Sapta 37
Babilon i Pinis, na Sampela i Krai Sori na Sampela i Amamas
1. Taim Bikpela Babilon i kisim bagarap, “ol king bilong graun” bai mekim wanem?
TAIM Babilon i pinis ol Witnes Bilong Jehova bai amamas, tasol ol lain man bai ting olsem wanem? Jon i tokim yumi: “Ol king bilong graun ol i bin mekim pasin pamuk wantaim em, na ol i bin mekim planti kain pasin nogut wantaim em. Olsem na taim ol dispela king i lukim smok i kamap long paia i kukim em, ol bai i krai sori na i stap bel hevi. Ol bai i lukim dispela pen nogut em i kisim, na ol bai i pret tru. Ol bai i sanap longwe long em na tok, ‘Sori, sori tumas long yu Babilon, yu bikpela na strongpela taun! Long wanpela aua tasol pe nogut bilong sin bilong yu em i kamap pinis long yu!’ ”—KTH 18:9, 10.
2. (a) Tenpela kom bilong retpela wel animal bai bagarapim Bikpela Babilon, olsem na bilong wanem “ol king bilong graun” i sori long em? (b) Taim Bikpela Babilon i kisim bagarap, bilong wanem ol dispela “king” i sanap longwe?
2 Ating yumi bai kirap nogut long ol lain man olsem king samting bai krai sori taim Bikpela Babilon i kisim bagarap, long wanem, 10-pela kom bilong retpela wel animal yet i bin bagarapim em. (KTH 17:16) Tasol taim Bikpela Babilon i pinis, ol dispela “king bilong graun” bai pilim olsem em i bin helpim gut ol, na em i gutpela samting bilong mekim ol man i stap isi na i stap daun long ol. Ol pris na pasto i save tokim ol man, pait em i samting holi, na ol i kirapim ol man long pait, na ol i tokim ol yangpela long go insait long ami. Na ol lotu bilong Babilon i olsem samting bilong haitim rong bilong ol dispela bikman nogut bilong politik ol i save putim planti hevi long ol man. (Lukim Jeremaia 5:30, 31; Matyu 23:27, 28.) Tru, ol dispela “king” bai bel hevi taim Babilon i bagarap, tasol ol i no bel hevi tumas—“ol bai i sanap longwe long em,” long wanem, ol i no laik helpim em, nogut ol tu i kisim bagarap.
Ol Bisnisman i Krai na Bel Hevi
3. Husat moa bai bel hevi long Bikpela Babilon i bagarap? Jon i kolim wanem as na ol i bel hevi olsem?
3 I no “ol king” tasol bai bel hevi long Bikpela Babilon i bagarap. Jon i tok: “Na ol bisnisman bilong olgeta hap bilong graun ol bai i tingting long Babilon, na ol bai i krai sori long em na i stap bel hevi. Long wanem, i no gat man bilong baim ol kago bilong ol moa. Ol kago bilong ol, em gol na silva na ol naispela ston na ol bis i dia tumas na ol naispela waitpela laplap na ol kain kain retpela laplap na ol laplap slika. Na tu ol i gat olgeta kain diwai i gat gutpela smel na olkain samting ol i wokim long tit bilong elefan na olkain samting ol i wokim long diwai i gat bikpela pe bilong en na long bras na long ain na long gutpela ston i gat makmak. Na ol i gat ol arapela kago tu i stap, olsem sinamon na kawawar bilong kaikai na paura bilong kamapim smok i gat gutpela smel na ol kain kain gris i gat gutpela smel na gutpela sanda na wain na wel na gutpela plaua na wit. Na ol i gat ol bulmakau na sipsip na ol hos wantaim ol karis na ol wokboi nating, em ol man i gat laip. Dispela olgeta samting i no gat man bilong baim moa. Ol man i save wok bisnis ol bai i tok olsem, ‘Dispela kaikai bel bilong yu [Bikpela Babilon] i bin kirap long kisim, em olgeta i stap longwe tru long yu. Olgeta gutpela gutpela samting i gat bikpela pe wantaim olgeta gutpela gutpela bilas bilong yu, em olgeta i lus pinis, na bai yu no inap tru long lukim gen.’ ”—KTH 18:11-14.
