Sapta 20

Wanpela Bikpela Lain Tru

 1. Jon i stori pinis long 144,000 i kisim mak, na nau em i lukim wanem narapela lain?

JON i stori pinis long 144,000 i kisim mak, na nau em i stori long wanpela gutpela samting bipo i stap hait tasol nau em i kamap ples klia, na yumi kirap nogut long dispela gutpela samting. Ating bel bilong em i amamas tru taim em i kolim dispela samting. Em i tok: “Bihain mi lukluk gen, na mi lukim planti manmeri tru ol i bung i stap, na i no inap man i kaunim namba bilong ol. Dispela ol manmeri ol i bilong olgeta lain man na bilong olgeta kantri na bilong olgeta kain skin na bilong olgeta tok ples. Ol i sanap i stap long pes bilong sia king na long ai bilong Pikinini Sipsip. Ol i bin putim ol longpela waitpela klos, na long han bilong ol, ol i holim ol lip bilong diwai pam.” (KTH 7⁠:⁠9) Ol ensel i pasim 4-pela win, na dispela i helpim lain 144,000 Israel bilong spirit, na i helpim tu traipela lain manmeri bilong olgeta kantri na kain kain tok ples.​—⁠KTH 7⁠:⁠1.

 2. Sampela man i bin tok wanem long bikpela lain? Ol Sumatin Bilong Baibel i bin ting olsem wanem long bikpela lain?

² Sampela man i tok, dispela bikpela lain olsem “planti manmeri tru” i makim ol man i kamap Kristen na ol i no bilong lain Juda, o i makim ol Kristen ol i bilong i go long heven na ol man i bin givim pen long ol na kilim ol i dai. Bipo ol Sumatin Bilong Baibel tu i ting dispela lain i olsem namba tu lain bilong heven. Volyum Namba 1 bilong sampela buk (Studies in the Scriptures, The Divine Plan of the Ages ol i wokim long 1886) i tok: “Ol i lus long kisim sia king na long kamap kain olsem God, tasol ol bai kamap spirit na i stap daun. Ol i kisim mak, tasol tingting bilong graun i pulim ol na ol i no givim laip bilong ol olsem ofa.” Na inap long 1930 ol dispela Sumatin i gat tingting olsem buk Light Buk Namba Wan i kolim: “Ol manmeri bilong dispela bikpela lain ol i no bihainim tok long kamap strongpela witnes bilong autim tok bilong Bikpela.” Ol dispela Sumatin Bilong Baibel i tok, dispela lain i ting ol i stretpela man, na ol i save long tok i tru, tasol ol i no autim tok tumas. Ol bai stap olsem namba 2 lain long heven na ol i no ken wok wantaim Krais long mekim wok king.

 3. (a) Sampela ol man i gat gutpela bel na ol i bin wok strong long autim tok, ol i gat wanem tingting na laik? (b) Wastaua (tok Inglis) bilong 1923 i tok wanem long tok piksa bilong sipsip na meme?

³ Tasol i gat sampela man moa ol i bung wantaim ol Kristen bilong liklik lain em God i bin makim ol, na bihain ol i wok strong long autim tok. Ol i no gat tingting long i go long heven; ol i gat tingting long i stap laip long graun. Ol i gat tingting wankain olsem wanpela pablik-tok em lain bilong Jehova i bin kamapim long 1918 i go inap 1922. Pastaim nem bilong dispela pablik-tok em olsem: “Pasin Bilong Dispela Graun i Pinis​—⁠Planti Milion Man Bilong Nau i No Ken i Dai.”a Bihain liklik, nius Wastaua (tok Inglis) bilong Oktoba 15, 1923, i kamapim insait bilong tok piksa bilong Jisas long sipsip na meme (Matyu 25⁠:​31-​46) na i tok: “Ol sipsip i makim ol manmeri bilong olgeta lain, em God i no bin makim ol, tasol ol i laik bihainim pasin i stret na ol i bilip long Krais Jisas em i Bikpela na ol i tingting long i stap aninit long em na kisim gutpela sindaun, na em bai bosim gut ol.”

 4. Long 1931 ol i bin kisim wanem nupela save, o lait, long dispela lain bilong i stap long graun? Na long 1932? Na long 1934?

⁴ Na long 1931 wanpela buk (Vindication, Buk 1) i stori long Esekiel sapta 9 na long sampela man long las taim ol bai kisim mak long pes bilong ol, na ol i olsem ol dispela sipsip long tok piksa bilong Jisas. Na narapela buk (Vindication, Buk 3 ol i bin wokim long 1932) i toktok long stretpela man Jonadap, em i no wanpela Israel, na em i go wantaim King Jehu bilong Israel long karis bilong Jehu; em i laik lukim Jehu i givim bel long pinisim ol man bilong lotu giaman. (2 King 10⁠:​15-​17) Dispela buk i tok: “Jonadap i makim wanpela lain nau i stap long graun long taim wanpela wok i stap kain olsem wok bilong Jehu [long tokaut long kot bilong Jehova bai painim ol man], na dispela lain i gat gutpela bel na ol i no wanbel long oganaisesen bilong Satan; ol i bihainim pasin i stret. Bikpela bai lukautim ol long taim bilong Armagedon na bai ol i no ken lus long dispela taim nogut, na em bai givim laip oltaim long ol long graun. Ol i olsem lain ‘sipsip.’ ” Na long 1934 Wastaua (tok Inglis) i tok klia olsem ol dispela Kristen i gat tingting long i stap laip long graun ol i mas dediket long Jehova na kisim baptais. Jehova i wok long kamapim klia tru ol save o lait long dispela lain bilong graun.​—⁠Sindaun 4⁠:⁠18.

 5. (a) Long 1935 wanem tok i kamap bilong tok klia long dispela bikpela lain manmeri ol i husat? (b) Long 1935, taim J. F. Rutherford i tokim ol man long kibung, ‘Ol man i laik i stap oltaim long graun, plis yupela sanap,’ wanem samting i kamap?

⁵ Taim i kamap pinis bilong Jehova i kamapim long ples klia insait bilong Kamapim Tok Hait 7⁠:​9-​17! (Song 97⁠:11) Wanpela kibung i laik kamap long Wosington, D.C., long Amerika long Me 30 i go inap Jun 3, 1935, na planti taim Wastaua (tok Inglis) i tok, ating dispela kibung bai helpim gut dispela lain em Jonadap i makim. Tru tumas, kibung i bin mekim olsem! Brata J. F. Rutherford, em long dispela taim em i go pas long wok bilong autim tok long olgeta hap, em i mekim wanpela gutpela tok, nem bilong en “Bikpela Lain Manmeri,” na 20,000 manmeri ol i harim. Em i kamapim tok bilong Baibel i makim olsem dispela lain narapela sipsip i wankain olsem dispela bikpela lain manmeri em Kamapim Tok Hait 7⁠:9 i kolim. Taim Rutherford i laik pinisim tok em i tok olsem: “Ol man i laik stap oltaim long graun, plis yupela sanap.” Orait, planti man i kirap sanap, em bikpela hap bilong dispela lain i stap long kibung. Nau presiden i tokaut olsem: “Lukim! Bikpela lain manmeri!” Ol i kirap nogut long harim dispela tok, na i no gat man i toktok, tasol bihain liklik ol i kirap singaut strong na amamas. Lain em Jon i piksa bilong ol ol i amamas tru na lain em Jonadap i piksa bilong ol, ol tu i amamas! Long de bihain 840 nupela Witnes i kisim baptais, na klostu olgeta i bilong dispela bikpela lain.

Bilong Save Tru, Bikpela Lain i Husat

 6. (a) Olsem wanem yumi ken save tru long dispela bikpela lain Kristen bilong nau ol i dediket pinis na ol i tingting long i stap laip long graun? (b) Waitpela klos bilong bikpela lain i makim wanem samting?

⁶ Olsem wanem yumi ken save tru olsem dispela bikpela lain em ol Kristen bilong nau ol i dediket pinis na ol i tingting long i stap laip long graun bilong God? Long driman, pastaim Jon i bin lukim wanpela lain long heven, em Jisas i “bin baim bek ol . . . bilong God,” na ol i “bilong olgeta tok ples, na bilong olgeta kain skin, na bilong olgeta kantri.” (KTH 5⁠:​9, 10) Bikpela lain tu i bilong olgeta tok ples na skin na kantri, tasol ol i no bilong i go long heven. God i bin makim hamas man i mas insait long Israel bilong God, tasol em i no bin mekim olsem long dispela bikpela lain. I no gat man inap save hamas man bai insait long bikpela lain. Ol i wasim klos bilong ol long blut bilong Pikinini Sipsip na klos i kamap waitpela, na nau dispela waitpela klos bilong ol i makim olsem ol i kamap stretpela man long ai bilong Jehova, long wanem ol i bilip long ofa Jisas i bin mekim bilong helpim ol. (KTH 7⁠:14) Ol i holim lip bilong diwai pam na ol i singaut amamas long Krais em i King bilong ol.

7, 8. (a) Taim aposel Jon i driman na lukim ol man i holim lip bilong diwai pam, em i tingim wanem samting? (b) Taim bikpela lain i holim lip o han bilong diwai pam samting, dispela i makim wanem samting?

⁷ Taim Jon i lukim ol samting long driman hia ating em i tingim samting i bin kamap 60 yia bipo, olsem long laspela wik bilong Jisas i bin stap long graun. Long de 9 bilong mun Nisan long yia 33 ol man i bin bung bilong amamas long Jisas taim em i laik go insait long Jerusalem, “na ol i kisim ol han bilong diwai pam na ol i go bungim em long rot. Na ol i singaut olsem, ‘Amamas long God. God i ken mekim gut long dispela man i kam long nem bilong [Jehova]. Em i king bilong Israel.’ ” (Jon 12⁠:​12, 13) Na i olsem tu long bikpela lain em Jon i lukim ol, ol i holim han bilong diwai pam na ol i singaut amamas bilong makim olsem ol i orait tru long givim bel long Jisas em dispela King Jehova i bin makim.

⁸ Na taim Jon i lukim ol lip bilong diwai pam na em i harim ol i singaut na amamas, ating em i tingim ol Israel bilong bipo ol i save wokim Ol Bikpela De Bilong I Stap Long Haus Win. Long dispela bung Jehova i tok: “Long de namba wan yupela i mas kisim sampela gutpela kaikai tru long ol diwai yupela i save kaikai pikinini bilong en. Na yupela i mas kisim ol han bilong diwai det na ol han bilong ol diwai i gat planti lip. Na yupela i mas amamas inap long 7-pela de long ai bilong mi, [Jehova], God bilong yupela.” Ol dispela han bilong diwai pam i bilong makim olsem ol i amamas. Ol dispela haus win i bilong kirapim ol long tingim taim Jehova i bin helpim ol long lusim Isip na ranawe i go long ples nating na ol i slip long ol haus sel. “Ol man bilong narapela kantri i stap wantaim [ol], na ol pikinini, papa bilong ol i dai pinis, na ol meri, man bilong ol i dai pinis,” ol tu i bung wantaim ol long dispela taim. Olgeta Israel wantaim “i mas amamas tru.”​—⁠Wok Pris 23⁠:40; Lo 16⁠:​13-​15.

 9. Bikpela lain i singaut amamas na i tok wanem?

⁹ Dispela bikpela lain manmeri i no bilong Israel bilong spirit, tasol i stret ol i holim lip bilong diwai pam, long wanem, ol i save God na Pikinini Sipsip i helpim ol long winim ol hevi na pait, olsem na ol i amamas. Jon i tok olsem, em i tok: “Ol i singaut strong olsem, ‘God bilong yumi em i save sindaun long sia king bilong en, na Pikinini Sipsip, tupela tasol i save kisim bek yumi na mekim yumi i stap gut.’ ” (KTH 7⁠:10) Ol i bilong ol narapela narapela tok ples o lain samting, tasol “ol i singaut strong” wantaim olsem wanpela nek tasol. Olsem wanem ol inap mekim olsem, maski ol i bilong planti ol narapela narapela kantri na tok ples?

10. Olsem wanem bikpela lain i wanbel long “singaut strong,” olsem wanpela nek tasol, maski ol i bilong planti ol narapela narapela kantri na tok ples?

¹⁰ Dispela bikpela lain i insait long wanpela oganaisesen hia long graun long nau, em ol i bilong olgeta lain na tok ples, tasol ol i stap wanbel tru. I no gat narapela oganaisesen i stap wanbel tru olsem. Maski ol i bilong wanem wanem lain o kantri, ol i save bihainim wankain pasin, na long olgeta taim ol i bihainim ol stretpela lo bilong Baibel, maski ol i stap we. Ol i no insait long wok politik o pait bilong ol man, nogat; “ol i paitim ol bainat bilong ol i kamap olsem ol ain bilong brukim graun.” (Aisaia 2⁠:⁠4) Ol i no bruk long ol narapela narapela lotu, olsem na ol i no gat ol narapela narapela tok o singaut olsem ol lotu i gat nem Kristen, em tok bilong ol i paul na i no klia liklik, nogat; na ol i no gat lain pris pasto tu bilong mekim wok bilong ol long litimapim nem bilong God, nogat. Na ol i no litimapim nem bilong spirit holi na tok, dispela samting tasol i givim laip long ol; long wanem, ol i no wokman bilong wanpela god triwan. Maski ol i stap long planti ol narapela narapela hap bilong graun, olsem 200 samting, ol i wanbel long kolim nem bilong Jehova, olsem long wanpela nek tasol, long wanem, olgeta i save mekim wanpela gutpela tok ples, em tok i tru. (Sefanaia 3⁠:⁠9) Ol i save tokaut long ol man na i tok, Jehova em Man bilong kisim bek ol, na em bai mekim olsem long rot bilong Krais Jisas, em i Nambawan Rot bilong Jehova long helpim ol man long kisim laip.​—⁠Song 3⁠:8; Hibru 2⁠:⁠10.

11. Olsem wanem ol nupela masin samting bilong nau i bin helpim bikpela lain long mekim singaut bilong ol i go bikpela moa?

¹¹ Ol man bilong nau i wokim ol nupela masin samting na dispela i helpim bikpela lain long mekim bikpela singaut moa yet. I no gat narapela lotu long graun ol i gat wok long wokim ol buk na nius long 400 tok ples samting bilong lainim ol man long tok bilong Baibel, long wanem i no gat narapela lotu i gat tingting long helpim olgeta man long lainim ol tok inap helpim ol long i stap wanbel. Lain Bilong Bosim Ol Witnes Bilong Jehova i helpim sampela man long wokim wanpela masin kompyuta ol i kolim MEPS na long dispela rot ol inap wokim ol buk na nius samting. Long nau long planti kantri, winim 125, i gat sampela kain masin kompyuta olsem MEPS bilong helpim ol long wokim nius Wastaua long kain kain tok ples i kamap long wankain taim olsem bilong tok Inglis na i gat wankain tok long en. Ol i wokim kain Wastaua olsem long planti tok ples, winim 130. Na lain bilong Jehova i wokim ol buk long planti tok ples wantaim, olsem dispela buk nau yu kaunim. Klostu olgeta Witnes Bilong Jehova i bilong dispela bikpela lain, na long olgeta yia ol i save tilim planti handet milion buk na nius long ol tok ples planti man i save long en, na planti man bilong olgeta lain na tok ples ol i ken lainim tok bilong Baibel na bung wantaim bikpela lain na mekim bikpela singaut wantaim ol.​—⁠Aisaia 42⁠:​10, 12.

