Pamukmeri Nogut−Bagarap Bilong Em

“Yumi litimapim nem bilong God! God bilong yumi em wanpela tasol i bin kisim bek yumi. Em i gat strong. Long kot God i save skelim ol man long pasin i tru na i stret olgeta. Dispela bikpela pamukmeri em i bin bagarapim olgeta manmeri bilong graun long pasin pamuk bilong en. Olsem na God i bekim pe nogut long em. Dispela meri em i kilim i dai ol wokboi bilong God, olsem na God i bekim dispela asua bilong em.”−REVELESEN 19:​1, 2

OL SAMTING yumi bin toktok pinis long en em bikpela samting tru. Tasol yumi mas tingim tu wanpela tok bilong Revelesen 17:​2, em i tok dispela pamukmeri i save mekim pasin pamuk wantaim “ol king bilong graun.” Tru em i pundaun pinis, tasol em i stap pren yet bilong dispela graun na em i wok long stiaim ol king na gavman bilong dispela graun na bai em inap long mekim ol laik nogut bilong em long rot bilong ol. (Jems 4:⁠4) Dispela pasin bilong Bikpela Babilon long prenim ol lain politik bilong graun i olsem em i mekim pasin pamuk wantaim ol. Na taim ol dispela gavman i kamapim Namba Wan Pait, em i helpim dispela pait, olsem na em i gat asua long planti milion manmeri ol i kisim bagarap insait long pait. Tasol ol samting em i bin mekim long taim bilong Namba Tu Pait i nogut moa yet, olsem na i stret tru Baibel i tok, “sin bilong en i olsem bikpela hip tru, na i kamap inap long heven”! (Revelesen 18:⁠5) Tasol i gat wanem as na mipela inap tok olsem?

₂ Yumi ken tingim wanpela man nogut bilong politik, em Adolf Hitler. Olsem wanem em i kamap nambawan long gavman bilong Jemani? Wanpela bikpela man bilong lotu Katolik, nem bilong em Franz von Papen, em i bin mekim pasin hait na long rot bilong wok politik em i helpim Hitler long kisim dispela wok. Nambawan long gavman bilong Jemani paslain long Hitler, em Kurt von Schleicher, em i bin stori long dispela bikpela man, em Franz von Papen, na i tok, em i man nogut tru, winim Judas. Von Papen i bin kirapim wanpela lain bilong Misin Katolik na ol bos bilong ol bikpela kampani long biruaim ol komiunis na putim Hitler i stap nambawan long Jemani. Bilong baim von Papen long dispela wok em i bin mekim, Hitler i putim em olsem nambatu bilong em, na Hitler i salim von Papen wantaim wanpela lain ol i go long Rom bilong stretim rot bambai gavman bilong Jemani i ken wokim kontrak wantaim Misin Katolik. Pop Pius Namba 11 em i tokim dispela lain bilong Jemani, em i amamas tru, long wanem nau nambawan bilong gavman bilong Jemani em i strongpela man bilong biruaim ol komyunis. Orait, long Julai 20, long 1933, ol i bung long biktaun Vatikan long Rom, as bilong Misin Katolik, na ol i mekim kain kain bilaspasin bilong lotu, na Kadinal Pacelli (em bihain em i kamap Pop Pius Namba 12) em i raitim nem bilong em long dispela kontrak.a

₃ Wanpela man bilong raitim stori bilong bipo em i tok: ‘Dispela kontrak Hitler i bin mekim wantaim Pop i strongim tru gavman bilong Hitler. Bipo i no gat wanpela lain ausait long Jemani i bin helpim em. Tasol nau Pop bilong Rom i helpim em, na Pop i gat bikpela namba tru, winim olgeta man bilong graun!’ Taim ol i bung na mekim ol samting bilong amamas long dispela bikpela de, Kadinal Pacelli i givim biknem na wanpela bikpela namba bilong Misin Katolik long von Papen.b Gavman bilong Englan long bipo, em Winston Churchill, em i raitim wanpela buk (The Gathering Storm, 1948) i stori long dispela samting na em i tok, von Papen i gat nem olsem gutpela Katolik, olsem na em i mekim wok long dispela na em i kirapim lotu Katolik long helpim gavman bilong Jemani long kisim kantri Ostria. Long 1938 Kadinal Innitzer i putim tok long olgeta haus lotu long Ostria i mas sanapim plak i gat mak bilong gavman bilong Jemani long en, na paitim ol belo bilong haus lotu, na mekim beten bilong litimapim nem bilong Hitler long betde bilong em.

