Pinis Bai Kamap Olsem Wanem?

 1. Wanem samting bai helpim yumi long was i stap na karim ol hevi?

KLOSTU nau ol samting bilong kirap nogut long en bai kamap long dispela graun. Ol tok profet bilong Baibel i soim olsem dispela tok em i tru. Olsem na yumi mas was i stap. Wanem samting bai helpim yumi long mekim olsem? Pol i tokim yumi olsem yumi no ken “lukluk long ol samting yumi inap lukim long ai, nogat.” Yumi mas “lukluk long ol samting yumi no inap lukim long ai.” Yumi no ken lusim tingting olsem Jehova bai givim yumi laip oltaim, olsem laip long heven o laip long graun. Pol i raitim ol dispela tok long ol Kristen long taim bilong en. Em i laik kirapim ol long tingting strong long prais ol bai kisim sapos ol i stap gut long God. Pasin bilong tingim dispela prais bai helpim ol long karim ol hevi na sanap strong taim ol man i mekim nogut long ol.—2 Kor. 4:8, 9, 16-18; 5:7.

 2. (a) Yumi mas mekim wanem na bai hop bilong yumi i stap strong? (b) Bai yumi stori long wanem samting long dispela stadi na long stadi i kamap bihain long dispela?

² Tok bilong Pol i lainim yumi long wanpela bikpela samting: Sapos yumi laik bai hop bilong yumi i stap strong, orait yumi no ken tingting tasol long ol samting yumi inap lukim long nau. Yumi mas tingting tu long ol bikpela samting em yumi no lukim i kamap yet. (Hib. 11:1; 12:1, 2) Long dispela stadi na stadi i kamap bihain long dispela, yumi bai stori long 10-pela samting em ol bai kamap paslain long yumi kisim laip oltaim.

 3. (a) Wanem samting bai kamap bihain olsem 1 Tesalonaika 5:2, 3 i stori long en? (b) Ol hetman bilong gavman bai mekim wanem? Ating wanem lain bai mekim wankain samting?

³ Long pas Pol i raitim long ol Tesalonaika em i stori long wanpela bilong ol dispela samting em yumi no lukim yet. (Ritim 1 Tesalonaika 5:2, 3.) Long pas, Pol i stori long “de bilong Jehova.” Dispela de bai kirap taim lotu giaman i kisim bagarap na em bai pinis long taim bilong Armagedon. Paslain stret long de bilong Jehova i kirap, ol hetman bilong graun bai tok: “Nau em i taim bilong bel isi na gutpela sindaun!” Taim ol i tok olsem, dispela inap makim wanpela samting i kamap o em inap makim planti samting i kamap klostu klostu. Ating ol gavman bai ting olsem i no longtaim na ol bai pinisim sampela bikpela hevi bilong ol. Ol hetman bilong lotu bai mekim wanem? Ol i insait long ol samting bilong dispela graun. Olsem na ating ol bai bungim maus wantaim ol hetman bilong politik na tok: “Nau em i taim bilong bel isi na gutpela sindaun!” (Rev. 17:1, 2) Taim ol i mekim olsem, ol hetman bilong lotu bai bihainim wankain pasin olsem ol giaman profet bilong Juda bilong bipo, ol i bin tok: “Yupela i no ken wari. Yumi stap gut.” Tasol Jehova i tok ol i no stap gut.—Jer. 6:14; 23:16, 17.

 4. Yumi kliagut long wanem samting em planti man i no save long en?

⁴ Maski husat i tok “Nau em i taim bilong bel isi na gutpela sindaun!” dispela tokaut i makim kirap bilong de bilong Jehova. Olsem na Pol inap tok: “Ol brata, yupela i no stap long tudak na bai yupela i kirap nogut long dispela de, olsem ol stilman i save kirap nogut long tulait i bruk. Yupela olgeta i pikinini bilong lait.” (1 Tes. 5:4, 5) Yumi kliagut long tok bilong Baibel long ol samting i wok long kamap long nau, tasol planti man i no save long en. Dispela tok profet long “bel isi na gutpela sindaun!” bai kamap tru olsem wanem? Yumi mas wet na lukim. Olsem na yumi mas strong long “was i stap na holim stretpela tingting.”—1 Tes. 5:6; Sef. 3:8.