Long Heven o Long Graun?

12, 13. Olsem wanem bikpela lain “i sanap i stap long pes bilong sia king na long ai bilong Pikinini Sipsip”?

¹² Jon i tok, bikpela lain “i sanap i stap long pes bilong sia king,” tasol olsem wanem yumi save dispela i no makim olsem ol i stap long heven? I gat planti samting i kamapim long ples klia bekim bilong dispela askim. Long tok Grik dispela tok “long pes bilong” (e·noʹpi·on) i olsem “long ai bilong,” na i olsem ol man i stap long graun ol i stap long ai bilong Jehova, na sampela taim Baibel i tok olsem. (1 Timoti 5⁠:21; 2 Timoti 2⁠:14; Galesia 1⁠:20) Taim lain Israel i stap long ples nating, wanpela taim Moses i tokim Aron: “Bikpela i harim pinis tok kros bilong olgeta manmeri. Olsem na tokim olgeta i mas i kam sanap klostu long Bikpela.” (Kisim Bek 16⁠:⁠9) Tasol i no olsem ol i mas i go long heven na bai ol i ken sanap klostu long Jehova, olsem long pes bilong em, nogat. (Lukim Wok Pris 24⁠:⁠8.) Ol i stap long ples nating hia long graun na ol i stap long ai bilong Jehova na em i lukluk i kam long ol.

¹³ Na Baibel i tok: “Taim Pikinini Bilong Man i kam bek olsem king . . . olgeta lain manmeri bai ol i kam bung long pes bilong em.” Long taim bilong truim bilong dispela tok profet olgeta man bilong graun i no ken i stap long heven, nogat. Ol man “bilong kisim pe nogut, [na] pen i save stap oltaim” ol bai i no stap long heven. (Matyu 25⁠:​31-​33, 41, 46) Long dispela taim ol man bai stap long graun long ples klia long ai bilong Jisas na em bai lukluk long ol bilong skelim pasin bilong ol. Na i olsem tasol long bikpela lain “i sanap i stap long pes bilong sia king na long ai bilong Pikinini Sipsip.” Jehova na King bilong em, em Krais Jisas, tupela i lukim dispela bikpela lain na tupela i orait long ol.

14. (a) Husat i “raunim . . . sia king” na “i sanap long maunten Saion [long heven]”? (b) Bikpela lain i save mekim wok bilong God “long haus bilong en,” tasol olsem wanem yumi save ol i no bilong lain pris?

¹⁴ Na Jon i tok, 24 hetman na 144,000 man em God i bin makim ol long spirit holi, ol i “raunim . . . sia king” bilong Jehova na ol i “sanap long maunten Saion [long heven].” (KTH 4⁠:4; 14⁠:⁠1) Tasol dispela bikpela lain “planti manmeri tru” ol i no lain pris; olsem na ol i no kisim dispela bikpela wok. Tru, Kamapim Tok Hait 7⁠:15 i tok, ol i mekim wok bilong God “long haus bilong en.” Tasol dispela haus i no makim Rum Tambu Tru, nogat. Em i makim banis bilong haus lotu spirit bilong God hia long graun. Ol i tanim tok Grik na·osʹ olsem “haus lotu,” na planti taim dispela i makim bikpela haus ol i wokim bilong lotuim Jehova. Long nau em i makim wanpela bikpela samting i stap long heven na graun wantaim.​—⁠Lukim Matyu 26⁠:61; 27⁠:​5, 39, 40; Mak 15⁠:​29, 30; Jon 2⁠:​19-​21.

Planti Ol i Singaut Litimapim Nem Bilong Jehova

15, 16. (a) Taim ol lain bilong heven i lukim bikpela lain, ol i mekim wanem? (b) Ol ensel i mekim wanem taim ol i lukim ol narapela narapela samting Jehova i mekim bilong kamapim long ples klia laik bilong em? (c) Yumi manmeri bilong graun i ken mekim wanem na bai yumi tu inap insait long dispela singsing bilong litimapim nem bilong Jehova?

¹⁵ Bikpela lain i litimapim nem bilong Jehova, na i gat sampela moa tu i mekim olsem. Jon i tok: “Olgeta ensel ol i sanap raunim sia king wantaim ol hetman na ol 4-pela samting i stap laip. Na ol i lukluk i go long sia king na ol i brukim skru na putim pes bilong ol i go daun long graun, na ol i lotu long God. Ol i tok olsem, ‘I tru. Yumi amamas moa yet long God bilong yumi, na yumi tokaut long biknem bilong em. Em i gat olgeta gutpela tingting, na yumi givim tenkyu long em, na litimapim nem bilong em. Em i gat strong tru. Yes, olgeta bikpela strong i stap long em. Oltaim oltaim dispela olgeta samting ol i bilong God tasol. I tru.’ ”​—⁠KTH 7⁠:​11, 12.

¹⁶ Taim Jehova i wokim graun, olgeta ensel holi bilong em “i bin lukim” na ol i singsing na ol “i amamas na singaut.” (Jop 38⁠:⁠7) Taim ol i kisim save long ol narapela narapela samting Jehova i mekim bilong kamapim laik bilong em, ating long olgeta taim, ol i singaut na litimapim nem bilong em. Taim 24 hetman​—⁠em lain 144,000 i kisim pinis biknem long heven​—⁠ol i singaut strong na i tok amamas long Pikinini Sipsip, olgeta ensel bilong God long heven ol tu i kirap litimapim nem bilong Jisas na God Jehova. (KTH 5⁠:​9-​14) Ol i bin amamas long lukim Jehova i kamapim tru laik bilong em na em i kirapim bek long matmat ol man i bin stap gut long God na God i bin makim ol long spirit holi, na ol i kisim gutpela wok long heven. Nau olgeta gutpela lain bilong Jehova long heven ol i kirap singsing na litimapim nem bilong Jehova na Jisas taim ol i lukim bikpela lain ol i stap. Tru tumas, olgeta wokman bilong Jehova i amamas, long wanem, ol i stap long de bilong Bikpela. (KTH 1⁠:10) Yumi olgeta hia long graun i ken amamas, long wanem, yumi gat gutpela wok na yumi tu i ken insait long dispela singsing bilong litimapim nem bilong Jehova na autim tok long Kingdom bilong em!

Bikpela Lain i Kamap

17. (a) Wanpela bilong 24 hetman i askim Jon long wanem samting? Dispela hetman i kisim save long bekim bilong dispela askim, na ating dispela i makim wanem samting? (b) Bekim bilong dispela askim i kamap long wanem taim?

¹⁷ Long taim aposel Jon i bin i stap long graun, na i go inap long de bilong Bikpela, ol Kristen em God i makim ol, ol i no save husat dispela bikpela lain. Olsem na i stret wanpela bilong 24 hetman i mekim wok olsem maus bilong dispela liklik lain Kristen i go pinis long heven na bai em i ken givim askim long Jon na kirapim tingting bilong em. “Orait wanpela bilong ol hetman em i askim mi olsem, ‘Ol dispela manmeri i bin putim ol longpela waitpela klos, em ol husat? Ol i kam long wanem hap?’ Na mi bekim tok bilong em olsem, ‘Bikman, yu yet yu save.’ ” (KTH 7⁠:​13, 14a) Dispela hetman inap painim bekim bilong dispela askim na givim long Jon. Ating dispela i makim olsem ol dispela Kristen insait long lain 24 hetman i bin kirap pinis long matmat na i stap pinis long heven ol i insait long wok bilong salim ol tok i tru bilong God i kam daun long lain bilong God i stap long graun nau long dispela taim. Pastaim dispela lain em Jon i piksa bilong ol, ol i no save husat dispela bikpela lain, tasol ol i lukim ol samting Jehova i mekim namel long ol na dispela i givim save long ol, na nau ol i save pinis husat dispela bikpela lain. Long 1935 em taim bilong Jehova long givim dispela bikpela ‘lait’ olsem save long ol, i olsem bekim bilong dispela askim, na kwiktaim ol i pilim dispela tok na dispela save na lait Jehova i givim long ol.

18, 19. (a) Long 1920 na i kam inap 1933 samting, lain em Jon i piksa bilong ol, ol i tingting tasol long husat? Tasol husat ol i harim tok bilong ol? (b) Long 1935 ol i save pinis long bikpela lain i husat, na nau ol i save long wanem samting bilong lain 144,000? (c) Yumi tingim hamas man i kam long Memorial long bipo na long nau, na hamas man i bin kisim bret na wain, na nau yumi save long wanem samting?

¹⁸ Long 1920 i go inap 1932 o 1933 samting, lain em Jon i piksa bilong ol, ol i tingting tasol long husat bai go long heven, na ol i stori long dispela tasol long ol buk bilong ol na long taim ol i autim tok. Olsem na ating long dispela taim sampela man moa i mas kam insait yet bilong inapim lain 144,000. Planti man i harim tok bilong ol na ol i givim bel long autim tok, tasol ol dispela man i no gat laik long i go long heven, nogat; ol i laik i stap oltaim long Paradais long graun. Ol i no bilong i go long heven, na ol i no bilong liklik lain sipsip; ol i bilong lain arapela sipsip. (Luk 12⁠:32; Jon 10⁠:16) Taim dispela save i kamap ples klia long 1935 em i makim olsem lain 144,000 em inap pinis.

¹⁹ Yumi inap save long dispela, long wanem, long 1938 i gat 59,047 Witnes Bilong Jehova i save autim tok, na 36,732 bilong ol i kisim bret na wain long Memorial bilong tingim i dai bilong Jisas, na dispela i makim olsem ol i bilong i go long heven. Long dispela taim na i kam inap nau lain bilong ol i wok long i go liklik, long wanem, ol dispela gutpela Witnes Bilong Jehova ol i wok long i dai i dai na wok bilong ol long graun i pinis. Long 2005 inap 8,524 tasol i kisim bret na wain bilong Memorial, tasol planti manmeri moa yet, inap 16,390,116, ol i bin i kam long Memorial.

20. (a) Long taim bilong Namba 2 Pait, J. F. Rutherford i bin tok wanem long bikpela lain? (b) Tasol olsem wanem nau yumi ken tok, dispela lain i bikpela tru?

²⁰ Taim Namba 2 Pait i kirap, Satan i wok strong long pasim wok bilong bungim bikpela lain. Planti kantri i tambuim wok bilong Jehova. Long dispela taim nogut, na klostu long taim J. F. Rutherford i dai long 1942, em i tok: “Ating . . . dispela bikpela lain i no ken bikpela tumas olsem bipo yumi bin tingim.” Tasol God yet i mekim na dispela lain i kamap bikpela! Long 1946 lain Witnes i autim tok em i go bikpela inap 176,456, na klostu olgeta i bilong bikpela lain tasol. Na long 2005 i gat 6,390,022 Witnes i stap gut long mekim wok bilong Jehova long 235 kantri​—⁠em BIKPELA LAIN tru! Na ol i wok long i go bikpela moa yet.

21. (a) Olsem wanem wok bilong bungim lain bilong God long de bilong Bikpela em i stret olsem Jon i bin driman? (b) Truim bilong sampela bikpela tok profet i bin kamap olsem wanem?

²¹ Long de bilong Bikpela em God i bin wok long kisim na bungim lain bilong em, na i stret olsem Jon i bin lukim long driman, long wanem, pastaim God i kisim ol man bilong inapim lain 144,000, na bihain em i kisim ol man bilong bikpela lain. Aisaia i bin tok profet long taim bilong yumi na i tok: “Wanpela taim bai i kamap bihain” na sampela man bilong olgeta lain ol bai kam insait long gutpela lotu bilong Jehova. Na tru tumas, yumi amamas long “nupela skai na nupela graun” Jehova i wokim. (Aisaia 2⁠:​2-4; 65⁠:​17, 18) God i wok long “bungim olgeta samting long Krais, ol samting bilong heven na bilong graun tu.” (Efesus 1⁠:10) Long taim bilong Jisas na i kam inap long nau, God i bin wok long bungim “ol samting bilong heven,” em dispela lain God i bin makim ol bilong i stap king long Kingdom bilong heven. Na long nau dispela bikpela lain i kamap, em ol narapela sipsip, na ol i olsem ol namba wan lain bilong “ol samting . . . bilong graun.” Sapos yu insait long ol dispela wok, dispela bai helpim yu long i stap amamas oltaim.

Ol Gutpela Samting Em Bikpela Lain Bai Kisim

22. Jon i kisim wanem sampela save moa bilong bikpela lain?

²² Long rot bilong Jehova, Jon i kisim sampela save moa bilong bikpela lain: “Em [hetman] i tokim mi olsem, ‘Ol dispela manmeri ol i bin [winim taim bilong bikpela hevi tru]. Na ol i bin wasim ol klos bilong ol long blut bilong Pikinini Sipsip, na ol klos i kamap waitpela. Olsem na ol i save sanap long pes bilong sia king bilong God. Na long san na long nait ol i save stap long haus bilong en na mekim wok bilong en. Na God i save sindaun long dispela sia king, em yet bai i stap wantaim ol na lukautim ol.’ ”​—⁠KTH 7⁠:14b, 15.

23. Wanem dispela bikpela hevi tru em bikpela lain bai “winim”?

²³ Bipo Jisas i bin tok, em bai kam wantaim bikpela namba bilong Kingdom, na bihain “bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.” (Matyu 24⁠:​21, 22) Bilong truim dispela tok profet, ol ensel bai lusim 4-pela win na dispela bai bagarapim ol samting bilong Satan hia long graun. Bikpela Babilon bai kisim bagarap pastaim, em olgeta lotu giaman. Na taim dispela “bikpela hevi” i go bikpela tru, long dispela taim Jisas bai helpim hap lain bilong 144,000 ol i stap yet long graun, na bikpela lain tu wantaim na bai ol i ken abrusim bagarap.​—⁠KTH 7⁠:1; 18⁠:⁠2.

24. Ol manmeri bilong bikpela lain i mas mekim wanem na bai ol i no ken bagarap?

²⁴ Ol manmeri bilong bikpela lain i mas mekim wanem na bai ol i no ken bagarap? Hetman i tokim Jon “ol i bin wasim ol klos bilong ol long blut bilong Pikinini Sipsip, na ol klos i kamap waitpela.” I olsem ol i bilip long Jisas, em i Man bilong baim bek ol, na ol i bin dediket long Jehova, olsem tok promis na givim bel olgeta long em, na ol i kisim baptais long wara, em bilong makim olsem ol i bin dediket pinis, na ol i bihainim “gutpela pasin . . . [na] stap stret long ai bilong God” na bai bel bilong ol i no gat tok. (1 Pita 3⁠:​16, 21; Matyu 20⁠:28) Olsem na ol i stap klin na stret long ai bilong Jehova, na “pasin bilong dispela graun i no ken mekim [ol] i kamap doti long ai bilong God.”​—⁠Jems 1⁠:⁠27.

25. (a) Olsem wanem bikpela lain i mekim wok bilong Jehova ‘long san na long nait long haus bilong em’? (b) Olsem wanem Jehova “i stap wantaim [bikpela lain] na lukautim ol”?

