Sapta 32
Belhat Bilong God Bai i Pinis Tru
1. Taim ol ensel i kapsaitim pinis olgeta “samting nogut tru” i stap long 7-pela dis, wanem samting bai kamap long dispela taim? Tasol yumi laik save long wanem samting bilong ol dispela “dis” na “samting nogut tru”?
JON i tokim yumi pinis long ol dispela ensel i gat wok long kapsaitim “7-pela samting nogut tru,” na em i tok, taim “dispela ol samting nogut i pinis,” “belhat bilong God bai i pinis tru.” (KTH 15:1; 16:1) Ol dispela “samting nogut tru” i kamapim long ples klia strafe em Jehova bai bekim long ol man nogut, na ol ensel i mas kapsaitim i go inap long “belhat bilong God bai i pinis tru.” Long dispela taim ol lain bilong graun bai i kisim dispela strafe Jehova i bin makim bilong ol, na bai i no gat moa ol wok bilong Satan hia long graun! Tasol yumi laik save, “dispela ol samting nogut” i makim wanem samting bai painim ol man na ol hetman bilong dispela graun em pasin nogut i pulap long en? Ol Kristen i ken mekim wanem na bai ol i ken abrusim “dispela ol samting nogut” bai painim ol man bilong graun? Em ol bikpela askim, na nau bai yumi kisim bekim bilong ol. Ol man i laik tru bai stretpela pasin i ken kamap, ol bai harim gut stori bilong ol samting nau Jon i lukim.
Jehova i Belhat Long “Graun”
2. Wanem samting i kamap taim namba wan ensel i kapsaitim long graun samting nogut i stap long dis bilong em? “Graun” i makim wanem samting?
2 Namba wan ensel i kirap mekim wok! “Namba wan ensel i go kapsaitim dis bilong en antap long graun. Na ol kain kain strongpela sua nogut tru i kamap long skin bilong ol man i gat mak bilong wel animal na i save lotu long piksa bilong en.” (KTH 16:2) Olsem long krai bilong namba wan biugel, “graun” i makim ol wok politik em Satan i bin kirapim long graun long taim bilong Nimrot, em 4,000 yia bipo, na long ai bilong ol man ol dispela gavman i olsem strongpela samting.—KTH 8:7.
3. (a) Planti gavman i bin strong long ol man i mas mekim wanem na i olsem ol i mas lotu long gavman? (b) Ol gavman i kamapim wanem samting na i olsem senis bilong Kingdom bilong God? Dispela i mekim wanem long ol man i lotuim dispela samting?
3 Nau long taim bilong las de, planti gavman i strong long ol man i mas givim bel olgeta long ol, olsem lotu long ol. Ol dispela gavman i laik bai ol man i ting gavman i namba wan na God i namba tu. (2 Timoti 3:1; skelim wantaim Luk 20:25; Jon 19:15.) Kirap long 1914 ol gavman i bin singautim ol yangpela man long go insait long ami na blut bilong planti man i bin kapsait. Na long de bilong Bikpela ol kantri i bin kamapim Lig ov Nesen na Yunaitet Nesen, em dispela piksa bilong wel animal, na em i olsem senis bilong Kingdom bilong God. Sampela pop i bin tok, Yunaitet Nesen tasol inap kamapim bel isi na gutpela sindaun, tasol dispela tok i giaman na i olsem tok bilas long God! Ol man yet i bin kamapim Yunaitet Nesen, na em i birua long Kingdom bilong God. Ol man i litimapim nem bilong dispela samting, olsem lotu long en, ol i no stap klin moa long ai bilong God. Ol i stap nogut long ol samting bilong spirit, na i olsem sua nogut i kamap long skin bilong ol, olsem ol Isip taim ol i sakim tok bilong Jehova long taim bilong Moses.—Kisim Bek 9:10, 11.
4. (a) Samting i stap long namba wan dis i kamapim klia wanem samting? (b) Ol man i kisim mak bilong wel animal ol i stap olsem wanem long ai bilong Jehova?
4 Yumi tingim samting i stap long namba wan dis na em bai mekim wanem long ol man, na nau yumi save i gat tupela samting tasol inap painim ol, olsem: Sapos ol i lotu long Jehova, ol man bilong graun i no ken orait long ol na bai ol i kisim hevi, tasol sapos ol i lotu long wel animal na piksa bilong en, belhat bilong Jehova bai painim ol. Wok politik i subim ol man long kisim mak bilong wel animal, na “sapos man i no gat dispela mak bilong nem bilong wel animal o sapos em i no gat namba bilong nem bilong en, orait em i no inap baim samting.” (KTH 13:16, 17) Tasol sapos ol i kisim dispela mak, samting nogut bai painim ol! Long ai bilong Jehova i olsem “ol kain kain strongpela sua nogut tru i kamap long skin” bilong ol. Kirap long 1922 ol i kisim mak bilong ol man i bin givim baksait long God. Wok politik bilong ol i no kamapim gutpela wok, na dispela i givim pen long ol. Ol i stap nogut long ai bilong God, olsem samting i no klin. Sapos ol i no tanim bel, ol sua nogut bilong ol bai kilim ol i dai, long wanem, nau em taim bilong Jehova long skelim ol man long kot. Sapos yumi no mekim wok bilong Jehova, orait, yumi stap insait long wok bilong graun; i no inap yumi stap namel tasol.—Luk 11:23; skelim wantaim Jems 4:4.
Solwara i Kamap Olsem Blut
5. (a) Taim ensel i kapsaitim samting nogut bilong namba 2 dis, wanem samting i kamap? (b) Long ai bilong Jehova ol man i stap olsem long “solwara” ol i stap olsem wanem?
5 Orait, nau narapela ensel bai kapsaitim belhat bilong God i stap long namba 2 dis. Dispela bai mekim wanem long ol man? Jon i tok: “Na namba 2 ensel i kapsaitim dis bilong en antap long solwara. Na solwara i kamap olsem blut bilong man i dai pinis. Na olgeta samting i stap laip long solwara, ol i dai.” (KTH 16:3) Krai bilong namba 2 biugel i bilong “solwara” i mas harim, na samting nogut bilong namba 2 dis, dispela tu i bilong i go long “solwara.” Dispela “solwara” i makim ol man ol i bikhet nabaut na ol i givim baksait long Jehova; ol i olsem ol si long biksolwara i mekim nabaut na i no stap isi. (Aisaia 57:20, 21; KTH 8:8, 9) Long ai bilong Jehova dispela “solwara” i olsem blut na i no inap ol samting i ken i stap laip long en. Olsem na ol Kristen i no ken insait long ol samting bilong dispela graun. (Jon 17:14) Taim ensel i kapsaitim belhat bilong God i stap long namba 2 dis, dispela i kamapim klia olsem ol man i stap insait long dispela solwara ol i olsem i dai pinis long ai bilong Jehova. Sapos sampela man bilong wanpela kantri ol i mekim rong, asua bilong dispela i kalap long ol narapela bilong dispela kantri, olsem na yumi ken tok, ol man i gat asua long kapsaitim blut bilong planti man em ol i no bin mekim rong. Long De bilong Jehova long bekim kros bilong em, ol lain em i makim bilong bekim strafe, ol bai kilim i dai ol dispela man i gat asua long blut.—KTH 19:17, 18; skelim wantaim Efesus 2:1; Kolosi 2:13.
Ol i Kisim Blut Bilong Dring
6. Wanem samting i kamap taim ensel i kapsaitim namba 3 dis i gat belhat bilong God i stap long en? Ensel i tok wanem? Alta i tok wanem?
