Yohane

17 Yesu a vula swilo leswi, kutani a languta etilweni a ku: “Tatana, nkarhi se wu fikile. Vangamisa n’wana wa wena leswaku a ta ku vangamisa,+ 2 hilaha u n’wi nyikeke hakona matimba yo fuma vanhu hinkwavo,+ leswaku hinkwavo lava u n’wi nyikeke vona+ a ta va nyika vutomi lebyi nga heriki.+ 3 Va ta kuma vutomi lebyi nga heriki+ loko va ya emahlweni va kuma vutivi hi wena Xikwembu xi ri xin’we xa ntiyiso+ na Yesu Kreste loyi u n’wi rhumeke.+ 4 Ndzi ku dzunisile emisaveni+ hi ku heta ntirho lowu u ndzi nyikeke wona.+ 5 Tatana, ndzi nyike xikhundlha lexi a ndzi ri na xona etlhelo ka wena misava yi nga si va kona.+

6 “Vanhu lava u ndzi nyikeke vona emisaveni ndzi va tivise vito ra wena.+ A va ri va wena kambe u ndzi nyike vona naswona va yingise rito ra wena. 7 Se va swi tiva leswaku swilo hinkwaswo leswi u ndzi nyikeke swona swi huma eka wena; 8 hikuva ndzi va byele leswi u ndzi leriseke swona+ naswona va swi yingisile kutani va swi tivile leswaku ndzi tile tanihi muyimeri wa wena+ va tlhela va tshemba leswaku u ndzi rhumile.+ 9 Ndza va khongelela; kambe a ndzi khongeleli misava, ndzi khongelela lava u ndzi nyikeke vona hikuva i va wena; 10 naswona hinkwaswo leswi ndzi nga na swona i swa wena+ ni leswi u nga na swona i swa mina naswona ndzi vangamisiwile exikarhi ka vona.

11 “A ndza ha ri emisaveni kambe vona va le misaveni+ naswona ndzi tlhelela eka wena. Tatana loyi a Kwetsimaka, va sirhelele+ hikwalaho ka vito ra wena leri u ndzi nyikeke rona, leswaku va va ni vun’we ku fana na mina na wena.+ 12 Loko ndza ha ri na vona ndzi va sirhelerile+ hikwalaho ka vito ra wena leri u ndzi nyikeke rona; lerova ku hava ni un’we wa vona loyi a lovisiweke+ handle ka loyi a nga ta lovisiwa,+ leswaku ku endleka leswi tsalwa ri swi vuleke.+ 13 Kambe sweswi ndzi ta eka wena naswona swilo leswi ndzi swi vula ndza ha ri laha misaveni leswaku va ta tsaka swinene ku fana na mina.+ 14 Ndzi va dyondzise rito ra wena kambe misava yi va vengile, hileswi va nga riki xiphemu xa misava,+ ku fana na mina ndzi nga riki xiphemu xa misava.

15 “A ndzi kombeli leswaku u va susa emisaveni, kambe ndzi kombela u va sirhelela eka lowo homboloka.+ 16 A hi xiphemu xa misava,+ tanihi leswi na mina ndzi nga riki xiphemu xa misava.+ 17 Va kwetsimise* hi ntiyiso;+ rito ra wena i ntiyiso.+ 18 Leswi u ndzi rhumeke emisaveni, na mina ndzi va rhuma emisaveni.+ 19 Ndza tikwetsimisa hikwalaho ka vona, leswaku ntiyiso wu ta va kwetsimisa na vona.

20 “A ndzi khongeleli vona ntsena, kambe ndzi khongelela ni hinkwavo lava nga ta va ni ripfumelo eka mina endzhaku ko yingisela leswi va nga ta va dyondzisa swona, 21 leswaku hinkwavo va va ni vun’we,+ ku fana ni leswi wena Tatana, u nga ni vun’we na mina ni leswi mina ndzi nga ni vun’we na wena,+ leswaku na vona va va ni vun’we na hina, leswaku misava yi ta tshemba leswaku u ndzi rhumile. 22 Ndzi va endle va xiximeka hilaha na wena u endleke hakona eka mina leswaku va va ni vun’we ku fana ni leswi mina na wena hi nga ni vun’we.+ 23 Ndzi ni vun’we na vona na wena u ni vun’we na mina, leswaku va ta va ni vun’we hilaha ku heleleke, leswaku misava yi ta swi tiva leswaku u ndzi rhumile ni leswaku u va rhandzile hilaha u ndzi rhandzeke hakona. 24 Tatana, ndzi lava leswaku lava u ndzi nyikeke vona va va na mina laha ndzi nga kona,+ leswaku va ta vona ku vangama loku u ndzi nyikeke kona, hikuva u ndzi rhandzile misava yi nga si va kona.+ 25 Tatana loyi a lulameke, misava a yi ku tivi+ kambe mina ndza ku tiva+ naswona lava se va swi tiva leswaku u ndzi rhumile. 26 Ndzi va tivise vito ra wena naswona ndzi ta ya emahlweni ndzi ri tivisa,+ leswaku va rhandza van’wana hi ndlela leyi u ndzi rhandzeke ha yona leswaku mina na vona hi va ni vun’we.”+