²⁵ Na bikpela lain i wok strong long autim tok bilong Jehova, “na long san na long nait ol i save stap long haus bilong en na mekim wok bilong en.” Olsem wanem long yu? Yu dediket pinis long Jehova na yu insait long dispela bikpela lain? Sapos olsem, yu inap mekim gutpela wok bilong Jehova insait long banis bilong bikpela haus lotu spirit bilong em hia long graun. Long nau bikpela lain i wok aninit long liklik lain em God i bin makim ol, na bikpela lain i mekim bikpela wok moa long autim tok, winim bilong liklik lain. Ol i mas mekim ol wok bilong skin, tasol planti handet tausen i painim pinis rot bilong mekim wok painia tu. Tasol sapos yu no inap mekim wok painia, na yu dediket pinis na yu bilong bikpela lain, yu ken amamas, long wanem yu bilip na yu mekim wok bilong God, olsem na em i makim yu i olsem stretpela man na yu kamap pren bilong em, olsem na em i amamas long yu ken kam insait long dispela haus bilong em. (Song 15⁠:​1-5; Jems 2⁠:​21-​26) Long dispela rot Jehova i save “stap wantaim” ol man i laikim tumas em, na em i mekim gut long ol na lukautim ol.​—⁠Sindaun 18⁠:⁠10.

26. Wanem sampela gutpela samting moa bikpela lain bai kisim?

²⁶ Hetman i tok moa, olsem: “Ol bai i no hangre moa, na nek bilong ol bai i no drai gen. San bai i no inap boinim skin bilong ol, na i no gat wanpela samting bai i mekim skin bilong ol i hat nogut tru. Long wanem, Pikinini Sipsip i stap namel tru long sia king, em bai i stap wasman bilong ol. Em bai i bringim ol i go long ol hul i gat wara i kamap, em wara bilong givim laip. Na God bai i mekim drai wara bilong ai bilong ol, na ol bai i no krai moa.” (KTH 7⁠:​16, 17) Tru tumas, Jehova i save mekim gut long man! Tasol olsem wanem long insait bilong ol dispela tok?

27. (a) Olsem wanem tok bilong Aisaia na bilong hetman i wankain liklik? (b) Olsem wanem yumi ken save, truim bilong tok bilong Aisaia i wok long kamap long lain Kristen long taim bilong Pol?

²⁷ I gat narapela tok profet i wankain liklik, em i tok: “Bikpela i tokim wokman bilong en olsem, ‘Mi yet mi bin makim taim bilong kisim bek yu na mekim gut long yu, na long dispela taim stret mi bin harim krai bilong yu na helpim yu. . . . Bai ol i no sot long kaikai na wara, na hatpela san na win bai i no inap kukim skin bilong ol. Long wanem, man bilong marimari long ol bai i lukautim ol gut, olsem wasman bilong sipsip i bringim ol lain sipsip i go long ol ples i gat planti gras na gutpela wara.’ ” (Aisaia 49⁠:​8, 10; lukim tu Song 121⁠:​5, 6.) Aposel Pol i kolim hap tok bilong dispela tok profet, na em i makim truim bilong en i kamap long “taim bilong God i kisim bek yumi.” Dispela taim i kirap long de Pentikos long yia 33. Pol i tok: “God i tok olsem, ‘Mi yet mi bin makim taim bilong kisim bek yu na mekim gut long yu, na long dispela taim stret mi bin harim krai bilong yu na helpim yu.’ Harim. Nau tasol em i taim bilong God i mekim gut long yumi. Nau tasol em i taim bilong God i kisim bek yumi.”​—⁠2 Korin 6⁠:⁠2.

28, 29. (a) Long taim bilong ol aposel wanem samting i kamap na i truim tok bilong Aisaia? (b) Wanem samting i painim bikpela lain na i truim tok bilong Kamapim Tok Hait 7⁠:​16? (c) Taim bikpela lain i kam long ‘wara bilong laip,’ dispela bai helpim ol olsem wanem? (d) Long bihain, olsem wanem bikpela lain bai narapela kain long ol narapela lain bilong graun?

²⁸ Long bipo, olsem wanem na sampela Kristen i no hangre na nek bilong ol i no drai na san i no bin boinim ol? Tru, sampela Kristen long bipo ol i sot long kaikai na wara bilong bel. (2 Korin 11⁠:​23-​27) Tasol ol i gat planti kaikai na wara bilong spirit. Jehova i bin lukautim ol gut long ol samting bilong spirit, olsem na ol i no bin sot liklik long kaikai na wara bilong spirit. Na Jehova i no bin kros long ol long taim em i bin belhat long lain Juda long yia 70 na em i bagarapim na pinisim dispela pasin na lo ol Juda i stap aninit long en. Na i olsem tu long Kamapim Tok Hait 7⁠:​16, em truim bilong en i painim bikpela lain long nau. Dispela lain wantaim liklik lain em God i makim, ol i kisim planti ol gutpela samting bilong spirit.​—⁠Aisaia 65⁠:13; Nahum 1⁠:​6, 7.

²⁹ Sapos yu bilong bikpela lain na yu gat gutpela bel, bai amamas i pulap long bel bilong yu na bai yu mekim ‘singsing bilong amamas,’ maski ol hevi na traim i painim yu nau long laspela taim bilong Satan i bosim graun. (Aisaia 65⁠:14) Olsem na long nau tu Jehova inap long ‘rausim aiwara long ai bilong yu,’ na belhat bilong God i no ken hatim o boinim yu, na taim ol ensel i lusim 4-pela win dispela belhat bilong Jehova i no ken bagarapim yu. Taim dispela belhat bilong em i bagarapim pinis ol samting, Pikinini Sipsip bai bringim yu long samting bilong helpim na strongim yu, em “ol hul i gat wara i kamap, em wara bilong givim laip” long ol man, na dispela i makim ol samting Jehova i putim bilong helpim yu long kisim laip oltaim. Sapos yu bilip long blut bilong Pikinini Sipsip, dispela bilip bilong yu bai helpim yu long kamap gutpela olgeta. Yupela ol manmeri bilong bikpela lain, em yupela inap planti milion, yupela i no ken kisim bagarap wantaim ol narapela lain, na yupela i no ken i dai! Long dispela taim aiwara bilong yupela bai pinis olgeta.​—⁠KTH 21⁠:⁠4.

Stap Strong na Bai Yumi No Ken Lus

30. Wanem ol gutpela samting yumi ken tingim bilong bihain, olsem Jon i bin lukim long driman? Husat tasol inap long “stap gut”?

³⁰ Ol dispela tok i makim gutpela samting tru yumi ken tingim bilong bihain! Jehova i sindaun long sia king bilong em na olgeta wokman bilong em long heven na long graun ol i bungim nek bilong ol long litimapim nem bilong em. Ol wokman bilong em long graun ol i save, i gutpela samting tru na ol inap insait long dispela wok bilong litimapim nem bilong em. Liklik taim nau Jehova na Jisas Krais bai givim strafe long ol man nogut, na long dispela taim ol man bai singaut na i tok: “Dispela bikpela De bilong tupela i belhat long ol manmeri na i bekim pe nogut long ol, nau em i kamap pinis. Na husat inap sakim strong bilong tupela na i stap gut?” (KTH 6⁠:17) Orait, husat tru bai stap gut? I no planti. Liklik hap bilong lain 144,000​—⁠sapos ol i stap yet long graun long dispela taim​—⁠na dispela bikpela lain bilong ol narapela sipsip, ol tasol bai “stap gut” na i no ken kisim bagarap.​—⁠Jeremaia 35⁠:19; 1 Korin 16⁠:⁠13.

31. Liklik lain wantaim bikpela lain i lukim ol samting i kamap bilong truim driman bilong Jon na dispela i mas kirapim ol long mekim wanem?

³¹ Olsem na ol Kristen em God i bin makim ol na Jon i piksa bilong ol, ol i wok “strong bilong kamap long mak na kisim prais. Dispela prais em i olsem: Long wok bilong Krais Jisas, God i singautim mi bilong i go antap na i stap gut tru wantaim em.” (Filipai 3⁠:14) Ol dispela Kristen i lukim ol samting nau i wok long kamap, olsem na ol i save ol i mas wok strong na ol i no ken les. (KTH 13⁠:10) Ol i bin mekim wok bilong Jehova inap planti yia pinis, na ol i sanap strong yet long bilip, na ol i amamas long wanem ol i tingim nem bilong ol i stap “long buk bilong [God] long heven.” (Luk 10⁠:20; KTH 3⁠:⁠5) Na bikpela lain tu ol i save, “ol manmeri i stap strong inap long las de, God bai i kisim bek ol” dispela manmeri tasol. (Matyu 24⁠:13) God i makim dispela bikpela lain na bai ol i mas winim dispela “bikpela hevi” bai kamap, tasol olgeta wan wan i mas wok strong long stap gut na mekim wok bilong God.

32. I gat tupela lain tasol bai “stap gut” long De bilong Jehova long kamapim belhat bilong em, olsem na yumi gat bikpela tingting long husat moa?

³² I gat dispela tupela lain tasol bai “stap gut” long taim Jehova bai kamapim kros bilong em, na i no gat narapela lain. Orait, olsem wanem long ol dispela planti milion man ol i gat hap tingting long ofa Jisas i bin mekim na long olgeta yia ol i save kam long Memorial bilong tingim i dai bilong Jisas, tasol ol i no gat strongpela bilip long dispela ofa inap long kirapim ol long dediket na kisim baptais na kamap wokman bilong God na mekim wok bilong em? Na olsem wanem long sampela moa, bipo ol i mekim wok bilong Jehova, tasol ol “i wari long ol samting bilong bodi” na nau ol i no stap moa long dispela wok? I gutpela sapos ol dispela man i ken kirap na “was i stap” na bai ol i ken “abrusim olgeta dispela samting i laik kamap,” na ol i ken “sanap long ai bilong Pikinini Bilong Man,” em Krais Jisas. Taim i sot pinis!​—⁠Luk 21⁠:​34-​36.

[Futnot]

[Blok long pes 119]

God Tasol Inap Kamapim Insait Bilong Ol Tok

Inap planti yia, dispela lain Jon i piksa bilong ol, ol i bin traim kisim save long bikpela lain i husat, tasol ol i no inap. Bilong wanem? Gutpela man Josep i tok: “God tasol i save soim yumi as bilong ol [tok].” (Stat 40⁠:⁠8) Wanem taim God i save kamapim insait bilong truim bilong tok profet bilong em? Na em i mekim olsem wanem? Em i save mekim long taim truim i laik kamap, o long taim truim i wok long kamap, olsem bai ol wokman bilong em i ken kisim gut save long en taim ol i wok long painim dispela save. God i givim dispela save long yumi “bilong strongim bel bilong yumi na mekim yumi sanap strong.”​—⁠Rom 15⁠:⁠4.

[Blok long pes 124]

Bikpela lain

▪ ol i bilong olgeta kantri na lain man na tok ples

▪ ol i sanap long ai bilong sia king bilong Jehova

▪ ol i wasim klos bilong ol long blut bilong Pikinini Sipsip na klos i kamap waitpela

▪ ol i tokaut olsem Jehova na Jisas tasol inap helpim ol long kisim laip

▪ ol i winim taim bilong bikpela hevi tru

▪ ol i mekim wok long haus lotu bilong Jehova long san na long nait

▪ Jehova i lukautim ol na helpim ol

▪ Jisas i bringim ol i go long wara bilong laip

[Piksa i karamapim pes olgeta long pes 121]

[Piksa long pes 127]

Bikpela lain i save God wantaim Pikinini Sipsip tasol inap helpim ol long abrusim bagarap

[Piksa long pes 128]

Pikinini Sipsip bai bringim bikpela lain i go long wara bilong givim laip

Sapta 21

Jehova i Kapsaitim Samting Nogut Long Ol Lotu i Gat Nem Kristen

Driman 5​​—⁠Kamapim Tok Hait 8⁠:​1–9:⁠21

Stori: Ol ensel i winim 6-pela bilong ol dispela 7-pela biugel

Taim bilong truim: Kirap long taim Krais Jisas i kamap King long yia 1914 i go inap long taim bilong bikpela hevi tru

 1. Taim Pikinini Sipsip i rausim namba 7 gris kandel i pasim buk, wanem samting i kamap?

OL ENSEL i bin holimpas ol “4-pela win” inap long taim lain 144,000 Israel bilong spirit em inap pinis na ol i kisim mak, na God i orait long ‘bikpela lain’ na bai ol inap abrusim bagarap. (KTH 7⁠:​1-4, 9) Tasol taim bikpela bagarap i no kamap yet, ol i mas tokaut long kot bilong Jehova bai painim lain bilong Satan long graun na bai ol i kisim bagarap! Orait, Pikinini bilong God i rausim namba 7 gris kandel i pasim buk, em laspela gris kandel, na Jon i tok: “I no gat wanpela samting i mekim nois, na i no gat toktok i kamap long heven, i go inap hap aua samting. Na bihain mi lukim dispela 7-pela ensel i sanap long pes bilong God, na ol i kisim 7-pela biugel.”​—⁠KTH 8⁠:​1, 2.

Taim Bilong Beten Strong

 2. Wanem samting i kamap insait long dispela hap aua i no gat liklik toktok o pairap samting i kamap long heven?

² I no gat wanpela liklik toktok o pairap i kamap inap hap aua olgeta! Sapos yu wetim wanpela samting i kamap na i no gat liklik toktok samting inap hap aua, dispela hap aua bai i olsem longpela taim tru, a? Na Jon i no harim moa nek bilong 4-pela samting i gat laip i mekim ol tok bilong litimapim nem bilong God. (KTH 4⁠:⁠8) Nau Jon i lukim wanpela samting i kamapim as bilong dispela: “Narapela ensel i kam sanap klostu long alta. Em i holim plet gol bilong holim paura bilong kamapim smok i gat gutpela smel. Na ol i givim em planti bilong dispela kain paura, bilong em i ken bungim wantaim ol [beten] bilong olgeta manmeri bilong God, na mekim ofa long God long dispela alta gol i stap long pes bilong sia king bilong God. Na dispela smok i gat gutpela smel wantaim ol [beten] bilong ol manmeri bilong God, ol i lusim han bilong dispela ensel i sanap i stap long pes bilong God, na ol i go antap.”​—⁠KTH 8⁠:​3, 4.

 3. (a) Dispela paura ol i kukim bilong kamapim smok i gat gutpela smel, em i kirapim yumi long tingim wanem samting? (b) Dispela hap aua i no gat liklik toktok samting i kamap long heven, em i gat wanem wok bilong en?

³ Taim ol Juda i bin i stap aninit long Lo Bilong Moses, long olgeta de long haus lotu sel ol i save kukim paura bilong kamapim smok i gat gutpela smel. Bihain ol i mekim olsem long bikpela haus lotu long Jerusalem. (Kisim Bek 30⁠:​1-8) Taim ol i kukim dispela paura, ol Israel i no bilong lain pris ol i sanap ausait long ples holi na ol i beten long dispela Man em smok i go antap long em. (Luk 1⁠:10) Nau Jon i lukim samting kain olsem dispela i kamap long heven. Dispela smok smel em ensel i mekim ofa long en, ol i bungim wantaim “ol beten bilong ol manmeri bilong God.” Long narapela driman em Jon i bin lukim pastaim, smok i gat gutpela smel i makim ol dispela kain beten. (KTH 5⁠:8; Song 141⁠:​1, 2) Olsem na dispela hap aua i no gat liklik toktok samting long heven, ating em i kamap bambai God i ken harim beten bilong ol manmeri bilong em long graun.