6 Belhat bilong God i stap long namba 3 dis em i wankain olsem krai bilong namba 3 biugel, na ensel i kapsaitim i go long ol wara: “Na namba 3 ensel i kapsaitim dis bilong en antap long ol bikpela wara na ol hul wara. Na dispela olgeta wara i kamap blut. Na mi harim ensel i bosim ol wara i tok olsem, ‘God, yu stap nau, na bipo tru yu stap. Pasin bilong yu em i gutpela na stretpela olgeta, na yu holi tru. Yu skelim pinis pasin bilong ol dispela man, na taim yu tok long ol dispela samting nogut i mas kamap long ol, dispela tok bilong yu em i stret olgeta. Ol dispela man ol i bin kilim i dai ol profet na ol manmeri bilong yu, na mekim blut bilong ol i kapsait. Olsem na yu givim blut long ol dispela man nogut, bai ol i dring. Na dispela blut ol i dringim, em i bekim stret pasin nogut ol i bin mekim.’ Na mi harim alta i singaut olsem, ‘Bikpela, yu God I Gat Olgeta Strong. Yu save skelim pasin bilong ol manmeri long kot, na tru tumas, kot bilong yu em i tru na i stret olgeta.’ ”—KTH 16:4-7.
7. “Ol bikpela wara na ol hul wara” i makim wanem samting?
7 Dispela “ol bikpela wara na ol hul wara” i makim ol tok na save ol man bilong graun i ting em i gutpela bilong helpim ol, olsem ol save ol i kisim long wok politik, na samting bilong bisnis na mani, na save bilong saiens, na ol skul, na helpim sindaun bilong man, na ol samting bilong lotu—em ol samting i stiaim tingting bilong ol man; ol dispela samting i as bilong ol save na pasin na wok bilong ol. Jehova i As bilong laip bilong ol man, tasol ol i no laik kisim save na tingting long em. Em inap givim tok i tru long ol olsem “wara” na bai ol i ken i stap laip oltaim, tasol ol i lusim em na “ol yet i wokim ol tang bilong holim wara. Na ol dispela tang i bruk nabaut na wara i no inap i stap long ol.” Ol i save dring long “save bilong dispela graun em i olsem longlong pasin tasol long ai bilong God.”—Jeremaia 2:13; 1 Korin 1:19; 2:6; 3:19; Song 36:9.
8. Ol man i bin mekim wanem na ol i gat bikpela asua long blut?
8 Ol dispela “wara” nogut i bin kirapim ol man long kilim man i dai, olsem long taim bilong pait samting; long yia 1900 na i kam inap 2000 samting, blut bilong planti man i bin kapsait, winim 100 milion, em ol i dai long pait. Ol misin i gat nem Kristen ol i gat bikpela asua moa long dispela samting. Tupela bikpela pait i bin kamap insait long lain bilong ol, “na oltaim [ol] i save bel kirap long kilim i dai ol man i no bin mekim wanpela rong,” na ol i bin mekim long planti wokman bilong Jehova yet. (Aisaia 59:7; Jeremaia 2:34) Na ol man i brukim stretpela lo bilong God taim ol i bin givim blut long narapela man, olsem na ol i gat bikpela asua long dispela tu. (Stat 9:3-5; Wok Pris 17:14; Aposel 15:28, 29) Ol i givim blut long ol man, na planti man i kisim sik AIDS na sik hepataitas na ol narapela sik long blut ol i bin kisim, olsem na ol yet i kisim bikpela hevi long dispela samting ol i mekim. Ol dispela man i gat asua long blut, liklik taim bai ol i kisim bikpela strafe, olsem ol “hos” bai krungutim ol “insait long bikpela tang ston bilong krungutim ol pikinini wain. Dispela em i makim belhat bilong God.”—KTH 14:19, 20.
9. Taim ensel i kapsaitim “samting nogut tru” bilong namba 3 dis, dispela i makim wanem samting?
9 Long taim bilong Moses, Jehova i tanim wara Nail i kamap blut, tasol ol Isip inap painim sampela wara nabaut bilong dring na bai ol i no ken i dai. (Kisim Bek 7:24) Tasol long nau ol man i sot long ol tok bilong God, long wanem “ol samting nogut tru” i kapsait i kam daun long graun, olsem na long olgeta hap bilong dispela graun bilong Satan i no gat gutpela “wara” bilong givim laip long ol man. Taim ensel i kapsaitim “samting nogut tru” bilong namba 3 dis, dispela i makim olsem lain bilong Jehova i mas autim tok long ol man na i tok, “ol bikpela wara na ol liklik wara” i kamap olsem blut na sapos ol man i dring long dispela ol bai dai—olsem dai long ai bilong Jehova, na sapos ol i no tanim bel i go long Jehova, belhat bilong em bai painim ol.—Lukim Esekiel 33:11.
10. “Ensel i bosim ol wara” em i tokaut long wanem samting? Taim “alta” i tokaut, dispela i strongpela mak bilong makim wanem samting?
10 Na namba 3 ensel i bin kapsaitim dis antap long ol wara, em dispela “ensel i bosim ol wara,” na em i litimapim nem bilong Jehova na tokaut olsem Jehova em i Bikpela Nambawan Jas, na samting Jehova i tok long mekim, dispela i stret na i no inap senis. Olsem na ensel i tokaut long dispela strafe ol i mas kisim, na i tok dispela “i bekim stret pasin nogut ol i bin mekim.” Inap planti tausen yia dispela ensel i bin lukim ol pait, na ol man i kilim i dai man, na pen ol man i bin kisim, na as bilong en em ol tok na bilip giaman bilong dispela graun. Olsem na ensel i save, strafe Jehova i makim bilong ol i stret. Na “alta” bilong Jehova tu i tokaut. Kamapim Tok Hait 6:9, 10 i tok, laip bilong ol man “i dai pinis ol i stap aninit long alta,” olsem na taim “alta” i tokaut, dispela i strongpela mak bilong makim olsem ol samting Jehova i laik mekim, em i stret tasol.a Olsem na i stret Jehova i tokim ol kilman na ol man i mekim wok nogut long blut, ol i mas ‘dringim blut’—olsem Jehova i makim ol bilong ol i mas dai.
Paia i Kukim Ol Man
11. Belhat bilong God i stap long namba 4 dis, ensel i kapsaitim long wanem samting? Taim ensel i mekim olsem, wanem samting i kamap?
11 Belhat bilong God i stap long namba 4 dis, em ensel i kapsaitim long san, olsem Jon i tok: “Orait namba 4 ensel i kapsaitim dis bilong en antap long san, na God i larim paia bilong san i kamap strong tru na i kukim ol man. Dispela bikpela paia bilong san em i hat moa yet, na i kukim nogut ol dispela man. Na ol i tok nogut long nem bilong God, em God i gat strong bilong bosim ol dispela samting nogut i kamap long ol. Tasol ol i no tanim bel na litimapim nem bilong em.”—KTH 16:8, 9.
12. “San” bilong ol man em i wanem samting? Jehova i larim dispela “san” i mekim wanem?
12 Nau long “las de bilong dispela graun” ol brata spirit bilong Jisas ol “i lait olsem san, insait long kingdom bilong Papa bilong ol.” (Matyu 13:40, 43) Na Jisas yet i “olsem lait bilong san.” (Malakai 4:2) Tasol ol man bilong graun i gat “san” bilong ol yet, em ol bos bilong ol. Ol dispela bikman i laik i stap olsem lait long ai bilong ol man, na ol i birua long Kingdom bilong God. Krai bilong namba 4 biugel i tokaut olsem ‘san na mun na ol sta long skai’ bilong ol misin ol i no givim lait, o save, long ol man; nogat. (KTH 8:12) Belhat bilong God i stap insait long namba 4 dis em i kam long “san” olsem ol bikman na i mekim “san” i hat nogut tru, na “paia” bilong ol dispela bikman “i kukim ol man.” Jehova “i larim paia bilong san” i mekim dispela samting, olsem “kamap strong tru na i kukim ol man,” long wanem, em kot bilong Jehova i painim ol. Ol bikman bilong graun, olsem “san,” ol i kukim ol man olsem wanem?