₄ Olsem na Misin Katolik i gat bikpela asua tru long blut bilong ol man! Em i strongpela hap bilong Bikpela Babilon na em i helpim Hitler long kamap nambawan long gavman bilong Jemani. Na Misin i wanbel wantaim em long ol wok nogut nogut em i mekim. Inap tenpela yia samting dispela gavman bilong Hitler i bin mekim nogut long ol man, na long taim bilong Namba Tu Pait planti tausen soldia Katolik ol i mekim pait na ol i dai bilong litimapim nem bilong dispela gavman bilong Hitler; na tu, Hitler i bin kilim i dai planti milion manmeri long ol banis kalabus bilong em. Tasol Pop i no mekim wanpela tok long ol dispela samting nogut i bin kamap−em i pasim maus na i lukluk nating tasol.

₅ Ol bisop Katolik long Jemani ol i bin helpim Hitler. Long taim bilong pait Jemani i bin wok wantaim Japan, na taim Japan i kirapim pait long Amerika, long dispela de stret, wanpela nius bilong Amerika (The New York Times) i tok: ‘Ol bisop Katolik bilong Jemani i bin bung long Fulda na ol i pasim tok pinis long kamapim wanpela “beten bilong helpim pait.” Ol i putim tok olsem: Long olgeta haus lotu Katolik ol i mas kaunim dispela beten taim ol i kirap long mekim lotu na taim ol i pinis long mekim. Dispela beten i singautim God bilong blesim ol ami bilong Jemani bambai ol i ken winim pait, na em i ken lukautim olgeta soldia na ol i no ken bagarap o kisim sik. Na ol bisop i tokim ol pris Katolik, wanpela taim long olgeta mun ol i mas mekim wanpela bikpela tok long haus lotu long Sande bilong tingim ol soldia bilong Jemani ol i stap “long graun na long solwara na long ples antap.” ’

₆ Misin Katolik i pren wantaim dispela gavman bilong Jemani, tasol dispela gavman i bin kirapim pait na planti milion manmeri i bagarap long pait, na ol i bin kilim i dai 6 milion Juda, na ol i bin putim planti tausen Witnes long ol banis kalabus nogut na planti tru ol i dai. Ol i bin mekim nogut tru long dispela manmeri bilong ‘liklik lain’ na ‘bikpela lain’ em Jehova i laikim tumas ol. Misin Katolik i gat bikpela hap asua long ol dispela samting nogut i bin kamap. Sapos em i no bin pren wantaim dispela gavman, ating ol dispela samting nogut i no ken kamap.−Jon 10:​10, 16.

Yumi Skelim Gut Dispela Pamukmeri

₇ Ol samting Jon i lukim olsem piksa na em i stori long en long Revelesen sapta 17 ves 3 i go inap 5, em i makim stret tru ol dispela samting i bin kamap. Jon i tok, “Holi Spirit em i kamap strong long mi, na i karim mi i go long graun i no gat man. Long dispela hap mi lukim wanpela meri em i sindaun antap long retpela wel abus. Dispela wel abus em i gat planti nem i pulap long skin bilong en. Na olgeta dispela nem em i kain kain tok bilas long God. Na wel abus i gat 7-pela het na 10-pela kom. Dispela meri em i putim tupela kain retpela klos, na i gat kain kain bilas gol, na bilas ol i bin wokim long naispela ston wantaim bis i dia tumas. Em i holim kap gol long han bilong en. Na kain kain pasin i sting tru long ai bilong God, na kain kain doti bilong pasin pamuk bilong dispela meri, em olgeta i pulap long dispela kap. Na rait bilong nem bilong en i stap long pes bilong en. Dispela nem i olsem tok hait, na nem yet i olsem: ‘Bikpela taun Babilon, em i mama tru bilong olgeta pamukmeri, na bilong olgeta pasin nogut tru long graun.’ ”