4, 5. Wanem ol bikpela samting i bin kamap long graun na i makim dispela hap aua i no gat toktok samting i kamap long heven?

⁴ Yumi inap save wanem taim dispela samting i bin kamap sapos yumi lukim gut ol tok i stap klostu long dispela tok bilong Baibel na yumi skelim wantaim ol bikpela samting i bin kamap taim de bilong Bikpela i kirap. (KTH 1⁠:10) Long yia 1918 na 1919 ol samting i kamap long graun i wankain stret olsem stori i stap long Kamapim Tok Hait 8⁠:​1-4. Inap 40 yia paslain long 1914, ol Sumatin Bilong Baibel, olsem ol Witnes Bilong Jehova, i bin tokaut olsem taim bilong ol man bilong ol arapela lain bai pinis long 1914. Orait, ol bikpela hevi i kamap long 1914 i truim tok bilong ol. (Luk 21⁠:24; Matyu 24⁠:​3, 7, 8) Tasol planti bilong dispela lain ol i ting, long 1914 bai Jisas i kisim ol i go antap long heven. Tasol dispela samting i no kamap. Long taim bilong Namba Wan Pait ol man i kirap na mekim nogut tru long ol. Long Oktoba 31, 1916, namba wan presiden bilong Sosaiti Was Taua, em Charles T. Russell, em i dai. Long Julai 4, 1918, nupela presiden em Joseph F. Rutherford na sevenpela man moa i holim bikpela wok long Sosaiti Was Taua, ol i go kalabus long Atlanta, long Jojia. Ol i kisim bikpela kalabus tru inap planti yia, tasol ol i no bin mekim rong.

⁵ Ol dispela Kristen i tingting planti long samting i bin painim ol. Ol i tingting: Wanem narapela wok God i laik bai ol i mekim? Wanem taim bai ol i go antap long heven? Long Me 1, 1919, wanpela tok i kamap long Wastaua (tok Inglis), het-tok bilong en, “Taim Bilong Bungim Kaikai i Pinis​—⁠Wanem Samting Bai Kamap Nau?” Dispela i kamapim tingting bilong ol, em ol i no klia long ol samting bai kamap; na bilong strongim bel bilong ol bilipman bambai ol i ken sanap strong yet, dispela nius i tok moa olsem: “Mipela i bilip tru olsem wok bilong bungim lain bilong kingdom i pinis nau, na olgeta i kisim pinis mak, na dua i pas pinis.” Long dispela taim, liklik lain Kristen i beten strong, na beten bilong ol i olsem i stap insait long smok i gat gutpela smel na i go antap. Na Jehova i harim beten bilong ol!

Ensel i Tromoi Paia Long Graun

 6. Dispela hap aua i no gat toktok samting i kamap long heven, taim em i pinis wanem samting i kamap? Wanem samting i mekim na dispela samting i kamap?

⁶ Jon i stori moa olsem: “Ensel i kisim paia long alta na em i pulimapim long dispela plet bilong smok i gat gutpela smel, na em i tromoi paia i go daun long graun. Em i tromoi pinis, orait ol klaut i pairap na bikpela nois i kamap, na lait bilong klaut i sut i go nabaut, na graun i guria.” (KTH 8⁠:⁠5) Pastaim i no gat wanpela liklik pairap o toktok i kamap, tasol nau bikpela pairap tru i kamap! Ating em bilong soim olsem God i harim pinis beten bilong ol manmeri bilong em. Long wanem, dispela pairap i kamap taim ensel i kisim paia long alta bilong kukim smok i gat gutpela smel. Long maunten Sainai, long yia 1513 paslain long Krais, klaut i pairap na lait bilong klaut i sut i go nabaut, na i gat paia, na maunten i guria, na dispela i makim olsem Jehova i tingim gen lain bilong em long graun. (Kisim Bek 19⁠:​16-​20) Ol samting Jon i lukim na i stori long en nau i wankain long dispela na i makim olsem Jehova i tingim gen ol wokman bilong em long graun. (KTH 1⁠:⁠1) Olsem na ol dispela samting Jon i lukim na harim long driman, em paia na klaut i pairap, na sampela nek i kamap, na lait bilong klaut i sut i go nabaut, na guria, ol i makim wanem samting long nau?

 7. (a) Taim Jisas i stap long graun na i autim tok, em i mekim wanem na i olsem em i tromoi paia long graun? (b) Ol brata spirit bilong Jisas ol i mekim wanem na i olsem ol i kirapim paia insait long ol lain i tok ol i Kristen?

⁷ Jisas i bin tokim ol disaipel: “Mi bin kam bilong tromoi paia long graun.” (Luk 12⁠:49) Na tru yet, em i bin kirapim wanpela paia. Em i bin wok strong long autim tok bilong Kingdom, na em i namba wan bikpela tok ol Juda i mas tingim​—⁠bai ol i daun long dispela Kingdom o nogat, na dispela i kamapim bikpela tok pait long Judia. (Matyu 4⁠:​17, 25; 10⁠:​5-7, 17, 18) Long yia 1919 ol brata spirit bilong Jisas long graun, em ol i winim ol bikpela hevi i bin painim ol long taim bilong Namba Wan Pait, ol i kirapim wankain “paia” insait long ol lain ol i gat nem Kristen. Long mun Septemba long 1919, spirit bilong Jehova i kamap ples klia tru taim ol Witnes bilong em ol i kam bung long Sida Poin, Ohaio, long Amerika. Long dispela taim Joseph F. Rutherford i lusim haus kalabus na em i mekim wanpela strongpela tok long dispela kibung, em i tok: “Yumi bihainim tok bilong Bikpela bilong yumi, na yumi save yumi gat wanpela wok, olsem yumi mas wok strong long daunim ol bilip giaman i bin kalabusim ol man inap longtaim tru, na . . . yumi mas tokaut long ol man long kingdom bilong Krais i kam pinis.” Em nau, namba wan bikpela tok bilong kamapim, em tok bilong Kingdom bilong God!

8, 9. (a) J. F. Rutherford i tok wanem long tingting na laik bilong lain bilong God long taim nogut bilong Namba Wan Pait? (b) Dispela tok piksa long ol i tromoi paia i go daun long graun, em i makim wanem samting i kamap? (c) Wanem samting i kamap na i makim klaut i pairap, na bikpela nois i kamap, na lait bilong klaut i sut i go nabaut, na graun i guria?

⁸ Man bilong mekim tok, em J. F. Rutherford, i stori long bikpela hevi i bin painim lain bilong God, na em i tok: “Ol birua i mekim nogut tru long lain bilong Bikpela na ol i kirap nogut long dispela hevi i painim ol na ol i stap tasol na beten na wetim Bikpela i kamapim klia ol samting em i laik bai ol i mekim. . . . Ol i gat bikpela laik tru long autim tok bilong kingdom, na dispela laik i olsem paia i stap long bel bilong ol.”​—⁠Dispela tok i stap long Wastaua (tok Inglis), bilong Septemba 15, 1919, pes 280.

⁹ Long 1919 ol inapim dispela laik bilong ol. Ol i wok strong, na spirit i kirapim ol olsem paia, na ol i kirap long autim tok bilong Kingdom i go long olgeta hap graun. (Lukim 1 Tesalonaika 5⁠:19.) Nau ol man i mas skelim​—⁠ol i laikim Kingdom bilong God i bosim graun o nogat? Taim dispela liklik lain Kristen i autim tok bilong Kingdom, em i olsem paia em ensel i tromoi i go daun long graun, na long nau tu i olsem! Pastaim i no gat liklik toktok i kamap, tasol nau ol i tokaut strong na ol i autim klia tok bilong Kingdom. Ol i autim ol strongpela toksave bilong Baibel long ol samting nogut bai painim ol lain bilong dispela graun, na dispela strongpela tok i olsem klaut i pairap. Na ol tok i tru bilong Baibel i kamap ples klia olsem lait bilong klaut i sut i go nabaut, na ol lotu bilong dispela graun ol i guria nogut tru, olsem bikpela guria i save mekim. Nau dispela liklik lain Kristen i save, i gat bikpela wok ol i mas mekim.​—⁠Rom 10⁠:⁠18.

Ol Ensel i Redi Long Winim Biugel

10. Dispela 7-pela ensel i redi long mekim wanem? Bilong wanem ol i mekim olsem?

¹⁰ Jon i tok moa olsem: “Dispela 7-pela ensel i holim 7-pela biugel, ol i redi long winim ol biugel.” (KTH 8⁠:⁠6) Bipo ol Israel i save winim biugel bilong tokaut long ol bikpela de o ol bikpela samting i kamap. (Wok Pris 23⁠:24; 2 King 11⁠:14) Na ol dispela biugel em Jon bai harim, ol bai tokaut long ol bikpela samting tru bai kamap, em inap helpim man long i stap laip o em inap bagarapim man.

11. Dispela lain em Jon i piksa bilong ol, ol i wok strong long mekim wanem wok, kirap long yia 1919 na i go inap long 1922?

¹¹ Taim ol ensel i redi long winim ol biugel, ating ol i wok tu long stiaim lain bilong God long stretim wanpela wok long graun. Kirap long 1919 i go inap 1922, dispela liklik lain Kristen i kisim bek strong na ol i wok strong long stretim na kirapim gen wok autim tok, na ol i stretim rot bilong wokim planti buk na nius moa. Long 1919 ol i kirap wokim wanpela nius nau yumi save kolim Kirap! Ol i tok, dispela nius em i bilong kamapim tok i tru, na helpim man long bilip na wetim gutpela samting bai kamap bihain. Dispela nius i olsem wanpela biugel i krai strong​—⁠em i gat bikpela wok long kamapim long ples klia wok nogut bilong ol lotu giaman, em ol i insait long ol wok politik bilong graun.

12. Olgeta wan wan biugel i toksave long wanem ol samting? Wanem samting long taim bilong Moses i kain olsem dispela?

¹² Taim ol ensel i winim olgeta wan wan biugel, dispela i bilong makim ol samting nogut tru i mekim nogut long sampela hap bilong graun. Sampela bilong ol dispela samting nogut i kirapim yumi long tingim ol samting nogut tru Jehova i bin salim i kam bilong mekim save long ol Isip long taim bilong Moses. (Kisim Bek 7⁠:​19–12:32) Ol dispela samting nogut tru i olsem strafe bilong Jehova i painim ol Isip, na i givim rot long lain bilong God bambai ol i ken ranawe lusim Isip. Ol samting nogut Jon i lukim long driman ol i mekim wankain wok liklik. Tasol ol dispela samting Jon i lukim ol i no samting tru tru; ol i olsem mak o piksa bilong makim stretpela kot bilong Jehova.​—⁠KTH 1⁠:⁠1.

Wanem Dispela “Wanpela Hap”?

13. Taim ol i winim namba wan i go inap namba 4 biugel, wanem samting i kamap? I gat wanem askim long dispela?

¹³ Taim ol ensel i winim pinis 4-pela biugel, ol i kapsaitim ol samting nogut tru i go daun long graun. I olsem ol i tilim olgeta hap graun i go long tripela hap, na ol i tilim solwara i go long tripela hap, na ol i tilim ol wara na ol hul wara tu i go long tripela hap, na ol i mekim olsem tu long san na mun na olgeta sta. Orait, ol dispela samting nogut i pundaun long wanpela hap bilong graun na solwara na ol wara na hul wara na long wanpela hap bilong san na mun na olgeta sta. (KTH 8⁠:​7-​12) Sapos yumi brukim graun o solwara samting i go tripela hap, orait ol dispela wan wan hap bai i bikpela, tasol em i no graun olgeta o solwara olgeta. Nogat. Em i wanpela hap tasol. (Lukim Aisaia 19⁠:24; Esekiel 5⁠:2; Sekaraia 13⁠:​8, 9.) Orait, wanem hap i gat bikpela asua na ol samting nogut tru i mas pundaun long en? Klostu olgeta manmeri bilong graun, em Satan wantaim lain bilong em i bin paulim ol na kirapim ol long mekim ol pasin nogut. (Stat 3⁠:15; 2 Korin 4⁠:⁠4) I olsem Devit i bin tok: “Olgeta i lusim gutpela rot pinis. Olgeta i wankain tasol, ol i man nogut tru. I no gat wanpela bilong ol i save mekim gutpela pasin. Nogat tru.” (Song 14⁠:⁠3) Tru tumas, strafe bilong God inap painim olgeta manmeri bilong graun. Tasol i gat “wanpela hap” bilong ol i gat bikpela asua moa yet. Orait yumi laik save, husat dispela “wanpela hap” bilong olgeta man bilong graun?

14. Wanem dispela “wanpela hap” i kisim ol samting nogut tru, olsem ol strongpela toksave bilong Jehova?

¹⁴ Em ol lain bilong dispela graun ol i gat nem Kristen! Sapos yumi tilim olgeta man bilong graun i go tripela hap, orait, long yia 1920 samting inap olsem wanpela hap ol i tok ol i Kristen. Lotu bilong ol i bin kamap insait long ol lain em ol i bin lusim lotu Kristen tru bilong pastaim na ol i pulim ol bilip giaman i kam insait long lotu. Jisas na ol disaipel i tok profet long dispela bai kamap. (Matyu 13⁠:​24-​30; Aposel 20⁠:​29, 30; 2 Tesalonaika 2⁠:3; 2 Pita 2⁠:​1-3) Ol pris pasto i tok ol i stap long haus holi bilong God na ol i gat wok long skulim ol man long lotu Kristen. Tasol ol bilip ol i skulim lain bilong ol long en i no i stap long Baibel, na ol i bagarapim tru nem bilong God. Olsem na i stret Baibel i tok piksa olsem ol dispela lotu em dispela “wanpela hap” i mas kisim ol samting nogut tru, olsem ol strongpela toksave bilong Jehova long bikpela strafe bai painim ol. Jehova i no inap orait liklik long dispela “wanpela hap” bilong graun!

15. (a) Olgeta wan wan biugel i makim stret ol wan wan yia o olsem wanem? Stori long dispela samting. (b) Nau husat moa ol i wok wantaim liklik lain long tokaut long strafe bilong Jehova?

¹⁵ Ol dispela 7-pela biugel ol ensel i winim, ol i olsem piksa na i makim ol bikpela toksave i bin kamap long 7-pela bikpela kibung, kirap long yia 1922 i go inap long 1928. Tasol krai bilong biugel, olsem ol bikpela toksave, i wok long kamap yet. Lain bilong Jehova i wok yet long autim ol strongpela tok i kamapim long ples klia ol pasin nogut tru ol lotu i gat nem Kristen ol i mekim, na ol dispela strongpela tok bai wok long kamap moa yet insait long de bilong Bikpela nau yumi stap long en. Ol strongpela toksave long strafe bilong Jehova bai painim dispela lain, ol i mas autim long olgeta lain bilong graun, maski olgeta lain i birua long ol na i mekim nogut long ol. Taim ol i mekim pinis dispela wok, orait olgeta samting bilong Satan long graun bai pinis. (Mak 13⁠:​10, 13) Nau bikpela lain manmeri i wok wantaim liklik lain long autim ol dispela strongpela tok em olgeta lain i mas harim.

