Pamukmeri Nogut−Pundaun Bilong Em

“Bikpela taun Babilon em i bagarap pinis! Yes em i bagarap pinis! Dispela taun Babilon tasol em i bin mekim olgeta lain manmeri ol i bihainim strongpela pasin pamuk bilong em. Dispela em i olsem em i givim strongpela wain long ol na ol i dringim.”−REVELESEN 14:8.

Dispela stori wantaim stori i kam bihain long en, tupela i hap bilong wanpela bikpela tok, nem bilong en “Taim i Laik Kamap Nau,” ol i bin kamapim long “Stretpela Pasin Bilong God” Kibung Distrik bilong ol Witnes Bilong Jehova long 1988.

 1. Husat dispela meri nogut? Bilong wanem yumi mas save long em?

DISPELA “pamukmeri” nogut−em i husat? Bilong wanem yumi mas stori long dispela meri? Planti buk na piksa wokabaut na televisen na video i save kamapim ol stori nogut bilong pamuk, na bilong wanem yumi mas stori long dispela meri? Tru, tasol dispela meri pamuk em i narapela kain. Em i meri tru bilong grisim na pulim ol man, na em i gat nem long mekim pasin pamuk, na em i kilim i dai planti planti man, winim ol narapela man long mekim olsem. Em i bin mekim pasin pamuk inap 4,000 yia! Yumi mas save long dispela meri na bai em i no ken giamanim o paulim yumi na mekim nogut long yumi. Long Revelesen 14:8 ensel bilong heven i kolim nem bilong dispela meri nogut olsem “Bikpela taun Babilon,” na ensel i tok em i pulim ol lain man long pamuk wantaim em. Em i meri nogut, tasol “taim i laik kamap nau, na ol dispela samting God i tok pinis long mekim, bai em i mekim,” olsem bagarapim dispela meri, na yumi amamas long dispela.−Revelesen 1:3.

₂ Dispela pamukmeri hia em i kisim nem bilong em long olpela taun Babilon bilong bipo, em lain bilong en i gat pasin antap na ol i hambak. Nimrot “em i strongpela man tru bilong painim abus” na em i no daun long Jehova, na em i bin wokim taun Babilon long Mesopotemia 4,000 yia bipo. Ol Babilon kirap long wokim wanpela haus taua bilong mekim lotu haiden long en, tasol Jehova i paulim tok ples bilong ol na nau ol i bruk na i go nabaut long olgeta hap bilong graun na ol i bringim lotu bilong ol i go wantaim, olsem na lotu bilong Babilon i kisim olgeta hap na i kamap bikpela. Olsem na nem bilong dispela meri i stret tru long em, olsem BIKPELA Babilon. (Jenesis 10:​8-10; 11:​1-9) Ol tok hait bilong olpela Babilon i stap long ol bilip na pasin bilong olgeta lotu bilong graun. (Revelesen 17:7) Long tok Hibru ol i bin kolim dispela taun olsem Bebel, na insait bilong dispela nem i olsem “Paul,” olsem na nem Babilon i stret long ol lotu giaman bilong nau ol i gat kain kain bilip i narapela narapela kain na i paulim nabaut ol man!

₃ Olpela Babilon i kamap strong gen, na em i daunim Asiria long yia 632 paslain long taim bilong Jisas, na em i kamap namba 3 bikpela gavman bilong ol dispela gavman em Baibel i stori long en. Tasol em i stap sotpela taim tasol−em i no winim 100 yia−na insait long dispela taim em i bin kalabusim lain bilong God, em ol Isrel, klostu inap 70 yia. Long dispela taim ol Isrel i bin i stap namel long wan tausen haus lotu bilong ol Babilon, na ol god triwan na ol spirit nogut olsem triwan bilong ol, na lotu bilong ol long lotuim mama na pikinini man bilong em, na pasin bilong ol long lukluk long ol sta bilong kisim save, na litimapim ol god giaman ol i tok ol i save stap oltaim. Olsem na Isrel i stap namel long as bilong ol lotu giaman, na long dispela taim, olsem long yia 539 paslain long taim bilong Jisas, taun Babilon i kisim bikpela bagarap. Tasol em i no pinis olgeta, long wanem, dispela lain i bin daunim em ol i larim em i stap olsem ples bilong ol bikpela lotu.