₈ Nau Jon i lukim gut Bikpela Babilon. I stret Jon i lukim dispela “pamukmeri” i stap long ples i no gat man, namel long ol animal nogut bilong bus. Ol samting i pulap long kap gol em i holim, dispela i kamapim em long ples klia. Ol dispela samting i olsem samting i sting tru long ai bilong God. Jehova em i “Jas bilong olgeta graun” na em i nolaik tru long ol pasin dispela “pamukmeri” i bin mekim, olsem em i laikim pasin bilong dispela graun, na lainim ol man long ol tok giaman, na orait long ol kain pasin pamuk samting, na pren wantaim ol gavman politik. (Jenesis 18:​22-26; Revelesen 18:​21, 24) Em i bilas gut tru! Em i gat ol gutpela gutpela haus lotu bilong em i gat kala kala glas long windo na ol bilas bilong en, na em i gat ol liklik ples lotu bilong em. Na ol pris bilong em i save bihainim pasin bilong em na pasim ol klos i gat bikpela pe bilong en, em ol retpela na blupela na yelopela klos.−Revelesen 17:⁠1.

₉ Tasol bikpela rong tru bilong em i olsem: Em i gat asua long blut. Inap longtaim pinis em i bin kapsaitim blut bilong ol man na Jehova i mas bekim pe nogut long em! Em i bin helpim ol hatpela gavman bilong nau, em ol i bin bagarapim ol man, na inap planti handet yia long bipo em i bin mekim ol pait em i kolim olsem Pait Holi na em i bin givim pen long planti man na kilim i dai planti man. Na em i bin kilim i dai sampela aposel na Pikinini bilong God yet, em Krais Jisas. (Aposel 3:15; Hibru 11:​36, 37) Na long dispela taim tu em i gat asua long blut bilong ol Witnes Bilong Jehova, em ol man i bin sutim ol long gan, na hangamapim ol long rop, na katim nek bilong ol long akis na bikpela naip na bainat, na mekim nogut tru long ol long ol haus kalabus na ol banis kalabus nogut. Olsem na yumi no ken kirap nogut long tok Jon i mekim taim em i stori pinis long dispela “pamukmeri,” em i tok: “Dispela meri em i bin kilim i dai ol manmeri bilong God na ol man i bilip long Jisas na i autim nem bilong em. Na mi lukim dispela meri em i dringim blut bilong ol na i kamap longlong.”−Revelesen 17:⁠6.

‘TOK HAIT BILONG DISPELA MERI NA WEL ABUS’

₁₀ Jon i lukim dispela samting na em i “kirap nogut tru” na “tingting planti.” Long nau tu yumi kirap nogut tru! Namel long yia 1930 na 1949 samting, dispela “pamukmeri” i mekim wok long wanpela lain bilong Misin Katolik na ol lain bilong gavman na ol i mekim nogut long ol witnes bilong Jehova−ol man i bung wantaim na paitim ol witnes na planti gavman i tambuim wok bilong ol. Na inap long nau long ol ples Bikpela Babilon i gat strong yet bilong bosim ol man, em i save kirapim ol long pasim rot bilong ol Witnes na daunim gutpela wok ol i mekim bilong autim gutpela tok bilong Kingdom bilong God. Ol pris pasto i giamanim planti milion manmeri na ol i stap olsem kalabus insait long ol misin giaman bilong dispela “pamukmeri.” Long dispela rot ol pris pasto i kamap olsem “aipas i soim rot long aipas.” Ol i bringim ol man i go long rot bilong bagarap na bai ol i lus olgeta. Aposel Pol i bin tok, “Mi autim tok long yupela nau: Sapos wanpela namel long yupela em i lus, dispela em i no asua bilong mi.” Tasol dispela “pamukmeri” i no inap tok olsem. Nogat tru!−Matyu 15:​7-9, 14; 23:13; Aposel 20:⁠26.

₁₁ Jon i kirap nogut, olsem na ensel i tokim em: “Bilong wanem yu tingting planti? Bai mi soim yu as bilong tok hait bilong dispela meri, na bilong dispela wel abus i gat 7-pela het na 10-pela kom, na i karim meri i go.” (Revelesen 17:⁠7) Dispela “wel abus” i makim wanem samting? Inap 600 yia paslain long taim bilong Jon, profet Danyel i bin lukim piksa na em i lukim sampela wel abus ol i makim ol “king” o ol gavman bilong graun. (Danyel 7:​2-8, 17, NW; 8:​2-8, 19-22) Jon i lukim ol dispela gavman i bung wantaim olsem wanpela gavman−em dispela “retpela wel abus.” Dispela i makim Lig ov Nesen em ol man i bin kamapim long yia 1920, na taim Namba Tu Pait i kirap long yia 1939, wok bilong dispela oganaisesen i bagarap na i olsem em i go daun insait long wanpela bikpela hul. Tasol wanem as bilong “tok hait bilong dispela meri, na bilong dispela wel abus”?

