Bikpela Pamukmeri i Kamap Ples Klia

SETEN i bosim olgeta manmeri bilong graun long nau, na dispela “graun” i gat 3-pela hap bilong en. “God giaman bilong dispela graun” i stiaim na mekim wok long ol dispela samting. Dispela 3-pela hap bilong “graun” em olsem: Ol wok politik, na ol bikpela kampani na bisnis i save bosim ol samting bilong mani, na ol lotu. Inap planti tausen yia pinis dispela 3-pela samting i insait long olgeta gavman i bin bosim ol man. Dispela “mama tru bilong olgeta pamukmeri” em i makim wanem hap bilong dispela 3-pela bikpela hap bilong graun?−2 Korin 4:​3, 4; Revelesen 12:9; 17:⁠5.

Yumi toktok hia long ol samting Jon i lukim long driman, na em i tok, ol dispela bikpela bos politik, em “ol king bilong graun,” ol i amamas long slip wantaim dispela pamukmeri. (Revelesen 18:⁠3) (Bihain bai yumi stori moa long dispela.) Olsem na Bikpela Babilon i no makim ol bikpela man politik bilong dispela graun. Nogat.

Orait, olsem wanem long ol bikpela kampani na bisnis, em ol i bosim planti samting long nau? Ol i stiaim tingting bilong ol man bilong planti hap, na i olsem ol i mekim sampela man i kamap maniman na sampela i stap rabis. Orait, ating ol yet i Bikpela Babilon, a? Nogat. Ensel i tokim Jon long wanpela hap tok, em i bikpela samting−ensel i tok, Babilon i pundaun na ol man i no litimapim em moa! Ol pren bilong em bilong bipo ol i no laikim em moa. Nau ol i tingim em i samting nogut. Na i no “ol king bilong graun” tasol ol i bin prenim em. Husat moa i bin mekim? Ensel i tok: “Olgeta lain manmeri ol i bin mekim planti pasin pamuk wantaim em. Em i olsem ol i bin dringim strongpela wain bilong em. Na ol king bilong graun ol tu i bin mekim pasin pamuk wantaim em. Na ol man bilong graun i save wok bisnis, ol i bin mekim bisnis na i kisim planti mani long kain kain bikpela pasin hambak bilong em.” Tru tumas, ol bikpela man bilong kampani na bisnis ol i bin wok wantaim Bikpela Babilon na dispela i helpim ol long kisim planti samting bilong skin, na i helpim em tu long kisim planti gutpela gutpela kago samting, na em i “hambak.” Orait, nau yumi save, dispela Bikpela Babilon i no makim ol bikpela man bilong ol kampani na bisnis bilong dispela graun. Nogat.−Revelesen 18:⁠3.

Yumi bin skelim wok politik, na yumi skelim ol bikpela wok bisnis, na nau yumi save, Bikpela Babilon i no makim ol dispela samting. Orait, wanem samting moa i stap na yumi ken skelim? Yumi tingim wanpela hap tok bilong Revelesen em i tok, “Yu bin giamanim olgeta lain man long kain kain posin bilong yu.” Dispela i makim wanpela bikpela samting i bin bosim ol man bilong graun, kirap long taim bilong Babilon bilong bipo. Dispela samting tasol em i “dispela meri yu lukim, em i dispela bikpela taun i stap olsem het bilong olgeta king bilong graun,” em ol lotu giaman tasol!−Revelesen 17:18; 18:⁠23.

Orait, Bikpela Babilon i makim wanem samting? Dispela Bikpela Babilon, em mama bilong ol pamukmeri, em i makim olgeta lotu giaman bilong graun, em Seten i bosim. Ating sampela man i bilip tru long lotu bilong ol bai ol i kirap nogut long dispela tok. Bikpela Babilon i makim ol lotu bilong graun ol i bin insait long ol wok politik na ol bikpela wok bisnis samting, kirap long bipo na i kam inap long nau.

Babilon i As Bilong Pait

Olsem dispela driman Jon i lukim, dispela bikpela Babilon em i olsem wanpela bikpela pamukmeri i bin pulim ol lain man i kam insait long ol pait nogut na blut bilong planti manmeri i kapsait, na em i bin blesim ol ami na tromoi wara santu long ol, na beten long God i helpim ol long winim pait, na em i mekim ol strongpela tok bilong litimapim nem bilong ples na kirapim ol man long helpim kantri bilong ol long winim pait.a−Revelesen 18:⁠24.

Ol pris na pasto i olsem rot bilong ol bikman bilong gavman long kirapim ol man long go insait long ol ami bambai ol i ken i go kilim i dai ol man bilong ol narapela lain, na planti planti bilong ol yet i bagarap, olsem i bin kamap long Namba Wan Pait na Namba Tu Pait Bilong Olgeta Hap. Katolik i kilim i dai Katolik, na Talatala i kilim i dai Talatala, na long dispela tupela pait inap 50 milion o 60 milion manmeri i bagarap. Na i gat ol narapela pait tu ol lotu i insait long en.

Tru ol man bilong nau i gat save long planti samting, tasol ol lotu i mekim yet wok nogut long kamapim pasin birua namel long ol lain man, na dispela i as bilong ol bagarap i painim planti planti manmeri. Yumi lukim kain pasin olsem long ol dispela lotu ol i tok ol i Kristen, olsem dispela pasin birua i stap namel long ol Katolik na Talatala, na i stap tu namel long ol narapela lotu, olsem Islam na Juda, Hindu na Islam, Buda na Hindu, Seik na Hindu, na sampela lotu moa−narapela i biruaim narapela.

Na long olgeta taim ol lotu i laik bosim strong “ol king bilong graun.” Ol lotu i laik stiaim tingting bilong ol dispela gavman na bosim ol wok bilong ol na wok bilong makim husat i mas kamap gavman samting. Orait nau yumi ken stori long sampela wok olsem bilong ol lotu.

[Futnot]

[Piksa long pes 4]

“Bikpela taun Babilon” i makim wanem lain−em i makim bikpela bisnis, o wok politik, o ol lotu?