 5. (a) Taim bilong “traipela hevi tru” bai kirap olsem wanem? (b) Husat i stap olsem “kwin” na em i ting olsem i no gat wanpela samting nogut bai kamap long em?

⁵ Wanem samting bai kamap bihain long dispela? Pol i tok: “Taim ol manmeri i tok olsem: ‘Nau em i taim bilong bel isi na gutpela sindaun!’ orait bagarap bai kamap long ol wantu tasol.” Dispela bagarap bai stat taim wanpela lain i kirapim pait long olgeta lotu giaman. Baibel i kolim lotu giaman olsem “Bikpela Babilon,” o “pamukmeri.” (Rev. 17:5, 6, 15) Taim dispela pait i kamap long olgeta lotu giaman, em Kristendom tu i insait long en, dispela i kirapim taim bilong “traipela hevi tru.” (Mat. 24:21; 2 Tes. 2:8) Planti manmeri bai kirap nogut taim dispela samting i kamap. Bilong wanem i olsem? Long wanem, i kam inap long dispela taim, pamukmeri i ting olsem em i stap “kwin” na “i no gat wanpela taim bai [em i] krai sori.” Em i ting olsem i no gat wanpela samting nogut bai kamap long em. Tasol wantu em bai painimaut olsem em i bin popaia. Kwiktaim em bai kisim bagarap, olsem “insait long wanpela de tasol.”—Rev. 18:7, 8.

 6. Husat bai bagarapim lotu giaman?

⁶ Baibel i tok wanpela “wel animal” i gat “10-pela kom” bai birua long pamukmeri. Taim yumi stadi long buk Revelesen, yumi kisim save olsem dispela wel animal i makim Yunaitet Nesen. Dispela “10-pela kom” i makim ol gavman husat i sapotim dispela “retpela wel animal.”a (Rev. 17:3, 5, 11, 12) Bagarap i painim pamukmeri bai bikpela olsem wanem? Ol gavman bilong Yunaitet Nesen bai kisim olgeta mani kago bilong en, kamapim ol pasin nogut bilong en, kaikai mit bilong en, na “kukim em olgeta long paia.” Olsem na lotu giaman bai pinis inap oltaim oltaim.—Ritim Revelesen 17:16.

 7. Olsem wanem “wel animal” bai kirap birua long pamukmeri?

⁷ Tok profet bilong Baibel i stori tu long olsem wanem dispela bagarap bai kirap. Long sampela rot, Jehova bai givim tingting long ol bikman bilong politik “long mekim samting em yet i tingting long en,” em bilong bagarapim pamukmeri olgeta. (Rev. 17:17) Lotu i as bilong planti woa na i save kamapim planti hevi. Olsem na ating ol gavman bai ting olsem sapos ol i bagarapim pamukmeri, dispela bai helpim ol. Taim ol bikman bilong politik i biruaim pamukmeri, ol bai ting olsem ol i bihainim laik bilong ol yet. Tasol nogat, God i yusim ol bilong bagarapim olgeta lotu giaman. Olsem na tupela hap bilong dispela graun em Satan i bosim bai kirap birua long narapela narapela, na Satan bai i no inap mekim wanpela samting bilong stopim.—Mat. 12:25, 26.

 8. Dispela pait bilong ‘Gok bilong graun Magok’ em wanem samting?

⁸ Bihain long lotu giaman i bagarap, ol wokboi bilong God bai i “stap gut” na i olsem “ol i no gat banis i raunim ol.” (Ese. 38:11, 14) Wanem samting bai kamap long ol dispela manmeri husat i lotuim Jehova na i luk olsem ol i no gat wanpela samting i lukautim ol? I luk olsem “bikpela lain ami” bai kam pait long ol. Baibel i kolim dispela samting i kamap olsem pait bilong ‘Gok bilong graun Magok.’ (Ritim Esekiel 38:2, 15, 16.) Yumi mas i gat wanem tingting long dispela pait?