4. Bilong wanem ‘ol bisnisman bai sori na bel hevi’ taim Bikpela Babilon i bagarap?
4 Bikpela Babilon i gutpela pren bilong ol bisnisman na maniman na kampani. Em i save baim planti samting long ol. Long ol haus bruder na haus sister na haus lotu ol misin i bin bungim planti planti gol na silva na naispela ston i dia tumas na sampela kain diwai i gat bikpela pe bilong en na ol narapela samting tu i gat bikpela pe bilong en. Na ol misin i orait long lain bilong ol i tromoi bikpela mani long baim planti dring samting long taim bilong Krismas na ol narapela de holi bilong ol, maski Krismas i mekim nogut nem bilong Krais. Ol misineri bilong ol i bin go insait long ol kantri na opim rot bilong “ol bisnisman” i ken kirapim wok bisnis bilong ol. Inap 3 handet yia bipo, Misin Katolik i go insait long Japan wantaim ol bisnisman, na misin i insait long ol pait. Wanpela buk (The Encyclopædia Britannica) i stori long wanpela bikpela pait i bin kamap klostu long haus Osaka, na buk i tok: ‘Ami bilong Tokugawa i pait wantaim ol man i holim plak i gat piksa bilong kruse na Jisas na Santu Jems, em santu bilong Spen.’ Wanpela lain i winim pait na ol i mekim nogut long lotu Katolik na klostu ol i pinisim dispela lotu long Japan. Na long nau tu ol lotu i insait long ol pait, tasol dispela samting i no save helpim ol liklik.
5. (a) Maus long heven i tok wanem long krai sori bilong ol dispela “bisnisman”? (b) Bilong wanem ol tu “i sanap i stap longwe” long Bikpela Babilon taim em i bagarap?
5 Na maus long heven i tok moa: “Na ol man i save wok bisnis long ol dispela samting, na ol i bin kisim planti mani long dispela taun, ol bai i pret tru long lukim pen nogut dispela taun em i kisim. Na ol bai i sanap i stap longwe long en, na ol bai i krai sori na i stap bel hevi. Ol bai i tok olsem, ‘Sori, sori tumas long dispela bikpela taun! Bipo em i save putim ol naispela waitpela klos na ol kain kain retpela laplap, na em i save bilasim skin bilong en long gol na long ol naispela ston wantaim ol bis i dia tumas. Long wanpela aua tasol, dispela olgeta mani na bilas em i bagarap olgeta.’ ” (KTH 18:15-17a) Taim Bikpela Babilon i bagarap pinis “ol bisnisman” bai krai, long wanem, poroman bilong ol long wok bisnis em i pinis, olsem na ol bai tok: “Sori, sori tumas.” Tasol ol i tingim wok bisnis bilong ol na ol i tok olsem. Ol i no sori tru long Bikpela Babilon yet. Ol i tingim ol samting bilong ol yet, olsem “na ol bai i sanap i stap longwe long en.” Ol i no laik i stap klostu long Bikpela Babilon na bai ol i mas helpim em taim em i bagarap.