13. Ol bikman i stap olsem “san” bilong ol man, na ol i bin mekim wanem na i olsem ol i “kukim” ol man?
13 Bihain long Namba Wan Pait ol bikman bilong graun i kamapim Lig ov Nesen bilong pasim pait na bai i no ken kamap moa, tasol em i no mekim. Olsem na ol i traim sampela kain gavman moa, olsem gavman Fasis, na gavman Natsi bilong Hitler. Na gavman Komyunis tu i bin kamap bikpela. Ol bikman bilong ol dispela gavman ol i olsem “san” bilong ol man, tasol ol i no stretim hevi bilong ol, nogat; ol i kirap long “kukim ol man. Dispela bikpela paia bilong san em i hat moa yet, na i kukim nogut ol.” Pait i kamap long Spen na Itiopia na Mansuria, na bihain Namba 2 Pait i kirap. Ol samting i kamap long dispela taim i kamapim klia olsem Mussolini na Hitler na Stalin, em ol bikman bilong ol gavman, ol yet i as na planti milion man i bagarap. Na pait i bin kamap tu long Vietnam na Kampusia na Iran na Lebanon na Aialan na sampela kantri long hap bilong Saut Amerika na Afrika. Na tupela bikpela gavman bilong Amerika na Rasia i kros i stap, na ol i gat ol bom samting nogut tru bilong pait na em inap “kukim” na bagarapim olgeta man long graun. Tru tumas, nau long las taim ol bikman nogut bilong graun i stap olsem “san” bilong ol man na ol i “kukim nogut” ol man. Namba 4 dis i gat belhat bilong God i stap long en na ensel i kapsaitim i go long “san” bilong ol man, na nau ol dispela samting i kamap ples klia na lain bilong God i autim long olgeta hap bilong graun.
14. Long olgeta taim ol Witnes Bilong Jehova i bin kolim wanem samting tasol inap long stretim ol hevi bilong graun? Tasol ol man i mekim wanem?
14 Long olgeta taim ol Witnes Bilong Jehova i bin tokaut olsem, Kingdom bilong Jehova tasol inap stretim ol hevi bilong ol man, na long rot bilong dispela Kingdom Jehova bai mekim nem bilong em i stap holi. (Song 83:4, 17, 18; Matyu 6:9, 10) Tasol ol man i no bilip long dispela tok. Ol i givim baksait long Kingdom na planti ol i tok bilas long nem bilong God olsem king bilong Isip i bin mekim long taim em i no laik daun long wok king bilong Jehova. (Kisim Bek 1:8-10; 5:2) Ol dispela birua i no tingim Kingdom liklik, nogat; ol i laik i stap aninit long hatpela “san” bilong ol yet, em ol dispela gavman bilong graun i save “kukim” ol man.
Sia King Bilong Wel Animal
15. (a) Belhat bilong God i stap long namba 5 dis, ensel i kapsaitim i go long wanem samting? (b) “Sia king bilong wel animal” i makim wanem samting? Taim ensel i kapsaitim belhat bilong God i go long “sia king bilong wel animal,” dispela i makim wanem samting?
15 Narapela ensel i holim namba 5 dis, em i kapsaitim belhat bilong God i go long wanem samting? Jon i tok: “Na namba 5 ensel i kapsaitim dis bilong en antap long sia king bilong wel animal.” (KTH 16:10a) Dispela “wel animal” em ol wok gavman bilong Satan. Dispela samting i no gat wanpela “sia king” tru; na i olsem tu long “wel animal,” em i no wanpela animal tru—em ol tok piksa tasol. Dispela tok “sia king” i makim olsem “wel animal” i bin bosim ol man olsem king. Olsem na ol kom bilong “wel animal,” olgeta i gat hat king. Dispela “sia king bilong wel animal” i makim as bilong strong bilong ol gavman. Baibel i kamapim long ples klia as bilong strong bilong “wel animal.” Baibel i tok: “Snek i givim strong bilong em yet long dispela wel animal. Em i mekim em i stap king olsem em yet, na em i givim bikpela strong long em.” (KTH 13:1, 2; 1 Jon 5:19) Jon i tok, ensel i kapsaitim belhat bilong God i go long “sia king bilong wel animal,” na dispela i makim ol Witnes i autim strongpela tok na i kamapim klia olsem Satan i wok yet long strongim dispela “wel animal” na kirapim ol man long givim bel long en.
16. (a) Ol lain bilong graun i mekim wok bilong husat, maski ol i no save? Stori long dispela samting. (b) Olsem wanem pasin bilong ol man bilong graun i wankain olsem bilong Satan? (c) Wanem taim bai sia king bilong wel animal i kapsait?
16 Satan i bosim ol lain long graun olsem wanem? Taim Satan i laik traim Jisas, long rot bilong driman em Satan i soim olgeta gavman long Jisas, na Satan i tok, “bai mi givim yu strong bilong bosim olgeta dispela kantri.” Tasol Jisas i mas lotu long Satan pastaim na bai Satan i ken givim dispela samting long Jisas. (Luk 4:5-7) Na ol gavman tu i mas lotu long Satan bambai em i ken larim ol i bosim ol samting long graun. Baibel i tok, Satan em i god bilong dispela graun, olsem na ol lain bilong graun i lotu long Satan tasol na mekim wok bilong em, maski ol i no save long dispela samting. (2 Korin 4:3, 4)b Pasin bilong ol lain bilong graun i wankain olsem bilong Satan: Ol wan wan lain o kantri i litimapim nem bilong ol yet na i laik winim ol narapela lain o kantri, na pasin birua i stap namel long ol, na ol wan wan man i save tingim ol yet tasol. Na Satan i stiaim tingting bilong ol na bai em i ken bosim ol. Pasin nogut i stap insait long ol gavman, na ol i mangal long kisim bikpela strong, na ol i giaman, na ol i laik bungim planti samting bilong mekim pait. Ol dispela pasin nogut bilong ol i wankain olsem bilong Satan. Ol man i helpim pasin nogut bilong Satan, olsem na em i god bilong ol. Sia king bilong wel animal bai kapsait taim em i kisim bagarap na taim Pikinini bilong meri bilong God i kalabusim Satan.—Stat 3:15; KTH 19:20, 21; 20:1-3.
Tudak na Bikpela Pen
17. (a) Taim ensel i kapsaitim namba 5 dis i gat belhat bilong God i stap long en, olsem wanem dispela i kamapim long ples klia olsem kingdom bilong wel animal i bin stap tudak long ol samting bilong spirit? (b) Taim ensel i kapsaitim belhat bilong God i stap long namba 5 dis, ol man i mekim wanem?
17 Taim kingdom bilong wel animal i bin kirap, na i kam inap nau, dispela kingdom bilong em i bin stap tudak long ol samting bilong spirit. (Lukim Matyu 8:12; Efesus 6:11, 12.) Namba 5 dis i kamapim bikpela tokaut long dispela tudak, na i tok piksa long sampela samting ol man i mekim taim belhat bilong God i kam daun long sia king bilong wel animal. Jon i tok: “Na tudak i kamap long ol lain man i stap aninit long strong bilong wel animal. Na pen ol i kisim em i kamap nogut tru, olsem na ol i kaikaim tang bilong ol. Ol i ting long pen bilong ol na long ol sua i bin kamap long skin bilong ol, na ol i tok nogut long God bilong heven. Tasol ol i no tanim bel na givim baksait long ol pasin nogut ol i save mekim.”—KTH 16:10b, 11.