 9. (a) Wanem nambawan bikpela samting long tingting bilong ol Kristen? (b) Yumi mas mekim wanem bilong strongim bilip bilong yumi?

⁹ Yumi save olsem ol birua bai pait long lain bilong God, tasol dispela i no mekim na yumi tingting planti. Yumi laik bai Jehova i kisim bek yumi, tasol nambawan samting long tingting bilong yumi em wok bilong mekim holi nem bilong Jehova na kamapim klia olsem em tasol i nambawan bos. Long Buk Esekiel, winim 60 taim Jehova i bin tok: “Yupela bai save gut olsem, mi yet mi Jehova.” (Ese. 6:7, NW) Yumi laik tru long lukim olsem wanem dispela hap bilong tok profet bilong Esekiel bai kamap tru. Na yumi bilip tru olsem “Jehova i save long rot bilong kisim bek ol man i save givim bel tru long Em taim traim i painim ol.” (2 Pita 2:9) Long seim taim, yumi laik mekim olgeta samting yumi inap mekim bilong strongim bilip bilong yumi na bai yumi inap i stap gut long Jehova maski wanem hevi i painim yumi. Yumi mas mekim wanem? Yumi mas beten, stadi long Baibel na tingim tingim long bel ol tok yumi stadi long en, na tokim ol arapela long gutnius bilong Kingdom. Dispela bai mekim hop bilong yumi long laip oltaim i stap strong. Dispela hop bai stap olsem “anka” i helpim yumi long i stap gut long God.—Hib. 6:19; Sng. 25:21.

10, 11. Armagedon bai kirap olsem wanem? Wanem samting bai kamap long dispela taim?

¹⁰ Wanem samting bai kamap taim lain bilong Satan i kirap pait long ol wokboi bilong Jehova na ol man bai kirap nogut long en? Jehova bai yusim Jisas na ol ami bilong heven bilong helpim ol manmeri bilong God. (Rev. 19:11-16) Dispela em pait bilong “bikpela de bilong God i Gat Olgeta Strong,” em Baibel i kolim Armagedon.—Rev. 16:14, 16.

¹¹ Jehova i stori long dispela pait em bai mekim wantaim Gok, em i tok: “Bai mi mekim bikpela pait i kamap long ples maunten bilong Israel, bilong bagarapim King Gok. Ol soldia bilong en bai i pait long ol yet na kilim ol yet i dai.” Ol man long sait bilong Satan bai paul na pret wantaim, na ol bai kirap pait namel long ol yet na narapela bai kilim i dai narapela. Jehova i tok: “Bai mi kapsaitim bikpela ren na ren ais na ol hatpela ston i gat paia, na ol dispela samting bai i pundaun antap long [Gok] na long ol soldia i bin kam wantaim em.” (Ese. 38:21, 22) Wanem samting bai kamap taim God i mekim olsem?

12. Olgeta lain pipol i mas save gut long wanem samting?

¹² Olgeta lain pipol i mas luksave olsem ol i kisim bagarap bikos Jehova yet i tok ol i mas bagarap. Ating long dispela taim ol man long sait bilong Satan bai mekim wankain tok olsem ol soldia bilong Isip husat i bin ranim ol Israel long solwara Retsi. Ol i bin tok: “Jehova i helpim ol Israel na i pait long yumi”! (Kis. 14:25, NW) Olgeta lain pipol bai save gut olsem Jehova em i husat. (Ritim Esekiel 38:23.) Ol dispela samting bai kirap kamap long wanem taim?

