Jisas na ol disaipel bilong em i lusim Jeriko na ol i kam slip 3-pela nait long Betani. Nau em bikmoning long Mande, Nisan 10, na ol i laik go long Jerusalem. Jisas i hangre, olsem na taim em i lukim wanpela diwai fik, em i wokabaut i go long en. Olsem wanem? Diwai i karim sampela kaikai?

Nau em klostu long pinis bilong mun Mas, na em i no taim bilong fik, ol fik i save karim kaikai long mun Jun. Maski i olsem, ol nupela lip i kamap paslain liklik long taim stret bilong en. Olsem na Jisas i ting i gat sampela fik i redi pinis. Tasol em i lukim olsem diwai i no karim kaikai yet. Ol nupela lip i kamap na dispela i mekim na i luk olsem diwai i gat kaikai. Jisas i tok: “Man i no ken kaikai prut bilong yu moa.” (Mak 11:14) Wantu tasol, diwai i stat long drai, so ol bai kisim save long mining bilong dispela tok long de bihain.

I no longtaim na Jisas na ol disaipel bilong em i go kamap long Jerusalem. Long de i go pinis em i bin i go lukluk raun, tasol nau em i go na mekim wankain samting olsem em i bin mekim long Pasova bilong 30 C.E., em samting i kamap 3-pela yia i go pinis. (Jon 2:14-16) Jisas i rausim “ol man i wok long baim na salim ol samting insait long tempel.” Em i kapsaitim “ol tebol bilong ol man i wok long senisim mani na ol fom bilong ol man i wok long salim ol pisin balus.” (Mak 11:15) Na tu, em i no larim ol man i yusim banis bilong tempel olsem sot kat rot bilong bringim ol samting long wanpela sait bilong taun i go long narapela sait bilong taun.

Wai na Jisas i rausim ol man bilong senisim mani na ol man i salim ol animal long tempel? Em i tok: “Rait Holi i tok: ‘Ol bai kolim haus bilong mi olsem haus bilong ol man bilong olgeta lain long mekim beten.’ Tasol yupela mekim i kamap olsem ples hait bilong ol stilman.” (Mak 11:17) Em i kolim ol stilman, long wanem, ol i makim bikpela pe tru long ol animal em ol man i baim bilong mekim ofa. Jisas i lukim pasin bilong ol i olsem ol stilman.

Tru tumas, ol bikpris, ol saveman bilong lo, na ol hetman bilong ol manmeri i harim stori long samting Jisas i mekim, na ol i tingting strong long kilim em i dai. Tasol ol i no save long olsem wanem ol bai kilim em i dai, long wanem, ol manmeri i go long em bilong harim ol tok em i autim.

Ol Juda na ol man i bin tanim bel na kam insait long lotu Juda, olgeta i kam long Pasova. Namel long ol i gat sampela Grik em ol i kam bilong insait long dispela bikpela bung bilong lotu. Ating ol dispela lain Grik i tingim nem bilong Filip olsem nem Grik, olsem na ol i kam long em na askim sapos ol inap long lukim Jisas. Tasol Filip i no save sapos i stret long em i bung wantaim ol o nogat, olsem na em i go lukim Andru. Na tupela i bringim dispela tok i go long Jisas, long dispela taim ating Jisas i stap yet long tempel.

Jisas i save olsem sampela de bihain em bai dai, olsem na em i no laik lusim nating taim long ol man i laik save long em o i laik givim biknem long em. Em i mekim wanpela tok piksa bilong bekim tok bilong tupela aposel, olsem: “Taim bilong Pikinini bilong man long kisim glori i kamap pinis. Tru tumas mi tokim yupela, Sapos sid bilong wit i no pundaun long graun na i dai, orait em bai i stap yet olsem wanpela sid. Tasol sapos dispela sid i dai, orait em bai karim planti kaikai.”—Jon 12:23, 24.

Wanpela sid bilong wit i luk olsem liklik samting. Tasol sapos sid i pundaun long graun na “i dai,” orait em bai kru na bihain em bai gro na karim planti kaikai. Olsem tasol, Jisas em wanpela man i gutpela olgeta. Sapos em i stap gut long God i go inap long em i dai, em bai opim rot long planti manmeri i ken kisim laip oltaim, em ol tu i gat pasin bilong givim laip bilong ol yet long helpim ol arapela. Olsem na Jisas i tok: “Man i laikim tumas laip bilong em yet, em i bagarapim laip bilong en. Na man i no laikim laip bilong en long dispela graun, em bai holimpas laip bilong en na kisim laip oltaim.”—Jon 12:25.

Jisas i no tingim em yet tasol, long wanem, em i tok: “Man i laik stap wokman bilong mi, em i mas bihainim mi. Na hap mi stap long en, wokman bilong mi tu bai i stap long en. Man i laik stap wokman bilong mi, Papa bai givim biknem long em.” (Jon 12:26) Em gutpela pe tru, a? Ol manmeri em Papa i givim biknem long ol, ol bai kamap wanwok bilong Krais long Kingdom.

Jisas i tingim ol hevi em bai karim na klostu nau ol man bai kilim em i dai, olsem na em i tok: “Nau bel bilong mi i hevi na mi tingting planti, bai mi tok wanem? Papa, kisim bek mi long dispela taim nogut.” Tasol Jisas i no tingting long abrusim wok em i kam bilong mekim, nogat, em i laik inapim laik bilong God. Em i tok moa: “Tasol dispela taim nogut i mas kamap long mi, em long dispela as na mi kam.” (Jon 12:27) Jisas i wanbel long olgeta samting God i tingting pinis long mekim, na long dai bilong em yet tu.