Paia i Kukim Wanpela Hap Bilong Graun

16. Namba wan ensel i winim biugel na wanem samting i kamap?

¹⁶ Jon i raitim ripot bilong wok bilong ol ensel na em i tok: “Namba wan ensel i winim biugel bilong en, na ren ais na paia wantaim blut em i kamap, na i go pundaun long graun. I olsem ol i tilim olgeta hap graun na olgeta diwai long tripela hap, na paia i kukim olgeta wanpela hap bilong graun na wanpela hap bilong ol diwai. Na olgeta grinpela gras, em tu paia i kukim olgeta.” (KTH 8⁠:⁠7) Dispela em i kain olsem namba 7 samting nogut tru Jehova i salim i kam daun long Isip. Tasol em i makim wanem samting nau long taim bilong yumi?​—⁠Kisim Bek 9⁠:⁠24.

17. (a) Long Kamapim Tok Hait 8⁠:​7, “graun” i makim wanem samting? (b) Wanem samting i kamap na ol lain i gat nem Kristen, olsem “wanpela hap bilong graun,” i olsem paia i kukim olgeta?

¹⁷ Long Baibel, sampela taim dispela tok “graun” i makim ol manmeri. (Song 97⁠:⁠1) Namba 2 samting nogut tru i pundaun long solwara, na solwara tu i makim ol man, olsem na “graun” i mas makim ol manmeri em ol i stap aninit long Satan na i olsem ol i stap strong, tasol bai ol i bagarap. (2 Pita 3⁠:7; KTH 21⁠:⁠1) Dispela stori bilong ol samting nogut tru i soim olsem dispela “wanpela hap bilong graun,” olsem ol lain ol i gat nem Kristen, em belhat bilong Jehova i kam daun long en olsem paia i kukim. Ol bikpela man bilong ol dispela lotu​—⁠em ol i sanap olsem ol bikpela diwai namel long ol dispela lain​—⁠i olsem paia i kukim ol taim lain bilong Jehova i autim strongpela tok long strafe bilong Jehova bai painim ol. Ol planti milion manmeri i insait long ol lotu i gat nem Kristen, sapos ol i wok yet long helpim ol dispela lotu, bai ol i kamap olsem gras em paia i kukim, na long ai bilong Jehova ol i drai pinis long ol samting bilong spirit.​—⁠Lukim Song 37⁠:​1, 2.a

18. Long bikpela kibung i kamap long Sida Poin, Ohaio, long 1922, ol i mekim wanem bilong tokaut olsem strafe bilong Jehova bai painim ol dispela lain bilong graun?

¹⁸ Olsem wanem ol i givim dispela strongpela tok bilong Jehova long ol dispela lain bilong graun i gat nem Kristen? Ol i no mekim long rot bilong ol nius bilong graun o redio o televisen samting, em planti taim ol i tok bilas long lain “wokboi” bilong Jehova. (Matyu 24⁠:45) Lain bilong Jehova i kamapim strong dispela tok bilong Jehova long namba 2 bikpela kibung bilong ol long Sida Poin, Ohaio, long Septemba 10, 1922. Olgeta i wanbel long kamapim wanpela bikpela toksave, het-tok i olsem: “Wanpela Bikpela Tok i Go Long Ol Gavman Bilong Graun.” Ol i tokaut strong long ol samting bai painim ol manmeri bilong graun; ol i tok: “Mipela laik tokaut long olgeta lain, na olgeta gavman na hetman bilong ol, na olgeta pris pasto bilong olgeta lotu, wantaim olgeta lain bilong ol na pren bilong ol, na ol bikman bilong bisnis na politik, em ol i tok ol inap tru long pinisim ol pait na kamapim gutaim long graun, na bai olgeta man i gat gutpela sindaun na ol i stap amamas; orait mipela laik bai ol i mas tokaut na kamapim long ples klia ol samting ol i mekim bilong truim dispela tok bilong ol; na sapos ol i no tokaut, orait ol i mas putim yau long tok bilong mipela, em mipela i autim tok bilong Bikpela, na taim ol i harim pinis, orait ol i ken tokaut olsem tok mipela i autim i stret o nogat.”

19. Lain bilong God i givim wanem tok bilong Kingdom long ol lain bilong graun i gat nem Kristen?

¹⁹ Ol i tokaut olsem: ‘Mipela i bilip na tokaut olsem kingdom em inap stretim olgeta hevi, na em bai pinisim olgeta pait na kamapim gutaim long graun, na God bai belgut long ol man, em ol samting olgeta lain i laik kisim; na ol man nau ol i laik i stap aninit long stretpela gavman bilong em, bai ol i kisim ol gutpela blesing olsem bel isi na laip i stap oltaim na i stap amamas, na ol dispela gutpela blesing i no ken pinis.’ Nau long dispela taim nogut, ol gavman em ol man yet i kamapim ol i lus tru long stretim ol hevi bilong graun, na ol gavman bilong ol lain i gat nem Kristen ol i lus moa yet long mekim. Olsem na lain bilong Jehova i autim strong moa yet dispela tokaut ol i bin mekim long 1922. Yumi ken bilip tru olsem Kingdom bilong God tasol inap long stretim olgeta hevi bilong ol man!

20. (a) Kirap long 1922, ol Kristen em God i bin makim ol, ol i autim ol strongpela tok bilong Jehova long wanem rot, olsem biugel i krai? (b) Taim namba wan biugel i krai, wanem samting i kamap insait long ol lain i gat nem Kristen?

²⁰ Long rot bilong ol strongpela toksave, na ol buk na nius na ol pablik-tok, dispela liklik lain Kristen i kamapim ol dispela bikpela toksave, olsem strongpela krai bilong biugel. Taim namba wan biugel i krai, i olsem ol bikpela ren ais i pundaun antap long ol lotu i gat nem Kristen na i paitim ol nogut. Ol i gat bikpela asua long blut, long wanem ol i bin insait long ol bikpela pait i bin kamap long taim bilong yumi, na lain bilong Jehova i kamapim long ples klia dispela bikpela asua bilong ol; olsem na i stret tru long belhat bilong Jehova i mas painim ol, olsem paia i kukim ol. Dispela liklik lain Kristen, na bikpela lain tu, ol i wok yet long autim toksave olsem krai bilong namba wan biugel, bambai olgeta manmeri i ken save, Jehova i no orait liklik long ol lotu bilong dispela graun i gat nem Kristen na ol i mas bagarap.​—⁠KTH 7⁠:​9, 15.

I Olsem Maunten i Paia

21. Namba 2 ensel i winim biugel na wanem samting i kamap?

²¹ “Namba 2 ensel i winim biugel bilong en, na ol i tromoi wanpela samting olsem bikpela maunten i paia, na em i go pundaun long solwara. I olsem ol i tilim solwara long tripela hap, na wanpela hap bilong solwara i kamap blut. Ol samting i gat laip long solwara, em tu ol i tilim long tripela lain, na wanpela lain olgeta i dai. Na ol sip tu ol i tilim long tripela lain, na wanpela lain sip i bagarap olgeta.” (KTH 8⁠:​8, 9) Yumi pret tru long dispela driman, tasol yumi laik save, em i makim wanem samting?

22, 23. (a) Taim namba 2 biugel i krai, dispela i mekim na lain bilong God i kamapim wanem bikpela toksave? (b) Dispela “wanpela hap bilong solwara” i makim wanem samting?

²² Bilong kisim save long dispela samting, yumi ken skelim ol tok i kamap long wanpela kibung em lain bilong Jehova i bin mekim long Los Enjeles, long hap bilong Kalifonia, long Amerika, long Ogas 18-​26, 1923. Brata J. F. Rutherford i mekim bikpela tok bilong Sarere long apinun, i stori long “Ol Sipsip na Meme.” Dispela tok i kamapim klia olsem “ol sipsip” em ol manmeri i laikim tru stretpela pasin na ol bai kisim dispela graun em Kingdom bai bosim. Na ol i kamapim wanpela bikpela toksave bilong kamapim long ples klia pasin giaman bilong “ol pris pasto na ‘ol bikman bilong lain bilong ol,’ em ol man i gat strong long stiaim ol bikman bilong bisnis na politik long bihainim laik bilong ol.” Na dispela toksave i tokim “olgeta manmeri ol i laikim pasin bilong i stap isi na bihainim lo em ol i stap insait long ol misin . . . long ol i mas lusim ol dispela misin i save bihainim pasin i no stret” na ol i mas redi long “kisim ol blesing aninit long kingdom bilong God.”

²³ Taim namba 2 biugel i krai, ol i kamapim dispela toksave. Ol manmeri i putim yau long dispela tok na i laik bihainim, ol i lusim dispela lain ol i gat pasin olsem meme, em Aisaia i makim ol stret taim em i tok: “Ol manmeri bilong mekim pasin nogut, ol i no inap lusim pasin nogut bilong ol. Ol i olsem solwara i bruk oltaim na i bringim ol kain kain pipia na rabis samting i kam bagarapim nambis.” (Aisaia 57⁠:20; 17⁠:​12, 13) Dispela “solwara” i makim stret ol lain bilong graun i save bikhet nabaut na i no stap isi. (Lukim Kamapim Tok Hait 13⁠:⁠1.) Bihain bai dispela “solwara” i pinis olgeta. (KTH 21⁠:⁠1) Tasol long nau krai bilong namba 2 biugel i kamap pinis na Jehova i kolim strafe bai painim “wanpela hap bilong solwara”​—⁠em ol dispela lain bilong bikhet, ol i stap insait long ol lotu i gat nem Kristen.

24. Dispela tok piksa long ol i tromoi wanpela samting olsem bikpela maunten i paia na em i go pundaun long solwara, dispela i makim wanem samting?

²⁴ Ol ensel i tromoi wanpela samting olsem maunten i paia i go pundaun insait long “solwara.” Planti taim Baibel i tok piksa long ol maunten bilong makim ol gavman. Olsem: Baibel i tok piksa long Kingdom bilong God i olsem wanpela maunten. (Daniel 2⁠:​35, 44) Bipo, Babilon i olsem wanpela “bikpela maunten” i bin bagarapim planti lain, tasol bihain ‘paia i pinisim em olgeta.’ (Jeremaia 51⁠:25) Tasol dispela bikpela samting olsem maunten em Jon i lukim, em i wok long paia yet. Dispela tok piksa long ol i tromoi dispela maunten i go daun long solwara, em i makim olsem long taim bilong Namba Wan Pait na bihain long en, bikpela tok i kamap olsem: Wanem gavman bai strong na bosim graun. Dispela tok i kamap bikpela tru long ol kantri i gat nem Kristen. Long Itali, Mussolini i kamapim gavman Fasis. Jemani i kisim gavman Natsi, em Hitler i bosim, na sampela kantri moa ol i kisim ol kain gavman olsem gavman soselis samting. Bikpela senis i bin kamap long gavman bilong Rasia​—⁠ol i pait na daunim gavman na ol i kamapim namba wan gavman Komyunis. Bipo ol pris pasto i gat bikpela strong long Rasia na ol inap subim gavman long bihainim laik bilong ol; tasol taim gavman Komyunis i kamap, strong bilong ol misin i pinis.

25. Bihain long Namba 2 Pait, wanem samting i kamap na yumi save, ol bikpela tok i kamap yet long husat bai bosim graun?

²⁵ Namba 2 Pait i daunim gavman bilong Mussolini na Hitler, tasol i gat bikpela tok yet long wanem gavman bai strong na bosim graun, na dispela “solwara,” olsem ol man, ol i wok long pait na kamapim ol nupela gavman bilong ol yet. Bihain long 1945, long Saina na Vietnam na Kuba na Nikaragua na sampela hap moa, ol i kamapim planti gavman kain olsem. Long kantri Grik ol i traim kamapim wanpela kain gavman i bosim ol man long rot bilong ami, na i gat wanpela man tasol i stap bos na em i holim bikpela strong​—⁠tasol dispela gavman i pundaun. Orait long Kampusia ol i traim wanpela kain gavman Komyunis, na ol ripot i tok ol i kilim i dai olsem 2 milion manmeri.

26. Dispela “bikpela maunten i paia,” olsem wanem em i wok yet long kirapim ol man olsem bikpela si i kirap long solwara?

²⁶ Dispela samting olsem “bikpela maunten i paia” em i wok yet long kamapim ol bikpela si long solwara, olsem ol man i bikhet nabaut na i no stap isi. Ol i pait long daunim ol gavman na kamapim gavman ol yet i laikim. Ol i bin mekim olsem long sampela hap bilong Afrika, na long Sentral na Saut Amerika, na Esia, na sampela ailan long solwara Pasifik. Planti pait olsem i bin kamap long ol kantri i tok ol i Kristen, na long sampela kantri we ol misineri bilong ol lotu i gat nem Kristen ol i stap long en, na ol i helpim ol man long pait na daunim ol gavman i putim hevi long ol. Na sampela pris Katolik i bin bung wantaim sampela lain Komyunis i birua long gavman na helpim ol long pait bilong daunim gavman. Na long Sentral Amerika sampela lain Talatala ol i bin wok long daunim ol lain Komyunis, long wanem ol i tok, ol Komyunis i ‘mekim nogut tru long ol man na ol i laik bosim strong ol man.’ Tasol dispela pasin bilong bikhet nabaut na pait i no bin kamapim gutaim na bel isi long graun.​—⁠Lukim Aisaia 25⁠:​10-​12; 1 Tesalonaika 5⁠:⁠3.

27. (a) Olsem wanem “wanpela hap bilong solwara” i kamap olsem blut? (b) Olsem wanem ‘wanpela lain bilong ol samting i gat laip long solwara’ ol i dai? Na wanem samting i mas painim “wanpela lain sip”?

²⁷ Namba 2 krai bilong biugel i kamapim klia olsem bikpela asua bilong blut i stap long ol dispela lain i helpim ol man long bikhet na pait bilong kamapim gavman bilong ol yet na ol i no laik aninit long Kingdom bilong God. Na “wanpela hap bilong solwara,” em ol lain i tok ol i Kristen, ol i gat bikpela asua moa long blut, na long ai bilong God ol i dai pinis​—⁠i olsem dispela hap bilong solwara i kamap blut stret na olgeta pis samting i stap insait long en ol i dai. Na olgeta lain i insait long ol dispela pait ol i mas bagarap, olsem olgeta sip i stap long dispela “wanpela hap bilong solwara” ol i bagarap. Yumi amamas tru long planti milion manmeri olsem sipsip ol i harim na bihainim toksave bilong lusim ol lain i bikhet na pait bilong kamapim ol gavman bilong ol yet na ol i gat bikpela asua long blut​—⁠i olsem ol dispela lain i tantanim nabaut insait long solwara nogut em blut i pulap long en!

Wanpela Sta i Lusim Heven na i Pundaun

28. Namba 3 ensel i winim biugel na wanem samting i kamap?

²⁸ “Orait namba 3 ensel i winim biugel bilong en, na wanpela bikpela sta i paia tru olsem bombom, em i lusim heven na i pundaun. I olsem ol i tilim olgeta wara long tripela lain, na dispela sta i pundaun antap long wanpela lain bilong ol wara na ol hul wara. Nem bilong dispela sta em i olsem, Marasin I Pait Nogut Tru. Na em i pundaun antap long wanpela lain bilong ol wara, na ol dispela wara i kamap olsem marasin i pait nogut tru. Planti man i dringim dispela wara, na wara i kukim bel bilong ol na ol i dai.” (KTH 8⁠:​10, 11) Sapos yumi skelim ol narapela tok bilong Baibel bai yumi inap save, olsem wanem truim bilong dispela tok i kamap long de bilong Bikpela.