13. Yumi gat wanem save long dispela namba 5 hap bilong imis em Daniel i stori long en?

¹³ Wanpela tok profet long buk Daniel i helpim yumi long kliagut long dispela haptaim yumi stap long en. Daniel i stori long wanpela imis i luk olsem wanpela man na ol i bin wokim long kain kain metal. (Dan. 2:28, 31-33) Imis i makim ol strongpela gavman bilong bipo na bilong nau em ol i bin mekim sampela bikpela samting long ol manmeri bilong God. Olsem Gavman Babilon, Midia-Persia, Grik, na Rom. Na laspela strongpela gavman i stap long taim bilong yumi. Long tok profet bilong Daniel, yumi kisim save olsem 2-pela fut na ol tou bilong dispela imis i makim dispela laspela strongpela gavman. Long taim bilong Wol Woa 1, Amerika na Briten i kirap wok bung wantaim. So namba 5 hap bilong imis em Daniel i stori long en i makim Gavman Briten-Amerika. Tupela fut em laspela hap bilong imis. Dispela i soim olsem i no gat narapela strongpela gavman bilong ol man bai kamap bihain long en. Tupela fut na ol tou ol i wokim long ain na graun. Dispela i makim olsem Gavman Briten-Amerika i gat hap strong tasol.

14. Wanem strongpela gavman bai mekim yet wok bos taim Armagedon i kam?

¹⁴ Dispela tok profet i stori long wanpela traipela ston i bruk nating long wanpela maunten. Dispela ston i makim Kingdom Bilong God na em i bruk long maunten long 1914. Maunten i makim wok bos bilong Jehova, olsem rait bilong em long bosim ol manmeri. Klostu nau dispela ston bai paitim imis. Long Armagedon, 2-pela fut na olgeta hap bilong imis bai bagarap. (Ritim Daniel 2:44, 45.) Olsem na Gavman Briten-Amerika bai mekim yet wok bos taim Armagedon i kam. Bai yumi amamas tru long lukim truim bilong dispela tok profet!b Tasol Jehova bai mekim wanem long Satan?

15. Bihain long Armagedon, wanem samting bai kamap long Satan na ol ensel bilong en?

¹⁵ Pastaim, Satan bai lukim oganaisesen bilong em long graun i bagarap olgeta. Bihain hevi bai painim Satan yet. Aposel Jon i tokim yumi long dispela samting. (Ritim Revelesen 20:1-3.) Jisas Krais, em dispela ‘ensel i lusim heven na i kam daun, na i holim ki bilong hul i no gat as.’ Em bai tromoi Satan na ol ensel bilong en i go daun long hul i no gat as na ol bai kalabus long dispela hap inap 1,000 yia. (Luk 8:30, 31; 1 Jon 3:8) Dispela em kirap bilong wok bilong krungutim het bilong snek.c—Stt. 3:15.

16. Taim Satan i stap long “hul i no gat as,” em bai i no inap mekim wanem samting moa?

¹⁶ Dispela “hul i no gat as” we ol i tromoi Satan na ol ensel bilong en i makim wanem? Em i makim wanpela ples we Jehova na ensel i holim “ki bilong hul i no gat as,” tupela tasol i ken go long en. Satan bai kalabus long dispela hap we em i “no ken giamanim moa olgeta lain manmeri.” Baibel i tok Satan i “olsem wanpela laion i singaut strong.” Tasol taim em i stap long hul i no gat as, em bai stap olsem mauspas.—1 Pita 5:8.

17, 18. (a) Yumi stori pinis long wanem ol samting i no kamap yet? (b) Taim ol dispela samting i kamap pinis orait wanem samting bai kirap?

¹⁷ Klostu nau ol bikpela samting bai kamap em ol man bai kirap nogut tru long en. Yumi gat bikpela laik long lukim olsem wanem dispela singaut bilong “bel isi na gutpela sindaun!” bai kamap. Bihain long dispela bai yumi lukim Bikpela Babilon i bagarap, Gok bilong graun Magok i pait long lain bilong God, na pait bilong Armagedon. Satan na ol ensel bilong en bai kalabus long hul i no gat as. Taim ol dispela samting i kamap pinis, bai i no gat pasin nogut i stap moa. Laip bilong yumi long Taim Bilong Wan Tausen Yia Bilong Krais i Stap King bai i narapela kain olgeta. Long dispela taim bai yumi “amamas i stap.”—Sng. 37:10, 11.

¹⁸ Long dispela stadi yumi kisim save pinis long 5-pela “samting yumi no inap lukim long ai,” em ol samting i no kamap yet. Na tu, i gat sampela arapela “samting yumi no inap lukim long ai” em yumi mas “lukluk long” en. Bai yumi stori long ol dispela samting long stadi i kamap bihain long dispela.