Long Mande, Nisan 10, Jisas i stap long tempel na em i stori long dai bilong em, em samting klostu bai painim em. Jisas i tingim samting dispela bai mekim long nem bilong God, na em i tok: “Papa, litimapim nem bilong yu.” Na wanpela strongpela nek i kamap long heven na i tok: “Mi litimapim pinis nem bilong mi na bai mi litimapim gen.”—Jon 12:27, 28.

Ol manmeri i sanap klostu i kirap nogut tru. Sampela i ting olsem ol i harim tanda i pairap. Ol narapela i tok: “Wanpela ensel i toktok long em.” (Jon 12:29) Tasol tru tru, ol i harim Jehova i toktok! Na dispela em i no fes taim ol manmeri i bin harim God i toktok long Jisas.

Inap 3 na hap yia i go pinis, taim Jisas i kisim baptais, Jon Bilong Baptais i bin harim God i tok long Jisas, olsem: “Dispela em i Pikinini bilong mi, mi laikim em tumas na mi amamas long em.” Bihain, long 32 C.E., taim ol i mekim pinis Pasova bilong dispela yia, bodi bilong Jisas i senis na i kamap narakain long ai bilong Jems, Jon, na Pita. Dispela 3-pela man i bin harim God i tokaut olsem: “Dispela em i Pikinini bilong mi, mi laikim em tumas na bel bilong mi i amamas long em. Harim tok bilong em.” (Matyu 3:17; 17:5) Tasol long dispela namba 3 taim, Jehova i toktok na bai olgeta manmeri i ken harim!

Jisas i tok: “Dispela nek i no kamap bilong helpim mi, nogat, em bilong helpim yupela.” (Jon 12:30) Dispela i kamapim klia olsem em i Pikinini tru bilong God, dispela Mesaia em Baibel i tok profet long em.

Na moa yet, Jisas i stap gut long God long laip olgeta bilong em na em i stap gutpela piksa long ol manmeri i ken bihainim, na tu, em i kamapim klia olsem i stret God i pinisim Satan, dispela hetman bilong graun. Jisas i tok: “God i mekim wok jas na skelim ol manmeri bilong graun na em bai i rausim hetman bilong dispela graun.” Na em i tok moa: “Tasol long mi yet, taim ol i hangamapim mi, mi bai pulim kain kain man i kam long mi.” (Jon 12:31, 32) Dispela i kamapim klia olsem dai bilong Jisas bai helpim planti man long i go klostu long em na ol inap kisim laip oltaim.

Taim ol manmeri i harim Jisas i tok ol birua bai “hangamapim” em, ol i tok: “Mipela i harim pinis long Lo olsem Krais bai stap oltaim. Olsem wanem yu tok ol i mas hangamapim Pikinini bilong man? Pikinini bilong man em i husat?” (Jon 12:34) Maski planti samting i kamapim klia olsem em i Pikinini Bilong God, na tu, ol i harim nek bilong God yet i tokaut long Jisas, planti bilong ol i no bilip olsem Jisas em i Pikinini tru bilong God, em dispela Mesaia God i bin tok promis long en.

Olsem Jisas i save mekim, em i tok em i stap olsem “lait.” (Jon 8:12; 9:5) Em i tokim ol manmeri olsem: “Lait bai stap wantaim yupela inap liklik taim moa. Wokabaut taim lait i stap wantaim yupela na bai tudak i no ken karamapim yupela. . . . Taim lait i stap wantaim yupela, bilip long dispela lait, na bai yupela i ken kamap ol pikinini bilong lait.” (Jon 12:35, 36) Bihain Jisas i lusim ol na i go, long wanem, Nisan 10 i no de bilong em long dai. Pasova long Nisan 14 em taim we ol bai hangamapim em na nilim em long wanpela diwai pos.—Galesia 3:13.

Jisas i bin autim tok, tasol ol Juda i no bilip long em na dispela i truim tok profet bilong Aisaia. Em i tok profet olsem ol manmeri bai kamap aipas na bel bilong ol bai kamap strong na bai ol i no tanim bel na kamap orait. (Aisaia 6:10; Jon 12:40) Tru tumas, planti Juda i bin bikhet na sakim ol samting i kamapim klia olsem Jisas em dispela Man Bilong Kisim Bek ol man, na em i rot bilong laip.

Nikodemus, Josep Bilong Arimatea, na planti arapela hetman i “bilip” long Jisas. Tasol bilip bai kirapim ol long mekim samting, o ol bai haitim bilip bilong ol, long wanem, ol i pret long ol man bai rausim ol long sinagog o ol i “laikim tumas bai ol man i litimapim nem bilong ol”?—Jon 12:42, 43.

Jisas i stori long pasin bilong bilip i makim wanem samting, em i tok: “Man i bilip long mi, em i no bilip long mi tasol, nogat, em i bilip tu long man i bin salim mi i kam. Na man i lukim mi, em i lukim tu dispela man i salim mi i kam.” Ol tok i tru em God i tokim Jisas long skulim ol man long en, na ol tok Jisas i wok yet long tokaut long en, ol i bikpela samting tru, olsem na Jisas i tok: “Man i givim baksait long mi na i no kisim ol tok bilong mi, i gat wanpela samting bai stap jas bilong em. Tok mi bin autim, dispela bai stap jas bilong em long las de.”—Jon 12:44, 45, 48.

Jisas i pinisim tok bilong em olsem: “Mi no autim tok long tingting bilong mi yet, nogat. Papa i bin salim mi i kam na em yet i tokim mi long olgeta tok mi mas mekim na autim. Na mi save olsem tok bilong em i kamapim laip oltaim.” (Jon 12:49, 50) Jisas i save olsem i no longtaim na em bai kapsaitim blut bilong em yet olsem ofa bilong helpim ol manmeri i bilip long em.—Rom 5:8, 9.