₁₂ Jehova i mekim gut long ol Witnes bilong em na long yia 1942 ol i kisim save long as bilong dispela tok hait. Long dispela taim Namba Tu Pait i stap yet na i kamap bikpela, na planti ol i ting olsem em bai i go bikpela olgeta na bai Amagedon i kirap. Tasol Jehova i no laik bai samting i kamap olsem! I gat bikpela wok yet em i laik bai ol Witnes bilong em i mekim! Long ol bikpela kibung bilong ol Witnes long Septemba 18-20, long yia 1942, presiden bilong Sosaiti Was Taua, em Nathan H. Knorr, em i mekim pablik-tok (Peace−Can It Last?) long biktaun Klivlan, long Ohaio, Amerika, na em i stori long ol tok bilong Revelesen 17:⁠8. Long 51 kibung moa ol i harim dispela tok long rot bilong wanpela kain telefon. Dispela ves i tok, bipo dispela “retpela wel abus” i stap, “na nau em i no i stap. Tasol bihain bai em i lusim dispela hul i no gat as, na em i kam antap, na bai em i lus olgeta.” Brata Knorr i kamapim long ples klia olsem namel long yia 1920 na yia 1939, dispela “retpela wel abus” i bin i stap. Tasol “nau em i no i stap,” long wanem dispela oganaisesen i pinis. Tasol bihain, taim namba tu bikpela pait i pinis, bai dispela oganaisesen i lusim hul na i kam antap. Olsem wanem? Ol samting i bin kamap olsem dispela tok profet bilong Baibel i makim? Em i bin kamap tru! Long yia 1945 dispela “wel abus” i lusim hul i kam antap na ol i kolim Yunaitet Nesen.

₁₃ Bikpela Babilon i pundaun pinis, tasol em i gat liklik hap strong i stap yet na em i wok yet long prenim dispela “wel abus,” em Yunaitet Nesen. Long Jun, 1965, sampela hetman bilong ol 7-pela bikpela lotu bilong graun ol i bung long San Fransisko bilong amamas long Yunaitet Nesen i bin wok i stap inap 20 yia pinis.c Ol dispela lotu em ol lotu ol i kolim Kristen na ol lotu haiden na ol i bosim bikpela hap lain tru bilong ol manmeri bilong graun. Na long dispela yia 1965, Pop Paul Namba 6 i stori long Yunaitet Nesen na em i tok, ‘i no gat narapela rot bilong kamapim pasin wanbel na pasin sekan.’ Na bihain Pop John Paul Namba 2 em i kamapim tingting bilong em, em i laik bai ‘Yunaitet Nesen i ken i stap oltaim olsem ples bilong stretim tok bilong kamapim pasin sekan na stretpela pasin.’ Yunaitet Nesen i makim yia 1986 olsem Yia Bilong Gutaim long Olgeta Hap na ol lotu giaman bilong olgeta hap i go pas long helpim dispela wok bilong Yunaitet Nesen. Ol i mekim planti beten, tasol olsem wanem? Gutaim i bin kamap na ol man i stap bel isi? Nogat tru! Planti lain insait long Yunaitet Nesen i kamapim bel bilong ol, ol i no laikim ol dispela lotu, olsem dispela “pamukmeri.”

Ol i Bagarapim Dispela Pamukmeri

₁₄ Bihain dispela “retpela wel abus,” olsem Yunaitet Nesen, em i mas kirapim laspela pait long lain bilong God na em tu i mas bagarap. Tasol pastaim i gat wanpela wok em i mas mekim. Jehova ‘i givim tingting long bel bilong wel abus na ol kom bilong en i gat ami’ na wel abus i kirap mekim wanem? Ensel bilong God i bekim tok, olsem: “Dispela 10-pela kom yu lukim pinis, dispela olgeta wantaim dispela wel abus ol bai i birua long pamukmeri. Bai ol i bagarapim em tru na tekewe olgeta klos samting bilong en. Na bai ol i kaikai mit bilong bodi bilong en, na kukim em olgeta long paia.” “Em i bin litimapim nem bilong em yet na i mekim planti kain pasin hambak,” tasol nau em i bagarap. Maski em i gat ol bikpela bikpela haus lotu na planti haus na graun samting, dispela i no inap helpim em. Ensel i tok pinis: “Kain kain samting nogut tru bai i kamap long em long wanpela de tasol. Planti sik bai i kamap, na planti man bai ol i krai nogut, na bikpela hangre bai i kamap. Na bai paia i kukim Babilon olgeta. Yes, Bikpela God i skelim em na i bekim pe nogut long em, em i strong tumas.”−Revelesen 17:​16, 17; 18:​7, 8.