Bikpela Lotu Bilong Olgeta Hap

₄ Ol profet bilong Jehova i bin tok, Jehova bai strafim Babilon na rausim em olgeta olsem man i brumim pipia na olsem Jehova i bin daunim Sodom na Gomora. Olsem wanem? Jehova i bin mekim olsem o nogat? Em i bin mekim tru! Bihain olpela taun Babilon i kamap olsem pipia tasol na i no gat man i stap long en−ol snek na wel animal tasol i stap−olsem ol profet i tok pinis! (Aisaia 13:​9, 19-22; 14:23; Jeremaia 50:​35, 38-40) Tasol dispela narapela Babilon, em olgeta lotu giaman wantaim, nem bilong em Bikpela Babilon, em i no pinis. Em i stap inap nau na i stap yet, na em i lainim ol man long ol tok na bilip bilong olpela Babilon na em i mekim wankain pasin antap na pasin hambak bilong olpela Babilon. Em i namba wan rot bilong Seten long pasim tingting bilong ol man bambai ol i no inap save long ol samting Kingdom bilong Jehova bai mekim.−2 Korin 4:​3, 4.

₅ Inap 500 yia samting paslain long Krais, gavman bilong Babilon i kamap strong tru, na long dispela taim lotu Hindu na Buda na Konfyusias na Sinto i kamap strong. Tasol Seten i no inap mekim na bai olgeta man long olgeta hap bilong graun i insait long lotu giaman, long wanem, hap lain bilong ol witnes bilong Jehova bilong bipo ol i lusim kalabus long Babilon na ol i go bek long Jerusalem bilong kirapim gen lotu bilong Jehova. Na sampela bilong lain Juda i stap inap long taim Krais i kamap na ol i bungim em na ol i namba wan lain long kam insait long kongrigesen Kristen. Lotu giaman yet i kirapim ol man long kilim i dai pikinini bilong God, na lotu giaman i rot bilong Seten long biruaim lotu Kristen tru, olsem Jisas na ol aposel bilong em i toksave pinis long ol bai mekim.−Matyu 7:15; Aposel 20:​29, 30; 2 Pita 2:1.

₆ Bihain long taim Jerusalem i bagarap namba tu taim, olsem long yia 70 C.E., Seten i mekim wok long ol aposel giaman long bagarapim bilip bilong ol Kristen. Ol dispela aposel giaman i bungim bilip Kristen wantaim ol tok hait bilong Babilon na bilong ol Grik. Ol i kamapim bilip long god triwan, na dispela i senisim tok bilong Baibel i tok Jehova “em wanpela tasol.” (Diuteronomi 6:​4, NW; Mak 12:29; 1 Korin 8:​5, 6) Na ol i kamapim bilip olsem man i gat tewel i no save dai, em bilip bilong Pleto, em wanpela bikman haiden, na dispela bilip i pait wantaim gutpela tok bilong Baibel long ofa Krais i bin mekim na long man i dai pinis em bai kirap bek. Na nau ol i kamapim narapela bilip, ol i tok, tewel bilong man bai go long bikpaia, o wanpela paia i no bikpela olsem, na ol i kolim klinpaia. (Sam 89:48; Esikiel 18:​4, 20) Ol dispela tok i save nogutim nem bilong God na i save pretim ol man na bai ol i givim mani long ol dispela lotu. Na taim misin Katolik i bin wok long daunim ol narapela lotu, na taim ol lotu Talatala i wok long kamap, ol bikman bilong lotu ol i bagarapim planti planti man. Planti man i no laik bihainim bilip bilong Babilon em ol misin i subim ol long mekim; ol i laik bilip long tok i tru bilong Baibel tasol; olsem na ol pris na pasto bilong misin Katolik na misin Talatala ol i pasim ol dispela man long ol pos na ol i kukim ol long paia. Tasol yumi ken stori moa na bai yumi save, pasin pamuk bilong Bikpela Babilon i no kamapim bilip giaman tasol−em i mekim sampela rong i bikpela moa.