6. Maus long heven i tok wanem long ol kepten bilong sip na ol boskru i krai sori? Bilong wanem ol i krai na bel hevi?
6 Na maus i tok moa olsem: “Na olgeta kepten bilong ol sip na olgeta man i save raun long ol sip na i go long ol arapela kantri na olgeta boskru na olgeta man i save wok bisnis long solwara, ol dispela man tu bai i sanap i stap longwe long Babilon. Na ol bai i lukim smok bilong paia i kukim em, na ol bai i singaut olsem, ‘Wanem taun i stap na em i wankain olsem dispela bikpela taun?’ Na ol bai i kisim das bilong graun na tromoi antap long het bilong ol yet, na ol bai i krai sori na bel hevi i stap. Na ol bai i singaut olsem, ‘Sori, sori tumas long dispela bikpela taun! Ol papa bilong olgeta sip i save raun long solwara ol i bin kamap maniman tru long bikpela mani bilong dispela taun. Sori tumas! Long wanpela aua tasol em i bagarap olgeta!’ ” (KTH 18:17b-19) Taun Babilon bilong bipo em ples bilong wok bisnis na i gat planti sip. Olsem tasol Bikpela Babilon i save mekim planti wok bisnis long ol lain bilong ol, ol i olsem “ol bikpela wara.” Ol i save wok mani long ol bisnis na kampani bilong Bikpela Babilon. Olsem na taim Bikpela Babilon i bagarap, hevi bai painim ol, long wanem, ol i no gat wok mani moa. Bai i no gat gutpela wok mani moa olsem bilong Bikpela Babilon.
Em i Bagarap na Ol i Amamas
7, 8. Maus long heven i tok wanem long taim Bikpela Babilon i bagarap? Husat bai mekim dispela samting em maus i tok long mekim?
7 Taim ol Midia na Persia i daunim Babilon bilong bipo, Jeremaia i tok: “Skai wantaim graun na olgeta samting i stap long ol bai i amamas tru long taim Babilon i pundaun.” (Jeremaia 51:48) Taim Bikpela Babilon i bagarap, dispela maus long heven i tok: “Yu heven wantaim ol manmeri bilong God, na yupela ol aposel na profet, yupela olgeta i ken amamas long dispela samting nau i kamap long dispela taun. God i skelim pinis pasin bilong em na em i bekim pe nogut long em. Na long dispela pasin em i bekim ol pasin nogut dispela taun i bin mekim long yupela.” (KTH 18:20) Jehova wantaim ol ensel bai amamas taim dispela birua bilong Jehova i bagarap, na ol aposel na ol profet Kristen bilong bipo tu—long dispela taim ol i kirap bek pinis na ol i stap long dispela lain 24 hetman long heven.—Lukim Song 97:8-12.
8 Ol dispela “manmeri bilong God”—maski ol i bin kirap bek long matmat na nau ol i stap long heven, o ol i stap yet long graun—ol bai amamas, na bikpela lain bilong “ol arapela sipsip” tu. Na ol man bilong bipo i bin stap strong long bilip, em ol bai lusim matmat na kirap bek long nupela taim bihain, ol tu bai amamas. Lain bilong God i no bin bekim nogut long ol misin giaman i bin mekim nogut long ol. Ol i tingim tok bilong Jehova, em i bin tok: “Mi yet bai mi bekim rong bilong ol na mekim save long ol.” (Rom 12:19; Lo 32:35, 41-43) Em bai truim dispela tok bilong em na bekim rong em Bikpela Babilon i bin mekim long kapsaitim blut bilong planti planti man.
Ensel i Tromoi Bikpela Ston
9, 10. (a) Wanpela strongpela ensel i mekim wanem nau? Na em i tok wanem? (b) Dispela samting Kamapim Tok Hait 18:21 i tok strongpela ensel i mekim, wanem wankain samting i bin kamap long taim bilong Jeremaia? Dispela i makim wanem samting bai kamap tru? (c) Dispela samting Jon i lukim ensel i mekim, em i makim wanem samting?
9 Nau Jon i lukim samting i makim olsem Jehova i pasim tok pinis long bagarapim Bikpela Babilon: “Dispela tok i pinis, na wanpela strongpela ensel i kisim wanpela ston i wankain mak olsem ol bikpela ston bilong wilwilim wit. Em i litimapim dispela ston na i tromoi i go daun long solwara. Na em i tok olsem, ‘Long dispela pasin tasol ol bai i kisim dispela bikpela taun Babilon na tromoi i go daun strong tru, na ol man bai i no inap lukim em moa.’ ” (KTH 18:21) Long taim bilong Jeremaia, wankain samting i bin kamap na i olsem piksa bilong samting i mas kamap bihain. Jehova i kirapim em long raitim long buk “olgeta samting nogut i mas kamap long Babilon.” Jeremaia i givim buk long Seraia na i tokim em long i go long taun Babilon. Seraia i bihainim tok bilong Jeremaia na em i go na i kaunim wanpela toksave long ol Babilon olsem: “Bikpela, yu tok pinis long yu laik bagarapim dispela kantri na bai i no gat wanpela man o abus i stap long en. Na oltaim dispela ples bai i stap nating.” Seraia i mekim pinis, na nau em i pasim wanpela ston long buk na i tromoi i go insait long wara Yufretis na i tok: “Babilon bai i go daun olsem dispela buk, na em i no inap i kamap gen, long wanem, mi Bikpela, bai mi bagarapim em nogut tru.”—Jeremaia 51:59-64.