₁₅ Ol lain politik i bin pren wantaim em, bai ol i hevi long em na bai ol i tok: “Sori, sori tumas long Babilon! Yu bikpela taun, na yu strongpela taun! Long wanpela aua tasol pe nogut bilong sin bilong yu em i kamap pinis long yu!” Na ol man i gat ol bikpela wok bisnis na ol i bin kisim bikpela profit mani long rot bilong Babilon, bai ol i “krai na i stap bel hevi. Bai ol i tok, ‘Sori, sori tumas long dispela bikpela taun! . . . Long wanpela aua tasol, dispela olgeta mani na bilas em i bagarap olgeta.’ ”−Revelesen 18:​9-17.

₁₆ Tasol taim Babilon i bagarap bai lain bilong God i mekim wanem? Bai ol i amamas, olsem ensel i tok: “Yu heven wantaim ol manmeri bilong God, na yupela aposel na profet, yupela olgeta i ken amamas long dispela samting nau i kamap long dispela taun. God i skelim em na bekim pe nogut long em. Na long dispela pasin em i bekim ol pasin nogut dispela taun i bin mekim long yupela.” Wantu tasol bai ol i tromoi em i go daun na bai em i no inap bagarapim moa nem holi bilong Jehova. Taim dispela “bikpela pamukmeri” i bagarap pinis, bikpela singaut bai kamap bilong amamas long Jehova i winim pait na bilong litimapim nem bilong Jehova. Bai ol i singaut na tok olsem: “Yumi litimapim nem bilong God! God bilong yumi em wanpela tasol i bin kisim bek yumi. Em i gat biknem na strong. Long kot God i save skelim ol man long pasin i tru na i stret olgeta. Dispela bikpela pamukmeri em i bin bagarapim olgeta manmeri bilong graun long pasin pamuk bilong en. Olsem na God i bekim pe nogut long em. Dispela meri em i kilim i dai ol wokboi bilong God, olsem na God i bekim dispela asua bilong em.”−Revelesen 18:​20–19:⁠3.

₁₇ Nau kwiktaim bai strafe bilong God i painim ol narapela lain i go inap long pinis. “King bilong olgeta king, na Bikpela bilong olgeta bikpela man” em bai “krungutim wain long tang ston bilong wain. Dispela em i bikpela belhat bilong God I Gat Olgeta Strong.” Long Amagedon bai em i pinisim ol bos nogut bilong dispela graun na olgeta narapela lain bilong Seten em ol i stap yet long graun. Ol pisin bai kaikai mit bilong bodi bilong ol. (Revelesen 16:​14, 16; 19:​11-21) Yumi mas amamas, long wanem, taim i laik kamap nau bilong God i pinisim olgeta samting i no holi o klin na i bagarapim graun!

₁₈ Tasol olsem wanem? Em laspela bikpela samting i mas kamap bilong truim ol tok bilong Revelesen? Nogat. I gat sampela samting moa i mas kamap. Taim olgeta bilong lain 144,000 i kirap bek pinis na i stap long heven, bai marit bilong Pikinini Sipsip i kamap. “Meri” bilong em i putim gutpela bilas na redi long maritim man bilong em. Em i stap long “nupela skai,” na long tok piksa em bai ‘kam daun’ bilong helpim man bilong em long kamapim laik bilong Jehova na “mekim olgeta samting i kamap nupela!” “Meri” i gat gutpela bilas bilong spirit em bilong dispela taun holi, Nupela Jerusalem. Bikpela lait bilong Jehova em i lait bilong dispela taun. Na Pikinini Sipsip em i lam bilong en. (Revelesen 21:​1-5, 9-11, 23) Em nau, laspela bikpela samting Revelesen i stori long en em i kamap pinis−Jehova i stretim bek pinis nem bilong em; na Pikinini Sipsip, em Krais Jisas, wantaim meri bilong em, Nupela Jerusalem, ol i kirap pinis long mekim ol wok bilong helpim ol manmeri i save bihainim tok, na bai ol inap kisim laip i stap oltaim long Paradais long graun.