Taim Bilong Jehova long Skelim Em long Kot

₇ Olsem na i stret Jehova i mas skelim dispela pamukmeri long kot, na Jehova i mekim pinis dispela samting! (Hibru 10:30) Tasol paslain liklik long dispela taim, olsem long yia 1870 samting, Jehova i salim “man bilong bringim tok” bilong em−em wanpela liklik lain sumatin bilong Baibel−na ol i kamapim bek ol tok i tru bilong Baibel na kamapim long ples klia ol bilip giaman bilong ol lotu bilong dispela graun, em ol i bin kisim long Babilon. (Malakai 3:1 namba wan hap, NW ) Dispela “man bilong bringim tok” i wanbel wantaim tok profet bilong Revelesen 4:​11, i tok: “[Jehova], yu God bilong mipela. Yu inap tru long olgeta man i ken amamas long yu, na litimapim nem bilong yu, na i stap aninit long strong bilong yu. Long wanem yu bin wokim olgeta samting. Long laik bilong yu yet yu wokim na i kamap, na nau dispela olgeta samting i stap.” Na dispela “man bilong bringim tok” em i strong long tokim ol man olsem ofa bilong Jisas em i rot bilong God long kisim bek ol man. Pastaim God bai kisim bek “liklik lain” em ol bai stap king wantaim Jisas long Kingdom bilong em long heven, na bihain bai God i kisim bek planti handet milion manmeri ol bai stap oltaim long Paradais bai kamap long graun−planti bilong dispela lain em ol i dai pinis na bai ol i kirap bek. (Luk 12:32; 1 Jon 2:2; Aposel 24:15) Em i ol dispela bikpela tok i tru ol Sumatin Bilong Baibel i kamapim bek, na ol i daunim dispela tok giaman bilong helpaia, em ol lotu bilong Bikpela Babilon i skulim ol man long en−i olsem ol i kapsaitim wara na mekim dai paia bilong hel!ANSI:MEPS Footnote:33

₈ Inap 40 yia samting ol Sumatin Bilong Baibel i tokaut strong olsem Taim Bilong Ol Man Bilong Ol Arapela Lain bai pinis long yia 1914. Em nau, long dispela yia 1914 sampela bikpela samting tru i bin kamap long graun, na wanpela bikpela samting tru em Namba Wan Pait Bilong Olgeta Hap. Ol misin giaman ol i kolim Kristen ol i bikpela hap lain bilong Bikpela Babilon, na ol pris pasto bilong ol dispela misin i bin wok strong long pinisim ol dispela Sumatin Bilong Baibel, na ol i laik mekim olsem long rot bilong dispela namba wan pait. Orait, ol i mekim mekim na long 1918 gavman i sutim tok giaman long ol dispela Sumatin Bilong Baibel na i tok ol i biruaim gavman, olsem na ol i kalabusim 8-pela brata em ol i bosim wok bilong Sosaiti Was Taua. Tasol 9-pela mun bihain ol i lusim kalabus na kot i tokaut olsem ol i no gat rong. Wanpela bikpela jas bilong haus kot long Amerika, em Martin T. Manton, em i bin harim kot bilong ol dispela Sumatin Bilong Baibel na em i no orait long ol i baim kot−em i laik bai ol i stap kalabus. Orait, bihain Pop Pius Namba 11 i givim wanpela bikpela nem o namba long em. Tasol long 1939 Jas Manton i gat kot na em i kalabus inap tupela yia, na em i mas baim kot long bikpela mani. Bilong wanem em i kalabus? Long wanem, taim em i mekim wok jas, em i bin paulim kot inap 6-pela taim na ol man i bin baim em long bikpela mani tru inap K186,000, bilong helpim ol long winim kot!a