18. Krai bilong namba 5 biugel na belhat bilong God i stap long namba 5 dis, olsem wanem tupela i wankain?
18 Krai bilong namba 5 biugel i no wankain stret olsem namba 5 dis i gat belhat bilong God i pulap long en, long wanem, krai bilong dispela biugel i toksave olsem bikpela lain grasopa i laik kam. Tasol taim ol grasopa i kam, ol i haitim lait bilong san, na tudak i kamap. (KTH 9:2-5) Baibel i stori long Jehova i salim ol grasopa bilong mekim save long Isip, na ol dispela grasopa i givim bikpela hevi long ol. Kisim Bek 10:14, 15 i tok: “Bipo ol Isip i no bin lukim bikpela lain grasopa olsem, na bihain ol i no inap lukim gen. Ol grasopa i kam pulap tru na karamapim graun olgeta, olsem na graun i bilak nogut tru.” Krai bilong namba 5 biugel na belhat bilong God i stap long namba 5 dis na ol i kapsaitim, dispela i kamapim long ples klia olsem ol lain bilong graun i stap olsem long bikpela tudak bilong spirit. Ol dispela lain olsem grasopa i autim strongpela tok na dispela strongpela tok i givim pen long ol man nogut em ol “i laikim tumas tudak. Ol i no laikim lait.”—Jon 3:19.
19. Olsem Kamapim Tok Hait 16:10, 11 i tok, taim ol Witnes i kamapim long ples klia olsem Satan em i god bilong ol man bilong graun, ol man i mekim wanem?
19 Satan i bos bilong ol man bilong graun, na em i as bilong planti hevi na pen bilong ol. Ol man i sot long kaikai, na i gat planti pait, na pasin bilong bagarapim man, na stil, na kisim ol drak, na pasin pamuk, na ol sik em pasin pamuk i save kamapim, na pasin giaman, na ol misin tu i gat tupela maus—ol dispela samting em samting Satan i kamapim. (Lukim Galesia 5:19-21.) Tasol taim ol Witnes i tokaut olsem Satan em i god bilong dispela graun, dispela tok i givim bikpela pen long ol man i laik bihainim ol pasin em Satan i kamapim, “na ol i kaikaim tang bilong ol,” na ol lotu i holim nating nem Kristen ol i moa mekim olsem. Planti man i kros taim ol Witnes i autim tok i tru na dispela i kamapim klia olsem pasin bilong ol dispela man i no stret. Sampela i pilim olsem dispela tok i tru i pait wantaim ol, olsem na ol i mekim nogut long ol man i autim dispela tok i tru. Ol i sakim Kingdom bilong God, na ol i tok bilas long nem holi bilong Jehova. Ol dispela “sua nogut” bilong ol em i samting bilong lotu giaman bilong ol, na tok i tru i kamapim long ples klia, olsem na ol i kirap na “ol i tok nogut long God bilong heven. Tasol ol i no tanim bel na givim baksait long ol pasin nogut ol i save mekim.” Olsem na yumi save, planti man ol i no inap senisim pasin bilong ol paslain long pinis bilong pasin bilong dispela graun.—Aisaia 32:6.
Wara Yufretis i Drai
20. Krai bilong namba 6 biugel na samting nogut tru i stap long namba 6 dis em ensel i kapsaitim, olsem wanem tupela i mekim sampela samting long wara Yufretis?
20 Krai bilong namba 6 biugel i makim taim em “4-pela ensel ol i kalabus i stap long bikpela wara Yufretis” ol i ken lusim dispela hap na i go. (KTH 9:14) Bipo bikpela taun Babilon i bin stap klostu long wara Yufretis. Long 1919 dispela 4-pela ensel i lusim kalabus, na long dispela taim Bikpela Babilon i pundaun. (KTH 14:8) Na namba 6 dis i gat belhat bilong God i stap insait long en em tu i mekim sampela samting long wara Yufretis. “Na namba 6 ensel i kapsaitim dis bilong en antap long bikpela wara Yufretis. Na wara em i drai olgeta, bilong redim rot bilong ol king i kam long hap sankamap.” (KTH 16:12) Dispela tok tu i putim hevi long Bikpela Babilon!
21, 22. (a) Olsem wanem na long yia 539 paslain long Krais bikpela wara Yufretis i drai pinis long hap bilong Babilon? (b) Wanem dispela “ol bikpela wara” Bikpela Babilon i “sindaun antap long” en? Olsem wanem na dispela “wara” i laik drai?
21 Taim taun Babilon i bin stap bipo, bikpela wara Yufretis i save pasim ol birua na ol i no inap go insait long taun. Long yia 539 paslain long Krais, Sairus, em king bilong Persia, i senisim baret em wara Yufretis i ran long en na wara i ran long narapela baret na i no go moa long hap bilong taun Babilon, olsem na wara i drai pinis long Babilon. Nau rot i op na bai King Sairus bilong Persia na King Darius bilong Midia, em ol king “i kam long hap sankamap,” ol i ken go insait na daunim Babilon. Sori tumas long ol Babilon long dispela taim nogut bilong ol, long wanem, nau i no gat wara Yufretis bilong helpim dispela bikpela taun long sakim ol birua. (Aisaia 44:27–45:7; Jeremaia 51:36) Wankain samting bai painim Babilon bilong nau tu, em olgeta lotu giaman.
22 Bikpela Babilon “i sindaun antap long ol bikpela wara.” Kamapim tok Hait 17:1, 15, i tok, dispela wara “i makim ol manmeri bilong olgeta lain man na bilong olgeta kain skin na bilong olgeta tok ples na bilong ol bikpela bikpela lain,” em ol lain man i bin helpim na strongim na lukautim ol misin. Tasol long nau ol dispela “wara” i laik drai! Bipo long Wes Yurop ol misin i bosim strong ol man, tasol long nau planti handet milion i givim baksait long ol lotu. Na long sampela kantri, inap planti yia sampela lain i bin tokaut olsem ol i laik pinisim olgeta lotu. Tasol ol man bilong ol dispela hap i no laik kirap na mekim sampela samting bilong helpim ol dispela misin. Lain bilong ol misin i wok long i go liklik, na long taim bilong Bikpela Babilon i mas kisim bagarap, liklik hap lain bilong en i no inap helpim em long abrusim dispela bagarap. (KTH 17:16) Long nau ol misin i tok ol i gat bikpela lain inap planti tausen milion, tasol bihain i no gat sampela lain inap helpim Bikpela Babilon taim “ol king i kam” bilong bagarapim em, em dispela “ol king i kam long hap sankamap.”
23. (a) Long yia 539 paslain long Krais, husat ol king “i kam long hap sankamap”? (b) Long de bilong Bikpela, husat “ol king i kam long hap sankamap?” Ol bai bagarapim Bikpela Babilon olsem wanem?