₁₉ Ol lotu bilong dispela graun i man bilong tupela maus na ol i mekim planti pasin giaman. Olsem wanem? Yu pilim pinis dispela samting na yu lusim pinis Bikpela Babilon? Na yu go moa na yu givim yu yet long God Jehova long rot bilong Krais Jisas, olsem dediket long em, na yu bin kisim baptais? Yu mas mekim olsem bambai God inap kisim bek yu! Taim i laik kamap nau bilong Jehova i givim strafe long ol man nogut, olsem na singaut i kamap strong moa olsem: “Holi Spirit wantaim meri bilong Pikinini Sipsip tupela i tok, ‘Yu kam!’ ” Na olgeta manmeri i harim dispela singaut ol i mas dediket long Jehova na ol i mas wok strong long tokim ol narapela man, ‘Yupela kam.’ “Na man i dai long wara, em i mas kam. Man i laik dring, em i mas kam na kisim wara bilong laip, em i olsem presen bilong God.” (Revelesen 22:17) Rot i op yet. Sapos yu bihainim dispela singaut na yu kam sanap long pes bilong sia king bilong God na Pikinini Sipsip, na yu dediket long Jehova na kamap wokboi bilong em na yu sanap strong i stap, orait yu ken amamas tru. Taim i laik kamap nau−em klostu pinis! Tru tumas, laspela bikpela samting bilong Revelesen i laik kamap nau!

Taim dispela Stadi Wastaua i pinis, wasman bilong en i ken tokim wanpela man long kaunim Tokaut na wasman i ken stori long en na kamapim ol dispela askim i stap long pinis bilong en. Ol i bin mekim dispela Tokaut long “Stretpela Pasin Bilong God” Kibung Distrik bilong ol Witnes Bilong Jehova em i bin kamap long olgeta hap bilong graun long 1988 na 1989, na ol i bin kolim dispela Tokaut taim ol i mekim pinis wanpela tok nem bilong en ‘ “Pamukmeri’ Nogut−Pundaun Bilong Em na Bagarap Bilong Em.”

[Ol Futnot]

[Askim Bilong Stadi]

 1. Bikpela pamukmeri i mekim wanem na i olsem em i pamuk wantaim “ol king bilong graun”? Na dispela i mekim wanem samting nogut i kamap?

 2. (a) Franz von Papen i mekim wanem bilong helpim Adolf Hitler long kamap bos bilong Jemani? Nambawan bilong gavman bilong Jemani paslain long Hitler em i tok wanem long dispela von Papen? (b) Dispela kontrak Jemani i wokim wantaim Misin Katolik long Rom, wanem tupela hap tok bilong en ol i haitim? (Lukim namba wan liklik rait i gat sta long pes 12 na i toktok long kontrak.)

 3. (a) Wanpela man bilong raitim stori em i tok wanem long dispela kontrak em Jemani wantaim Pop i bin wokim? (b) Taim ol i mekim bung long Rom, ol i givim wanem samting long Franz von Papen? (c) Franz von Papen i mekim wanem bilong helpim Jemani long kisim kantri Ostria?

 4, 5. (a) Misin Katolik i bin mekim wanem na em i gat bikpela asua tru long blut bilong ol man? (b) Ol bisop Katolik long Jemani i mekim wanem na ol i helpim Hitler?

 6. Sapos Misin Katolik i no bin prenim gavman bilong Hitler long Jemani, wanem ol bikpela hevi na pen i no inap kamap?

 7. Aposel Jon i tok wanem long bikpela meri pamuk?

 8. (a) Wanem ol samting i pulap long kap bilong dispela meri, na dispela i kamapim em long ples klia? (b) Olsem wanem Bikpela Babilon i gat ol bilas olsem “retpela klos” na “bilas gol” na “naispela ston na “bis i dia tumas”?

 9. Inap longtaim pinis Bikpela Babilon i bin mekim wanem na em i gat bikpela asua long blut bilong ol man? Jon i tok wanem long taim em i pinisim stori bilong em long dispela meri?

 10. (a) Bipo na inap long nau dispela meri pamuk i bin mekim wanem pasin nogut long ol Witnes Bilong Jehova? (b) Ol pris pasto bilong Bikpela Babilon ol i wanem kain bos?

