Genesa

9 Xikwembu xi katekisa Nowa ni vana vakwe xi ku eka vona: “Tswalanani mi andza mi tata misava.+ 2 Xivumbiwa xin’wana ni xin’wana lexi hanyaka emisaveni ni xivumbiwa xin’wana ni xin’wana lexi hahaka xa matilo, ni hinkwaswo leswi famba-fambaka emisaveni, ni tinhlampfi hinkwato ta lwandle, swi ta hambeta swi chava ni ku tshuka hikwalaho ka n’wina. Sweswi swi nyiketiwe+ emavokweni ya n’wina. 3 Xiharhi xin’wana ni xin’wana lexi famba-fambaka lexi hanyaka xi ta va swakudya swa n’wina.+ Hilaha ku fanaka ni hi swimila swa rihlaza, hinkwaswo ka swona ndzi mi nyika swona.+ 4 Ntsena nyama leyi nga ni moya-xiviri+ wa yona—ngati+ ya yona—​mi nga tshuki mi yi dya.+ 5 Tlhandlakambirhi, ngati ya mimoya-xiviri ya n’wina ndzi ta yi lava. Ndzi ta yi lava evokweni ra xivumbiwa xin’wana ni xin’wana lexi hanyaka; ni le vokweni ra munhu, evokweni ra un’wana ni un’wana loyi a nga makwavo, ndzi ta lava moya-xiviri wa munhu.+ 6 Un’wana ni un’wana la halataka ngati ya munhu, ngati yakwe yi ta halatiwa+ hi munhu, hikuva Xikwembu xi endle munhu hi xifaniso xa xona. 7 Loko ku ri n’wina, tswalanani mi andza, endlani leswaku misava yi tala swinene hi n’wina naswona mi andza eka yona.”+

8 Xikwembu xi ya emahlweni xi byela Nowa ni vana vakwe lava a nga na vona xi ku: 9 “Loko ku ri mina, ndzi simeka ntwanano+ wa mina na n’wina ni vana va n’wina lava nga ta va kona endzhaku ka n’wina,+ 10 ni moya-xiviri wun’wana ni wun’wana lowu hanyaka lowu nga na n’wina, wa tinyenyana, wa swifuwo ni wa swivumbiwa hinkwaswo leswi hanyaka swa misava leswi nga na n’wina, ku sukela eka hinkwaswo leswi humaka engalaveni ku ya eka xivumbiwa xin’wana ni xin’wana lexi hanyaka xa misava.+ 11 Ina, ndzi simeka ntwanano wa mina na n’wina: Nyama hinkwayo a yi nge he lovisiwi hi mati ya ndhambi, nakambe a ku nge he vi na ndhambi leyi nga ta lovisa+ misava.”

12 Kutani Xikwembu xi engeta xi ku: “Hi lexi xikombiso+ xa ntwanano lowu ndzi wu vekaka exikarhi ka mina na n’wina ni moya-xiviri wun’wana ni wun’wana lowu hanyaka lowu nga na n’wina, i wa switukulwana hilaha ku nga riki na makumu. 13 Ndzi mi nyika nkwangulatilo+ wa mina epapeni, wu fanele wu va xikombiso xa ntwanano exikarhi ka mina ni misava. 14 Kutaku loko ndzi tisa papa ehenhla ka misava, kunene nkwangulatilo wu ta humelela epapeni. 15 Kunene ndzi ta tsundzuka ntwanano+ wa mina exikarhi ka mina na n’wina ni moya-xiviri wun’wana ni wun’wana lowu hanyaka wa nyama+ hinkwayo; naswona mati a ma nge he vi ndhambi leyi nga ta lovisa+ nyama hinkwayo. 16 Nkwangulatilo wu ta humelela epapeni,+ kunene ndzi ta wu vona leswaku ndzi tsundzuka ntwanano wa hilaha ku nga riki na makumu+ exikarhi ka Xikwembu ni moya-xiviri wa nyama yin’wana ni yin’wana leyi nga emisaveni.”+

17 Xikwembu xi tlhela xi ku eka Nowa: “Lexi i xikombiso xa ntwanano lowu ndzi wu simekaka exikarhi ka mina ni nyama hinkwayo leyi nga ehenhla ka misava.”+

18 Vana+ va Nowa lava nga huma engalaveni a ku ri Xeme, Hamu na Yafeta. Endzhaku Hamu a va tata wa Kanana.+ 19 Lava vanharhu a va ri vana va Nowa, kutani vaaki hinkwavo va misava va hangalake hinkwako-nkwako+ va huma eka lava.

20 Nowa a sungula hi ku va murimi,+ a rima nsimu ya vhinya.+ 21 Kutani a nwa vhinyo a pyopyiwa,+ hiloko a tifunungula entsongeni wakwe. 22 Endzhakunyana Hamu+ tata wa Kanana a vona vuhava+ bya tata wakwe kutani a ya byela vamakwavo vambirhi lava a va ri ehandle.+ 23 Hiloko Xeme na Yafeta va teka nkhancu+ va wu veka emakatleni ya vona, va famba hi xindzhaku-ndzhaku. Kutani va funengeta vuhava bya tata wa vona swikandza swa vona swi fularherile, a va ku vonanga ku swela+ ka tata wa vona.

24 Nowa a hetelela a xalamukile eku pyopyiweni kakwe kutani a tiva leswi n’wana wakwe lontsongo eka hinkwavo a swi endleke eka yena. 25 Hiloko a ku:

28 Nowa a hanya malembe ya 350 endzhaku ka ndhambi.+ 29 Hikwalaho masiku hinkwawo ya Nowa a ma ri malembe ya 950, kutani a fa.+