23 Husat dispela ol king? Long yia 539 paslain long Krais, Darius bilong Midia na Sairus bilong Persia i stap king, na long rot bilong tupela, Jehova i bin daunim olpela taun Babilon. Long nau long de bilong Bikpela tu, ol lain politik bilong ol gavman bai mekim olsem long Bikpela Babilon—ol bai bagarapim olgeta lotu bilong en. Na olsem long bipo, Jehova bai kirapim ol long mekim. Dispela “ol king i kam long hap sankamap” em God Jehova na Krais Jisas tasol, na tupela bai “givim tingting” long ol dispela gavman long bagarapim Bikpela Babilon na pinisim olgeta. (KTH 17:16, 17) Ensel i kapsaitim samting nogut i stap long namba 6 dis, na dispela i makim olsem ol Witnes i tokaut long dispela samting i laik kamap!
24. (a) Olsem wanem ol man i harim ol strongpela toksave bilong 6-pela dis i gat belhat bilong God i stap long en? Dispela i givim rot long ol man long mekim wanem? (b) Taim Jon i no stori yet long laspela dis i gat belhat bilong God i stap long en, em i stori pastaim long wanem samting?
24 Belhat bilong Jehova i stap long namba wan i go inap namba 6 dis, na dispela ol dis i gat strongpela toksave long en. Ol ensel i helpim ol wokman bilong God long graun long autim dispela tok long olgeta hap bilong graun, olsem wanpela strongpela toksave i go long olgeta hap na olgeta lain em Satan i bosim. Na taim ol wokman bilong Jehova i autim dispela tok, i olsem Jehova i givim rot long ol man na bai ol i ken kamapim bel bilong ol, ol i laik tanim bel na bihainim stretpela pasin na i stap laip o nogat. (Esekiel 33:14-16) Na i gat wanpela dis moa i stap, em i gat belhat bilong God i pulap long en, tasol Jon i stori pastaim long ol samting Satan wantaim lain bilong em long graun ol i mekim bilong daunim dispela tok ol wokman bilong God i save autim.
Ol i Bung Long Armagedon
25. (a) Jon i stori olsem wanem long ol “spirit nogut olsem rokrok”? (b) Olsem wanem long dispela samting nogut tru i bin kamap long de bilong Bikpela na i olsem ol rokrok? Dispela samting i mekim wanem long ol bikman bilong graun?
25 Jon i tok: “Na mi lukim tripela spirit nogut olsem rokrok, ol i kamap long maus bilong dispela traipela snek na long maus bilong wel animal na long maus bilong giaman profet. Ol dispela spirit nogut tru i save wokim ol kain kain mirakel, na ol i go nabaut long ol king bilong olgeta kantri bilong graun. Ol i laik mekim ol king i bringim ol ami bilong ol i kam bung, bai ol i ken kirapim pait long dispela bikpela de bilong God I Gat Olgeta Strong i kotim ol manmeri.” (KTH 16:13, 14) Long taim bilong Moses, Jehova i “mekim ol rokrok i kamap na pulapim graun bilong Isip,” na bihain ol i dai “na ol i sting na smel nogut tru i kamap.” (Kisim Bek 8:5-15) Long de bilong Bikpela i gat sampela samting nogut tru i bin kamap, i olsem ol rokrok, tasol Jehova i no as bilong en. Jon i kolim dispela samting olsem “tripela spirit nogut,” na i makim ol tok gris bilong Satan long kirapim ol bikman bilong ol gavman, olsem “ol king” na bai ol i birua long God Jehova. Satan i kamapim dispela samting na bai ol dispela bikman i no ken bilipim ol tok bilong belhat bilong God i stap long ol dis. Satan i laik bai ol i pas strong wantaim em long taim dispela bikpela pait i kirap, em pait bilong “dispela bikpela de bilong God I Gat Olgeta Strong.”
26. (a) Wanem 3-pela as bilong ol dispela tok gris? (b) “Giaman profet” i wanem samting? Yumi save olsem wanem?
26 “Traipela snek” (em Satan) na “wel animal” (em ol wok politik bilong Satan long graun), em tupela as bilong ol dispela tok gris, na yumi stori pinis long dispela tupela samting. Tasol olsem wanem long dispela “giaman profet”? Em i no nupela samting; longtaim Jon i stori pinis long en, tasol long dispela taim bipo Jon i no kolim olsem “giaman profet”—em i kolim olsem wel animal i gat tupela kom olsem bilong sipsip na em i “wokim ol kain kain mirakel” long ai bilong wel animal i gat 7-pela het. Wel animal i gat tupela kom olsem bilong sipsip i mekim wok olsem profet bilong dispela “wel animal” i gat 7-pela het. Em i kirapim ol man long lotuim “wel animal,” na em i kirapim ol long kamapim piksa bilong “wel animal.” (KTH 13:11-14) Dispela “giaman profet” em i dispela wel animal i gat tupela kom olsem sipsip na i no narapela samting, nogat. Long wanem, bihain bai yumi kaunim sampela tok em i tok, “giaman profet” i mekim wankain pasin olsem wel animal i gat tupela kom i mekim, olsem “wokim planti mirakel long ai bilong wel animal [i gat 7-pela het], na long dispela pasin em i bin giamanim ol man i bin kisim mak bilong wel animal na i save lotu long piksa bilong en.”—KTH 19:20.
27. (a) Krais Jisas i givim wanem toksave long yumi? (b) Taim Jisas i stap long graun em i mekim wanem toksave? (c) Aposel Pol i mekim wanem wankain toksave?
27 Satan i kamapim planti tok giaman bilong grisim ol man, olsem na i stret Jon i raitim dispela narapela tok em i harim long driman, olsem: “Harim. Wantu bai mi kam long yupela olsem ol stilman i save kam. Olsem na sapos man i no slip, na em i putim ol klos samting bilong en i stap klostu long em, orait dispela man i ken amamas, long wanem, em bai i no inap wokabaut as nating na ol manmeri bai i no inap lukim sem bilong en.” (KTH 16:15) Husat bai kam olsem “stilman”? Em Jisas tasol, na em bai kam bilong givim strafe bilong Jehova long ol man, tasol em i no toksave long wanem taim em bai kam. (KTH 3:3; 2 Pita 3:10) Taim em i stap yet long graun em i bin tok, em bai kam olsem stilman i save kam, na em i tok: “Yupela i mas was gut. Yupela i no save wanem de Bikpela bilong yupela bai i kam. Olsem na yupela tu i mas redi. Pikinini Bilong Man bai i kam long wanpela taim yupela i no ting em bai i kam.” (Matyu 24:42, 44; Luk 12:37, 40) Aposel Pol i mekim wankain tok, em i tok: “De bilong [Jehova] bai i kamap wantu tasol olsem stilman i kam long nait. Ol manmeri bai i tok olsem, ‘Nau em i gutpela taim tru. Yumi stap gut,’ na wantu tasol samting bilong bagarapim ol bai i kamap long ol.” Satan i wok long kirapim ol man long mekim dispela tok giaman olsem “Nau em i gutpela taim tru. Yumi stap gut”!—1 Tesalonaika 5:2, 3.
28. Jisas i tok wanem long sakim ol traim bilong dispela graun? Wanem “dispela de” em ol Kristen i no laik bai i painim ol olsem “umben”?
28 Na Jisas i toksave tu long ol man bilong dispela graun bai traim ol Kristen, em ol bai grisim ol long ol tok gris bilong dispela graun. Em i tok: “Yupela lukaut gut. Nogut yupela i dring nabaut oltaim na yupela i spak. Na nogut yupela i wari long ol samting bilong bodi. Sapos kain pasin olsem i daunim yupela, orait dispela de bilong [Jehova] bai i kamap long yupela wantu tasol, olsem umben i save holimpas abus, . . . Oltaim oltaim yupela i mas was i stap. Na yupela i mas beten oltaim long God i givim strong long yupela. Olsem na bai yupela i abrusim olgeta dispela samting i laik kamap, na bai yupela i sanap long ai bilong Pikinini Bilong Man.” (Luk 21:34-36) “Dispela de” em i “dispela bikpela de bilong God I Gat Olgeta Strong.” (KTH 16:14) Em “de” bilong Jehova long kamapim long ples klia olsem em i King tru bilong heven na graun, na “dispela de” i wok long i kam klostu. Olsem na i gat planti hevi na traim i save painim ol Kristen na i hatwok long ol i karim ol dispela hevi. Ol i mas tingting gut na was gut i stap inap long “dispela de” i kam.