₉ Olsem yumi tok pinis, taim bilong bikpela traim na hevi i painim lain bilong Jehova long 1918. Sampela tok moa bilong profet Malakai i stori long samting i bin kamap Malakai 3:​1-3 (NW ) i tok: “Na wantu bai Bikpela tru [Jehova] em i kam long haus lotu bilong Em, em dispela man yupela i wok long painim em, na bai man bilong bringim tok bilong kontrak [bilong Ebraham] em i kam”−em Jisas. Yes, long dispela taim Jehova i kam wantaim Krais bilong skelim ol man long kot. Orait nau Jehova i mekim wanpela askim, olsem: “Tasol long de bilong em i kam, husat inap sanap strong? Taim em i kam, husat inap long sanap na winim dispela? Long wanem, bai em i . . . olsem man bilong kukim silva long paia na mekim i kamap klin, na i olsem marasin em ol man bilong wasim klos ol i save putim long klos bilong mekim i kamap klin.” Olsem 1 Pita 4:17 i makim, Jehova bai kirapim kot pastaim long ol lain i tok ol i “lain bilong em.” Olsem na nau Jehova i kirap long stretim ol Kristen tru na mekim ol i kamap olsem klin na gutpela bambai ol inap mekim wok bilong em.

“OL MANMERI BILONG MI . . . LUSIM DISPELA PLES”!

₁₀ Tasol olsem wanem long ol pris pasto bilong ol misin giaman ol i tok ol i Kristen? Ol i no tanim bel na lusim Bikpela Babilon, olsem na ol i no inap sanap strong long dispela taim bilong kot. Ol i lus long kot. Ol dispela misin i bin insait long namba wan pait na ol i gat asua long blut bilong planti milion man ol i bin bagarap long dispela pait, na ol i bin mekim nogut long ol Kristen tru. (Jeremaia 2:34) Ol i no amamas long Kingdom bilong Krais i kamap long heven. Nogat. Ol i wok long helpim ol man long kamapim Lig ov Nesen, na ol i tok ol lain politik i kamapim Kingdom bilong God long graun. Long 1919, samting i kamap ples klia olsem Jehova i skelim pinis long kot ol misin giaman ol i kolim Kristen, na ol narapela lotu giaman bilong graun. Em nau, Bikpela Babilon i pundaun pinis, na Jehova i makim em bilong bagarap olgeta! Olsem na olgeta man i laikim tumas tok i tru na stretpela pasin ol i mas kirap kwik na bihainim wanpela tok profet i stap long Jeremaia 51:45 (NW ) i tok: “Ol manmeri bilong mi, yupela i mas lusim dispela ples na ranawe, na bai belhat bilong Jehova i no ken painim yupela na yupela i no ken bagarap.”

₁₁ Bikpela Babilon i pundaun pinis! Tasol em i no bagarap yet. Dispela bikpela oganaisesen bilong ol lotu giaman bilong graun em i namba wan rot bilong Seten long giamanim ol manmeri bilong graun, na em i mas holim yet dispela wok inap liklik hap taim moa. Wanem samting bai painim em olsem kot bilong God i makim? Baibel i tokaut klia long dispela samting! Yumi ken opim Baibel bilong yumi long Revelesen 17:​1, 2. Wanpela ensel i givim tok long aposel Jon, na long rot bilong Jon ensel i givim dispela tok long ol man bilong nau em ol i wok long kisim save long tok profet; ensel i tok: “Yu kam! Dispela pamukmeri i sindaun antap long bikpela wara, em i laik kisim pe nogut bilong en. Mi laik soim dispela long yu. Ol king bilong graun ol i bin mekim planti pasin pamuk wantaim dispela meri. Na olgeta man bilong graun ol tu i bin mekim pasin pamuk wantaim em, na ol i kamap longlong, olsem man i spak.” Dispela “bikpela wara” i makim ol manmeri bilong dispela graun ol i no stap isi, na inap longtaim tru dispela pamukmeri i bosim ol na daunim ol. Na olsem dispela tok profet i tok, “olgeta man bilong graun” i “spak” long wain bilong dispela pamukmeri. Ol i kisim ol tok na bilip giaman bilong Bikpela Babilon na ol i bihainim pasin pamuk bilong em na ol pasin bilong dispela graun em yet i save bihainim−i olsem ol i dring strongpela wain na ol i spak.

