Askim Bilong Ol Rida
Taim Devit i tok long Buk Song 61:8 olsem em bai preisim nem bilong God inap “oltaim oltaim,” yu ting em i laik tok olsem em i no inap dai?
Nogat. Tok em Devit i mekim long dispela ves em i tru na i stret.
Skelim tok em i raitim long dispela ves na ol wankain ves, em i tok: “Bai mi singim ol song bilong preisim nem bilong yu inap oltaim oltaim.” “O Jehova God bilong mi, long bel olgeta mi givim biknem long yu, na oltaim bai mi givim glori long nem bilong yu.” “Oltaim oltaim mi bai preisim nem bilong yu.”—Sng. 61:8; 86:12; 145:1, 2.
Taim Devit i raitim ol dispela tok, em i no minim olsem em bai i no inap dai, nogat. Em i save long tokaut Jehova i mekim olsem ol man i gat sin ol bai dai, na Devit i bin tokaut olsem em i wanpela sinman. (Stt. 3:3, 17-19; Sng. 51:4, 5) Em i save olsem ol man em God i orait long ol olsem Abraham, Aisak, na Jekop i bin dai pinis. Na Devit inap luksave olsem em tu bai dai. (Sng. 37:25; 39:4) Tasol tok bilong em long Buk Song 61:8 i kamapim klia olsem em i gat laik na em i tingting strong long preisim God inap oltaim oltaim, dispela i makim olsem Devit i laik preisim God long laip olgeta bilong em.—2 Sml. 7:12.
Sampela taim Devit i raitim ol stori long laip bilong em yet, olsem yumi ken lukim long supaskripsen bilong Buk Song 18, 51, na 52. Long Buk Song 23, Devit i stori long Jehova olsem wanpela wasman husat i save stiaim, givim nupela strong, na lukautim gut ol sipsip bilong em. Devit em i kain wasman olsem. Na em i laik lotuim God ‘long olgeta de em i stap laip.’—Sng. 23:6.
Tingim tu olsem, Jehova i bin kirapim Devit long raitim ol dispela tok. Ol tok em i raitim i makim tu ol tok profet we bai kamap tru long bihain. Olsem, long Buk Song 110, Devit i stori long wanpela taim we Bikpela bilong em bai “sindaun long rait han bilong [God]” long heven na kisim bikpela strong. Bilong mekim wanem? Bilong daunim ol birua bilong God na “kotim ol lain manmeri” bilong graun. Devit em wanpela tumbuna bilong Mesaia, em man husat bai mekim wok king long heven na em bai stap “pris inap oltaim oltaim.” (Sng. 110:1-6) Jisas i tok olsem tok profet i stap long Buk Song 110 i stori long em na truim bilong en bai kamap tru long bihain.—Mat. 22:41-45.
Yes, God i kirapim Devit long raitim ol tok i stori long taim bilong em na long wanpela taim bai kamap bihain we em bai kirap bek na amamas long preisim Jehova inap oltaim oltaim. Dispela i helpim yumi long tingim tok bilong Buk Song 37:10, 11, 29 long gutpela sindaun long taim bilong ol Israel bilong bipo, na tu, long gutpela sindaun bai kamap long graun olgeta long bihain taim God i inapim ol tok promis bilong em.—Lukim paragraf 8 bilong atikol “Yu Bai Stap Wantaim Mi Long Paradais” long dispela magasin.
Buk Song 61:8 na ol wankain ves i soim olsem long Israel bilong bipo Devit i laik givim glori long Jehova i go inap long em i dai. Na ol dispela tok i kamapim klia samting Devit inap mekim long bihain taim Jehova i kirapim em bek long dai.