29, 30. (a) Wanem insait bilong dispela tok bilong Jisas em i tok, sapos man i slip na em i no was i stap, ol bai rausim klos bilong em na bai em i gat bikpela sem? (b) “Klos” hia i makim wanem samting? (c) Wanem samting, sapos Kristen i mekim, i olsem ol i rausim klos bilong em? Na sapos em i mekim olsem, wanem samting inap painim em?
29 Wanem insait bilong dispela tok bilong Jisas, em i tok, man i no ken slip, nogut ol i rausim klos bilong em na bai em i gat bikpela sem? Long lain Israel bipo, sampela pris o Livai i mas was long haus lotu, em bikpela wok. Sampela Juda i tok, sapos wanpela pris o Livai i stap long dispela wok na em i slip, ol bai rausim klos bilong em na ol bai kukim, na dispela bai semim em.
30 Jisas i tok, samting olsem inap painim ol Kristen long nau. Ol pris na Livai i makim ol brata bilong Jisas em God i bin makim ol long spirit holi. (1 Pita 2:9) Tasol dispela bikpela lain olsem “planti manmeri tru” ol tu i mas harim dispela tok bilong Jisas. Dispela tok “klos” i makim man em i wanpela Witnes Kristen bilong Jehova. (Lukim Kamapim Tok Hait 3:18; 7:14.) Sapos Kristen i larim ol hevi na traim bilong graun i daunim em na nau em i no was gut moa i stap, i olsem em i “slip” na i olsem ol bai rausim “klos” bilong em na em i stap skin nating—i olsem nau em i no gat gutpela klinpela pasin bilong makim em i wanpela Kristen. Sapos olsem, em bai i gat bikpela sem, na nogut “dispela de” i painim em olsem na em bai lus olgeta.
31. (a) Kamapim Tok Hait 16:16 i tok wanem na yumi save, long nau ol Kristen i mas was gut i stap? (b) Sampela ol bikman bilong lotu i tok wanem long Armagedon?
31 Long nau ol Kristen i no ken tru “slip” olsem slek o surik o les, long wanem, wanpela bikpela samting em klostu nau bai kamap, olsem narapela ves bilong Kamapim Tok Hait i tok: “Orait ol spirit nogut i bringim ol king i kam bung long dispela hap, long tok Hibru ol i kolim Armagedon.” (KTH 16:16) Baibel i kolim dispela nem Armagedon wanpela taim tasol, tasol planti man i moa tingim dispela tok Armagedon. Sampela bikman bilong gavman i bin tok, yumi mas lukaut long Armagedon i gat ol bom nuklia samting. Na sampela i tok, Armagedon bai kamap long wanpela taun bilong bipo, em taun Megido, em bipo ol pait i bin kamap long dispela hap na sampela lain i bin win. Olsem na sampela bikman bilong lotu ol i tok, Armagedon bai kamap long dispela liklik hap. Tasol dispela tok bilong ol i kranki tru.
32, 33. (a) Armagedon i no makim wanpela hap bilong graun, tasol em i makim wanem samting? (b) Wanem sampela hap tok bilong Baibel i olsem i makim Armagedon? (c) Wanem taim namba 7 ensel bai kapsaitim dis i gat belhat bilong God i stap long en?
32 Insait bilong tok Armagedon i olsem “Maunten bilong Megido.” Tasol Armagedon i no makim wanpela hap, nogat. Armagedon i makim wanpela taim bambai olgeta lain bilong graun ol i gat wankain tingting long biruaim God Jehova, na long dispela taim em bai bagarapim ol, maski ol i stap we long graun. (Jeremaia 25:31-33; Daniel 2:44) Armagedon i wankain olsem dispela “bikpela tang ston bilong krungutim ol pikinini wain. Dispela em i makim belhat bilong God.” Na Armagedon i olsem “dispela ples daun, ol i kolim God Em I Jas,” o “ples daun bilong mekim kot,” na Jehova bai bungim ol lain bilong graun long dispela ples bilong bagarapim ol. (KTH 14:19; Joel 3:12, 14) Na Armagedon i olsem “graun bilong Israel” taim King Gok i kam pait long en na Jehova i bagarapim ol ami bilong dispela Gok bilong Magok. Na Armagedon i olsem “graun i stap namel long nambis bilong biksolwara Mediterenian na dispela maunten i nambawan tru, em maunten bilong God,” na “long dispela taim namba wan ensel Maikel bai i kamap” na em bai bagarapim king bilong hap bilong not “na i no gat wanpela bai i helpim em.”—Esekiel 38:16-18, 22, 23; Daniel 11:45–12:1.
33 Taim ol tok gris bilong Satan na lain bilong em i grisim ol lain man na olgeta i birua long God, em nau, long dispela taim namba 7 ensel bai kapsaitim dis bilong em i gat belhat bilong God i stap long en.
“Em i Pinis Nau”
34. Namba 7 ensel i kapsaitim belhat bilong God i go long wanem samting? “Insait long haus bilong God, maus bilong wanpela man i kamap long sia king bilong God, na i singaut strong” na i tok wanem?
34 “Na namba 7 ensel i kapsaitim dis bilong en long skai. Na insait long haus bilong God, maus bilong wanpela man i kamap long sia king bilong God, na i singaut strong olsem, ‘Em i pinis nau.’ ”—KTH 16:17.
35. (a) Wanem dispela “skai” em Kamapim Tok Hait 16:17 i kolim? (b) Taim ensel i kapsaitim dis bilong em long “skai” em i tokaut long wanem samting?
35 “Skai,” o win, em laspela samting bilong kisim “belhat bilong God.” Tasol dispela i no skai o win tru, nogat. Jehova i no belhat long skai, o win, olsem em i no belhat long graun na solwara na wara na san tru. “Skai” hia em dispela “skai,” o win, em Pol i bin stori long en taim em i kolim Satan olsem “hetman i bosim strong bilong win.” (Efesus 2:2, NW ) Dispela “win” i olsem win nogut bilong Satan em ol man bilong graun i save pulim, na dispela win em i makim tingting na pasin bilong ol man bilong graun, em tingting na pasin nogut Satan i as bilong en na i stap long olgeta hap, tasol insait long oganaisesen bilong Jehova, nogat. Olsem na taim namba 7 ensel i kapsaitim dis bilong em long dispela “skai,” o win, em i tokaut long belhat bilong God bai painim Satan na oganaisesen bilong em na olgeta samting i save kirapim ol man long wok wantaim Satan long biruaim wok king bilong Jehova.
36. (a) Dispela 7-pela samting nogut tru i makim wanem samting? (b) Wanem insait bilong dispela tok bilong Jehova: “Em i pinis nau”?
36 Dispela namba 7 samting nogut tru, na ol narapela 6-pela tu, em ol strafe Jehova bai givim long Satan na ol lain bilong Satan. Dispela 7-pela samting nogut i tokaut olsem Satan na lain bilong em bai kisim bagarap. Taim ensel i kapsaitim pinis laspela dis, Jehova yet i tok: “Em i pinis nau.” I olsem i no gat tok moa—ol 7-pela ensel i autim pinis olgeta tok, na em tasol. Taim ol i autim pinis inap long laik bilong Jehova, em bai kirap mekim ol samting em ol dispela 7-pela samting nogut tru i makim.