₁₂ Jems 4:4 i tok: “Yupela i olsem manmeri i brukim marit. Sapos man i laikim pasin bilong graun, em i mekim pasin birua long God. Ating yupela i no save long dispela, a?” Ol lotu bilong nau ol i mekim ol samting bambai ol man bilong dispela graun i ken laikim ol, na ol misin ol i kolim Kristen ol i go pas long mekim dispela samting. Ol pris pasto bilong ol dispela misin ol i no autim gutpela tok bilong Kingdom bilong Jehova i laik i kam, na ol i no skulim ol man long ol lo bilong Baibel i tok man i no ken mekim pasin pamuk samting−ol i bihainim pasin bilong dispela graun na ol i larim lain bilong ol i mekim ol dispela kain pasin na ol i no gat tok long ol. Na sampela pris pasto tu i mekim pasin pamuk, tasol aposel Pol i bin mekim strongpela tok tru long dispela samting, em i tok: “Ol man i save mekim pasin nogut, bai ol i no kisim kingdom bilong God. Ating yupela i no save dispela? Nogut yupela i giamanim bel bilong yupela yet. Ol man i save mekim pasin pamuk, na ol man i save bihainim ol god giaman, na ol man i save bagarapim marit, na ol man i laikim pasin olsem meri, na ol man i save mekim pasin i gat sem wantaim ol arapela man, . . . bai ol i no kisim kingdom bilong God. Na bipo yupela sampela i stap kain man olsem. Tasol yupela i waswas pinis.”−1 Korin 6:​9-11.

“Tantanim Nabaut long Graun Malumalum”

₁₃ Tasol olsem wanem long ol pris pasto bilong ol misin long nau? Ol i “waswas pinis” na kamap klin pinis? Yumi ken tingim sampela samting i kamap long hap bilong Englan, bipo ol lotu Talatala i strong tru long dispela ples. Long Novemba 1987 praim minista bilong Englan i tok ol pasto i mas i go pas long mekim stretpela pasin na bai lain bilong ol i ken bihainim pasin bilong ol. Tasol long dispela taim wanpela pasto bilong misin Angliken i tok: “Ol man i slip wantaim man, i stret ol i ken inapim laik bilong bel olsem ol narapela man i save mekim, na yumi no ken tambuim ol; yumi mas wok long painim gutpela samting long dispela, na kirapim ol long i stap gut wantaim poroman bilong ol.” Wanpela nius bilong London i tok: “Long wanpela bikpela skul bilong misin Angliken bilong lainim ol man long kamap pasto, planti sumatin i mekim pasin sodom, olsem na narapela bikpela skul i stap klostu i tambuim ol sumatin bilong en long i go lukim ol sumatin long dispela skul.” Wanpela lain i skelim dispela pasin long hap bilong London na ol i ting, long olgeta 10-pela 10-pela pasto long wanpela provins, inap olsem 5-pela samting i gat laik long pasin sodom. Long wanpela kibung bilong lotu Angliken, klostu olgeta pasto i orait long wanpela tok bilong misin i tok, i gat rong long mekim pasin pamuk na pasin bilong bagarapim marit, tasol pasin bilong man i slip wantaim narapela man, dispela i no gat rong long en; long wanem dispela i no olsem maritpasin tru. Wanpela man bilong raitim nius i kirap nogut long dispela tok bilong misin, na em i tok, i gutpela sapos ol i senisim nem bilong Misin Angliken na kolim Sodom na Gomora. Na narapela nius bilong London i tok: ‘Ol man bilong Englan i tingting planti long dispela pasin bilong larim ol man i bihainim laik bilong bel bilong ol yet.’

₁₄ Tok bilong aposel Pita i sutim tru ol pris pasto i bin lusim tok bilong Baibel; Pita i tok: “Dispela pasin i kamap long ol, em i olsem wanpela trupela tok olsem, ‘Dok i go bek long traut bilong en.’ Na narapela tu i tok, ‘Pik i waswas pinis long wara, tasol em i go tantanim nabaut long graun malumalum.”−2 Pita 2:22.