29. “Bikpela sta i paia tru olsem bombom” em i olsem piksa na i makim wanem samting? Olsem wanem yumi inap save long dispela?

²⁹ Ol tok Jisas i givim long 7-pela kongrigesen i gat tok piksa long 7-pela sta i makim ol elda insait long ol kongrigesen.b (KTH 1⁠:20) Ol dispela “sta” o elda wantaim olgeta narapela man God i bin makim ol bilong mekim wok king long heven, i olsem ol i stap pinis long heven, kirap long taim ol i kisim mak. (Efesus 2⁠:​6, 7) Tasol aposel Pol i toksave olsem: Sampela namel long ol dispela “sta” bai lusim bilip na kirap mekim tok giaman bilong pulim ol Kristen i go bihainim ol. (Aposel 20⁠:​29, 30) Ol dispela elda i bikhet na i givim baksait long God na kamapim ol bilip giaman bai ol i pulim planti manmeri i go bihainim ol, na olgeta wantaim bai kamap olsem wanpela “man bilong sakim lo,” na em bai hambak na litimapim nem bilong em yet olsem em i wanpela god. (2 Tesalonaika 2⁠:​3, 4) Dispela samting Pol i tokaut long en i kamap tru taim ol pris pasto bilong ol lotu i gat nem Kristen ol i kamap. Baibel i makim stret dispela lain ol i olsem “wanpela bikpela sta i paia tru olsem bombom.”

30. (a) Taim Aisaia i tokim king bilong Babilon, em i bin i stap olsem wanpela sta long antap na em i pundaun pinis, wanem insait bilong dispela tok? (b) Dispela tok long em i bin i stap antap long heven na em i pundaun pinis, dispela tok inap makim wanem samting?

³⁰ Jon i lukim dispela sta i lusim heven na i pundaun. Em i pundaun olsem wanem? Bilong save long dispela, yumi ken stori long samting i bin painim wanpela king bilong bipo. Aisaia i tokim king bilong Babilon: “Yu bin i gat biknem tru. Long ai bilong ol manmeri yu bin i stap olsem sta bilong moning i lait antap long skai. Tasol nau yu pundaun pinis.” (Aisaia 14⁠:12) Truim bilong dispela tok profet i bin kamap taim ami bilong Sairus i daunim Babilon, na king bilong Babilon, em pastaim em i bin i stap nambawan strongpela gavman bilong graun, nau em i pundaun pinis na em i gat bikpela sem. Olsem na taim Baibel i toktok long wanpela sta i lusim heven na i pundaun, sampela taim dispela i makim olsem wanpela man i holim bikpela namba na bihain em i pundaun na em i gat bikpela sem.

31. (a) Wanem taim ol pris pasto bilong ol lotu i gat nem Kristen ol i pundaun na i no stap antap moa olsem “sta”? (b) Dispela wara ol pris pasto i givim long ol man bilong dring, olsem wanem dispela wara i kamap olsem “marasin i pait nogut tru”? Wanem samting i painim planti man i bin dring long dispela wara?

³¹ Taim ol pris pasto i lusim lotu Kristen tru na i wok long pulim ol man i go bihainim ol, ol i no i stap moa olsem “sta”​—⁠ol i no holim moa bikpela namba o wok olsem long “heven,” em Pol i tok long Efesus 2⁠:​6, 7. Ol i pundaun pinis. Ol i no givim tok i tru long ol man olsem gutpela wara bilong dring. Nogat. Ol i givim ol tok giaman long ol, olsem tok bilong bikpaia, na klinpaia, na God Triwan, na stori giaman olsem God i makim pinis ol samting i save painim yumi na yumi no inap abrusim; i olsem ol dispela lotu i givim “marasin i pait nogut tru” long ol man. Na ol i pulim ol lain i go insait long ol bikpela pait, na ol i no bin strongim ol man long stap olsem stretpela wokman bilong God. Olsem na ol manmeri i bilipim ol dispela tok giaman, ol i kisim bagarap long ol samting bilong spirit​—⁠i olsem man i dring marasin nogut na dispela marasin i bagarapim em. Samting i painim ol i wankain olsem samting i bin painim ol Israel long taim bilong Jeremaia, em ol i bin lusim Jehova. Jehova i tokim ol dispela Israel: “I olsem mi givim marasin i gat pait long ol na mekim ol i kaikai, na mi mekim ol i dring wara nogut bilong bagarapim man. Long wanem, ol profet i bihainim pasin haiden na nau dispela pasin i inapim olgeta hap bilong graun.”​—⁠Jeremaia 9⁠:15; 23⁠:⁠15.

32. Ol lotu i pundaun tru long ol samting bilong spirit, na dispela samting i kamap ples klia long wanem taim? Olsem wanem stori bilong dispela samting i go long ol man?

³² Ol dispela bikman bilong lotu i pundaun tru long ol samting bilong spirit. Dispela i kamap ples klia long 1919. Long 1919 liklik hap lain em God i bin makim ol na ol i stap yet long graun, Jisas i makim ol bilong bosim ol wok bilong Kingdom. (Matyu 24⁠:​45-​47) Na kirap long 1922 dispela liklik lain i wok strong gen long tokaut long olgeta manmeri olsem ol dispela pris pasto i pundaun pinis long mekim wok bilong God.

33. Long kibung i bin kamap long Kalambas, Ohaio, long hap bilong Amerika long 1924, ol i mekim wanem bilong kamapim long ples klia bikpela asua i stap long ol pris pasto bilong lotu?

³³ Dispela liklik lain i bin mekim wanpela bikpela toksave bilong dispela samting long wanpela kibung bilong ol. Wanpela nius bilong ol (The Golden Age) i bin tok, em i wanpela bikpela kibung tru bilong ol Sumatin Bilong Baibel. Em i kamap long Kalambas, Ohaio, long Julai 20 i go inap 27, long 1924. Dispela namba 3 ensel i winim biugel, ating em yet i stiaim ol na ol i kamapim wanpela strongpela toksave long dispela kibung, na bihain ol i wokim 50 milion liklik nius i gat dispela toksave long en na ol i tilim long ol man. Het-tok bilong en i olsem: Ol Pris Pasto i Gat Kot (tok Inglis tasol). Wanpela liklik het-tok i olsem: “Pikinini Em God i Tok Promis Long Kamapim, na Pikinini Bilong Snek.” Dispela bikpela toksave i kamapim long ples klia rong bilong ol bikman bilong lotu, em ol i kisim ol bikpela nem insait long lotu, na ol i putim ol bikman bilong bisnis na politik i kamap olsem ol bikman insait long lotu, na ol i laik bai ol man i litimapim nem bilong ol, na ol i no laik i go autim tok long ol manmeri long Kingdom bai bosim graun. Nius i tok, olgeta Kristen i dediket pinis long God, ol i gat wok long autim tok long taim God “i laik . . . mekim save long ol birua . . . [na] strongim bel bilong ol manmeri i sori na i krai.”​—⁠Aisaia 61⁠:⁠2.

34, 35. (a) Kirap long taim namba 3 ensel i winim biugel, olsem wanem long strong bilong ol pris pasto long bosim ol man na grisim ol bikpela man bilong graun long bihainim laik bilong ol? (b) Bihain wanem samting bai painim ol pris pasto bilong ol dispela lotu ol i holim nating nem Kristen?

³⁴ Taim namba 3 ensel i kirap long winim biugel, strong bilong ol pris pasto long bosim ol man i wok long lus, na long nau i no planti ol i holim yet bikpela strong na biknem long ai bilong ol man. Ol Witnes i wok strong long autim tok, olsem na nau planti planti manmeri ol i save pinis, planti tok ol pris pasto i skulim ol man long en i olsem “marasin i pait nogut tru”​—⁠em i save bagarapim man long ol samting bilong spirit. Na long hap bilong not long Yurop, strong bilong ol dispela pris pasto i laik pinis, na long sampela narapela kantri, gavman i no larim ol i holim sampela strong na stiaim tingting bilong ol man. Na long ol hap bilong Yurop na Not na Sentral na Saut Amerika, lotu Katolik i namba wan lotu, na planti pris i paulim mani na go insait long ol kros pait bilong ol lain politik, na ol i mekim pasin pamuk samting, na nau ol i no gat gutpela nem moa namel long ol man. Na biknem na strong bilong ol i mas wok long i go liklik, long wanem, liklik taim nau na bai ol i kisim wankain strafe olsem ol bikman bilong ol narapela lotu giaman.​—⁠KTH 18⁠:21; 19⁠:⁠2.

³⁵ Tasol Jehova i no pinis yet long givim hevi long ol lotu i holim nating nem Kristen. Nau yumi ken stori long ol samting i kamap taim namba 4 ensel i winim biugel bilong em.

Bikpela Tudak!

36. Namba 4 ensel i winim biugel na wanem samting i kamap?

³⁶ “Orait namba 4 ensel i winim biugel bilong en, na i olsem ol i tilim san na mun na olgeta sta long tripela hap. Na ol i bagarapim wanpela hap bilong san na wanpela hap bilong mun na wanpela hap bilong olgeta sta. Na wanpela hap bilong lait bilong ol i kamap tudak, olsem na wanpela hap bilong san na bilong nait i no gat lait.” (KTH 8⁠:12) Namba 9 samting nogut em God i bin salim long ol Isip bipo em tudak tru. (Kisim Bek 10⁠:​21-​29) Tasol dispela tudak i kamap long ol man em i wanpela tok piksa. Orait dispela tudak i makim wanem samting tru?

37. Pita na Pol i tok, ol man i stap ausait long kongrigesen Kristen ol i stap olsem wanem long ol samting bilong spirit?

³⁷ Aposel Pita i tokim ol wanbilip, taim ol i no kamap Kristen yet, ol i stap tudak long ol samting bilong spirit. (1 Pita 2⁠:⁠9) Na taim Pol i stori long ol man ausait long kongrigesen Kristen, em i tok ol i stap tudak long ol samting bilong spirit. (Efesus 5⁠:8; 6⁠:12; Kolosi 1⁠:13; 1 Tesalonaika 5⁠:​4, 5) Tasol olsem wanem long ol lain bilong ol misin em ol i tok ol i bilip long God na ol i bilip olsem Jisas em i Man bilong kisim bek ol?

38. Namba 4 ensel i winim biugel na i kamapim wanem tok i tru long “lait” bilong ol lotu i gat nem Kristen?

³⁸ Jisas i tok, yumi inap luksave long ol Kristen tru long pasin ol i mekim. Na em i tok, planti man bai tok ol i lain bilong em, tasol ol i “man bilong mekim pasin nogut.” (Matyu 7⁠:​15-​23) Tasol sapos wanpela man i skelim pasin bilong ol manmeri insait long ol lotu i gat nem Kristen, olsem “wanpela hap bilong graun,” dispela man i mas tokaut olsem ol i stap tudak tru long ol samting bilong spirit. (2 Korin 4⁠:⁠4) Ol dispela lotu i gat bikpela asua, long wanem ol i tok ol i Kristen. Olsem na namba 4 ensel i mas winim biugel bilong toksave olsem “lait” bilong ol dispela lotu i no lait tru​—⁠em tudak, na ol i kisim dispela “lait” long Babilon, na Babilon em lain haiden.​—⁠Mak 13⁠:​22, 23; 2 Timoti 4⁠:​3, 4.

39. (a) Wanpela bikpela toksave i kamap long wanpela kibung long 1925 i tok wanem long lait giaman bilong ol dispela lotu i gat nem Kristen? (b) Long 1955 ol i mekim wanem samting moa bilong kamapim giaman bilong ol dispela lotu?

³⁹ Orait, lain bilong God i mekim wanpela kibung long Amerika, long Ogas 29, 1925, na ol i pasim tok long kamapim wanpela strongpela toksave na ol i putim long wanpela liklik nius, het-tok bilong en, “Gutpela Samting Ol Man Inap Tingim na Wet Long En.” Ol i tilim inap 50 milion long kain kain tok ples. Dispela toksave i stori long “lait” giaman em ol bikman bilong bisnis na politik na ol pris pasto i soim long ol man na dispela i mekim na “ol man i stap long tudak.” Na nius i tokaut olsem Kingdom bilong God tasol em i rot tru bilong kisim ‘bel isi, na gutpela sindaun, na i no gat sik, na ol inap i stap oltaim oltaim, na i stap amamas.’ Kirap long 1922 samting na i kam inap long nau, dispela liklik lain Kristen i strongim bel tru bilong autim dispela strongpela tok i sutim dispela bikpela lain ol i gat nem Kristen. Long 1955 lain bilong God i kamapim narapela strongpela tok bilong kamapim long ples klia olsem “lait” bilong ol pris pasto em i lait giaman tasol. Bilong mekim dispela wok ol i wokim wanpela liklik buk, nem bilong en i olsem: Wanem Lain i Olsem “Lait Bilong Graun”​—⁠ Ol Lotu i Gat Nem Kristen o Lotu Kristen Tru? (tok Inglis tasol) Long nau, giaman bilong ol dispela lotu i kamap ples klia tru, na planti manmeri bilong olgeta hap ol i save long en. Tasol ol Witnes i strong yet long kamapim long ples klia olsem ol dispela lotu i holim nating nem Kristen ol i lain bilong tudak na i no gat liklik hap lait i stap long ol!

Wanpela Bikpela Tarangau i Flai Antap

40. Dispela krai bilong 4-pela biugel i kamapim klia wanem samting bilong ol lotu i gat nem Kristen?

⁴⁰ Em nau, taim 4-pela ensel i winim biugel, dispela i kirapim bikpela wok tru bilong kamapim klia olsem ol lotu i gat nem Kristen ol i stap nogut na ol i givim dai tasol long ol man, na i stret dispela lain i mas kisim strafe long han bilong Jehova. Na lain bilong Jehova i tokaut olsem: Ol nupela gavman i kamap insait long ol kantri i gat nem Kristen na long ol narapela kantri ol i birua long ol samting bilong spirit. Na ol i tokaut olsem wok bilong ol pris pasto i pundaun pinis na ol i no gat strong moa, na ol dispela lotu i stap tudak long ol samting bilong spirit. Tru tumas, ol dispela lain i holim nating nem Kristen ol i gat bikpela asua moa, winim ol narapela lain long dispela graun bilong Satan.

41. Inap liklik hap taim i no gat krai bilong biugel, na nau Jon i lukim na harim wanem samting?

⁴¹ Wanem narapela samting i mas kamap ples klia? Yumi laik save long dispela, tasol pastaim i gat liklik malolo na ol narapela ensel i no winim biugel bilong ol. Nau Jon i stori long narapela samting em i lukim, olsem: “Mi lukim wanpela bikpela tarangau i flai i go namel long skai. Na mi harim em i singaut strong olsem, ‘Sori, sori, sori tumas long ol manmeri i stap long graun. Tripela ensel moa i laik winim ol biugel bilong ol, na ol bikpela hevi tru bai i kamap long ol manmeri.’ ”​—⁠KTH 8⁠:⁠13.