37. Jon i stori olsem wanem long ol samting i kamap bihain long taim ensel i kapsaitim namba 7 dis i gat belhat bilong God i stap insait long en?
37 Na Jon i tok moa olsem: “Na lait bilong klaut i sut i go nabaut na bikpela nois i kamap na klaut i pairap na bikpela guria i kamap. Dispela guria em i bikpela tru, na long olgeta taim ol manmeri i stap long graun, i no gat kain bikpela guria olsem i bin kamap bipo. Orait bikpela taun Babilon em i bruk tripela hap, na ol taun bilong olgeta lain man ol i bagarap olgeta. God i tingim pasin bilong bikpela taun Babilon, na em i mekim Babilon i dring long kap wain bilong em, em dispela wain bilong bikpela belhat tru bilong God. Na olgeta ailan ol i ranawe i go pinis, na i no gat wanpela maunten moa i stap. Na bikpela ren ais i kam daun. Olgeta hap ais wan wan i gat hevi inap [20] kilogram samting. Dispela ren ais i kam long skai na i pundaun antap long ol man na bagarapim ol nogut tru. Olsem na ol i tok nogut long God i salim dispela ais i kam bagarapim ol.”—KTH 16:18-21.
38. (a) “Guria em i bikpela tru” i makim wanem samting? (b) “Bikpela taun Babilon em i bruk tripela hap,” dispela i makim wanem samting? (c) “Olgeta ailan ol i ranawe i go pinis, na i no gat wanpela maunten moa i stap,” dispela i makim wanem samting? (d) “Bikpela ren ais i kam daun,” dispela i makim wanem samting?
38 Jon i tok, “lait bilong klaut i sut i go nabaut na bikpela nois i kamap na klaut i pairap”—dispela i makim taim Jehova bai kirap mekim tru ol samting long ol man olsem em i makim pinis. (Lukim Kamapim Tok Hait 4:5; 8:5.) “Guria em i bikpela tru” em i makim olsem ol man bai seksek na guria nogut tru na ol bai pret moa yet, winim ol narapela taim bipo. (Lukim Aisaia 13:13; Joel 3:16.) Dispela bikpela guria bai mekim “bikpela taun Babilon em i bruk tripela hap,” na dispela i makim olsem Bikpela Babilon bai bagarap olgeta na i pinis. Na tu, “ol taun bilong olgeta lain man” bai bagarap. “Olgeta ailan ol i ranawe i go pinis, na i no gat wanpela maunten moa i stap,” na dispela i makim ol dispela oganaisesen na skul na ol bikpela kampani samting bilong graun ol bai pinis. Long ai bilong ol man ol dispela samting i strong olsem wanpela maunten na i bilong i stap oltaim, tasol nogat. Na “bikpela ren ais i kam daun,” na olgeta wan wan i gat hevi inap 20 kilogram samting, na i winim ren ais i bin bagarapim ol Isip taim namba 7 samting nogut i bin painim ol. Ol dispela bikpela ren ais bai givim bikpela pen tru long ol man. (Kisim Bek 9:22-26) Dispela ren ais i makim strongpela tok nogut tru bilong Jehova, em i kolim ol bikpela strafe bai painim ol man, na taim em i kamapim ol dispela strongpela tok nogut tru, yumi ken save dispela strafe i laik kam nau, na pinis tru i laik kamap! Na ating Jehova bai salim ren ais tru i kam daun long dispela taim tu bilong bagarapim ol samting.—Jop 38:22, 23.
39. Maski 7-pela samting nogut tru i painim ol man, klostu olgeta bai mekim wanem?
39 Olsem na stretpela kot bilong Jehova bai bungim ol lain bilong Satan na ol samting Satan i bin kamapim long graun. Tasol klostu olgeta man bai sakim yet Jehova na ol bai tok bilas long em, i go inap long ol i bagarap. Olsem king bilong Isip i bin mekim, ol tu bai bikhet long Jehova, maski ol dispela “samting nogut tru” i wok long kisim ol; na taim namba 7 samting nogut i bungim ol, ol i no ken senisim tingting tu—ol bai stap olsem yet na kisim bagarap. (Kisim Bek 11:9, 10) Taim ol i laik bagarap, ol i no inap tanim bel. Ol bai wok yet long tok nogut long God. Tasol em i tok: “Bai ol i save gut olsem, mi yet mi [Jehova].” (Esekiel 38:23) Ol i mas save, Nambawan Strongpela God Jehova em i King.
[Ol Futnot]
a Lukim Stat 4:10; 31:44-53; Hibru 12:24; em ol samting i no save toktok, tasol i olsem ol i tokaut long sampela samting.
b Lukim tu Jop 1:6, 12; 2:1, 2; Matyu 4:8-10; 13:19; Luk 8:12; Jon 8:44; 12:31; 14:30; Hibru 2:14; 1 Pita 5:8.
[Blok long pes 221]
“Antap Long Graun”
Lain em Jon i piksa bilong ol, ol i bin tokaut long belhat bilong God long “graun” na ol i mekim tok olsem:
“Inap planti handet yia ol gavman i bin traim stretim ol hevi, tasol ol i no inap. Ol bikman bilong gavman na ol saveman bilong mani i bin wok long painim rot bilong stretim ol hevi, tasol ol i save ol i no inap mekim wanpela samting bilong stretim.”—Millions Now Living Will Never Die, 1920, pes 61.
“I no gat wanpela gavman long graun long nau em inapim laik bilong planti man. Na planti gavman i gat wanpela man tasol i stap bos. Na klostu olgeta kantri i sot olgeta long mani.”—A Desirable Government, 1924, pes 5.
“Dispela olpela pasin bilong graun i mas pinis . . . long dispela rot tasol ol pasin nogut bai pinis olgeta . . . na bai gutaim na stretpela pasin i ken kamap.”—“Dispela Gutpela Tok Bilong Kingdom,” 1962, pes 25.
“Ol manmeri bilong dispela graun i mekim planti rong na pasin i no stret na ol i bikhet tru long God na long ol samting em i laik mekim. . . . Ol i no inap stretim dispela pasin. Olsem na em i mas pinis!”—Wastaua, Oktoba 1, 1982, pes 6.
[Blok long pes 223]
“Antap Long Solwara”
Em hia sampela tok dispela lain em Jon i piksa bilong ol, ol i bin mekim taim ol i tokaut long belhat bilong God bai painim ol bikhetman ol i olsem ol si long “solwara” na bel bilong ol i stap longwe long Jehova:
“Ol samting i bin kamap bipo na i kam inap nau i kamapim klia olsem: Long olgeta kantri i gat kros i stap namel long ol maniman na rabisman. . . . Olsem na planti pait i bin kamap na i givim bikpela pen na hevi long ol man, na blut bilong planti man i kapsait.”—Government, 1928, pes 244.
Long nupela taim “dispela ‘solwara’ bai pinis, em ol bikhetman i givim baksait long God na ol i no sindaun gut; wel animal i bin kamap namel long dispela ‘solwara’ bilong mekim wok bilong Satan, na em tu bai pinis.”—Wastaua (tok Inglis), Septemba 15, 1967, pes 567.
“Ol man bilong dispela graun ol i gat . . . sik bilong spirit. Baibel i tok ol bai bagarap. Yumi no inap helpim ol.”—Bel Isi na Gutpela Sindaun—Bai Kamap Olsem Wanem?, 1975, pes 131.