₁₅ Long olgeta hap bilong graun ol man i lusim stretpela pasin bilong marit. Long sampela lain, ol i ting i no gat wok long ol man i mas marit tru, na ol man i marit pinis ol i ting i no gat rong long slip wantaim narapela i no meri o man tru bilong ol. Long nau planti man na meri ol i sindaun nating wantaim na ol i no marit tru; na ol manmeri i marit pinis, planti bilong ol i katim marit. Long hap bilong Amerika, winim wan milion ol i save katim marit long olgeta yia. Long Englan long 1965, inap 41,000 ol i katim marit bilong ol, tasol 20 yia bihain dispela namba i go bikpela tru, na inap 175,000 i katim marit. Long nau ol man na meri singel i laik sindaun nating wantaim na ol i no laik marit tru, na planti ol i save kisim ol narapela narapela poroman. Ol i save toktok planti long ol sik bilong pamuk na nupela sik AIDS tu i go bikpela, tasol ol i no laik lusim pasin pamuk na pasin sodom bilong ol−ol i tok i stret ol i ken mekim na ol man i no ken pasim ol. Na ol pris pasto bilong ol misin ol i no stretim lain bilong ol−ol i larim ol tasol. Olsem na ol tu i gat asua long ol samting nogut i kamap long dispela pasin nogut lain bilong ol i mekim.−Jeremaia 5:​29-31.

₁₆ Ol dispela pasin nogut na pasin bilong katim marit i kamap insait long olgeta lotu giaman bilong graun, ol dispela samting tu i kamapim long ples klia olsem Bikpela Babilon i pundaun pinis. God i skelim em pinis long kot na i makim em bilong kisim bagarap. Olsem na singaut bilong ensel long Revelesen 18:2 i stret tru, em i tok: “Bikpela taun Babilon em i bagarap pinis! Em i bagarap pinis! Nau em i kamap ples bilong ol spirit nogut ol i stap long en. Ol spirit nogut, na ol pisin doti na ol pisin nogut tru, ol tu i stap long olgeta man i laik abrusim bagarap taim pasin bilong dispela graun i pinis, kwiktaim ol i mas bihainim tok i stap long ves 4, i tok: “Ol manmeri bilong mi, yupela i mas lusim dispela ples na i kam ausait. Nogut yupela i poroman wantaim em long sin bilong en. Na nogut bai yupela i poroman wantaim em long kisim pe nogut bilong sin”! Tru tumas, sapos ol i laik abrusim bagarap long dispela taim bilong ‘bikpela hevi tru’ klostu nau i laik kamap, ol i mas lusim Bikpela Babilon. (Revelesen 7:14) Tasol ol i mas mekim sampela samting moa, na nau bai yumi stori long dispela!

[Futnot]

 2. Dispela meri i kisim we nem bilong em? Olsem wanem ol lotu giaman i bin kirap na i go kamap long olgeta hap?

 3. (a) Babilon i bin kalabusim lain bilong God inap hamas yia? Olsem na lain bilong God i stap namel long wanem samting? (b) Wanem taim Babilon i bin kisim bagarap? Bilong wanem em i no pinis olgeta long dispela taim?

 4. (a) Ol profet bilong Jehova i tok wanem long Babilon? Na wanem samting i bin painim taun Babilon? (b) Tasol wanem narapela Babilon i stap yet na i mekim nogut long ol man?

 5. (a) Wanem ol lotu i bin kamap strong taim Babilon i stap nambawan bikpela gavman long graun? Bilong wanem Seten i no inap mekim na bai olgeta man bilong graun i insait long lotu giaman? (b) Taim lotu Kristen i kirap, lotu giaman i rot bilong Seten long mekim wanem?

 6. (a) Olsem wanem Seten i bagarapim bilip bilong ol Kristen? Ol i kamapim wanem ol bilip giaman i save semim God? (b) Wanem samting i painim planti tausen man ol i bin sakim tok giaman bilong Babilon na ol i laik bihainim tok i tru bilong Baibel?