 11, 12. Wanem dispela tok hait bilong “retpela wel abus” em dispela pamukmeri nogut i sindaun antap long en? Long 1942 ol Witnes Bilong Jehova i kisim wanem save long dispela samting?

 13. Bikpela Babilon i mekim wanem na i olsem em i mekim pasin pamuk yet wantaim dispela “wel abus,” em Yunaitet Nesen?

 14. Wanem wok dispela “retpela wel abus,” em Yunaitet Nesen, em i mas mekim? Ensel bilong God i tok wanem long dispela samting?

 15. Ol pren politik bilong pamukmeri na ol man bilong ol bikpela bisnis ol bai tok wanem long taim em i kisim bagarap?

 16. Taim dispela meri pamuk i bagarap, lain bilong God bai mekim wanem? Na wanem singaut em lain bilong God bai mekim, olsem yumi lukim long Revelesen?

 17. Taim meri pamuk i bagarap pinis, wanem ol narapela samting bai kamap?

 18. Wanem ol laspela tok bilong Revelesen?

 19. (a) Yumi mas lusim Bikpela Babilon, na wanem sampela samting moa yumi mas mekim bambai yumi ken abrusim bagarap na i stap laip? (b) Wanem singaut yumi mas givim yau long en? Taim yumi harim yumi mas mekim wanem?

[Blok long pes 13]

POP I NO MEKIM WANPELA TOK

H. W. Blood-Ryan i wokim wanpela buk long 1939 (Franz von Papen−His Life and Times), na em i kamapim ol pasin hait von Papen i mekim bilong helpim Hitler long kamap nambawan bilong Jemani na Vatikan i wokim kontrak wantaim gavman bilong Hitler. Na Blood-Ryan i stori long ol pasin nogut ol i mekim bilong kilim i dai ol lain ol i no save laikim, olsem ol i bin mekim long ol Juda na Witnes Bilong Jehova na sampela lain moa. Na em i tok: ‘Bilong wanem Pacelli [Pop Pius Namba 12] i pasim maus na em i no gat tok long dispela ol pasin nogut? Long wanem, von Papen i tingting long Misin Katolik na gavman bilong Jemani i ken bung wantaim na kamap strong na Vatikan i ken bosim gavman olsem em i bin mekim bipo . . . Nau Pacelli i stap bos long lotu bilong planti milion man, tasol em i no laik toktok liklik long pasin Hitler i bin mekim long daunim na mekim nogutim ol man. . . . Taim mi raitim dispela tok ol i bin bagarapim ol man inap 3-pela de, tasol pop i no laik beten bilong helpim ol dispela man i dai pinis, na planti ol i Katolik. Taim wok bos i tekewe long ol dispela bikpela man na ol i sanap long ai bilong God, em bai askim ol, Bilong wanem yupela i bin mekim olsem? Ol inap bekim wanem tok? Nogat!’

[Blok long pes 17]

VATIKAN I INSAIT LONG DISPELA RONG

Wanpela nius ( The New York Times) bilong Mas 6, 1988, em i tok, long 1988 mani bilong Vatikan bai lus inap K61,800,000, na nius i tok, long 1984 Vatikan i bin tok promis long bekim K250 milion long ol man bilong wanpela beng i bin bagarap na Vatikan i gat dinau long ol. Vatikan i bin insait long dispela beng long Milan taim beng i bagarap long 1982. Vatikan wantaim ol man bilong dispela beng ol i gat bikpela rong, na rong i kamap ples klia, na taim polis i laik i kam holim 3-pela man i insait long dispela rong na bai ol i kot long Itali, em Vatikan i pasim rot na bai polis i no inap kisim ol. Wanpela bilong dispela 3-pela man ol polis i laik holim ol, em wanpela asbisop bilong Amerika.

[Ol Piksa long pes 14]

Vatikan na von Papen na Hitler i gat bikpela asua long blut bilong ol man i kapsait

[Ol Kredit Lain]

UPI/Bettmann Newsphotos

UPI/Bettmann Newsphotos

[Ol Piksa long pes 17]

Ol pop i no laik tokim ol man long givim bel long Kingdom bilong God, nogat; ol i save litimapim Yunaitet Nesen na ol i tok, ‘Yunaitet Nesen tasol inap stretim ol hevi.’

[Kredit Lain]

Insets: UN photos