[Blok long pes 224]
“Long Ol Bikpela Wara na Ol Hul Wara”
Namba 3 samting nogut em ol tokaut kain olsem i stap daunbilo hia na i kamapim long ples klia rong bilong “ol bikpela wara na ol hul wara”:
“Ol pris pasto i tok ol i lainim ol man long tok bilong [Krais], tasol ol i orait long ol lain man i pait na ol i tok ol dispela pait i samting holi. Ol i amamas long piksa bilong ol bai stap wantaim piksa bilong ol kilman i gat nem insait long ol pait.”—Wastaua (tok Inglis), Septemba 15, 1924, pes 275.
“Ol man i bilipim wanpela bikpela tok giaman olsem: Ol man i gat tewel, na taim man i dai tewel bilong em i stap yet. Dispela bilip i as bilong ol marila na posin na papait samting.”—What Do the Scriptures Say About “Survival After Death?,” 1955, pes 51.
“Ol tok bilong ol saveman bilong graun i no bin givim gutpela ‘wara,’ olsem gutpela tingting long ol man bilong strongim ol . . . Ol dispela wara i bin kirapim ol man long brukim lo bilong God long ol samting bilong blut na long biruaim ol man bilong narapela lotu.”—Wanpela tokaut ol i bin mekim long “Gutnius Bilong i Stap Oltaim” Kibung Intenesenel, 1963.
“Ol man yet i no inap helpim ol man long rot bilong saiens na bai ol i ken abrusim bagarap, nogat. Ol bai bringim ol man long rot bilong bagarap. . . . Ol saveman bilong graun i no inap senisim tingting bilong ol man. . . . I no inap ol i kamapim wanpela lain polis . . . na bai ol i ken lukautim yumi na yumi ken sindaun gut na i stap bel isi.”—Saving the Human Race—In the Kingdom Way, 1970, pes 5.
[Blok long pes 225]
“Antap Long San”
“San” i makim ol bikpela bos bilong gavman, ol i bin “kukim” ol man long de bilong Bikpela, na lain em Jon i piksa bilong ol, ol i tokaut long ol samting i kamap, olsem:
“Hitler na Mussolini i hatpela bos na ol i inap pinisim gutaim long olgeta hap, na Misin Katolik i helpim ol long bagarapim sindaun bilong ol man.”—Fascism or Freedom, 1939, pes 12.
“Long ol taim bipo ol gavman i gat wanpela man tasol i stap bos ol i gat tingting olsem: Ol i mas bosim strong ol man, na sapos ol i no inap, ol i mas bagarapim ol! Tasol nau God i putim King Krais Jisas bilong bosim graun, na ol man i no laik bihainim tok bilong em ol i mas kisim bagarap.”—When All Nations Unite Under God’s Kingdom, 1961, pes 23.
“Long 1945 i kam inap nau winim 25 milion man i bin dai long 150 pait i bin kamap.”—Wastaua (tok Inglis), Janueri 15, 1980, pes 6.
“Ol lain man . . . i no tingim ol narapela lain o sori long ol; ol i no bihainim ol lo bilong helpim olgeta lain wantaim. Bilong mekim ol samting ol i laik mekim, sampela lain i ting i no gat rong long ol i kilim i dai planti man wantaim o kilim i dai ol bikman bilong gavman, o stilim balus, o tromoi bom na kilim i dai ol man . . . Yu ting . . . hamas yia o mun moa na ol dispela longlong pasin i no ken kirapim ol long pait?”—Wastaua, Septemba 1, 1985, pes 9.
[Blok long pes 227]
“Antap Long Sia King Bilong Wel Animal”
Ol Witnes Bilong Jehova i bin kamapim long ples klia sia king bilong wel animal na ol i tokaut long tingting bilong Jehova olsem em i nolaik tru long en, na ol i tok olsem:
“Ol spirit nogut i bosim tingting bilong ol bikman bilong gavman, na ol dispela spirit nogut i subim ol i go long rot bilong kisim bagarap long bikpela pait bilong Armagedon.”—After Armageddon—God’s New World, 1953, pes 8.
“Satan i givim strong na namba na sia king long wel animal, em ol wok politik bilong ol man, olsem na em i mas pas long Satan na bihainim laik bilong em.”—After Armageddon—God’s New World, 1953, pes 15.
“Ol lain bilong dispela graun ol i stap aninit long Satan, em Nambawan Birua bilong God.”—Tokaut ol i bin mekim long “God i Win” Kibung Intenesenel, 1973.
[Blok long pes 229]
“Wara Em i Drai Olgeta”
Long nau ol man i no helpim tumas ol lotu bilong Bikpela Babilon, na dispela i kamapim klia olsem bihain “ol king i kam long hap [bilong] sankamap” ol bai kirap biruaim ol dispela lotu na bagarapim ol.
‘Long Tailan 75 pesen bilong ol man i stap long taun ol i no go lotu long haus lotu Buda na harim tok bilong lotu, na 50 pesen bilong ol man bilong ol liklik ples ol tu i no go long lotu.’—Bangkok Post, Septemba 7, 1987, pes 4.
‘Long nau [long Saina] lotu Dao i no gat strong moa long pulim ol man olsem bipo. Ol pris i no inap wokim moa ol trik na majik olsem bipo ol i bin mekim bilong pulim planti man, na nau i no gat planti man i laik mekim wok pris, olsem na lotu Dao i laik dai.’—The Atlanta Journal and Constitution, Septemba 12, 1982, pes 36-A.
‘Japan i gat planti misineri bilong ol narapela kantri, inap 5,200, tasol i no 1 pesen bilong ol Japan ol i kamap Kristen. Wanpela pris Fransiskan i bin stap long Japan long 1950 na i kam inap nau, na em i ting taim bilong ol misineri i mekim wok long Japan, em dispela taim i pinis.’—The Wall Street Journal, Julai 9, 1986, pes 1.
‘Long Inglan, inap 30 yia bipo i gat 16,000 haus lotu Angliken, tasol nau i gat 14,000 tasol i stap; ol narapela 2,000 haus lotu ol i pasim pinis, long wanem ol i stap nating na i no gat wok bilong ol. Ol i tok, Inglan em kantri Kristen, tasol long nau i no planti man i go lotu. Bisop Durham i tok, nau yumi no inap tok, Inglan i kantri Kristen.’—The New York Times, Me 11, 1987, pes A4.
‘Lain bilong Haus Palamen (bilong Grik) i bin tok pait planti aua, na nau ol i orait long gavman Soselis i kisim planti bisnis bilong Lotu Grik Otodoks. Na sampela ol man i no bilong dispela lotu, em gavman i makim ol bilong bosim ol kaunsil na komiti bilong lotu i save lukautim ol bikpela bisnis bilong lotu, olsem ol hotel, na ol ples bilong baim ston mabol long ol man, na ol haus ofis.’—The New York Times, Epril 4, 1987, pes 3.
[Ol Piksa long pes 222]
Fopela dis bilong paslain ol i gat belhat bilong God long en i mekim wankain samting nogut long ol man olsem krai bilong 4-pela biugel bilong paslain i mekim
[Piksa long pes 226]
Namba 5 dis i kamapim long ples klia olsem sia king bilong wel animal i makim strong em Satan i givim long dispela wel animal
[Ol Piksa long pes 231]
Tok gris bilong ol spirit nogut i bringim ol bikman bilong graun i kam bung long Armagedon na Jehova bai strafim ol olsem kot bilong em i bin makim
[Piksa long pes 233]
Strafe bilong stretpela kot bilong Jehova bai painim ol man em “skai,” o win, bilong Satan i bin paulim ol