 7. (a) Wanem taim Jehova i kirap long kamapim bek ol tok i tru bilong Baibel na kamapim long ples klia ol bilip giaman bilong ol lotu bilong dispela graun em ol i bin kisim long Babilon? Jehova i mekim dispela samting olsem wanem? (b) Ol Sumatin Bilong Baibel i kamapim bek wanem ol tok i tru bilong Baibel?

 8. (a) Long rot bilong Namba Wan Pait ol pris pasto bilong ol misin i mekim wanem bambai ol i ken pinisim ol Sumatin Bilong Baibel? (b) Wanem samting i painim dispela jas em i bin kalabusim 8-pela brata em ol i bosim wok bilong Sosaiti Was Taua?

 9. Malakai i tok profet olsem wanem long samting i bin painim lain bilong Jehova? Olsem na Jehova i kirapim kot pastaim long wanem lain?

 10. Long 1919 bilong wanem Jehova i skelim long kot ol misin bilong dispela graun ol i kolim Kristen na ol narapela lotu giaman? Long dispela taim wanem samting i painim Bikpela Babilon?

 11, 12. (a) Long Revelesen 17:​1, 2 wanpela ensel i tok wanem long dispela kot i painim Bikpela Babilon? (b) Dispela “bikpela wara” em bikpela pamukmeri i sindaun long en, em i makim wanem samting? Olsem wanem olgeta man bilong graun “i kamap longlong, olsem man i spak” long wain bilong dispela pamukmeri?

 13, 14. (a) Olsem wanem yumi inap save, ol pris pasto bilong ol misin ol i no bin “waswas” na kamap klin? (b) Long wanpela kibung bilong Misin Angliken ol i tok wanem long pasin bilong man i slip wantaim man? Wanpela man bilong raitim nius em i tok, i gutpela sapos ol i senisim nem bilong dispela misin na givim wanem nem long en? (c) Wanem tok bilong Pita i makim stret ol dispela pris pasto bilong misin?

 15. (a) Long ol kantri ol i kolim Kristen, ol man i lusim wanem stretpela pasin? (b) Husat tu i gat asua long ol samting nogut i kamap long dispela pasin?

 16. (a) Wanem samting i kamapim long ples klia tru olsem Bikpela Babilon i pundaun pinis? Long Revelesen 18:2 ensel i mekim wanem singaut i stret tru long dispela? (b) Olgeta man i laik abrusim bagarap taim pasin bilong dispela graun i pinis, ol i mas mekim wanem?

[Blok long pes 9]

PASIN BILONG OL PRIS

“Long Amerika, ol papamama na dokta na polis na loya i tok, insait long 5-pela yia i go pinis, ol pris Katolik i bin mekim pasin nogut long planti handet pikinini na dispela i bagarapim tingting na bel bilong ol dispela pikinini.”−Nius Akron Beacon Journal, bilong Janueri 3, 1988.

“Misin Roman Katolik long Amerkia i mas tromoi planti milion dola olsem mani kompensesen bilong baim ol famili ol i tok ol pris i mekim pasin nogut i gat sem long ol pikinini bilong ol. Tasol dispela rong i no pinis−em i kamap bikpela moa na ol yangpela em pris i bin mekim pasin sem long ol na ol loya tu ol i tok, misin hia i no laik pasim dispela pasin nogut bilong ol pris, na misin i haitim pasin bilong ol.”−Nius The Miami Herald bilong Janueri 3, 1988.

[Ol Piksa long pes 6]

Ol imis bilong ol god triwan bilong Isip na ol lotu ol i kolim Kristen long en

[Ol Kredit Lain]

Saint-Remi Museum collection, Reims,photo by J. Terrisse

Louvre Museum, Paris

[Piksa long pes 10]

Baibel i tok, sapos bikman bilong lotu em i mekim pasin pamuk em i olsem pik em i waswas pinis na skin bilong en i klin, tasol em i go bek gen na tantanim nabaut long graun malumalum