10 Seraia i tromoi buk wantaim ston i go daun insait long wara, na dispela i makim olsem taun Babilon bai bagarap na pinis olgeta na i no ken i stap moa. Orait, aposel Jon i lukim strongpela ensel i mekim wankain samting, na dispela i makim olsem samting Jehova i tok pinis long mekim long Bikpela Babilon, em bai mekim tru. Babilon bilong bipo i bin kisim bagarap, na dispela i makim samting liklik taim bai painim ol lotu giaman.
11, 12. (a) Strongpela ensel i givim wanem tok long Bikpela Babilon? (b) Jeremaia i bin tok wanem long ol bikhet lain bilong Jerusalem? Dispela i makim wanem samting bilong nau?
11 Nau strongpela ensel i givim tok long Bikpela Babilon olsem: “Olsem na, Babilon, krai bilong ol gita na bilong ol mambu na biugel na bilong ol kain kain musik, em bai i no kamap moa insait long banis bilong yu. Na ol man i skul pinis long mekim olgeta kain wok, ol bai i no i stap moa long yu. Krai bilong ston i wilwilim wit, em bai i no kamap moa insait long yu. Lait bilong lam, em bai i no lait moa long yu. Na toktok bilong ol man na meri i laik marit, em tu bai i no inap kamap moa insait long yu. Bipo ol bisnisman bilong yu ol i stap bikman tru long ai bilong ol arapela lain manmeri. Na yu bin wokim ol kain kain posin samting bilong giamanim ol manmeri bilong olgeta kantri.”—KTH 18:22, 23.
12 Jeremaia i bin mekim wankain tok long ol bikhet lain bilong Jerusalem, em i bin tok: “Na bai mi pinisim tru pasin bilong belgut na amamas na pasin ol man i kisim meri. Na bai i no gat man bilong mekim wok bilong wilwilim wit, olsem na ol ston bilong wilwilim wit i no ken pairap moa. Na bai i no gat lam i lait moa long ol dispela ples. Dispela graun olgeta bai i bagarap na i kamap ples nating tasol.” (Jeremaia 25:10, 11) Ol lotu i gat nem Kristen ol i bikpela hap bilong Bikpela Babilon, na ol bai bagarap olsem Jerusalem i bin bagarap long yia 607 paslain long Krais. Nau ol i amamas na wok i stap, tasol bihain birua bai daunim ol na ol bai lus.
13. Wanem senis wantu bai painim Bikpela Babilon? Na olsem wanem long “ol bisnisman”?
13 Long nau Bikpela Babilon i stap olsem wanpela bikpela strongpela samting, tasol bihain bagarap bai painim olgeta hap bilong en na em bai kamap olsem graun nating o ples nogut. Em i bin wok wantaim “ol bisnisman” na ol bikpela maniman, na em i kisim biknem wantaim ol, tasol taim em i bagarap, bai ol i lus tru—ol i no inap mekim wok moa long dispela poroman bilong ol bilong helpim ol yet. Em i no ken i stap moa na giamanim ol lain man long kain kain pasin na tok hait bilong lotu bilong en.
Bikpela Asua Long Blut
14. Strongpela ensel i kolim wanem rong bilong Bikpela Babilon na Jehova bai givim bikpela strafe long em? Na taim Jisas i bin i stap long graun em i givim wanem wankain tok long ol bikman bilong lotu?