42. Ating dispela bikpela tarangau i piksa bilong wanem samting? Em i autim wanem tok?

⁴² Ol bikpela tarangau i save flai antap tru, na ai bilong ol inap lukluk i go longwe. (Jop 39⁠:29) Jon i lukim 4-pela samting olsem ensel i raunim sia king bilong God, na wanpela ensel namel long ol i olsem tarangau. (KTH 4⁠:​6, 7) Ating em dispela ensel o narapela ensel i save lukluk i go longwe tru na em i singaut na mekim strongpela toksave long 3-pela bikpela hevi bai kamap, olsem: “Sori, sori, sori”! Olsem na olgeta manmeri i mas putim gut yau taim ol i harim krai bilong 3-pela biugel moa, long wanem, krai bilong 3-pela biugel wan wan i kirapim dispela 3-pela bikpela hevi wan wan.

[Ol Futnot]

[Sat long pes 139]

Wara Bilong Ol Lotu i Gat Nem Kristen Em Marasin i Pait Nogut Tru

[Piksa long pes 132]

Taim Pikinini Sipsip i rausim 7-pela gris kandel i pasim buk, nau 7-pela ensel i winim biugel

[Piksa long pes 140]

“Wanpela Bikpela Tok i Go Long Ol Gavman Bilong Graun” (1922) Dispela toksave ol i kamapim em i helpim ol man long save, Jehova i tromoi samting nogut i go daun long “graun”

[Piksa long pes 140]

“Wanpela Toksave i Go Long Olgeta Kristen” (1923) Long rot bilong dispela toksave ol i tokaut long strafe bilong Jehova bai painim “wanpela hap bilong solwara”

[Piksa long pes 141]

“Ol Pris Pasto i Gat Kot” (1924) Ol i tilim planti milion bilong dispela nius na bai ol man i ken save dispela “sta” bilong ol pris pasto bilong ol lotu i gat nem Kristen i pundaun pinis

[Piksa long pes 141]

“Gutpela Samting Ol Man Inap Tingim na Wet Long En” (1925) Dispela strongpela toksave i bilong kamapim long ples klia olsem as bilong dispela lait ol lotu i gat nem Kristen i tok ol i holim, em i no kamapim lait tru​—⁠em i kamapim tudak

Sapta 22

Namba Wan Bikpela Hevi​—⁠Ol Grasopa

 1. Taim ol ensel i winim ol biugel, wanem lain i bihainim dispela singaut na ol i autim ol dispela toksave? Namba 5 biugel i tokaut long wanem samting?

NAMBA 5 ensel i redi long winim biugel. Fopela ensel i winim pinis biugel bilong ol, na 4-pela samting nogut tru i kam daun pinis long “wanpela hap bilong graun” em Jehova i ting i gat bikpela asua tru​—⁠em ol dispela lotu i tok ol i Kristen. Dispela ol lotu i gat bikpela sik bilong i dai, na nau dispela bikpela sik bilong ol i kamap ples klia. Taim ol ensel i winim biugel, orait long graun ol man i tokaut long dispela samting. Nau namba 5 ensel i redi long tokaut long namba wan bikpela hevi i nogut moa, na em bai mekim ol man i pret nogut tru. Em i kain olsem bikpela lain grasopa i raun na bagarapim ol samting, na ol man i save pret long ol. Tasol pastaim yumi ken skelim ol narapela tok bilong Baibel ol bai helpim yumi long save gut long dispela namba wan hevi.

 2. Wanem hap bilong Baibel i stori long wanpela bikpela lain grasopa kain olsem Jon i lukim long driman? Dispela bikpela lain grasopa i mekim wanem long ol Israel bilong bipo?

² Hap bilong Baibel ol i kolim Joel, em i stori long wanpela bikpela hevi, em bikpela lain binatang na ol grasopa tu, i kain olsem Jon i bin lukim long driman. (Joel 2⁠:​1-​11, 25)a Dispela traipela lain binatang Joel i stori long ol, em bilong givim bikpela hevi long ol Israel, em ol i bin kirap lotuim ol god giaman. Tasol dispela hevi bai kirapim sampela Israel long tanim bel na kam bek long Jehova na bai em i ken orait long ol. (Joel 2⁠:​6, 12-​14) Long taim dispela samting i kamap, Jehova bai kapsaitim spirit bilong em long ‘olgeta kain manmeri,’ na klostu long ‘taim nogut bilong bikpela De bilong Jehova’ ol bikpela mak bai kamap na i mekim ol man i pret nogut tru.​—⁠Joel 2⁠:​11, 28-​32.

Bikpela Lain Grasopa Long Taim Bilong Ol Aposel

3, 4. (a) Wanpela truim bilong tok bilong Joel sapta 2 i kamap long wanem taim? Wanem samting i kamap bilong truim dispela tok? (b) Long taim bilong ol aposel wanem samting i kamap na i olsem wanpela traipela lain grasopa i kamap na i givim hevi long ol man? Ol i wok long givim hevi long ol man inap long wanem taim?

³ Wanpela truim bilong Joel sapta 2 i kamap long taim bilong ol aposel. Long dispela taim, long Pentikos 33, Jehova i kapsaitim spirit holi long namba wan lain i bin kamap Kristen, bilong makim ol na givim strong long ol bilong autim tok long “ol strongpela wok bilong God” long kain kain tok ples. Olsem na planti manmeri ol i kam bung long ol. Aposel Pita i kamapim tok bilong Joel 2⁠:​28, 29 na em i tokim ol, nau truim bilong dispela tok i kamap. (Aposel 2⁠:​1-​21) Tasol Baibel i no stori long wanpela lain binatang tru i bin kamap long dispela taim na i givim bikpela hevi na pen long sampela man na i kirapim sampela man long tanim bel. Nogat.

⁴ Tasol olsem wanem? I gat wanpela samting i bin kamap long dispela taim na i olsem wanpela bikpela lain binatang i givim hevi long ol man? Yes, i gat! Em i kamap taim ol dispela Kristen i mekim save autim tok. Long rot bilong ol, Jehova i singautim ol Juda i harim gut tok, long ol i mas tanim bel na bai em i mekim gut long ol. (Aposel 2⁠:​38-​40; 3⁠:19) Ol man i tanim bel, Jehova i mekim gut tru long ol. Tasol long ol man i sakim dispela tok, ol dispela Kristen i olsem wanpela bikpela lain grasopa i save pinisim ol kaikai long gaden na givim bikpela hevi long ol man. Ol dispela Kristen i kirap autim tok long Jerusalem na ol i go long olgeta hap bilong Judia na Samaria. I no longtaim na ol inapim olgeta ples, na taim ol i autim tok long Jisas i kirap bek pinis, dispela i givim pen long ol Juda i no bilip. (Aposel 1⁠:8; 4⁠:​18-​20; 5⁠:​17-​21, 28, 29, 40-​42; 17⁠:​5, 6; 21⁠:​27-​30) Ol Kristen i mekim dispela wok i go inap long taim nogut bilong yia 70, taim Jehova i bringim ol ami bilong Rom i kam pait long Jerusalem na bagarapim. Ol Kristen i bilip na ol i singaut long Jehova na kolim nem bilong em, ol tasol i no bagarap.​—⁠Joel 2⁠:32; Aposel 2⁠:​20, 21; Sindaun 18⁠:⁠10.

Bikpela Lain Grasopa Long Taim Bilong Yumi

 5. Wanem samting i kamap bihain long 1919 na i makim olsem narapela truim bilong tok profet bilong Joel i kamap?

⁵ Orait, i stret yumi ken ting tok profet bilong Joel i mas i gat laspela truim bilong en i kamap long taim bilong las de. Wanpela bikpela kibung bilong ol Sumatin Bilong Baibel i kamap long Sida Poin, Ohaio, long Amerika, long Septemba 1 i go 8, 1919; long dispela taim Jehova i kapsaitim spirit holi long lain bilong em na ol i kirap mekim bikpela wok bilong autim tok long olgeta hap graun. Planti lain ol i tok ol i Kristen, tasol lain bilong Jehova tasol i bilip olsem Jisas i kamap King pinis long heven, olsem na ol i wok strong tru long autim dispela gutpela tok long olgeta hap. Ol i no les​—⁠ol i mekim save autim tok; ol i olsem bikpela lain grasopa, na tok bilong ol i givim bikpela pen long ol lotu i lusim pinis tok bilong God. Dispela bikpela wok ol Kristen i mekim i truim tok profet bilong Baibel.​—⁠Matyu 24⁠:​3-8, 14; Aposel 1⁠:⁠8.

 6. (a) Taim namba 5 ensel i winim biugel bilong em, Jon i lukim wanem samting? (b) Dispela “sta” i makim husat? Olsem wanem yumi inap tok olsem?

⁶ Jon i bin raitim tok bilong Kamapim Tok Hait inap 26 yia samting bihain long taim Jerusalem i kisim bagarap, na dispela hap tu bilong Baibel i stori long bikpela lain grasopa. Jon i tok: “Orait namba 5 ensel i winim biugel bilong en, na mi lukim wanpela sta i lusim heven na i pundaun long graun. Na ol i givim em ki bilong dispela hul i go daun moa na i no gat as bilong en.” (KTH 9⁠:⁠1) Dispela “sta” i narapela kain long “sta” bilong Kamapim Tok Hait 8⁠:​10, em i wok long pundaun na Jon i lukim. Nau em i lukim wanpela “sta i lusim heven na i pundaun [pinis] long graun” na nau dispela “sta” i gat wanpela wok long dispela graun. Dispela “sta” em i husat? Em i wanpela ensel o wanpela man? Man bilong holim “ki bilong dispela hul . . . i no gat as,” bihain Baibel i stori gen long em na i tok, em i tromoi Satan i go daun long “hul i no gat as.” (KTH 20⁠:​1-3) Olsem na yumi ken save em i wanpela strongpela ensel. Long Kamapim Tok Hait 9⁠:11 Jon i tok ol dispela grasopa i gat “wanpela king i stap hetman bilong ol. Dispela king em i ensel bilong dispela hul . . . i no gat as.” Dispela tupela tok bilong Baibel long KTH 9ves 1 na 11 i mas stori long wanpela ensel tasol; long wanem, dispela ensel i holim ki bilong bikpela hul, na ensel bilong bikpela hul, i olsem wanpela ensel tasol. Na dispela sta em i mas makim King em Jehova i bin putim, long wanem, ol Kristen em Jehova i bin makim ol long spirit holi ol i gat wanpela King tasol, em dispela ensel Krais Jisas.​—⁠Kolosi 1⁠:13; 1 Korin 15⁠:⁠25.

 7. (a) Taim “sta” i opim dispela ‘hul i no gat as,’ wanem samting i kamap? (b) Dispela ‘hul i no gat as,’ em i wanem samting? Husat ol i stap sotpela taim insait long dispela hul?

⁷ Jon i stori moa olsem: “Orait sta i opim dispela hul, na smok i kamap long hul olsem smok bilong bikpela paia. Na dispela smok i kamap long hul em i karamapim san na skai, na san na skai i kamap tudak. Na planti binatang olsem ol grasopa ol i lusim dispela smok, na ol i go nabaut long graun. Ol i kisim strong olsem strong bilong ol skopion, em ol dispela binatang bilong graun i save bagarapim man.” (KTH 9⁠:​2, 3) Long Baibel, dispela tok ‘hul i no gat as’ i makim wanpela ples i no gat wanpela wok i kamap long en, o ples bilong i dai. (Lukim Rom 10⁠:7; Kamapim Tok Hait 17⁠:8; 20⁠:​1, 3.) Taim Namba Wan Pait i pinis, inap sotpela taim tasol liklik lain brata bilong Jisas ol i no mekim wok bilong ol (long 1918-​1919), na i olsem ol i stap insait long wanpela ‘hul i no gat as.’ Tasol bihain ol i tanim bel, na long 1919 Jehova i kapsaitim spirit long ol, na ol i kamap strong na ol i redi long mekim wanpela bikpela wok​—⁠ol i olsem wanpela strongpela lain grasopa i laik i go nabaut.

 8. Taim ol dispela grasopa i lusim hul na i kam ausait, olsem wanem na bikpela “smok” i kamap long hul?

⁸ Taim ol grasopa i lusim hul, bikpela smok i kamap, olsem “smok bilong bikpela paia.”b Na kain samting olsem i kamap long 1919. Bikpela hevi olsem tudak i painim ol lain i gat nem Kristen na olgeta narapela lain bilong graun. (Lukim Joel 2⁠:​30, 31.) Ol dispela grasopa, olsem liklik lain Jon i piksa bilong ol, ol i lusim hul na kirap gen long mekim wok, na dispela i makim olsem wok bilong ol pris pasto bilong ol lotu i pundaun, em ol i bin wok long painim rot bilong daunim na pinisim wok bilong Kingdom bilong God. Taim dispela lain olsem grasopa i kisim strong long God, ol i kirap mekim wok bilong tokaut long bikpela strafe bai painim ol dispela lotu. Dispela i olsem bikpela smok i karamapim ol lotu i gat nem Kristen, em ol i bikhet na lusim tok i tru bilong Baibel. Long ai bilong ol man, i olsem ol dispela lotu i gat lait, o save, bilong Baibel​—⁠tasol nau dispela lait, olsem “san,” i go tudak, na “skai” i kamap tudak long dispela smok taim dispela lain olsem grasopa i autim dispela strongpela tok bilong God na ol i kamapim long ples klia olsem god bilong ol dispela lotu em i “hetman” bilong dispela graun.​—⁠Efesus 2⁠:2; Jon 12⁠:31; 1 Jon 5⁠:⁠19.

Ol Grasopa i Givim Pen Long Ol!

 9. Ol dispela grasopa i kisim wanem tok bilong mekim pait?

⁹ Ol grasopa i kisim wanem tok long ol samting ol i mas mekim long pait? Jon i tok: “Ol i tokim ol dispela grasopa olsem, ‘Yupela i no ken bagarapim ol gras na ol kain kain samting i save kamap long graun na ol diwai. Nogat. Yupela i mas bagarapim tasol dispela ol manmeri i no gat mak bilong God i stap long pes bilong ol. Yupela i ken givim pen long ol dispela manmeri i go inap long 5-pela mun, tasol yupela i no ken kilim ol i dai.’ Na ol dispela grasopa i go nabaut na givim pen nogut tru long ol manmeri. Pen ol i givim em i wankain olsem ol skopion i save givim long ol manmeri. Long dispela taim ol manmeri bai i wok long painim rot bilong i dai, tasol ol bai i no inap i dai. Ol bai i laikim tumas long i dai, tasol dai bai i ranawe long ol.”​—⁠KTH 9⁠:​4-6.

10. (a) Ol grasopa i mas givim pen long husat pastaim? Dispela bai mekim wanem long ol lain i kisim pen? (b) Wanem kain hevi i painim ol na i olsem ol i kisim pen? (Lukim sta i gat liklik rait, i stap daunbilo long pes 145.)

