin bilong em. Sapos yu mekim olsem, bai em i givim biknem long yu, na yu ken holim dispela graun em i givim yu. Na bai yu lukim em i bagarapim ol man nogut.”