14 Strongpela ensel i kolim rong bilong Bikpela Babilon na nau Jehova i givim bikpela strafe long en. Ensel i tok: “God i lukim dispela taun i gat asua bilong kilim i dai ol profet na ol manmeri bilong en. Na olgeta man bilong graun ol birua i bin kilim ol i dai, asua bilong dispela tu em i stap long Babilon tasol.” (KTH 18:24) Taim Jisas i bin stap long graun em i tokim ol bikman bilong lotu long Jerusalem, “asua bilong olgeta man i bin kilim i dai ol stretpela man i bin i stap long dispela graun, dispela asua em bai i stap long yupela tasol. Ol i bin kilim i dai ol stretpela man, stat long Abel.” Olsem na bagarap i painim ol dispela lain nogut bilong lotu long yia 70. (Matyu 23:35-38) Na long nau i gat narapela lain bikman bilong lotu ol i gat asua long blut—ol tu i bin biruaim lain bilong God.
15. Long taim bilong Hitler, olsem wanem Misin Katolik long Jemani i gat asua long blut long tupela samting?
15 Wanpela buk (The Catholic Church and Nazi Germany) bilong Guenter Lewy i tok: ‘Taim ol i tambuim ol Witnes Bilong Jehova long Baveria long Epril 13 [1933] Misin Katolik i kisim wok long gavman long kotim ol Witnes long gavman sapos misin i lukim ol i mekim yet wok bilong ol.’ Olsem na taim gavman i kalabusim planti tausen Witnes long ol bikpela banis kalabus nogut, Misin Katolik i gat bikpela hap asua long dispela; gavman i kilim i dai planti handet Witnes, na blut bilong ol i pas long dispela misin. Ol yangpela Witnes, olsem Wilhelm Kusserow, ol i no laik pait long ami na bagarapim sampela man na brukim lo bilong God, olsem na ol soldia bilong Hitler i sutim ol long gan na ol i dai. Tasol Hitler i laik mekim nogut moa long ol, olsem na em i tokim ol man long katim long akis nek bilong brata bilong Wilhelm, em Wolfgang. Em i gat 20 krismas tasol taim ol i kilim em i dai. Long dispela taim Misin Katolik i bin kirapim ol yangpela Katolik bilong Jemani long go insait long ami na dai bilong helpim kantri. Tru tumas, bikpela rong bilong dispela lotu i stap ples klia!
16, 17. (a) Bikpela Babilon i gat wanem asua long blut? Olsem wanem Misin Katolik i gat asua long blut bilong ol Judaman em gavman bilong Hitler i bin kilim ol i dai? (b) Wanem wanpela as na ol lotu giaman i gat asua long planti milion man i dai long planti handet pait long taim bilong yumi?
16 Tasol Baibel i tok, “olgeta man bilong graun ol birua i bin kilim ol i dai, asua bilong dispela tu em i stap long Babilon tasol.” Tru tumas, long taim bilong yumi, Bikpela Babilon i bin mekim olsem. Misin Katolik i bin helpim Hitler long kamap nambawan bilong Jemani, olsem na dispela misin i gat bikpela asua long blut bilong 6 milion Judaman em gavman bilong Hitler i bin kilim ol i dai. Na planti planti man, winim 100,000,000, ol i bin dai long planti handet pait long taim bilong yumi. Olsem wanem? Em asua bilong ol lotu giaman? Em i stret. I gat tupela as na ol dispela lotu i gat asua long dispela samting.
17 Ol lotu i as bilong planti pait. Ol Muslim na ol Hindu i gat narapela narapela lotu, na dispela i as bilong pait i bin kamap long India long 1946-1948. Planti handet tausen ol i dai. Na namel long 1980 na 1988 ol Irak na Iran i pait, na planti handet tausen ol i dai; as bilong pait bilong ol em ol i gat narapela narapela lotu. Na ol Katolik na Talatala i pait long Noten Aialan na planti tausen ol i dai. Wanpela man, em C. L. Sulzberger, i stori long dispela samting long 1976 na em i tok: ‘Planti pait bilong nau em lotu i as bilong en.’ Tasol em i olsem tasol long taim Bikpela Babilon i bin kirap na i kam inap long nau.