¹⁰ Olsem yumi lukim long dispela tok, ol dispela lain grasopa i no ken bagarapim pastaim ol manmeri nating o ol man i gat nem namel long ol, olsem “ol gras na ol kain kain samting i save kamap long graun na ol diwai,” nogat. (Lukim Kamapim Tok Hait 8⁠:⁠7.) Ol grasopa i mas givim pen long ol man bilong ol lotu i gat nem Kristen em ol i tok ol i gat mak bilong God, tasol ol wok nogut bilong ol i kamapim klia olsem ol i no gat dispela mak. (Efesus 1⁠:​13, 14) Olsem na ol dispela strongpela tok bilong kot dispela lain olsem grasopa i autim, i givim bikpela pen tru long ol bikpela man bilong ol lotu i gat nem Kristen. Ol dispela bikpela man i harim dispela strongpela tok ol dispela lain olsem grasopa i sutim long ol, na bel bilong ol i bagarap stret na i olsem ol i kisim bikpela pen!c Wanpela tok bilong Baibel i kamap tru long ol, i tok, ‘aipas i soim rot long narapela aipas’!​—⁠Matyu 15⁠:⁠14.

11. (a) Ol grasopa i kisim strong bilong givim pen long ol birua bilong God i go inap hamas mun? Olsem wanem yumi ken tok, dispela i no sotpela taim tru? (b) Dispela pen ol i kisim, em i bikpela olsem wanem?

¹¹ Dispela pen ol i kisim em i stap inap 5-pela mun. Olsem wanem? Em i sotpela taim tasol? Nogat. Ol grasopa tru i save stap laip inap 5-pela mun tasol. Olsem na dispela lain bilong nau em ol grasopa i makim, taim ol i stap laip yet, long olgeta taim ol i wok long givim bikpela pen tru long ol birua bilong God, na ol i laik painim rot bambai ol i ken i dai na abrusim dispela pen. Dispela tok piksa i helpim yumi long pilim dispela bikpela pen ol birua bilong God i kisim​—⁠olsem pen bilong binatang ol i kolim skopion, taim em i wok long sutim man long tel bilong en. Em i olsem bikpela hevi na pen em Jeremaia i tok profet long ol Israel bai kisim, long wanem ol i no stap gut long Jehova. Jeremaia i tok, ol Babilon bai kam rausim ol long graun bilong ol na bai ol i go nabaut na ol i no laik i stap laip moa​—⁠ol i laik bai ol i ken dai tasol.​—⁠Jeremaia 8⁠:3; lukim tu Saveman 4⁠:​2, 3.

12. Bilong wanem ol grasopa i kisim strong bilong givim “pen” long ol pris pasto bilong ol lotu i gat nem Kristen, tasol ol i no ken kilim ol i dai?

¹² Bilong wanem dispela lain olsem grasopa i mas givim pen long ol na i no ken kilim ol i dai? Long wanem, dispela em i namba wan hevi tasol, em i kamap taim lain bilong God i kamapim long ples klia bilip giaman na wok nogut bilong ol dispela lotu. Tasol bihain, taim de bilong Bikpela i wok long i go moa yet, lain bilong God bai tokaut strong na i tok, ol dispela lotu i gat nem Kristen ol i dai pinis long ol samting bilong spirit. Taim namba 2 bikpela hevi i kamap, wanpela hap bilong ol lain man bai kisim bagarap.​—⁠KTH 1⁠:10; 9⁠:​12, 18; 11⁠:⁠14.

Ol Grasopa i Redi Long Pait

13. Pes na skin bilong ol dispela grasopa i olsem wanem ol samting?

¹³ Olaman! Ol dispela grasopa i narapela kain stret! Jon i stori long ol olsem: “Mi lukim ol dispela grasopa ol i olsem ol hos i redi long pait. Long het bilong ol, ol samting olsem ol hat gol i stap. Na pes bilong ol i olsem pes bilong man. Na gras bilong ol i longpela, olsem gras bilong ol meri. Na tit bilong ol i olsem tit bilong laion. Ol samting olsem ol siot kapa i karamapim bros bilong ol, na ol wing bilong ol i pairap olsem pairap bilong planti karis ol hos i pulim na ol i ran i go long pait.”​—⁠KTH 9⁠:​7-9.

14. Olsem wanem stori Jon i mekim long ol grasopa i stret wantaim dispela lain Kristen long 1919, taim ol i kisim bek strong?

¹⁴ Dispela piksa i makim stret dispela liklik lain Kristen em ol i stap gut long God na ol i kisim bek strong long yia 1919. Ol i olsem ol hos i redi long pait. Ol i givim bel long mekim pait bilong helpim tok i tru. (Efesus 6⁠:​11-​13; 2 Korin 10⁠:⁠4) Long het bilong ol, Jon i lukim samting olsem hat gol. I no stret sapos ol i gat hat tru bilong king, long wanem, ol i no kirap mekim wok king taim ol i stap yet long graun. (1 Korin 4⁠:8; KTH 20⁠:⁠4) Tasol long 1919 ol i olsem man i king pinis, long wanem hat king bilong ol i stap na i wetim ol, na ol inap putim sapos ol i stap gut long wok bilong ol i go inap long taim ol i dai.​—⁠2 Timoti 4⁠:8; 1 Pita 5⁠:⁠4.

15. Wanem insait bilong dispela tok piksa long ol grasopa (a) i gat siot kapa i karamapim bros bilong ol? (b) i gat pes olsem bilong man? (c) i gat gras olsem bilong meri? (d) i gat tit olsem bilong laion? (e) ol i mekim bikpela pairap?

¹⁵ Long dispela driman ol grasopa i gat siot kapa i karamapim bros bilong ol, na dispela i makim olsem ol i strong long bihainim stretpela pasin. (Efesus 6⁠:​14-​18) Na pes bilong ol i olsem pes bilong man, na dispela i makim olsem ol i gat pasin sori, long wanem God i wokim man i gat pasin olsem em yet, na God em i as bilong pasin sori. (Stat 1⁠:26; 1 Jon 4⁠:16) Gras bilong ol i longpela olsem gras bilong ol meri, na dispela i makim stret olsem ol i daun long King bilong ol. Na tit bilong ol i olsem tit bilong laion. Laion i save mekim wok long tit bilong en bilong brukbrukim abus. Kirap long 1919, dispela lain em Jon i piksa bilong ol, ol inap kirap gen long kisim ol strongpela kaikai bilong spirit. Ol i kisim stretpela save long Kingdom bilong God, em Krais Jisas i King bilong en, em i “Laion i bin kamap long lain Juda.” Laion i gat strongpela bel na i no save pret, na olsem tasol dispela liklik lain i mas i gat strongpela bel bambai ol inap kisim save long dispela strongpela tok ol i mas autim na ol i ken putim long ol buk na nius bilong ol na tilim long olgeta hap. Dispela lain olsem grasopa ol i mekim bikpela pairap olsem “pairap bilong planti karis ol hos i pulim na ol i ran i go long pait.” Ol i bihainim pasin bilong ol Kristen bilong pastaim, na ol i no pasim maus liklik.​—⁠1 Korin 11⁠:​7-​15; KTH 5⁠:⁠5.

16. Dispela tok long ol grasopa i gat “tel olsem bilong ol skopion, na nil bilong sutim marasin nogut bilong givim pen, em i stap long tel bilong ol”​—⁠wanem insait bilong dispela tok?

¹⁶ Na ol i no ken autim tok long maus tasol​—⁠i gat narapela samting tu ol i mas mekim! “Ol dispela grasopa i gat tel olsem bilong ol skopion, na nil bilong sutim marasin nogut bilong givim pen, em i stap long tel bilong ol. Olsem na strong bilong ol bilong givim pen nogut tru long ol manmeri i go inap long 5-pela mun, em i stap long ol tel bilong ol.” (KTH 9⁠:10) Wanem insait bilong dispela tok? Em olsem: Taim ol Witnes Bilong Jehova i mekim wok bilong Kingdom, long rot bilong autim tok na ol buk na nius, ol i kamapim ol tok i gat strong em Baibel i as bilong en. Ol tok bilong ol i olsem binatang skopion i gat nil bilong sutim marasin nogut long ol man, long wanem, ol i kamapim strongpela toksave long bikpela De bilong Jehova i klostu pinis, na long dispela De bai em i bekim nogut long ol man. (Aisaia 61⁠:⁠2) Taim dispela lain grasopa bilong spirit i no i dai yet, bai ol inapim tru wok bilong ol long autim strongpela tok long kot bilong Jehova bai painim ol man​—⁠dispela bai givim bikpela pen long ol man i tok bilas long Jehova.

17. (a) Long kibung bilong ol Sumatin Bilong Baibel long 1919, ol i kamapim wanem toksave na taim ol i autim dispela tok em i givim bikpela pen moa long ol bikpela man bilong lotu? (b) Olsem wanem ol pris pasto i kisim pen? Ol i kirap mekim wanem long dispela?

¹⁷ Dispela lain olsem grasopa i amamas tru taim ol i kisim wanpela nupela nius (The Golden Age) long kibung bilong ol long 1919. Dispela nius i kamap long olgeta tupela tupela wik, na wok bilong en i bilong givim pen moa yet long ol man taim ol i lukim ol tok bilong en.d Nius bilong Septemba 29, 1920, em Namba 27, i kamapim pasin giaman bilong ol pris pasto em ol i gat tupela maus, na ol i mekim nogut long ol Witnes Bilong Jehova long Amerika long 1918 inap 1919. Long 1920 i go inap 1930 samting, nius i kamapim sampela strongpela tok na piksa moa i kamapim pasin bilong ol pris pasto​—⁠long pasin hait ol i insait long wok politik, na pop wantaim ol narapela bikpela man bilong misin Katolik i wokim kontrak wantaim gavman Fasis na gavman bilong Hitler, em ol gavman nogut. Orait ol pris pasto i bel nogut long ol Witnes i bin kamapim ol dispela rong bilong ol, olsem na ol i painim rot long lo bilong gavman na ol i bungim sampela bikhetman bilong paitim na mekim nogut long lain bilong God.​—⁠Song 94⁠:⁠20.

Toksave i Go Long Ol Gavman

18. Ol grasopa i gat wanem wok ol i mas mekim? Taim namba 5 ensel i winim biugel bilong em, wanem samting i kamap?

¹⁸ Dispela lain bilong nau i olsem ol grasopa, ol i gat wok long autim tok bilong Kingdom na kamapim long ples klia ol bilip giaman bilong ol lotu, na ol i mas painim ol sipsip i lus. Ol manmeri bilong graun ol i mas harim ol dispela tok na lukim ol wok ol i mekim. Ol dispela lain em Jon i piksa bilong ol, ol i bihainim singaut bilong ol biugel ol ensel i winim, na ol i wok long kamapim klia olsem i stret Jehova i laik givim strafe long ol lotu giaman i gat nem Kristen. Taim ol ensel i winim pinis namba 5 biugel, ol Sumatin Bilong Baibel i mekim wanpela kibung long Landon, Inglan, long Me 25 i go 31, long 1926, na ol i tokaut strong long sampela samting bilong ol dispela tok bilong kot i mas painim ol birua bilong Jehova. Ol i kamapim wanpela bikpela toksave, het-tok bilong en i olsem: “Wanpela Toksave i Go Long Ol Gavman Bilong Graun”; na ol i mekim bikpela pablik-tok long wanpela bikpela haus kibung (Royal Albert Hall), nem bilong tok, “I Gat Wanem As na Ol Bikpela Gavman Bilong Graun i Laik Pundaun​—⁠Wanem Samting Inap Stretim?” Bihain ol i wokim wanpela liklik nius i gat dispela toksave long en, na dispela lain olsem grasopa i tilim 50 milion long olgeta hap bilong graun. Dispela i givim bikpela pen long ol pris pasto, olsem nil bilong binatang i sutim ol! Inap planti yia bihain, ol man bilong Inglan i toktok yet long dispela strongpela tok i sutim ol pris pasto na kamapim long ples klia ol rong bilong ol.

19. Dispela lain olsem grasopa ol i kisim wanem narapela samting bilong helpim ol long mekim pait? Dispela samting i tok wanem long dispela pepa ol pris pasto i kamapim long Landon?

¹⁹ Long dispela kibung ol dispela lain olsem grasopa ol i kisim narapela samting moa bilong mekim pait bilong ol​—⁠ol i kisim wanpela nupela buk (Deliverance). Em i kamapim wanpela tok bilong Baibel i stori long mak bilong soim yumi tru olsem Kingdom bilong Krais long heven i kamap long yia 1914. (Matyu 24⁠:​3-​14; KTH 12⁠:​1-​10) Bihain long dispela tok, buk hia i kolim toksave i stap long wanpela pepa em 8-pela pasto i sainim nem bilong ol long en, na ol i wokim long Landon long 1917. Dispela pepa i tok, ol dispela pasto i ‘man bilong autim tok bilong lotu, winim planti man bilong graun.’ Ol dispela pasto ol i bilong lotu Baptis, Kongrigesenal, Presbitirian, Episkopelian, Metodis. Dispela pepa i tokaut olsem, ‘dispela bikpela hevi i kamap long graun i makim olsem taim bilong ol man bilong ol narapela lain i pinis,’ na ‘liklik taim bai Bikpela i kamap ples klia.’ Em nau, ol dispela pasto i luksave long ol mak i kamap bilong makim kambek bilong Jisas! Tasol olsem wanem? Ol i laik mekim wanpela samting long dispela? Dispela buk (Deliverance) i tok: “Yumi kirap nogut, long wanem ol dispela man i bin sainim nem bilong ol long pepa, bihain ol i sakim dispela tok na ol i sakim ol mak i kamapim long ples klia olsem yumi stap long taim bilong las de na long taim bilong namba tu kambek bilong Bikpela.”

20. (a) Ol pris pasto i no laik mekim wanem long dispela lain olsem grasopa na King bilong ol? (b) Husat i bosim dispela lain grasopa olsem Jon i tok? Nem bilong em husat?

²⁰ Ol pris pasto i no laik tokaut olsem Kingdom bilong God i kamap pinis. Ol i laik i stap insait long ol manmeri em Satan i bosim ol. Ol i no laik helpim dispela lain olsem grasopa na King bilong ol, em Jon i lukim long driman na em i tok: “Ol i gat wanpela king i stap hetman bilong ol. Dispela king em i ensel bilong dispela hul i go daun moa na i no gat as bilong en. Long tok Hibru ol i kolim nem bilong dispela ensel olsem Abadon [olsem “Bagarap”]. Na long tok bilong yumi ol i kolim em Man Bilong Bagarapim Olgeta Samting.” (KTH 9⁠:11) Jisas em “ensel bilong dispela hul i go daun moa” na em i “Man Bilong Bagarapim Olgeta Samting,” na tru tumas em i kapsaitim bikpela hevi tru i go daun long ol lotu bilong graun ol i gat nem Kristen! Tasol i gat sampela bikpela hevi moa i mas kamap!

[Ol Futnot]

[Piksa long pes 143]

Taim namba 5 ensel i winim biugel bilong em, namba wan bilong ol 3-pela bikpela hevi i kamap

[Piksa long pes 146]

Ol spia bilong yu i sap tumas na i sutim tru ol birua bilong King. (Song 45⁠:⁠5) Bipo ol i bin wokim dispela piksa olsem komik na raitim dispela tok aninit long en. Long 1930 i go inap 1940 ol i wokim planti piksa olsem, na dispela i givim bikpela pen long ‘ol man i no gat mak bilong God i stap long pes bilong ol’

[Ol Piksa long pes 147]

Long dispela haus bung (Royal Albert Hall ) ol i tokaut long nupela buk (Deliverance) na ol i kamapim wanpela toksave, nem bilong en “Wanpela Toksave i Go Long Ol Gavman Bilong Graun”