18. Wanem narapela as na ol lotu giaman i gat asua long kapsaitim blut bilong planti man?
18 Na i gat narapela as tu na ol lotu giaman i gat asua long planti man i bin bagarap long pait. Long ai bilong Jehova ol lotu bilong graun i gat asua long blut, long wanem, ol i no bin lainim gut ol man long ol lo bilong Jehova na ol samting em i laik bai lain bilong em i mas mekim. Lain tru bilong God i mas bihainim pasin bilong Krais Jisas na mekim pasin sori long ol narapela man, maski ol i bilong wanem lain, tasol ol dispela lotu i no bin lainim gut ol man olsem. (Maika 4:3, 5; Jon 13:34, 35; Aposel 10:34, 35; 1 Jon 3:10-12) Ol lotu bilong Bikpela Babilon i no bin lainim ol man long ol dispela samting, olsem na lain bilong ol long olgeta hap ol i go insait long pait. Dispela samting i kamap ples klia long Namba 1 na Namba 2 Pait, em ol lain i gat nem Kristen i bin kirapim, na ol i kilim i dai ol wanlotu bilong ol yet! Ol dispela lain i tok ol i Kristen, sapos ol i bin bihainim tok bilong Baibel, dispela tupela pait i no inap kirap.
19. Bikpela Babilon i gat wanem bikpela asua long blut?
19 Jehova i tok, asua bilong Bikpela Babilon na ol dispela blut i bin kapsait. Sapos ol bikman bilong ol lotu na ol pris pasto bilong ol misin i gat nem Kristen ol i bin skulim ol lain bilong ol long tok i tru bilong Baibel, ol dispela pait i no ken kamap na bagarapim planti man olsem. Olsem na Jehova i gat tok long Bikpela Babilon, em dispela bikpela pamukmeri, olsem olgeta lotu giaman, ol “i gat asua bilong kilim i dai ol profet na ol manmeri” bilong Em, na ol i gat asua long “olgeta man bilong graun ol birua i bin kilim ol i dai.” Tru tumas, Bikpela Babilon i gat bikpela asua tru long kilim i dai planti planti man. Olsem na taim em i pinis, em gutpela tru!
[Blok long pes 270]
Misin i Gat Asua
Wanpela buk (The Catholic Church and Nazi Germany) bilong Guenter Lewy i tok: ‘Sapos Misin Katolik long Jemani i bin stap strong na i no larim gavman bilong Hitler i bosim em, ating ol samting bai narapela kain. Na sapos Hitler i strong tumas na em i mekim ol dispela planti pasin nogut na em i winim pait, tasol Misin Katolik i bin mekim ol samting bilong sakim em na daunim em, misin bai i gat gutnem liklik, tasol misin i no mekim olsem—em i helpim Hitler. Tru, sapos lain bilong misin i bin pait long daunim Hitler, ating planti man bai dai tu, tasol dispela inap kamapim sampela gutpela samting. Ating Hitler bai i hatwok long daunim birua long ples bilong em na bosim ol man long Jemani, na em bai pret long kirapim pait long ol narapela kantri, na ol dispela milion milion man i no inap bagarap long pait—em ol dispela planti tausen man bilong Jemani ol i no laik helpim pait bilong Hitler na em i bin kalabusim ol na givim bikpela pen long ol na kilim ol i dai, na em i kilim i dai planti manmeri bilong Polan, na planti handet tausen Rasia, na 6,000,000 Judaman. Misin Katolik long Jemani i orait long gavman bilong Hitler i bin mekim nogut tru long ol man. Pop long Rom em i bos bilong Misin Katolik, tasol em i pasim maus i stap na em i no mekim wanpela tok.’—Pes 320, 341.
[Piksa long pes 268]
Ol king “bai krai sori na i stap bel hevi”
[Piksa long pes 268]
Ol bisnisman bai tok, “Sori, sori tumas”